အခန်း ၉၆၇

အခန်း (၉၆၇) ကောင်းကင်မြစ်ဂိုဏ်းနှင့် စူးချန်ခုန်း။ (၁)

ရွှေရောင်ပိုးမျှင်တန်းများသည် ချောင်မင်ယန်၏ ဦးခေါင်းခွံကို ထိုးဖောက်သွားခဲ့ပြီး မူလဝိညာဉ်၏ စွမ်းအားဖြင့် သူ၏ သိစိတ်ပင်လယ်အတွင်းသို့ ထိုးဝင်ကာ ဝိညာဉ်ကို အစိတ်စိတ်အမြွှာမြွှာ ဆွဲဖြဲပစ်လိုက်သည်။

ချောင်မင်ယန်၏ မျက်လုံးများမှာ လျင်မြန်စွာ မှိန်ဖျော့သွားပြီး သက်စောင့်အားများ ကင်းစင်သွားကာ ဝိညာဉ်မဲ့နေသော ရုပ်အလောင်းတစ်ခုကဲ့သို့ ကောင်းကင်ယံမှ လွင့်ကျသွားခဲ့သည်။

“အစ်ကိုကြီး” အမာရွတ်ရှိသော အမျိုးသားနှင့် ဝတ်စုံဝါဝတ်ထားသော သတ်လတ်ပိုင်းအရွယ် အမျိုးသားတို့က ချောင်မင်ယန် ပြုတ်ကျသွားသည်ကို ကြည့်ရင်း ထိတ်လန့်တုန်လှုပ်စွာ အော်ဟစ်လိုက်ကြသည်။

ဟင်းလင်းပြင်အတွင်း မိုင်အနည်းငယ်အကွာတွင် အနက်ရောင်ဝတ်စုံနှင့် လူငယ်တစ်ဦးသည် ရုတ်တရက် ပေါ်ထွက်လာခဲ့ပြီး ထိုသူမှာ စူးချန်ခုန်းပင် ဖြစ်သည်။

တည်ငြိမ်သော အမူအရာဖြင့် စူးချန်ခုန်းသည် ဤတိုက်ပွဲ စတင်ကတည်းက ခံစားမိခဲ့ခြင်းဖြစ်ပြီး ပြင်းထန်လှသော အခြေအနေကို စောင့်ကြည့်ပြီးနောက် ဝင်ရောက်ကူညီရန် ဆုံးဖြတ်ခဲ့ခြင်း ဖြစ်သည်။

ပထမအချက်မှာ လူငယ်လေးနှင့် မိန်းကလေးတို့သည် အသက်အန္တရာယ်နှင့် ရင်ဆိုင်ရချိန်တွင် အချင်းချင်း မစွန့်ပစ်ကြသဖြင့် သူတို့သည် လူကောင်းများ ဖြစ်ကြောင်း သက်သေပြနေသည်။ ဒုတိယအချက်ကတော့…

“နတ်ဘုရားမျိုးစေ့ သုံးစေ့က ငါဝင်ကူညီဖို့ တန်တယ်”

စူးချန်ခုန်းအတွက်မူ ထိုလူသုံးဦးသည် ရတနာများကို လုယူရန်အတွက် သတ်ဖြတ်နေကြသော ဓားပြများနှင့် တူညီနေသည်။ ထိုကဲ့သို့သော လူဆိုးများကို သုတ်သင်ရှင်းလင်းခြင်းက သူ့အတွက် မည်သည့် စိတ်ပိုင်းဆိုင်ရာ ဖိအားမျှ မရှိစေဘဲ နတ်ဘုရားမျိုးစေ့များကို ရရှိခြင်းက ပျော်စရာတစ်ခု ဖြစ်လာပေလိမ့်မည်။

“တောက်၊ ဒီကောင်လေးက သူတို့နှစ်ယောက်ကို ကယ်ဖို့ ရောက်လာတဲ့ ကောင်းကင်မြစ်ဂိုဏ်းက သိုင်းဝိဇ္ဇာသူတော်စင်လား”

“သူက အစ်ကိုကြီးကို တစ်ချက်တည်းနဲ့ သတ်ပစ်လိုက်တာလား”

အမာရွတ်နှင့် အမျိုးသားနှင့် ဝတ်စုံဝါနှင့်အမျိုးသားတို့က ထိတ်လန့်ဒေါသထွက်သွားကြသည်။ ရုတ်တရက် ရောက်ရှိလာသော ထိုသူသည် ကောင်းကင်မြစ်ဂိုဏ်းမှ အင်အားကြီးမားသော ပုဂ္ဂိုလ်တစ်ဦး ဖြစ်နိုင်ကြောင်း သူတို့ ခန့်မှန်းမိသော်လည်း သူတို့သည် ထိုဂိုဏ်း၏ နယ်မြေနှင့် ဝေးကွာသော အရပ်သို့ ရောက်ရှိနေကြခြင်း ဖြစ်သည်။

“တစ်ယောက်ယောက်က ငါတို့ကို ကူညီပေးနေတာလား”

လူငယ်လေးနှင့် မိန်းကလေးတို့ ဝမ်းသာသွားကြသည်။ သူတို့အား ကယ်တင်ခဲ့သောသူအကြောင်းကို မသိသော်လည်း ချောင်မင်ယန်ကို သတ်ပေးခဲ့သဖြင့် သူတို့အပေါ် ကျရောက်နေသော ဖိအားများကို သိသာစွာ လျော့နည်းသွားစေခဲ့သည်။

“သူတို့အားလုံးကို သတ်ပစ်ကြစို့၊ ကောင်းကင်မြစ်ဓားစီးကြောင်း”

အပြာရောင်ဝတ်စုံနှင့်လူငယ်လေးက စိတ်ဓာတ်များ ပြန်လည်တက်ကြွလာပြီး ခံစစ်မှ တိုက်စစ်သို့ ပြောင်းလဲကာ သူ၏ ဓားကို ဆွဲထုတ်လိုက်ရာ ကြီးမားလှသော ဓားချီစွမ်းအားများသည် ကြယ်တာရာမြစ်ကြီးကဲ့သို့ ထွက်ပေါ်လာပြီး ကျန်ရှိသော ရန်သူနှစ်ဦးထံသို့ ပြင်းထန်စွာ တိုက်ခိုက်သွားခဲ့သည်။

အစိမ်းရောင်နှင့်မိန်းကလေးသည်လည်း အားတက်သွားခဲ့ပြီး အသေတိုက်ကွက်များကို ထုတ်ဖော်ကာ လူငယ်လေးနှင့် ပူးပေါင်း၍ အမာရွတ်နှင့် အမျိုးသားနှင့် ဝတ်စုံဝါ အမျိုးသားတို့ကို ဝိုင်းရံတိုက်ခိုက်ကြသည်။

ချောင်မင်ယန် သေဆုံးသွားခဲ့သဖြင့် ကျန်အမျိုးသားနှစ်ယောက်သည် ကြောက်ရွံ့စိုးရိမ်စိတ်များ ဖြစ်ပေါ်လာခဲ့ပြီး ယခင်ကကဲ့သို့ ရဲဝံ့ခြင်း မရှိကြတော့ပေ။

ထိုလူငယ်မောင်နှမနှစ်ဦး၏ ပြင်းထန်သော တိုက်ခိုက်မှုအောက်တွင် သူတို့သည် ကြီးမားသော အန္တရာယ်နှင့် ရင်ဆိုင်နေရသည်။

“ပြေးကြစို့၊ ပြေးကြစို့”

အမာရွတ်နှင့်လူက ဆက်လက်တိုက်ခိုက်ရန် သတ္တိ မရှိတော့သဖြင့် ဆုတ်ခွာခြင်းကသာ အကောင်းဆုံးဖြစ်ကြောင်း သိပြီးနောက် အော်ပြောလိုက်သည်။

လေပြင်းများ တိုက်ခတ်လာပြီး အမာရွတ်န အမျိုးသားနှင့် ဝတ်ရုံဝါ အမျိုးသားတို့ကို ဆန့်ကျင်ဘက်အရပ်သို့ လျင်မြန်စွာ သယ်ဆောင်သွားခဲ့သည်။

သို့သော် အဝေးမှ စူးချန်ခုန်းက သူ၏ လက်ချောင်းဆယ်ချောင်းကို အသာအယာ လှုပ်ရှားလိုက်သည်ကို မြင်လိုက်ရသောအခါ သူတို့နှစ်ဦးလုံးသည် ဦးရေပြားများ အေးစက်သွားသကဲ့သို့ ခံစားလိုက်ရသည်။

ဟင်းလင်းပြင်အတွင်း၌ ရွှေရောင်ပိုးမျှင်တန်း မြောက်မြားစွာ ထူထပ်စွာ ပေါ်ထွက်လာပြီး အရပ်မျက်နှာအနှံ့မှ ကြီးမားသော ပိုက်ကွန်တစ်ခုကဲ့သို့ ဝိုင်းရံလာခဲ့သည်။

ကြည်လင်တောက်ပနေသဖြင့် မမြင်နိုင်လောက်သော စူးချန်ခုန်း၏ နတ်ပိုးချည်မျှင်ကို ကြီးမားသော ပိုက်ကွန်တစ်ခုအဖြစ် လွယ်ကူစွာ ရက်လုပ်ထားခြင်း ဖြစ်သည်။ ထို့နောက် မူလဝိညာဉ်၏ ကန်းရွှေဓာတ်စွမ်းအားကို ထည့်သွင်းလိုက်ရာ ကန်းရွှေပိုးအိမ်မျှင်အဖြစ် ချက်ချင်း ပြောင်းလဲသွားခဲ့သည်။

“မြစ်နက်ရေကြမ်း”

ဝတ်ရုံဝါနှင့်လူက သူ၏ နတ်ဘုရားစွမ်းရည်ကို ချက်ချင်း ထုတ်ဖော်လိုက်ပြီး နက်မှောင်သော ရေလုံးများကို စုစည်းကာ ပေပေါင်းများစွာ ကြီးမားလှသော ရေလုံးကြီးတစ်ခု ပြုလုပ်လိုက်သည်။

ထိုရေလုံးကြီး၏ ထူထပ်လေးလံမှုမှာ ရွှေနှင့် သံမဏိထက် အဆပေါင်းများစွာ ပိုမိုသာလွန်လှသဖြင့် ရွှေရောင်ပိုးမျှင်တန်းများကို ခုခံနိုင်လိမ့်မည်ဟု သူ မျှော်လင့်ထားခဲ့သည်။

သို့သော် ထိုအရာမှာ အသုံးမဝင်ခဲ့ပေ။

ရှူးရှူးရှဲရှဲ မြည်သံများနှင့်အတူ ပိုက်ကွန်သည် တင်းကျပ်သွားခဲ့ပြီး ပြိုင်ဘက်ကင်းသော နတ်ဘုရားလက်နက်နှင့် တူညီသော ကန်းရွှေပိုးအိမ်မျှင်များသည် ကြီးမားလှသော ရေလုံးကြီးကို လွယ်ကူစွာပင် ဖြတ်တောက်သွားခဲ့သည်။

“မဖြစ်နိုင်ဘူး”

ရေလုံးကြီးအတွင်းရှိ အမျိုးသားနှစ်ဦးလုံးသည် ထိတ်လန့်သွားကြပြီး ကန်းရွှေပိုးချည်မျှင်များကို ခုခံရန် အစွမ်းကုန် ကြိုးစားခဲ့ကြသော်လည်း အချည်းနှီးသာ။

ရှူးခနဲ မြည်သံနှင့်အတူ ပိုက်ကွန်သည် ပိုမိုတင်းကျပ်သွားသောအခါ သူတို့၏ ဦးခေါင်း၊ ရင်ဘတ်၊ လက်များနှင့် ခြေထောက်များပေါ်တွင် သွေးကြောင်းများ ပေါ်ထွက်လာခဲ့သည်။

ထို့နောက် သူတို့၏ ခန္ဓာကိုယ်များသည် အစိတ်အပိုင်းများအဖြစ် ပြိုကွဲသွားခဲ့ပြီး သူတို့၏မျက်လုံးများအတွင်း မကျေနပ်မှုနှင့် ရှုံးနိမ့်မှုများကို ပြသလျက် နေရာ၌တင် ချက်ချင်း အသတ်ခံလိုက်ရသည်။

မူလဝိညာဉ်၏ ကန်းရွှေဓာတ်စွမ်းအားနှင့် နတ်ပိုးချည်ချီစွမ်းအင် ပေါင်းစပ်ထားသော ကန်းရွှေပိုးအိမ်မျှင်သည် မာကျောထက်ရှလှသည်။ ပိုးမျှင်တစ်ပင်ချင်းစီမှာ အရာအားလုံးကို ဖြတ်တောက်နိုင်သော ဓားသွားများနှင့် တူညီနေသဖြင့် သန်မာလှသော သိုင်းဝိဇ္ဇာသူတော်စင် ခန္ဓာကိုယ်ပင်လျှင် ပဲပြားကဲ့သို့ နူးညံ့ပျော့ပျောင်းသွားစေခဲ့သည်။

“ကြောက်စရာကောင်းလိုက်တာ။ အဲဒီပိုးမျှင်တွေက နတ်ဘုရားစွမ်းရည်တွေလား ဒါမှမဟုတ် နတ်ဘုရားလက်နက် တစ်မျိုးမျိုးလား”

အပြာရောင်ဝတ်စုံနှင့် လူငယ်နှင့် အစိမ်းရောင်နှင့် မိန်းကလေးတို့သည် သူတို့ရှေ့မှောက်တွင် ဖြစ်ပျက်သွားသော မြင်ကွင်းကို ကြည့်ရင်း ဆွံ့အသွားခဲ့ကြသည်။

သူတို့အပေါ် အဆက်မပြတ် တိုက်ခိုက်နေခဲ့သော ရန်သူများသည် စူးချန်ခုန်း၏ ရှေ့မှောက်တွင် စက္ကူကဲ့သို့ လွယ်ကူစွာ ပျက်စီးသွားခဲ့ကြသည်။

ပိုးမျှင်များကို အနည်းငယ် လှုပ်ရှားလိုက်ရုံဖြင့် ချောင်မင်ယန်နှင့် အခြားနှစ်ဦး၏ ရုပ်အလောင်းများကို စူးချန်ခုန်းသည် သူ၏ထံသို့ ဆွဲယူလိုက်ပြီး သိုလှောင်မှုရတနာအတွင်းသို့ ထည့်သွင်းသိမ်းဆည်းလိုက်သည်။

“ဒီလူသုံးယောက်လုံးက နတ်ဘုရားမျိုးစေ့တွေကို သန့်စင်ပြီး သိုင်းဝိဇ္ဇာသူတော်စင်အဆင့်ကို ရောက်လာကြတာ ဖြစ်ရမယ်။ ဒါပေမဲ့ မျိုးစေ့တွေကို မွေးမြူဖို့အတွက် အရင်းအမြစ် အမြောက်အမြားကို သုံးစွဲထားကြပုံရတယ်။ မျိုးစေ့ပေါ်မှာရှိတဲ့ နတ်ဘုရားအမှတ်အသား အရေအတွက်က မနည်းတဲ့အတွက် သူတို့ရဲ့ စွမ်းအားက တကယ်ကို အားကောင်းတယ်” စူးချန်ခုန်းက တိတ်တဆိတ် စဉ်းစားလိုက်သည်။

နတ်ဘုရားမျိုးစေ့ သိုင်းဝိဇ္ဇာသူတော်စင်တစ်ဦး၏ စွမ်းအားသည် နတ်ဘုရားမျိုးစေ့ အရေအတွက်အပေါ်၌သာ မူတည်နေခြင်းမဟုတ်ဘဲ နတ်ဘုရားစွမ်းရည်၏ အရည်အသွေးနှင့် မျိုးစေ့ပေါ်ရှိ နတ်ဘုရားအမှတ်အသား အရေအတွက်အပေါ်တွင်လည်း မူတည်နေသည်။

ချောင်မင်ယန်နှင့် သူ၏အပေါင်းအဖော်များတွင် နတ်ဘုရားအမှတ်အသားများစွာ ရှိနေကြသဖြင့် သူတို့၏ တိုက်ခိုက်ရေးစွမ်းရည်မှာ အားနည်းခြင်း မရှိပေ။

အစိမ်းရောင်ဝတ်စုံနှင့် ထိုမိန်းကလေးမှာမူ သိုင်းဝိဇ္ဇာသူတော်စင်အဆင့်သို့ ရောက်တာ မကြာသေးပုံပင်။ သူက မိမိကိုယ်ပိုင်ကျင့်ကြံမှုဖြင့် အဆင့်တက်လှမ်းနိုင်ခဲ့သည်မှာ ထူးခြားလှသော်လည်း သူ၏ နတ်ဘုရားမျိုးစေ့ပေါ်တွင် နတ်ဘုရားအမှတ်အသားများစွာ မရှိသေးသဖြင့် နှစ်ပေါင်းများစွာ သိုင်းဝိဇ္ဇာသူတော်စင် ဖြစ်နေခဲ့ပြီး မူလအဆီအနှစ်ရည်ကဲ့သို့သော ရတနာများစွာကို သန့်စင်ထားသည့် ချောင်မင်ယန်တို့ သုံးဦးနှင့် နှိုင်းယှဉ်ပါက တိုက်ခိုက်ရေးစွမ်းရည်မှာ များစွာ ကွာခြားလှသည်။

သိုင်းပညာရှင်တစ်ဦး သိုင်းဝိဇ္ဇာသူတော်စင်အဆင့်သို့ စတင်ရောက်ရှိချိန်တွင် နတ်ဘုရားမျိုးစေ့ပေါ်၌ နတ်ဘုရားအမှတ်အသား တစ်ခု သို့မဟုတ် နှစ်ခုသာ ရှိသဖြင့် နတ်ဘုရားအမှတ်အသား ဒါဇင်နှင့်ချီ သို့မဟုတ် ရာနှင့်ချီ၍ ရှိနေသော အဆင့်တူပြိုင်ဘက်များနှင့် ရင်ဆိုင်ရသောအခါ တိုက်ခိုက်ရေးစွမ်းအား၌ များစွာ ကွာခြားသွားလေ့ရှိသည်။ သူတို့အကြား စွမ်းအားကွာခြားမှုမှာ အလွန်ပင် ကြီးမားလှသည်။

စူးချန်ခုန်းကဲ့သို့ နက်နဲသော သိုင်းပညာအခြေခံရှိသူတစ်ဦးမှာမူ သိုင်းဝိဇ္ဇာသူတော်စင်အဆင့်သို့ စတင်ရောက်ရှိစဉ်ကတည်းက နတ်ဘုရားမျိုးစေ့ပေါ်တွင် နတ်ဘုရားအမှတ်အသား တစ်ဆယ်ခုအထိ ပါဝင်ခဲ့သည်။ သူ၏ ပြိုင်ဘက်ကင်းသော နတ်ဘုရားစွမ်းရည်များက သူ့အား အဆင့်တူညီသူများအကြား ပြိုင်ဘက်ကင်း ဖြစ်စေခဲ့ပြီး ဤကဲ့သို့သော ပါရမီရှင်မျိုးမှာ မြင့်မြတ်သော ရှေးဟောင်းနိုင်ငံတော်၌ပင် လွန်စွာ ရှားပါးလှသည်။

သို့သော် စူးချန်ခုန်းအတွက်တော့ ဒါက ကွာခြားမှု မရှိပါ။ နတ်ဘုရားစွမ်းရည် သုံးခုနှင့် နတ်ဘုရားအမှတ်အသားများစွာ ရှိကြသည့် ဂိုဏ်းကြီးများမှ ထိပ်တန်းသိုင်းဝိဇ္ဇာသူတော်စင် ဖြစ်သော ဝမ်ကျန့်ချိုးကဲ့သို့သော ပုဂ္ဂိုလ်များပင်လျှင် မူလဝိညာဉ်ကို ကျင့်ကြံထားသော စူးချန်ခုန်း၏ ရှေ့မှောက်တွင် အလွန်ပင် အားနည်းလှပေသည်။