အခန်း ၂၇၄
Vol. 28 Ch. 274
ပြိုင်ဘက်ကင်း အင်ပါယာ။ အပိုင်း ၂၇၄
ဘာသာပြန် - Ko Yoohtoo
True Immortal Team
ရံဖန်ရံခါ၌ ကောင်းမွန်သည့် အကြံဉာဏ်တစ်ခုမှာ သတိမမူမိဘဲ လွတ်သွားတတ်ပြီး အတွေးအခေါ်များကို ပြောင်းလဲရန် ခဲယဉ်းနေတတ်သည်။
သို့သော် အနည်းငယ်မျှသော လှုံ့ဆော်မှု သို့မဟုတ် သတိပေးမှုတစ်ခု ရလိုက်သည်နှင့် တစ်ပြိုင်နက် လူသည် ချက်ချင်းပင် ဉာဏ်အလင်းပွင့်သွားတတ်၏။
အထဲမှာရှိနေသူက တွေဝေပြီး အပြင်ကကြည့်သူက မြင်သာသည်ဟူသည့် စကားပုံကဲ့သို့ပင် ဖြစ်သည်။
လင်းချန်၏ အခြေအနေမှာလည်း ထိုသို့ပင် ဖြစ်၏။
အကယ်၍သာ ယီစင်း၏ သတိပေးမှု မရှိပါက စိတ်ဝိညာဉ်သလင်းကျောက်များ ရောင်းချနိုင်မည့် ဟွာရှာအင်ပါယာ၏ ထုတ်ကုန်ပစ္စည်းများကို သတိမမူဘဲ ကျော်လွန်သွားမိပေလိမ့်မည်။
သို့သော်လည်း လင်းချန်သည် လက်ရှိအချိန်၌ ထိုကိစ္စများကို ကိုင်တွယ်ရန် အချိန်မရသေးပေ။
အဘယ်ကြောင့်ဆိုသော် သူသည် ကျန်းထျန်ရှင်းနှင့် ကျိုးယီအန်တို့အား ပေးထားသည့် ကတိအတိုင်း ကျန်းဇီတဲနှင့် လီယွမ်ဖုန်းတို့၏ အစွမ်းများကို မြှင့်တင်ပေးရန် တာဝန်ရှိနေသောကြောင့် ဖြစ်၏။
သူတို့နှစ်ဦးသာမက ကျန်းဝမ်ရွှမ်းသည်လည်း လင်းချန်၏ ရှေ့၌ ပြုံးစိစိဖြင့် ရပ်နေသည်။
သူမသည် လင်းချန်အတွက် လက်ရေးမူ မိတ္တူပေါင်း နှစ်သောင်းခန့်ကို လက်ဆောင်အဖြစ် ယူဆောင်လာပြီး လင်းချန်၏ လမ်းညွှန်မှုအောက်၌ သူမ၏ အစွမ်းများကို မြှင့်တင်လိုသည့် ဆန္ဒရှိနေ၏။
လင်းချန်၏ ဇဝေဇဝါဖြစ်နေသည့် အကြည့်ကို မြင်သောအခါ ကျန်းချီက ရှင်းပြလာ၏။
ကျန်းဝမ်ရွှမ်းအား လင်းချန်ထံ၌ လေ့ကျင့်ခွင့်ရရှိစေရန် အနောက်ပိုင်းဌာနခွဲ၏ အကြီးအကဲအား ထိုမျှလောက်သော တန်ဖိုးကို ပေးဆောင်စေရန် သူကိုယ်တိုင်ပင် ဖျောင်းဖျပေးခြင်း ဖြစ်ကြောင်း ရှင်းပြသည်။
ထို့ကြောင့်ပင် ရှေးဟောင်းလူသားမျိုးနွယ်စု အမွေအနှစ်နယ်မြေ အခမ်းအနား မစတင်မီအထိ လင်းချန်၏ နေအိမ်မှာ လူစည်ကားနေတော့မည် ဖြစ်၏။ မည်သို့ပင်ဆိုစေကာမူ သူတို့၏ ပူဇော်သက္ကာရပစ္စည်းများကို လက်ခံရရှိထားပြီးဖြစ်ရာ လင်းချန်အနေဖြင့် ကတိအတိုင်း လုပ်ဆောင်ပေးရပေမည်။
ယီစင်းမှာမူ ဟွာရှာအင်ပါယာ၏ ဧကရီဖြစ်သည့်အလျောက် အမတ်ချုပ် ကျူးကော့မင်က သူမအတွက် သီးသန့် ကျင့်စဉ်နှင့် ဆေးရည်များကို ဖော်စပ်ပေးထားပြီးဖြစ်ရာ သူမဘာသာကြိုးစားအားထုတ်ရန်သာ လိုအပ်သည်။
ကျန်းချီမှာလည်း လင်းချန်၏ စောင့်ရှောက်မှုကို ရရှိထားပြီးဖြစ်၍ အဆင့်လိုက် လေ့ကျင့်သွားမည်ဆိုပါက အခြားပြဿနာရှိမည် မဟုတ်ချေ။
ထိုအချိန်၌ လင်းချန်သည် သူ၏ လက်ထဲမှ စက္ကူကတ်အမြောက်အမြားကို ထုတ်ယူလိုက်၏။
ထို့နောက် စိတ်ဝိညာဉ်စွမ်းအင်များ ထည့်သွင်းပြီး လီယွမ်ဖုန်း၊ ကျန်းဇီတဲနှင့် ကျန်းဝမ်ရွှမ်းတို့အား ပေးအပ်လိုက်ကာ ခန္ဓာကိုယ် အစိတ်အပိုင်းအသီးသီး၌ ကပ်ထားရန် ညွှန်ကြားလိုက်သည်။
သူတို့သုံးဦးမှာ ထိုထူးဆန်းသည့် စက္ကူကတ်ပြားများကို ဇဝေဇဝါဖြင့် ကပ်ပြီးသောအခါ လင်းချန်က တည်ကြည်လေးနက်စွာ ပြောလိုက်သည်။
“မင်းတို့ သုံးယောက်လုံး စုပေါင်းပြီး ငါ့ကို အင်အားအပြည့်နဲ့ တိုက်ခိုက်ကြစမ်း။”
လင်းချန်၏ တောင်းဆိုမှုကို ကြားလိုက်ရချိန်၌ သုံးဦးလုံးမှာ တစ်ပြိုင်နက်တည်း မှင်သက်သွားကြပြီး လီယွမ်ဖုန်းက အရင်ဆုံး ပြောလိုက်၏။
“ဒါက နည်းနည်းတော့ မသင့်တော်ဘူး ထင်တယ်။”
လင်းချန်က ပြန်ပြောလိုက်သည်။
“ရပါတယ်... ငါ ကျန်းထျန်ရှင်းကို ဒီနေရာကို အားဖြည့်ခိုင်းထားပြီးသား။ လေ့ကျင့်ရေးကွင်းထဲက တိုက်ပွဲအစီအရင်ကို အသက်သွင်းလိုက်ရင် အပြင်းအထန် တိုက်ခိုက်ရင်တောင် ပျက်စီးသွားမှာ မဟုတ်ဘူး။”
လင်းချန်၏ စကားကြောင့် ကျန်းဇီတဲက သက်ပြင်းချလိုက်သည်။
“ညီအစ်ကိုလင်း... ငါတို့ မင်းရဲ့ ကြောက်မက်ဖွယ်ကောင်းတဲ့ တိုက်ခိုက်ရေးစွမ်းရည်ကို မြင်ဖူးပါတယ်။ တစ်ယောက်ချင်းဆိုရင် မင်း ငါတို့ကို နိုင်ကောင်း နိုင်လိမ့်မယ်။ ဒါပေမဲ့ ငါတို့ သုံးယောက်က မင်းတစ်ယောက်တည်းကို ပြိုင်တူတိုက်မယ်ဆိုရင်တော့ ရလဒ်က ရှင်းနေတာပဲ မဟုတ်လား။”
လေ့ကျင့်ရေးကွင်းအတွင်း၌ လင်းချန်က ဘာမှ ထပ်မပြောတော့ဘဲ သူ၏ ခန္ဓာကိုယ်မှ စိတ်ဝိညာဉ်စွမ်းအင်များကို ပေါက်ကွဲထွက်စေလိုက်သည်။
သူ၏ မျက်ဝန်းများမှာ ထက်မြက်လာပြီး ဘယ်ဘက်ခြမ်းမှ ရွှေနီရောင် မိုးကြိုးစိတ်ဝိညာဉ်စွမ်းအင်နှင့် ညာဘက်ခြမ်းမှ ပင်လယ်ရေများကိုပင် ခဲသွားစေနိုင်သည့် နှင်းတောင်ရေခဲစိတ်ဝိညာဉ်စွမ်းအင်တို့ကို ထုတ်လွှတ်လိုက်၏။
သိုင်းဝိညာဉ်အသွင်ပြောင်းခြင်း။
စိတ်ဝိညာဉ်စွမ်းအင် နှစ်မျိုးလုံးနှင့်အတူ လင်းချန်သည် လက်တစ်ဖက်စီ၌ စိတ်ဝိညာဉ်လက်နက်တစ်ခုစီကို ကိုင်ဆောင်လိုက်သည်။
ဘယ်ဘက်လက်၌ မိုးကြိုးလျှပ်စီးဓားနှင့် ညာဘက်လက်၌ တိမ်တိုက်ဓားတို့ပင် ဖြစ်၏။
လီယွမ်ဖုန်း၏ မျက်လုံးများမှာ တုန်လှုပ်မှုကြောင့် ပြူးကျယ်သွားရကာ မယုံကြည်နိုင်စွာ အော်ဟစ်လိုက်၏။
“သိုင်းဝိညာဉ်... သိုင်းဝိညာဉ် နှစ်ခုလား။”
ဘေးနားရှိ ကျန်းဇီတဲနှင့် ကျန်းဝမ်ရွှမ်းတို့မှာလည်း အံ့ဩမှင်သက်သွားကြသည်။
ဓားအစုံကို ကိုင်ဆောင်ထားရင်း လင်းချန်သည် သူ၏ ရှေ့မှ သုံးဦးအား စနောက်သည့် အပြုံးဖြင့် ကြည့်လိုက်၏။ သူ၏ လေသံမှာ အလွန်ပင် စိန်ခေါ်မှု ပြင်းထန်လှသည်။
“ငါ့ရဲ့ သိုင်းဝိညာဉ်ရဲ့ အထူးစွမ်းရည်က အားဖြည့်ပေးတာပဲ။ မိုးကြိုးစိတ်ဝိညာဉ်စွမ်းအင်က ခန္ဓာကိုယ်ခွန်အားကို ငါးဆမြှင့်တင်ပေးပြီး နှင်းတောင်ရေခဲစိတ်ဝိညာဉ်စွမ်းအင်က စိတ်ဝိညာဉ်စွမ်းအားကို ငါးဆမြှင့်တင်ပေးတယ်။ ဒါ့အပြင် ငါ့မှာ တတိယမြောက် စိတ်ဝိညာဉ်စွမ်းအင် အမျိုးအစားလည်း ရှိသေးတယ်။”
“စိတ်ဝိညာဉ်နှစ်ခုလုံးကို အသုံးပြုထားတဲ့ အခြေအနေမှာတောင် မင်းတို့ သုံးယောက်လုံး စုပေါင်းတိုက်ရင် ငါ့ကို အနိုင်ရဖို့ အခွင့်အရေး မရှိဘူး။ ငါ့ရဲ့ တတိယမြောက် စိတ်ဝိညာဉ်စွမ်းအင်ကို ထုတ်သုံးရအောင်တောင် မင်းတို့ လုပ်နိုင်မှာ မဟုတ်ဘူး။”
လီယွမ်ဖုန်းသည် တိုက်ပွဲကို ရူးသွပ်သူဖြစ်သည့်အတိုင်း လင်းချန်၏ စိန်ခေါ်မှုကို မအောင့်အီးနိုင်တော့ဘဲ ရယ်မောလိုက်သည်။
“ဟားဟား... ဒါက တကယ့်ကို စိတ်ဝင်စားစရာပဲ။ ညီအစ်ကိုလင်း... မင်းကတော့ တကယ့်ကို မောက်မာလွန်းတာပဲ။”
ထို့နောက် သူ၏ စိတ်ဝိညာဉ်စွမ်းအင်များကို အထွတ်အထိပ်သို့ ထုတ်ဖော်လိုက်၏။ ချက်ချင်းပင် စိတ်ဝိညာဉ်လက်နက်ဖြစ်သည့် ရွှေရောင်ဓားကို ကိုင်ဆောင်ကာ ရှေ့သို့ ပြေးဝင်တိုက်ခိုက်လိုက်သည်။
ကျန်းဇီတဲသည်လည်း အော်ဟစ်လိုက်သည်။
“တတိယမြောက် စိတ်ဝိညာဉ်စွမ်းအင်ကို သုံးဖို့ မပြောနဲ့ဦး။ မင်းကို နိုင်ဖို့က ပြဿနာ မဟုတ်ဘူး။”
ပြောပြီးသည်နှင့် လီယွမ်ဖုန်း၏ နောက်မှနေ၍ လင်းချန်ထံသို့ ပြေးဝင်သွား၏။ တစ်ချိန်တည်းမှာပင် ကျန်းဝမ်ရွှမ်းသည်လည်း ကွင်းအတွင်းသို့ ဝင်ရောက်ကာ လင်းချန်အား စတင်တိုက်ခိုက်လိုက်သော်လည်း သူမ၏ နှလုံးသားထဲ၌မူ တုန်လှုပ်မှုများက စွဲကျန်နေဆဲပင် ဖြစ်သည်။
သူတို့သုံးဦး ကွင်းအတွင်းသို့ ဝင်ရောက်လိုက်သည်နှင့် အစီအရင်မှာ အသက်ဝင်လာပြီး ကျယ်ပြောလှသည့် နေရာတစ်ခုလုံးကို ဖုံးလွှမ်းသွား၏။
ချက်ချင်းဆိုသလိုပင် စိတ်ဝိညာဉ်စွမ်းအင်များ ပေါက်ကွဲထွက်လာပြီး အစီအရင်ဖြင့် စုစည်းထားသည့် ပင်လယ်ရေများမှာ လှိုင်းထန်ကာ ဗြောင်းဆန်သွားသည်။ လူလေးဦး၏ ပုံရိပ်များမှာ ရောယှက်သွားပြီး အဆက်မပြတ် ပေါက်ကွဲသံကြီးများ ထွက်ပေါ်လာ၏။
လီယွမ်ဖုန်းနှင့် ကျန်းဇီတဲတို့မှာ အမှန်တကယ်ပင် ပါရမီရှင်များ ဖြစ်ကြပြီး ကျန်းဝမ်ရွှမ်းမှာလည်း သူတို့ထက် အားနည်းသူ မဟုတ်ပေ။
ဤသုံးဦး၏ စုပေါင်းတိုက်ခိုက်မှုဒဏ်ကို ခံယူနေရစဉ် လင်းချန်မှာ သိုင်းဝိညာဉ် နှစ်ခုလုံးကို အသက်သွင်းထားသော်ငြား ရုန်းကန်နေရသည်။
အကယ်၍ ယခင်က လေချန်တို့အဖွဲ့ကို ရင်ဆိုင်ခဲ့ရသည့် အခက်အခဲအဆင့်ကို ၁ ဟု သတ်မှတ်ပါက ယခု လီယွမ်ဖုန်း၊ ကျန်းဇီတဲနှင့် ကျန်းဝမ်ရွှမ်းတို့ကို တစ်ပြိုင်နက်တည်း ရင်ဆိုင်ရသည့် အခက်အခဲမှာ ၁၀၀၀ အထိ မြင့်တက်သွားပြီ ဖြစ်၏။
တဖြည်းဖြည်းနှင့် လင်းချန်မှာ ဖိနှိပ်ခံလာရ၏။ ဤသည်မှာ ယခင်က တစ်ခါမျှ မကြုံဖူးသည့် အခြေအနေပင် ဖြစ်သည်။
ခဏတာ လူခွဲလိုက်ပြီးနောက် လင်းချန်က ရှေ့မှ သုံးဦးကို ကြည့်ကာ အံ့ဩသွားသည်။
“ဗိုလ်လုပွဲတုန်းက မင်းတို့ အစွမ်းကုန် မထုတ်ခဲ့ကြဘူးပဲ။”
လီယွမ်ဖုန်းက ပြုံးလိုက်သည်။
“ဒါပေါ့... ဝှက်ဖဲတစ်ခုခုကို အမြဲချန်ထားရတာ ထုံးစံပဲလေ။ အခုတောင် ငါ အစွမ်းကုန် မထုတ်ရသေးဘူး။”
စကားအဆုံး၌ သူ၏ စိတ်ဝိညာဉ်စွမ်းအင်မှာ ထပ်မံ ပေါက်ကွဲထွက်လာပြီး ယခင်ကထက် နှစ်ဆကျော်မျှ မြင့်တက်သွား၏။
ဘေးနားရှိ ကျန်းဇီတဲသည်လည်း ခပ်တိုးတိုး ရယ်မောလိုက်သည်။ သူ၏ လက်ရှစ်ဖက်၌ ကိုင်ဆောင်ထားသည့် လှံတိုလေးခုမှာ အပြောင်းအလဲများ ဖြစ်ပေါ်လာ၏။
လက်တစ်စုံမှာ လှံစွပ်များကို ကိုင်ထားဆဲ ဖြစ်သော်လည်း ကျန်လက်များ၌မူ လှံတိုတစ်စုံ၊ တုတ်တစ်စုံနှင့် ဒိုင်းငယ်နှစ်ခုကို တပ်ဆင်လိုက်သည်။ ဤသို့ ပြင်ဆင်လိုက်ခြင်းက သူ့အား တိုက်စစ်ရော ခံစစ်အတွက်ပါ အဆင်သင့် ဖြစ်သွားစေ၏။
သူတို့နှစ်ဦးသာမက ကျန်းဝမ်ရွှမ်း၏ အရှိန်အဝါမှာလည်း ပိုမိုအားကောင်းလာပြီး စိတ်ဝိညာဉ်စွမ်းအင် ပြင်းထန်မှုမှာ တဖြည်းဖြည်း မြင့်တက်လာသည်။
လီယွမ်ဖုန်းက ပြုံးလျက် အော်ဟစ်လိုက်သည်။
“ညီအစ်ကိုလင်း... အဆင်သင့် ပြင်ထားပေတော့။”
ထို့နောက် အရင်ဆုံး ပြေးဝင်လာကာ ကျန်နှစ်ဦးကလည်း လင်းချန်အား မတူညီသည့် လမ်းကြောင်းများမှနေ၍ ဝိုင်းဝန်း တိုက်ခိုက်ကြသည်။
ယင်းကို မြင်လိုက်ရသည့်အခါ လင်းချန်၏ မျက်လုံးများမှာ ကျုံ့သွားရပြီး အော်ဟစ်လိုက်၏။
“ကောင်းကင်ဧကရာဇ်ဝတ်ရုံ... နဂါးကိုးကောင် အကာအကွယ်။”
သူ၏ ဧကရာဇ်အမိန့်တော် စိတ်ဝိညာဉ်စွမ်းအင်များမှာ ချက်ချင်း ပေါက်ကွဲထွက်လာကာ တောက်ပလှသည့် ကောင်းကင်ဧကရာဇ်ဝတ်ရုံအဖြစ်သို့ ပေါင်းစည်းသွား၏။
တစ်ချိန်တည်းမှာပင် စိတ်ဝိညာဉ်စွမ်းအင်များဖြင့် ဖွဲ့စည်းထားသည့် မိုးကြိုးရွှေနဂါး သုံးကောင်၊ နှင်းတောင်ရေခဲ နဂါးဖြူ သုံးကောင်နှင့် နတ်နဂါးတစ်ကောင် အပါအဝင် နဂါးကိုးကောင်မှာ သူ၏ ခန္ဓာကိုယ်အား ဝိုင်းရံထား၏။
ပထမဆုံး ထိတွေ့မှုအပြီး၌ လင်းချန်သည် သူတို့နှင့် အင်အားချင်း မျှတနေသည်ကို တွေ့လိုက်ရ၏။ လင်းချန်၏ မျက်နှာပေါ်၌ အံ့ဩမှုနှင့်အတူ ဝမ်းမြောက်သည့် အရိပ်အယောင်များ ထွက်ပေါ်လာကာ ရေရွတ်လိုက်သည်။
“ဒီလို လေ့ကျင့်မှုမျိုးက တကယ်ကို ရှားပါးတယ်။”
စိတ်လှုပ်ရှားမှုများနှင့်အတူ လင်းချန်နှင့် အခြားသုံးဦးမှာ အပြင်းအထန် ဆက်လက် တိုက်ခိုက်နေကြ၏။
တစ်ချိန်တည်းမှာပင် သူတို့၏ တိုက်ခိုက်မှု အချက်အလက်များကို လင်းချန်က စုဆောင်းကာ အစွမ်းများကို မြှင့်တင်ပေးမည့် အစီအစဉ်တစ်ခု ရေးဆွဲနိုင်ရန် ဟွာရှာအင်ပါယာ၏ ကောင်းကင်လက်မှုပညာဌာနသို့ ပေးပို့လိုက်သည်။
လင်းချန်နှင့် အဖွဲ့သားများ ကျင့်ကြံနေကြစဉ်အတွင်း အခြားသော ပင်လယ်မျိုးနွယ်စုများနှင့် လူသားမျိုးနွယ်စုများမှာလည်း အလုပ်များနေကြပြီး သူတို့၏ တပည့်များနှင့် မျိုးနွယ်စုဝင်များသည် တောင်တန်းများအတွင်းရှိ ရှေးဟောင်းလူသားမျိုးနွယ်စု အမွေအနှစ်နယ်မြေသို့ စူးစမ်းရှာဖွေရန် အားသွန်ခွန်စိုက် ပြင်ဆင်နေကြ၏။
ထိုအချိန်၌ လက်ရှစ်ဖက်ပင်လယ်မျိုးနွယ်စု၏ စုရပ်ဖြစ်သည့် ကမ္ဘာငယ်လေးအတွင်း၌ ကျိုးယီအန်သည် ပင်လယ်ပြင်ထက်၌ ထူးဆန်းစွာ လွင့်မျောနေသည်။
သူ၏ ရှေ့၌ ငွေရောင်ဆံပင်များနှင့် လူတစ်ဦးမှာ ကျောပေးလျက် ရပ်နေပြီး ကျိုးယီအန်၏ သတင်းပို့ချက်များကို နားထောင်နေ၏။
ကျိုးယီအန်၏ သတင်းပို့ချက်အားလုံးမှာ လင်းချန်အကြောင်းကိုသာ အဓိကထားပြီး ယီစင်းအကြောင်းကိုလည်း အနည်းငယ် ထည့်သွင်းပြောဆိုသွားသည်။ ယီစင်းအကြောင်းကို ပြောရခြင်းမှာလည်း လင်းချန်နှင့် ဆက်နွှယ်နေသည့်အတွက်သာ ဖြစ်၏။
သတင်းပို့ပြီးနောက် ကျိုးယီအန်က စူးစမ်းစွာ မေးမြန်းလိုက်သည်။
“ဆရာ... သူ့ကို တွေ့ဖို့ အစီအစဉ် မရှိဘူးလား။”
ထိုပုဂ္ဂိုလ်ကြီး၏ ပုံရိပ်ယောင်က ခဏတာ စဉ်းစားပြီး တည်ငြိမ်စွာ မိန့်ကြားလိုက်သည်။
“ဒီကိစ္စကို အတင်းအကျပ် မလုပ်စေချင်ဘူး။ အချိန်တန်လို့ တွေ့ဆုံဖို့ အကြောင်းဖန်လာရင် သဘာဝအလျောက် တွေ့လိမ့်မယ်။ လောလောဆယ်တော့ သူ့ဘာသာသူ ရှိပါစေဦး။”
“နောက်နောင် ငါ့ကို ဆက်သွယ်ဖို့ မလိုဘူး။ သူ ဘေးကင်းတယ်ဆိုတာ သိရရင် လုံလောက်ပြီ။ တကယ်တော့ ငါတို့ အချင်းချင်း ဆက်သွယ်နေတာက တခြားသူတွေ သိသွားနိုင်တဲ့ အန္တရာယ်ရှိတယ်။ မင်း နားလည်တယ် မဟုတ်လား။”
ထိုကြီးကဲသူ၏ ညွှန်ကြားချက်ကို ကြားရသည့်အခါ ကျိုးယီအန်က အကြိမ်ကြိမ် ခေါင်းညိတ်ပြလျက် နားလည်ကြောင်း အချက်ပြလိုက်၏။
ထို့နောက် ကျိုးယီအန်၏ ရှေ့မှောက်ရှိ ပုံရိပ်ယောင်မှာ တဖြည်းဖြည်း မှေးမှိန်ပျောက်ကွယ်သွားပြီး နောက်ဆုံး၌ သူ၏ မြင်ကွင်းထဲမှ လုံးဝ ကွယ်ပျောက်သွားသည်။
ထိုပုံရိပ်ယောင် ပျောက်ကွယ်သွားသည်ကို မြင်ရမှသာ ကျိုးယီအန်၏ တင်းမာနေသည့် မျက်နှာမှာ ပြေလျော့သွားပြီး ဝမ်းသာရိပ်များပင် ထွက်ပေါ်လာသည်။
ရှေ့မှောက်ရှိ ဟင်းလင်းပြင်ကို ကြည့်ရင်း ကျိုးယီအန်က သက်ပြင်းချလျက် တိုးတိုးလေး ရေရွတ်လိုက်သည်။
“နောင်တစ်ချိန်မှာ... သခင်လေးရဲ့ အကူအညီနဲ့ ဆရာ့အနားကို ပြန်ရောက်ကောင်း ရောက်လိမ့်မယ်။”
အကယ်၍ ဤနေရာ၌ တစ်စုံတစ်ယောက်သာ ရှိနေပါက အင်အားကြီးလှသည့် နှောင်ကြိုးမဲ့ဂိုဏ်း၏ ဂိုဏ်းချုပ်ကြီး ကျိုးယီအန်မှာ တစ်စုံတစ်ယောက်၏ အစေခံတစ်ဦးကဲ့သို့ ရိုသေကိုင်းရှိုင်းနေသည်ကို မြင်လျှင် အလွန်အမင်း အံ့အားသင့်သွားကြပေလိမ့်မည်။
ဤသတင်းသာ လူသိရှင်ကြား ပေါက်ကြားသွားပါက တောင်ပိုင်းဒေသတစ်ခုလုံးကို လှုပ်ခတ်သွားစေနိုင်လောက်သည့် သတင်းထူးကြီး ဖြစ်လာပေလိမ့်မည်။
ပုံရိပ်ယောင်နှင့် တွေ့ဆုံမှု ပြီးဆုံးပြီး ကျိုးယီအန်သည် ပင်လယ်အတွင်းသို့ ပြန်လည် ငုပ်လျှိုးသွားကာ ဧရာမ သန္တာကျွန်းကြီးဆီသို့ ပြန်သွား၏။
လက်ရှစ်ဖက်ပင်လယ်မျိုးနွယ်စု၏ မျိုးနွယ်စု အစည်းအဝေးမှာ ကျင်းပနေဆဲဖြစ်ပြီး ပြိုင်ပွဲသုံးခုမှာလည်း မပြီးဆုံးသေးသဖြင့် သူကိုယ်တိုင် ကြီးကြပ်ကွပ်ကဲရန် လိုအပ်နေသေးသောကြောင့် ဖြစ်သည်။
လင်းချန်ဘက်၌မူ အစွမ်းများကို မြှင့်တင်ပေးမည့် လေ့ကျင့်ရေး အစီအစဉ်မှာ အရှိန်အဟုန်ဖြင့် ဆက်လက် တိုးတက်နေ၏။
ပြိုင်ဘက်ကင်း အင်ပါယာ။ အပိုင်း ၂၇၄ ပြီး။
ဘာသာပြန် - Ko Yoohtoo
True Immortal Team