အခန်း ၁၀၁

အခန်း (၁၀၁) ထပ်မံ၍ ရေပန်းစားလာခြင်း

[ ဒင်... စနစ်အဆင့်မြှင့်တင်ခြင်း ပြီးမြောက်ပါပြီ... ဗားရှင်း ၃.၀ ကို တင်နေပါပြီ…]

စနစ်အဆင့်မြှင့်တင်မှု ပြီးဆုံးသွားပြီးနောက် ချန်ဖုန်းသည် သူတွေ့ရှိလိုက်ရသောအရာကြောင့် အလွန်အံ့အားသင့်သွားခဲ့၏။

ယခင်က သူသည် မျက်နှာပြင်ပေါ်ရှိ အကြောင်းအရာများကို ကြည့်ရှုရန် ဖုန်းကို ထုတ်ယူရလေ့ရှိသော်လည်း ယခုအခါတွင်မူ ဟိုလိုဂရမ် ရုပ်လုံးကြွ ပရိုဂျက်ရှင်နည်းပညာကို အသုံးပြု၍ သူ၏ရှေ့ လေဟာပြင်ထဲသို့ တိုက်ရိုက် ရုပ်လုံးကြွ ပေါ်စေနိုင်ပြီ ဖြစ်ပေသည်။

ပို၍ အံ့သြစရာကောင်းသည်မှာ ဤမျက်နှာပြင်ကို အခြားသူများ လုံးဝ မြင်တွေ့နိုင်ခြင်း မရှိခြင်းပင် ဖြစ်လေ၏။

"ငါက ဟိုလိုဂရမ် ရုပ်လုံးကြွ ပရိုဂျက်ရှင်နည်းပညာကို ဖန်တီးနိုင်ခဲ့လို့ စနစ်မှာလည်း ဒီလုပ်ဆောင်ချက် ပါလာတာများလား..."

"ဒါ တကယ်မိုက်တာပဲ..."

ချန်ဖုန်းက တဟားးဟားး ရယ်မောလိုက်သည်။

ဤစနစ်သည် အမှန်တကယ်ပင် ထူးခြားလှပေ၏။

သူသည် လေဟာပြင်ထဲရှိ ရုပ်လုံးကြွ မျက်နှာပြင်ကို ကြည့်ရှုလိုက်သည်။ လက်ရှိ ကြိုတင်ခန့်မှန်းနိုင်သော အချိန်ကာလသည် ရှေ့သို့ ၂၅ နှစ်အထိ တိုးချဲ့သွားခဲ့ပြီ ဖြစ်လေ၏။

တစ်နည်းဆိုရသော် အနာဂတ်တွင် သူသည် ပိုမိုအဆင့်မြင့်သော အဖြစ်အပျက်များကို ကြိုတင်ခန့်မှန်းနိုင်ရုံသာမက ပိုမိုအဆင့်မြင့်သော နည်းပညာများကိုပါ ပိုင်ဆိုင်နိုင်မည့် အခွင့်အရေး ရရှိလာမည် ဖြစ်ပေသည်။

"တော်တော်လေး ကောင်းတာပဲ…”

"ယန်းယန်း... ငါ အခု ပြန်တော့မယ်..."

ရှန်ယန်းယန်းအား နှုတ်ဆက်ပြီးနောက် ချန်ဖုန်းသည် ဗီလာဆီသို့ တိုက်ရိုက် ကားမောင်းပြန်လာခဲ့၏။

ရှန်ယန်းယန်းသည်လည်း ဗီလာသို့ မူလက ပြန်လိုက်ချင်ခဲ့သော်လည်း ယနေ့တွင် အတန်းရှိနေသဖြင့် ကျောင်းသို့သာ လိမ္မာစွာ ပြန်သွားခဲ့ရလေသည်။

ဗီလာအတွင်း၌ ချန်ဖုန်းသည် သားဖောက်စက်ကို စစ်ဆေးရန် စာကြည့်ခန်းသို့ သွားရောက်ခဲ့သော်လည်း ကြီးမားလှသော ဥကြီးမှာ မည်သည့် တုံ့ပြန်မှုမျှ မပြသသေးချေ။

"ပေါက်လာဖို့ နောက်ထပ် ရက်အနည်းငယ်လောက် အချိန်ယူရဦးမယ်ထင်တယ်..."

ယခုအခါတွင် ၎င်းကို သူ စတင်မျှော်လင့်နေပြီ ဖြစ်ပေ၏။

ရေချိုးပြီးနောက် သူသည် အိပ်ရာပေါ်သို့ တိုက်ရိုက်တက်ကာ အိပ်မောကျသွားတော့သည်။ မည်သို့ပင်ဆိုစေ သူ တစ်ညလုံး မအိပ်ရသေးသဖြင့် အလွန်အမင်း အိပ်ချင်နေဆဲ ဖြစ်လေ၏။

သူ နေ့လယ်အထိ အိပ်ပျော်သွားခဲ့ပြီး နိုးလာချိန်တွင် မွန်းလွဲ ၂ နာရီပင် ထိုးနေခဲ့ချေပြီ။ထို့နောက် ဖုန်းကိုဖွင့်ကာ အလုပ်စတင်လုပ်ဆောင်လိုက်သည်။

‘အခုလောက်ဆိုရင် စစ်ဝေ့ နည်းပညာကုမ္ပဏီရဲ့ ကုန်ကြမ်းတွေ ရောက်နေလောက်ပြီဖြစ်ပြီး သူတို့က ချစ်ပ်ပြားတွေကို အမြောက်အမြား စတင်ထုတ်လုပ်နေလောက်ပြီ မဟုတ်လား…’ ချန်ဖုန်းက သူ့ဘာသာ တွေးတောလိုက်၏။

လူမှုကွန်ရက် ပလက်ဖောင်းအမျိုးမျိုးတွင် စစ်ဝေ့ နည်းပညာကုမ္ပဏီမှ ကြော်ငြာများကိုလည်း သူ မြင်တွေ့ခဲ့ရသည်။ စမတ်အိမ်သုံးနည်းပညာများ၊ လက်သုံးစရာမလိုဘဲ အသုံးပြုနိုင်မှုများနှင့် အခြားအရာများ ပါဝင်ပေ၏။ ၎င်းတို့မှာ ဂရပ်ဖစ် စီမံဆောင်ရွက်မှု စနစ်များ၊ အသံ စီမံဆောင်ရွက်မှု စနစ်များနှင့် မျက်နှာအသိအမှတ်ပြု စနစ်များ စသည့် ထုတ်ကုန်များနှင့် အများဆုံး သက်ဆိုင်နေလေသည်။

သူသည် သူ၏ဖုန်းထဲမှ ဟိုလိုဂရမ် ရုပ်လုံးကြွ ပရိုဂျက်ရှင်စနစ်ကို ဖွင့်လိုက်၏။ ဖုန်းပေါ်ရှိ မျက်နှာပြင်သည် ရှေ့လေဟာပြင်တွင် ချက်ချင်းပေါ်လာခဲ့ပြီး လေဟာပြင်ထဲရှိ Douyin ကို လက်ချောင်းဖြင့် နှိပ်လိုက်သည်။

"လစ်ဗ်လွှင့်သူတွေကို ပွိုင့်စပေးလိုက်တော့မယ်..."

ဤတစ်ကြိမ်တွင်မူ သူသည် လက်ဆောင်ပေးရန် မိန်းကလေး လစ်ဗ်လွှင့်သူများကို သီးသန့် ရွေးချယ်မနေခဲ့ချေ။ လစ်ဗ်လွှင့်နေသူ တစ်ဦးဦးကို မြင်တွေ့သည်နှင့် တစ်ပြိုင်နက် ကျားမ မရွေး ယွမ် ၃၀၀၀ တန် ပွဲတော် လက်ဆောင်တစ်ခုကို ချက်ချင်း ပေးပို့လိုက်လေ၏။

"ချီးပဲ... အစ်ကိုဖုန်းရဲ့ အကောင့်ကြီး ပြန်လာပြီ... ဒီသူဌေးကြီးက ငါတို့ကို ပွိုင့်တွေနဲ့ ထပ်ပြီး ရေချိုးပေးနေပြန်ပြီကွ..."

"အစ်ကိုဖုန်း ပြန်လာပြီ... လာကြ ကောင်မလေးတို့ လစ်ဗ်လွှင့်ကြရအောင်..."

"ဘုရားရေ... အစ်ကိုဖုန်းက ငါ့ကိုလည်း ပွိုင့်တွေ ပေးသွားတယ်... သူက ယောကျာ်းလေး လစ်ဗ်လွှင့်သူကိုပါ ပေးတာကွ..."

"မိုက်တယ်... တကယ်မိုက်တယ်... အစ်ကိုဖုန်းလို့ ခေါ်တဲ့ ဒီသူဌေးကြီးကလွဲပြီး ငါ ဘယ်သူ့ကိုမှ မလေးစားတော့ဘူး... သူက ယောကျာ်းလေးရော မိန်းကလေးရော အကုန်လုံးအပေါ် ရက်ရောတာပဲကွ..."

အချိန်တိုအတွင်းမှာပင် ရက်အနည်းငယ်မျှ ငြိမ်သက်သွားခဲ့သော Douyin သည် နောက်တစ်ကြိမ် ရူးသွပ်စပြုလာခဲ့ပြန်လေ၏။ လွန်ခဲ့သော ရက်အနည်းငယ်က မိန်းကလေးများသာ လိုက်စ်လွှင့်နေခဲ့ကြသော်လည်း ယခုအခါတွင်မူ ကျားမ မရွေး ဖုန်းရှိသူတိုင်းက ဖုန်းကိုထုတ်ကာ လစ်ဗ်လွှင့်ရန် စတင်နေကြပေပြီ။

[ ညီမလေးလင် ထံမှ ကျေးဇူးတင်စကား ၁၀ ကြိမ် လက်ခံရရှိပြီး စနစ်ပွိုင့် ၁၀ ရရှိပါသည်…]

[ ဓားငယ်လေး ထံမှ ကျေးဇူးတင်စကား ၁၅ ကြိမ် လက်ခံရရှိပြီး စနစ်ပွိုင့် ၁၅ ရရှိပါသည်…]

[ နိုင်သူမဲ့ လေဆင်နှာမောင်းလေး ထံမှ ကျေးဇူးတင်စကား ၅ ကြိမ် လက်ခံရရှိပြီး စနစ်ပွိုင့် ၅ ရရှိပါသည်…]

ချန်ဖုန်းသည် ပွဲတော် လက်ဆောင်တစ်ခု ပေးပို့ပြီးနောက် ချက်ချင်း ထွက်သွားကာ အခြား လိုက်စ်လွှင့်သူများကို အလွန်လျင်မြန်စွာ ပွိုင့်များ ပေးနေခဲ့သည်။ ဆယ်မိနစ်မပြည့်မီမှာပင် စနစ်ပွိုင့် ၃၀၀၀ ကျော်ကို ရရှိခဲ့ပြီ ဖြစ်လေ၏။

ဤသို့ လက်ဆောင်များ ပေးအပ်မှုလှိုင်းလုံးကြီးက သူ့ကို ရေပန်းစားသော ရှာဖွေမှုများ၏ ထိပ်ဆုံးသို့ နောက်တစ်ကြိမ် တွန်းပို့ပေးလိုက်ပြန်ပေသည်။

ဝေပေါ်၊ ဒိုယင်၊ ကျိဟူ၊ ပိုင်ဒူး နှင့် အခြားသော ပလက်ဖောင်းများအားလုံး၏ ရေပန်းစားသော ရှာဖွေမှု စာရင်းတိုင်းနီးပါးတွင် သူသည် တစ်ချိန်တည်းမှာပင် ထိပ်ဆုံးနေရာကို ရယူနိုင်ခဲ့လေ၏။

လွန်ခဲ့သော ရက်အနည်းငယ်က ရေပန်းစားခဲ့မှုနှင့် ပေါင်းစပ်လိုက်သောအခါ သူ၏ အကောင့်မှာ ပို၍ပင် လူကြိုက်များလာခဲ့ပေသည်။

"ဒီအစ်ကိုဖုန်းဆိုတာ တကယ်တော့ ဘယ်သူလဲ... သူက ဘာလို့ လူမှုကွန်ရက်မှာ နေ့တိုင်း ရေပန်းစားနေရတာလဲ... သတ္တုတွင်း ပိုင်တဲ့ မိသားစုက ဆင်းသက်လာတဲ့သူတောင် ဒီလောက် မကြာခဏ ရေပန်းစားမှာ မဟုတ်ဘူး..."

"ဟုတ်တယ်... ဒီတစ်ကြိမ် သူ ပွိုင့်ပေးတဲ့အခါမှာ လူကြီးလူငယ် ကျားမ မရွေး ခွဲခြားမှုမရှိဘူးလို့ ကြားတယ်... သူက လိုက်စ်လွှင့်နေတဲ့ ဘယ်သူ့ကိုမဆို ပွဲတော် လက်ဆောင် ပေးသွားတာတဲ့..."

"လခွမ်း... အရင်တစ်ခေါက်က မိန်းကလေး လိုက်စ်လွှင့်သူတွေကို ပွိုင့်ပေးခဲ့တာက သူတို့ရဲ့ ခန္ဓာကိုယ်ကို တပ်မက်တယ်လို့ တွေးလို့ရသေးတယ်... ဒီတစ်ကြိမ်ကျတော့ ဘယ်လို ကလိန်ကကျစ်တွေ လုပ်ဖို့ စီစဉ်နေတာလဲ..."

"သူ့အကောင့်ရဲ့ အကြောင်းအရာတွေကို သွားကြည့်လိုက်... သူ ဒီနေ့မှ ဗီဒီယိုတစ်ခု တင်ထားပုံရတယ်..."

"တကယ်လား... သွားကြည့်ကြရအောင်..."

စူးစမ်းချင်စိတ်များကြောင့် လူတိုင်းသည် ချန်ဖုန်း၏ အကောင့်နှင့် ဗီဒီယိုများကို ဝင်ရောက်စစ်ဆေးကြည့်လိုက်ကြ၏။ အနီးကပ် ကြည့်ရှုလိုက်ချိန်တွင် လူတိုင်း အံ့အားသင့်သွားကြလေသည်။

ဗီဒီယိုတစ်ခုတည်းသာ ရှိပြီး ဗီဒီယို၏ မျက်နှာပြင်ကို အပိုင်းနှစ်ပိုင်း ခွဲထားပေ၏။ ဘယ်ဘက်ရှိ အပိုင်းမှာ "အိုင်းစ်ရွန်းမန်း" ရုပ်ရှင်ထဲမှ ဖြတ်ပိုင်းတစ်ခု ဖြစ်သည်။ အိုင်းစ်ရွန်းမန်း သည် ဟိုလိုဂရမ် ရုပ်လုံးကြွ ပရိုဂျက်ရှင် ထိန်းချုပ်မှု မျက်နှာပြင်ပေါ်တွင် ပွတ်ဆွဲနေသည့် ဗီဒီယိုတစ်ခု ဖြစ်ပေ၏။

ညာဘက်တွင်မူ ချန်ဖုန်းက စမတ်လက်ပတ်နာရီတစ်လုံးကို ဝတ်ဆင်ထားပြီး လေဟာပြင်ထဲရှိ ဟိုလိုဂရမ် ရုပ်လုံးကြွ မျက်နှာပြင်ပေါ်တွင် TikTok ကို ပွတ်ဆွဲနေသော ဖြတ်ပိုင်းတစ်ခု ဖြစ်လေသည်။

ရံဖန်ရံခါတွင် သူသည် အိုင်းစ်ရွန်းမန်း ကဲ့သို့ လေထဲတွင် လှုပ်ရှားဟန်များကို အတုယူပြသနေခဲ့၏။

ဤနှိုင်းယှဉ်ချက်ကြောင့် လူတိုင်း လုံးလုံးလျားလျား အံ့အားသင့်သွားကြတော့သည်။

"ညာဘက်က ဗီဒီယိုက အစစ်လား ဒါမှမဟုတ် အထူးပြုလုပ်ချက်တွေ သုံးပြီး ဖန်တီးထားတာလား..."

"ငါ အခုလေးတင် ကွန်ပျူတာပေါ်မှာ ခွဲခြမ်းစိတ်ဖြာကြည့်ပြီးပြီ... အထူးပြုလုပ်ချက် အသုံးပြုထားတဲ့ အရိပ်အယောင်လေးတောင် ရှာမတွေ့ဘူး... အဲဒါ အစစ်ဖြစ်ရမယ် မဟုတ်လား..."

"တောက်... ရုပ်ရှင်ထဲက ဟိုလိုဂရမ် ရုပ်လုံးကြွ ပရိုဂျက်ရှင်နည်းပညာက တကယ်ကြီး ဖန်တီးနိုင်သွားပြီလား... ဒါ မယုံနိုင်စရာပဲ..."

"ငါ အဲဒီလက်ပတ်နာရီကို အရမ်း သဘောကျနေပြီ... တကယ်လို့ အစစ်သာဆိုရင်တော့ သေချာပေါက် တစ်လုံးဝယ်ရမယ်..."

အချိန်တိုအတွင်းမှာပင် ဟိုလိုဂရမ် ရုပ်လုံးကြွ ပရိုဂျက်ရှင်နည်းပညာ ခေါင်းစဉ်သည် ချက်ချင်းပင် မယုံနိုင်လောက်အောင် လူကြိုက်များသွားခဲ့လေ၏။

၎င်းသည် ဒုတိယမြောက် ရေပန်းအစားဆုံး ရှာဖွေမှု ခေါင်းစဉ်တစ်ခုပင် ဖြစ်လာခဲ့ပေသည်။

သာမန်လူများသည် ဟိုလိုဂရမ် ရုပ်လုံးကြွ ပရိုဂျက်ရှင်နည်းပညာကို လက်ရှိတွင် အကောင်အထည်ဖော်ရန် ခက်ခဲကြောင်းကိုသာ သိရှိကြသော်လည်း မည်မျှအထိ ခက်ခဲသည်ကိုမူ ၎င်းတို့ မသိကြချေ။ အချို့သော ပညာရှင်များက ထိုဗီဒီယိုကို မြင်တွေ့သွားချိန်တွင်မူ ၎င်းတို့ လုံးလုံးလျားလျား တုန်လှုပ်သွားကြတော့၏။

၎င်းတို့အားလုံးက ဗီဒီယိုကို ပြန်လည်မျှဝေခဲ့ကြပြီး လုပ်ငန်းခွင်မှ လုပ်ဖော်ကိုင်ဖက်များကလည်း စုံစမ်းမေးမြန်းရန် ဖုန်းခေါ်ဆိုလာကြသည်။ ၎င်းတို့သည် ဟိုလိုဂရမ် ရုပ်လုံးကြွ ပရိုဂျက်ရှင်နည်းပညာ နှင့် ပတ်သက်၍ ပိုမိုလေ့လာသိရှိလိုကြပေ၏။

အချို့သူများက ချန်ဖုန်းထံသို့ တိုက်ရိုက် မက်ဆေ့ခ်ျများပင် ပေးပို့ခဲ့ကြရာ သူ၏ သီးသန့် မက်ဆေ့ခ်ျအရေအတွက်မှာ ချက်ချင်းပင် 99+ သို့ ရောက်ရှိသွားတော့သည်။