အခန်း ၉၂၂

အခန်း (၉၂၂) - ရွှေပုစဉ်းရင်ကွဲကူ မွေးဖွားလာခြင်း၊ သေသူကိုရှင်စေပြီး အရိုးကိုအသားတက်စေခြင်းနှင့် မသေမျိုးခန္ဓာ (၂)

'အင်း... ရွှေပုစဉ်းရင်ကွဲကူရဲ့ စွမ်းအားကို အရင်သွားစမ်းကြည့်ရမယ်...'

ကျိုးစွေ့၏စိတ်ထဲတွင် လှုပ်ရှားသွား၏။ သူသည် သူ၏တာအိုလက်တွဲဖော် သုံးဦးကိုလည်း သတိရသွားသည်။

သူ၏တာအိုလက်တွဲဖော်များ၏ ခန္ဓာကိုယ်သည် အလွန်ကောင်းမွန်ပုံပေါ်သော်လည်း နေ့စဉ်နှင့်အမျှ တိုက်ပွဲများစွာကို ဖြတ်သန်းခဲ့ရသဖြင့် ခန္ဓာကိုယ်တွင် အနည်းနှင့်အများ ဒဏ်ရာများ ကျန်ရစ်နေမည်မှာ သေချာပေသည်။

ဤကဲ့သို့သောဒဏ်ရာများသည် အပေါ်ယံကြည့်လျှင် ကြီးမားသော ပြဿနာမဟုတ်ဟု ထင်ရသော်လည်း အမှန်တကယ် ပိုမိုမြင့်မားသောအဆင့်သို့ တက်လှမ်းရန် အချိန်ကျလာသောအခါ အတားအဆီးတစ်ခု ဖြစ်လာပေမည်။

ဤသည်က အမှန်တကယ်တမ်း ကျင့်ကြံသူများ၏ အခက်အခဲအတားအဆီးများ ဖြစ်ပေါ်လာရခြင်း၏ ဇာစ်မြစ်ပင် ဖြစ်၏။

အဆင့်နိမ့်ကျင့်ကြံသူများဘဝတွင် မိမိတို့၏အုတ်မြစ်ကို ပြီးပြည့်စုံသောအဆင့်သို့ မရောက်ရှိစေခဲ့သောကြောင့် ယင်းကဲ့သို့သောတန်ဖိုးကို အဆင့်မြင့်ကျင့်ကြံသူများ ဖြစ်လာသောအခါ ပေးဆပ်ရခြင်း ဖြစ်လေသည်။

ကျိုးစွေ့ကဲ့သို့ အဆင့်တိုင်းတွင် အလွန်ပြည့်စုံသောကျင့်ကြံသူများအတွက် အခြေခံအားဖြင့် မည်သည့်အခက်အခဲအတားအဆီးမျှ မရှိဟု ဆိုနိုင်ပေသည်။

အခြေခံအားဖြင့် အဆင့်များကို လွယ်ကူစွာ ကျော်ဖြတ်နိုင်ခြင်းပင် ဖြစ်၏။

ရွှစ်...

ဤနေရာသို့ တွေးမိသောအခါ ကျိုးစွေ့လည်း တုံ့ဆိုင်းမနေတော့ဘဲ ကိုယ်ဟန်တစ်ချက် လှုပ်ရှားလိုက်ကာ ဂူဗိမာန်မှ ချက်ချင်း ထွက်ခွာသွားလေသည်။

ချက်ချင်းဆိုသလိုပင် ပိုင်စုကျဲ့၊ ဟွားစစ်ချင်နှင့် ထောင်ချီလီ မိန်းမလှလေးသုံးဦးတို့ နောက်ဖေးခြံဝင်းထဲတွင် လက်ဖက်ရည်သောက်ရင်း စကားပြောနေကြကာ အလွန်အေးချမ်းနေကြောင်း သူအာရုံခံမိလိုက်သည်။

"ယောကျ်ား... ရှင်က တစ်ခုခု ပြောင်းလဲသွားသလို ကျွန်မ ဘာလို့ ခံစားနေရတာလဲ..."

ပိုင်စုကျဲ့က မျက်တောင်တစ်ချက် ခတ်လိုက်ပြီး ကျိုးစွေ့ကို အနည်းငယ် အံ့ဩစွာ ကြည့်လိုက်လေသည်။

ယခုကျိုးစွေ့သည် အရင်ကနှင့် လုံးဝမတူတော့ကြောင်း သူမ၏ဗီဇက အလိုအလျောက် သိမြင်သွား၏။

အကယ်၍ အရင်က ကျိုးစွေ့ကို ဆွဲဆောင်မှုအတုမရှိသော အချစ်နတ်ဘုရားတစ်ပါးဟု ဆိုရလျှင် ယခုအချိန်တွင် ကမ္ဘာလောကကို နှလုံးသားထဲတွင် ထည့်ထားသော တာအိုကိုသိမြင်သည့် ရဟန်းတော်တစ်ပါးအဖြစ်သို့ ပြောင်းလဲသွားပုံရပြီး အဆိုးမြင်စိတ်အားလုံးကို ချေဖျက်ပေးနိုင်သည့် ရနံ့များထွက်ပေါ်နေသကဲ့သို့ပင်။

၎င်းသည် အဆုံးမဲ့အမှောင်ထုကို မောင်းထုတ်ပေးသည့် နေမင်းကြီးနှင့် တူလှပေသည်။

"အိုး... ဘယ်နေရာက မတူတာလဲ..."

ကျိုးစွေ့လည်း တိတ်တဆိတ်အံ့ဩသွားမိသည်။ မိမိ၏တာအိုလက်တွဲဖော်ပီပီ မိမိ၏ပြောင်းလဲမှုကို ပထမဆုံးအကြိမ် ချက်ချင်းသတိပြုမိသွားခြင်းပင် ဖြစ်၏။

"သေချာတော့ မသိဘူး... ဒါပေမဲ့ တစ်ခုခုတော့ မတူသလို ခံစားနေရတယ်..."

"ရနံ့က နည်းနည်း ပိုမွှေးလာသလိုပဲ..."

ပိုင်စုကျဲ့သည် ကျိုးစွေ့အနီးသို့ ချဉ်းကပ်လာကာ နှာခေါင်းကို ဖြည်းညင်းစွာ ရှုံ့လိုက်ပြီး ကျိုးစွေ့၏ခန္ဓာကိုယ်မှ ရနံ့ကို ရှူရှိုက်နေပုံရလေသည်။

သူမ၏ယောကျ်ားထံမှ ရနံ့တစ်မျှင်ကို ရှူရှိုက်လိုက်ရုံဖြင့် သူမ၏စိတ်အခြေအနေသည် မည်မျှပင် ပျော်ရွှင်သွားမှန်း မသိနိုင်တော့သလို ခံစားလိုက်ရသည်။

တစ်ချိန်တည်းမှာပင် သူမ၏ခန္ဓာကိုယ် အစိတ်အပိုင်းတိုင်းက ဝမ်းသာအားရ ဖြစ်နေကြပေသည်။

ဤခံစားချက်သည် အမှန်တကယ်ပင် အလွန်ထူးဆန်းလှသည်။

"ဟုတ်တယ်... တကယ်ကို မတူတော့တာပဲ..."

"ယောကျ်ားရဲ့ ခန္ဓာကိုယ်က နောက်ထပ် ထူးခြားတဲ့ အပြောင်းအလဲတစ်ခု ဖြစ်သွားပြန်ပြီလို့ ခံစားရတယ်..."

"ဘာလို့လဲတော့ မသိဘူး... ကျွန်မ ရှင့်ကို စားပစ်ချင်သလိုပဲ..."

ဟွားစစ်ချင်က သူမ၏ လှပသောမျက်ဝန်းအစုံကို ပုတ်ခတ်ကာ ပြောလိုက်၏။ ဤသည်မှာ အခြားအဓိပ္ပာယ်မဟုတ်ဘဲ စာသားအတိုင်း တိုက်ရိုက်ပြောခြင်းပင် ဖြစ်ပေသည်။

ဤသည်က သက်ရှိတို့၏ ဗီဇပင် ဖြစ်ပေသည်။

ယခုမြင်ကွင်းအရ သူတို့၏ရှေ့မှောက်ရှိ ဤအမျိုးသားမှာ အရသာရှိလှသော အစားအစာတစ်ခုအလား ထင်မှတ်ရလေ၏။

"ယောက်ျား ထူးခြားတဲ့ကျင့်စဉ်တစ်ခုခုကို ထပ်ပြီးကျင့်ကြံလိုက်ပြန်တာများလား..."

ထောင်ချီလီက ကျိုးစွေ့ကို စူးစမ်းချင်စိတ်ဖြင့် ကြည့်လိုက်လေသည်။

"မှန်တယ်... ကျုပ် အခုလေးတင် ထူးခြားတဲ့ တန်ခိုးစွမ်းအင်ပညာရပ်တစ်ခုကို အောင်မြင်စွာ ကျင့်ကြံနိုင်ခဲ့တာ..."

"ဒီတန်ခိုးစွမ်းအင်က ခန္ဓာကိုယ်ပေါ်က ဒဏ်ရာမှန်သမျှကို ကုသပေးနိုင်ပြီး သေမင်းတံခါးဝရောက်နေသူတွေကိုတောင် ကယ်တင်ပေးနိုင်တယ်..."

"ဒီပညာရပ်ရဲ့နာမည်က ရွှေပုစဉ်းအခွံလဲခြင်းလို့ ခေါ်တယ်..."

ကျိုးစွေ့က အသာအယာ ပြုံးလိုက်သည်။ သူ၏ကိုယ်ပေါ်ရှိ 'ရွှေပုစဉ်းရင်ကွဲကူ'၏ စွမ်းအားကို သူ၏ကိုယ်ပိုင် တန်ခိုးစွမ်းအင်ပညာရပ်တစ်ခုအဖြစ် ဟန်ဆောင်လိုက်ခြင်းပင် ဖြစ်၏။

မည်သို့ပင်ဖြစ်စေ ထိုနှစ်ခုစလုံးမှာ များစွာကွာခြားမှု မရှိပေ။

နှစ်ခုစလုံးသည် မယုံကြည်နိုင်ဖွယ် စွမ်းအားများကို ပိုင်ဆိုင်ထားပြီး ဆွေးမြည့်နေသည့်အရာများကို အံ့ဖွယ်ရာများအဖြစ်သို့ ပြောင်းလဲပေးနိုင်စွမ်း ရှိကြပေသည်။

ဝုန်း...

စကားသံအဆုံးတွင် သူသည် 'ရွှေပုစဉ်းရင်ကွဲကူ'၏ စွမ်းအားများကို လည်ပတ်စေလိုက်ပြီး ညင်သာစွာ လက်ညှိုးညွှန်ပြလိုက်လေသည်။

ထိုခဏတွင်ပင် ရွှေရောင်အလင်းတန်းတစ်ခုက ဟွားစစ်ချင်၊ ပိုင်စုကျဲ့နှင့် ထောင်ချီလီဟူသော အမျိုးသမီးသုံးဦး၏ ခန္ဓာကိုယ်ထဲသို့ ချက်ချင်း ဝင်ရောက်သွားခဲ့ချေပြီ။

သူတို့၏ခန္ဓာကိုယ်များကို ရွှေရောင်ပုစဉ်းအခွံများဖြင့် ချက်ချင်း ဖုံးအုပ်သွားလေသည်။ ထိုအခွံများအပေါ်တွင် သိပ်သည်းလှသော ရွှေပုစဉ်းအဆောင်လက်ဖွဲ့စာလုံးများ၊ စကြာသင်္ကေတများ ပေါ်လာပြီး သန့်စင်မွန်မြတ်သော အငွေ့အသက်များ ထွက်ပေါ်လာကာ အလွန်တောက်ပသော ရွှေရောင်အလင်းတန်းများ ဖြာထွက်လာ‌သည်။

ဤအခိုက်တွင် သူတို့သည် ပုစဉ်းအိမ်ထဲသို့ ဝင်ရောက်သွားသည့်အလား ထင်မှတ်ရပေသည်။ ကြီးမားလှသော သက်စောင့်စွမ်းအားများက သူတို့၏ခန္ဓာကိုယ်ထဲသို့ ဝင်ရောက်သွားပြီး ခန္ဓာကိုယ်၏ နေရာအနှံ့အပြားသို့ စီးဝင်သွားလေ၏။

'ဒါက ရွှေပုစဉ်းရင်ကွဲကူရဲ့ ကုသခြင်းစွမ်းအားလား...'

'ရွှေပုစဉ်းအခွံလဲသလိုမျိုး ဘဝသစ်ကို ပြန်လည်ရရှိသွားသလိုပဲ...'

ကျိုးစွေ့မှာ အံ့ဩမဆုံး ဖြစ်သွားရလေသည်။ သူသည် 'ရွှေပုစဉ်းရင်ကွဲကူ'၏ စွမ်းအားကို ပထမဆုံးအကြိမ် အသုံးပြုခြင်းဖြစ်ရာ ဤအချိန်တွင် သူ၏တာအိုလက်တွဲဖော် သုံးဦးသည် ရွှေပုစဉ်းအခွံများဖြင့် ဖုံးအုပ်ခံထားရပြီး သူတို့၏ခန္ဓာကိုယ်ထဲသို့ ရွှေပုစဉ်းစွမ်းအားများ အဆက်မပြတ် စီးဝင်နေသည်ကို အာရုံခံမိနေပေသည်။

ထိုအရာများက သူတို့၏ခန္ဓာကိုယ်ကို အဆက်မပြတ် ကုသပေးကာ ပြုပြင်ပေးနေသည့်အလားပင်။

သို့ရာတွင် ထင်ရှားစွာပင် ဤကုသမှုလုပ်ငန်းစဉ် ပြီးဆုံးရန်အတွက် အချိန်အတိုင်းအတာတစ်ခုအထိ လိုအပ်ပြီး အနည်းဆုံး တစ်ရက်ခန့် အချိန်ယူရမည် ဖြစ်လေသည်။

သို့သော် 'ရွှေပုစဉ်းရင်ကွဲကူ'၏ ကုသနိုင်စွမ်းမှာ အကြိမ်အရေအတွက် အကန့်အသတ်မရှိသည်တော့ မဟုတ်ပေ။

၎င်းသည် သူ၏ခန္ဓာကိုယ်အတွင်းရှိ သက်စောင့်စွမ်းအင်များအပေါ်တွင် မူတည်နေပေသည်။

အကယ်၍ ကုန်ဆုံးသွားပါက ပြန်လည်ပြည့်ဖြိုးရန်အတွက် အချိန်များစွာ လိုအပ်မည် ဖြစ်၏။

အကယ်၍ လူနာ၏ဒဏ်ရာသည် သေးငယ်ပါက သဘာဝကျစွာပင် အကြိမ်ပေါင်းများစွာ ကုသပေးနိုင်ပေမည်။

သို့ရာတွင် အကယ်၍ လူနာသည် ဒဏ်ရာပြင်းထန်နေပါက အကြိမ်အနည်းငယ်သာ ကုသနိုင်ပြီး ခန္ဓာကိုယ်တွင်းရှိ စွမ်းအင်များ ကုန်ခမ်းသွားပေလိမ့်မည်။

'ရွှေပုစဉ်းရင်ကွဲကူ'၏ ကျင့်ကြံမှုအဆင့် တိုးတက်လာသည်နှင့်အမျှ ၎င်း၏ခန္ဓာကိုယ်တွင်းရှိ သက်စောင့်စွမ်းအင်များလည်း အဆမတန် တိုးတက်လာမည်မှာ သေချာလှပေသည်။

ထိုအခါ ပိုမိုများပြားသော လူများကို ကုသပေးနိုင်ပြီး ပိုမိုပြင်းထန်သော ဒဏ်ရာများကိုလည်း ကုသပေးနိုင်စွမ်း ရှိလာပေလိမ့်မည်။

ယခုအချိန်တွင်မူ ထောင်ချီလီ၊ ပိုင်စုကျဲ့နှင့် ဟွားစစ်ချင်တို့ သုံးဦး၏ ခန္ဓာကိုယ်ပေါ်တွင် ဒဏ်ရာများစွာ မရှိသောကြောင့် 'ရွှေပုစဉ်းရင်ကွဲကူ'အတွက် စွမ်းအင်ကုန်ဆုံးမှုမှာ သိပ်မကြီးမားလှချေ။

တစ်ရက်ကြာပြီးနောက်။

အိမ်နောက်ဖေးခြံဝင်းအတွင်းရှိ ရွှေရောင်ပုစဉ်းအိမ်သုံးခုမှာ ချက်ချင်းဆိုသလို အက်ကွဲသွားပြီး ရွှေရောင်အလင်းတန်းများ တောက်ပလာလေသည်။

မြေပြင်ပေါ်တွင် အလှနတ်သမီးလေးများ၏ အခွံသုံးခု ချက်ချင်း ပေါ်လာခဲ့၏။

ထို့နောက် အလွန်လှပသော အမျိုးသမီးသုံးဦးသည် ရွှေရောင်ပုစဉ်းအိမ်များထဲမှ ထွက်ပေါ်လာကြပြီး ယခုလေးတင် မွေးဖွားလာသော ကလေးငယ်လေးများအလား ထင်မှတ်ရပေသည်။

ဤသည်မှာ ဘဝသစ်ကို ပြန်လည်ရရှိသွားသည့်အလားပင် ဖြစ်လေသည်။

ခန္ဓာကိုယ်ပေါ်ရှိ အသားအရေမှာ ကလေးငယ်လေးများအလား ဖြူဖွေးဝင်းမွတ်နေပြီး မည်သည့်အမာရွတ်မျှ မရှိတော့ချေ။

သူတို့သုံးဦးမှာ ဟွားစစ်ချင်၊ ထောင်ချီလီနှင့် ပိုင်စုကျဲ့တို့ပင် ဖြစ်ကြ၏။

ဤအချိန်တွင် အမျိုးသမီးသုံးဦး၏ မျက်နှာပေါ်၌ ဝမ်းသာပျော်ရွှင်နေသော အမူအရာများ ပေါ်လွင်နေပြီး အလွန်စိတ်လှုပ်ရှားနေကြပေသည်။

"ယောက်ျား... ရှင်ရဲ့ဒီတန်ခိုးစွမ်းအင်ပညာရပ်က တကယ်ကို ယုံကြည်နိုင်စရာမရှိအောင် အံ့ဩဖို့ကောင်းတာပဲ..."

"အရင်က ရဖူးတဲ့ သေးငယ်တဲ့ဒဏ်ရာလေးတွေတောင် အခုအချိန်မှာ အလုံးစုံ ပျောက်ကင်းသွားပြီဆိုတာကို ကျွန်မ ခံစားမိတယ်..."

"အခု ကျွန်မရဲ့ခန္ဓာကိုယ်က အရင်က တစ်ခါမှမဖြစ်ဖူးလောက်အောင်ကို ကောင်းမွန်နေပြီ..."

ပိုင်စုကျဲ့မှာ အလွန်အံ့အားသင့်နေလေသည်။

သူမ၏ယောက်ျား တတ်မြောက်ထားသော ဤတန်ခိုးစွမ်းအင်ပညာရပ်သည် သူမ၏ခန္ဓာကိုယ်ကို အသစ်ပြန်လည်မွေးဖွားလာသည့်အလား ဖြစ်စေနိုင်လောက်အောင် စွမ်းအားကြီးမားလိမ့်မည်ဟု သူမ လုံးဝထင်မှတ်မထားခဲ့ပေ။

"တကယ်ပဲ အဲဒီလိုမျိုးလား... ကျွန်မရဲ့ခန္ဓာကိုယ်က အသက်တစ်ဆယ့်ရှစ်နှစ်အရွယ်ကို ပြန်ရောက်သွားသလိုမျိုး သက်စောင့်စွမ်းအင်တွေ ပြည့်နှက်နေတယ်လို့ ခံစားရတယ်..."

"လုံးဝကို အသစ်စက်စက် ဖြစ်သွားသလိုပဲ..."

"ခန္ဓာကိုယ်အသစ်တစ်ခုကို လဲလှယ်လိုက်သလိုပဲ..."

"အခုကျွန်မက အပျိုစင်လေးတစ်ယောက်နဲ့ ဘာမှမကွာတော့ဘူး..."

ဟွားစစ်ချင်က မျက်တောင်လေးပုတ်ခတ်ပုတ်ခတ် လုပ်လိုက်ကာ ရဲတင်းလှသော စကားတစ်ခွန်းကို ပြောလိုက်လေသည်။

သူမကလည်း ဝမ်းသာအားရဖြင့် သူမ၏ခန္ဓာကိုယ်ကို စမ်းသပ်ကြည့်လိုက်ပြီး ယခင်က တစ်ခါမျှမခံစားဖူးသော စွမ်းအားများကို ခံစားနေရပေသည်။

မည်သည့်အမျိုးသမီးကမျှ မိမိ၏နုပျိုမှုကို ပြန်လည်ရရှိခြင်းကို မနှစ်သက်ဘဲ နေမည်မဟုတ်ပေ။

ယခင်ခန္ဓာကိုယ်သည် အခက်အခဲများစွာကို ဖြတ်သန်းခဲ့ရပြီး တိုက်ပွဲပေါင်းမည်မျှကို ကြုံတွေ့ခဲ့ရကာ အမာရွတ်ပေါင်းမည်မျှ ကျန်ရစ်ခဲ့သည်ကို မသိနိုင်ချေ။

မျက်စိထောင့်ရှိ အရေးအကြောင်းများပင် ပေါ်လာခဲ့ပြီ ဖြစ်၏။

သို့သော် ယခုအချိန်တွင်မူ သူမသည် မိန်းမပျိုလေးတစ်ယောက်၏ ခန္ဓာကိုယ်ကို ပြန်လည်ပိုင်ဆိုင်နိုင်ခဲ့ခြင်းမှာ အမှန်တကယ်ပင် ယုံကြည်နိုင်ဖွယ် မရှိပေ။