အခန်း ၂၅၀

အခန်း (၂၅၀) ထိုက်ရွှမ် အလည်လာခြင်း

ထိုက်ရီ ခန်းမဆောင်။

အောက်ဘက်တွင် လူရိပ်များက ရိုသေလေးစားစွာဖြင့်ဖြစ်စေ လေးနက်တည်ကြည်စွာဖြင့်ဖြစ်စေ တည်ငြိမ်အေးချမ်းစွာဖြင့်ဖြစ်စေ နေရာယူထားကြသည်။ ၎င်းတို့အထဲတွင် ချန်ယောင် လုရှီးယွင် အစရှိသူများ ပါဝင်သလို ယန်ဟန်ယွီ လင်းယွဲ့ နင်းချန် အစရှိသော ချန်မု၏ မိတ်ဟောင်းဆွေဟောင်း အများအပြားလည်း ပါဝင်သည်။

ထူးခြားသည်မှာ လူအများစု၏ ကျင့်ကြံမှုမှာ မူလဝိညာဉ် ထာဝရနတ်မင်း အဆင့်သို့ ရောက်ရှိနေကြပြီဖြစ်ပြီး နင်းချန် လျှိုလျန် အစရှိသော လက်ချိုးရေတွက်၍ရသည့် လူအနည်းငယ်သာလျှင် ရွှေရောင်အမြုတေအဆင့် ကျင့်ကြံမှုတွင် ရှိနေသေးသည်။

လူအများ၏ ထိပ်ဆုံးနေရာတွင်မူ ချန်မုက တာအိုဝတ်ရုံကို လွှမ်းခြုံကာ တင်ပျဉ်ခွေ ထိုင်နေသည်။

ယန်နတ်ဘုရား တတိယအဆင့်သို့ ကျော်ဖြတ်ပြီးနောက်ပိုင်း ယခုဆိုလျှင် လေးလ ကြာမြင့်ခဲ့ပြီဖြစ်ရာ ထိုက်ရီ ခန်းမဆောင်တွင် သူ တာအိုတရားဟောကြားရမည့် နေ့ရက်သို့ ရောက်ရှိလာခြင်း ဖြစ်သည်။

ချန်မု၏ နှုတ်ခမ်းမှ ကောင်းကင်နှင့်မြေကြီး တာအိုအနှစ်သာရ မျိုးစုံကို အဆက်မပြတ် ရှင်းလင်းဟောကြားနေသည်။ စကားတစ်ခွန်း ကျဆင်းသွားတိုင်း ခန်းမဆောင်အတွင်း တောက်ပသော အလင်းတန်းများ အဆက်မပြတ် လင်းလက်လာစေပြီး မြေကြီးအောက်မှ ရွှေကြာပန်းများ ထွက်ပေါ်လာကာ ကောင်းကင်ယံမှ ကြယ်ပွင့်လေးများ ကြွေကျလာစေသည်။

သူ ကောင်းကင်နတ်မင်း အဖြစ် ကျင့်ကြံအောင်မြင်ပြီးကတည်းက နှစ်တစ်သောင်းလျှင် တစ်ကြိမ် ရွှမ်လင်ကမ္ဘာရှိ သက်ရှိအားလုံးအတွက် တာအိုတရားဟောကြားလေ့ရှိပြီး နှစ်တစ်ထောင်လျှင် တစ်ကြိမ် ထိုက်ရီ ခန်းမဆောင်တွင် တာအိုတရားဟောကြားလေ့ရှိသည်။ သို့သော် ထိုက်ရီ ခန်းမဆောင်တွင်မူ ချန်ယောင် လုရှီးယွင် အစရှိသော ရင်းနှီးသူများသာ လာရောက် နာကြားခွင့် ရှိသည်။

နှစ်ပေါင်း နှစ်သောင်းကျော်။

သူသည် ဤ ထိုက်ရီ ခန်းမဆောင် အတွင်း၌ တာအိုတရားဟောကြားခဲ့သည်မှာ နှစ်ဆယ့်ခြောက်ကြိမ်တိုင် ရှိခဲ့ပြီ ဖြစ်သည်။

ဤမျှများပြားသော တာအိုတရားဟောကြားမှုများက လူများကို သေရေးရှင်ရေး နက်နဲမှုကို နားလည်သဘောပေါက်စေရန် မစွမ်းဆောင်နိုင်သော်လည်း အပြည့်အဝ နားလည်နိုင်မည်ဆိုပါက ကောင်းကင်နှင့်မြေကြီး တာအိုအနှစ်သာရပိုင်းတွင် အလွန် နက်ရှိုင်းသော နားလည်သဘောပေါက်မှုများကို ရရှိစေမည်ဖြစ်သည်။ အထူးသဖြင့် သူ ယန်နတ်ဘုရား ဒုတိယအဆင့် သို့ ရောက်ရှိပြီးနောက်ပိုင်း ထို့အပြင် မကြာသေးမီက တတိယအဆင့် သို့ ကျော်ဖြတ်ပြီးနောက်ပိုင်းတွင် သူ၏ အမြင်အာရုံမှာ ကမ္ဘာပေါင်း တစ်သိန်းအထိတောင် လွှမ်းခြုံနိုင်နေပြီဖြစ်ရာ တာအိုအမှတ်အသား မျိုးစုံကို လက်ဖျားတွင် စိတ်ကြိုက် ပုံဖော်နိုင်နေပြီ ဖြစ်သည်။

အကယ်၍ သူသာ မရှိခဲ့လျှင် နှစ်ပေါင်း နှစ်သောင်းကျော် ကာလအတွင်း ရွှေရောင်အမြုတေအဆင့် ကျင့်ကြံသူများသည် တာအိုကပ်ဘေး နှစ်ဆယ်ကျော်ကို ဖြတ်သန်းရမည်ဖြစ်ရာ ကျင့်ကြံသူ အများစုမှာ တာအိုကပ်ဘေးအောက်တွင် ပျက်စီးသွားကြမည် ဖြစ်သည်။ သို့သော် သူရှိနေခြင်းကြောင့် ထာဝရနတ်မင်း အဆင့်သို့ မကျော်ဖြတ်နိုင်သေးသော လျှိုလျန် နင်းချန် တို့ပင်လျှင် တာအိုကပ်ဘေး၏ အန္တရာယ်မှ ကင်းဝေးခဲ့ကြသည်။ သို့သော် ထိုလူအနည်းငယ်မှာ သေရေးရှင်ရေး နက်နဲမှုကို ယနေ့တိုင် နားလည်သဘောပေါက်နိုင်ခြင်း မရှိသေးပေ။

ဤအဆင့်မှာ ပါရမီနှင့် ဉာဏ်ရည်ဉာဏ်သွေး ရှိရုံသာမက ခိုင်မာသော တာအိုနှလုံးသားနှင့် စိတ်ဆန္ဒလည်း ရှိရန် လိုအပ်သည်။ နင်းချန် တွင် မူလကတည်းက သန့်စင်သော တာအိုလမ်းစဉ်ကို လျှောက်လှမ်းလိုသည့် စိတ်နှလုံး မရှိသလို လျှိုလျန် မှာလည်း သူမ၏ ပင်ကိုယ်စရိုက်အရ အရာအားလုံးကို စွန့်လွှတ်ကာ သေမင်းကို မကြောက်ရွံ့ဘဲ ရင်ဆိုင်ဝံ့သည့် သတ္တိမျိုး မရှိပေ။

ချန်ယောင် တို့ကတော့ ခြွင်းချက် ဖြစ်သည်။

မူလကတည်းက ပါရမီနှင့် ဉာဏ်ရည်ဉာဏ်သွေး မညံ့ကြသည့်အပြင် သူ၏ အကြိမ်ကြိမ် တာအိုတရားဟောကြားမှုများကို နာကြားရပြီး ရွှမ်လင်ကမ္ဘာ တွင် လွတ်လပ်စွာ စူးစမ်းလေ့လာခွင့် ရထားသဖြင့် ဤနှစ်ပေါင်း နှစ်သောင်းကျော် ကာလအတွင်း သူတို့သည် သေရေးရှင်ရေး တံခါးပေါက်ကို တစ်ယောက်ပြီးတစ်ယောက် ကျော်ဖြတ်ကာ ထာဝရနတ်မင်း အဆင့်သို့ ကျင့်ကြံအောင်မြင်ခဲ့ကြသည်။

ရွှမ်လင်ကမ္ဘာ မှာ ပျက်စီးနေပြီး တာအိုအမှတ်အသား များစွာ ပျောက်ဆုံးနေသော်လည်း ထာဝရနတ်မင်း အဆင့်သို့ ရောက်ရှိသည်မှာ ကပ်ကမ္ဘာ တစ်ခုပင် မပြည့်သေးသော ချန်ယောင် တို့အတွက်မူ ၎င်းတို့၏ တရားထိုင် ကျင့်ကြံမှုအတွက် အလွန် သင့်တော်သော ကမ္ဘာတစ်ခု ဖြစ်နေဆဲ ဖြစ်သည်။

ချန်မုသည် ချန်ယောင် တို့ကို အခြားသော ကမ္ဘာများသို့ စောစီးစွာ စေလွှတ်၍ စူးစမ်းလေ့လာခွင့် ပြုရန် အစီအစဉ် မရှိသေးပေ။

အစပိုင်းတုန်းကတော့ သူ ဒီလို စဉ်းစားခဲ့မိကောင်း စဉ်းစားခဲ့မိလိမ့်မည်။

သို့သော် ယခုအခါ ကျင့်ကြံမှုအဆင့်မှာ ယန်နတ်ဘုရား တတိယအဆင့် သို့ ရောက်ရှိနေပြီဖြစ်သော သူသည် ဤအကြံအစည်ကို ဖျောက်ဖျက်လိုက်ပြီ ဖြစ်သည်။ မည်သို့ပင်ဆိုစေ ချန်ယောင် တို့ကို အခြားကမ္ဘာများသို့ စေလွှတ်၍ စူးစမ်းလေ့လာခွင့် ပြုခြင်းက အန္တရာယ်ရှိနေဆဲဖြစ်ပြီး ရွှမ်လင်ကမ္ဘာ လောက် လုံခြုံမှု မရှိပေ။

သူ၏ လက်ရှိ ကျင့်ကြံမှု အရှိန်အဟုန်ဖြင့်ဆိုလျှင် နောက်ထပ် ကပ်ကမ္ဘာ တစ်ခုခန့် အချိန်ကြာမြင့်ပါက မဟာစွမ်းအားရှင် အဆင့်သို့ပင် ကျော်ဖြတ်နိုင်ကောင်း ကျော်ဖြတ်နိုင်မည် ဖြစ်သည်။ ထိုအချိန်ကျလျှင် ချန်ယောင် တို့ကို မည်သည့်ကမ္ဘာသို့ စေလွှတ်သည်ဖြစ်စေ မည်သည့် အန္တရာယ်မှ ရှိတော့မည် မဟုတ်ပေ။

ချန်မု အဆက်မပြတ် ရှင်းလင်းဟောကြားနေသည်နှင့်အမျှ။

တာအိုအနှစ်သာရများ ယှက်နွယ်လာပြီး တာအိုအမှတ်အသားများ ရုတ်တရက် ပေါ်ထွက်လာသည်။

လျှိုလျန် နှင့် နင်းချန် တို့ကဲ့သို့ ထာဝရနတ်မင်း အဆင့်သို့ မရောက်ရှိသေးသူများမှာ တဖြည်းဖြည်း နားမလည်နိုင်တော့ဘဲ ထိုအထဲတွင် မျက်စိလည်လမ်းမှား ဖြစ်လာကြသည်။

အချိန်များ ကုန်လွန်လာသည်နှင့်အမျှ ချန်ယောင် အပါအဝင် အခြားသော ထာဝရနတ်မင်း များ နားလည်နိုင်စွမ်းမှာလည်း တဖြည်းဖြည်း အမြင့်ဆုံး အကန့်အသတ် သို့ ရောက်ရှိလာသည်။ အဘယ်ကြောင့်ဆိုသော် ယခု ချန်မုမှာ ယန်နတ်ဘုရား တတိယအဆင့် သို့ ရောက်ရှိနေပြီဖြစ်ပြီး သူ၏ အမြင်အာရုံမှာ လေဟာနယ်ကိုပင် ထိုးဖောက်မြင်နိုင်စွမ်း ရှိနေပြီဖြစ်သောကြောင့် ပင်ဖြစ်သည်။

ကောင်းကင်နှင့်မြေကြီး တာအိုပေါင်းစုံမှသည် လေဟာနယ် ပျက်သုဉ်းခြင်းအထိ ဟောကြားလာသောအခါ ထာဝရနတ်မင်း များပင်လျှင် နားမလည်နိုင်တော့ဘဲ သူတို့၏ နယ်ပယ်ကို ကျော်လွန်သွားတော့သည်။

"ဒီလောက်နဲ့ပဲ ရပ်လိုက်ကြတာပေါ့"

နောက်ဆုံးတွင်။

ချန်မုက ရပ်တန့်လိုက်ပြီး ဆက်လက်၍ မဟောကြားတော့ဘဲ ချန်ယောင် တို့ကို မျက်လုံးမှိတ်ကာ ယခင်က ရရှိခဲ့သော နားလည်မှုများကို ခံစားမှတ်သားစေလိုက်သည်။

သူကိုယ်တိုင်ကမူ အဝေးသို့ ငေးမောကြည့်လိုက်ပြီးနောက် ရုတ်တရက် တိတ်တဆိတ် မတ်တပ်ရပ်ကာ အပြင်ဘက်သို့ လျှောက်သွားလိုက်သည်။ ခြေတစ်လှမ်း လှမ်းလိုက်ရုံဖြင့် ခန်းမဆောင် အတွင်းမှ ပျောက်ကွယ်သွားပြီး ထိုက်ရီ ခန်းမဆောင် ၏ အထက် ကောင်းကင်ယံသို့ ရောက်ရှိသွားကာ အရှေ့ဘက်သို့ လှမ်းကြည့်လိုက်သည်။

ထိုကောင်းကင်၏ အဆုံးစွန်တွင် ဘယ်အချိန်ကတည်းက ပေါ်လာမှန်းမသိသော ဆံပင်ဖြူ အဘိုးအို တစ်ဦးက ဖြည်းညှင်းစွာ ခြေလှမ်းများ လှမ်းလာနေသည်။ ခြေလှမ်းများမှာ ဖြည်းညှင်းသော်လည်း ကောင်းကင်နှင့်မြေကြီးကို တိုင်းတာနေသကဲ့သို့ ရှိပြီး ခြေနှစ်လှမ်းခန့် လှမ်းလိုက်ရုံဖြင့် ချန်မု၏ အရှေ့ မလှမ်းမကမ်းသို့ ရောက်ရှိလာကာ မျက်နှာပေါ်တွင် အပြုံးတစ်ခု ထွက်ပေါ်နေသည်။

ထိုက်ရွှမ် ကောင်းကင်နတ်မင်း။

ယခင်က ရောက်လာခဲ့သော ကိုယ်ပွားနှင့် မတူညီဘဲ ယခုတစ်ကြိမ် ရောက်ရှိလာသည်မှာ ထိုက်ရွှမ် ကောင်းကင်နတ်မင်း ၏ အစစ်အမှန် ခန္ဓာကိုယ် ဖြစ်ပြီး သူ၏ ကိုယ်ပေါ်ရှိ စတုတ္ထအဆင့် ကျင့်ကြံမှု အရှိန်အဝါကို ချန်မု၏ မျက်လုံးများထဲတွင် ရှင်းလင်းစွာ မြင်တွေ့နေရသည်။

"ထိုက်ရွှမ် တာအိုမိတ်ဆွေ လာရောက်လည်ပတ်တာကို အဝေးကနေ မကြိုဆိုနိုင်ခဲ့ဘူး"

ချန်မုက ထိုက်ရွှမ် ကောင်းကင်နတ်မင်း ကို လက်ယှက်အရိုအသေပေးကာ ယဉ်ကျေးစွာ ပြောလိုက်သည်။

ထိုက်ရွှမ် ကောင်းကင်နတ်မင်း က ချန်မုကို ကြည့်ကာ ပြုံးလိုက်ပြီး မျက်ဝန်းများထဲတွင် အံ့အားသင့်သည့် အရိပ်အယောင် အနည်းငယ် ပါဝင်နေကာ ပြောလိုက်သည်။ "ချန် တာအိုမိတ်ဆွေက ယဉ်ကျေးလွန်းနေပါပြီ မျက်စိတစ်မှိတ်အတွင်း နှစ်သောင်းလောက် မတွေ့ရတဲ့အချိန်မှာ တာအိုမိတ်ဆွေရဲ့ ကျင့်ကြံမှုက အများကြီး ထပ်တက်သွားပြန်ပြီပဲ"

လွန်ခဲ့သော နှစ်ပေါင်း နှစ်သောင်းကျော်က ချန်မု ယန်နတ်ဘုရား အဖြစ်သို့ ကျော်ဖြတ်ပြီးစ အချိန်တွင် သူ၏ ကိုယ်ပေါ်ရှိ ယန်နတ်ဘုရား စွမ်းအားများကို ဖုံးကွယ်ထား၍ မရသလောက်ပင် ဖြစ်ရာ သွားလေရာတိုင်းတွင် ကောင်းကင်ယံရှိ တောက်ပသော နေမင်းကြီး တစ်စင်းအလား ဖြစ်နေပြီး သူ၏ ကိုယ်ပွားပင်လျှင် ချန်မု၏ ကျင့်ကြံမှု အဆင့်ကို အလွယ်တကူ ခွဲခြားသိရှိနိုင်ခဲ့သည်။

သို့သော် ယခုမူ။

နှစ်ပေါင်း နှစ်သောင်းကျော် ကြာပြီးနောက် ချန်မု၏ အရှိန်အဝါများမှာ လုံးဝ ငုပ်လျှိုးသွားခဲ့ပြီ ဖြစ်ရာ သူ၏ အစစ်အမှန် ခန္ဓာကိုယ် ဤနေရာတွင် ရှိနေလျှင်ပင် ချန်မု၏ ကိုယ်ပေါ်ရှိ အရှိန်အဝါကို ဝိုးတဝါးသာ မြင်နိုင်တော့သည်။ ဤသည်မှာ သူ၏ ကျင့်ကြံမှု အဆင့်ကို လုံးဝ ခိုင်မာသွားစေပြီ ဖြစ်ကြောင်း ရှင်းလင်းစွာ ပြသနေသည်။

အံ့အားသင့်မှုနှင့်အတူ ထိုက်ရွှမ် ကောင်းကင်နတ်မင်း ၏ စိတ်နှလုံးထဲတွင်လည်း အဆုံးစွန် ဝိညာဉ်လမ်းစဉ် ကျင့်ကြံသူ ဆိုသည်မှာ နှစ်ပေါင်း နှစ်သောင်းကျော်လေးအတွင်းမှာတင် ယန်နတ်ဘုရား အဆင့်ကို လုံးဝ ခိုင်မာသွားအောင် လုပ်နိုင်ပါလားဟု သက်ပြင်းချမိသည်။ အကယ်၍ အဆင့်သစ်တက်လာသော ဝိညာဉ်အသွင်ပြောင်းခြင်း ကောင်းကင်နတ်မင်း တစ်ပါးဆိုလျှင် ကပ်ကမ္ဘာ တစ်ခု နှစ်ခုအတွင်း၌ မိမိ၏ ကောင်းကင်နှလုံးသား ဆန္ဒနှင့် ကောင်းကင်နတ်မင်း အရှိန်အဝါကို ဖုံးကွယ်ထားနိုင်ရန် ခက်ခဲလှပေမည်။

ဒါပေါ့။

ချန်မု ဤမျှ မြန်ဆန်စွာ မိမိ၏ ကျင့်ကြံမှုကို ခိုင်မာစေခြင်းမှာ သူ့အတွက်လည်း ကောင်းသော အရာတစ်ခု ဖြစ်သည်။ မည်သို့ပင်ဆိုစေ သူ၏ အစစ်အမှန် ခန္ဓာကိုယ် အနီးကပ် ရှိနေတာတောင် ချန်မုက အဆုံးစွန် ဝိညာဉ်လမ်းစဉ် ကျင့်ကြံသူ မှန်း တစ်ချက်တည်းနှင့် မသိနိုင်လျှင် အခြားသူများလည်း အလွယ်တကူ သိမြင်နိုင်မည် မဟုတ်ပေ။

ထိုအချိန်ကျလျှင် ချန်မုနှင့် အတူပူးပေါင်းကာ အမှောင် လေဟာနယ်ကမ္ဘာ ကို စူးစမ်းလေ့လာရာတွင် များစွာ ပိုမို အဆင်ပြေချောမွေ့မည် ဖြစ်သည်။

"နည်းနည်းလေးပါပဲ"

ချန်မုက ထိုက်ရွှမ် ကောင်းကင်နတ်မင်း ကို ခေါင်းအနည်းငယ် ညိတ်ပြလိုက်သည်။

ထိုက်ရွှမ် ကောင်းကင်နတ်မင်း က ပြုံးကာ ပြောလိုက်သည်။ "ချန် တာအိုမိတ်ဆွေက နှိမ့်ချလွန်းနေပါပြီ တာအိုမိတ်ဆွေက ကပ်ကမ္ဘာ တစ်ခုတောင် မရှိတဲ့ အချိန်လေးအတွင်းမှာ ယန်နတ်ဘုရား ကောင်းကင်နတ်မင်း အဖြစ် ကျင့်ကြံအောင်မြင်ခဲ့ရုံသာမက ကျင့်ကြံမှု အဆင့်ကိုလည်း ခိုင်မာအောင် လုပ်နိုင်ခဲ့တယ် ဒါဟာ ကန်းယွင် မြစ်ဝှမ်းဒေသ တစ်ခုလုံးမှာတောင် အလွန် အံ့မခန်း ထူးချွန်တဲ့သူ ဖြစ်ပြီး အနာဂတ်မှာ ကန်းယွင် မြစ်ဝှမ်းဒေသ မှာ နာမည်ကျော်ကြားတဲ့ တည်ရှိမှု တစ်ခု ဖြစ်လာမှာ သေချာပါတယ်"

ဤနေရာအထိ ပြောပြီးနောက် ထိုက်ရွှမ် ကောင်းကင်နတ်မင်း က အနည်းငယ် ရပ်တန့်လိုက်ပြီး ဆက်ပြောသည်။ "ကဲ ငါတို့တွေ သိပ်ပြီး ယဉ်ကျေးနေစရာ မလိုပါဘူး ဒီတစ်ခေါက် အဘိုးကြီး ငါလာခဲ့တာက တာအိုမိတ်ဆွေနဲ့ အမှောင် လေဟာနယ်ကမ္ဘာ ကို စူးစမ်းလေ့လာမယ့် အကြောင်း အသေးစိတ် ဆွေးနွေးဖို့ပါ အဲဒီ အမှောင် လေဟာနယ်ကမ္ဘာ ပွင့်ဖို့က နှစ်နှစ်ထောင်ပဲ လိုတော့တယ်လေ"

"ကောင်းပြီ တာအိုမိတ်ဆွေ ကြွပါ"

ချန်မုက ညင်သာစွာ လက်ဝှေ့ယမ်းလိုက်ရာ သူ၏ နောက်ကျောဘက်တွင် သူ ဖန်တီးထားသော လျှို့ဝှက်ကမ္ဘာ သို့ ဆက်သွယ်ထားသည့် တံခါးပေါက်တစ်ခု ပေါ်လာသည်။

အမှောင် လေဟာနယ်ကမ္ဘာ နှင့် ပတ်သက်၍ သူ သိပ်မသိလှပေ။ အဘယ်ကြောင့်ဆိုသော် ဤနှစ်ပေါင်း နှစ်သောင်းကျော် ကာလအတွင်း သူသည် ပြင်ပ ကောင်းကင်နတ်မင်း များနှင့် အလွန် နည်းပါးစွာ ဆက်သွယ်ခဲ့ပြီး တတ်နိုင်သမျှ ရှောင်ရှားခဲ့သောကြောင့် ဖြစ်သည်။ မဆက်သွယ်လျှင် မလိုအပ်သော ပြဿနာများစွာကို ရှောင်ရှားနိုင်မည် ဖြစ်သည်။ မည်သို့ပင်ဆိုစေ လွန်ခဲ့သော အချိန်များစွာက သူသည် အသူရာ မျိုးနွယ်စုမှ ဝိညာဉ်အသွင်ပြောင်းခြင်း ကောင်းကင်နတ်မင်း တစ်ပါးကို သတ်ဖြတ်ခဲ့ဖူးပြီး အသူရာ မျိုးနွယ်စု နှင့် ရန်ငြိုးဖွဲ့ထားခဲ့ဖူးသည် မဟုတ်ပါလော။

သို့သော် ယခုအခါတွင်မူ အရေးမကြီးတော့ပေ။ ယန်နတ်ဘုရား တတိယအဆင့် ကျင့်ကြံမှုဖြင့် လေဟာနယ်သန့်စင်ခြင်း အဆင့် မဟာစွမ်းအားရှင် များနှင့် ရင်ဆိုင်ရလျှင်ပင် အသက်ရှင်လွတ်မြောက်နိုင်စွမ်း ရှိနေပြီဖြစ်ရာ ကန်းယွင် မြစ်ဝှမ်းဒေသ အတွင်း လွတ်လပ်စွာ သွားလာနိုင်နေပြီ ဖြစ်သည်။ အရင်က ထိုက်ရွှမ် ကောင်းကင်နတ်မင်း နှင့် အတူတကွ အမှောင် လေဟာနယ်ကမ္ဘာ ကို စူးစမ်းလေ့လာရန် ကတိပေးထားခဲ့ဖူးရာ ထိုနေရာသို့ တစ်ခေါက်လောက် သွားရောက်ကြည့်ရှုရမည် ဖြစ်သည်။

"ကြွပါ"

ထိုက်ရွှမ် ကောင်းကင်နတ်မင်း သည်လည်း ယဉ်ကျေးစွာ အမူအရာ ပြသလိုက်ပြီး ချန်မု၏ နောက်မှ လိုက်ပါသွားတော့သည်။