အခန်း ၁၇၂

အခန်း (၁၇၂) ရတနာရှာဖွေရေး တာဝန်သစ်

ရွှီယန်က မြေအနည်းငယ် ဖောင်းကြွနေသော နေရာတစ်ခုကို စမ်းမိသွားပြီး မြေကြီးကို ဖယ်ရှားကြည့်လိုက်ရာ ထိုအထဲတွင် အနက်ရောင် အရာတစ်ခု ရှိနေသည်ကို တကယ်ပင် တွေ့လိုက်ရသည်။

သူက အနည်းငယ် အားစိုက်၍ ကလော်လိုက်သည်နှင့် မှိုနက်ကို အလွယ်တကူ ထုတ်ယူနိုင်ခဲ့၏။

"ကြည့်... ငါရှိတယ်လို့ ပြောသားပဲ... ဒီနေရာက တော်တော်လေး ကွယ်နေတော့ သာမန်လူတွေ ရှာမတွေ့နိုင်ဘူးလေ... တောင်ပေါ်ကြီးက အရမ်းကျယ်ပြီး ရတနာတွေလည်း အများကြီး ရှိပေမယ့် ရှာတွေ့ဖို့က အဲဒီလောက် မလွယ်ဘူးနော်"

ရွှီယန်က မှိုနက်ကို လိုက်ဖ်မြင်ကွင်းတွင် ပြသရင်း အင်တာနက်သုံးစွဲသူများကို ပြောလိုက်သည်။

အင်တာနက်သုံးစွဲသူများက ထိုမှိုနက်ကို မြင်လိုက်ရသောအခါ ချက်ချင်းပင် အနည်းငယ် စိတ်မသက်မသာ ဖြစ်သွားကြ၏။

'ဒီကောင် ဘယ်လိုလုပ်ပြီး တူးတွေ့သွားပြန်တာလဲ'

မှိုနက်ကို မသိသူ အချို့ကလည်း လိုက်ဖ်ထဲတွင် ကွန်မန့်များ ရေးလာကြသည်။

'လိုက်ဖ်လွှင့်သူရေ... ဒါက တိရစ္ဆာန် ချေး မဟုတ်ဘူးဆိုတာ သေချာရဲ့လား... အမည်းရောင် အတုံးကြီးပါလား'

'ဟုတ်တယ်... တိရစ္ဆာန် ချေးကို ယူပြီး ငါတို့ကို လာမလိမ်နဲ့နော်'

ရွှီယန်က ထိုကွန်မန့်များကို မြင်သော်လည်း တည်ငြိမ်နေဆဲပင် ဖြစ်၏။

မည်သို့ပင်ဖြစ်စေ ဤအရာက တကယ့် မှိုနက် အစစ်အမှန် ဖြစ်သည် မဟုတ်ပါလား။ အခြားသူများ မည်သို့ပင် ပြောဆိုနေပါစေ အမှန်တရားကို ပြောင်းလဲ၍ မရနိုင်ချေ။

"ဒါတွေက အကောင်းစား ပစ္စည်းတွေချည်းပဲ... ဆောင်းတွင်းရောက်မှ အရည်အသွေး အကောင်းဆုံးဖြစ်တာ... နွေရာသီ နှောင်းပိုင်းတုန်းက နည်းနည်း တူးဖူးတယ်... အဲဒီအချိန်က မှိုနက်တွေက အဝါရောင်သန်းနေပြီး ရုပ်ထွက်ရော အရသာပါ သိပ်မကောင်းသေးဘူး... အဲဒါကြောင့် အခုအချိန်ရောက်မှ ကျွန်တော် လာခဲ့တာလေ... စောင့်ဆိုင်းရတာက အကျိုးရှိပါတယ်"

ရွှီယန်က မှိုနက်ကို မြှောက်ကိုင်ကာ ဆက်လက် ပြသနေသည်။

ထိုအချိန်တွင် ကျားသစ်ပေါက်လေးက သိချင်စိတ်ဖြင့် တိုးကပ်လာပြီး မှိုနက်၏ အနံ့ကို နှာခေါင်းဖြင့် ရှူရှိုက်ကြည့်လိုက်၏။

တစ်ချက်မျှ အနံ့ခံကြည့်လိုက်ရုံဖြင့် ၎င်းက ရွံရှာသွားဟန်ဖြင့် အနောက်သို့ ခြေနှစ်လှမ်းခန့် ချက်ချင်း ဆုတ်သွားကာ နှာချေလိုက်ပြီး ခေါင်းကိုပင် ရမ်းခါပစ်လိုက်သည်။

၎င်း၏ မျက်နှာတစ်ပြင်လုံးတွင် ငြင်းဆန်လိုသည့် အမူအရာများ အပြည့်ဖြစ်နေသည်ကို သိသာစွာ မြင်တွေ့နိုင်ပေသည်။

ဤမြင်ကွင်းကို မြင်လိုက်ရသောအခါ ကွန်မန့်များက ပို၍ပင် ပွက်လောရိုက်သွားတော့၏။

'လောင်ရွှီ... အဲဒါ တိရစ္ဆာန် ချေးပဲ ဖြစ်ရမယ်... ကြည့်ပါဦး ရှောင်ဟွာ တောင် ဘယ်လောက် ရွံသွားလဲဆိုတာ'

'ရှောင်ဟွာက... မင်းက ဘာလို့ ချေးတွေနဲ့ ဆော့နေတာလဲလို့ ပြောနေတဲ့ပုံပဲ'

'ဟားဟားဟား... ဒီကျားသစ်ဝဝကြီးက ဒီလောက်တောင် ချစ်စရာကောင်းတာလား... ငါက အရမ်း ကြမ်းတမ်းမယ်လို့ ထင်နေတာ'

'ဒီအကောင်ကြီးက တကယ်ကို ချစ်စရာလေးပဲ'

ရွှီယန်က မှိုနက်ကို သိမ်းဆည်းလိုက်ပြီး ဆက်လက် ရှာဖွေနေလိုက်သည်။

သို့သော် နားလည်တတ်ကျွမ်းသူ အချို့ကတော့ ထိုအရာသည် မှိုနက်မှန်း ကြည့်လိုက်သည်နှင့် သိရှိကြပေသည်။ အပေါ်ယံ အခွံတွင် ခွေးနှာခေါင်းရှိ အရေးအကြောင်းများကဲ့သို့ အကွက်ငယ်လေးများ အများအပြား ရှိနေခြင်းက မှိုနက်၏ ထူးခြားသော လက္ခဏာပင် ဖြစ်၏။

ရွှီယန်က ဤသို့ဖြင့် နှင်းပြင်ထဲတွင် ဆက်လက် ယက်ယက်ပြီး ရှာဖွေနေလိုက်သည်။

သူက လက်အိတ်စွပ်ကာ နှင်းလွှာများကို တစ်လွှာချင်း ဖယ်ရှားလိုက်ပြီး မြေကြီးများကို ဖော်ထုတ်လိုက်၏။ နှင်းများက အသစ်စက်စက်များ ဖြစ်ပြီး ယခုလေးတင် ကျထားသဖြင့် မခဲသေးဘဲ အစိုင်အခဲ မဖြစ်သေးရာ ဆားပွင့်များကဲ့သို့ နှင်းပွင့် အစေ့အဆန်လေးများကို သာမန်မျက်စိဖြင့်ပင် မြင်တွေ့နိုင်ပေသည်။

ဖယ်ရှားလိုက်သည်နှင့် နှင်းပွင့် အစေ့အဆန်လေးများ လိမ့်ဆင်းသွားသည်ကို မြင်တွေ့နိုင်၏။

ဤမြင်ကွင်းက ကြည့်ရသည်မှာ အလွန် ဆွဲဆောင်မှု ရှိလှသည်။ အထူးသဖြင့် နှင်းနှင့် မဆော့ဖူးသူများအတွက် ပို၍ပင် ဆွဲဆောင်မှု ရှိနေပေသည်။ နှင်း၏ အနေအထားက တကယ်ကို အံ့ဩဖွယ် ကောင်းလှ၏။

ထိုအချိန်တွင် ကျားသစ်ပေါက်လေးက ရွှီယန် နှင်းနှင့် ဆော့ကစားနေသည်ဟု ထင်မှတ်ကာ ရွှီယန်၏ ပုံစံကို အတုခိုးပြီး နှင်းပြင်ထဲတွင် ဟိုယက်ဒီယက် စတင် လုပ်ဆောင်တော့သည်။

ထို့နောက် ၎င်းက မြေကြီးပေါ်တွင် လှဲချကာ အားရပါးရ လူးလှိမ့်တော့ရာ ချက်ချင်းပင် နှင်းပွင့်များ လွင့်စဉ်ထွက်သွားတော့၏။

ဒရုန်းက ကောင်းကင်ယံမှနေ၍ ဤမြင်ကွင်းကို လိုက်ဖ်လွှင့်နေသည်။

တောနက်ကြီးထဲရှိ ငွေရောင်လွှမ်းခြုံနေသော အဖြူရောင် ကမ္ဘာကြီးထဲတွင် လူတစ်ယောက်က မြေကြီးပေါ်၌ ဆောင့်ကြောင့်ထိုင်ကာ တစ်ခုခုကို ရှာဖွေနေပြီး ကျားသစ်တစ်ကောင်ကတော့ ဘေးတွင် အားရပါးရ လူးလှိမ့် ဆော့ကစားနေ၏။

လိုက်ဖ်မြင်ကွင်းက အလွန် အံ့မခန်းဖြစ်ပြီး ကြည့်နေရင်းနှင့်ပင် စိတ်ဖိစီးမှုများ ပြေပျောက်သွားသလို ခံစားရပေသည်။

အထူးသဖြင့် အိမ်တွင် လှဲလျောင်းကာ ကြည့်ရှုနေသူများအတွက် ပို၍ပင် သက်သောင့်သက်သာ ရှိသလို ခံစားရစေ၏။

ရွှီယန်က ခဏမျှ ဆက်လက် ရှာဖွေပြီးနောက် မြေကြီးထဲမှနေ၍ မီးသွေးကဲ့သို့ မည်းနက်နေသော မှိုနက် အတော်များများကို ထပ်မံ ရှာတွေ့ခဲ့သည်။

ဤကဲ့သို့သော တောရိုင်း မှိုနက်များက တန်ဖိုး အမြင့်ဆုံးပင် ဖြစ်၏။

ရွှီယန်က မှိုနက်များကို ရှာဖွေနေစဉ် ရှောင်ဟွာ က သူ၏ ဘေးတွင် အဆက်မပြတ် ဆော့ကစားနေပြီး ရွှီယန်ကိုပင် အကြိမ်အနည်းငယ် ဝင်တိုက်မိသေးသည်။

"ရှောင်ဟွာ... ဟေ့ကောင် ရှောင်ဟွာ... နည်းနည်း ငြိမ်ငြိမ်နေစမ်းပါ... မင်း ကူညီစရာ မလိုတော့ဘူး... ဒီအတိုင်းလေးပဲ ငြိမ်ငြိမ်နေ"

ရွှီယန်က ၎င်းကို အလျင်အမြန် တားဆီးရတော့သည်။

ဤမြင်ကွင်းကို ကြည့်ပြီး အင်တာနက်သုံးစွဲသူများက မနေနိုင်ဘဲ ရယ်မောလိုက်ကြ၏။

နောက်ဆုံးတွင်တော့ ရွှီယန်က မှိုနက် ရှစ်ခု ကိုးခုခန့် ရှာတွေ့ခဲ့ရာ အိတ်တစ်လုံး အပြည့်ဖြစ်သွားပြီး ခန့်မှန်းခြေအားဖြင့် ယွမ် ထောင်ဂဏန်းခန့် တန်ဖိုးရှိပေသည်။

ယနေ့လည်း တစ်ရက်တည်းနှင့် ယွမ် ထောင်ဂဏန်းခန့် ရှာနိုင်ခဲ့သည့် နေ့တစ်နေ့ပင် ဖြစ်၏။

'တကယ်ကို ဇိမ်ကျတာပဲ'

လယ်ယာခြံဝင်း ပိုင်ရှင် တစ်ယောက်အနေဖြင့် နေ့တိုင်း မျက်လုံးဖွင့်လိုက်သည်နှင့် ကုန်ကျစရိတ် အများအပြား ရှိနေသဖြင့် ပိုက်ဆံရှာရန်ကို အမြဲတမ်း တွေးတောနေရမည် မဟုတ်ပါလား။

ဤသို့မှသာ စိတ်အေးရမည် ဖြစ်၏။

မှိုနက်များကို တူးဖော်ပြီးနောက် ယနေ့အတွက် ရတနာရှာဖွေရေး သံလိုက်အိမ်မြှောင်ကို အသုံးမပြုရသေးကြောင်း ရွှီယန် သတိရသွားသည်။

အနည်းငယ် ဝေးဝေးသို့ လျှောက်သွားပြီးမှ အသုံးပြုရန် သူ ရည်ရွယ်ထား၏။

"ဒီနေရာ တစ်ဝိုက်က မှိုနက်တွေကို အကုန် တူးလို့ပြီးသွားပြီ... အရမ်း သေးလွန်းတဲ့ ဟာလေးတွေ နည်းနည်း ကျန်သေးပေမယ့် နောက်တစ်နှစ် ဆက်ကြီးဖို့ ထားခဲ့လိုက်တော့မယ်... ဘယ်လိုပဲဖြစ်ဖြစ် နှစ်တိုင်း ပေါက်လာမှာပဲလေ... ဒီနေရာက ကျွန်တော့်ရဲ့ နှစ်ကုန် ဘောနပ်စ် ရတဲ့ နေရာလို့တောင် ပြောလို့ရတယ်... နှစ်တိုင်း လာပြီး ဆုလာထုတ်ရုံပဲ... ခံစားရတာ တကယ်ကို မိုက်တယ်နော်"

ရွှီယန်က မတ်တတ်ရပ်ကာ လက်အိတ်ပေါ်မှ နှင်းများကို ခါချရင်း ပေါ့ပေါ့ပါးပါး ပြောလိုက်သည်။

'လောင်ရွှီ... မင်းပြောတာ အပိုတွေ မဟုတ်ဘူးလား... ငါသာ ပိုက်ဆံ ထောင်ချီပြီး ကောက်ရရင် ငါလည်း အရမ်း မိုက်တယ်လို့ ခံစားရမှာပဲ'

'တောင်ပေါ်တက်ပြီး ပိုက်ဆံရှာချင်ပေမယ့် လိုက်ဖ်လွှင့်သူလို အရည်အချင်း မရှိရင် ဘယ်လိုလုပ်ရမလဲ'

'လိုက်ဖ်လွှင့်သူရေ... တပည့် လက်ခံသေးလား... မင်းနောက်ကို လိုက်ပြီး မင်း အိုတဲ့အထိ ပြုစု စောင့်ရှောက်ပေးချင်လို့ပါ'

လိုက်ဖ်ထဲတွင် နောက်တစ်ကြိမ် ဆူညံသွားတော့၏။

ရွှီယန်က ကွန်မန့်များကို သိပ်ပြီး ဂရုမစိုက်ဘဲ အရှေ့ဘက်သို့ တောက်လျှောက် ဆက်လျှောက်သွားလိုက်သည်။

ဤအကြောင်းရင်းကြောင့်ပင် လိုက်ဖ်ထဲရှိ လူအရေအတွက်က သုံးလေးသောင်း ဝန်းကျင်တွင် တည်ငြိမ်နေခြင်း ဖြစ်နိုင်ပေသည်။

အားလုံးက ကြည့်ချင်သည့်အခါ ဝင်ကြည့်ကြရုံသာ ဖြစ်၏။

တကယ်တော့ ဤသို့ ဖြစ်နေခြင်းကလည်း ကောင်းမွန်လှသည်။

အကယ်၍ နေ့တိုင်း လူတစ်သိန်းကျော် ကြည့်ရှုနေမည်ဆိုပါက နာမည်ကျော်ကြားမှု အလွန် မြင့်မားနေကြောင်းကို ပြသနေပြီး မကောင်းသည့် ကိစ္စရပ်များစွာကို သေချာပေါက် ဖြစ်ပေါ်စေနိုင်၏။

ဥပမာအားဖြင့် လူအချို့က လယ်ယာခြံဝင်းအထိ သူ့ကို လာရှာခြင်းမျိုးပင် ဖြစ်သည်။

အငြင်းပွားမှုများ နည်းပါးလေလေ အကောင်းဆုံးပင် ဖြစ်၏။

လူတစ်ယောက်နှင့် ကျားသစ်တစ်ကောင်က ခရီးကို ဆက်လက် ထွက်ခွာလာခဲ့ကြသည်။

လေတိုက်ခတ်လာပြီး မြေပြင်ပေါ်ရှိ နှင်းပွင့်များပေါ်မှ ဖြတ်သန်းသွားရာ နှင်းမှုန်များကို လွင့်စဉ်လာစေ၏။

ကြည့်ရသည်မှာ လေတွင်လည်း ပုံသဏ္ဌာန် ရှိနေသည့်အလားပင်။

အရှေ့ဘက်ရှိ နှင်းပြင်က အလွန် သန့်ရှင်း ပြန့်ပြူးနေပြီး ရွှီယန် ခြေချလိုက်သည်နှင့် ခြေရာတစ်ကြောင်း ချန်ရစ်ခဲ့ပေသည်။

သူက လိုက်ဖ်ကို ခဏမျှ ထပ်ပိတ်ထားလိုက်ပြီး အခြေအနေ အဆင်ပြေပြီဟု ထင်သောအခါမှသာ လိုက်ဖ်ကို ပြန်ဖွင့်လိုက်၏။

ယခုအခါ သူက တောနက်ကြီးထဲသို့ အတော်လေး ရောက်ရှိနေပြီ ဖြစ်သည်။

ထို့ကြောင့် ရွှီယန်က ရတနာရှာဖွေရေး တာဝန်ကို အသုံးပြုရန် ရွေးချယ်လိုက်၏။

'ရတနာရှာဖွေရေး တာဝန် စတင်ပါသည်... ဆောင်းခိုနေသော ဝက်ဝံနက်ကို အစာကျွေးပါ'

'တာဝန် ဖော်ပြချက်... ဝက်ဝံနက် တစ်ကောင်က ဆောင်းခိုမည့် အခြေအနေသို့ ရောက်ရှိတော့မည် ဖြစ်သော်လည်း ၎င်း၏ ခန္ဓာကိုယ်ထဲတွင် စုဆောင်းထားသော စွမ်းအင်များက ဤဆောင်းရာသီ တစ်ခုလုံးကို ဖြတ်ကျော်နိုင်ရန် မလုံလောက်ပေ... လက်ခံသူ အနေဖြင့် ငါးမျှား၍ ရလာသော ငါးများဖြင့် ဝက်ဝံနက်ကို အစာကျွေးပါ... သတ်မှတ်ထားသော ငါး အရေအတွက်အထိ ကျွေးရန် လိုအပ်ပါသည်'

'တာဝန် အချိန်ကန့်သတ်ချက်... ၇၂ နာရီ'

'တာဝန် ဆုလာဘ်... စွမ်းရည် (ခွန်အား မြှင့်တင်ခြင်း)... လက်ခံသူ၏ ခွန်အား အနည်းငယ် မြင့်တက်လာပါမည်'

စနစ်၏ တာဝန်က မျက်စိရှေ့တွင် ပေါ်လာခဲ့၏။

'ဝက်ဝံနက်ကို အစာကျွေးရမယ် ဟုတ်လား'

ရွှီယန်က စိတ်ထဲမှ တိတ်တဆိတ် တွေးလိုက်သည်။

ဝက်ဝံနက်များကို သူ သိထားပြီးဖြစ်ကာ ချန်ပိုင်တောင်တန်းတွင် မျက်လုံးမကောင်းသည့် ဝက်ဝံနက်များ အများအပြား ရှိနေတတ်သည် မဟုတ်ပါလား။

ဝက်ဝံများက ဆောင်းခိုတတ်ကြပြီး ဆောင်းတွင်း မရောက်မီ အစားအစာများကို အများအပြား စားသုံးထားကာ ကျောက်ဂူ သို့မဟုတ် သစ်ခေါင်း တစ်ခုခုကို ရှာဖွေ၍ ဆောင်းရာသီ တစ်ခုလုံး အိပ်စက်တတ်ကြ၏။

သို့သော် တစ်ခါတစ်ရံတွင် ဗိုက်မဝသော ဝက်ဝံနက်များ ရှိတတ်ပြီး ဆောင်းတွင်း၌ ဗိုက်ဆာသဖြင့် နိုးလာကာ အပြင်ထွက်ပြီး အစာရှာတတ်ကြသည်။

ထိုကဲ့သို့သော ဝက်ဝံနက်များက အတော်လေး သနားစရာ ကောင်းလှပေသည်။ ဆောင်းတွင်းတွင် အမဲလိုက်ရန်က ထိုမျှ မလွယ်ကူလှချေ။

တောင်ပေါ် တစ်ခွင်လုံး နှင်းများ ဖုံးလွှမ်းနေပြီး မြစ်များနှင့် ရေကန်များ အားလုံးလည်း ရေခဲများ အေးခဲနေတတ်၏။

ယေဘုယျအားဖြင့် အစာရှာမတွေ့နိုင်ဘဲ အအေးဒဏ်ကြောင့် သေဆုံးသွားခြင်း သို့မဟုတ် ငတ်မွတ်၍ သေဆုံးသွားခြင်းမျိုးသာ ရှိပေသည်။

သဘာဝတရားကြီးက အလွန် ရက်စက်လှပြီး သစ်တောထဲတွင် ဤကဲ့သို့သော ကိစ္စမျိုး ဖြစ်ပျက်ခြင်းကလည်း ပုံမှန်ပင် ဖြစ်၏။

'ဘယ်ဝက်ဝံနက်များ ဖြစ်နေမလဲ မသိဘူး... အရင်တုန်းက ငါ မိန်းမ ရှာပေးခဲ့တဲ့ အကောင်များလား... ဘာပဲဖြစ်ဖြစ်ပါလေ... ဝက်ဝံနက် ဆောင်းတွင်းမှာ ဗိုက်ဆာပြီး နိုးလာတော့မယ်ဆိုတာ သိနေမှတော့ သူ့ကို ကယ်တင်ရမှာပဲ... ဒီနေ့က အချိန် သိပ်မရှိတော့ဘူး... ငါးမျှားတံလည်း မပါလာဘူးဆိုတော့ မနက်ဖြန်မှ ထွက်လာပြီး ရေခဲပြင် ငါးမျှားရင်း နောက်ထပ် တစ်ရက် လိုက်ဖ်လွှင့်ရမယ်... လောလောဆယ် လယ်ယာခြံဝင်းမှာလည်း အားနေတာဆိုတော့ အချိန်ကိုက်ပဲ'

ရွှီယန်က အစီအစဉ်များ ချမှတ်လိုက်သည်။

ထို့နောက် ဝက်ဝံနက်၏ ဂူအပြင်ဘက်သို့ အရင် သွားကြည့်ရန် သူ ရည်ရွယ်လိုက်၏။

အင်တာနက်သုံးစွဲသူများကို သစ်တောထဲတွင် ဆောင်းခိုနေသော မျက်လုံးမကောင်းသည့် ဝက်ဝံနက်များအကြောင်း ဗဟုသုတ ဝေမျှပေးရန် ဖြစ်သည်။

မည်သို့ပင်ဖြစ်စေ ရွှီယန်နှင့် ရှောင်ဟွာ တို့ ရှိနေသဖြင့် ဝက်ဝံနက် ထွက်လာလျှင်တောင် ၎င်းက ထွက်ပြေးရုံသာ ရှိမည် မဟုတ်ပါလား။

လူတစ်ယောက်နှင့် ကျားသစ်တစ်ကောင်က တကယ်ကို မကြောက်ရွံ့ကြချေ။

ရွှီယန်က သွားစရာ နေရာမရှိသည့်အလား ဟန်ဆောင်ကာ အရှေ့သို့ ဆက်လျှောက်သွားလိုက်၏။

သိပ်မကြာခင်မှာပင် သူက တောင်နံရံ တစ်ခု၏ အစွန်းသို့ ရောက်ရှိသွားခဲ့သည်။

ဤတောင်က ကျောက်တောင် တစ်ခုဖြစ်ပြီး ပတ်ဝန်းကျင် တစ်ဝိုက်တွင် မညီမညာဖြစ်နေသော ကျောက်တုံးများ အပြည့်ဖြစ်နေ၏။

ထိုအထဲတွင် အလွန် ကြီးမားသော ကျောက်ဂူ အချို့လည်း ရှိနေသေးသည်။

ဤမြင်ကွင်းကို မြင်လိုက်ရသောအခါ ရွှီယန်က ချက်ချင်းပင် ပြောလိုက်၏။

"အားလုံးပဲ ဒီဘက်ကို ကြည့်လိုက်... ဒီကျောက်ဂူတွေထဲမှာ ဝက်ဝံတွေ ရှိနေနိုင်တယ်... ဝက်ဝံတွေက ဆောင်းခိုတဲ့အခါ ကျောက်ဂူတွေကို ရှာလေ့ရှိတယ်... အပြင်ဘက်မှာ အရိုးကွဲမတတ် အေးခဲနေရင်တောင် ဂူထဲမှာကတော့ နွေးထွေး သက်သောင့်သက်သာ ရှိနေတုန်းပဲ... ဝက်ဝံတွေက ဂူထဲမှာပဲ အိပ်ကြတာလေ... ဒါပေမဲ့ ဒီလို ဂူကြီးတွေထဲမှာတော့ ဝက်ဝံတွေ မရှိလောက်ဘူး... အနွေးဓာတ် မထိန်းနိုင်လို့... ဝက်ဝံတွေ အများဆုံး ရှိနိုင်တာက မြေကြီးနဲ့ ကပ်နေပြီး ဂူဝမှာ သစ်ရွက်ကြွေတွေ စုပုံနေတဲ့ အနိမ့်ပိုင်း ဂူမျိုးတွေပဲ... သူတို့ အထဲဝင်လို့ရသရွေ့ ဒီလိုနေရာမျိုးကိုပဲ သေချာပေါက် ရွေးချယ်ကြမှာ"

ရွှီယန်၏ စကားကို ကြားသောအခါ အားလုံးက ချက်ချင်း သိချင်စိတ်ဖြင့် ကြည့်ရှုလိုက်ကြ၏။

ဤလိုက်ဖ်လွှင့်သူက တကယ်ကို သတ္တိကောင်းလှပေသည်။

တောရိုင်းထဲသို့ ပြေးလာပြီး ဝက်ဝံနက် ဆောင်းခိုသည့် ကျောက်ဂူအကြောင်းကို လာရောက် မိတ်ဆက်ပေးနေသည် မဟုတ်ပါလား။

မျက်လုံးမကောင်းသည့် ဝက်ဝံနက် ခုန်ထွက်လာမည်ကိုတောင် မကြောက်ရွံ့ချေ။

'လောင်ရွှီ... နည်းနည်း သတိထားပါဦး... ဝက်ဝံနက် တစ်ကောင် ပြေးထွက်လာပြီး မင်းကို ဂူထဲ ဆွဲသွင်းသွားမှာကို ငါတောင် ကြောက်နေပြီ'

'လောင်ရွှီ က ကြည့်ရတာ ငယ်ငယ်ကတည်းက အဆော့သန်မယ့်ပုံပဲ... တောင်ပေါ်ကို မကြာခဏ ပြေးတက်လေ့ရှိမှာ သေချာတယ်'

'ပြောပြရင် မင်းတို့ ယုံချင်မှ ယုံမှာ... သူက အရှေ့မြောက်ကျား ကိုတောင် မကြောက်ဘဲ သွားပွတ်သပ်ရဲတာ... သူက သာမန်လူ မဟုတ်ဘူးဆိုတာကို ငါ သိနေခဲ့တာ'

'အဲဒီတော့ ဒီကျောက်ဂူတွေထဲမှာ ဝက်ဝံ ရှိနေတာလား'

အားလုံး စကားပြောနေကြစဉ် ရွှီယန်က တာဝန် ပစ်မှတ်ဖြစ်သော ဝက်ဝံဂူဆီသို့ ရောက်ရှိလာခဲ့၏။

ထင်သည့်အတိုင်းပင် ကျောက်တောင်၏ အောက်ခြေဆုံးရှိ ကျောက်ဂူ တစ်ခုဖြစ်ပြီး အပြင်ဘက်တွင် သစ်ရွက်များဖြင့် ကွယ်ထားကာ အက်ကွဲကြောင်း တစ်ခုသာ ချန်ထားခဲ့သည်။

အတွင်းမှနေ၍ လေနွေးများ ထွက်ပေါ်လာသည်ကို သာမန်မျက်စိဖြင့်ပင် မြင်တွေ့နိုင်ပေသည်။

ထို့အပြင် အနံ့အနည်းငယ်လည်း ထွက်ပေါ်နေသော်လည်း ဤအချိန်တွင်တော့ အနံ့က သိပ်မပြင်းထန်လှချေ။

"လခွမ်း... တကယ်ကြီး ဝက်ဝံနက်ဂူ ရှိနေတာပဲ... ဒီဘက်ကို ကြည့်လိုက်... ဒီထဲမှာ ဝက်ဝံနက် ရှိတယ်... ဒီလေနွေးတွေ ထွက်လာတာကို မြင်လား... ဒီအချိန်မှာ ဝက်ဝံနက်တွေက သိပ်အိပ်မပျော်သေးဘူး... ပြီးတော့ သူတို့က စားဖို့ကိုလည်း တွေးနေသေးတာ... ဂူရှေ့ကနေ ဖြတ်သွားတဲ့ တိရစ္ဆာန် တစ်ခုခုဆိုရင် သူတို့ပါးစပ်ထဲ အလိုလို ရောက်သွားသလိုပဲ... ရှောင်ဟွာ... နည်းနည်း ငြိမ်ငြိမ်နေ... ငါတို့ သူ့ကို သွားမနှောင့်ယှက်နဲ့"

ရွှီယန်က အရှေ့ရှိ ကျောက်ဂူ တစ်ခုကို လက်ညှိုးထိုးပြကာ လိုက်ဖ်ထဲမှ အင်တာနက်သုံးစွဲသူများကို ပြောလိုက်သည်။

အင်တာနက်သုံးစွဲသူများက လိုက်ဖ်ကို ကြည့်ရှုနေကြ၏။

စည်းချက်ကျကျ ထွက်ပေါ်နေသော လေနွေးများက အပြင်သို့ အဆက်မပြတ် ထွက်ပေါ်နေပြီး သိမ်မွေ့သော အသက်ရှူသံ အနည်းငယ်ကိုလည်း ကြားနေရသည်။

မျက်လုံးမကောင်းသည့် ဝက်ဝံနက် တစ်ကောင်က ထိုအထဲတွင် ပုန်းအောင်းနေကြောင်းကို တွေးမိသောအခါ အင်တာနက်သုံးစွဲသူများမှာ မနေနိုင်ဘဲ ထပ်မံ၍ စိုးရိမ်လာကြတော့၏။

စိုးရိမ်ရမည်မှာ အမှန်ပင် ဖြစ်ပြီး အားလုံးက ရွှီယန် ဘာကြောင့် ဤမျှ တည်ငြိမ်နေနိုင်သလဲ ဆိုသည်ကို လုံးဝ နားမလည်နိုင်အောင် ဖြစ်နေကြသည်။

မင်း မည်မျှပင် အစွမ်းထက်နေပါစေ ဝက်ဝံနက်၏ တစ်ချက် ကုတ်ဖဲ့ခြင်းကို ခံလိုက်ရပါက အနာတရ ဖြစ်သွားမည်သာ။

နောက်ထပ် တစ်ချက် အကိုက်ခံလိုက်ရပါက သေဖို့သာ ရှိတော့မည် ဖြစ်၏။

'လောင်ရွှီ... ခပ်ဝေးဝေးမှာ နေပါကွာ... ကြည့်ရတာ တကယ် ကြောက်စရာ ကောင်းတယ်'

'သေလမ်းရှာတာတောင် ဒီလောက်ကြီး မဟုတ်ဘူးလေ'

'အစ်ကိုယန်... ခပ်ဝေးဝေး သွားပါ... မင်း တစ်ခုခု ဖြစ်သွားမှာကို တကယ် စိုးရိမ်လို့ပါ'

ပရိသတ်အချို့က ဂရုတစိုက်ဖြင့် ပြောလိုက်ကြသည်။

ရွှီယန်က အတိုင်းအတာကို ကောင်းကောင်း သိရှိထား၏။

သူက ကင်မရာကို ဂူထဲသို့ အတင်းအကျပ် ထိုးသွင်းကာ ဝက်ဝံနက်ကို ရိုက်ကူးမည် မဟုတ်ချေ။

ထိုသို့ လုပ်ဆောင်လိုက်ပါက မျက်လုံးပြူးကာ ဒေါသထွက်နေသည့် ဝက်ဝံနက်၏ မျက်နှာကို ရိုက်ကူးမိသွားနိုင်ပြီး ရကျိုးမနပ် ဖြစ်သွားနိုင်ပေသည်။

"ရှောင်ဟွာ... သွားမယ်... သူ့ကို သွားမနှောင့်ယှက်နဲ့... သူ့ဘာသာ အနားယူပါစေ"

ရွှီယန်က ရှောင်ဟွာ ကို လှမ်းခေါ်ကာ ထွက်ခွာလာခဲ့သည်။

ထို့နောက် သူက ပတ်ဝန်းကျင်ရှိ မြစ်များနှင့် ရေကန်များကို စတင် ရှာဖွေတော့၏။

ရေခဲနှင်းများကြောင့် မြစ်များနှင့် ရေကန်များ၏ မျက်နှာပြင်များ အားလုံးက အေးခဲနေပြီး ရေများက ရေခဲလွှာ အောက်တွင်သာ စီးဆင်းနေသည်။

အချို့နေရာများရှိ ရေခဲများက အလွန် ထူထပ်လွန်းသဖြင့် ထုခွဲ၍ပင် မရနိုင်ချေ။

သို့သော် ဤရာသီတွင်တော့ အတော်လေး အဆင်ပြေနေသေးပြီး အထူးပြုလုပ်ထားသော ရေခဲဖောက်စက်များကို အသုံးပြုရန် မလိုဘဲ ရေခဲလွှာများကို ခွဲဖောက်နိုင်ပေသည်။

သူက ပတ်ဝန်းကျင်ရှိ မြစ်များနှင့် ရေကန်များကို ရှာဖွေနေခြင်းမှာ ရေခဲပြင် ငါးမျှားရန် နေရာရှာနေခြင်းလည်း ဖြစ်၏။

ငါးမျှားခြင်းကလည်း ပညာရပ် တစ်ခုဖြစ်ပြီး ထိုမျှ မလွယ်ကူလှပေ။ ကျပန်း နေရာတစ်ခုတွင် ငါးရှိနေမည်ဟု မဆိုနိုင်ချေ။

သိပ်မကြာခင်မှာပင် သူက တောတွင်း ရေကန် တစ်ခုကို ရှာတွေ့ခဲ့သည်။ ရေကန် မျက်နှာပြင် တစ်ခုလုံးက အေးခဲနေပြီး ပါးလွှာသော နှင်းလွှာတစ်ခု ဖုံးလွှမ်းနေကာ ကြည့်ရသည်မှာ အလွန် လှပလှ၏။

ဤကဲ့သို့သော ရေခဲလွှာပေါ်တွင် အပေါ်သို့ တက်ကာ ခြေလှမ်း အနည်းငယ် လျှောက်လိုက်ပါက နှင်းများက ဖိသိပ်ခံရပြီး ရေအဖြစ် ပြောင်းလဲသွားကာ ထပ်မံ အေးခဲသွားမည် ဖြစ်သဖြင့် ရေခဲပြင်က အလွန် ချောိကျိသွားမည် ဖြစ်သည်။

နှစ်စဉ်နှစ်တိုင်း တုံးအအ တောသမင်ငယ်လေး အများအပြားက ရေခဲပြင်ပေါ်တွင် ချော်လဲတတ်ကြပြီး အချိန်အကြာကြီး ရုန်းထွက်၍ မရသဖြင့် လူများက အထဲသို့ ဝင်ရောက်ကာ ကူညီပေးရတတ်၏။

ဆောင်းတွင်း၏ သစ်တောကလည်း အတော်လေး စည်ကားလှပေသည်။