အခန်း ၈၃၂

အခန်း(၈၃၂) အကျိုးစီးပွားများ

"တပ်မှူး... ဘာဖြစ်လို့လဲ" မေသည် တစ်စုံတစ်ခု လွဲချော်နေသည်ကို ရိပ်မိသွားပြီး မေးမြန်းလိုက်လေသည်။

ရှီလင်က သက်ပြင်းတစ်ချက် ချလိုက်ပြီး "အထက်လူကြီးတွေက ငါတို့တောင်ပေါ်မှာ စားနပ်ရိက္ခာတွေ စိုက်ပျိုးလို့ရနေပြီဆိုတာ သိသွားကြပြီ... အဲ့တာက ဖုန်း ငါ့ကိုပေးခဲ့တဲ့အရာကြောင့်ဆိုတာ သူတို့ စုံစမ်းသိရှိသွားကြလို့... ဒါကြောင့်..." ဟု ဆို၏။

ချင်ယွမ်ဖုန်းသည် ထိုအခြင်းအရာကို ကြိုတင်ခန့်မှန်းထားပြီးဖြစ်ရာ အနည်းငယ်မျှ အံ့ဩသွားခြင်း မရှိပေ။

"ဒါဆို... သူတို့က ကျွန်တော့်ကို ကယ်တင်ပြီး သန့်စင်သော နတ်ရေစင်တွေ ပိုပြီးထုတ်လုပ်ခိုင်းချင်ကြတာပေါ့... ဟုတ်လား" ချင်ယွမ်ဖုန်းက တည်ငြိမ်စွာ ပြောလိုက်သည်။

ရှီလင်သည် ချင်ယွမ်ဖုန်းအား တစ်ချက်ကြည့်ကာ "ဖုန်း... မင်းကို ဒီလိုပြောရတာ ငါ အားနာမိတယ်ဆိုတာ သိပါတယ်... ဒါပေမဲ့ ဒါက တော်လှန်ရေးအဖွဲ့ရဲ့ အခြေအနေကို ပြောင်းလဲပေးနိုင်ရုံတင်မကဘဲ ငတ်မွတ်ခေါင်းပါးနေတဲ့ သာမန်လူအမြောက်အမြားကိုလည်း ကယ်တင်နိုင်မှာမို့လို့ပါ" ဟု ဆိုလေသည်။

ချင်ယွမ်ဖုန်းက ခေါင်းညိတ်ပြလိုက်ပြီး "ကျွန်တော် နားလည်ပါတယ်... ဒါပေမဲ့ သန့်စင်သော နတ်ရေစင်ကို ခင်ဗျားတို့လက်ထဲ အပ်လိုက်ရင်... တော်လှန်ရေးအဖွဲ့က ပိုမိုကြီးမားတဲ့ အကျိုးအမြတ်တွေအတွက် နောက်ထပ် နယ်စားပဒေသရာဇ်အင်အားစုတစ်ခု ဖြစ်မလာဘူးလို့ ဘယ်သူ အာမခံနိုင်မလဲ" ဟု မေးခွန်းထုတ်လိုက်၏။

ရှီလင်သည် ခေါင်းမော့ကာ သူမ ကိုယ်တိုင် အာမခံနိုင်ကြောင်း ပြောရန် ပြင်လိုက်သော်လည်း နောက်ဆုံးတွင် မည်သည့်စကားမျှ ထွက်မလာခဲ့ချေ။

ထိုကဲ့သို့သော ကြီးမားလှသည့် အကျိုးစီးပွားနှင့် ရင်ဆိုင်ရပါက မည်သူမျှ စိတ်သဘောထား ဖြူစင်စွာ ရှိနေနိုင်မည်မဟုတ်ပေ။ သူမသည်လည်း ထိုသန့်စင်သော နတ်ရေစင်ကို ရရှိပြီးနောက် အထက်လူကြီးများက မည်သို့မည်ပုံ အသုံးပြုမည်ကို ကြိုတင်မခန့်မှန်းနိုင်ချေ။

ချင်ယွမ်ဖုန်းက ပြုံးလိုက်ပြီး "စိတ်မပူပါနဲ့... ကျွန်တော် ခင်ဗျားကို အကျပ်ရိုက်အောင် လုပ်နေတာမဟုတ်ပါဘူး... ဒါပေမဲ့ လက်ရှိမှာတော့ သန့်စင်သော နတ်ရေစင်ကို ခင်ဗျားတို့ကို မပေးနိုင်သေးဘူး... ကျွန်တော့်ဆီမှာလည်း လက်ကျန် သိပ်မရှိတော့ဘူး... ပြီးတော့ ဒါက မိစ္ဆာနယ်မြေရဲ့ ပြဿနာကို ဖြေရှင်းဖို့ သော့ချက်လည်း မဟုတ်ပါဘူး" ဟု တည်ငြိမ်စွာ ပြောဆိုလိုက်သည်။

ရှီလင်က ခေါင်းညိတ်ကာ "ငါ နားလည်ပါပြီ... အထက်လူကြီးတွေကို ငါ ပြန်ပြောလိုက်ပါ့မယ်" ဟု ဆို၏။

"အနည်းဆုံးတော့ အချိန်အတန်ကြာလို့ အခြေအနေတွေ ပိုပြီးရှင်းလင်းသွားတဲ့အခါ မင်းတို့ကို ကျွန်တော် ရှင်းလင်းချက်တစ်ခု ပေးပါ့မယ်" ချင်ယွမ်ဖုန်းက ဆက်လက်ပြောကြားလိုက်သည်။

ရှီလင်သည် များစွာ ဝမ်းမြောက်သွားပြီး ချင်ယွမ်ဖုန်းနှင့် မေတို့အတွက် အခန်းများ စီစဥ်ပေးကာ ထိုနေရာတွင်ပင် တည်းခိုစေခဲ့သည်။

ရက်အနည်းငယ် ကြာလွန်ပြီးနောက် ၎င်းတို့သည် နတ်ဆိုးဘုရင်၏ နန်းတော်ထံမှ သတင်းစကားတစ်ခု လက်ခံရရှိခဲ့လေသည်။

လျှို့ဝှက်ဆန်းကြယ်သော အစွမ်းထက်ပုဂ္ဂိုလ်တစ်ဦးသည် နတ်ဆိုးဘုရင်နှင့် သုံးရက်နှင့် သုံးညတိုင်တိုင် တိုက်ပွဲဖြစ်ပွားခဲ့ပြီး နတ်ဆိုးဘုရင်၏ နန်းတော်ကို ဖျက်ဆီးပစ်ကာ အဝေးသို့ ပျောက်ကွယ်သွားခဲ့ရာ ဒဏ္ဍာရီတစ်ခု ဖြစ်လာခဲ့သည်။

ထိုသတင်းကို ကြားရလျှင် ချင်ယွမ်ဖုန်းသည် မိမိ၏ ဘိုးဘေးဖြစ်သူ မည်မျှအထိ မောက်မာရိုင်းစိုင်းကြောင်း တွေးမိကာ မတတ်သာဘဲ ခေါင်းကိုသာ ရမ်းခါလိုက်မိတော့သည်။

သို့သော်လည်း နတ်ဆိုးဘုရင်နှင့် သုံးရက်နှင့် သုံးညတိုင်တိုင် နိုင်လူရှုံးလူမရှိဘဲ တိုက်ခိုက်နိုင်ခြင်းကို ကြည့်ခြင်းဖြင့် ကျိရန်၏ အစွမ်းသည် အထူးပင် မြင့်မားလှကြောင်း သိသာပေရာ အနည်းဆုံးတော့ ထိပ်သီးအဆင့်အတန်းဖြစ်သည့် နတ်ဘုရားတစ်ပိုင်းအဆင့်တွင် ရှိပေလိမ့်မည်။

"မင်းမှာ ဘာအစီအစဥ်ရှိလဲ" မေက မေးမြန်းလိုက်သည်။

ချင်ယွမ်ဖုန်းက ခေါင်းညိတ်ကာ "ကျွန်တော့်ဘိုးဘေးကို အရင်ရှာရမယ်... ပြီးတော့မှ နောက်ထပ် ဘာလုပ်ရမလဲဆိုတာ ကြည့်ရမှာပေါ့" ဟု ဆို၏။

"မင်း ထွက်သွားတော့မလို့လား" မေက ဆက်၍ မေးခွန်းထုတ်ပြန်သည်။

ချင်ယွမ်ဖုန်းသည် ခေတ္တမျှ တုံ့ဆိုင်းသွားပြီးနောက် ပြတ်သားစွာ ခေါင်းညိတ်ပြလိုက်ကာ "ဟုတ်တယ်... ဒါပေမဲ့ အခုချက်ချင်းတော့ မဟုတ်သေးပါဘူး... မင်းကော ဘာလုပ်ဖို့ စိတ်ကူးထားလဲ"

မေသည် ခေါင်းကို ရမ်းခါလိုက်ပြီး "ငါလည်း မသိဘူး... အခု ငါ့စိတ်တွေ အတော်လေး ရှုပ်ထွေးနေပြီး ရှေ့ဆက် ဘာလုပ်ရမလဲဆိုတာ စဥ်းစားလို့မရသေးဘူး" ဟု ညည်းတွားရှာသည်။

ချင်ယွမ်ဖုန်းက ပြုံးလျက် မေ၏ ဆံနွယ်များကို သာသာယာယာ ပွတ်သပ်ပေးလိုက်ကာ "နောက်ထပ်လုပ်ရမှာကတော့ သေချာပေါက် မင်းရဲ့ အစွမ်းတွေကို ပြန်လည်ကုစားရမယ်... မိစ္ဆာဘုရင်ရဲ့ ရာထူးကို ပြန်လုယူရမယ်... ပြီးတော့ မိစ္ဆာနယ်မြေကို ကောင်းမွန်စွာ အုပ်ချုပ်ရမှာပေါ့" ဟု ဆိုလေသည်။

မေသည် မျက်တောင်ခတ်လိုက်ပြီး "ဖုန်း... ငါတို့ မိစ္ဆာမျိုးနွယ်တွေက မင်းတို့ရဲ့ ကမ္ဘာကို ကြီးမားတဲ့ အထိခိုက်အပျက်အစီးတွေ ဖြစ်စေခဲ့တာလား" ဟု စိုးရိမ်တကြီး မေးလိုက်၏။

ချင်ယွမ်ဖုန်းက သက်ပြင်းချကာ "သေချာတာပေါ့... ကျွန်တော်တို့ ကမ္ဘာက ရေတွက်လို့မရတဲ့ လူအမြောက်အမြားဟာ မိမိတို့အိမ်ဂေဟာကို အောင်မြင်စွာ ကာကွယ်ဖို့အတွက် သေဆုံးခဲ့ကြရတယ်... ဒါပေမဲ့ သေကျေဒဏ်ရာရသူ များပြားလွန်းခဲ့လို့ အခုထက်ထိ အဲဒီဆုံးရှုံးမှုတွေကနေ ပြန်လည်နာလန်ထူဖို့ ကြိုးစားနေရတုန်းပဲ" ဟု ဆိုသည်။

ထိုစဥ်က ဖြစ်ပွားခဲ့သော မဟာစစ်ပွဲကြီးသည် ရှန်းဝူ စကြဝဠာ တိုက်ကြီးကို ပျက်စီးယိုယွင်းစေခဲ့သည်။ နှစ်ပေါင်းများစွာ ကြာမြင့်ခဲ့သည့်တိုင်အောင် ယခင်အခြေအနေသို့ ပြန်လည်မရောက်ရှိနိုင်သေးချေ။

စင်စစ်အားဖြင့် လောကဓာတ်၏ မူလအနှစ်သာရပင် ပျောက်ကွယ်သွားခဲ့ရပြီး ယင်းနောက်ပိုင်းတွင် မည်သည့်နတ်ဘုရားမျှ ပေါ်ထွက်မလာတော့ပချေ။

နတ်ဘုရားတစ်ပိုင်းအဆင့် ကျင့်ကြံသူများပင်လျှင် အလွန်တရာ ရှားပါးလှပေသည်။

ဆန့်ကျင်ဘက်အနေဖြင့်မူ မိစ္ဆာမျိုးနွယ်စုတစ်ခုတည်းတွင်ပင် နတ်ဘုရားတစ်ပိုင်းအဆင့်သို့ ရောက်ရှိထားသော မင်းသား ခြောက်ပါးအထိ ရှိနေသည်။

ထို့အပြင် မင်းသားများ၏ လက်အောက်တွင် ပုန်းအောင်းနေသော လျှို့ဝှက်ပညာရှင်များနှင့် မိစ္ဆာမျိုးနွယ်မှ အခြားအစွမ်းထက် ပုဂ္ဂိုလ်များကို ပေါင်းစပ်လိုက်ပါက ၎င်းတို့၏ အရေအတွက်သည် ရှန်းဝူ စကြဝဠာ တိုက်ကြီးထက် များစွာ သာလွန်နေပေသည်။

အကယ်၍ မိစ္ဆာမျိုးနွယ်များက ရှန်းဝူ စကြဝဠာ တိုက်ကြီးကို ထပ်မံကျူးကျော်လာပါက ရှန်းဝူ စကြဝဠာ တိုက်ကြီးအနေဖြင့် ခုခံနိုင်စွမ်း ရှိလိမ့်မည်မဟုတ်ကြောင်း ချင်ယွမ်ဖုန်း အကြွင်းမဲ့ ယုံကြည်နေမိသည်။

"ဒါပေမဲ့ ငါ မိစ္ဆာဘုရင် မလုပ်ချင်တော့ဘူး... ပြီးတော့... ငါ မင်းနဲ့အတူ မင်းတို့ကမ္ဘာကို လိုက်ခဲ့ချင်တယ်..." မေသည် ချင်ယွမ်ဖုန်းကို ကြည့်ကာ ရိုးသားစွာ ဖွင့်ဟလိုက်လေသည်။

ချင်ယွမ်ဖုန်းသည် တိတ်ဆိတ်သွား၏။ သူ၌ ကောင်းမွန်သော အစီအစဥ်တစ်ခု ရှိခဲ့ဖူးသည်။ မေသည် မိစ္ဆာဘုရင်အဖြစ် ပြန်လည်ထိုင်လိုက်ပြီး မိစ္ဆာနယ်မြေ၏ ထောက်ခံမှုကို ရရှိသွားသရွေ့ တစ်ပါးကျွန်းသား မိစ္ဆာများက ရှန်းဝူ စကြဝဠာ တိုက်ကြီးအပေါ် ခြိမ်းခြောက်နေမှုသည် ရှိတော့မည်မဟုတ်ပေ။

ထိုသို့ဆိုလျှင် အစောင့်အရှောက်မိသားစုဖြစ်သော ကျိမိသားစု၏ တာဝန်သည်လည်း ပြီးဆုံးသွားမည်ဖြစ်ရာ သူသည် ရှန်းဝူ စကြဝဠာ တိုက်ကြီးပေါ်ရှိ ရန်ငြိုးအင်အားစုများကိုသာ ဖြေရှင်းရန် လိုအပ်တော့မည်ဖြစ်သည်။

လက်ရှိတွင် သူနှင့် ရန်ငြိုးရှိနေသော အင်အားစု အနည်းငယ်သာ ကျန်ရှိတော့သည်။ မြူနှင်းဂိုဏ်းက တစ်ခုဖြစ်ပြီး ယမမင်း လူသတ်သမားအဖွဲ့အစည်းကိုလည်း အခြားတစ်ခုအဖြစ် သတ်မှတ်နိုင်သည်။

ထိုဧရာမ အင်အားစုကြီးနှစ်ခု၏ နောက်ကွယ်တွင် နတ်ဘုရားများ ရှိနေနိုင်ကြောင်း ချင်ယွမ်ဖုန်း တွေးတောမိသည်။

မြူနှင်းဂိုဏ်းနှင့် ချင်ယွမ်ဖုန်းတို့အကြားရှိ ရန်ငြိုးသည် နှစ်ရှည်ကာလကြာစွာ စေ့စပ်၍မရနိုင်သော အခြေအနေ ဖြစ်သည်။

ယမမင်းအဖွဲ့နှင့် ချင်ယွမ်ဖုန်းတို့၏ ရန်ငြိုးသည်လည်း ကြီးမားလှပြီး ချင်ယွမ်ဖုန်းအနေဖြင့် ချင်ကွေ့အား ယမမင်းအဖွဲ့အစည်းကို အမြစ်ပြတ်ချေမှုန်းပစ်မည်ဟု ကတိပြုခဲ့ဖူးသည်။

ယမမင်းအဖွဲ့သည် ရှန်းဝူ စကြဝဠာ တိုက်ကြီး၏ ကင်ဆာအကျိတ်တစ်ခု ကဲ့သို့ပင် ဖြစ်သည်။ ဝိညာဉ်ကျောက်တုံးများ ပေးချေနိုင်သရွေ့ တိုက်ကြီးပေါ်ရှိ လူအများစုကို သတ်ဖြတ်ပေးနိုင်ရာ ယင်းက လူအများအပြားအတွက် မတရားမှုပင် ဖြစ်သည်။

လူသတ်သမားအဖွဲ့အစည်းများ ရှိနေခြင်းကို လက်ခံနိုင်သော်လည်း ဤမျှအထိ ကြီးမားကျယ်ပြန့်မနေသင့်ပေ။ ထိုအရာက ရှန်းဝူ စကြဝဠာ တိုက်ကြီး၏ မျှတမှုကို ပျက်ပြားစေပြီး ရေတွက်၍မရသော မိသားစုများကို ဒုက္ခတွင်းသို့ သက်ဆင်းစေသည်။

အကယ်၍ ယမမင်းအဖွဲ့သာ ဆက်လက်အင်အားကြီးမားနေပါက ရှန်းဝူ စကြဝဠာ တိုက်ကြီးပေါ်ရှိ မည်သူမျှ ကျင့်ကြံခြင်းကို အားထုတ်ကြတော့မည်မဟုတ်ချေ။

ဝိညာဉ်ကျောက်တုံးများ ပေးဆောင်ရုံဖြင့် အခြားသူများကို သတ်ဖြတ်နိုင်နေသရွေ့ ကျင့်ကြံအားထုတ်ခြင်းသည် အဓိပ္ပာယ်မဲ့သောအရာတစ်ခု ဖြစ်သွားပေလိမ့်မည်။

ချင်ယွမ်ဖုန်းသည် ထိုသို့သော အခြေအနေမျိုး ဖြစ်မလာစေလိုသကဲ့သို့ မိမိ၏ မိသားစုနှင့် မိတ်ဆွေများ၏ ဘေးကင်းလုံခြုံရေးအတွက် ယမမင်းအဖွဲ့အစည်းတစ်ခုလုံးကို အကြွင်းမဲ့ သုတ်သင်ရှင်းလင်းရန် သန္နိဋ္ဌာန်ချထားပြီး ဖြစ်သည်။

ထိုအကြောင်းကို တွေးမိရင်း ချင်ယွမ်ဖုန်းသည် ခေါင်းကို အမြန်ရမ်းလိုက်မိရာ အတွေးများက လမ်းချော်သွားခဲ့ပြီ ဖြစ်သည်။

"အချို့သောအရာတွေကို ထွက်ပြေးရုံနဲ့ မဖြေရှင်းနိုင်ဘူးလေ... ဒါပေမဲ့ မင်းဘယ်လိုဆုံးဖြတ်ချက်ပဲချချ... ကျွန်တော် ကူညီပေးမှာပါ" ချင်ယွမ်ဖုန်းက တည်ငြိမ်စွာ ပြောဆိုလိုက်သည်။

"ကျေးဇူးတင်ပါတယ်... ဖုန်း" မေက တိုးညင်းစွာ ဆို၏။

နှစ်ရက်လွန်ပြီးနောက် တော်လှန်ရေးအဖွဲ့၏ အထက်လူကြီးများသည် ချင်ယွမ်ဖုန်းအား တွေ့ဆုံရန် တောင်ပေါ်စခန်းသို့ ရောက်ရှိလာကြသည်။

ရောက်ရှိလာသူနှစ်ဦးမှာ အမျိုးသားတစ်ဦးနှင့် အမျိုးသမီးတစ်ဦး ဖြစ်သည်။ အမျိုးသားသည် အရပ်မြင့်မားကာ သန်မာထွားကျိုင်းပြီး အမျိုးသမီးသည် ဆွဲဆောင်မှုရှိကာ လှပတင့်တယ်လှသည်။

ထို့အပြင် ၎င်းတို့နှစ်ဦးစလုံးသည် ဘုရင်နယ်ပယ်သို့ ရောက်ရှိထားကြသဖြင့် မြင့်မားသော ကျင့်စဉ်အဆင့်များ ရှိကြပေသည်။

"မင်းက ဖုန်း ဖြစ်ရမယ်... မင်းအကြောင်း ကြားနေရတာ ကြာပါပြီ" အမျိုးသမီးက ပြုံးလျက် နှုတ်ဆက်စကား ဆိုလိုက်သည်။

ချင်ယွမ်ဖုန်းက ခေါင်းညိတ်ပြကာ "မင်းတို့ သန့်စင်သော နတ်ရေစင်ကိစ္စအတွက် လာကြတာမလား" ဟု တိုက်ရိုက်ပင် မေးမြန်းလိုက်၏။

"ဉာဏ်ကောင်းတဲ့လူတွေနဲ့ စကားပြောရတာ တကယ်ကို လွယ်ကူတာပဲ" အမျိုးသား၏ နက်ရှိုင်းသော အသံ ထွက်ပေါ်လာပြီး "မင်းဆီမှာ မြေယာတွေရဲ့ သဘောသဘာဝကို ပြောင်းလဲပေးနိုင်တဲ့ အရည်တစ်ခု ရှိနေတယ်ဆိုတာ ငါတို့ သိရတယ်... မင်း လိုအပ်တဲ့အရာမှန်သမျှနဲ့ ငါတို့ အလဲအလှယ် လုပ်နိုင်ပါတယ်" ဟု ဆိုသည်။

ချင်ယွမ်ဖုန်းက ခေါင်းကို ရမ်းခါလိုက်ပြီး "ကျွန်တော် ပြောပြီးသားပဲ... လက်ရှိမှာတော့ မဖြစ်နိုင်ဘူး... ပြီးတော့ မင်းတို့ သန့်စင်သော နတ်ရေစင်ကို ဘာအတွက် သုံးမလဲဆိုတာ ကျွန်တော် မသေချာဘူး... ဒါက မိစ္ဆာနယ်မြေရဲ့ သဘောသဘာဝကို ပြောင်းလဲပစ်နိုင်တဲ့ နည်းလမ်းမဟုတ်ပါဘူး" ဟု ပြတ်သားစွာ ငြင်းပယ်လိုက်သည်။

ထိုအခါ အမျိုးသား၏ မျက်နှာသည် အေးစက်သွားသော်လည်း အမျိုးသမီးကမူ ပြုံးလျက် ချင်ယွမ်ဖုန်းကို ကြည့်နေဆဲ ဖြစ်သည်။

"ကျွန်တော့်ကို အဲဒီလို လာမကြည့်ပါနဲ့... မင်းတို့နှစ်ယောက်စလုံးက ဦးချိုကျိူးတွေ မဟုတ်ကြဘူး... ကျွန်တော့်အမြင်အရတော့ တော်လှန်ရေးအဖွဲ့ကို အစပိုင်းမှာ ထိုကျွန်တွေအတွက် ဖွဲ့စည်းခဲ့တာ ဖြစ်နိုင်ပေမဲ့ မင်းတို့လို မိစ္ဆာတွေ ပါဝင်လာပြီးတဲ့နောက်မှာတော့ တော်လှန်ရေးအဖွဲ့ရဲ့ ရည်ရွယ်ချက်က မဖြူစင်တော့ဘူး"

ချင်ယွမ်ဖုန်းက မိမိစကားကြောင့် ရှေ့မှ လူနှစ်ဦး ဒေါသထွက်သွားနိုင်သည်ကို အနည်းငယ်မျှ ဂရုမစိုက်ဘဲ တည်ငြိမ်စွာပင် ပြောကြားလိုက်လေသည်။

ချိုပါသော လူသားကျွန်များ၏ ပြဿနာကို ဖြေရှင်းရန် ရည်ရွယ်ထားသည့် အဖွဲ့အစည်းတစ်ခုတွင် ပြည့်စုံသော ဦးချိုများရှိသည့် မိစ္ဆာအမြောက်အမြား အဘယ်ကြောင့် ပါဝင်နေရသနည်းဟူသော အချက်ကို သူ ကြိုတင်၍ သံသယဝင်ခဲ့ပြီး ဖြစ်သည်။

ယင်း၏ အကြောင်းပြချက်မှာ ရိုးရှင်းလှပေသည်... အကျိုးအမြတ် ရှိနေသောကြောင့်သာ ဖြစ်ချေတော့သည်။