အခန်း ၈၅၁

အခန်း(၈၅၁) နောက်တစ်ကြိမ် တံဆိပ်ခတ်နှိပ်ခြင်း

အကူးအပြောင်း ကြားခံဟင်းလင်းပြင်သည် မည်သည့်အခါမျှ နေ့နှင့်ညဟူ၍ ရှိမနေဘဲ အမြဲတစေ မှုံမှိုင်းမှောင်မိုက်နေသည့်ပုံစံအတိုင်း ရှိနေဆဲပင် ဖြစ်ချေသည်။

ဟင်းလင်းပြင်အတားအဆီးကို ဖြတ်ကျော်ပြီးနောက် ချင်ယွမ်ဖုန်းသည် အကူးအပြောင်း ကြားခံဟင်းလင်းပြင်သို့ ပြန်လည်ရောက်ရှိလာခဲ့သည်။

ထိုအချိန်တွင် သူသည် မိစ္ဆာနယ်မြေ၌ သုံးနှစ်ကျော်မျှ အချိန်ကုန်ဆုံးခဲ့ပြီး ဖြစ်သော်လည်း ပြင်ပလောကတွင်မူ ခန့်မှန်းခြေ ခြောက်လခန့်သာ ရှိသေးပေသည်။ ဤနေရာကို စောင့်ကြပ်နေသည့် ကျိရှန့်သည် တစ်စုံတစ်ဦး ရောက်ရှိလာသည်ကို သတိပြုမိသဖြင့် မတ်တတ်ထရပ်လိုက်၏။

"ယွမ်ဖုန်း... မင်း ပြန်လာပြီလား..." ကျိရှန့်သည် လောတကြီးဖြင့် ရှေ့သို့ထွက်၍ ဆီးကြိုလိုက်သည်။

"ဟုတ်ကဲ့... အဖေ၊ အဖေလည်း နောက်ဆုံးတော့ ပြန်ရောက်လာပြီပေါ့" ချင်ယွမ်ဖုန်းက ပြုံး၍ ပြောလိုက်၏။

ကျိရှန့်သည် ချင်ယွမ်ဖုန်းကို သေချာစွာ စိုက်ကြည့်ပြီးနောက် စိတ်ကျေနပ်မှုရှိစွာဖြင့် ခေါင်းညိတ်လိုက်သည်။ ယခုအချိန်၌ ချင်ယွမ်ဖုန်း၏ ကျင့်စဉ်အဆင့်သည် ဆဋ္ဌမအဆင့်ဘုရင်နယ်ပယ် သို့ တိုက်ရိုက် မြင့်တက်သွားခဲ့ပြီ ဖြစ်ချေသည်။

ဤမျှ မြန်ဆန်လှသော တိုးတက်မှုနှုန်းသည် ကျိရှန့်ကို အံ့အားသင့်လွန်းသဖြင့် တသသ ဖြစ်သွားစေရသည်။

"မင်း ကျင့်စဉ်ကို ဘယ်လိုများ ကျင့်ကြံခဲ့တာလဲ" ကျိရှန့်က စိတ်လှုပ်ရှားစွာ မေးမြန်းလိုက်၏။

"မိစ္ဆာနယ်မြေရဲ့ မင်းသားနှစ်ပါးကို ကျေးဇူးတင်ရမှာပါ၊ ဒါ့အပြင် မိစ္ဆာနယ်မြေရဲ့ အချိန်စီးဆင်းမှုက ကျွန်တော်တို့ဆီနဲ့ မတူဘူး၊ မိစ္ဆာနယ်မြေထဲမှာ သုံးနှစ်တောင် ကုန်ဆုံးသွားခဲ့ပြီလေ" ချင်ယွမ်ဖုန်းက တည်ငြိမ်စွာဖြင့် ပြောပြလိုက်သည်။

ကျိရှန့်က ခေါင်းညိတ်လိုက်၏။ ချင်ယွမ်ဖုန်းသည် မိစ္ဆာနယ်မြေအတွင်း ရေတွက်မရနိုင်သော အန္တရာယ်များစွာကို ရင်ဆိုင်ခဲ့ရမည်ကို သူ သေချာပေါက် သိရှိနေသဖြင့် ထိုအကြောင်းအရာများကို အမြန်ဆုံး သိရှိလိုနေသည်။

ချင်ယွမ်ဖုန်းက ပြုံးလျက် မိစ္ဆာနယ်မြေအတွင်း သူ ကြုံတွေ့ခဲ့ရသမျှကို ကျိရှန့်အား အသေးစိတ် ပြောပြလိုက်သည်။ ထို့ပြင် သူသည် ရှေးဟောင်းဘိုးဘေး ဖြစ်သူ ကျိရန်ကို ရှာဖွေတွေ့ရှိခဲ့ကြောင်းကိုပါ ပြောပြလိုက်ရာ ကျိရှန့်မှာ အလွန်တရာ အံ့ဩမှင်သက်သွားရ၏။

ချင်ယွမ်ဖုန်းသည် မိစ္ဆာနယ်မြေ၏ မိစ္ဆာဘုရင်ကို ကိုယ်တိုင် ပျိုးထောင်ပေးခဲ့ပြီး မိစ္ဆာဘုရင် သုံးပါးကို သုတ်သင်ချေမှုန်းခဲ့ကြောင်း ကြားသိရသောအခါ ကျိရှန့်မှာ အံ့ဩလွန်းသဖြင့် စကားပင် မဆိုနိုင်တော့ပေ။

"မထူးဆန်းတော့ပါဘူး... နောက်ပိုင်းမှာ နတ်ဆိုးဘုရင်က ဒီဘက်ကို လာတာ ကျဲသွားတယ်၊ မင်းက မိစ္ဆာနယ်မြေထဲမှာ ပြဿနာတွေ ရှာနေခဲ့တာကိုး၊ သူတို့ ဒီဘက်ကို အာရုံမစိုက်နိုင်လောက်အောင် ရှုပ်ယှက်ခတ်နေအောင် လုပ်ထားတာပဲ" ကျိရှန့်က သက်ပြင်းချရင်း ဆိုလေသည်။

ချင်ယွမ်ဖုန်းက ခေါင်းညိတ်ကာ "ဟုတ်တယ်... ဒီမင်းသားတွေ အထိနာသွားကြလို့ အခုလောလောဆယ် ဒီဘက်အရေးကို လှည့်ကြည့်ဖို့ အချိန်ရမှာ မဟုတ်ဘူး၊ ကျွန်တော်တို့ရဲ့ ဘိုးဘေးသာ ဒီမှာရှိနေရင် မေကလည်း နတ်ဘုရားအဆင့်ကို သေချာပေါက် ပြန်သွားနိုင်လိမ့်မယ်၊ မိစ္ဆာမျိုးနွယ်စုရဲ့ ခြိမ်းခြောက်မှုက မရှိတော့ပါဘူး"

"အော်... ဒါနဲ့ ဘိုးဘေးက အဖေ့ကို အနားယူဖို့အတွက် ခွင့်ပေးလိုက်တယ်လို့ ပြောခိုင်းလိုက်ပါတယ်"

ကျိရှန့်က ပြုံး၍ ခေါင်းခါပြလိုက်သည်။

"ဟူး... ဒီနေရာက ပျင်းစရာကောင်းလှပေမဲ့ ငါလည်း ကျင့်သားရနေပါပြီ၊ ဒါ့အပြင် မင်း ပြင်ပလောကမှာ ကောင်းကောင်းမွန်မွန် ရှိနေတယ်ဆိုတာ သိရရင်ပဲ ငါ့အတွက် လုံလောက်ပါပြီ"

"ကျွန်တော့်ကို ကူညီဖို့ အဖေ အပြင်ကို ထွက်လာပေးဖို့ လိုသေးတယ်လေ" ချင်ယွမ်ဖုန်း၏ လေသံထဲတွင် ရှားရှားပါးပါး နွေးထွေးမှုတို့ ယှက်သန်းသွားခဲ့သည်။

"အခုအချိန်မှာ ငါက မင်းအတွက် ဘာအသုံးဝင်ဦးမှာလဲ" ကျိရှန့်က ပြုံးလျက် ဆို၏။ "ဒါပေမဲ့ ငါ ဒီမှာပဲ ဆက်နေဦးမယ်၊ နတ်ဆိုးဘုရင်ရဲ့ အကြောင်းကို ငါ ကောင်းကောင်းသိတယ်၊ သူ ဒီအတိုင်း လက်လျှော့မှာ မဟုတ်ဘူး"

ချင်ယွမ်ဖုန်းသည် မျက်မှောင်ကြုတ်လိုက်မိသည်။

"ဘာလို့ အဲလိုပြောတာလဲ... သူ အခု ကိုယ့်ကိုယ်ကိုယ်တောင် မနည်းကာကွယ်နေရတာကို ရှန်းဝူ စကြဝဠာ တိုက်ကြီးကို ကျူးကျော်ဖို့ ကြံစည်နေတုန်းပဲလား"

"အဲဒါကတော့ သေချာရေရာတာ မဟုတ်ဘူး" ကျိရှန့်က ခေါင်းခါရင်း ဆိုသည်။ "ငါ နတ်ဆိုးဘုရင်နဲ့ တိုက်ခိုက်လာခဲ့တာ နှစ်ပေါင်းများစွာ ရှိပြီ၊ သူ့အကြောင်း ငါ အသိဆုံးကတော့ သူ ဘယ်တော့မှ အရှုံးမပေးတတ်တာပဲ"

ချင်ယွမ်ဖုန်းက ခေါင်းညိတ်လိုက်၏။

"အဲဒါလည်း ဟုတ်တာပဲ... သူက ရှေးရှေးကတည်းက ရှန်းဝူ စကြဝဠာ တိုက်ကြီးကို ပြန်လာဖို့ ကြိုးစားနေခဲ့တာ အခုထိ လက်မလျှော့သေးဘူး၊ ဒါက စွဲလမ်းမှုတစ်ခု ဖြစ်သွားတာ နေမှာပါ"

"ကဲပါ... အဲဒီအကြောင်းတွေ ဆက်မပြောကြရအောင်၊ ဘာပဲဖြစ်ဖြစ် ငါ ဒီမှာရှိနေသရွေ့ သူတို့ တံဆိပ်ခတ်နှိပ်မှုကို ဖျက်ဆီးနိုင်မှာ မဟုတ်ဘူး" ကျိရှန့်က ပြုံး၍ ဆိုလေသည်။ "အခု မင်းလည်း အင်အားကြီးမားလာပြီဆိုတော့ ပြန်ပါတော့၊ မင်းကို စောင့်နေတဲ့သူတွေ ရှိသေးတယ် မဟုတ်လား၊ ငါကတော့ ဘိုးဘေးတို့ ထွက်လာပြီး မိစ္ဆာနယ်မြေရဲ့ ကိစ္စတွေ ငြိမ်သက်သွားမှ မင်းကို လာရှာမယ်"

"ကောင်းပါပြီ" ချင်ယွမ်ဖုန်းက ခေါင်းညိတ်လိုက်သည်။ ကျိရှန့်၏ စိုးရိမ်ပူပန်မှုသည် အခြေအမြစ်မရှိသည်တော့ မဟုတ်ပေ။ အကယ်၍ ကျိရှန့် မရှိသည့်အချိန်တွင် နတ်ဆိုးဘုရင်က မမျှော်လင့်ထားသော အရာတစ်ခုခုကို ပြုလုပ်ခဲ့ပါက အခြေအနေသည် အလွန် ဆိုးဝါးသွားပေလိမ့်မည်။

ကျိရှန့်နှင့်အတူ ရက်အနည်းငယ်မျှ အချိန်ကုန်ဆုံးပြီးနောက် ချင်ယွမ်ဖုန်းသည် အကူးအပြောင်း ကြားခံဟင်းလင်းပြင်မှ ထွက်ခွာခဲ့ပြီး နတ်ဘုရားသောင်းချီနယ်မြေသို့ ပြန်လည်ရောက်ရှိလာခဲ့သည်။

ယခုအချိန်တွင် နတ်ဘုရားသောင်းချီနယ်မြေရှိ မိစ္ဆာနှိမ်နင်းရေး နတ်လက်နက်တံပိုးပေါ်မှ အပေါက်ကြီးသည် ပိုမိုကြီးမားလာသည့်ပုံစံ ရှိနေပြီး ၎င်းထံမှ အလွန်များပြားလှသော စိတ်အာဃာတမိစ္ဆာ အရှိန်အဝါများ အဆက်မပြတ် ထွက်ပေါ်နေချေသည်။

နတ်ဆိုးဘုရင်သည် အကူးအပြောင်း ကြားခံဟင်းလင်းပြင်သို့ လအနည်းငယ် သို့မဟုတ် နှစ်အနည်းငယ် ကြာမှ တစ်ကြိမ်သာ ဝင်ရောက်လေ့ရှိသော်လည်း ချန်ထားရစ်ခဲ့သော အတိုင်းအဆမရှိလှသည့် မိစ္ဆာအရှိန်အဝါ အကြွင်းအကျန်များသည် တံဆိပ်ခတ်နှိပ်မှုကို ဖောက်ထွက်၍ ဤနေရာသို့ ရောက်ရှိလာခြင်း ဖြစ်သည်။

မိစ္ဆာနှိမ်နင်းရေး နတ်လက်နက်တံပိုးသည် ဟင်းလင်းပြင်လမ်းကြောင်း၏ တံဆိပ်ခတ်နှိပ်မှုများထဲမှ တစ်ခုပင် ဖြစ်သည်။ အကယ်၍ ဤတံဆိပ်ခတ်နှိပ်မှု ပျက်စီးသွားပါက ဟင်းလင်းပြင်လမ်းကြောင်း၏ အခြားတစ်ဖက်မှ တံဆိပ်ခတ်နှိပ်မှုသည်လည်း လျော့ရဲသွားပေလိမ့်မည်။

"အခု ငါက ဆဋ္ဌမအဆင့် ဘုရင်နယ်ပယ် ကို ရောက်နေပြီဆိုတော့ ဒီနေရာကို ပြန်ပြီး တံဆိပ်ခတ်နှိပ်ဖို့ ကြိုးစားကြည့်ရမယ်" ချင်ယွမ်ဖုန်းက တည်ငြိမ်စွာ ရေရွတ်လိုက်၏။

သူနှင့် ဝမ်ရှူးကျူးတို့ ဤနေရာသို့ ပထမဆုံးအကြိမ် ရောက်ရှိစဉ်က မဟာဆရာနယ်ပယ် အဆင့်မျှသာ ရှိသေးသဖြင့် ၎င်းတို့ ပြုလုပ်ခဲ့သော တံဆိပ်ခတ်နှိပ်မှုသည် ခိုင်ခံ့မှု မရှိခဲ့ပေ။ သို့သော် ချင်ယွမ်ဖုန်းသည် ယခုအခါတွင်မူ စမ်းသပ်ကြည့်နိုင်ပြီ ဖြစ်သည်။

ချင်ယွမ်ဖုန်းသည် ဟင်းလင်းပြင်ထက်တွင် ရပ်တန့်လိုက်ပြီး ၎င်း၏ လက်ညှိုးကို ရှေ့သို့ ညွှန်ကာ လေထုထဲတွင် ဝိညာဉ်အဆောင်ပုံရိပ်များကို စတင် ရေးဆွဲလေသည်။ ရွှေရောင်လင်းလက်သော ပုံရိပ်များသည် လေထုထဲတွင် ပျံ့နှံ့သွားပြီးနောက် ထိုအပေါက်ကြီးပေါ်သို့ ဖြည်းညှင်းစွာ ကျရောက်သွားခဲ့၏။

ဤအရာသည် မိစ္ဆာအရှိန်အဝါများ ယိုစိမ့်မှုကို ယာယီအားဖြင့် တားဆီးပေးနိုင်သော်လည်း ယခင်အတိုင်းပင် အချိန်တိုအတွင်း ပြန်လည် ပွင့်ထွက်သွားမည် ဖြစ်သည်။

"ငါ့ရဲ့ ဝိညာဉ်အဆောင်လက်ဖွဲ့ ဖန်တီးသူ စွမ်းရည်ကို ပိုပြီး မြှင့်တင်ဖို့ လိုအပ်နေပြီထင်တယ်" ချင်ယွမ်ဖုန်းက တိုးတိုးလေး ရေရွတ်လိုက်သည်။

ထိုအချိန်တွင် သူသည် ဆဋ္ဌမအဆင့် ဝိညာဉ်အဆောင်လက်ဖွဲ့ ဖန်တီးသူသာ ရှိသေးပြီး မိစ္ဆာနှိမ်နင်းရေး နတ်လက်နက်တံပိုး၏ တံဆိပ်ခတ်နှိပ်မှုကို ဖန်တီးခဲ့သူသည် နတ်ဘုရားတစ်ပိုင်းအဆင့်ထက် ကျော်လွန်သော ပညာရှင်ကြီး သို့မဟုတ် နတ်ဘုရားအဆင့်ပင် ဖြစ်တန်ရာသည်။

"ဒါဆိုရင် စမ်းသပ်ကြည့်ကြတာပေါ့"

ချင်ယွမ်ဖုန်းသည် မိစ္ဆာနှိမ်နင်းရေး နတ်လက်နက်တံပိုး၏ အောက်ခြေသို့ ဖြည်းညှင်းစွာ ဆင်းသက်လိုက်ပြီး မြေပြင်ပေါ်တွင် ဝင်ထိုင်ကာ မျက်လုံးများကို မှိတ်လိုက်၏။

နတ်ဘုရားသောင်းချီနယ်မြေအတွင်း တစ်စုံတစ်ဦးက သူ့အား လာရောက်နှောင့်ယှက်မည်ကို ချင်ယွမ်ဖုန်း အနည်းငယ်မျှ စိုးရိမ်ပူပန်ခြင်း မရှိပေ။

သူ၏ စိတ်အာရုံထဲတွင် ဝိညာဉ်အဆောင်လက်ဖွဲ့ အစုံအလင်ကျမ်းသည် ဖြည်းညှင်းစွာ ပွင့်ဟလာပြီး ဝိညာဉ်အဆောင်ပုံရိပ်များသည် ချင်ယွမ်ဖုန်း၏ စိတ်ထဲတွင် နက်ရှိုင်းစွာ စွဲထင်သွားခဲ့သည်။

ချင်ယွမ်ဖုန်း ကိုယ်တိုင်ပင် သတိမပြုမိဘဲ သူ၏ ခန္ဓာကိုယ်ပတ်လည်တွင် မှေးမှိန်သော ရွှေရောင်အလင်းတန်းများ လင်းလက်နေပြီး ယင်းတို့သည် ဆန်းကြယ်လှသော ရွှေရောင် ဝိညာဉ်အဆောင်ပုံရိပ်များ ဖြစ်ချေသည်။

ယင်းတို့သည် အလွန် ထူးဆန်းအံ့ဩဖွယ်ကောင်းလှပြီး အနီးနားရှိ မိစ္ဆာနှိမ်နင်းရေး နတ်လက်နက်တံပိုးပေါ်မှ ဝိညာဉ်အဆောင်ပုံရိပ်များကိုပင် လှုပ်ခတ်တုံ့ပြန်လာစေသည်။

ဤအရာသည် ချင်ယွမ်ဖုန်းသည် ဝိညာဉ်အဆောင်ပုံရိပ်ဆိုင်ရာ နယ်ပယ်သို့ ချဉ်းနင်းဝင်ရောက်သွားခြင်း၏ လက္ခဏာဖြစ်ပြီး သူ၏ ဝိညာဉ်အဆောင်ပုံရိပ်များနှင့် အဆောင်လက်ဖွဲ့များအပေါ် နားလည်သဘောပေါက်မှုသည် ပိုမိုနက်ရှိုင်းလာကြောင်း ပြသနေခြင်း ဖြစ်သည်။

မြင့်မားသော ကျင့်စဉ်အဆင့်များသည် ဆေးဖော်စပ်သူ၊ အဆောင်လက်ဖွဲ့ ဖန်တီးသူနှင့် အစီအရင် ဆရာသခင်ကဲ့သို့သော အသက်မွေးဝမ်းကျောင်း လုပ်ငန်းများအတွက် မြင့်မားသောအဆင့်ကို သေချာပေါက် အာမမခံနိုင်သော်လည်း နားလည်နိုင်စွမ်းကိုမူ တိုးမြင့်စေနိုင်သည်။

အကြောင်းမူကား ဤအထောက်အကူပြု အသက်မွေးဝမ်းကျောင်း လုပ်ငန်းများသည် လောကနိယာမနှင့် လိုက်လျောညီထွေရှိလှရာ ကျင့်စဉ်အဆင့် မြင့်မားလေလေ လောကနိယာမနှင့် ပိုမို ပေါင်းစည်းနိုင်လေလေ ဖြစ်ပေရာသည်။

ထိုသို့ဖြင့် ချင်ယွမ်ဖုန်းသည် မိစ္ဆာနှိမ်နင်းရေး နတ်လက်နက်တံပိုးအောက်တွင် တစ်လတိတိ ထိုင်နေခဲ့၏။

ဤနေ့တွင် ချင်ယွမ်ဖုန်းသည် ရုတ်တရက် မျက်လုံးများကို ဖွင့်လိုက်ရာ သူ၏ ခန္ဓာကိုယ်ပတ်လည်တွင် ဝိညာဉ်အဆောင်ပုံရိပ်များ လင်းလက်သွားပြီးနောက် ခန္ဓာကိုယ်အတွင်းသို့ ပြန်လည်ဝင်ရောက် ပျောက်ကွယ်သွားကာ ခန့်ညားထည်ဝါလှသော အသံလှိုင်းများကို ဖြစ်ပေါ်စေခဲ့သည်။

"ဒါက ကမ္ဘာမြေနဲ့ ကောင်းကင်ဘုံက မွေးဖွားပေးလိုက်တဲ့ ဝိညာဉ်အဆောင်ပုံရိပ်ရဲ့ စွမ်းအားပေါ့" ချင်ယွမ်ဖုန်းသည် မတ်တတ်ထရပ်လိုက်ပြီး ခန္ဓာကိုယ်ပေါ်မှ ဖုန်မှုန့်များကို ခါထုတ်ကာ ပြုံးလိုက်၏။ "ဒါဆိုရင် အဆင့်တက်ကြစို့"

ချင်ယွမ်ဖုန်း၏ အဆောင်လက်ဖွဲ့ ဖန်တီးသူအဆင့်သည် ဆဋ္ဌမအဆင့်မှ အဋ္ဌမအဆင့်သို့ တဟုန်ထိုး မြင့်တက်သွားပြီးနောက်မှသာ ဖြည်းညှင်းစွာ ရပ်တန့်သွားခဲ့သည်။

ချင်ယွမ်ဖုန်းသည် နဝမအဆင့်သို့ ရောက်ရှိရန်မှာ ပါးလွှာသော စက္ကူတစ်ရွက်စာမျှသာ လိုအပ်တော့ကြောင်း ခံစားလိုက်ရသည်။

ယခုအခါတွင်မူ ချင်ယွမ်ဖုန်းသည် လက်ကို အသာအယာ ဝှေ့ယမ်းလိုက်ရုံမျှဖြင့် ဆန်းကြယ်လှသော ဝိညာဉ်အဆောင်ပုံရိပ်များ လင်းလက်လာပြီး သူ၏ လှုပ်ရှားမှုတိုင်းသည် လောကနိယာမနှင့် လိုက်လျောညီထွေ ဖြစ်နေသည့်ပုံစံ ရှိနေတော့သည်။

သူသည် ပြန်လည်ပျံသန်းကာ မိစ္ဆာနှိမ်နင်းရေး နတ်လက်နက်တံပိုး၏ အပေါက်ကြီးရှေ့တွင် ရပ်တန့်လိုက်၏။

"တံဆိပ်ခတ်နှိပ်စမ်း"

ချင်ယွမ်ဖုန်းသည် သူ၏လက်ကို ဆန့်ထုတ်လိုက်ပြီး အသေးအဖွဲကိစ္စတစ်ခုကို ပြုလုပ်နေသကဲ့သို့ သူ၏လက်ချောင်းများကို ရှေ့တွင် ဝှေ့ယမ်းလိုက်သည်။

ရွှေရောင်လင်းလက်သော ဝိညာဉ်အဆောင်ပုံရိပ်များသည် လေထုထဲတွင် ပျောက်ကွယ်မသွားဘဲ စုစည်းလာခဲ့ပြီး ယခင်က ချင်ယွမ်ဖုန်း ရေးဆွဲခဲ့သော ဝိညာဉ်အဆောင်ပုံရိပ်များထက် အဆပေါင်းများစွာ ပိုမိုထူထဲလှသည်။

ထို့နောက် ယင်းတို့သည် ဖြည်းညှင်းစွာ ဆင်းသက်သွားပြီး မိစ္ဆာနှိမ်နင်းရေး နတ်လက်နက်တံပိုးပေါ်မှ အပေါက်ကြီးပေါ်သို့ ကျရောက်သွားခဲ့လေသည်။