အခန်း ၂၆၁

အခန်း (၂၆၁) ယန်နတ်ဘုရား တတိယအဆင့်

ချင်းလွမ်နှင့် ထိုက်ရွှမ်တို့၏ တုန်လှုပ်နေသော အကြည့်များအောက်တွင် မိုင်သန်းပေါင်းများစွာ ကျယ်ပြောသော သမုဒ္ဒရာကြီးမှာ လေဟာနယ်အတွင်း ခဏတာ တွန့်လိမ်သွားပြီးနောက် ပြင်းထန်သော အသံကြီးနှင့်အတူ ပြိုကွဲပျက်စီးသွားတော့သည်။

ပြိုကွဲသွားသော သမုဒ္ဒရာကြီးထဲမှ တောက်ပသော ရွှေရောင်အလင်းတန်းတစ်ခု ထွက်ပေါ်လာပြီး ထိုအလင်းရောင်မှာ ရွှမ်လင်ကမ္ဘာရှိ နေမင်းကြီးထက်ပင် အဆပေါင်းများစွာ ပိုမို တောက်ပနေသည်။ ထိုအလင်းတန်း၏ အလယ်ဗဟိုမှာ ရွှေရောင် မဟုတ်တော့ဘဲ အလင်းရောင် ဟုပင် ခေါ်ဆို၍ မရနိုင်တော့ဘဲ တဖြည်းဖြည်းနှင့် အဖြူရောင် အဖြစ်သို့ ပြောင်းလဲသွားတော့သည်။

အရာအားလုံးကို လွှမ်းခြုံနိုင်သော အဖြူရောင်။

အရာအားလုံးကို ထိုးဖောက်ဝင်ရောက်နိုင်သော အဖြူရောင်။

အရာအားလုံး၏ နေရာကို အစားထိုးနိုင်သော အဖြူရောင်။

ထိုအဖြူရောင်ထဲမှ ရွှေရောင်ကြိုး လေးချောင်းက လေဟာနယ်အတွင်းသို့ ထိုးထွက်လာသည်။

ဤရွှေရောင်ကြိုး လေးချောင်းသည် မိုင်သန်းပေါင်းများစွာသော သမုဒ္ဒရာကြီးကို ဆုတ်ဖြဲပစ်ခဲ့ပြီး နတ်ဘုရားအလင်းတန်းများကို ဖျက်ဆီးကာ တာအိုပညာရပ်များကို ပြိုကွဲစေခဲ့သည်။ ကြိုးများ၏ အဆုံးတွင် အလင်းတန်းလေးခုကို တင်းကျပ်စွာ ချည်နှောင်ထားပြီး ထိုအလင်းတန်းများမှာ မည်မျှပင် ရုန်းကန်နေစေကာမူ ရုန်းထွက်နိုင်ခြင်း မရှိပေ။

ထို အလင်းတန်းလေးခုထဲတွင် ပုံရိပ်လေးခု ရှိနေပြီး ၎င်းတို့မှာ မင်မူ၊ နယဲ့လင်၊ ဝူဝမ့်နှင့် ရှန်းဟိုင်တို့ ပင်ဖြစ်သည်။

ယခုအချိန်တွင်။

ဝူဝမ့် ကောင်းကင်နတ်မင်း၏ ကောင်းကင်ကံကြမ္မာ မျက်လုံးသုံးလုံး ဖြစ်စေ၊ မင်မူ ကောင်းကင်နတ်မင်း၏ သွေးရောင် မျက်လုံး ဒါဇင်ပေါင်းများစွာ ဖြစ်စေ ထိုရွှေရောင်ကြိုးများ၏ အဆုံးရှိ သန့်စင်သော အဖြူရောင်ကို ကြည့်ရင်း လုံးဝ မယုံကြည်နိုင်သော အမူအရာများ ထွက်ပေါ်နေကြသည်။

"တတိယအဆင့် မဖြစ်နိုင်ဘူး"

မင်မူ ကောင်းကင်နတ်မင်း၏ ပါးစပ်ကြီးထဲမှ သွားပေါင်းထောင်ချီမှာ တစ်ခုနှင့်တစ်ခု ပွတ်တိုက်သွားပြီး မယုံကြည်နိုင်စွာဖြင့် စူးရှသော အသံကြီးဖြင့် အော်ဟစ်လိုက်ရာ သူမ၏ ခန္ဓာကိုယ်ပေါ်ရှိ အကြေးခွံတိုင်းမှ ထူးဆန်းသော အမှတ်အသားများ ထွက်ပေါ်လာတော့သည်။

အကြေးခွံတိုင်းတွင် အမှတ်အသားပေါင်း သောင်းချီရှိပြီး သေချာကြည့်မည်ဆိုလျှင် ထိုအမှတ်အသားတိုင်းကို ပိုမိုသေးငယ်သော အမှတ်အသားပေါင်း သန်းချီဖြင့် ဖွဲ့စည်းထားကာ အားလုံးပေါင်းလိုက်ပါက ဘီလီယံနှင့်ချီ၍ ရှိနေမည်ဖြစ်သည်။

"ဝုန်း"

ထိုအမှတ်အသားများ၏ အလင်းရောင်နှင့်အတူ မင်မူ ကောင်းကင်နတ်မင်း၏ ပိုးကောင်ခန္ဓာကိုယ်ကြီးမှာ ရွှေရောင်ကြိုးများ၏ ချည်နှောင်မှုအောက်တွင် ကြီးမားလာပြီး မျက်စိတစ်မှိတ်အတွင်း အဆပေါင်းများစွာ ကြီးမားလာကာ ရွှေရောင်အလင်းတန်းများကို ဖောက်ထွက်ပြီး ရွှေရောင်ကြိုးများကို ဖြတ်တောက်ရန် ကြိုးစားနေသည်။

သို့သော် ရွှေရောင်ကြိုးများ ထွက်ပေါ်လာရာ သန့်စင်သော အဖြူရောင်ထဲမှ တည်ငြိမ်သော နှာခေါင်းရှုံ့သံတစ်ခု ထွက်ပေါ်လာသည်။

ရွှေရောင်အလင်းတန်းများ ပြိုကွဲသွားသော်လည်း ရွှေရောင်ကြိုးများမှာ ချက်ချင်းပင် အတွင်းသို့ တင်းကျပ်သွားပြီး မင်မူ ကောင်းကင်နတ်မင်း၏ ခန္ဓာကိုယ်ကို တင်းကျပ်စွာ ချည်နှောင်လိုက်ကာ သူမ၏ အကြေးခွံများကြားသို့ ထိုးဖောက်ဝင်ရောက်သွားပြီး ဆက်လက်၍ တင်းကျပ်သွားတော့သည်။

"မဟုတ်ဘူး"

မင်မူ ကောင်းကင်နတ်မင်းက ထိတ်လန့်တုန်လှုပ်စွာ အော်ဟစ်လိုက်သည်။

"ဖောင်း"

အသံမှာ ချက်ချင်း ရပ်တန့်သွားသည်။

ဝူဝမ့်နှင့် ရှန်းဟိုင်တို့ကို အလွန် ခေါင်းခဲစေခဲ့ပြီး ဖျက်ဆီးရန် ခက်ခဲလှသော သူမ၏ ပိုးကောင်ခန္ဓာကိုယ်ကြီးမှာ ဖရဲသီးတစ်လုံးအလား အပိုင်းပိုင်းအစစ ပေါက်ကွဲသွားပြီး လေဟာနယ်ထဲတွင် မျက်စိတစ်မှိတ်အတွင်း ပျောက်ကွယ်သွားတော့သည်။

ရှန်းဟိုင်၊ နယဲ့လင်နှင့် ဝူဝမ့်တို့ သုံးဦးမှာ ဤမြင်ကွင်းကို ကြည့်ရင်း အလွန် ထိတ်လန့်သွားကြပြီး အားလုံးမှာ အစွမ်းကုန် ကြိုးစားကာ တောက်ပသော နတ်ဘုရားအလင်းတန်းများကို ထုတ်ဖော်၍ ရုန်းထွက်ရန် ကြိုးစားကြပြီး စိတ်ထဲတွင်လည်း လုံးဝ မယုံကြည်နိုင်ဖြစ်နေကြသည်။

တတိယအဆင့်…

ယန်နတ်ဘုရား တတိယအဆင့်….

ဘယ်လိုလုပ်ပြီး ဒီလို ကြောက်မက်ဖွယ်ကောင်းတဲ့ တည်ရှိမှုက ရုတ်တရက် ပေါ်လာရတာလဲ။

အကယ်၍ ပထမအဆင့် ဒါမှမဟုတ် ဒုတိယအဆင့် ဆိုလျှင်တော့ ပြဿနာ မရှိသော်လည်း ဤတတိယအဆင့် ဆိုသည်မှာ လေဟာနယ်သန့်စင်ခြင်း အဆင့် မဟာစွမ်းအားရှင်များထက်ပင် ပိုမို ရှားပါးသော တည်ရှိမှု ဖြစ်သည်။ ကန်းယွင် မြစ်ဝှမ်းဒေသတွင်သာမက အနီးနားရှိ အခြားသော မြစ်ဝှမ်းဒေသများတွင်ပါ ယန်နတ်ဘုရား တတိယအဆင့်ရှိသော အဆုံးစွန် ကောင်းကင်နတ်မင်း ရှိသည်ဟု တစ်ခါမျှ မကြားဖူးခဲ့ပေ။

တည်ငြိမ်သော်လည်း ခုခံ၍မရနိုင်သော အဆုံးစွန် ဝိညာဉ်စွမ်းအားကို ခံစားနေရရင်း ရှန်းဟိုင် ကောင်းကင်နတ်မင်း၏ စိတ်ထဲတွင် ထိတ်လန့်ခြင်းနှင့်အတူ စိတ်ဓာတ်ကျခြင်း၊ မျှော်လင့်ချက်မဲ့ခြင်းနှင့် အရှုံးပေးလိုခြင်း စသည့် ခံစားချက်များ ဖြစ်ပေါ်လာသည်။

၎င်းမှာ ယန်နတ်ဘုရား တတိယအဆင့်၏ စိတ်ဆန္ဒ ဖိနှိပ်မှုကြောင့် ဖြစ်မှန်း သိသော်လည်း သူ လုံးဝ မခုခံနိုင်ပေ။

"တတိယအဆင့်"

ကောင်းကင်နတ်မင်းနှင့် မဟာစွမ်းအားရှင်တို့အကြား ကွာခြားချက်မှာ အလွန် ကြီးမားလှသည်။ နဝမအဆင့်ရှိသော အထွတ်အထိပ် ကောင်းကင်နတ်မင်း ပင်လျှင် အစစ်အမှန် လေဟာနယ်သန့်စင်ခြင်း အဆင့် မဟာစွမ်းအားရှင်၏ ရှေ့တွင် ခုခံနိုင်စွမ်း လုံးဝ မရှိဘဲ မျက်စိတစ်မှိတ်အတွင်း ချေမှုန်းခံရနိုင်သည်။

ကန်းယွင် မြစ်ဝှမ်းဒေသရှိ ကောင်းကင်နတ်မင်း အများစု မသိသော်လည်း ရှန်းဟိုင် သည် အခြားသော မြစ်ဝှမ်းဒေသများတွင် ယန်နတ်ဘုရား တတိယအဆင့်၏ တည်ရှိမှုမှာ နဝမအဆင့်နှင့် ညီမျှရုံသာမက မဟာစွမ်းအားရှင်များ၏ ရှေ့တွင် မိမိကိုယ်ကို ကာကွယ်နိုင်စွမ်း ရှိကြောင်း ကြားဖူးခဲ့သည်။

သူတို့သည် မဟာစွမ်းအားရှင် တစ်ဝက် နီးပါး ဖြစ်နေပြီဖြစ်သည်။

ကျင့်ကြံမှုအရ နဝမအဆင့်နှင့် ညီမျှသည်ဟု ဆိုသော်လည်း အမှန်တကယ်တွင်မူ နဝမအဆင့်သို့ ရောက်မှသာ ယန်နတ်ဘုရား တတိယအဆင့်၏ ရှေ့တွင် မိမိကိုယ်ကို ကာကွယ်ရန်နှင့် ထွက်ပြေးရန် စွမ်းရည် ရှိမည်ဖြစ်ပြီး နဝမအဆင့် အောက်ရှိသူများမှာမူ ယန်နတ်ဘုရား တတိယအဆင့်ကို လုံးဝ ခုခံနိုင်စွမ်း မရှိပေ။

ထိုသို့ တွေးမိသည်နှင့်

ရှန်းဟိုင် ကောင်းကင်နတ်မင်းက ရုန်းကန်မှုကို ချက်ချင်း ရပ်တန့်လိုက်ပြီး ပြောလိုက်သည်။

"တာအိုမိတ်ဆွေ ရပ်ပါတော့ ကျွန်တော် အရှုံးပေးပါတယ် တာအိုမိတ်ဆွေရဲ့ အမိန့်ကို နာခံပါ့မယ် ကျေးဇူးပြုပြီး အသက်ချမ်းသာပေးပါ"

စကားအဆုံးတွင်

အတွင်းသို့ တင်းကျပ်နေသော ရွှေရောင်ကြိုးမှာ ချက်ချင်းပင် အတော်လေး နှေးကွေးသွားတော့သည်။

တစ်ချိန်တည်းမှာပင် ဝူဝမ့် ကောင်းကင်နတ်မင်းနှင့် နယဲ့လင် ကောင်းကင်နတ်မင်းတို့ နှစ်ဦးကို ချည်နှောင်ထားသော ရွှေရောင်ကြိုးများမှာ ရုတ်တရက် လင်းလက်သွားပြီး ဝိညာဉ်စွမ်းအားများ ပြင်းထန်လာကာ အတွင်းသို့ ဖိနှိပ်သွားတော့သည်။

ဒုက္ခပဲ

သူတို့နှစ်ဦးစလုံးမှာ ထိတ်လန့်သွားကြပြီး အသနားခံရန် ပြင်လိုက်ကြသည်။

သို့သော် နောက်ကျသွားပြီဖြစ်သည်။ စကားပင် မပြောနိုင်သေးမီ ရွှေရောင်ကြိုးများက သူတို့နှစ်ဦး၏ မူလဝိညာဉ် အလင်းတန်းများကို ပြင်းထန်စွာ ဖိချေလိုက်ပြီး သတ္တမအဆင့် မူလဝိညာဉ်များကို အထပ်ထပ် ဖိချေကာ ဖန်ပုတီးတစ်လုံးအလား ပေါက်ကွဲသွားစေတော့သည်။

"ဘုန်း"

"ဘုန်း"

တုံးတိတိ အသံနှစ်ခု ထွက်ပေါ်လာသည်။

ရွှေရောင်ကြိုးများမှာ လျင်မြန်စွာ မှိန်ဖျော့သွားပြီး ဝူဝမ့်နှင့် နယဲ့လင် ကောင်းကင်နတ်မင်းတို့၏ ပုံရိပ်များမှာလည်း ပျောက်ကွယ်သွားတော့သည်။

လေဟာနယ်ထဲတွင် ရှန်းဟိုင် ကောင်းကင်နတ်မင်း တစ်ဦးတည်းသာ ရွှေရောင်ကြိုး၏ ချည်နှောင်မှုကို ခံထားရဆဲဖြစ်ပြီး ရွှေရောင်ကြိုးက သူ့ကို ညင်သာစွာ ဆွဲယူကာ အလယ်ဗဟိုရှိ သန့်စင်သော အဖြူရောင်ထဲသို့ ဆွဲသွင်းသွားတော့သည်။

အဖြူရောင်မှာ အနည်းငယ် လှိုင်းထသွားပြီးနောက် ထိုအထဲမှ မျက်နှာအင်္ဂါ ငါးခုသာ ပါဝင်သော ဝိုးတဝါး မျက်နှာတစ်ခု ပေါ်ထွက်လာသည်။

ထိုမျက်နှာမှာ ချန်မု၏ မျက်နှာနှင့် ဆင်တူပေသည်။

သူက ရှန်းဟိုင် ကောင်းကင်နတ်မင်းကို တည်ငြိမ်စွာ ကြည့်ရင်း ပြောလိုက်သည်။ "ကပ်ဘေး သုံးခုအတွင်း ငါ့ရဲ့ ခိုင်းစေမှုကို နာခံရမယ်"

"နာခံပါ့မယ်"

ရှန်းဟိုင် ကောင်းကင်နတ်မင်းက ခါးသီးစွာ ပြုံးလိုက်သည်။

သူ တာအိုအောင်မြင်ပြီးချိန်မှစ၍ ယခုအထိ ကပ်ဘေး သုံးဆယ်ကျော် ဖြတ်သန်းခဲ့ပြီး ဖြစ်ရာ ကပ်ဘေး သုံးခုဆိုသည်မှာ မရှည်လျားသလို မတိုတောင်းလှပေ။ ၎င်းမှာ နှစ်သန်းပေါင်းများစွာ ကြာမြင့်မည်ဖြစ်ပြီး အလယ်အလတ် သို့မဟုတ် အသေးစား ကမ္ဘာအချို့၏ ဖြစ်တည်မှုမှ ပျက်စီးမှုအထိ အချိန်ကာလနှင့် ညီမျှပေသည်။

ကပ်ဘေး သုံးဆယ်တိုင်တိုင် ခက်ခဲစွာ ကျင့်ကြံခဲ့ရပြီး သတ္တမအဆင့်သို့ ရောက်ရှိလာခဲ့ရာ အရာအားလုံး ဖျက်ဆီးခံရမည့်အစား ချန်မု၏ ခိုင်းစေမှုကို ကပ်ဘေး သုံးခုတိုင်တိုင် နာခံရခြင်းမှာ လက်မခံနိုင်စရာ မဟုတ်ပေ။ အဘယ်ကြောင့်ဆိုသော် ယန်နတ်ဘုရား တတိယအဆင့် ဆိုသည်မှာ အခြားသော မြစ်ဝှမ်းဒေသများတွင် မဟာစွမ်းအားရှင် တစ်ဝက် အဖြစ် သတ်မှတ်ခံထားရသောကြောင့် ပင်ဖြစ်သည်။

"ရွှစ်"

အဖြူရောင်ထဲမှ အလင်းစက်လေးတစ်ခု ထွက်ပေါ်လာပြီး ရှန်းဟိုင် ကောင်းကင်နတ်မင်း၏ မျက်ခုံးကြားသို့ ဝင်ရောက်သွားသည်။

ရှန်းဟိုင် ကောင်းကင်နတ်မင်းသည်လည်း မခုခံဘဲ ထိုအလင်းစက်လေးကို သူ၏ မျက်ခုံးကြားမှတစ်ဆင့် ဝိညာဉ်နက်ရှိုင်းရာသို့ ဝင်ရောက်ခွင့် ပြုလိုက်ရာ သူ၏ မူလဝိညာဉ် အတွင်း၌ သေးငယ်သော အမှတ်အသားတစ်ခု အဖြစ် စုစည်းသွားတော့သည်။

သူ မျက်လုံးပြန်ဖွင့်လာသောအခါ စိတ်ထဲတွင် သက်ပြင်းတစ်ချက် ချလိုက်မိပြီး ဘေးရှိ အဖြူရောင်ကို နားမလည်နိုင်စွာဖြင့် လှမ်းကြည့်လိုက်မိသည်။

ခမ်းနားလှသော ယန်နတ်ဘုရား တတိယအဆင့် ကျင့်ကြံသူ၊ လေဟာနယ်သန့်စင်ခြင်း အဆင့် မဟာစွမ်းအားရှင်များ၏ ဧည့်သည်တော်၊ မဟာစွမ်းအားရှင် တစ်ဝက်နီးပါး ရှိသော တည်ရှိမှု တစ်ခုက ဤ အမှောင် လေဟာနယ်ကမ္ဘာထဲသို့ ဘာလာလုပ်သနည်း။ လေဟာနယ် မူလသလင်းကျောက် ပင်လျှင် သူ့အတွက် အသုံးဝင်မည် မဟုတ်ပေ။

အကယ်၍ ကန်းယွင် အပျက်အစီး သို့မဟုတ် ကမ္ဘာ့သစ်ပင် တို့တွင် တွေ့ဆုံရပါက သူသည် ထိုနေရာများတွင် ပိုမို သတိထားမည် ဖြစ်သော်လည်း ဤ အမှောင် လေဟာနယ်ကမ္ဘာ ဆိုသည်မှာ အဋ္ဌမအဆင့်နှင့်အထက် ကောင်းကင်နတ်မင်းများ လာရောက်လေ့ မရှိသော တတိယမြောက် တားမြစ်နယ်မြေ ဖြစ်ရာ ဤနေရာတွင် ယန်နတ်ဘုရား တတိယအဆင့်ရှိသော တည်ရှိမှု တစ်ခုနှင့် တွေ့ဆုံရခြင်းမှာ တကယ့်ကို ကံဆိုးလွန်းလှသည်။ သို့သော်လည်း ကပ်ဘေး သုံးခုစာ ခိုင်းစေခံရမည့် အပေးအယူဖြင့် အသက်ဘေးမှ လွတ်မြောက်ခဲ့ရခြင်းမှာ ကံကောင်းသည်ဟုပင် ဆိုရပေမည်။

"ဂလု"

ရွှေရောင်ကြိုးများနှင့်တကွ မိုင်သန်းပေါင်းများစွာသော လေဟာနယ်ကို လင်းလက်စေခဲ့သော ရွှေရောင်အလင်းတန်းများမှာ တဖြည်းဖြည်း မှိန်ဖျော့သွားတော့သည်။

အလယ်ဗဟိုရှိ သန့်စင်သော အဖြူရောင်မှာလည်း တိတ်ဆိတ်စွာ အရည်ပျော်သွားပြီး အတွင်းသို့ စုစည်းသွားကာ လူပုံစံတစ်ခုအဖြစ် ပြောင်းလဲသွားပြီး နောက်ဆုံးတွင် အလင်းရောင်များ လုံးဝ ပျောက်ကွယ်သွားကာ တာအိုဝတ်ရုံကို ဝတ်ဆင်ထားသော ချန်မုက တည်ငြိမ်သောအမူအရာဖြင့် ဖြည်းညှင်းစွာ ထွက်လာတော့သည်။