အခန်း (၂၅၉-၂၆၀)

အခန်း ၂၅၉ ပင်လယ်ရပ်ခြားမှ အမြတ်ထုတ်သူများ

ဆောက်လုပ်ရေးလုပ်ငန်းအချို့ လုပ်ဆောင်ပြီးနောက် ဆေးကျောင်းသည် မပြည့်စုံ‌ သေးသော်လည်းပုံစံတကျ ဖြစ်လာပြီဖြစ်သည်။

အတိုင်းအတာ ကျယ်ပြန့်လာပြီး ကျောင်းသားအရေအတွက် တိုးပွားလာသည်နှင့်အမျှ ရန်ပုံငွေ ပြဿနာက တစ်ကျော့ပြန် ထင်ရှားလာပြန်သည်။

အိမ်ရှေ့စံမင်းသား ကျူးပြန်သည် ဝူကျိရှန်းအား ရိက္ခာနှင့် ငွေကြေးအချို့ ထောက်ပံ့မည်ဟု ကတိပေးခဲ့ဖူးသော်လည်း ၎င်းက ကတိစကားသက်သက်သာ ဖြစ်ခဲ့၏။ ယနေ့တိုင်အောင် ကျူးပြန် ကတိပေးခဲ့သော ထောက်ပံ့မှုက ရောက်ရှိမလာသေးချေ။

အိမ်ရှေ့စံမင်းသားကြီး မေ့သွားတာ ဖြစ်နိုင်မလား။ဝူကျိရှန်းသည် သူ့ကို သတိပေးရန် လိုအပ်သည်ဟု ခံစားရ၏။

"အရှင်... ဆေးကျောင်းက အတော်လေး အခြေကျနေပါပြီ၊ ကဏ္ဍအသီးသီးမှာ ငွေကြေး လိုအပ်နေပါတယ်..."

အမှန်တော့ ကျူးပြန်သည် ထိုစဉ်က ထောက်ပံ့မှုအကြောင်းကို ပေါ့ပေါ့ပါးပါး ပြောခဲ့ခြင်း ဖြစ်ပြီး အကြာကြီးကတည်းက လုံးဝ မေ့လျော့နေခဲ့ပြီဖြစ်သည်။

ဝူကျိရှန်းက သူ့ကို အရိပ်အမြွက် ပြောနေသော်လည်း ဝူကျိရှန်း၏ ရည်ရွယ်ချက်မှာ ထိုထောက်ပံ့မှုကို တောင်းခံရန် ဖြစ်ကြောင်း သူ သတိမပြုမိသေးချေ။ သူက ပြုံးလျက်သာ ပြောလိုက်၏။

"ကျောင်းအုပ်ဝူက တရားရုံးတော်ကနေ ဆေးကျောင်းအတွက် ရန်ပုံငွေနဲ့ ရိက္ခာတွေ ချပေးစေချင်တာလား"

ရန်ပုံငွေနဲ့ ရိက္ခာ ချပေးရမည် ဟုတ်လား။ဘယ်ရန်ပုံငွေနဲ့ ရိက္ခာကို ချပေးရမှာလဲ။

"ကျွန်တော်မျိုးက ဘဏ္ဍာရေး အသုံးစရိတ် လာတောင်းတာ မဟုတ်ပါဘူး၊ ပေးမယ်ဆိုတဲ့ ထောက်ပံ့မှုကို လာတောင်းတာ ဖြစ်ပါတယ်"

"တရားရုံးတော်မှာ မကြာခင် ငွေတွေ ရှိလာတော့မည်"

ကျူးပြန်က ထောက်ပံ့မှု ကိစ္စကို မတွေးမိသေးဘဲ စိတ်လှုပ်ရှားစွာ ပြောလိုက်၏။

"ရက်ကန်းဌာနက အခုတင်ပဲ စီးပွားရေးအကြီးကြီးတစ်ခု လုပ်လိုက်တယ်၊ ပိုးထည်အလိပ်ပေါင်း နှစ်သိန်းဖြစ်ပြီး စရန်ငွေတင် ငွေပြားခြောက်သိန်း ရှိလိမ့်မယ်"

မင်မင်းဆက်က ကမ္ဘာပေါ်မှာ အချမ်းသာဆုံး ဖြစ်သည် ဟူသော ခမ်းနားလှသည့် စကားက ပေါ့ပေါ့ပါးပါး ပြောလေ့ရှိပြီး ပေါ့ပေါ့ပါးပါး နားထောင်လေ့ရှိသော အရာသာ ဖြစ်သည်။ လက်တွေ့တွင်မူနန်းတော်၏ ဘဏ္ဍာရေး အခြေအနေကလိုငွေပင်ပြသလိုဖြစ်နေ၏။

မင်အင်ပါယာတွင် နှစ်စဉ် ဝင်ငွေ သန်းပေါင်းများစွာ ရှိသော်လည်း ၎င်းက စာရွက်ပေါ်ရှိ ကိန်းဂဏန်းမျှသာ ဖြစ်သည်။ ကြီးမားလှသော တပ်မတော်ကြီးကို ထိန်းသိမ်းရမည်၊ အရာရှိများ၏ လစာကို ပေးရမည်ဖြစ်ပြီး မင်းဆက်တစ်ခုလုံး ချောမွေ့စွာ လည်ပတ်နေအောင် လုပ်ဆောင်ရမည် ဖြစ်၏။ ကြေးပြားတစ်ပြားစီတိုင်းက တင်းကျပ်လှသော ဘဏ္ဍာရေး အသုံးစရိတ် စိစစ်မှုကို ဖြတ်သန်းရသည်။

သို့သော် စီးပွားရေးလုပ်ရာမှ ရရှိသော စစ်မှန်သည့် ငွေကြေးက အပိုဝင်ငွေ ဖြစ်ပြီး လက်ငင်းငွေသား ဝင်ငွေ ဖြစ်သဖြင့် အထူး အရေးပါလှ၏။

"ပါရှန်းကုန်သည်တွေက ပိုးထည်အလိပ်ပေါင်း နှစ်သိန်း ဝယ်ယူခဲ့တာ"

ပင်လယ်ရပ်ခြား ကုန်သွယ်မှုကို မင်းဆက်တိုင်းတွင် လုပ်ဆောင်ခဲ့ကြသော်လည်း အများစုမှာ သေးငယ်ပြီး အရောင်းအဝယ်များသာ ဖြစ်သည်။ ပိုးထည်အလိပ်ပေါင်း နှစ်သိန်းကို ဝယ်ယူခြင်းကမင်မင်းဆက်အတွက်အလွန် ကြီးမားသော အရောင်းအဝယ် ဖြစ်၏။

ပါရှန်းကုန်သည်များသည် အလယ်ပိုင်းဒေသ မင်းဆက်များ၏ ရေရှည်ဖောက်သည်များ ဖြစ်ကြပြီး ချင်မင်းဆက်၊ ဟန်မင်းဆက်မှသည် စွေမင်းဆက်၊ တန်မင်းဆက်၊ ထိုမှတစ်ဆင့် ဆုန်းမင်းဆက်နှင့် ယွမ်မင်းဆက်အထိ သူတို့က အမြဲတမ်း အရေးပါလှသော ပင်လယ်ရပ်ခြား ဖောက်သည်များ ဖြစ်ခဲ့ကြသည်။

"ပိုးထည်အလိပ်နှစ်သိန်းကို တစ်လိပ်ကို တစ်ဆယ့်နှစ်ပြားနဲ့ဆိုရင် စုစုပေါင်း သန်းချီပြီး ရရှိလိမ့်မယ်"

ကျူးပြန်က စီးပွားရေးအကြီးကြီးတစ်ခုကို မကြာခင်ကမှ အောင်မြင်စွာ လုပ်ဆောင်နိုင်ခဲ့သဖြင့် အလွန် စိတ်လှုပ်ရှားနေ၏။

"ပင်လယ်ရေကြောင်း ကုန်သွယ်ရေးရုံးကနေ သူတို့ကို အခွင့်ထူးအချို့ ပေးရရင်တောင် ထိုက်တန်ပါတယ်"

ပင်လယ်ရေကြောင်း ကုန်သွယ်ရေးရုံးဆိုသည်မှာ အကောက်ခွန်ရုံးကဲ့သို့ပင်ဖြစ်ပြီးထိုကဲ့သို့ စီးပွားရေးအကြီးကြီးတွင် သက်ဆိုင်ရာ အခွင့်ထူးခံ အခြေအနေများ ရှိနေမှာ သေချာသည်။

ဒါပေမဲ့ ပိုးထည်တစ်လိပ်ကို တစ်ဆယ့်နှစ်ပြားဆိုတာက နည်းနည်း နည်းမနေဘူးလား။ပိုးထည်လုပ်ငန်းသည် အမြတ်အစွန်း အလွန်များပြားလှပြီး တစ်ဝက်စီ အမြတ်ရရှိခြင်းက သာမန်ပင် ဖြစ်၏။ ရိတ်သိမ်းမှုနှင့် ဈေးကွက် အခြေအနေများ မတူညီမှုကြောင့် ပိုးထည်ဈေးနှုန်းက အတက်အကျ အလွန်များသည်။ အရည်အသွေးမြင့် ပိုးထည်တစ်လိပ်သည် အနိမ့်ဆုံးအချိန်တွင် ငွေပြားတစ်ဆယ်မျှသာ ရှိတတ်၏။ ဈေးကွက်ကောင်းချိန်တွင်မူ တစ်ဆယ့်ခြောက်ပြား၊ သို့မဟုတ် တစ်ဆယ့်ခုနစ်ပြား၊ တစ်ဆယ့်ရှစ်ပြားအထိ ရောင်းချနိုင်ပြီး ကုန်ပစ္စည်းကို ရရှိရန်ပင် မသေချာချေ။

ယခုနှစ် ဈေးကွက်က အတော်လေး ကောင်းမွန်လှရာ ပြီးခဲ့သည့်နှစ်က ဈေးနှုန်းအနိမ့်ဖြင့် ဝယ်ယူထားသော ပိုးထည်များကို ပါရှန်းကုန်သည်များထံ ရောင်းချပြီး အမြတ်အစွန်း အများကြီး ရရှိနိုင်သည်။ သို့သော် တစ်ဆယ့်နှစ်ပြား ဟူသော ဈေးနှုန်းကတော့နည်းလွန်းလှ၏။

"ဟုတ်ပါတာ်။ ဈေးနှုန်းက တကယ်တော့ မမြင့်ပါဘူး၊ ဒါပေမဲ့ တတ်နိုင်ဘူးလေ"

အိမ်ရှေ့စံမင်းသား ကျူးပြန်က အကြောင်းပြချက်ကို ပြောပြသည်။

"မွန်ဂိုတွေက အရှေ့နဲ့ အနောက် ကုန်သွယ်ရေးလမ်းကြောင်းတွေကို ဖြတ်တောက်လိုက်ကြတယ်။ လမ်းဟောင်းတွေက ဆက်ပြီး မပွင့်တော့လို့ ငါတို့ မင်အင်ပါယာဆီကနေ ပိုးထည်တွေ ဝယ်ယူဖို့ ပင်လယ်ရေကြောင်း လမ်းသစ်တွေကို ဖွင့်လှစ်ရတာ ဖြစ်တယ်"

အလယ်ပိုင်းဒေသတွင် မွန်ဂိုတို့၏ အုပ်ချုပ်မှု ပြိုလဲသွားခဲ့သော်လည်း မွန်ဂိုများသည် အရှေ့အလယ်ပိုင်းနှင့် အနောက်အာရှတို့တွင် မအောင်နိုင်သေးဘဲ ရှိနေဆဲ ဖြစ်ကာ ပါရှန်းများနှင့် မွန်ဂိုခန်းနိုင်ငံတို့အကြား စစ်ပွဲက ပြင်းထန်နေဆဲ ဖြစ်သည်။

စစ်ပွဲသည် ပုံမှန် ကုန်သွယ်မှု လုပ်ငန်းများကို အမြဲတမ်း ပိုမို ခက်ခဲစေ၏။ ကုန်းလမ်းကုန်သွယ်ရေး လမ်းကြောင်းများ ပိတ်သွားသဖြင့် ပါရှန်းများတွင် ပင်လယ်ရေကြောင်း ကုန်သွယ်ရေးလမ်းသစ်ကို ဖွင့်လှစ်ရန်မှတစ်ပါး အခြားရွေးချယ်စရာ မရှိတော့ချေ။

"ပါရှန်းတွေ ပြောတာကတော့... အမှန်သူတို့က ပါရှန်းစစ်စစ်တွေ မဟုတ်ဘဲ ပါရှန်းရဲ့ အနောက်ဘက်နိုင်ငံငယ်လေးတစ်ခုက လာကြတာ တဲ့။ ပင်လယ်ပြင်က လှိုင်းလေပြင်းထန်လှလို့ ပိုးထည်ဈေးကို မလျှော့ပေးရင် သူတို့မှာ အမြတ်မကျန်ဘဲ စီးပွားရေးလုပ်ဖို့ မဖြစ်နိုင်ဘူးလို့ ဆိုကြတယ်"

ကျူပြောင်က ရယ်မောရင်း ပြော၏။

"အဲဒီ ပါရှန်းကုန်သည်တွေ ပြောတာက ငါတို့ မင်အင်ပါယာဆီ ကုန်တင်ဖို့ လာရတာနဲ့ ပါရှန်းဆီ ပြန်ရတာက အခက်အခဲနဲ့ အန္တရာယ် အများကြီးကို ဖြတ်သန်းရပြီး အရောင်းအဝယ် တစ်ခေါက်ကို မိနစ်နှစ်ဆယ်လောက် ကြာတတ်သလို ခရီးအကွာအဝေးက လီကိုးသောင်းလောက် ရှိတယ်လို့ ဆိုကြတယ်"

ဝူကျိရှန်းသည် နိုင်ငံတကာ ကုန်သွယ်မှုအကြောင်းကို လုံးဝ နားမလည်သလို ဤခေတ်ကာလတွင် ကုန်သွယ်မှုက မည်သို့ လည်ပတ်သည်ကိုလည်း မသိချေ။ သို့သော် သူက ပထဝီဝင်ကိုတော့ နားလည်သည်။

ပါရှန်းမှ မင်အင်ပါယာသို့ လာလျှင် ပါရှန်းပင်လယ်ကွေ့မှ အိန္ဒိယသမုဒ္ဒရာထဲသို့ အလွယ်တကူ သွားနိုင်ပြီး ထိုမှတစ်ဆင့် အင်ဒိုချိုင်းနား ကျွန်းဆွယ်ကို ပတ်ကာ မင်အင်ပါယာသို့ ရောက်ရှိနိုင်သည်။

ထိုကဲ့သို့သော ခရီးစဉ်အကွာအဝေးက လီကိုးသောင်း ဟုတ်လား။ ပါရှန်းကုန်သည်အဖွဲ့က လမ်းလွှဲကနေ သွားရင်တောင် အီကွေတာကို ပတ်ရတာထက်တော့ ပိုပြီး မဝေးနိုင်ပေ။

"အရှင်ကတော့ အဲဒီ လည်လွန်းတဲ့ ပါရှန်းကုန်သည်တွေရဲ့ လှည့်စားခြင်းကို ခံလိုက်ရတာ ဖြစ်လိမ့်မယ်။ပင်လယ်လမ်းကြောင်း ဖြစ်နေရင်တောင် ဒီလောက်အထိ မဝေးပါဘူး" ဟု ဝူကျိရှန်းက ပြောလိုက်၏။

"ကျွန်တော် ခန့်မှန်းရသလောက်တော့ ဒီပင်လယ်လမ်းကြောင်းက လီ တစ်သောင်း ဒါမှမဟုတ် နှစ်သောင်းလောက်ပဲ ရှိရမယ်၊ လီကိုးသောင်း မဖြစ်နိုင်ပါဘူး။ သူတို့က ဈေးနှိမ်ချင်လို့ လိမ်ပြောနေကြတာ"

"ပင်လယ်လမ်းကြောင်းက ကုန်းလမ်းနဲ့ မတူဘူးလေ၊ လမ်းနည်းနည်း လွှဲလိုက်တာနဲ့တင် ခရီးက လီထောင်ချီ ဖြစ်သွားနိုင်နယ်."

လမ်းလွှဲက သွားရတာလား။ ပင်လယ်ခရီးက ကုန်းလမ်းခရီးနဲ့ မတူဘဲ အဖြောင့်အတိုင်း အကွာအဝေးကို တွက်ချက်လို့ မရချေ။ ဒါပေမဲ့ ဘယ်လောက်ပဲ လမ်းလွှဲက သွားရပါစေ လီကိုးသောင်းအထိ ဖြစ်သွားဖို့ကတော့ မဖြစ်နိုင်‌ချေ။

ကမ္ဘာ့အီကွေတာ အလျားက ကီလိုမီတာ လေးသောင်း၊ အကြမ်းဖျင်း လီရှစ်သောင်း (ကီလိုမီတာ လေးသောင်းခန့်) သာ ရှိသည်။ ပါရှန်းကုန်သည်အဖွဲ့က တောင်မြောက် လမ်းစဉ်ကို သုံးပြီး ပြောင်းပြန်လမ်းကြောင်းအတိုင်း ရွက်လွှင့်ကာ ပါရှန်းပင်လယ်ကွေ့ကနေ စတင်ပြီး အာဖရိကတိုက်တစ်ခုလုံးကို ပတ်ကာ အတ္တလန္တိတ်သမုဒ္ဒရာထဲ ဝင်ရမည်၊ ထိုမှတစ်ဆင့် တောင်အမေရိကတိုက်၏ တောင်ဘက်ဆုံးစွန်းကနေ ပစိဖိတ်သမုဒ္ဒရာထဲ ဝင်မှသာ ကမ္ဘာကြီးတစ်ခုလုံးနီးပါးကို ပတ်မိသလို ဖြစ်ပြီး ထိုအကွာအဝေး ဖြစ်လာမည် ဖြစ်၏။

"အရှင်... အဲဒီ ပါရှန်းကုန်သည် ပြောတာတွေကို မယုံပါနဲ့။ တကယ်ကို ဒီလောက်အထိ မဝေးပါဘူး"

ဝူကျိရှန်းက စက္ကူနဲ့ ကလောင်ကို ယူကာ ပါရှန်းမှ မင်အင်ပါယာသို့ လာသော ရွက်လွှင့်လမ်းကြောင်းကို အကြမ်းဖျင်း ဆွဲပြလိုက်သည်။

"သူတို့ရဲ့ သင်္ဘောတွေ ရွက်လွှင့်တာနဲ့ မကြာခင်မှာပဲ အိန္ဒိယကို ဖြတ်သန်းရမယ်။ အိန္ဒိယကို ဖြတ်ပြီး ခဏလောက် ဆက်ပြီး ရွက်လွှင့်ရင် မလက္ကာကို ရောက်လိမ့်မယ်..."

ကျူးပြန်တွင် ပင်လယ်လမ်းကြောင်းနှင့် ပတ်သက်၍ လုံးဝဗဟုသုတမရှိသဖြင့် ဝူကျိရှန်း ပြောသမျှကိုသာ နားထောင်နေရတော့၏။

"လှိုင်းလေ ဘယ်လောက်ပဲ ပြင်းထန်ပါစေ ကျွန်တော် ခန့်မှန်းရသလောက်တော့ ကျွန်တော်တို့ မင်အင်ပါယာဆီ ရောက်ဖို့ နှစ်လလောက်ပဲ ကြာရမည်။ သွားပြန်တစ်ခေါက်ဆိုရင် အလွန်ဆုံး ရာသီဝက်စာပဲ ကြာမှာ ဖြစ်ပြီးနှစ်‌ ပေါင်းဆယ်အထိ ဘယ်လိုလုပ် ကြာနိုင်မှာလဲ"

ကျူးပြန်းသည် ဝူကျိရှန်းက လီပေါင်းထောင်ချီ ဝေးကွာသော နေရာ၏ အခြေအနေကို ထိုမျှအထိ ရှင်းလင်းစွာ ဖော်ပြနိုင်လိမ့်မည်ဟု လုံးဝ ထင်မထားခဲ့ချေ။ သူက ပါရှန်းမှ မင်မင်းဆက်သို့ လာသော တိကျသည့် ခရီးစဉ်ကိုပင် သိနေသည်။

ပါရှန်းကုန်သည်တွေကို ယုံရမလား၊ ဒါမှမဟုတ် ဝူကျိရှန်းကို ယုံရမလား"

"မျှော်လင့်ထားတဲ့အတိုင်းပဲ၊ ကုန်သည်ဆိုတာ ကောက်ကျစ်တာချည်းပဲ။ ဒီပါရှန်းတွေက ငါ့ကို ဒီလို လှည့်စားသွားတာပဲ။ တကယ်ကို စက်ဆုပ်ဖို့ကောင်းလှတယ်"

သူသည် ပါရှန်းကုန်သည်များ၏ လိမ်လည်မှုကို ခံလိုက်ရသဖြင့် အလွန် ဒေါသထွက်နေသော်လည်း အိမ်ရှေ့စံမင်းသား ကျူးပြန်သည် စီးပွားရေးကိုတော့ ဆက်လုပ်ချင်နေသေး၏။

"နောက်တစ်ကြိမ် ပိုးထည်အရောင်းအဝယ်အကြောင်း ဆွေးနွေးတဲ့အခါ မင်းက ရက်ကန်းဌာနက လူတွေနဲ့အတူ လိုက်သွားပေးပါ။ သူတို့ကို ဒီလို အမြတ်ထုတ်တဲ့ ကုန်သည်တွေရဲ့ လှည့်စားခြင်း မခံရစေနဲ့"

"သမားတော်ဝူ... သင်က လီပေါင်းထောင်ချီ ဝေးတဲ့နေရာက အကြောင်းတွေကို ဘယ်လိုလုပ် ဒီလောက် အများကြီး သိနေရတာလဲ။ ပါရှန်းကို ရောက်ဖူးလို့လား"

"မရောက်ဖူးပါဘူး"

ဝူကျိရှန်းက ပေါ့ပေါ့ပါးပါးပင် ပြောလိုက်၏။

"ကျွန်တော် ကံကောင်းထောက်မစွာနဲ့ မြေပုံတစ်ခုကို တစ်ခါ မြင်ဖူးခဲ့လို့ ပါရှန်းက ကျွန်တော်တို့ မင်အင်ပါယာနဲ့ သိပ်မဝေးဘူးဆိုတာ သိတယ်။ ပင်လယ်လမ်းကြောင်းကနေ လမ်းလွှဲပြီး သွားရရင်တောင် ဒီလောက်အထိ မဝေးပါဘူး..."

ကျူးပြန်က ခေါင်းကို အနည်းငယ် ငြိမ့်လိုက်သည်။

"နားလည်ပြီ နားလည်ပြီ..."

*********

အခန်း ၂၆၀ ဆုတောင်းပေးခြင်း

"သူတို့ ဘာပြောကြတာလဲ"

ဘာသာပြန်တာဝန်ခံ အရာရှိက တိုးတိုးလေး ပြောလိုက်၏။

"ဒီကုန်သည်တွေ ပြောတာက သူတို့က ရောမဧကရာဇ်ရဲ့ အမိန့်နဲ့ ကျွန်တော်တို့ မင်အင်ပါယာကြီးနဲ့ ကုန်သွယ်ဖို့ လာတာ ဖြစ်ပြီး နှစ်နိုင်ငံကြား ရေရှည်ချစ်ကြည်ရေးကို မျှော်လင့်သလို ပိုးထည်တစ်လိပ်ရဲ့ ဈေးနှုန်းကလည်း တစ်ဆယ့်နှစ်ပြားထက်မပိုဖို့ မျှော်လင့်တယ်လို့ ဆိုပါတယ်"

"သူတို့ကို ပြောလိုက်ပါ"

ဟု ဝူကျိရှန်းက အားရပါးရ ရယ်မောရင်း ပြော၏။

"တစ်လိပ်ကို တစ်ဆယ့်နှစ်ပြားဆိုတာ လုံးဝ မဖြစ်နိုင်ဘူး။ အနည်းဆုံး တစ်ဆယ့်လေးပြား ဖြစ်ရမယ်၊ ကြေးပြားတစ်ပြားလေးတောင် လျှော့မပေးနိုင်ဘူး"

"သမားတော်ဝူ... ပထမကြိမ်ကသူတို့နဲ့ ဈေးနှုန်းညှိနှိုင်းတုန်းက တစ်လိပ်ကို တစ်ဆယ့်နှစ်ပြားလို့ သဘောတူထားပြီးသား။အခု နောက်ဆုံးအချိန်ကျမှ ဈေးတက်တာကမသင့်တော်ဘူး မဟုတ်လား။ ဒါတင်မက သူတို့က ရောမဧကရာဇ် စေလွှတ်လိုက်တဲ့သူတွေပဲဥစ္စာ..."

"ဘာရောမဧကရာဇ်လဲ။ သူက အခြေအနေပျက်နေတဲ့သူပဲဥစ္စာ"

"ငါ့စကားကို သူတို့ဆီ ပြန်ပေးပါ။ ရောမအင်ပါယာဆိုတာ အတိတ်က အရာတစ်ခု ဖြစ်သွားပါပြီ။ မင်းတို့ပြောတဲ့ ရောမဧကရာဇ်ဆိုတာ မြို့ပျက်ကြီးတစ်မြို့ကို စောင့်နေရတဲ့ စော်ဘွားတစ်ယောက်ထက် မပိုပါဘူး။ ဘယ်နေ့မှာ ရန်သူ့ဓားကောက်နဲ့ ခေါင်းဖြတ်ခံရမလဲတောင် မသိနိုင်ဘူး..."

ရောမအင်ပါယာကြီး ပျက်စီးသွားခဲ့သည်မှာ နှစ်ပေါင်းများစွာ ကြာခဲ့ပြီ ဖြစ်သည်။

အနောက်တိုင်း ကုန်သည်တွေ ပြောနေတဲ့ ရောမဧကရာဇ်ဆိုတာ အမှန်တော့ အရှေ့ရောမအင်ပါယာကို ရည်ညွှန်းခြင်း ဖြစ်၏။

အရှေ့ရောမအင်ပါယာသည် ယခုအခါ အရပ်မျက်နှာအနှံ့တွင် အင်အားကြီးသော ရန်သူများ ဝိုင်းရံထားသဖြင့် ကွန်စတန်တီနိုပယ် မြို့ပျက်ကြီးတစ်ခုအဖြစ်သာ ကျန်ရှိတော့ရာ ၎င်း၏ ကံကြမ္မာမှာ ဆံခြည်တစ်မျှင်သာ လိုတော့သည်။ စစ်ပြိုင်ခေတ်က ကျိုးမင်းဆက် ဧကရာဇ်များကဲ့သို့ပင် သူတို့တွင် ဂုဏ်သရေရှိလှသော ဘွဲ့အမည် ရှိနေဆဲ ဖြစ်သော်လည်း လက်တွေ့တွင်မူ ဘွဲ့နာမည်မျှသာ ဖြစ်၏။

ဒါတင်မကသေးဘဲ အချို့သော စုံစမ်းစစ်ဆေးမှုများအရ ထိုကုန်သည်များသည် ပါရှန်းများလည်း မဟုတ်သလို အရှေ့ရောမအင်ပါယာမှ လူများလည်း မဟုတ်ဘဲ အရှေ့ရောမအင်ပါယာ၏ လက်အောက်ခံနိုင်ငံငယ်တစ်ခုမှ လာကြသူများ ဖြစ်နိုင်ကြောင်း ဝူကျိရှန်း ရှာဖွေတွေ့ရှိခဲ့၏။။

ဘာသာပြန်အရာရှိများက ဝူကျိရှန်း၏ စကားကို မွန်ဂိုဘာသာစကားသို့ အရင်ပြန်ဆိုကြပြီးနောက် ထိုကုန်သည်များ ယူဆောင်လာသော ဘာသာပြန်များက မွန်ဂိုဘာသာစကားမှတစ်ဆင့် သူတို့၏ ဘာသာစကားသို့ ထပ်ဆင့် ပြန်ဆိုကြ၏။

ထပ်တလဲလဲ ပြန်ဆိုရသော ဆက်သွယ်ရေးနည်းလမ်းက တိကျမှု အားနည်းမှာ သေချာသော်လည်း ထိုစီးပွားရေးသမားများသည် ဝူကျိရှန်း၏ စကားကို ရှင်းလင်းစွာ နားလည်သွားကြသည်။ သူတို့အားလုံး အံ့ဩသွားကြပြီး တတွတ်တွတ်ဖြင့် ဆူညံစွာ ပြောဆိုကြတော့၏။

"သမားတော်ဝူ... သူတို့ ပြောတာက ရောမဧကရာဇ်က နတ်မင်းကြီးရဲ့ စောင့်ရှောက်မှုကို ခံရသူလို့ ဆိုကြတယ်။ အခုလောလောဆယ် အခက်အခဲအချို့နဲ့ ရင်ဆိုင်နေရပေမဲ့ ရောမအင်ပါယာရဲ့ အတိတ်က ဘုန်းအာနုဘော်ကို မုချ ပြန်လည် ရရှိလိမ့်မယ်။ အင်ပါယာကြီးနှစ်ခုရဲ့ ကောင်းမွန်တဲ့ ဆက်ဆံရေးကို ငဲ့ညှာပြီး သူတို့ပေးတဲ့ဈေးကို လက်ခံဖို့ မျှော်လင့်တယ်လို့ပြောနေကြတယ်"

နတ်မင်းကြီး၏ စောင့်ရှောက်မှု ဟုတ်လား။ သူက ဘုရားသခင်၏ ကျေးဇူးတော်ကို ပြောတာ ဖြစ်လိမ့်မယ်။

"ရောမရဲ့ ဘုန်းအာနုဘော်က ပြန်ပွင့်လာမယ် ဟုတ်လား။ ဟာသတွေ လုပ်မနေနဲ့"

ဝူကျိရှန်းက ဘာသာပြန်ကို ပြောလိုက်၏။

"ကွန်စတန်တီနိုပယ်မှာ ရှိတဲ့ ရောမဧကရာဇ်ကိုယ်တိုင်တောင် ဒီလိုအရာကို ယုံကြည်မှာ မဟုတ်ပါဘူး။ သူတို့ရဲ့ ရန်သူတွေက ပိုပြီး အင်အားကြီးလာနေပေမဲ့ ခရူးဆိတ်စစ်တပ်တွေက သူတို့ကို ကူညီဖို့ လာတော့မှာ မဟုတ်ဘူး၊ လာရင်တောင် ဘာမှ ထူးခြားသွားမှာ မဟုတ်ဘူး"

လက်ရှိ အရှေ့ရောမအင်ပါယာသည် အသက်ရှုရုံမျှသာ ကျန်တော့ပြီး နောက်ဆုံးထွက်သက်ကို ရင်ဆိုင်နေရသော်လည်း အင်ပါယာ၏ ဘုန်းအာနုဘော်ကို ပြန်လည် တည်ဆောက်မည်ဟု ပြောနေဆဲ ဖြစ်သည်။

သို့သော် ဝူကျိရှန်း၏ စကားများကို တစ်ဆင့်ပြီးတစ်ဆင့် ပြန်ဆိုပြီးနောက် ထိုပါရှန်းကုန်သည်ဆိုသူများမှာ မျက်လုံးများ ပြူးသွားကြပြီး တတွတ်တွတ်ဖြင့် ပြောနေကြပြန်၏။

"သူတို့က သိချင်လို့ မေးနေကြတယ်။သမား‌တော်ဝူက ခရူးဆိတ်စစ်ပွဲတွေအကြောင်းကို ဘယ်လိုလုပ် သိနေတာလဲ တဲ့..."

"ဒီအဓိပ္ပာယ်မရှိတာတွေကို တော်လိုက်တော့။ သူတို့က ရောမအင်ပါယာက မဟုတ်သလို ပါရှန်းနဲ့လည်း ဘာမှမဆိုင်မှန်း ငါသိတယ်"

ဝူကျိရှန်းက အခွင့်အာဏာရှိသူတစ်ဦးကဲ့သို့

"မင်အင်ပါယာကို လာပြီး စီးပွားရေးလုပ်တဲ့သူမှန်သမျှကို ငါတို့ ကြိုဆိုပါတယ်။ ကမ္ဘာတစ်ဝန်းက ကုန်သည်တွေနဲ့ ကုန်စည်ဖလှယ်ဖို့လည််း‌ မျှော်လင့်ပါတယ်။ တကယ်လို့ မင်းတို့က မင်အင်ပါယာရဲ့ ပိုးထည်တွေကို သုံးပြီး ငွေရှာနိုင်ရင် ငါတို့ ဝမ်းသာပါတယ်။ ဒါပေမဲ့ စည်းကမ်းတစ်ခု ရှိတယ်၊ အပြန်အလှန် အကျိုးရှိရမယ်။။ မင်းတို့ချည်းပဲ ငွေတွေအကုန် ယူသွားလို့ မရဘူး၊ ငါတို့လည်း သင့်တော်တဲ့ အမြတ်အစွန်းကို ချန်ထားရမယ်..."

"တစ်လိပ်ကို ငွေပြားတစ်ဆယ့်လေးပြား၊ ဒီဈေးကို ထပ်ပြီး ညှိနှိုင်းလို့ မရဘူး"

"သမားတော်ဝူ... သူတို့ ပြောတာက ဒီဈေးနဲ့ဆိုရင် တကယ်ပဲ အမြတ်မကျန်တော့ပါဘူး တဲ့။ တကယ်လို့ ဈေးမလျှော့ပေးရင် စီးပွားရေး ဆက်မလုပ်တော့ဘူးလို့ ဆိုပါတယ်"

ပိုးထည်များကို အနောက်ဘက်သို့ သယ်ဆောင်သွားပါက အမြတ်အစွန်း အဆပေါင်းများစွာဖြင့် ပြန်လည် ရောင်းချနိုင်သည် ဖြစ်၏။

မင်မင်းဆက် ကျားကျင့်ခေတ်ကာလတုန်းက အနောက်ဘက်က ကုန်သည်သင်္ဘော လေးစင်းသည် မင်အင်ပါယာနဲ့ ကုန်သွယ်ဖို့ လာခဲ့ကြပြီး သူတို့ရဲ့ အဓိကကုန်စည်မှာ ပိုးထည် ဖြစ်၏။ ထိုသင်္ဘောများသည် ချွမ်ကျိုးမှ ထွက်ခွာလာပြီး တောင်တရုတ်ပင်လယ်တွင် မုန်တိုင်းနှင့် ကြုံတွေ့ရကာ သုံးစင်း နစ်မြုပ်သွားခဲ့ပြီး နောက်ဆုံးသင်္ဘောတစ်စင်းသာ ဘေးကင်းစွာ ပြန်ရောက်ခဲ့သော်လည်း အမြတ်အစွန်း အများကြီး ရရှိခဲ့ဖူးသည်။

ဒီလောက်အထိ အမြတ်များလှတဲ့အတွက် လူတွေက လီပေါင်းထောင်ချီကို ဖြတ်သန်းပြီး ဒီကို လာကြခြင်း ဖြစ်သည်။ နင်တို့က ဒီစီးပွားရေးကို မလုပ်ဘဲ နေမှာတဲ့လား။နင်တို့က ငါ့ကို သုံးနှစ်သားကလေးလို့ ထင်နေတာလား။

"အရောင်းအဝယ် မဖြစ်ရင်တောင် မိတ်ဆွေတွေအဖြစ် ရှိနေနိုင်ပါသေးတယ်။ သူတို့ကို ကောင်းကောင်း ဧည့်ခံပြီး သာမန်လက်ဆောင်အချို့ ပေးကာ ပြန်လွှတ်လိုက်ပါ"

ဝူကျိရှန်းက ဂရုမစိုက်ဟန်ဖြင့် ပြောလိုက်၏။

"သူတို့က ပိုးထည်တွေ မဝယ်ချင်မှတော့ ငါတို့က အော့တိုမန်တွေဆီပဲ ရောင်းလိုက်ရုံပေါ့..."

"သမားတော်ဝူ... အော့တိုမန်အင်ပါယာဆိုတာ ဘာလဲ"

"နင်က ပြန်ဆိုရုံပဲ လုပ်ပါ"

ဘာသာပြန်က ဝူကျိရှန်း၏ စကားကို မွန်ဂိုဘာသာစကားသို့ မပြန်ဆိုရသေးခင်မှာပင် ပါရှန်းကုန်သည် အတုအယောင်များမှာ စိတ်မရှည် ဖြစ်လာကြပြီ ဖြစ်သည်။

သူတို့သည် အော့တိုမန် ဟူသော အသံထွက်ကို ရှင်းလင်းစွာ နားလည်ကြပြီး အလွန် စိတ်လှုပ်ရှားသွားကြ၏။

"သမားတော်ဝူ... သူတို့ ပြောတာက ငါတို့က... အခွင့်အရေးကို နှစ်ဖက်လုံးကနေ ယူလို့ မရပါဘူး တဲ့။ သူတို့နဲ့ စီးပွားရေးလုပ်နေရင်း အော့တိုမန်တွေနဲ့လည်း စီးပွားရေးလုပ်တာက မမှန်ကန်ဘူးလို့ ဆိုပါတယ်"

"သူတို့ကို ပြောလိုက်ပါ၊ အော့တိုမန် ကုန်သည်တွေက တစ်လိပ်ကို တစ်ဆယ့်လေးပြား ပေးတယ်လို့"

"အကြီးအကဲဝူ... ဒါပေမဲ့ အော့တိုမန် ကုန်သည်တွေကို ကျွန်တော်တို့ မမြင်မိသေးပါဘူး"

"ဒါက အရေးမကြီးဘူး၊ ဒီအတိုင်းပဲ ပြန်လိုက်"

ဝူကျိရှန်း၏ စကားကို နောက်တစ်ကြိမ် ပြန်ဆိုပြီးနောက် နှာခေါင်းကြီးကြီး၊ မျက်လုံးအောက်စိုက်နေသော ကုန်သည်များသည် အချင်းချင်း တီးတိုး ဆွေးနွေးကြတော့သည်။

ဒီအဆင့်ရောက်မှတော့ အရောင်းအဝယ်က အောင်မြင်သွားပြီ ဖြစ်ကြောင်း ဝူကျိရှန်း ကောင်းကောင်း သိသည်။

အခြေအနေက မြန်ဆန်လှ၏။ သူတို့က ပိုးထည်တစ်လိပ်ကို တစ်ဆယ့်လေးပြားဆိုတဲ့ ဈေးကို လုံးဝ လက်မခံနိုင်ရင် အစောကြီးကတည်းက ဒေါသတကြီး ထွက်သွားကြပြီ ဖြစ်သည်။ ယခုလို ဝူကျိရှန်းရဲ့ ရှေ့မှောက်မှာတင် အချင်းချင်း တီးတိုး ပြောနေကြတာက အဖြေကို ပြသနေခြင်း ဖြစ်၏။

"သူတို့ မေးတာက... တစ်ဆယ့်လေးပြားဆိုတဲ့ ဈေးကို လက်ခံရင် အခွန်အခတွေကို သီးခြား ခွဲထုတ်ပြီး အခြား သက်သာခွင့်တွေ ပေးဦးမှာလား တဲ့"

ဒါက အခွန်ပြန်အမ်းတဲ့ သက်သာခွင့်ကို လိုချင်တာ မဟုတ်ဘူးလား။

ဒီကုန်သည်တွေက တကယ်ကို လည်လှပါသည် ဈေးနှုန်းကို မနှိမ်နိုင်တော့တဲ့အခါ အခြားနေရာကနေ ပြန်နှုတ်ဖို့ နည်းလမ်းရှာကြခြင်း ဖြစ်ရာ ၎င်းက ဈေးဆစ်ခြင်း ဖြစ်၏။

အဝယ်အလိပ်ပေါင်း နှစ်သိန်း ရှိတဲ့ အရောင်းအဝယ်ပဲဥစ္စာ။ အခွန်အနည်းငယ် ပြန်အမ်းရုံနဲ့တင် ကြီးမားတဲ့ အမြတ်အစွန်း ဖြစ်လာမှာ သေချာသည်။

"အခွန်နဲ့ ငွေကြေးကိစ္စတွေကိုတော့ မင်းတို့ဘာသာ စီမံလိုက်ပါ၊ သူတို့ကို စည်းကမ်းချက်တွေပဲ ပေးလိုက်ပါ"

ပင်လယ်ရပ်ခြား ကုန်သွယ်မှုသည်ပြီးဆုံး‌ အောင်မြင်လုနီးပါး ဖြစ်သွားပြီ ဖြစ်သည်။

ဝူကျိရှန်း ထွက်ခွာရန် ပြင်လိုက်စဉ် အနောက်ကမ္ဘာက လာသော ကုန်သည်များသည် သူ့ကို ယဉ်ကျေးမှုအရ နှုတ်ဆက်စကား ဆိုကြ၏။

"သူတို့ ပြောတာက နတ်မင်းကြီးနဲ့ အနောက်ဘက် သခင်မကြီးတို့က ဆရာဝူကို မုချ စောင့်ရှောက်လိမ့်မည် တဲ့..."

အနောက်တိုင်းသားတွေက နတ်မင်းကြီးနဲ့ အနောက်ဘက် သခင်မကြီးအကြောင်းကို သိမှာ မဟုတ်ချေ၊ ဒါက ဘာသာပြန်ခြင်း ပြဿနာ ဖြစ်ရမည်။

သူတို့က ဘုရားသခင်နဲ့ မယ်တော်မာရီကို ပြောခြင်း ဖြစ်လိမ့်မည်။

ဝူကျိရှန်းကထရပ်ကာ သူ၏ ရင်ဘတ်ပေါ်တွင် လက်ဝါးကပ်တိုင် ပုံသဏ္ဌာန် လုပ်ဆောင်ရင်း ပြောလိုက်၏။

"ခရစ်တော်ယေရှု၊ မာရီနဲ့ သူတို့ရဲ့ မိသားစုတစ်ခုလုံးက ငါတို့ရဲ့ ဖောက်သည်တွေကို စောင့်ရှောက်ပါစေ"

ထိုအနောက်တိုင်း ကုန်သည်များသည် ဝူကျိရှန်း ဘာပြောသည်ကို မသိကြသော်လည်း ခရစ်တော်ယေရှု၊ မာရီ ဟူသော အသံထွက်ကိုမူ ရှင်းလင်းစွာ ကြားလိုက်ရသည်။ ပြီးတော့ ရင်ဘတ်ပေါ်တွင် လက်ဝါးကပ်တိုင် ပုံသဏ္ဌာန် ဆွဲလိုက်သော အမူအရာကလည်း သူတို့ကို အံ့ဩသွားစေ၏။