အခန်း ၂၄၂

အခန်း (၂၄၂) လက်အင်္ကျီတစ်ချက်ဝှေ့ယမ်းခြင်း

"အဲဒီစီနီယာပဲ..."

ရွှယ်ရိချိုး ၏ မျက်ဝန်းများထဲတွင် ဝမ်းသာကြည်နူးမှုများ ထွက်ပေါ်လာသည်။

လူသားမျိုးနွယ်စုမှ ထာဝရနတ်မင်း ငါးယောက် ပူးပေါင်းတိုက်ခိုက်လျှင်ပင် တစ်ဖက်ရန်သူ ထာဝရနတ်မင်း တစ်ယောက်ကို မယှဉ်နိုင်ခဲ့ချေ။ သူတို့လို ထာဝရသခင်ကြီးများ ပူးပေါင်းလျှင်လည်း အသူရာတစ်သိန်း သတ်ဖြတ်ခြင်း အစီအရင်ကို ဖျက်ဆီးနိုင်ရန် အလွန်ခက်ခဲလှသည်။ ထို့အပြင် တစ်ဖက်တွင် ထာဝရနတ်မင်း နှစ်ယောက်က ဖိနှိပ်ထားသေးရာ ဤသည်မှာ လုံးဝ မျှော်လင့်ချက် ကင်းမဲ့နေသော အခြေအနေမျိုး ပင်ဖြစ်သည်။

သို့သော် ချန်မု ထွက်ပေါ်လာခြင်းက ဤစစ်ပွဲ၏ ရလဒ်ကို အနည်းငယ် ပြောင်းလဲသွားစေနိုင်သည့် မျှော်လင့်ချက်လေးတစ်ခု ဖြစ်လာစေခဲ့သည်မှာ သေချာလှသည်။

သို့သော် ချန်မုကို မြင်ဖူးခဲ့သော ရွှယ်ရိချိုး အပါအဝင် ကျင့်ကြံသူ အနည်းငယ်မှလွဲ၍ မင်ယွီ ထာဝရနတ်မင်း တို့ပင်လျှင် ချန်မုကို လှမ်းကြည့်လိုက်ချိန်တွင် အနည်းငယ် ကြောင်အမ်းသွားခဲ့ကြသည်။

သူက တကယ့်ကို အဲဒီ လျှို့ဝှက် ပုန်းအောင်းနေတဲ့ ထာဝရနတ်မင်းပဲလား...

သတင်းအချက်အလက် အများအပြားမှတစ်ဆင့် ချန်မု၏ အကြောင်းကို အနည်းအကျဉ်း သိရှိထားကြသော်လည်း သူတို့ အားလုံးက ရှေးခေတ်ကာလမှ သေဆုံးမသွားဘဲ ယနေ့တိုင် ပုန်းအောင်းနေခဲ့သော ထာဝရနတ်မင်း တစ်ယောက် ဖြစ်မည်ဟုသာ ခန့်မှန်းခဲ့ကြသည်။

သို့သော် ယခုအခါ ချန်မုက သူတို့၏ မျက်စိရှေ့တွင် အမှန်တကယ် ပေါ်လာချိန်တွင်မူ သူတို့၏ စိတ်နှလုံးများ အလွန် အံ့အားသင့်သွားကြရသည်။ ပထမအချက်မှာ ချန်မု၏ အရှိန်အဝါသည် အလွန်စိမ်းသက်နေပြီး သူတို့ တစ်ခါမျှ မခံစားဖူးခဲ့သော အရာဖြစ်နေခြင်းကြောင့် ပင်။

အခြားတစ်ဖက်တွင်မူ...

ချန်မု၏ အရှိန်အဝါသည် နက်နဲသိမ်မွေ့လွန်းလှရာ ထာဝရနတ်မင်း အဆင့်ရှိသော သူတို့၏ အာရုံခံနိုင်စွမ်းဖြင့်ပင် ချန်မု၏ ကျင့်ကြံမှု အနိမ့်အမြင့်ကို ချက်ချင်း မခန့်မှန်းနိုင်ခဲ့ကြပေ။

ထိုအချက်ကို တွေးမိလိုက်သည်နှင့် မင်ယွီ ထာဝရနတ်မင်း သည် အခြား ထာဝရနတ်မင်း များနှင့် အချင်းချင်း အကြည့်ချင်း ဖလှယ်လိုက်ကြပြီး အားလုံး၏ မျက်ဝန်းများထဲတွင် အံ့သြဝမ်းသာသည့် အရိပ်အယောင်များကို မြင်တွေ့လိုက်ကြရသည်။

ချန်မု၏ ကျင့်ကြံမှု အနိမ့်အမြင့်ကို အာရုံမခံနိုင်ခြင်းမှာ ချန်မု၏ ကျင့်ကြံမှုက သူတို့ထက် ပိုမိုနက်ရှိုင်းနေခြင်းကြောင့် ဖြစ်ပြီး တာအိုကောင်းကင် ထာဝရနတ်မင်း ကဲ့သို့ တာအိုတစ်ရာ ပေါင်းစပ်ထားသော အဆင့်သို့ပင် ရောက်ရှိနေနိုင်ပေသည်။

အကယ်၍ ချန်မုတွင် ထိုမျှလောက် အစွမ်းထက်သော ကျင့်ကြံမှု ရှိနေမည်ဆိုပါက သွေးအသူရာ ထာဝရနတ်မင်း ကို မယှဉ်နိုင်လျှင်တောင် အနည်းဆုံးတော့ အတန်အသင့် ခုခံတားဆီးနိုင်မည်မှာ သေချာလှသည်။

သွေးအသူရာ ထာဝရနတ်မင်း ကိုသာ တားဆီးထားနိုင်မည်ဆိုပါက သူတို့ငါးယောက်စလုံး ဒဏ်ရာကိုယ်စီ ရရှိထားကြလျှင်တောင် အခြား အသူရာမျိုးနွယ်စု ထာဝရနတ်မင်း နှစ်ယောက်နှင့် အသူရာတစ်သိန်း သတ်ဖြတ်ခြင်း အစီအရင်ကို တားဆီးနိုင်ရန် ယုံကြည်ချက် အပြည့်အဝ ရှိနေကြသည်။

ထို အဖြူရောင် ဝတ်ရုံရှင်လေး ထွက်ပေါ်လာသည်နှင့် တစ်ပြိုင်နက်...

ဤအဆုံးအဖြတ် တိုက်ပွဲ၏ အခြေအနေကို ချက်ချင်း လွှမ်းမိုးသွားစေခဲ့တော့သည်။

"..."

သွေးအသူရာ ထာဝရနတ်မင်း သည်လည်း မျက်မှောင်များ အနည်းငယ် ကြုတ်သွားပြီး အထူးသဖြင့် ချန်မု၏ နက်နဲသိမ်မွေ့လှသော အော်ရာကြောင့် ချက်ချင်းမလှုပ်ရှားရဲဘဲ တွေဝေသွားခဲ့သည်။

ထိုအချိန်မှာပင် ချန်မု က နောက်ဆုံးတွင် လှုပ်ရှားလိုက်ပြီ ဖြစ်သည်။

သူက သွေးအသူရာ ထာဝရနတ်မင်း ၏ မေးခွန်းကို ပြန်မဖြေဘဲ မင်ယွီ ထာဝရနတ်မင်း တို့ကိုလည်း မကြည့်သလို ယခင်က တစ်ကြိမ်ဆုံဖူးသော ရွှယ်ရိချိုး နှင့် အခြား ကျင့်ကြံသူများကိုလည်း အာရုံမစိုက်ချေ။ ခံစားချက်ကင်းမဲ့နေသော မျက်လုံးတစ်စုံဖြင့် သွေးအသူရာ ထာဝရနတ်မင်း ကိုသာ စိုက်ကြည့်ပြီးနောက် ညာဘက်လက်ကို မြှောက်လိုက်သည်။

ရှေ့သို့ ပေါ့ပေါ့ပါးပါး တစ်ချက် ဝှေ့ယမ်းလိုက်သည်။

အဖြူရောင် ဝတ်ရုံလက် က ကောင်းကင်ယံကို ဖြတ်သန်းသွားသည်။

ဗီရိုပေါ်တွင် ကပ်ငြိနေသော ဖုန်မှုန့်များကို ခါထုတ်လိုက်သည့်အလား ပင်ဖြစ်သည်။

ထို အဖြူရောင် ဝတ်ရုံလက် ဖြတ်သန်းသွားရာ နေရာများရှိ အသူရာတစ်သိန်း သတ်ဖြတ်ခြင်း အစီအရင်မှာ ပုံရိပ်ယောင် ပူဖောင်းများအလား အသံတိတ် ပျောက်ကွယ်သွားပြီး အသံတစ်စက်မျှပင် မထွက်ပေါ်လာခဲ့ချေ။ ထာဝရနတ်မင်း တစ်ယောက်၏ တိုက်ခိုက်မှုနှင့် ညီမျှသော ထိုကြောက်မက်ဖွယ် သွေးရောင် လှံတံကြီးမှာလည်း အသံတိတ် ပျက်စီးသွားတော့သည်။

လုယွဲ့၊ တောက်နိုင် နှင့် အခြား သုံးယောက်လုံးမှာ မျက်နှာများ ပြင်းထန်စွာ ပျက်ယွင်းသွားပြီး အဆုံးအစမရှိသော ထိတ်လန့်တုန်လှုပ်မှုများ ပေါ်ထွက်လာကာ မည်သည့် တွေဝေမှုမျှ မရှိဘဲ အလင်းတန်းများအဖြစ် ပြောင်းလဲကာ အဝေးသို့ ထွက်ပြေးရန် ကြိုးစားကြတော့သည်။

သို့သော် မျက်စိတစ်မှိတ်အတွင်း မိုင်သောင်းချီ အကွာအဝေးသို့ ထွက်ပြေးသွားသော်လည်း ထို အဖြူရောင် ဝတ်ရုံလက် ဝှေ့ယမ်းသည့် နယ်ပယ်ထဲတွင် ထူးဆန်းစွာ ကျန်ရှိနေဆဲ ဖြစ်သည်။

အဖြူရောင် ဝတ်ရုံလက် ဖြတ်သန်းသွားသည်နှင့် လုယွဲ့၏ ခန္ဓာကိုယ်မှာ ပုံရိပ်ယောင် ပူဖောင်းများအလား တစ်စစီ ပျောက်ကွယ်သွားပြီး မူလဝိညာဉ် ဓမ္မခန္ဓာနှင့် တာအိုအမှတ်အသား စစ်မှန်သော စွမ်းအင်များကို ထုတ်ဖော်သော်လည်း မည်သို့မျှ အသုံးမဝင်တော့ချေ။

"မဟုတ်ဘူး..."

လက်မခံနိုင်သော အော်ဟစ်သံကြီး တစ်ခုကိုသာ ထုတ်လွှတ်နိုင်ခဲ့ပြီး တစ်ကိုယ်လုံး အရိပ်အယောင်မကျန် ပျောက်ကွယ်သွားတော့သည်။

အခြားတစ်ဖက်ရှိ တောက်နိုင်မှာလည်း မျက်နှာတွင် အလွန် ထိတ်လန့်နေပြီး အသက်ချမ်းသာပေးရန် တောင်းပန်လိုသော်လည်း အသံပင် မထွက်နိုင်ဘဲ တစ်ကိုယ်လုံး မျက်စိတစ်မှိတ်အတွင်း ပျက်စီးပျောက်ကွယ်သွားတော့သည်။

"ဘုန်း..."

သွေးအသူရာ ထာဝရနတ်မင်း လည်း ထိတ်လန့်တုန်လှုပ်မှုနှင့် မယုံကြည်နိုင်မှုများ အပြည့်ဖြစ်နေပြီး ရင်ဘတ်ရှေ့ရှိ သွေးရောင် ကျောက်စိမ်းတစ်ခု ရုတ်တရက် ပေါက်ကွဲထွက်သွားကာ လောကကို လွှမ်းမိုးနိုင်သော ဖိအားတစ်ခု ပေါက်ကွဲထွက်လာပြီး ထို အဖြူရောင် ဝတ်ရုံလက် ကို နောက်ဆုံးတွင် အနည်းငယ် နှေးကွေးသွားစေခဲ့သည်။

သို့သော် သူ၏ မျက်နှာပေါ်တွင် ဝမ်းသာသည့် အရိပ်အယောင် အနည်းငယ်မျှ မပေါ်လာဘဲ ကြောက်ရွံ့ထိတ်လန့်မှုများသာ ပြည့်နှက်နေပြီး စိတ်ထဲတွင် အသံတစ်သံတည်းသာ အဆက်မပြတ် အော်ဟစ်နေတော့သည်။

"ကောင်းကင်နတ်မင်း..."

"ဒါက ဝိညာဉ်အသွင်ပြောင်းခြင်း အဆင့် ကောင်းကင်နတ်မင်း တစ်ပါးပဲ..."

ထို့အပြင် ကြည့်ရသည်မှာ ကိုယ်ပွား မဟုတ်ဘဲ အစစ်အမှန် ကောင်းကင်နတ်မင်း ကိုယ်တိုင်၊ ကောင်းကင်၏ အရှင်သခင် တစ်ပါး ဖြစ်နေသည်။

ရွှေရောင်အမြုတေအဆင့်တွင် ကောင်းကင်နှင့်မြေကြီး၏ စွမ်းအားကို အသုံးပြုနိုင်ပြီး မူလဝိညာဉ်အဆင့်တွင် နယ်မြေတစ်ခုကို ထိန်းချုပ်နိုင်စွမ်း ရှိသော်လည်း ထိုသို့ ထိန်းချုပ်ခြင်း ဆိုသည်မှာ မြေကွက်တစ်ခုပေါ်တွင် ခြံစည်းရိုး ခတ်ထားပြီး မိမိ၏ နယ်မြေအဖြစ် သတ်မှတ်ထားခြင်းမျှသာ ဖြစ်သည်။

ကောင်းကင်နတ်မင်း များသာလျှင် အတွေးတစ်ချက်ဖြင့် ကောင်းကင်နှင့်မြေကြီးကို ပြောင်းလဲနိုင်ပြီး ဤကောင်းကင်နှင့်မြေကြီးကို ဖွဲ့စည်းထားသော အခြေခံ တာအိုအမှတ်အသား စည်းမျဉ်းများကိုပါ အကုန်လုံး ပြန်လည် ရေးဆွဲနိုင်ကာ ၎င်းတို့၏ တည်ရှိမှု ပုံစံကိုပင် စိတ်ကြိုက် ပုံသွင်း ဖန်တီးနိုင်စွမ်း ရှိပေသည်။

သွေးရောင် ကျောက်စိမ်းထဲမှ ထွက်ပေါ်လာသော သွေးစွမ်းအားက ချန်မု၏ ဝတ်ရုံလက် ကို ခဏတာ နှေးကွေးသွားစေသော်လည်း မျက်စိတစ်မှိတ်စာ အချိန်လေးသာ ဖြစ်သည်။

ထိုဝတ်ရုံလက်က သွေးအသူရာ ထာဝရနတ်မင်း ဆီသို့ ဆက်လက် ဝှေ့ယမ်းလာနေဆဲ ဖြစ်သည်။

"ကောင်းကင်ဘိုးဘေး ကယ်ပါဦး..."

သွေးအသူရာ ထာဝရနတ်မင်း က ထွက်ပြေးရန် လက်လျှော့လိုက်ပြီး ကွဲအက်သွားသော သွေးရောင် ကျောက်စိမ်းဆီသို့သာ အကူအညီတောင်းသည့် အသံကို ထုတ်လွှတ်လိုက်သည်။

ကွဲအက်နေသော သွေးရောင် ကျောက်စိမ်းက တဝီဝီ မြည်သွားပြီး အစအနများ အားလုံး အမှုန့်အဖြစ် ပေါက်ကွဲသွားကာ ၎င်းထဲမှ အလင်းတန်း အနည်းငယ် ထွက်ပေါ်လာပြီး အသံတစ်ခု ထွက်ပေါ်လာသည်။

"ဟင်... တာအိုမိတ်ဆွေက..."

သို့သော် ထိုအသံမှာ အပြည့်အဝ ထွက်မလာနိုင်ခင်မှာပင် အဖြူရောင် ဝတ်ရုံလက် ၏ ဖုံးအုပ်ခြင်းကို ခံလိုက်ရပြီး မျက်စိတစ်မှိတ်အတွင်း လုံးဝ ပျက်စီးပျောက်ကွယ်သွားတော့သည်။

သွေးအသူရာ ထာဝရနတ်မင်း ကိုယ်တိုင်လည်း ထိုနေရာတွင် တောင့်တင်းသွားပြီးနောက် တစ်ကိုယ်လုံး အပိုင်းပိုင်းအစစ ပျောက်ကွယ်သွားတော့သည်။

နောက်ဆုံးတွင်...

ကောင်းကင် တစ်ခုလုံးကို လွှမ်းခြုံထားသော သွေးရောင်များ အားလုံးပင်လျှင် အဖြူရောင် ဝတ်ရုံလက် ၏ တစ်ချက် ဝှေ့ယမ်းမှုအောက်တွင် ကြည်လင်သော အပြာရောင် ကောင်းကင်ကြီး အဖြစ်သို့ ပြန်လည် ရောက်ရှိသွားတော့သည်။

အသူရာမျိုးနွယ်စု၏ ထာဝရနတ်မင်း သုံးယောက်နှင့်တကွ အသူရာတစ်သိန်း သတ်ဖြတ်ခြင်း အစီအရင်တို့မှာ စာရွက်ပေါ်ရှိ အရုပ်လေးများအလား အပြာရောင် စုတ်တံဖြင့် တစ်ချက်တည်း ဖျက်ခံလိုက်ရသကဲ့သို့ လုံးဝ ပျောက်ကွယ်သွားကြတော့သည်။

နေရာတစ်ခုလုံး တိတ်ဆိတ်ငြိမ်သက်သွားသည်။

မင်ယွီ အထွတ်အမြတ်နယ်မြေ တစ်ခုလုံး တိတ်ဆိတ်သွားပြီး ရွှယ်ရိချိုး နှင့် အခြားသော ရွှေရောင်အမြုတေအဆင့် ထာဝရသခင်ကြီး အများအပြားမှာ အံ့အားသင့်သည့် အမူအရာများ ပေါ်ထွက်လာကြပြီးနောက် မယုံကြည်နိုင်အောင် ဖြစ်သွားကြတော့သည်။

မင်ယွီ အပါအဝင် ထာဝရနတ်မင်း ငါးယောက်လုံးပင်လျှင် ဤအချိန်တွင် နေရာ၌ပင် တောင့်တင်းနေကြပြီး မျက်ဝန်းများထဲတွင် တုန်လှုပ်ချောက်ချားမှုများ ပေါ်ထွက်နေကြသည်။

"ဒါက..."

ထို ရွှေရောင်အမြုတေအဆင့် ထာဝရသခင်ကြီးများ နှင့် နှိုင်းယှဉ်ပါက ထာဝရနတ်မင်း များ ဖြစ်ကြသော သူတို့က အနည်းငယ် ပို၍ နားလည်နိုင်ကြသည်။

နားလည်နိုင်သောကြောင့်ပင် ပို၍ တုန်လှုပ်ချောက်ချားရပြီး မယုံကြည်နိုင်အောင် ဖြစ်ကာ အံ့ဩမှင်သက်သွားကြရသည်။

သူတို့၏ အမြင်တွင် ချန်မု ဝှေ့ယမ်းလိုက်သည်မှာ ဝတ်ရုံလက် မဟုတ်ဘဲ တစ်ချက် ဝှေ့ယမ်းလိုက်ရုံဖြင့် ကောင်းကင်နှင့်မြေကြီး ကြားရှိ စည်းမျဉ်းများကို တိုက်ရိုက် ကမောက်ကမ ဖြစ်သွားစေပြီး အဆုံးအစမရှိသော ကောင်းကင်နှင့်မြေကြီး လေဟာနယ် တစ်ခုလုံးကို အလုံးတစ်လုံးအဖြစ် ဖိချေပစ်ကာ သွေးအသူရာ ထာဝရနတ်မင်း တို့ကိုပါ အမှုန့်ကြိတ်ပြီး ကွဲအက်နေသော ကောင်းကင်နှင့်မြေကြီး စည်းမျဉ်းများထဲသို့ တိုက်ရိုက် ထည့်သွင်းလိုက်ကာ နောက်ဆုံးတွင် မူလအတိုင်း ပြန်လည် ထားရှိလိုက်ခြင်း ပင်ဖြစ်သည်။

မည်မျှ တွေးကြည့်၍ပင် မရနိုင်လောက်အောင် ကြောက်မက်ဖွယ်ကောင်းသော နည်းလမ်းနည်း။

ကောင်းကင်နှင့်မြေကြီး တစ်ခုလုံးမှာ လက်ဖဝါးထဲရှိ ရွှံ့စေးတစ်တုံးအလား စိတ်ကြိုက် ပုံသွင်း ဖန်တီးနိုင်စွမ်း ရှိနေပြီး မူလဝိညာဉ် ထာဝရနတ်မင်း များ ပိုင်ဆိုင်သော နယ်မြေ ကို များစွာ ကျော်လွန်နေပေသည်။

မူလဝိညာဉ်... အထက် အဆင့်လား...

ချန်မု၏ ကျောပြင်ကို ကြည့်ရင်း မင်ယွီ ထာဝရနတ်မင်း တို့၏ စိတ်ထဲတွင် ဤအတွေးများ ပေါ်ထွက်လာပြီး နက်ရှိုင်းသော ကြောက်ရွံ့ရိုသေမှုများနှင့်အတူ ထိန်းချုပ်မရသော စိတ်လှုပ်ရှားမှုများလည်း ပါဝင်လာတော့သည်။

ရှေးဟောင်း ဒဏ္ဍာရီများတွင် ထာဝရနတ်မင်း အထက်၌ ပိုမို မြင့်မားသော အဆင့်များ ရှိသေးကြောင်း ၎င်းတို့သည် ဤကမ္ဘာကြီးကိုပင် ဖောက်ထွက်နိုင်ပြီး အဆုံးအစမရှိသော လေဟာနယ်တွင် လှည့်လည်သွားလာနိုင်ကြောင်း ဆိုကြသော်လည်း ၎င်းမှာ ဒဏ္ဍာရီမျှသာ ဖြစ်သည်။

သွေးအသူရာ ထာဝရနတ်မင်း ဆင့်ခေါ်ခဲ့သော ပုံရိပ်ယောင် တစ်ခုက တာအိုကောင်းကင် ထာဝရနတ်မင်း အပါအဝင် ထာဝရနတ်မင်း ငါးယောက်ကို သတ်ဖြတ်ခဲ့သဖြင့် ထာဝရနတ်မင်း အထက်တွင် ပိုမို မြင့်မားသော အဆင့်များ အမှန်တကယ် ရှိနေနိုင်ကြောင်း သူတို့ အကြမ်းဖျင်း ခန့်မှန်းမိခဲ့ကြသည်။ ထိုပုံရိပ်ယောင်၏ အစစ်အမှန် ခန္ဓာကိုယ် ပင်ဖြစ်သည်။

သို့သော် ခန့်မှန်းချက်သာ ဖြစ်သည်။

ယခုအခါတွင်မူ မည်သည့် သံသယမျှ မရှိတော့ဘဲ မျက်စိရှေ့တွင် ပေါ်လာပြီး ကောင်းကင်နှင့်မြေကြီး ကြားတွင် ရပ်တည်နေသော ထို အဖြူရောင် ဝတ်ရုံရှင် မှာ ထာဝရနတ်မင်း အထက်တွင် ရှိနေသော၊ ပိုမို မြင့်မားသော အဆင့်သို့ ခြေချနိုင်ခဲ့သူ တစ်ဦး ပင်ဖြစ်သည်။

လက်တစ်ချက်ဝှေ့ရမ်းလိုက်ယုံဖြင့် ဤကမ္ဘာ၏ ဘေးအန္တရာယ်ကြီးကို ဖယ်ရှားပေးခဲ့ခြင်းက မူလဝိညာဉ် အထက်တွင် လမ်းကြောင်း ရှိသေးကြောင်း သက်သေပြနေပြီး ကြောက်ရွံ့ရိုသေသော အကြည့်များအောက်တွင် စိတ်နှလုံးများမှာလည်း မြစ်ရေများအလား လှိုင်းဂယက်များ ထနေတော့သည်။