အခန်း ၈၅၀

အပိုင်း ၈၅၀ - မိစ္ဆာဓား ပြန်လည်ပေါ်ထွက်လာခြင်း

ခေါင်းနှစ်လုံးနှင့် ရှေးဟောင်းမိစ္ဆာသည် ဆိုးယုတ်စွာ ပြုံးလိုက်ပြီးနောက် သူ၏ ခန္ဓာကိုယ်မှာ လေပွေလှိုင်းတစ်ခုနှင့်အတူ မြင်ကွင်းမှ ပျောက်ကွယ်သွားခဲ့ပြန်သည်။

ဟန်လိ၏ ရှေ့တွင် မလှုပ်မယှက် ရပ်တန့်နေခဲ့သော မိစ္ဆာအလောင်းကောင်အရှင်မှာ ရုတ်တရက် ဟိန်းဟောက်လိုက်ပြီး သူ၏ လက်များကို ဖြတ်ခနဲ လှုပ်ရှားကာ သူ၏ လက်သည်းများဖြင့် မရေမတွက်နိုင်သော အစိမ်းရောင် အလင်းတန်းများကို ရှေ့သို့ တရစပ် ပစ်လွှတ်လိုက်တော့၏။

အနက်ရောင်အလင်းတန်းများ ဖြတ်ခနဲ လင်းလက်သွားပြီး ထိုအစိမ်းရောင် လက်သည်းအလင်းတန်းများ၏ ရှေ့မှောက်၌ ရှေးဟောင်းမိစ္ဆာ၏ ပုံရိပ်သည် ရုတ်တရက် ပေါ်ထွက်လာသည်။

ထိုမိစ္ဆာ၏ တစ္ဆေဦးခေါင်းမျက်နှာထက်တွင် ရက်စက်ကြမ်းကြုတ်သော အမူအရာတစ်ခု ဖြစ်ပေါ်လာပြီး သူ၏ လက်တစ်ဖက်ကို ဝှေ့ယမ်းလိုက်ရာ ရှေ့မှောက်ရှိ အစိမ်းရောင်အလင်းတန်းများမှာ ရုတ်ချည်း သိပ်သည်းသွားကာ လေထုကို ဆုတ်ဖြဲသွားသည့် လက်သည်းချင်း ထိခတ်သံများ ပြင်းထန်စွာ ပဲ့တင်ထပ်လာတော့၏။ နှစ်ဖက်စလုံး ထိပ်တိုက်ရင်ဆိုင်မိသွားကြသည့် ခဏ၌ ထိုအနက်ရောင်အလင်းတန်းမှာ အစိမ်းရောင်အလင်းတန်းများကို အလွယ်တကူပင် အပိုင်းပိုင်း ဖြတ်တောက်ဖျက်ဆီးပစ်လိုက်ပြီး သူ၏ လက်မှာလည်း ဆန်းကြယ်လှသော နည်းလမ်းဖြင့် တစ်မီတာခန့် ပိုမိုရှည်လျားသွားကာ မိစ္ဆာအလောင်းကောင်အရှင်၏ ခန္ဓာကိုယ်အတွင်းသို့ သံမဏိကို ထိုးစိုက်လိုက်သည့်အလား သူ၏ လက်ကို အတင်းအကျပ် ထိုးစိုက်ပစ်လိုက်တော့သည်။

သူက သူ၏ လက်ချောင်းများကို ပြန်လည်ရုတ်သိမ်းလိုက်သည့်အခါ အောက်သိုးသိုးနံနေသည့် အနက်ရောင်မိစ္ဆာသွေးများ တဟုန်ထိုး ပန်းထွက်နေသည့် ပုကန်လုံးတစ်ခုစာလောက် သွေးထွက်သံယို အပေါက်ကြီးတစ်ခု ကျန်ရစ်ခဲ့သည်။

ဤကဲ့သို့သော ဒဏ်ရာမျိုးမှာ သာမန်ကျင့်ကြံသူတစ်ဦးအဖို့ သေစေနိုင်လောက်သည် ဖြစ်သော်လည်း အလောင်းကောင်မိစ္ဆာ တစ်ဦးအဖို့မူ ၎င်းက နာကျင်မှုကိုသာ ခံစားရစေသည်။ ထိုဒဏ်ရာက သူ့အား ဒေါသတကြီး မာန်သွင်းလာစေဖို့ အတွက်သာ နှိုးဆော်ပေးလိုက်သလို ဖြစ်သွား၏။ သူက နောက်သို့ ဆုတ်ခွာသွားခြင်း မရှိသည့်အပြင် သူ၏ လက်ထံမှနေ၍ သုံးမီတာခန့် ရှည်လျားသော ဆူးချွန်ကြီးများ ရုတ်တရက် ထိုးထွက်လာစေကာ ထိုရှေးဟောင်းမိစ္ဆာထံသို့ အရှိန်အဟုန်ပြင်းစွာဖြင့် ပြန်လည်ထိုးနှက် တိုက်ခိုက်လိုက်တော့သည်။

ထိုမိစ္ဆာစိတ်ဝိညာဉ်သည် မိစ္ဆာအလောင်းကောင်အရှင်မှာ သူ မျှော်လင့်ထားခဲ့သည်ထက် များစွာ ပိုမိုခက်ထန်ကြံ့ခိုင်နေပြီး ယခုအသစ်ပေါ်ထွက်လာသော ဆူးချွန်ကြီးများ၏ စွမ်းပကားကြောင့် အံ့အားသင့်သွားရကာ အလန့်တကြား ဖြစ်သွားရ၏။ သို့သော်လည်း ခဏအကြာတွင် ထိုမိစ္ဆာက အေးစက်စွာ သရော်လိုက်ပြီး သူ၏ လက်နှစ်ဖက်ကို ရင်ဘတ်ရှေ့သို့ ဝှေ့ယမ်းလိုက်သည်။ ထိုဆူးချွန်သုံးခု ထိုးထွက်လာသည်နှင့် တပြိုင်နက် ကတ္တရာစေးကဲ့သို့ နက်မှောင်လှသော သံချပ်ကာအင်္ကျီ ဝတ်ဆင်ထားသည့် သူ၏ လက်များဖြင့် တင်းကျပ်စွာ ဖမ်းဆုပ်လိုက်တော့၏။ သည့်နောက် သူ၏ မျက်နှာထက်တွင် ဆိုးယုတ်လှသော အပြုံးတစ်ခု ဖော်ပြလျက် သူ၏ လက်ကို အားစိုက် ညှစ်ခြေကာ ထိုဆူးချွန်ကြီးများကို အပိုင်းပိုင်း ပြတ်တောက်သွားအောင် လိမ်ချိုးပစ်သည်။

မိစ္ဆာအလောင်းကောင်အရှင်၏ လက်သည်းများ နှစ်ခြမ်းမကွဲသွားခင် သုံးရောင်ခြယ် အင်းဆက်အုပ်ကြီးတစ်ခု ရုတ်တရက် ပေါ်ထွက်လာပြီး ထိုမိစ္ဆာ၏ ဘေးပတ်လည်သို့ အုံလိုက်ကျင်းလိုက် ဝိုင်းရံပိတ်ဆို့လိုက်ကြ၏။ ဤမျှ နီးကပ်လှသော အကွာအဝေး၌ မမျှော်လင့်ဘဲ ရုတ်ချည်း ပြောင်းလဲသွားခဲ့ရသည့် အခြေအနေကြောင့် ထိုရှေးဟောင်းမိစ္ဆာမှာ သူ၏ ဘေးပတ်လည်တွင် မိစ္ဆာအတတ်ပညာရပ်များကို အပြည့်အဝ ချခင်းထားခဲ့သည် ဆိုဦးတော့... အကြီးအကဲ တုန်လှုပ်ထိတ်လန့်သွားခဲ့သည်။

ထိုအင်းဆက်အုပ်ကြီးက သူ့အား ဝါးမြိုခြုံလွှမ်းတော့မည့် အခိုက်အတန့်၌ မိစ္ဆာ၏ မျက်နှာထက်တွင် ရက်စက်ကြမ်းကြုတ်သော အမူအရာတစ်ခု ဖြစ်ပေါ်လာခဲ့ချေပြီ။ သူက ရုတ်တရက် ပါးစပ်ကို ဟလိုက်ပြီးနောက် သူ၏ ရှေ့မှောက်ရှိ သုံးရောင်ခြယ် ပိုးတောင်မာအုပ်ကြီးကို ပြန့်ကျဲသွားစေရန်အတွက် အနက်ရောင်လှိုင်းတန်းများကို ထွေးထုတ်၍ တိုက်ခိုက်လိုက်တော့၏။

ယင်းကြောင့် ဆန်းကြယ်လှသော မြင်ကွင်းတစ်ခု ဖြစ်ပေါ်လာခဲ့သည်။ ထိုအနက်ရောင်လှိုင်းတန်းများက အနက်ရောင်အကွက်အစင်းနှင့် ရွှေဝါးမြိုခြင်းပိုးတောင်မာများကို ဖြတ်သန်းသွားခဲ့ရသော်လည်း ၎င်းတို့၏ အမြန်နှုန်းမှာ နည်းနည်းလေးမျှ နှေးကွေးသွားခြင်း မရှိခဲ့ပေ။ ယင်းတို့ထံမှနေ၍ အက်ကွဲသံခပ်တိုးတိုးများသာ ထွက်ပေါ်လာခဲ့ပြီး တစ်ခုပြီးတစ်ခု ဆက်တိုက် ပေါက်ကွဲထွက်သွားကြရလျက် လေထုထဲတွင်လည်း သွေးစသွေးနများဖြင့် ပြည့်နှက်သွားစေတော့၏။

ဤသည်ကား မျှော်လင့်ထားခဲ့ပြီးသား ရလဒ်တစ်ခုပင်။ အနက်ရောင်အကွက်အစင်းနှင့် ရွှေဝါးမြိုခြင်းပိုးတောင်မာများမှာ စစ်မှန်သော ရွှေရောင်ပိုးတောင်မာများကဲ့သို့ ခိုင်ခံ့ကြံ့ခိုင်ခြင်း မရှိကြသည့်အပြင် အစွမ်းထက်လှသော ထိုရှေးဟောင်းမိစ္ဆာ၏ မိစ္ဆာအသံလှိုင်းတိုက်ကွက်ကလည်း ၎င်းတို့ကို လုံးဝဖျက်စီးပစ်နိုင်စွမ်း ရှိနေ၏။

ထိုအခိုက်အတန့်၌ မိစ္ဆာအလောင်းကောင်အရှင်က သူ၏ အခြားလက်တစ်ဖက်ကို မြှောက်လိုက်ပြန်သည်။

မိစ္ဆာ၏ မျက်နှာအမူအရာက စိတ်မရှည်တော့သည့်အလား ရှုံ့တွသွားခဲ့ပြီး သူ၏ ပုံရိပ်ကို နောက်တစ်ကြိမ် ဝေဝါး ပျောက်ကွယ်သွားစေကာ မိစ္ဆာအလောင်းကောင်အရှင်၏ နောက်ကွယ်တွင် ရုတ်တရက် ပြန်လည်ပေါ်ထွက်လာခဲ့လျက် ကတ္တရာစေးကဲ့သို့ နက်မှောင်လှသော သူ၏ လက်သီးဖြင့် ရှေ့သို့ အလွယ်တကူပင် ထိုးနှက်တိုက်ခိုက်လိုက်တော့၏။

ဤလုပ်ဆောင်ချက်များမှာ နှေးကွေးလှသည်ဟု ထင်မှတ်ရသော်လည်း ထိုအလောင်းကောင်ရုပ်သေး လှည့်ပတ်ကြည့်ရှုလိုက်သည့် အခိုက်အတန့်ကျမှပင် လက်သီးချက်မှာ သူ၏ မျက်နှာထက်သို့ ကျရောက်လာခဲ့ချေပြီ။ ထိုတစ်ချိန်တည်းမှာပင် တစ်ပေခန့် ရှည်လျားသော ကတ္တရာစေးကဲ့သို့ နက်မှောင်လှသော အရိုးဆူးချွန်ကြီးများ ထိုလက်သီးထံမှနေ၍ ထိုးထွက်လာခဲ့ပြီး အလောင်းကောင်ရုပ်သေး၏ ဦးခေါင်းခွံကို ထွင်းဖောက်သွားခဲ့သည်။ သူ၏ ခန္ဓာကိုယ်မှာ တုန်ရင်သွားခဲ့ပြီးနောက်မှာတော့ သူ၏ လှုပ်ရှားမှုများအားလုံး ရပ်တန့်သွားခဲ့၏။

ထိုရှေးဟောင်းမိစ္ဆာသည် ဆိုးယုတ်စွာ ပြုံးလိုက်ပြီးနောက် ထိုအရိုးဆူးချွန်ကြီးများထံမှနေ၍ အနက်ရောင်မိစ္ဆာမီးတောက်များ ချက်ခြင်း ပြန့်ကားသွားစေသည်။ သည့်နောက် သူက အရိုးဆူးချွန်များကို ပြန်လည်ဆွဲထုတ်လိုက်သည့်အခါ ထိုအလောင်းကောင်ရုပ်သေးမှာ ဘယ်ညာယိမ်းထိုးသွားခဲ့ပြီးနောက်မှာတော့ အနက်ရောင်မိစ္ဆာမီးတောက်များ အပြည့်အဝ ဖုံးလွှမ်းနေလျက် မြေပြင်ပေါ်သို့ လဲပြိုကျသွားခဲ့ပေသည်။

သည့်နောက် ထိုမိစ္ဆာသည် ရွှေဝါးမြိုခြင်းပိုးတောင်မာများရှိရာ အရံအတားအတွင်းသို့ တဟုန်ထိုး တိုးဝင်သွားခဲ့ပြီး သူ၏ လက်သီးထံမှ ထိုးထွက်နေသော အရိုးဆူးချွန်များကို အသုံးပြုကာ ရူးသွပ်စွာ ဝှေ့ယမ်းတိုက်ခိုက်လိုက်တော့၏။

ဟန်လိသည် ထိုရှေးဟောင်းမိစ္ဆာ သူ၏ ဘေးနားသို့ ရောက်ရှိလာခဲ့ပြီး သူ၏ မိစ္ဆာအလောင်းကောင်အရှင်မှာလည်း သူ့အား ရင်ဆိုင်တိုက်ခိုက်ဖို့ရာအတွက် ရှေ့သို့ တဟုန်ထိုး တိုးဝင်သွားတာကို မြင်တွေ့လိုက်ရသည့် အခိုက်အတန့်၌ သူက ချက်ခြင်းပင် နောက်သို့ ဆုတ်ခွာကာ သူတို့ကြားမှ အကွာအဝေးကို ပိုမိုဝေးကွာသွားအောင် လုပ်ဆောင်ရန် တွေးမိသည်။

တစ်ချိန်တည်းမှာပင် သူက သူ၏ ဘေးပတ်လည်တွင် လည်ပတ်စီးဆင်းနေကြသော ရွှေရောင်ဓားအလင်းတန်းများအားလုံးထံသို့ လက်ညွှန်လိုက်ပြီးနောက် ထိုဓားပျံများပေါ်သို့ မန္တာန်တံဆိပ်များကို ဆက်တိုက် ရိုက်ခတ်လိုက်ရာ ဓားပုံရိပ်ယောင်များ အထပ်ထပ် အလွှာလွှာပါဝင်သည့် ရွှေရောင်လှိုင်းလုံးကြီးတစ်ခု ဖွဲ့စည်းပေါ်ထွက်လာခဲ့သည်။ ဟန်လိသည် သူ၏ စိတ်နှလုံးအတွင်း လှုပ်ခတ်သွားပြီး ယင်းတို့ကို အသုံးပြု၍ ထိုမိစ္ဆာကို ဖိနှိပ်ပစ်ရန် ကြံစည်လိုက်မိသော်လည်း ထိုမိစ္ဆာက သူ၏ မိစ္ဆာအလောင်းကောင်အရှင်ကို ဤမျှ လျင်မြန်လှစွာဖြင့် အနိုင်ယူဖျက်ဆီးပစ်နိုင်လိမ့်မည်ဟု လုံးဝ ထင်မှတ်မထားခဲ့မိပေ။

ဟန်လိသည် သူ၏ ကျောရိုးတလျှောက် စိမ့်ခနဲ ခံစားလိုက်ပြီး သူ၏ စိတ်ထဲကနေ ခါးသီးစွာ ညည်းတွားမိလျက် စိတ်နှလုံးအတွင်း၌လည်း အကြီးအကျယ် နာကျင်မှုကို ခံစားလိုက်ရ၏။ ဤသည်ကား သူ ထိုမိစ္ဆာအလောင်းကောင်အရှင်ကို သန့်စင်မွန်းမံပြီးကတည်းက ပထမဆုံးအကြိမ်အဖြစ် ထုတ်ဖော်အသုံးပြုခဲ့ခြင်း ဖြစ်သော်လည်း ထိုရှေးဟောင်းမိစ္ဆာ၏ လက်ချက်ကြောင့် အလွယ်တကူပင် အနိုင်ယူခြင်း ခံလိုက်ရပြီ။ ထိုအလောင်းကောင်ရုပ်သေးမှာ ဆက်လက်ရှင်သန်နိုင်စွမ်း ရှိဦးမလား၊ မရှိတော့ဘူးလား ဆိုတာကို မသိရသေးသော်လည်း မည်သို့ပင်ဖြစ်စေ ဤတိုက်ပွဲ၏ ကျန်ရှိသော အချိန်အတောအတွင်းမှာတော့ သူ့အတွက် မည်သည့်အသုံးဝင်မှုမျှ ရှိလာနိုင်တော့မှာ မဟုတ်ချေ။

ယင်းအတွေးဖြင့် ဟန်လိက သူ၏ ရှေ့တွင် ကာကွယ်ပေးထားကြသော ကျားရုပ်သေးများကို စတင်ထိန်းချုပ်လိုက်ပြီး အဖြူရောင် အလင်းတန်းများ ဖြတ်ခနဲ လင်းလက်သွားစေကာ ထိုမိစ္ဆာထံသို့ တဟုန်ထိုး တိုးဝင် တိုက်ခိုက်စေသည်။

ကြီးမားလှသော လိပ်ရုပ်သေးကြီးများကမူ ဟန်လိ၏ ဘေးနား၌ပင် ဆက်လက်ရှိနေခဲ့ကြပြီး သူတို့၏ ပါးစပ်များဆီမှနေ၍ ရေခဲဓာတ်ပါဝင်သော အလင်းတန်းကြီးများကို အဆက်မပြတ် ပစ်လွှတ်နေခဲ့ကြ၏။ ဟန်လိ၏ ဦးခေါင်းထက်မှ ဝေဝါးလှသော ဓားပုံရိပ်ယောင်များမှာလည်း ကျယ်လောင်လှသော မြည်ဟိန်းသံကြီးများ ထွက်ပေါ်စေကာ ထိုရှေးဟောင်းမိစ္ဆာကို အပြည့်အဝ ဝါးမြိုခြုံလွှမ်းပစ်ရန်အတွက် ရှေ့သို့ တဟုန်ထိုး တိုးဝင်သွားကြချေပြီ။

ထိုမိစ္ဆာသည် ဤသည်ကို မြင်လိုက်ရသည့်အခါ အေးစက်စွာ နှာမှုတ်လိုက်ပြီး သူ၏ လက်လေးဖက်စလုံးကို ဝှေ့ယမ်းလိုက်ရာ သူ၏ လက်သီးများနှင့် တံတောင်ဆစ်များထံမှနေ၍ အရွယ်အစား အမျိုးမျိုးရှိသော အရိုးဆူးချွန်ကြီးများ ထိုးထွက်လာခဲ့သည်။ ယင်းတို့ထဲတွင် ကောက်ကွေးနေသောအရာများရော၊ ဖြောင့်မတ်နေသောအရာများပါ ပါဝင်နေသော်လည်း ၎င်းတို့အားလုံးမှာမူ အလွန်တရာ ထက်ရှလှသည့်အလား အေးစိမ့်လှသော မိစ္ဆာအလင်းတန်းများ ဖြာထွက်နေသည်။ ထိုကျားရုပ်သေးများ ချဉ်းကပ်လာနိုင်ခြင်း မရှိသေးမီမှာပင် ထိုမိစ္ဆာ၏ ပုံရိပ်မှာ ဝေဝါးသွားပြီး မြင်ကွင်းမှ ချက်ခြင်း ပျောက်ကွယ်သွားတော့၏။

သူ၏ ပစ်မှတ် ပျောက်ကွယ်သွားခဲ့ပြီ ဖြစ်ရာ ဟန်လိအနေဖြင့် သူ၏ တိုက်ခိုက်မှုများကို ရပ်တန့်ပစ်ရန်ကလွဲ၍ အခြားမရှိတော့ချေ။ ထိုအခိုက်အတန့်၌ အနက်ရောင်အလင်းတန်းတစ်ခု ဖြတ်ခနဲ လင်းလက်သွားပြီး ထိုကျားရုပ်သေးများထဲမှ တစ်ကောင်၏ နောက်ကွယ်တွင် မိစ္ဆာ၏ ပုံရိပ်သည် ရုတ်တရက် ပေါ်ထွက်လာခဲ့သည်။ မိစ္ဆာက သူ၏ လက်လေးဖက်စလုံးကို အလွယ်တကူပင် ဝှေ့ယမ်းလိုက်၏။ ထိုရုပ်သေးမှာ အနက်ရောင်အလင်းတန်းများ လင်းလက်သွားခဲ့ပြီးနောက်မှာတော့ ချက်ခြင်းပင် အပိုင်းပိုင်း ပြတ်တောက်သွားသည်။

ထိုမိစ္ဆာသည် နောက်တစ်ကြိမ် ထပ်မံ ပျောက်ကွယ်သွားခဲ့ပြန်၏။ သည့်နောက် ညာဘက်ခြမ်းရှိ ရုပ်သေးတစ်ကောင်မှာ အနက်ရောင်အလင်းတန်းများ လင်းလက်သွားခဲ့ပြီး သိပ်သည်းလှသော အရိုးဆူးချွန်ကြီးတစ်ခု သူ၏ ရင်ဘတ်ကို ထွင်းဖောက်သွားခဲ့ပြီ ဖြစ်ရာ ၎င်း၏ ခန္ဓာကိုယ်မှာ ချက်ခြင်းပင် ပျော့ခွေလဲကျသွားသည်။ ဟန်လိသည် ဤမြင်ကွင်းကို ထိတ်လန့်တုန်လှုပ်စွာဖြင့် ကြည့်ရှုနေခဲ့ပြီး ထိုမိစ္ဆာနောက်သို့ လိုက်လံတိုက်ခိုက်ရန်အတွက် ရွှေရောင်ဓားအလင်းတန်းများကို ချက်ခြင်း အမိန့်ပေးစေခိုင်းလိုက်တော့၏။

သို့သော်ငြားလည်း ထိုမိစ္ဆာမှာ နောက်တစ်ကြိမ် ထပ်မံ ပျောက်ကွယ်သွားခဲ့ပြန်ပြီး ခဏအကြာတွင်မူ သူ ထင်မှတ်မထားခဲ့ဖူးသည့် နေရာတစ်ခုတွင် ရုတ်တရက် ပြန်ပေါ်လာသည်။ အရှိန်အဟုန် မြင့်မားသွားခဲ့ပြီဖြစ်သော ထိုရှေးဟောင်းမိစ္ဆာ၏ ပူးပေါင်းချခင်းထားသည့် ကိုယ်ယောင်ဖျောက်အတတ်နှင့် လှုပ်ရှားမှုပညာရပ်များမှာ လုံးဝ ပြည့်စုံလွန်းနေသည်။

သူ နောက်တစ်ကြိမ် ပြန်လည်ပေါ်ထွက်လာခဲ့လေတိုင်း ကျားရုပ်သေးတစ်ကောင်မှာ ဆက်တိုက်ဆိုသလို အပိုင်းပိုင်း ပျက်စီးရသည်သာ။ ယင်းတို့မှာ သူ့အား စိုးစိမျှ တားဆီးနိုင်စွမ်း မရှိချေ။

ဟန်လိသည် သူ ကြုံတွေ့ခဲ့ဖူးသမျှသော ကျင့်ကြံသူ အများစုထက် သူက ပိုမိုစွမ်းအားကြီးမားလှကြောင်း ကိုယ့်ကိုယ်ကိုယ် အမြဲတစေ ဂုဏ်ယူဝင့်ကြွားခဲ့ဖူးသူ ဖြစ်သော်လည်း အခုအခါတွင်မူ ထိုရှေးဟောင်းမိစ္ဆာ၏ စစ်မှန်သော စွမ်းပကားများကို မျက်မြင်တွေ့ရှိလိုက်ရသည့် အခိုက်အတန့်၌ သူ၏ သွေးများပင် ခဲမတတ် ခံစားမိသည်။ သူ ယခင်က ကြုံတွေ့ခဲ့ဖူးသမျှသော တိုက်ပွဲများအားလုံးမှာ အခု သူ ရင်ဆိုင်နေရသော ရန်သူနှင့် ယှဉ်ကြည့်မည်ဆိုပါက ဘာမှပြောပလောက်စရာ ရှိမနေခဲ့ကြပေ။ သူ၏ ကြည်လင်အာရုံ ဝိညာဉ်မျက်စိကို အစွမ်းကုန် အသုံးချနေခဲ့သည် ဆိုဦးတော့... ထိုမိစ္ဆာ၏ တည်နေရာကို ကောင်းစွာ ခြေရာခံနိုင်စွမ်း မရှိဘဲ ဖြစ်နေခဲ့ရ၏။

သူ၏ စိတ်နှလုံးအတွင်း အကြောက်တရားများ ဖြစ်ပေါ်လာနေစဉ်မှာပင် ထိုရှေးဟောင်းမိစ္ဆာသည် နောက်ဆုံး၌ ကျန်ရှိနေသော နောက်ဆုံးကျားရုပ်သေးတစ်ကောင်၏ ဘေးနားသို့ ရောက်ရှိသွားခဲ့ပြီ ဖြစ်ကာ ၎င်း၏ လည်ပင်းအတွင်းမှနေ၍ သူ၏ လက်ကို ပြန်လည်ဆွဲထုတ်ယူသည်။ သည့်နောက် သူက ဟန်လိဘက်သို့ လှည့်ကြည့်လာလေပြီ။ သူ၏ ရေခဲတမျှ အေးစက်လှသော အကြည့်များကြောင့် ဟန်လိ၏ တစ်ကိုယ်လုံးရှိ အမွှေးအမျှင်များပင် ထောင်မတ်သွားမတတ် ခံစားလိုက်၏။

သူ စဦးစိတ်ဝိညာဉ်ကို ဖွဲ့စည်းနိုင်ခဲ့ပြီးနောက် ယခုကဲ့သို့ ကြီးမားလှသော စိတ်မသက်မသာဖြစ်မှုကို တစ်ခါမျှ မကြုံတွေ့ခဲ့ဖူးချေ။ ဟန်လိက အသက်ကို ဝဝရှူသွင်းလိုက်ပြီး ကိုယ့်ကိုယ်ကိုယ် တည်ငြိမ်အောင် အစွမ်းကုန် ကြိုးစားအားထုတ်သည်။

ကြည့်ရသည်မှာ ထိုရှေးဟောင်းမိစ္ဆာ၏ ဆန်းကြယ်လှသော တည်နေရာရွှေ့ပြောင်းခြင်း အတတ်ပညာရပ်နှင့် ဆင်တူလှသည့် လှုပ်ရှားမှုများကြောင့် ရွှေရောင်ဓားအစီအရင်ကို ချခင်းရန်မှာ ခက်ခဲလွန်းမည့်ပုံပင်။ သူ့အတွက် အချိန်ပိုမိုဆွဲထားနိုင်ရန်အတွက် အခြားနည်းလမ်းတစ်ခုခုကိုသာ အသုံးပြုရမည် ဖြစ်ကြောင်း သူ ကောင်းစွာ သဘောပေါက်သွား၏။

ယင်းအတွေးဖြင့် ဟန်လိက ထိုဓားချီစွမ်းအင်လှိုင်းကြီးထံသို့ လက်ညွှန်လိုက်ရာ ကြည်လင်လှသော မြည်ဟိန်းသံကြီးများနှင့်အတူ သူ၏ ဦးခေါင်းထက်သို့ ချက်ခြင်း ပြန်လည်ရောက်ရှိလာကြသည်။ ထိုဓားအလင်းတန်းများဖြင့် ဖွဲ့စည်းထားသော ရွှေရောင်လှိုင်းလုံးကြီးက ဟန်လိကို အလယ်ဗဟို၌ ထားရှိကာ အပြည့်အဝ ခြုံလွှမ်း ကာကွယ်ပေးသည်။

ယင်းနောက် ဟန်လိက မန္တာန်ချိပ်ဟန်တစ်ခု ဖန်တီးလိုက်ရာ သူ၏ ခန္ဓာကိုယ်တလျှောက်မှနေ၍ မိုးကြိုးမုန်တိုင်းသံကြီးများ ပြင်းထန်စွာ ပေါက်ကွဲ ထွက်ပေါ်လာခဲ့သည်။ သိပ်သည်းလှသော လျှပ်စီးနဂါးကွင်းများမှာ သူ၏ ခန္ဓာကိုယ်ထံမှနေ၍ ထိုးထွက်လာခဲ့ကြပြီးနောက်မှာ တစ်ခုနှင့်တစ်ခု ရစ်ထွေးယှက်လိမ်သွားကြလျက် သူ၏ ခန္ဓာကိုယ်ပေါ်တွင် မိုးကြိုးသံချပ်ကာဝတ်စုံတစ်ခုအသွင်ဖြင့် ဖွဲ့စည်းသွားသည်။ ၎င်းတို့က စူးရှတောက်ပသော ရွှေရောင်အလင်းတန်းများဖြင့် တဖြတ်ဖြတ် လင်းလက်နေကြ၏။

တစ်ချိန်တည်းမှာပင် သူက ပါးစပ်ကို ဟလိုက်ပြီးနောက်မှာ စူးရှတောက်ပလှသော ခရမ်းရောင်အလင်းလုံးတစ်ခုကို ထွေးထုတ်၍ တိုက်ခိုက်လိုက်တော့သည်။ လျှပ်စီးအက်ကွဲသံတစ်ခုနှင့်အတူ ထိုအလင်းလုံးထံမှနေ၍ ခရမ်းရောင်မီးတောက်များ အရှိန်အဟုန်ပြင်းစွာ ပြန့်ကားသွားခဲ့ပြီး စူးရှလှသော အော်မြည်သံကြီးတစ်ခု ပေါက်ကွဲထွက်ပေါ်လာခဲ့၏။ ထိုအလင်းလုံးမှာ တစ်ပေခန့် ရှည်လျားသော ခရမ်းရောင်မီးလျှံငှက်ကြီးတစ်ကောင်အဖြစ်သို့ ချက်ခြင်း အသွင်ပြောင်းလဲသွားခဲ့ပြီး ဟန်လိ၏ ဘေးပတ်လည်တွင် မရပ်မနား ပျံသန်းလှုပ်ရှားလျက် ကောင်းကင်တခွင်လုံးတွင်လည်း လှပဆန်းကြယ်လှသော ခရမ်းရောင်မီးပွားများကို ချန်ရစ်ထားခဲ့သည်။

ဤသည်ကား ဟန်လိ သေချာသန့်စင်ထားသော ခရမ်းရောင်အထွတ်အထိပ်မီးတောက် များအားလုံးကလွဲ၍ အခြားမဟုတ်ပေ။

ဟန်လိ၏ တရစပ် လှုပ်ရှားမှုများက ထိုရှေးဟောင်းမိစ္ဆာ၏ အာရုံစိုက်မှုကို အပြည့်အဝ ဖမ်းစားနိုင်ခဲ့ချေပြီ။ ထိုမိစ္ဆာ၏ တစ္ဆေဦးခေါင်းမျက်နှာထက်တွင် ရန်လိုသော အမူအရာတစ်ခု ဖြစ်ပေါ်လာခဲ့ပြီး သူက နောက်ထပ် ရုတ်တရက်ဆန်သော တိုက်ခိုက်မှုလှိုင်းတစ်ခုကို မပြုလုပ်မီ ဟန်လိ မည်သည်ကို လုပ်ဆောင်နေသလဲဆိုတာကို သေချာစေရန်အတွက် ခေတ္တမျှ ငြိမ်သက်စွာ ရပ်ကြည့်နေခဲ့၏။

ဟန်လိကမူ ထိုမိစ္ဆာ၏ ရက်စက်ကြမ်းကြုတ်လှသော ဟန်ပန်ကို မည်သည့်ခံစားချက်မျှမပါဘဲ တစ်ချက်လှမ်းကြည့်လိုက်ပြီး သူ၏ လက်ကို လှန်ကာ လက်မအနည်းငယ်ခန့်သာ ရှည်လျားသော ကြက်သွေးရောင်ဓားငယ်တစ်ခုကို ဆင့်ခေါ်လိုက်တော့သည်။ ၎င်းက လက်မအနည်းငယ်ခန့်သာ ရှည်လျားသည် ဆိုသော်လည်း ၎င်း၏ကိုယ်ထည်မှာမူ ဖောက်ထွင်းမြင်နိုင်သည့် ကြက်သွေးရောင်အဆင်း ရှိနေရုံတင်မကဘဲ သွေးရောင်တောက်နေသည့်အလား လင်းလက်တောက်ပနေသည်။ ထိုဓားပျံ၏ ဘေးပတ်လည်တွင်လည်း အနက်ရောင်ချီမြူထုအမျှင်တန်းတစ်ခု တိတ်တဆိတ် လှည့်ပတ်စီးဆင်းနေသေးသည်။ ဤသည်ကား ဟန်လိအနေဖြင့် နန်ကုန်းဝမ်၏ စီနီယာအစ်မထံမှ ရရှိခဲ့သော မိစ္ဆာဓား ကလွဲ၍ အခြားမဟုတ်ပေ။

ထိုကြက်သွေးရောင်ဓားငယ်မှာ ဟန်လိ၏ ရှေ့မှောက်တွင် ပေါ်ထွက်လာခဲ့ပြီး သူ ၎င်းကို မထုတ်ဖော်ရသေးမီမှာပင် ပြင်းထန်စွာ တုန်ခါလာပြီး လေထုထဲတွင်လည်း သွေးညှီနံ့များဖြင့် ချက်ခြင်း ပြည့်နှက်သွားစေ၏။

ဟန်လိသည် ဤဓားပျံကို မဆင်မခြင် အသုံးပြုမိပါက ကြီးမားလှသော အကျိုးဆက်များကို ခံစားရနိုင်မှန်း ကောင်းစွာ သိရှိထားသော်လည်း အခုအခါတွင်မူ သူကား သေရေးရှင်ရေး အခြေအနေသို့ ရောက်ရှိနေခဲ့ရပြီ မဟုတ်ပါလား။ သူက ထိုဓားငယ်ပေါ်သို့ သူ၏ အနှစ်သာရသွေးမြူထုတစ်ခုကို ထွေးထုတ်လိုက်သည့်အခါ ၎င်းထံမှနေ၍ မယုံကြည်နိုင်လောက်အောင် စူးရှတောက်ပသော အလင်းတန်းများ ပေါက်ကွဲထွက်လာခဲ့ပြီး တစ်ပေခန့် အရွယ်အစားအထိ ချက်ခြင်း ကြီးမားလာသည်။ ၎င်းဓားက နေရာ၌ပင် ငြိမ်သက်စွာ မြောလွင့်နေလေ၏။

ဟန်လိက လေးနက်သော မျက်နှာထားဖြင့် ထိုဓား၏ ဓားရိုးကို တင်းကျပ်စွာ လှမ်းဖမ်းဆုပ်လိုက်ပြီး တစ်ချက် စစ်ဆေးကြည့်လိုက်သည့် အခိုက်အတန့်၌ သူ၏ ခန္ဓာကိုယ်အတွင်းရှိ စစ်မှန်သောအနှစ်သာရ အမြောက်အမြားမှာ ထိုဓားအတွင်းသို့ တဟုန်ထိုး စီးဆင်းဝင်ရောက်သွားတာကို ရုတ်တရက် ခံစားမိသည်။ သူက ထိတ်လန့်တကြားဖြင့် သူ၏ လက်ကို ခပ်မြန်မြန် ပြန်လည်ရုတ်သိမ်းလိုက်ပြီး ထိုဓားနှင့် ဆက်သွယ်ထားသော စိတ်ဝိညာဉ်အာရုံကို ဖြတ်တောက်ဖျက်ဆီးပစ်လိုက်ရပြီး အနှီဓား၏ ဆိုးယုတ်လှသော စရိုက်သဘာဝကြောင့် စိတ်ထဲ၌ အကြီးအကျယ် စိုးရိမ်ထိတ်လန့်သွားမိသည်။ သူ စိတ်ပြန်တည်ငြိမ်အောင် ကြိုးစား၏။ ယင်းနောက် ဟန်လိက ထိုဓားကို နောက်တစ်ကြိမ် ဖမ်းဆုပ်ပြီး သူ၏ ရှေ့မှောက်ရှိ ခေါင်းနှစ်လုံးနှင့်ရှေးဟောင်းမိစ္ဆာထံသို့ လှမ်းကြည့်သည်။

ခေါင်းနှစ်လုံးနှင့် ရှေးဟောင်းမိစ္ဆာသည် မိစ္ဆာဓားကို မြင်တွေ့လိုက်ရသည့် အခိုက်အတန့်၌ သူ၏ မျက်နှာထက်တွင် အံ့ဩတုန်လှုပ်ဟန် အရိပ်အယောင်တစ်ခု ဖြစ်ပေါ်လာခဲ့ပြီး သူ၏ အကြည့်များက ၎င်းအပေါ်သို့သာ အပြည့်အဝ ကျရောက်သွားသည်။

ဟန်လိသည် ထိုရှေးဟောင်းမိစ္ဆာ၏ မျက်နှာအမူအရာကို မြင်တွေ့သည့်အခါ စိတ်ထဲ၌ အနည်းငယ် မရေမရာ ဖြစ်မိသွား၏။

ခဏမျှ ချင့်ချိန်တွေးတောနေပြီးနောက်မှာ ထိုမိစ္ဆာသည် ဤဓားက မည်သည့်အရာဖြစ်ကြောင်း အတည်ပြုနိုင်သွားခဲ့ပြီ ဖြစ်ကာ သူ၏ မျက်နှာထက်တွင် ကျေနပ်အားရသည့် အပြုံးတစ်ခု ဖြစ်ပေါ်လာလေပြီ။ သူက အရင်စ၍ ပြောလာ၏။ "ကောင်းတယ်... တကယ့်ကို ကောင်းတယ်။ ကျုပ်တို့ မြင့်မြတ်သောဘုံရဲ့ မြင့်မြတ်သောလက်နက်ရတနာတွေဟာ ဒီလောကထဲမှာ ကျန်ရစ်ခဲ့လိမ့်မယ်လို့ ကျုပ် လုံးဝ မထင်ထားမိဘူး။ မင်းကသာ ဒီမြင့်မြတ်သောလက်နက်ရတနာကို ကျုပ်ဆီ နာနာခံခံ လွှဲပြောင်းပေးမယ်ဆိုရင် ကျုပ် မင်းရဲ့ အသက်ကို ချမ်းသာပေးမှာဖြစ်ပြီး ဘေးကင်းကင်းနဲ့ ထွက်ခွာသွားခွင့် ပေးမယ်"

ဟန်လိသည် စိတ်ထဲမှ အံ့ဩသွားမိရသော်လည်း မျက်မှောင်ကြုတ်လိုက်ပြီး မေးလိုက်၏။ "မြင့်မြတ်သောလက်နက်ရတနာ ဟုတ်လား... ဒီအရာက ရှေးဟောင်းမိစ္ဆာဘုံရဲ့ မှော်ရတနာတစ်ခုလား..."

ထိုရှေးဟောင်းမိစ္ဆာသည် နှာမှုတ်လိုက်ပြီး သူ့ကို အေးစက်စက် စိုက်ကြည့်ကာ ရန်လိုသည့်လေသံဖြင့် ပြောလာ၏။

"မြင့်မြတ်သောဘုံရဲ့ ကိစ္စရပ်တွေက မင်းနဲ့ ဘာပတ်သတ်လို့လဲ။ ကျုပ် အခု မေးနေတာက မင်း သဘောတူမလား၊ မတူဘူးလား ဆိုတာကိုပဲ..."

"ခင်ဗျားကသာ လူသားကျင့်ကြံသူတစ်ဦး ဖြစ်ခဲ့မယ်ဆိုရင်တော့ ကျုပ် အသက်အတွက် သဘောတူပေးဖို့ မခက်ပါဘူး။ ဒါပေမဲ့ ခင်ဗျားက…ဟားဟား…”

သည့်နောက် ဟန်လိ၏ မျက်နှာထက်တွင် လှောင်ပြုံးတစ်ခု ပေါ်လာတော့သည်။