အခန်း ၇၄

အခန်း (၇၄) ငါ့ကို ရှင်းပြချက်ပေးခိုင်းလိုက်

" မတောင်းပန်သေးရင် ညာဘက်ခြေထောက်ကို ချိုးလိုက်။ သူမတောင်းပန်သေးဘူးဆိုရင် လက်မောင်းကို ချိုးလိုက်မယ်။ ဘာပဲဖြစ်ဖြစ် လူတစ်ယောက်မှာအစိတ်အပိုင်းတွေ အများကြီး ရှိတာပဲ။"

ဆုရှင်း၏စကားများက သန်မာသောအမျိုးသား လျို၏ နားထဲတွင် ပဲ့တင်ထပ်နေ၏။ သူမ၏ရှေ့ရှိ ချောမောသော လူငယ်လေးကိုကြည့်ရင်း ၎င်းက နတ်ဆိုး တစ်ကောင်နှင့် မကွာခြားကြောင်း သူ ခံစားလိုက်ရသည်။

ရက်စက်သည်ဟု လူတိုင်းကပြောနေကြသော လင်းယုန်ပျံဂိုဏ်းမှ ဆုရှင်းကို ယခု သူကိုယ်တိုင် မျက်မြင်တွေ့လိုက်ရလေပြီ။ ထို့အတူ သူ၏ဘဝတစ်သက်တာလုံးတွင် နောက်တစ်ကြိမ်မမြင်ရရန် သူ ပိုဆန္ဒရှိနေတော့သည်။

ဆုရှင်း၏အမိန့်အရ ဂိုဏ်းဝင်အနည်းငယ်က ချက်ချင်းရှေ့သို့ ပြေးထွက်လာကာ ဆုရှင်း လက်ညှိုးထိုးပြထားသော လူကို မြေပြင်ပေါ်သို့ ဖိချလိုက်ပြီး ၎င်း၏အော်ဟစ်သံများကို လျစ်လျူရှုကာ သူတို့၏သံတုတ်တိုများကို ဆွဲထုတ်ကာ သူ၏ ခြေထောက်တစ်ဖက်ကို ရိုက်ချိုးလိုက်ကြ၏။

လင်းယုန်ပျံဂိုဏ်းက ယခုအခါ ၎င်း၏အောက်ခြေအဆင့် အဖွဲ့ဝင်များ အားလုံး၏လက်နက်ကို ဤသံတုတ်တိုများအဖြစ်ပြောင်းလဲလိုက်ပြီး ၎င်းတို့က ခွေးရိုက်တုတ်သိုင်း၏သေစေနိုင်စွမ်းကို ထုတ်လွှတ်ပေးနိုင်သည်။ သူတို့က ပြောင်းလွယ်ပြင်လွယ်မှုဆုံးရှုံးသွားပြီး ပိတ်လှောင်ခြင်း နည်းစနစ် မှာ အခြေခံအားဖြင့် အသုံးမဝင်တော့သော်လည်း၊ ထိုးခြင်းနှင့် စိုက်ခြင်းကဲ့သို့သော တိုက်ခိုက်မှုများတွင် ပိုမိုသေစေနိုင်စွမ်းရှိလာခဲ့သည်။

ဤသံတုတ်တိုမှာ ပေါင်ဆယ်ချီသောအလေးချိန်ရှိ၏။ လှုပ်ရှားခဲ့သော ဂိုဏ်းဝင်က ဂိုဏ်းချုပ်ရှေ့တွင်ကြွားဝါချင်သဖြင့် သူက သနားညှာတာမှု ကင်းမဲ့စွာဖြင့် ကျန်းရန် ဂိုဏ်း အဖွဲ့ဝင်၏ဘယ်ဘက် ခြေထောက်ကို ထူးဆန်းသောပုံသဏ္ဍာန်ဖြစ်အောင် ရိုက်ချိုးလိုက်ရာ ထိုသူကို နာကျင်မှုကြောင့် အူသံပေးကာမြေပြင်ပေါ်တွင် လဲကျသွားစေခဲ့သည်။

"မင်း တောင်းပန်မှာလား။" ဆုရှင်းက တည်ငြိမ်စွာ မေးလိုက်၏။

ဝဝကစ်ကစ်ကောင်လေးမှာ ကြောက်လန့်တကြား ဖြူလျော့သွားသော်လည်း ခေါင်းမာစွာဖြင့် ခေါင်းယမ်းလိုက်ဆဲပင်။

"မတောင်းပန်ဘူးပေါ့ အရမ်းကောင်းတယ်။ မင်းရဲ့ လက်အောက်ငယ်သားတွေ ဒီလိုအရိုက်ခံရတာကို မင်း သည်းခံနိုင်သေးတာပဲ။ ကျွတ် ကျွတ်။ ဒီလောက် ငယ်ငယ်ရွယ်ရွယ်နဲ့ ခေါင်းမာတဲ့ နှလုံးသား၊ ရက်စက်တဲ့ သူရဲကောင်းတစ်ယောက်ရဲ့ အမူအကျင့်ပဲ။"

ဆုရှင်း လှည့်ကာ ပြောလိုက်သည်။ "ဆက်ရိုက်။"

အပြစ်ပေးမှုကိုလုပ်ဆောင်နေသော ဂိုဏ်းဝင်က ချက်ချင်းရိုက်နှက်လိုက်ရာ ကျန်းရန် ဂိုဏ်း အဖွဲ့ဝင်၏ခြေလက် လေးဖက်စလုံးကို ဆက်တိုက် ရိုက်ချိုးပစ်လိုက်၏။ နောက်ဆုံးတွင် သူက အဖွဲ့ဝင်၏ ပဉ္စမမြောက်ခြေလက်ထဲမှ သုံးခုမြောက်ခြေထောက်ကို မကောင်းဆိုးဝါးဆန်စွာ ရိုက်ချလိုက်ရာ သူ့ကို နာကျင်မှုကြောင့် သတိလစ်သွားစေခဲ့သည်။

"မင်း မတောင်းပန်သေးဘူးလား။"

ဆုရှင်းက ဝဝကစ်ကစ်ကောင်လေးကို ဘေးတစောင်းကြည့်လိုက်ရာ သူ ကြောက်နေပြီဖြစ်ကြောင်း နောက်ဆုံးတွင် သတိပြုမိသွား၏။

ကံမကောင်းစွာဖြင့် ဆုရှင်းက သူ့ကိုအခွင့်အရေး မပေးဘဲ တိုက်ရိုက်ပြောလိုက်သည်။ "မတောင်းပန်ရင်လည်း ရပါတယ်။ လူသုံးယောက် ကျန်သေးတယ်။ အချိန်တွေ အများကြီး ရှိပါသေးတယ်။"

အပြစ်ပေးမှုကို ယခုလေးတင် လုပ်ဆောင်ခဲ့သော ဂိုဏ်းဝင်များမှာ ဉာဏ်ရည်ထက်မြက်ကြ၏။ ဆုရှင်း ဤသို့ပြောသည်ကို ကြားသည်နှင့် သူတို့က နောက်ထပ် ကျန်းရန် ဂိုဏ်း အဖွဲ့ဝင် တစ်ဦးကို မြေပြင်ပေါ်သို့ ချက်ချင်း ဖိချလိုက်ပြီး သူ၏အရိုးအဆစ် အားလုံးကို တစ်ခုပြီးတစ်ခု ရိုက်ချိုးလိုက်ကြသည်။

အရိုးများ အက်ကွဲသွားသည့် အသံက လူတိုင်း၏ ကျောရိုးတစ်လျှောက် ကြက်သီးမွေးညင်း ထသွားစေခဲ့၏။

သန်မာသောအမျိုးသား လျို နှင့် ကျန်ရှိနေသော ဂိုဏ်းဝင်တို့၏နဖူးများတွင် ချွေးအေးများက သူတို့၏ နားထင်မှ မိုးပေါက်များကဲ့သို့ စီးကျလာခဲ့သည်။

*ဒီဘိုးဘေးလေးမတောင်းပန်ရင်၊ စောစောဖြစ်ဖြစ် နောက်ကျဖြစ်ဖြစ် သူတို့အကုန်လုံး ဒီနတ်ဆိုးဆီမှာ ဒုက္ခိတတွေ ဖြစ်သွားတော့မှာပဲ*

အဆက်မပြတ် အော်ဟစ်သံများနှင့် ဂိုဏ်းဝင် နှစ်ဦး၏သနားစရာကောင်းသော အခြေအနေများက ဝဝကစ်ကစ်ကောင်လေးကို ရူးသွပ်သွားစေပြီး သူ၏ကြောက်ရွံ့မှုမှာ ပိုမို ကြီးထွားလာကာ နောက်ဆုံးတွင် သူ အော်ငိုလိုက်တော့၏။

မည်သို့ပင်ဆိုစေ သူ၏ဖခင်မှာ သိုင်းလောကမှ လူတစ်ဦး ဖြစ်ပြီး ယခင်က သိုင်းလောကအကြောင်း ထူးဆန်းပြီး အံ့သြဖွယ်ကောင်းသော ဇာတ်လမ်းများစွာကို သူ့အား ပြောပြခဲ့ဖူးသည်။ ဤဆုရှင်းက သိုင်းလောက ဒဏ္ဍာရီများထဲမှ အဆိုးရွားဆုံးသော မိစ္ဆာခေါင်းဆောင်များထဲမှ တစ်ဦးကဲ့သို့ ရိုးရိုးရှင်းရှင်းပင် သွေးအေးပြီး ရက်စက်လွန်းလှသည်။

"ကျွန်တော်... ကျွန်တော် တောင်းပန်ပါတယ်။ ဟင့် ...ဟင့် ကျွန်တော် မှားသွားပါတယ်။"

ဝဝကစ်ကစ် ကောင်လေး၏ငိုသံများက သန်မာသောအမျိုးသား လျို နှင့် အခြား ကျန်းရန် ဂိုဏ်း အဖွဲ့ဝင် တစ်ဦးအတွက် ကောင်းကင်ဘုံမှ ဂီတသံကဲ့သို့ ထွက်ပေါ်လာပြီး နေရာမှာတင် လဲကျသွားလုမတတ် ချက်ချင်းသက်သာရာရသွားစေခဲ့၏။

"ငါ့ကို တောင်းပန်ဖို့မဟုတ်ဘူး။ ရွှမ်းအာကို တောင်းပန်ဖို့။ တောင်းပန်လိုက်။" ဆုရှင်းက တည်ငြိမ်စွာ ပြောလိုက်သည်။

ဝဝကစ်ကစ် ကောင်လေးက ရွှမ်းအာကို အလျင်အမြန် အကြိမ်ကြိမ်တောင်းပန်လိုက်ရာ သူ အလွန်ကြောက်လန့်နေကြောင်း ရှင်းလင်းနေ၏။

"ကောင်းပြီ။ ဒီနှစ်ယောက်ကိုခေါ်ပြီး ဒီကနေ ထွက်သွားတော့။" ဆုရှင်းက လက်ဝှေ့ယမ်းလိုက်ရာ သန်မာသောအမျိုးသား လျို နှင့် အခြား ကျန်းရန် ဂိုဏ်း အဖွဲ့ဝင်တို့က ချက်ချင်း လူများကို တွဲကာ ထွက်သွားကြသည်။

သို့သော် ဤအချိန်တွင် ဆုရှင်းက တည်ငြိမ်စွာ ပြောလိုက်၏။ "ပြန်သွားပြီး မင်းတို့ရဲ့ဂိုဏ်းချုပ်ကို သတင်းစကားပါးလိုက်ပါ။ ပြီးတော့ ငါ့ကို ရှင်းပြချက်ပေးခိုင်းလိုက်။"

သန်မာသောအမျိုးသား လျို မှာ ပေါင်မုန့်လည်နင်သွားခဲ့၏။ "ဂိုဏ်းချုပ်ဆု ကိစ္စကပြီးသွားပြီ မဟုတ်ဘူးလား။ ခင်ဗျား ဘာရှင်းပြချက်လိုချင်လို့လဲ။"

ဆုရှင်းက အေးစက်စွာ ပြောလိုက်သည်။ "ဒီဝဝကစ်ကစ်ကောင်လေးက ငါ့ညီမကို အနိုင်ကျင့်တဲ့ ကိစ္စကပြီးသွားပြီ။ ဒါပေမဲ့ မင်းတို့ရဲ့ကျန်းရန် ဂိုဏ်းက ငါ့ကိုအကြောင်းတောင် မကြားဘဲ လင်းယုန်ပျံဂိုဏ်းရဲ့နယ်မြေမှာ လူတွေလာထားရဲတယ်။ ဒီကိစ္စက အဆုံးသတ်ဖို့ သိပ်မလွယ်ဘူး။"

သန်မာသောအမျိုးသား လျို၏ မျက်နှာမှာ ချက်ချင်း ဖြူလျော့သွားခဲ့၏။ ဤကိစ္စက ကြီးကျယ်သွားလေပြီ။

အခြားဘာကိစ္စမှမရှိပါက ဂိုဏ်းအသီးသီးမှ အဖွဲ့ဝင်များက အခြားဂိုဏ်းများ၏နယ်မြေများသို့ လှည့်လည်သွားလာလေ့ မရှိကြပေ။ အဘယ်ကြောင့်ဆိုသော် ထိုသို့ပြုလုပ်ခြင်းက သူတို့ကို တမင်တကာရန်စသည်ဟု ယူဆရသောကြောင့်ပင်။

အကယ်၍ အဆင့်နိမ့်ဂိုဏ်းဝင်များက အလုပ်ကိစ္စဖြင့် အပြင်ထွက်ခြင်း သို့မဟုတ် ဆွေမျိုးများထံ လည်ပတ်ခြင်းလုပ်ပါက၊ သူတို့လူအင်အားမှာနည်းပါးပြီး အာရုံစိုက်မှုကို မဆွဲဆောင်နိုင်သဖြင့် ပြဿနာဖြစ်မည် မဟုတ်ပေ။

သို့သော် သူတို့ကို ကျန်းရန် ဂိုဏ်း၏ ထိပ်တန်း ခေါင်းဆောင်က စေလွှတ်ခြင်းဆိုလျှင်တော့ ထိုအရာက ဇာတ်လမ်းတစ်ခု ဖြစ်သွားပြီဖြစ်သည်။

*မင်းရဲ့သားကို ငါ့နယ်မြေမှာ ထားခဲ့လို့ရပါတယ်။ ပြီးတော့ သူ့ကို နေ့တိုင်း သွားကြိုပို့ဖို့ တစ်ယောက်ယောက်ကို စေလွှတ်လို့ရပါတယ်။ ဒါပေမဲ့မင်း အနည်းဆုံးတော့ ငါ့ကို အသိပေးသင့်တယ်။ မဟုတ်ရင် မင်းငါ့ကို မလေးစားတာပဲ။*

တစ်ဖက်လူက ပြဿနာဖန်တီးချင်သည့်စိတ်အပေါ် မူတည်ပြီး ဤကိစ္စမျိုးက ကြီးကျယ်နိုင်သလို သေးငယ်သွားနိုင်ပါသည်။

ကျန်းရန် ဂိုဏ်း၏ ခေါင်းဆောင်ကြီး ကျန်းဟယ်က အစကတည်းက မှားယွင်းနေပြီး သူ၏သားက ဆုရှင်း၏ညီမကို အနိုင်ထပ်ကျင့်ခဲ့သေး၏။ ထို့အတူ သူ၏ လူများကလည်း လင်းယုန်ပျံဂိုဏ်း၏နယ်မြေတွင် မာနထောင်လွှားစွာ လျှောက်သွားနေကြသည်။

ဤအခြေအနေများအောက်တွင် ဆုရှင်းက သူ့ကို ပြဿနာမရှာပါက ထူးဆန်းနေပေလိမ့်မည်။

သန်မာသောအမျိုးသား လျိုက ဒုက္ခိတ နှစ်ဦးနှင့် ကလေးလေးဦးတို့နှင့်အတူ စိတ်ပျက်လက်ပျက် ထွက်သွားတော့သည်။ ဆုရှင်းက လက်ဝှေ့ယမ်းကာ အခြားသူများကိုလည်း လူစုခွဲရန် အချက်ပြလိုက်၏။

လူတိုင်းထွက်သွားပြီးနောက် ရွှမ်းအာက ဆုရှင်း၏လက်ကို ကိုင်ကာသနားစရာကောင်းသော အသံလေးဖြင့် ပြောလိုက်သည်။ "အစ်ကို တောင်းပန်ပါတယ်။"

ဆုရှင်းက အံ့အားသင့်စွာ မေးလိုက်၏။ "ဘာလို့ တောင်းပန်နေတာလဲ။"

"ဘာလို့လဲဆိုတော့ သမီးရန်ဖြစ်လို့ အစ်ကိုနဲ့ ပြဿနာတက်သွားတာလေ။" ရွှမ်းအာက သတိထားကာ ပြန်ဖြေလိုက်သည်။

ယနေ့မြင်ကွင်းက ဝဝကစ်ကစ်ကောင်လေးကို အလွန်ကြောက်လန့်သွားစေရုံသာမက ရွှမ်းအာကိုလည်း ထိတ်လန့်သွားစေခဲ့၏။

ဆုရှင်းက ယခင်က ဤရက်စက်မှုကို ရွှမ်းအာအား သိပ်မပြသခဲ့ဖူးသော်လည်း ယနေ့တွင် သူ ချွင်းချက်တစ်ခု ပြုလုပ်ခဲ့သည်။

သူ ရွှမ်းအာကို အမြဲတမ်းကာကွယ်ပေးမည်ဖြစ်သော်လည်း သိုင်းလောကက သစ္စာဖောက်တတ်ပြီး အဆသန်းပေါင်းများစွာပိုဆိုးရွားသော အရာများအချိန်မရွေးဖြစ်ပေါ်လာနိုင်၏။

ရွှမ်းအာကို တစ်ခုခုဖြစ်လာပါက အော်ဟစ်ဆူပူရုံသာတတ်နိုင်မည့်အလိုလိုက်ခံရသော အမျိုးသမီးငယ်လေးတစ်ဦးမဖြစ်စေချင်ပေ။ ထို့ကြောင့် သူက ရွှမ်းအာကိုသိုင်းပညာများသင်ကြားပေးခဲ့ပြီး ယနေ့ ဤမြင်ကွင်းကို မြင်တွေ့ခွင့် ပေးခဲ့ခြင်း ဖြစ်သည်။

ဆုရှင်းက ရွှမ်းအာ၏ခေါင်းကို ပွတ်သပ်ကာ လေးနက်သော အသံဖြင့် ပြောလိုက်၏။ "ရွှမ်းအာ ညီမလေး ဘာမှမမှားပါဘူး။ မှတ်ထား နောက်တစ်ခါ ဒီလိုမျိုးထပ်ကြုံလာရင် မကြောက်နဲ့ သူ့ကို ပြင်းပြင်းထန်ထန်ပြန်ရိုက်ပလိုက်။"

"တစ်ယောက်ယောက်က ကိုယ့်ကို စော်ကားလာရင် သူတို့ကို လက်သီးနဲ့ ထိုးပစ်။ တစ်ယောက်ယောက်က ကိုယ့်ကိုရိုက်လာရင် သူတို့ကိုပြန်ကန်ပစ်လိုက်။ ပြဿနာကို မကြောက်နဲ့ တစ်ခုခု ဖြစ်လာရင် ညီမလေးအစ်ကိုက ညီမလေးအတွက် ဒီမှာရှိနေတယ်။

ရွှမ်းအာ ခေါင်းညိတ်လိုက်ပြီး ဇဝေဇဝါ ဖြစ်နေပုံရ၏။

သူမ ငယ်ငယ်က တစ်ယောက်ယောက်က သူမကို အနိုင်ကျင့်လျှင် သူမ၏အစ်ကိုက ပြေးသွားပြီး သူတို့နှင့် ရန်ဖြစ်တတ်သည်။ တစ်ခါတလေ ခေါင်းများမှ သွေးများပင်ထွက်လာသည်ကို သူမမှတ်မိနေသေး၏။

ထို့ကြောင့် နောက်ပိုင်းတွင် သူမအရမ်းသတိထားလာပြီး သူမ၏ အစ်ကိုအား တစ်ယောက်ယောက်နှင့် ရန်မဖြစ်ရစေရန် ပြဿနာရှာဖို့အပြင်မထွက်တော့ပေ။။

သို့သော် ယခု သူမ၏အစ်ကိုတွင် လက်အောက်ငယ်သားအများအပြားရှိနေသဖြင့် သူက ရန်ပွဲများတွင် သူ့ကိုယ်သူနာကျင်အောင် လုပ်စရာ မလိုတော့ပေ။ ၎င်းက ရွှမ်းအာကို သက်သာရာ ရသွားစေခဲ့၏။

အနောက်မှနားထောင်နေသော ဟွမ်ပင်းချန်က မျက်နှာရှုံ့မဲ့ကာ ပြောလိုက်သည်။ "ဟေး ခေါင်းဆောင်။ ကလေးတစ်ယောက်ကို ဒီလိုပညာပေးတာက တကယ်အဆင်ပြေရဲ့လား။"

ဆုရှင်းက သူ့ကိုတစ်ချက်ကြည့်လိုက်၏။ "ဒါဆို ငါ သူမကိုဘာသင်ပေးရမလဲ။ ကြင်နာမှုဖြောင့်မတ်မှု။ ကိုယ်ကျင့်တရားလား။ အဲဒီအရာတွေကို မင်းကကောယုံလို့လား။"

"အာ သေချာတာပေါ့ ကျွန်တော်မယုံပါဘူး။" ဟွမ်ပင်းချန် အလျင်အမြန် ခေါင်းယမ်းလိုက်သည်။

သူတို့ကဲ့သို့လူများက သူတို့၏လိပ်ပြာကို ခွေးကျွေးမထားလျှင် ယခုလောက်ဆိုပါက အခြားလူများ၏ကစားခြင်းခံရကာ သေသွားလောက်လေပြီ။

"ဒါနဲ့ မင်းရဲ့လက်အောက်က ညီအစ်ကိုတွေကို အပြင်လူတွေ အထူးသဖြင့် သိုင်းပညာရှင်တွေကို ပိုသတိထားဖို့ပြောလိုက်ပါ။ ဒီတစ်ခါ ကျန်းရန် ဂိုဏ်း အဖွဲ့ဝင်အတော်များများက ငါတို့ နှာခေါင်းအောက်မှာ ဒီလောက်အချိန်အကြာကြီး ဝင်ထွက်သွားလာနေတာကို ငါတို့တောင်မသိခဲ့ကြဘူး။"

ဆုရှင်းက ယခင်က အခြားသူများ၏နယ်မြေများထံသို့ ခိုးဝင်ကာ လုပ်ကြံသတ်ဖြတ်မှုများပြုလုပ်ခဲ့ဖူးသော်လည်း အခြားသူများကိုတော့ သူ့အပေါ် ဤသို့လုပ်ဆောင်လာမည်ကို အလိုမရှိချေ။

ဟွမ်ပင်းချန် ခေါင်းညိတ်လိုက်၏။ တကယ်တမ်းတွင် ဤတစ်ကြိမ်တွင် လျှစ်ဟာမှုအတွက် သူ၏ဂိုဏ်းဝင်များကို အပြစ်တင်၍မရပေ။ ကျန်းရန်ဂိုဏ်း အဖွဲ့ဝင်များက ကျင်းယွဲ့ရပ်ကွက်တွင် အချိန်အတော်ကြာရှိနေခဲ့ပြီဖြစ်သည်။

ယခင်က ရှားဖေးယင်းက သူ၏ဂိုဏ်းဝင်များကို တင်းကျပ်စွာ စီမံခန့်ခွဲမထားသဖြင့် သတိမပြုမိခဲ့ကြပေ။ ယခု ဂိုဏ်းကို ရှင်းလင်းရေးလုပ်ဆောင်နေသဖြင့် ကျင်းယွဲ့ရပ်ကွက်ကို စီမံခန့်ခွဲသူများကို အစားထိုးလိုက်ရာ မည်သူကမျှ အာရုံမစိုက်ကြတော့ချေ။

လူတိုင်းက သူတို့ကိုမူလကတည်းက ကျင်းယွဲ့ရပ်ကွက်မှ လူများဟု ထင်မှတ်နေခဲ့ကြ၏။

လက်ရှိအချိန်မှာတော့ သန်မာသောအမျိုးသားလျိုက ဆုရှင်းပြန်လာပြီး သူ့ကိုထိုနေရာတွင်ပင် နေခိုင်းခဲ့မည်ကို စိုးရိမ်ကာ ထိတ်လန့်တကြားဖြင့် ကျန်းရန် ဂိုဏ်း၏ဌာနချုပ်ဖြစ်သော တုန်းရှန်းဖန်း ထံသို့ ပြန်ရောက်နေပြီဖြစ်သည်။

သန်မာသောအမျိုးသားလျိုမှာ အတော်လေး ပါးနပ်၏။ ဤအမှုမှာ ကြီးမားသောပြဿနာကြီး တစ်ခုဖြစ်လာပြီး သူ၏ခေါင်းဆောင်က မကိုင်တွယ်နိုင်ကြောင်း၊ ၎င်းက သူ၏ခေါင်းဆောင်ကိုပင် ဒုက္ခရောက်စေနိုင်ကြောင်း သူ သိထားသည်။

ထို့ကြောင့် သူက ဂိုဏ်းချုပ်ကိုသတင်းပို့ရန် သူ၏လူများကို ချက်ချင်း ခေါ်ဆောင်သွားခဲ့သည်။

ဂိုဏ်းသုံးဂိုဏ်းနှင့် အဖွဲ့လေးဖွဲ့တွင် ကျန်းရန်ဂိုဏ်း မှာ အားအနည်းဆုံးဖြစ်သည်ဟု ဆိုနိုင်ပါသည်။

ကျန်းရန်ဂိုဏ်းတစ်ခုလုံးတွင် အသန်မာဆုံးအဖွဲ့ဝင်များဖြစ်သော ဂိုဏ်းချုပ်နှင့် ဒုဂိုဏ်းချုပ်နှစ်ဦးမှာ ဟောက်ထျန်းအလယ်အလတ်အဆင့်တွင်သာ ရှိကြ၏။

မိုးပြာဝါးဂိုဏ်း၏ယခင် ခေါင်းဆောင်မှာ ရှားဖေးယင်းကဲ့သို့ပင် ဟောက်ထျန်းအထွတ်အထိပ်၏ခွန်အားကို ပိုင်ဆိုင်ထားကြပါသည်။

အခြား ဂိုဏ်းလေးခု၏ခေါင်းဆောင်များလည်း ဟောက်ထျန်းအထွတ်အထိပ်ခွန်အားရှိကြပြီး သူတို့တွင် တစ်ယောက်ထက်မကရှိကြ၏။

ဤသည်က ကျန်းရန်ဂိုဏ်းကို အနေခက်သော အခြေအနေသို့ ရောက်သွားစေသည်။ သူတို့က ဂိုဏ်းသုံးဂိုဏ်းနှင့် အဖွဲ့လေးဖွဲ့ထဲတွင် ဟောက်ထျန်းအထွတ်အထိပ်သိုင်းပညာရှင် တစ်ဦးမျှမရှိသော တစ်ခုတည်းသောဂိုဏ်းဖြစ်သည်။

ကျန်းရန်ဂိုဏ်းက ရာစုနှစ်တစ်ခုကျော်တည်ရှိခဲ့ပြီး ၎င်း၏အမွေအနှစ်များက သိသာထင်ရှားကာအရင်းအမြစ်များစွာကိုပိုင်ဆိုင်ထားဆဲဖြစ်ကာ အောက်ခြေအဆင့်အဖွဲ့ဝင်အများအပြားကို စုဆောင်းထားနိုင်ခဲ့သောကြောင့်သာ မဟုတ်ပါက၊ ကျန်းရန်ဂိုဏ်းက ယခုအချိန်လောက်ဆိုလျှင် ရှစ်ကြိမ်လောက်ရှင်းလင်းခံရပြီး ဖြစ်လိမ့်မည်။

ထို့ကြောင့် ကျန်းရန်ဂိုဏ်းက မည်သူ့ကိုမျှ မစော်ကားမိစေရန် သူတို့လုပ်ဆောင်သမျှတွင် အမြဲတမ်း အလွန်သတိထားလေ့ရှိ၏။ အလွန်အမင်းသတိထားနေသည့်တိုင် ပြဿနာများ ဖြစ်ပေါ်လာလိမ့်မည်ဟု သူဘယ်သောအခါမျှ မမျှော်လင့်ထားခဲ့ပေ။

"သောက်ရူးကောင် ကျန်းဟယ်က တကယ့်သောက်ရူးပဲ။ သူက သူ့သားကို လင်းယုန်ပျံဂိုဏ်းနယ်မြေမှာ ဒီအတိုင်းကြီးသွားထားတာလား။ သိုသိုသိပ်သိပ်နေရမယ်ဆိုတာ သူမသိဘူးလား။"

"လင်းယုန်ပျံဂိုဏ်းနယ်မြေမှာ လင်းယုန်ပျံဂိုဏ်း ဂိုဏ်းချုပ်ရဲ့ညီမကို အနိုင်ကျင့်ဖို့သူ့လူတွေကို ခေါ်သွားတယ်တဲ့လား။ သူတို့ကိုပြဿနာလာရှာဖို့တောင်းဆိုနေတာပဲ။"

ကျန်းရန်ဂိုဏ်းချုပ် ကျန်းပိုင်ဖေးက စားပွဲကို ဒေါသတကြီး ရိုက်ချလိုက်၏။

ဒုခေါင်းဆောင်တစ်ဦးဖြစ်သူ ယန်တုန်းက ပြောလိုက်သည်။ "ဒါက ကလေးတွေရန်ဖြစ်တာပဲကို။ ဂိုဏ်းချုပ်က ဘာလို့ဒီလောက်ဒေါသထွက်နေရတာလဲ။"

"အဲဒီဆုရှင်းက တကယ်ကိုမောက်မာတာပဲ။ ငါတို့ဆီကနေ ရှင်းပြချက်တောင်းနေသေးတယ်။ သူက ဘယ်လို ရှင်းပြချက်မျိုးလိုချင်တာလဲ။ ငါတို့က ဘာလို့ သူ့ကိုပေးရမှာလဲ။"

နောက်ထပ် ဒုဂိုဏ်းချုပ်တစ်ဦးဖြစ်သူ ရှန်ကျုံးမင်က သက်ပြင်းချလိုက်၏။ "သူတို့မှာ မောက်မာပိုင်ခွင့် ရှိပါတယ်။ ပြီးတော့ ချန်နင်စီရင်စုတစ်ခုလုံးမှာ ငါတို့ ကျန်းရန်ဂိုဏ်းက ဘယ်သူကများ သူတို့ကို စော်ကားရဲမှာလဲ။"

ဤသည်ကို ကြားသောအခါ ကျန်းပိုင်ဖေး၏အမူအရာမှာ ချက်ချင်းပို၍ဆိုးရွားသွားခဲ့၏။

သူက ကျန်းရန်ဂိုဏ်း၏ခေါင်းဆောင်ဖြစ်ပြီး ဂိုဏ်း၏လက်ရှိ ပြိုကျလုနီးပါးအခြေအနေအတွက် အတိုင်းအတာ တစ်ခုအထိတာဝန်ရှိသူဖြစ်သည်။

သူစကားမှားသွားကြောင်း သဘောပေါက်သွားသဖြင့် ရှန်ကျုံးမင်က အလျင်အမြန်ပြောလိုက်၏။ "ဂိုဏ်းချုပ် အဲဒီလိုဆိုလိုတာမဟုတ်ပါဘူး။ ငါတို့ လင်းယုန်ပျံဂိုဏ်းကို ရန်စလို့မရဘူး။ ပြီးတော့ ဒီကိစ္စကို အမြန်ဆုံးဖြေရှင်းဖို့လိုတယ်လို့ ပြောချင်တာပါ။"

ကျန်းပိုင်ဖေး သက်ပြင်းချလိုက်၏။ " ဒီကိစ္စက ကြီးကျယ်နိုင်သလို သေးလည်းသေးငယ်နိုင်ပါတယ်။ လင်းယုန်ပျံဂိုဏ်းက ဘာပြောချင်လဲဆိုတာပေါ် မူတည်ပါတယ်။ အခု သူတို့က ငါတို့ဆီကနေ ရှင်းပြချက်တောင်းနေတယ်ဆိုတာက ဒီကိစ္စကို အကြီးကြီးလုပ်ချင်နေတယ်ဆိုတာ ရှင်းနေတယ်။ဒါကို ကိုင်တွယ်ဖို့ မလွယ်ဘူး။"

ယန်တုန်း ကျိန်ဆဲကာပြောလိုက်သည်။ "အဲဒီကောင်လေးဆုရှင်းက သိုင်းလောကမှာ ဂျူနီယာတစ်ယောက်ပါပဲ။ ဒါပေမဲ့ အခု သူကငါတို့ လည်ပင်းပေါ်တက်စီးပြီး ငါတို့အပေါ်ချီးပါဖို့တောင် သတ္တိနေပြီ။ ဒါက ဘယ်လို အဓိပ္ပာယ်မရှိတဲ့ကိစ္စလဲ။"

"ငါ့အနေနဲ့ပြောရရင်တော့ သူ့ကိုလျစ်လျူရှုလိုက်ကြရအောင်။ ဒီလောက် အသေးအဖွဲ့ကိစ္စလေးအတွက် ငါတို့ကိုတိုက်ခိုက်ဖို့ လင်းယုန်ပျံဂိုဏ်း တစ်ခုလုံးကို သူတကယ်ပဲလှုပ်ရှားခိုင်းရဲမလားဆိုတာ ငါကြည့်ချင်တယ်။"

"သူတို့ရဲ့လင်းယုန်ပျံဂိုဏ်းက အင်အားကြီးရင် ကြီးနိုင်တယ်။ ဒါပေမဲ့ ငါတို့ရဲ့ကျန်းရန်ဂိုဏ်းကလည်း ရန်စလို့ လွယ်တဲ့သူမဟုတ်ဘူး။ သူ တိုက်ချင်ရင်တောင် ငါတို့သူ့သွားတစ်ချောင်းကျွတ်အောင် ရိုက်ထုတ်ပစ်မယ်။"

"အဲဒီအချိန်ကျရင် ငါတို့ဆုံးရှူံးမှုများနိုင်ပေမဲ့ သူတို့ဘက်ကလည်းအထိနာသွားလိမ့်မယ်။ အဲ့ခါကြရင် သူ့ရဲ့ပြိုင်ဘက်ဟောင်း မိုးပြာဝါးဂိုဏ်းကို သူ ဘယ်လို ဆက်တိုက်မလဲဆိုတာကြည့်ကြရတာပေါ့။"