အခန်း ၂၂၀

အခန်း (၂၂၀) ချင်လွမ် ကောင်းကင်နတ်မင်း

ထို မျက်နှာကြီး မှာ ကောင်းကင် တစ်ခုလုံး ကဲ့သို့ လောက တစ်ခုလုံး ကို ဖုံးလွှမ်းထားပေသည်။

သံကြိုး များဖြင့် ချည်နှောင်ခံထားရသော ကျင့်ကြံသူ များ အားလုံး ဒူးထောက် ရှိခိုးလိုက်ကြသော်လည်း ချန်ယောင် တစ်ယောက်တည်း သာ အနည်းငယ် ကြောင်အမ်းစွာ ဖြင့် ကောင်းကင် သို့ မော့ကြည့်နေပြီး ထို ကြီးမားလှသော မျက်နှာ ကြီး မှာ အနည်းငယ် ရင်းနှီးနေသကဲ့သို့ ရှိသော်လည်း မသေချာသကဲ့သို့ ဖြစ်နေပေသည်။

ထို မျက်နှာကြီး ပေါ်ရှိ နေနှင့်လ ကဲ့သို့ နက်ရှိုင်းသော မျက်လုံး အစုံ က သူမဆီသို့ အဝေးမှ လှမ်းကြည့်လာပြီး အကြည့်များ မှာ နွေးထွေးမှု များ အဖြစ် ပြောင်းလဲသွားသည့် အချိန်အထိ ပင်ဖြစ်သည်။

"ဒီတစ်ခေါက် လေ့ကျင့်မှု က... ဘာတွေများ ရလိုက်လဲ..."

အသံ က ဖြည်းညှင်းစွာ ထွက်ပေါ်လာသည်။

ဤ အသံ ကြီး မှာ ကြီးကျယ် ခမ်းနားပြီး ကျယ်ပြန့်သော်လည်း ယခုအခါ ထို ရင်းနှီးနေသော အကြည့် နှင့် ဤ အသံ ကြောင့် မည်မျှပင် မသေချာ ပါစေ ချန်ယောင် လည်း တစ်ခုခု ကို သိရှိသွားပြီ ဖြစ်ပြီး အနည်းငယ် ကြောင်အမ်းသွားသော အမူအရာ ပေါ်လာတော့သည်။

'ချန်မု... ကောင်းကင်နတ်မင်း... လား...'

ချန်ယောင် ကြောင်အမ်း နေချိန်မှာပင် ချန်မု ၏ အကြည့်များ က အဝေးရှိ တောင်တန်း များဆီသို့ ရွှေ့သွားတော့သည်။

ထိုနေရာ တွင် အလင်းတန်း တစ်ခု က လေထဲတွင် ချည်နှောင်ခံထားရပြီး အလင်းတန်း အတွင်းတွင် ခြင်္သေ့စိမ်း တစ်ကောင် ကို တွေ့မြင်ရကာ ယခုအခါ ဂုဏ်ထူးဆောင် ထာဝရနတ်မင်း ၏ အရှိန်အဝါ အနည်းငယ်မျှ မရှိတော့ဘဲ မြေကြီးပေါ်တွင် ပျော့ခွေ နေပြီး မျက်ဝန်းထဲတွင်လည်း ကြောက်လန့်မှု များ အပြည့် ရှိနေပေသည်။

"ကျွန်တော် က ချင်လွမ် ကောင်းကင်နတ်မင်း ရဲ့ နောက်လိုက်..."

သူက အသံကို ခက်ခက်ခဲခဲ ထုတ်ကာ ချန်မု ကို အရှုံးပေး တောင်းပန်လိုက်သည်။

ဤအချိန်တွင် အပေါ်မှနေ၍ ကြည့်မည် ဆိုပါက ချန်မု သည် ကောင်းကင်ယံ တွင် တည်ငြိမ်စွာ ရပ်နေပြီး လက်ဖဝါး ထဲတွင် သေးငယ်လှပသော၊ လက်ရာမြောက်သည့် အနုပညာ ပစ္စည်း လေး တစ်ခု ကဲ့သို့ တောင်တန်း လေး တစ်ခု ကို ကိုင်ဆောင်ထားသည်ကို မြင်တွေ့ရပေမည်။

ချန်မု ၏ အောက်ဘက် တွင်မူ ကျယ်ပြန့်သော သဲကန္တာရ ကြီး နှင့် ဟွမ်ထျန်း အထွတ်အမြတ် နယ်မြေ ရှိနေပေသည်။

အထွတ်အမြတ် နယ်မြေ အတွင်းတွင်။

ယွင်ရွှမ် ထာဝရနတ်မင်း နှင့် အခြားသော လူသား ကျင့်ကြံသူ များ မှာလည်း နေရာတွင် ကျောက်ရုပ်ပမာ မှင်တက်သွားကြပြီး ချန်မု ကို ကြည့်သော အကြည့်များ တွင် တုန်လှုပ်မှု နှင့် မယုံကြည်နိုင်မှု များ အပြည့် ရှိနေကြပေသည်။

ချန်ယောင် နှင့် ကောင်းကင်ဝါးမျို မဟာသူတော်စင် အစရှိသော မိစ္ဆာ များ၏ အမြင် တွင်မူ ချန်မု ၏ ခန္ဓာကိုယ် ကြီး မှာ ကျယ်ပြန့်လှသော ကောင်းကင်နှင့်မြေကြီး ကဲ့သို့ ဖြစ်နေပြီး လက်တစ်ဖက်တည်း ဖြင့် နေနှင့်လ ကို ကိုင်ဆောင်ထားနိုင်သကဲ့သို့ ဖြစ်နေသော်လည်း ယွင်ရွှမ် ထာဝရနတ်မင်း နှင့် အခြားသူများ ၏ အမြင် တွင်မူ ချန်မု မှာ အစကတည်းက သာမန် လူတစ်ယောက် ၏ ပုံပန်းသဏ္ဌာန် မျိုး သာ ရှိနေပေသည်။

သူ၏ ခန္ဓာကိုယ် ကြီးမားသွားခြင်း မဟုတ်ဘဲ ထို တောင်တန်း ကြီး မှာ ချန်မု ၏ လက်ဖဝါး ထဲတွင် သေးငယ်သွားခြင်း ပင်ဖြစ်သည်။

လက်ဖဝါး ထဲက ကမ္ဘာ။

ဤသည်မှာ ဒဏ္ဍာရီ ထဲတွင် ကောင်းကင်နတ်မင်း များသာ ပိုင်ဆိုင်သော မဟာ နတ်ဘုရား စွမ်းအင် ပင်ဖြစ်သည်။

'ချန်မု... ဂုဏ်ထူးဆောင် ထာဝရနတ်မင်း မဟုတ်ဘဲ... ကောင်းကင်နတ်မင်း လား...'

ယွင်ရွှမ် ထာဝရနတ်မင်း စိတ်ထဲတွင် တုန်လှုပ် နေရုံသာမက လွန်ခဲ့သော လဝက်ခန့် က အရပ်လေးမျက်နှာ ကို လင်းထိန်သွားစေပြီး ကောင်းကင် တွင် နေနှစ်စင်း ထွက်ပေါ်လာခဲ့သော ကြီးကျယ် ခမ်းနားသည့် လက္ခဏာ ကို ပြန်လည် သတိရသွားကာ စိတ်ထဲတွင် ယုံကြည်ရန် ခက်ခဲသော အတွေးတစ်ခု ပေါ်လာတော့သည်။

'လွန်ခဲ့တဲ့ လဝက် က အဲဒီ ကောင်းကင်နဲ့မြေကြီး ရဲ့ လက္ခဏာ က... ချန်မု ကြောင့် ဖြစ်လာတာလား... ချန်မု က အဲဒီ အချိန်တုန်းက ကောင်းကင်နဲ့မြေကြီး ရဲ့ အထွတ်အထိပ် ကို တက်လှမ်းပြီး... နေနဲ့လ ရဲ့ ကောင်းကင် ကို ရောက်ရှိကာ... ကောင်းကင်နတ်မင်း ဖြစ်သွားခဲ့တာများလား...'

ယွင်ရွှမ် ထာဝရနတ်မင်း တစ်ယောက်တည်း သာ မဟုတ်ချေ။

ဤမျှ ကြီးကျယ် ခမ်းနားသော အရှိန်အဝါ ကြီး ကြောင့် ကောင်းကင်နှင့်မြေကြီး ပင်လျှင် အညံ့ခံ သွားရပြီး ထျန်းရွှမ် တိုက်ကြီး တစ်ခုလုံး ရှိ မရေမတွက်နိုင်သော ထာဝရနတ်မင်း များ အားလုံး နိုးထလာကြကာ မရေမတွက်နိုင်သော အကြည့်များ မှာလည်း ဟွမ်ထျန်း အထွတ်အမြတ် နယ်မြေ ဆီသို့ ရောက်ရှိလာကြပြီး အချို့က ရိုသေ လေးစားစွာ၊ အချို့က တုန်လှုပ်စွာ၊ အချို့ကမူ မယုံကြည်နိုင်စွာ ဖြင့် ကြည့်နေကြပေသည်။

ရိုသေ လေးစားသူ များမှာ ချန်မု ၏ ခုခံ၍ မရနိုင်သော ကြီးကျယ် ခမ်းနားသည့် ကောင်းကင် အရှိန်အဝါ ကို အဝေးမှနေ၍ ခံစားမိပြီး လောက တွင် ကောင်းကင်နတ်မင်း တစ်ပါး ထွက်ပေါ်လာပြီ ဖြစ်ကြောင်း သိရှိသွားကြသောကြောင့် ပင်ဖြစ်သည်။

တုန်လှုပ်သူ များမှာမူ ချန်မု က တိုက်ခိုက်လိုက်သည်ကို ကိုယ်တိုင် မျက်မြင် တွေ့လိုက်ရပြီး ဝိညာဉ်လောက ကို ဆွဲဖြဲကာ ဝိညာဉ်လောက ထဲမှ တောင်တန်း ကြီး တစ်ခုလုံး ကို ဆွဲထုတ်လာပြီးနောက် နားမလည်နိုင်သော နည်းလမ်း ဖြင့် လက်ဖဝါး ပေါ်ရှိ ကစားစရာ အရုပ် လေး တစ်ခု ကဲ့သို့ ကိုင်ဆောင်ထားသည်ကို မြင်တွေ့လိုက်ရသောကြောင့် ပင်ဖြစ်သည်။

မယုံကြည်နိုင်သူ များမှာမူ အကြီးမားဆုံးသော ရိုက်ခတ်မှု ကို ခံစားလိုက်ရသူ များ ပင်ဖြစ်သည်။

ထျန်းဟုန် ထာဝရနတ်မင်း။

သူသည် နှစ်ပေါင်း သိန်းချီ အသက်ရှင် နေထိုင်လာခဲ့သူ ဖြစ်ပြီး လူသား မျိုးနွယ်စု ၏ ကောင်းကင်နတ်မင်း နှစ်ပါး ၏ စွမ်းရည် များကို ကိုယ်တိုင် မျက်မြင် တွေ့ရှိခဲ့ဖူးသလို ယင်ယန် ကောင်းကင်နတ်မင်း က တိုက်ခိုက်လိုက်ရာ မိုင်ပေါင်း သန်းချီ သော ကောင်းကင်နှင့်မြေကြီး မှာ ယင်ယန် အရောင် နှစ်မျိုး အဖြစ် ပြောင်းလဲသွားသည်ကို မြင်တွေ့ခဲ့ဖူးသလို ထိုက်ရွှမ် ကောင်းကင်နတ်မင်း က ခြေလှမ်း တစ်လှမ်း တည်း ဖြင့် စကြာဝဠာ ကို နင်းဖြတ်ကာ စကားတစ်ခွန်း တည်း ဖြင့် သတ္တဝါ အားလုံး၏ အသက် ကို အဆုံးအဖြတ် ပေးနိုင်သည်ကိုလည်း မြင်တွေ့ခဲ့ဖူးပေသည်။

သို့သော် ယခု ချန်မု ၏ ကြီးကျယ် ခမ်းနားသော ကောင်းကင် အရှိန်အဝါ မှာ ထို ကောင်းကင်နတ်မင်း နှစ်ပါး နှင့် တူညီနေသော်လည်း အငွေ့အသက် မှာမူ လုံးဝ ကွဲပြားခြားနားနေပြီး ယင်ယန် နှင့် ထိုက်ရွှမ် ထဲမှ တစ်ပါးပါး မဟုတ်သလို မိစ္ဆာမျိုးနွယ်စု ၏ ချင်လွမ် ကောင်းကင်နတ်မင်း လည်း မဟုတ်ချေ။

'ဒါဆို သူက... ဘယ်သူလဲ။'

'ရွှမ်လင်ကမ္ဘာ ကနေ ထွက်သွားတဲ့ ရှေးဟောင်း ကောင်းကင်နတ်မင်း တစ်ပါးပါး များ ပြန်ရောက်လာတာလား...'

'ဒါမှမဟုတ် ရှေးခေတ် တုန်းက ရွှမ်လင်ကမ္ဘာ ပြိုကွဲသွားပြီးတဲ့ နောက်ပိုင်း ဒီလောက မှာ ကောင်းကင်နတ်မင်း အဖြစ် တက်လှမ်းနိုင်ခဲ့တဲ့ ပထမဆုံးသော ကောင်းကင်နတ်မင်း လား...'

'တကယ်ပဲ အောင်မြင်သွားတာကိုး...'

တာဟွမ် ထာဝရနတ်မင်း က ချန်မု ၏ ပုံရိပ် ကို မော့ကြည့်ရင်း စိတ်ထဲတွင် တီးတိုး ရေရွတ်လိုက်သည်။

မကြာသေးမီ အချိန်က ကောင်းကင်နှင့်မြေကြီး တွင် ကြီးမားသော အပြောင်းအလဲ များ ဖြစ်ပေါ်လာတော့မည်ကို သူ မှုန်ဝါးဝါး ခံစားလိုက်ရသဖြင့် ကြယ်တာရာ များကို တွက်ချက် ကြည့်ရာ မှုန်ဝါးဝါး ဖြင့် ကံကြမ္မာ အချို့ ကို တွေ့မြင်လိုက်ရပြီး ဤ လောက တွင် ကောင်းကင်နတ်မင်း အဖြစ် တက်လှမ်းမည့် ပုဂ္ဂိုလ် တစ်ဦး ရှိနေကြောင်း သိရှိလိုက်ရသည်။

သို့သော် ထို ကံကြမ္မာ မှာ အလွန် မှုန်ဝါးလွန်းပြီး တွက်ချက်စဉ်က ဖြစ်ပေါ်လာသော ပုံရိပ်ယောင် သက်သက် ဟုတ်မဟုတ် ကိုပင် မဆုံးဖြတ်နိုင်ခဲ့သဖြင့် ရွှမ်လင်ကမ္ဘာ ရှိ ဂုဏ်ထူးဆောင် ထာဝရနတ်မင်း အားလုံး၏ ကံကြမ္မာ ကို တွက်ချက် ကြည့်ခဲ့သော်လည်း ဘာမှ မသိရခဲ့ချေ။

ထိုအချိန်အထိ...

လွန်ခဲ့သော လအနည်းငယ် က ချန်မု ရောက်လာချိန်တွင် ဖြစ်သည်။

ထိုအချိန်က ချန်မု သည် ထာဝရနတ်မင်း အဆင့်တွင်သာ ရှိသေးသော်လည်း ကံကြမ္မာ များ အားလုံး မှုန်ဝါးနေပြီး သူ၏ အရှေ့တွင် ရပ်နေသော်လည်း အနာဂတ် ကံကြမ္မာ အနည်းငယ် ကိုပင် တွက်ချက်၍ မရနိုင်ခဲ့ချေ။

ဤသည်မှာ တစ်ခါမှ မကြုံဖူးသော ကိစ္စ ပင်ဖြစ်သည်။

ယခင်က သူ တွေ့ဆုံခဲ့ဖူးသော လူသား မျိုးနွယ်စု ၏ ဂုဏ်ထူးဆောင် ထာဝရနတ်မင်း များစွာ ကိုပင် ကံကြမ္မာ အနည်းငယ် ကို တွက်ချက်နိုင်ခဲ့ပေသည်။

ချန်မု ပဲ။

ချန်မု က ဒီလောက မှာ ကောင်းကင်နတ်မင်း အဖြစ် တက်လှမ်းမယ့်သူ ပဲ။

တာဟွမ် ထာဝရနတ်မင်း စိတ်ထဲတွင် တုန်လှုပ်သွားခဲ့သော်လည်း ကံကြမ္မာ များကို နှောင့်ယှက်မည်ကို စိုးရိမ်သဖြင့်၊ သို့မဟုတ် မိမိ၏ ခန့်မှန်းချက် မှားယွင်းမည်ကို စိုးရိမ်သဖြင့် ဘာမှ မပြောရဲဘဲ ချန်မု အတွက် ချန်ယောင် ၏ ကံကြမ္မာ ကိုသာ တိတ်တဆိတ် တွက်ချက်ပေးနေခဲ့ပြီး လွန်ခဲ့သော လဝက် က ကောင်းကင်တွင် နေနှစ်စင်း ထွက်ပေါ်လာသော လက္ခဏာ ကို မြင်တွေ့လိုက်ရချိန်တွင်...

ထိုအချိန်မှစ၍ သူ သေချာ သိလိုက်ပြီ ဖြစ်သည်။

ချန်မု အောင်မြင်သွားပြီ ဖြစ်ကြောင်း။

ထို့အပြင် တာအို အားလုံး ပေါင်းစပ်ထားသော ဝိညာဉ်အသွင်ပြောင်းခြင်း လမ်းစဉ် မဟုတ်ဘဲ ထို လမ်းစဉ် မှာ ရွှမ်လင်ကမ္ဘာ ပြိုကွဲပြီးနောက်ပိုင်း လုံးဝ ပိတ်ဆို့သွားပြီ ဖြစ်ကာ ကျင့်ကြံ၍ မရနိုင်တော့သဖြင့် ချန်မု လျှောက်လှမ်းခဲ့သည်မှာ ရှေးခေတ် တုန်းက မည်သူမျှ မအောင်မြင်ခဲ့ဖူးသော ဝိညာဉ်ကျင့်ကြံသူ လမ်းစဉ် ပင်ဖြစ်သည်။

သူသည် ဤ လောက စတင် ဖြစ်တည်ပြီးကတည်းက ပထမဆုံးသော ဝိညာဉ်ကျင့်ကြံသူ ကောင်းကင်နတ်မင်း ဖြစ်ပြီး ယခု ရွှမ်လင်ကမ္ဘာ တွင်လည်း တစ်ပါးတည်းသော...

စတုတ္ထမြောက် ကောင်းကင်နတ်မင်း ပင်ဖြစ်သည်။

...

ကောင်းကင်ဝါးမျို မဟာသူတော်စင် မှာ ကြောက်လန့် နေပြီး မယုံကြည်နိုင်အောင် ဖြစ်နေပေသည်။

စတုတ္ထမြောက် ကောင်းကင်နတ်မင်း။

ယခု အရှေ့ရှိ ချန်မု မှာ ယခု ရွှမ်လင်ကမ္ဘာ တွင် ထွက်ပေါ်လာသော စတုတ္ထမြောက် ကောင်းကင်နတ်မင်း ပင်ဖြစ်သည်။

လွန်ခဲ့သော လဝက် က ကောင်းကင်တွင် နေနှစ်စင်း ထွက်ပေါ်လာချိန်တွင် သူက ရှေးခေတ် က မိစ္ဆာမျိုးနွယ်စု ၏ ကောင်းကင်နတ်မင်း တစ်ပါးပါး ပြန်လည် ရောက်ရှိလာခြင်း၊ သို့မဟုတ် အပြင်ဘက် လောက မှ ကောင်းကင်နတ်မင်း တစ်ပါးပါး က ဤ လောက ကို မတော်တဆ ဖြတ်သန်းသွားခြင်း ဖြစ်မည်ဟု ထင်ထားခဲ့သည်။

သို့သော် ယခု ကြည့်ရသည်မှာ သူ၏ ခန့်မှန်းချက် များ အားလုံး မှားယွင်းသွားပြီ ဖြစ်ပြီး ထိုနေ့က ကောင်းကင်နှင့်မြေကြီး ၏ လက္ခဏာ များကို ဖြစ်ပေါ်စေခဲ့သူ မှာ ယခု အရှေ့ရှိ လူသား မျိုးနွယ်စု မှ ကောင်းကင်နတ်မင်း ပင်ဖြစ်ကာ တစ်ဖက်လူ ၏ ကြီးကျယ် ခမ်းနားသော ကောင်းကင် အရှိန်အဝါ ကို ခံစားမိရုံဖြင့် သူ၏ စိတ်ဝိညာဉ် ပင်လျှင် တုန်ယင် နေရပေသည်။

"ကောင်းကင်နတ်မင်း..."

"ခြင်္သေ့စိမ်း မှာ အပြစ် မရှိပါဘူး..."

ကောင်းကင်ဝါးမျို မဟာသူတော်စင် ၏ စိတ်ဝိညာဉ် တုန်ယင်နေပြီး သူ လူသား ကျင့်ကြံသူ များကို ဖမ်းဆီးကာ ကံကြမ္မာ များကို ခိုးယူချိန် ကတည်းက တစ်နေ့နေ့တွင် လူသား ကောင်းကင်နတ်မင်း များ၏ ရှာဖွေ ဖော်ထုတ်ခြင်း ကို ခံရမည်ဟု ကြိုတင် တွေးထားခဲ့သော်လည်း သူ ဆက်လက် လုပ်ဆောင်ခဲ့ပြီး ယခု ချန်မု နှင့် ရင်ဆိုင်ရချိန်တွင် သွားကြိတ်ကာ ပြောလိုက်ရပေသည်။

ချန်မု ၏ အကြည့် က သူ့ကို တည်ငြိမ်စွာ ကြည့်နေပြီး ဘာမှ မတုံ့ပြန်သော်လည်း ထို အကြည့် ကြောင့် ကောင်းကင်ဝါးမျို မဟာသူတော်စင် မှာ သူ၏ အပေါ်ရှိ ဖိနှိပ်မှုအရှိန်အဝါ မှာ ပိုမို ကြောက်စရာ ကောင်းလာပြီး ပိုမို လေးလံလာကာ ဂုဏ်ထူးဆောင် ထာဝရနတ်မင်း တစ်ပါး အနေဖြင့် ယခုအချိန်တွင် အသက်ရှူရန် ပင်လျှင် ခက်ခဲလာကြောင်း ခံစားလိုက်ရသည်။

"ဒီလောက ကြီး က ပြိုကွဲနေပြီး... တာအို အောင်မြင်ဖို့ အခွင့်အရေး မရှိတော့ပါဘူး... ဒါကြောင့်မို့လို့ လောက တစ်ခုလုံး ရဲ့ ကံကြမ္မာ ကို မျိုချပြီး... ကောင်းကင်နတ်မင်း လမ်းစဉ် ကို အတင်းအကျပ် ဖွင့်ဖို့ ကြိုးစားခဲ့ရတာပါ... လူသား နဲ့ မိစ္ဆာ နှစ်မျိုးနွယ်စလုံး ရဲ့ ကျင့်ကြံသူ တွေကို ဖမ်းဆီးခဲ့ပါတယ်... သတ္တဝါ အားလုံး တာအို ကို ယှဉ်ပြိုင်ကြတာ အပြစ် မရှိပါဘူး..."

ကောင်းကင်ဝါးမျို မဟာသူတော်စင် က ခက်ခက်ခဲခဲ ပြောလိုက်သည်။

ချန်မု ၏ အကြည့် က တောင်တန်း များဆီသို့ တည်ငြိမ်စွာ လှမ်းကြည့်လိုက်ရာ သူ၏ အမြင် တွင် လူသား ကျင့်ကြံသူ များ အပြင် မိစ္ဆာ ကျင့်ကြံသူ များလည်း ရှိနေသလို အလွန် ရှားပါးသော မျိုးနွယ်စု ဖြစ်သည့် ဝိညာဉ် မျိုးနွယ်စု ကဲ့သို့သော ကျင့်ကြံသူ များလည်း ရှိနေကြောင်း မြင်တွေ့လိုက်ရသည်။

ကောင်းကင်ဝါးမျို မဟာသူတော်စင် ပြောသည့်အတိုင်း ယခု ရွှမ်လင်ကမ္ဘာ တွင် တာအို အားလုံး ကို ပေါင်းစပ်ပြီး ကောင်းကင်နတ်မင်း ဖြစ်လာရန် မှာ လုံးဝ မဖြစ်နိုင်သလောက် ဖြစ်နေပြီး တကယ်လို့ တာအို အားလုံး ပေါင်းစပ်နိုင်ခဲ့လျှင်တောင်မှ မူလဝိညာဉ် ကို အသွင်ပြောင်းကာ ကောင်းကင် နှလုံးသား ကို ဖန်တီးရန် ဆိုသည်မှာ မျှော်လင့်ချက် မရှိသလောက် ပင်ဖြစ်သည်။

အကယ်၍ ကောင်းကင်ဝါးမျို မဟာသူတော်စင် ကဲ့သို့ လောက တစ်ခုလုံး ၏ ကံကြမ္မာ ကို ပေါင်းစပ်ပြီး လောက တစ်ခုလုံး ၏ ကံကြမ္မာ ၏ ကာကွယ်မှု ကို ရရှိပါက ဤ လောက ပြိုကွဲသွားမည့် အချိန်တွင် အတင်းအကျပ် ကောင်းကင် လမ်းစဉ် ကို ဖွင့်လှစ်ပြီး ကောင်းကင်နတ်မင်း အဖြစ် တက်လှမ်းနိုင်မည့် အခွင့်အရေး အနည်းငယ် ရှိနိုင်ပေသည်။

သို့သော်...

ကောင်းကင်ဝါးမျို မဟာသူတော်စင် ၏ တာအို အမှတ်အသား များမှာ ယခုအခါ ကိုးထောင့်ကိုးရာခြောက်ဆယ့်သုံး ခု သာ ရှိသေးပြီး သုံးဆယ့်ခုနစ် ခု လိုအပ်နေသေးကာ ဤ လောက တွင် ထာဝရ မပြည့်စုံနိုင်တော့ဘဲ ထိုနည်းလမ်း ကို အသုံးပြုပြီး လောက ၏ ကံကြမ္မာ များကို အသုံးချကာ သေချာပေါက် မသေချာသော အခွင့်အရေး တစ်ခု ကို ဖမ်းဆုပ်ပြီး ဝိညာဉ်အသွင်ပြောင်းခြင်း အဆင့် ကောင်းကင်နတ်မင်း ဖြစ်လာလျှင်တောင်မှ တစ်သက်လုံး ပထမအဆင့် တွင်သာ ပိတ်မိနေမည် ဖြစ်ပြီး ရှေ့ဆက် တိုးနိုင်မည် မဟုတ်တော့ချေ။

"တာအို ကို ယှဉ်ပြိုင်တာက အသက်ရှင်ဖို့ အတွက်ပဲ... သတ္တဝါ အားလုံး အသက်ရှင်ဖို့ ကြိုးစားတာ အပြစ် မရှိသလို... တာအို ကို ယှဉ်ပြိုင်တာလည်း အပြစ် မရှိပါဘူး..."

"ဒါကြောင့်မို့လို့ သူတို့ အားလုံး က မင်း လုပ်ရပ် ကို ခွင့်ပြုထားခဲ့ကြတာကိုး..."

ချန်မု က ကောင်းကင်ဝါးမျို မဟာသူတော်စင် ကို စိုက်ကြည့်ပြီး နောက်ဆုံးတွင် တည်ငြိမ်စွာ ပြောလိုက်သည်။

ကောင်းကင်ဝါးမျို မဟာသူတော်စင် က ကံကြမ္မာ များကို တိတ်တဆိတ် ဖုံးကွယ်ပြီး လူမျိုးစုံ ၏ ကံကြမ္မာ များကို ခိုးယူ ဝါးမျို နေခြင်း ကို ထာဝရနတ်မင်း များ အားလုံး မသိနိုင်အောင် ဖုံးကွယ်ထားနိုင်သော်လည်း ချင်လွမ်၊ ယင်ယန် နှင့် ထိုက်ရွှမ် ကောင်းကင်နတ်မင်း သုံးပါး ကိုမူ ဖုံးကွယ်ထားနိုင်မည် မဟုတ်ချေ။

ဤသို့ လုပ်ရဲခြင်း မှာ ကောင်းကင်ဝါးမျို မဟာသူတော်စင် သည် ချင်လွမ် ကောင်းကင်နတ်မင်း ၏ ခွင့်ပြုချက် ကို ရရှိထားပြီး ယင်ယန်၊ ထိုက်ရွှမ် တို့ နှစ်ဦး ကလည်း ဂရုမစိုက်သဖြင့် နှစ်သောင်းချီ ကြာသည့်အထိ တိတ်တဆိတ် ပုန်းအောင်း နေနိုင်ခဲ့ခြင်း ပင်ဖြစ်သည်။

ချန်မု ၏ စကား ကို ကြားလိုက်ရသဖြင့်။

ကောင်းကင်ဝါးမျို မဟာသူတော်စင် လည်း စိတ်ထဲတွင် အနည်းငယ် သက်သာရာ ရသွားသည်။

သို့သော် သူ ဆက်လက် တောင်းပန်ရန် ပြင်လိုက်ပြီး စိတ်ထဲတွင် ချင်လွမ် ကောင်းကင်နတ်မင်း ကို အဆက်မပြတ် ခေါ်ဆိုနေစဉ်မှာပင် ချန်မု က ရုတ်တရက် ဆက်ပြောလိုက်ပြီး သူ၏ အသံ တွင် ဆောင်းရာသီ လို အေးစက်သော အငွေ့အသက် များ ပါဝင်နေသည်။

"ဒါပေမဲ့ မင်း က ငါ့ရဲ့ ညီမ ကို ဖမ်းလာခဲ့တယ်လေ..."

ဤ အသံ ထွက်ပေါ်လာသည် နှင့် ကောင်းကင်ဝါးမျို မဟာသူတော်စင် တစ်ကိုယ်လုံး ကျောက်ရုပ်ပမာ တောင့်တင်းသွားတော့သည်။

ဂုဏ်ထူးဆောင် ထာဝရနတ်မင်း တစ်ပါး အနေဖြင့် ချန်မု က မပြောခင်တုန်းက အနည်းငယ်မျှ အာရုံခံ မမိခဲ့သော်လည်း ချန်မု ၏ စကား အဆုံးတွင် ချန်ယောင် နှင့် ချန်မု ကြားရှိ ကံကြမ္မာ များကို မျက်စိတစ်မှိတ်အတွင်း သိရှိသွားတော့သည်။

'သူ လား...'

ကောင်းကင် တစ်ခုလုံး ကို ဖုံးလွှမ်းထားပြီး နေနှင့်လ ကဲ့သို့ မျက်လုံးများ ရှိသော အေးစက်သည့် မျက်နှာ ကြီး ကို ကြည့်ရင်း ကောင်းကင်ဝါးမျို မဟာသူတော်စင် ၏ မျက်ဝန်းထဲတွင် မယုံကြည်နိုင်သော အမူအရာ များ ပေါ်လာတော့သည်။

ဂုဏ်ထူးဆောင် ထာဝရနတ်မင်း တစ်ပါး အဖြစ်၊ ထာဝရနတ်မင်း များ၏ အထွတ်အထိပ် တွင် ရှိသော ပုဂ္ဂိုလ် တစ်ဦး အဖြစ် ချန်မု က ပြောလိုက်သည် နှင့် တစ်ပြိုင်နက် သူ မျက်စိတစ်မှိတ်အတွင်း အရာအားလုံး ကို နားလည်သွားပြီး ချန်မု ကို မယုံကြည်နိုင်စွာ ကြည့်ကာ နောက်ဆုံးတွင် ခါးသက်စွာ ပြုံးလိုက်မိတော့သည်။

'ဒီလို ဖြစ်နေတာကိုး...'

သူသည် ကောင်းကင်နတ်မင်း ဖြစ်လာမည့် အခွင့်အရေး ကို လက်လွတ် ဆုံးရှုံးခဲ့ရပြီး ရှေးခေတ် ပြီးကတည်းက ကောင်းကင်နတ်မင်း ၏ တံခါးဝ တွင် ပိတ်မိနေခဲ့သည်။

နှစ်ပေါင်း သန်းချီ ခက်ခက်ခဲခဲ ရှာဖွေခဲ့ပြီး နောက်ဆုံးတွင် ချင်လွမ် ကောင်းကင်နတ်မင်း ထံမှ လျှို့ဝှက် ပညာရပ် တစ်ခု ကို ရရှိခဲ့ကာ လောက ၏ ကံကြမ္မာ ကို အသုံးချပြီး ကောင်းကင်နတ်မင်း အဆင့် ကို တက်လှမ်းရန် ကြိုးစားခဲ့သည်။

သို့သော် ရလဒ် မှာမူ အလွန် ရယ်စရာ ကောင်းလှပေသည်။

သူ အရေးမစိုက်ခဲ့သော လူသား ထာဝရနတ်မင်း တစ်ပါး၊ တစ်ဖက်လူ ၏ ညီမ ကို ဖမ်းဆီးခဲ့သည်ကိုပင် ဂရုမစိုက်ခဲ့သော်လည်း တစ်ဖက်လူ မှာမူ တိတ်တဆိတ် ကောင်းကင်နတ်မင်း အဖြစ် တက်လှမ်းသွားခဲ့ပြီ ဖြစ်သည်။

ခက်ခက်ခဲခဲ ရှာဖွေခဲ့သော်လည်း မရရှိခဲ့သော နှစ်ပေါင်း သန်းချီ စွဲလမ်းမှု မှာ ရယ်စရာ တစ်ခု ကဲ့သို့ ဖြစ်သွားတော့သည်။

"ဝုန်း..."

ချန်မု ၏ မျက်နှာ မှာ တည်ငြိမ်နေပြီး ဘယ်ဘက်လက် ကို မြှောက်ကာ ကောင်းကင်ဝါးမျို မဟာသူတော်စင် ဆီသို့ လက်ညှိုး တစ်ချောင်း ဖြင့် ညွှန်ပြလိုက်သည်။

ကောင်းကင်ဝါးမျို မဟာသူတော်စင် ၏ ခါးသက်သော အပြုံး မှာ ရပ်တန့်သွားပြီး မျက်ဝန်းထဲတွင် နောင်တရမှု နှင့် ဝမ်းနည်းမှု များ ဖြတ်ပြေးသွားကာ လူတစ်ယောက်လုံး လည်း ဖုန်မှုန့် များ အဖြစ် ပြောင်းလဲသွားပြီး ပျောက်ကွယ်သွားတော့သည်။

"ဝေါ..."

မျက်စိတစ်မှိတ်အတွင်း ကောင်းကင်နှင့်မြေကြီး ၏ လေတိုက်နှုန်း နှင့် တိမ်တိုက်များ ၏ အရောင်အသွေး ပြောင်းလဲသွားပြီး သွေးရောင် တိမ်တိုက်များ က ကောင်းကင် တစ်ခုလုံး ကို ဖုံးလွှမ်းသွားကာ သွေးမိုး များ ရွာသွန်းလာပြီး မြေကြီး ပေါ်သို့ ကျဆင်းလာကာ ကောင်းကင်နှင့်မြေကြီး က ငိုကြွေးနေသကဲ့သို့ ပင်ဖြစ်သည်။

ထာဝရနတ်မင်း သေဆုံးလျှင် ကောင်းကင် မှ သွေးမိုး ရွာတတ်ပြီး ဂုဏ်ထူးဆောင် ထာဝရနတ်မင်း သေဆုံးပါက မိုင်ပေါင်း သန်းချီ ကျယ်ဝန်းသော ထျန်းရွှမ် တိုက်ကြီး တစ်ခုလုံး ပင်လျှင် ဝမ်းနည်းပူဆွေး နေသကဲ့သို့ ပင်ဖြစ်သည်။

မိစ္ဆာမျိုးနွယ်စု ၏ နံပါတ်တစ် ထာဝရနတ်မင်း၊ ကောင်းကင်ဝါးမျို မဟာသူတော်စင်... ဤနေရာတွင် သေဆုံးသွားခဲ့ပြီ ဖြစ်သည်။

ယခုအချိန်တွင်။

ထျန်းရွှမ် တိုက်ကြီး တစ်ခုတည်း သာမက ထျန်းလင် တိုက်ကြီး၊ ထျန်းတင်း တိုက်ကြီး အစရှိသော အရပ်မျက်နှာ အသီးသီး မှ အကြည့်များ ရောက်ရှိလာကြသည်။

အလွန် ဝေးကွာလွန်းသဖြင့် ထျန်းရွှမ် တိုက်ကြီး တွင် ဘာတွေ ဖြစ်ပျက်နေသည်ကို မသိနိုင်သော်လည်း ဂုဏ်ထူးဆောင် ထာဝရနတ်မင်း တစ်ပါး သေဆုံးသွားကြောင်း ကိုမူ ကံကြမ္မာ အရ သိရှိနေကြပေသည်။

...

ဝူလျန် လှိုဏ်ဂူ။

"ဂုဏ်ထူးဆောင် ထာဝရနတ်မင်း သေဆုံးသွားတာလား..."

"ဒါက... ကောင်းကင်ဝါးမျို ခြင်္သေ့စိမ်း လား..."

ဝူရှင်းဝူရှန်း ထာဝရနတ်မင်း က မျက်လုံး ဖွင့်လာပြီး ကြောင်အမ်းသွားသော အမူအရာ ပေါ်လာသည်။

ကောင်းကင်ဝါးမျို မဟာသူတော်စင် သည် ကောင်းကင်နတ်မင်း နှင့် အနီးစပ်ဆုံး သော ထာဝရနတ်မင်း များထဲမှ တစ်ပါး ဖြစ်ပြီး တာအို အမှတ်အသား များမှာ တစ်သောင်း နီးပါး ရှိနေပြီ ဖြစ်ရာ ဤ လောက တွင် မည်သူက သူ့ကို သတ်နိုင်မည်နည်း။

'ထို ကောင်းကင်နတ်မင်း နှစ်ပါး ကများ တိုက်ခိုက်လိုက်တာလား...'

'ဒါပေမဲ့ သူက ဘာလုပ်လို့ ယင်ယန် နဲ့ ထိုက်ရွှမ် ကောင်းကင်နတ်မင်း နှစ်ပါး က တိုက်ခိုက်ရတာလဲ... ချင်လွမ် ကောင်းကင်နတ်မင်း ကရော ဘာမှ မလုပ်ဘူးလား...'

ဝူရှင်းဝူရှန်း ထာဝရနတ်မင်း က ဝူလျန် လှိုဏ်ဂူ ၏ ဂူပေါက်ဝ သို့ ကြောင်အမ်းစွာ လျှောက်သွားပြီး ထျန်းရွှမ် တိုက်ကြီး ရှိရာ အရပ်သို့ လှမ်းကြည့်လိုက်သည်။

...

ထျန်းချန် တိုက်ကြီး။

သာမန် မြို့ငယ်လေး တစ်ခု။

ထင်းခွဲနေသော လယ်သမား တစ်ဦး က ရုတ်တရက် ခေါင်းမော့လာပြီး အဝေးရှိ ကောင်းကင်ယံ သို့ အံ့အားသင့်စွာ ကြည့်လိုက်သည်။

"အဲဒီ ခြင်္သေ့ က... သေသွားပြီလား..."

"ဘယ်သူက သူ့ကို သတ်နိုင်တာလဲ... အဲဒီ နှစ်ယောက်လား... ဒါပေမဲ့ အဲဒီ နှစ်ယောက် ရဲ့ အစစ်အမှန် ခန္ဓာကိုယ် တွေက ဒီလောက မှာ မရှိဘူးလေ... ကိုယ်ပွား လေးနဲ့ဆိုရင်တော့ အဲဒီ ခြင်္သေ့အို ကြီး သေလောက်တဲ့ အထိ မဖြစ်နိုင်ဘူး..."

သူက အနည်းငယ် တွေဝေသွားသော အမူအရာ ပေါ်လာသည်။

...

တိုက်ကြီး အသီးသီး တွင် ထာဝရနတ်မင်း တစ်ပါး ပြီး တစ်ပါး လှိုဏ်ဂူ များမှ ထွက်လာကြပြီး အားလုံး မျက်နှာပေါ်တွင် တုန်လှုပ်မှု များဖြင့် ကောင်းကင် သို့ မော့ကြည့်နေကြပေသည်။

မကြာသေးမီ ကမှ ကောင်းကင် တွင် နေနှစ်စင်း ထွက်ပေါ်လာသော လက္ခဏာ ကြီး ဖြစ်ပေါ်ခဲ့ပြီး ယခုအခါ ဂုဏ်ထူးဆောင် ထာဝရနတ်မင်း တစ်ပါး ထပ်မံ သေဆုံးသွားပြန်သဖြင့် တကယ်ကို ဘာတွေ ဖြစ်ပျက်နေသနည်း။

...

မရေမတွက်နိုင်သော အကြည့်များ ဆုံဆည်းရာ ထျန်းရွှမ် တိုက်ကြီး။

ချန်မု က လက်တစ်ချောင်း တည်း ဖြင့် ကောင်းကင်ဝါးမျို မဟာသူတော်စင် ကို သတ်ဖြတ်ပစ်လိုက်ပြီးနောက် လက်ထဲတွင် အရိုးသောင်းချီ တောင်တန်း ကို ကိုင်ဆောင်ထားဆဲ ဖြစ်ပြီး ရှေ့သို့ တည်ငြိမ်စွာ ကြည့်လိုက်သည်။

သူ၏ အရှေ့တွင် လေဟာနယ် က အနည်းငယ် တွန့်လိမ်သွားပြီးနောက် အစိမ်းရောင် အလင်းတန်း များ လွှမ်းခြုံထားသော အမျိုးသမီး တစ်ဦး ၏ ပုံရိပ် က ထွက်ပေါ်လာသည်။

သူမ ပေါ်လာသည် နှင့် တစ်ပြိုင်နက်...

ကောင်းကင်နှင့်မြေကြီး ကို လွှမ်းမိုးထားသော အရှိန်အဝါ က အရပ်လေးမျက်နှာ သို့ ပျံ့နှံ့သွားသည်။

အချိန်တို အတွင်းမှာပင် မိုင်ပေါင်း သန်းချီ ကျယ်ဝန်းသော ထျန်းရွှမ် တိုက်ကြီး တစ်ခုလုံး မှာ တုန်လှုပ်သွားပြီး မရေမတွက်နိုင်သော မိစ္ဆာမျိုးနွယ်စု များ အားလုံး အတွေးများ ရပ်တန့်သွားကာ မြေကြီး ပေါ်တွင် ဝပ်တွား သွားကြတော့သည်။

ထို မိစ္ဆာ ထာဝရနတ်မင်း များ ပင်လျှင် တုန်ယင်စွာဖြင့် ခန္ဓာကိုယ် ကို ကိုင်းညွတ်လိုက်ကြပြီး ထို အစိမ်းရောင် ပုံရိပ် ဆီသို့ ဦးညွှတ်လိုက်ကြတော့သည်။

"ချင်လွမ် ကောင်းကင်နတ်မင်း ကို အရိုအသေ ပေးပါတယ်..."

မိစ္ဆာ ထာဝရနတ်မင်း တစ်ပါး က တုန်ယင်သော အသံဖြင့် ပြောလိုက်သည်။

မကြာမီ မှာပင် အသံများ ဆက်တိုက် ထွက်ပေါ်လာပြီး မိုင်ပေါင်း သန်းချီ ကျယ်ဝန်းသော ထျန်းရွှမ် တိုက်ကြီး တစ်ခုလုံး ရှိ မရေမတွက်နိုင်သော သတ္တဝါများ အားလုံး ဒူးထောက် အညံ့ခံ လိုက်ကြသကဲ့သို့ ပင်ဖြစ်သည်။

လူသား ထာဝရနတ်မင်း များ ပင်လျှင် ရင်ဘတ် ထဲမှနေ၍ ဒူးထောက် ရှိခိုးချင်စိတ် များ ပေါ်လာကြပေသည်။

အားလုံး မျက်နှာပေါ်တွင် တုန်လှုပ်မှု များဖြင့် ထို ပုံရိပ် ကို ကြည့်နေကြပေသည်။

ချင်လွမ် ကောင်းကင်နတ်မင်း။

အစိမ်းရောင် ပိုးသား အင်္ကျီ ပါးပါး ကို ဝတ်ဆင်ထားသော အမျိုးသမီး မှာ ရွှမ်လင်ကမ္ဘာ ၏ ကောင်းကင်နတ်မင်း သုံးပါး ထဲမှ တစ်ပါး ဖြစ်သော ချင်လွမ် ကောင်းကင်နတ်မင်း ပင်ဖြစ်သည်။

သန်းချီသော မိစ္ဆာ နှင့် လူသား များ၏ အကြည့်များ အောက်တွင် ချင်လွမ် ကောင်းကင်နတ်မင်း က နှုတ်ခမ်း လေး ဟကာ ယဉ်ကျေး နူးညံ့သော အသံဖြင့် ပြောလိုက်သည်။

"ဒီလိုဆိုရင်... ရှင်းပြချက် ဖြစ်လောက်ပြီလား..."

ချန်မု က ချင်လွမ် ကောင်းကင်နတ်မင်း ကို တည်ငြိမ်စွာ ကြည့်နေသည်။

သူ၏ ခန္ဓာကိုယ် ပေါ်မှလည်း ကောင်းကင်နတ်မင်း၏ အရှိန်အဝါ တစ်ခု တိတ်တဆိတ် ထွက်ပေါ်လာပြီး အချိန်တို အတွင်းမှာပင် မရေမတွက်နိုင်သော သတ္တဝါများ အားလုံး အမြင်မှား သွားသကဲ့သို့ ခံစားလိုက်ရပြီး ကောင်းကင်ယံ တွင် နေမင်း အသစ် တစ်စင်း ထွက်ပေါ်လာကာ နေနှစ်စင်း မြင့်မားစွာ ထွန်းလင်း နေသကဲ့သို့ ပင်ဖြစ်သည်။

ယန်နတ်ဘုရား ၏ ကြီးကျယ် ခမ်းနားသော အရှိန်အဝါ နှင့် ချင်လွမ် ကောင်းကင်နတ်မင်း ၏ အရှိန်အဝါ တို့ အနည်းငယ် တိုက်မိသွားကြပြီး ကောင်းကင်နှင့်မြေကြီး တစ်ခုလုံး ပင်လျှင် တခဏတာ တုန်လှုပ်သွားသကဲ့သို့ ဖြစ်သွားတော့သည်။

ဤအချိန်တွင်။

ကောင်းကင်နှင့်မြေကြီး ကြားရှိ သတ္တဝါများ အားလုံး တုန်ယင် သွားကြတော့သည်။

အချိန် မည်မျှ ကြာသွားသည် မသိ၊ ချန်မု က ထိုနေရာတွင် ရပ်နေပြီး နောက်ဆုံးတွင် တည်ငြိမ်စွာ ပြောလိုက်သည်။

"ဒီလောက်ဆို ရပါပြီ..."

"ကောင်းပြီလေ..."

ချင်လွမ် ကောင်းကင်နတ်မင်း က ညင်သာစွာ ပြုံးလိုက်ရာ ကောင်းကင် တစ်ခုလုံး ပွင့်လင်းသွားသကဲ့သို့ ဖြစ်ကာ မိုင်ပေါင်း သန်းချီ ကျယ်ဝန်းသော ထျန်းရွှမ် တိုက်ကြီး တစ်ခုလုံး တွင် အသက်ဝင်မှု များ ထွက်ပေါ်လာတော့သည်။

ထို့နောက် သူမ၏ ပုံရိပ် မှာ ရေမြှုပ် လေး တစ်ခု ကဲ့သို့ တဖြည်းဖြည်း မှေးမှိန် ပျောက်ကွယ်သွားတော့သည်။

ချန်မု တစ်ယောက်တည်း သာ ကောင်းကင်ယံ တွင် ရပ်နေပြီး ချင်လွမ် ကောင်းကင်နတ်မင်း ပျောက်ကွယ်သွားသော နေရာကို စိုက်ကြည့်နေပေသည်။

'ကိုယ်ပွား လား...'

သူက တိုးတိုးလေး ရေရွတ်လိုက်သည်။

ဝိညာဉ်အသွင်ပြောင်းခြင်း လမ်းစဉ် ၏ ကောင်းကင်နတ်မင်း မှာ ယန်နတ်ဘုရား လမ်းစဉ် နှင့် မတူညီချေ။

ယန်နတ်ဘုရား ၏ သီးသန့် နတ်ဘုရား စွမ်းအင် မှာ မသေမျိုး စစ်မှန်သော ဝိညာဉ် ဖြစ်ပြီး စိတ်အာရုံ နှင့် ကောင်းကင်နှင့်မြေကြီး ပေါင်းစပ်ကာ မသေနိုင်၊ မပျက်စီးနိုင် သကဲ့သို့ ဝိညာဉ်အသွင်ပြောင်းခြင်း ၏ သီးသန့် နတ်ဘုရား စွမ်းအင် မှာမူ ခန္ဓာကိုယ် ပြင်ပရှိ ကိုယ်ပွား ပင်ဖြစ်သည်။

ပြီးပြည့်စုံသော မူလဝိညာဉ် သည် လောက တွင် လျှောက်သွားရန် ကိုယ်ပွား များ ခွဲထုတ်နိုင်ပြီး အများဆုံး ကိုယ်ပွား သုံးခု အထိ ခွဲထုတ်နိုင်ကာ ချီစွမ်းအင် တစ်ခုတည်းမှ သုံးပိုင်း ခွဲထွက်ခြင်း ဟု ခေါ်ဆိုကြပေသည်။

စောစောက ချင်လွမ် ကောင်းကင်နတ်မင်း မှာ ကိုယ်ပွား တစ်ခု သာ ဖြစ်သည်။

သူမ၏ အစစ်အမှန် ခန္ဓာကိုယ် မှာ လူသား မျိုးနွယ်စု ၏ ယင်ယန် နှင့် ထိုက်ရွှမ် ကောင်းကင်နတ်မင်း နှစ်ပါး ကဲ့သို့ပင် ရွှမ်လင်ကမ္ဘာ တွင် မရှိတော့ဘဲ မည်သည့် နေရာသို့ ရောက်နေမှန်း မသိနိုင်ချေ။