အခန်း ၈၅၅

အခန်း ၈၅၅ - ငွေရောင်မီးလျှံ

ဟင်းလင်းပြင်အက်ကြောင်း၏ ဝါးမြိုခြင်းကို ခံလိုက်ရသည့် အခိုက်အတန့်တွင် ဟန်လိသည် မျက်စိကျိန်းမတတ် ပြင်းထန်လှသော ရောင်စုံအလင်းတန်းများကြောင့် မျက်လုံးများကို အတင်းအကျပ် မှိတ်ထားလိုက်ရသည်။ သည့်အပြင် ခန္ဓာကိုယ်အတွင်းရှိ ဝိညာဉ်စွမ်းအားများ ရုတ်ချည်း ကင်းမဲ့သွားမှုကြောင့် သူသည် ခေါင်းမူးနောက်နောက်ဖြစ်ကာ အလွန်တရာ နေရထိုင်ရ ခက်ခဲလှသော ဝေဒနာကို ခံစားလိုက်ရ၏။ အကယ်၍ သူ၏ ခန္ဓာကိုယ်မှာ အဆိပ်ရေနဂါးအသွင် ပြောင်းလဲထားခြင်းသာ မဟုတ်ခဲ့ပါက သူသည် သတိလစ်မေ့မြောသွားလောက်ပြီဟု ယုံကြည်နေမိသည်။

ထိုစဉ် ဟန်လိသည် သူ၏ခန္ဓာကိုယ်အတွင်းရှိ ဝိညာဉ်စွမ်းအားများ တစ်ဖန်ပြန်၍ လှုပ်ရှားလာသည်ကို ရုတ်တရက် ခံစားလိုက်ရပြီး သူ၏ ကျင့်ကြံခြင်းစွမ်းအားများမှာ ချက်ခြင်း ပြန်လည်ကောင်းမွန်လာခဲ့ပြီ ဖြစ်သည်။ သူသည် အလွန်တရာ ဝမ်းမြောက်သွားပြီး သူ၏ခန္ဓာကိုယ်မှ ဝိညာဉ်အလင်းတန်းများ လင်းလက်လာစေကာ ခန္ဓာကိုယ်ကို မြဲမြံအောင် ပြန်လည်ထိန်းချုပ်လိုက်သည်။ ထိုအချိန်တွင် ပတ်ဝန်းကျင်ရှိ ရောင်စုံအလင်းတန်းများမှာ အကြိမ်အနည်းငယ် ပြင်းထန်စွာ ထပ်မံလင်းလက်သွားပြီးနောက် ပျောက်ကွယ်သွားကာ ပတ်ဝန်းကျင်တစ်ခုလုံး၏ အသွင်အပြင်မှာ ရှင်းလင်းစွာ ပေါ်ထွက်လာသည်။

ဟန်လိသည် သူ၏ အကြည့်ဖြင့် ပတ်ဝန်းကျင်ကို ဝေ့ဝိုက်ကြည့်ရှုလိုက်ရာ သူ၏ပုံရိပ်မှာ ဖြတ်ခနဲ ဝေဝါးသွားပြီး ကိုက်သုံးဆယ်ကျော်အကွာသို့ အလျင်အမြန် ပျံသန်းဆုတ်ခွာလိုက်သည်။ သူသည် ရှေးဟောင်းမိစ္ဆာမှာ သူ့နှင့် ကပ်လျက် ရှိနေသည်ကို လှမ်းမြင်လိုက်ရသဖြင့် ထိတ်လန့်တုန်လှုပ်စွာဖြင့် အဝေးသို့ ခုန်ပျံရှောင်တိမ်းလိုက်ခြင်း ဖြစ်သည်။

ထိုအခိုက်အတန့်တွင် ဟန်လိသည် မည်သည့်စူးစမ်းမှုကိုမျှ ပြုလုပ်ရန်မလိုဘဲ လက်ရှိအခြေအနေကို ကောင်းစွာ သဘောပေါက်လိုက်ပြီ ဖြစ်သည်။ သူတို့ ရောက်ရှိနေသော ဟင်းလင်းပြင်နယ်ပယ်မှာ ကိုက်တစ်ရာခန့်သာ ကျယ်ဝန်းပြီး အတွင်းရှိ အရာရာအားလုံးကို ရှင်းလင်းစွာ မြင်တွေ့နိုင်လေသည်။ ဟန်လိကို စိတ်ပျက်သွားစေသည့်အချက်မှာ ဤနေရာတွင် သူ့နှင့် ရှေးဟောင်းမိစ္ဆာမှလွဲ၍ အခြားမည်သူမျှ ရှိမနေခြင်းပင်။

သူ လှုပ်ရှားလိုက်သည့် ခဏတွင် ပတ်ဝန်းကျင်လေထုထဲရှိ စိတ်ဝိညာဉ်ချီစွမ်းအင်များမှာ မယုံကြည်နိုင်လောက်အောင် သိပ်သည်းလှကြောင်းကို ရုတ်တရက် ရှာဖွေတွေ့ရှိလိုက်ရသည်။ ထို့အပြင် သူတို့၏ ပတ်ပတ်လည်တွင် စိတ်ဝိညာဉ်ဆေးပင်များနှင့် ဆေးဝါးအချို့ ပေါက်ရောက်နေကြပြီး မပြည့်စုံသော စင်္ကြန်လမ်းတစ်ခုပါရှိသည့် အဆောက်အဦတစ်ခုလည်း ရှိနေချေသည်။ ဤဟင်းလင်းပြင်နယ်ပယ်၏ အနားစွန်းနံရံများမှာမူ မဖောက်ထွင်းနိုင်လောက်အောင် သိပ်သည်းလှသော မီးခိုးရောင်မြူထုကြီးများဖြင့် ပိတ်ဆို့ထားခြင်း ဖြစ်၏။

သူ အခု ရောက်ရှိနေသော နေရာမှာ စွန့်ပစ်ထားခဲ့သည့် ဆေးဥယျာဉ်ဟောင်းတစ်ခုနှင့် အတော်လေး တူလှပေသည်။

ဟန်လိသည် အံ့ဩထိတ်လန့်သွားသော်လည်း အခုလက်ရှိတွင် အစွမ်းထက်လှသော ရန်သူကြီးနှင့် ရင်ဆိုင်နေရပြီး သူ၏ အသက်အန္တရာယ်နှင့် ကြုံတွေ့နေရဆဲ ဖြစ်သည်။ အထူးပြောနေရန်မလိုဘဲ အခုအချိန်မှာ ပတ်ဝန်းကျင်ကို စူးစမ်းလေ့လာနေရမည့် အချိန်မဟုတ်ချေ။ သူ၏ခန္ဓာကိုယ်ပေါ်တွင် မိုးပြာရောင်အလင်းတန်းများ စီးဆင်းစေလျက် ဟန်လိသည် ရှေးဟောင်းမိစ္ဆာကို အေးစက်စွာ စိုက်ကြည့်နေသည်။ သူသည် သူ၏လက်များကို လက်သီးဆုပ်လိုက်ရာ သူ၏ခန္ဓာကိုယ်ပေါ်တွင် ရွှေရောင်လျှပ်စီးတန်းများ ချက်ခြင်း လင်းလက်လာ၏။ တစ်ချိန်တည်းမှာပင် ခရမ်းရောင် မီးတောက်လုံးတစ်ခုမှာ သူ၏အထက်တွင် ပေါ်ထွက်လာပြီး သူ၏ဦးခေါင်းထက်၌ စတင်လည်ပတ်နေသည်။

ဤ 'ခရမ်းရောင်အထွတ်အထိပ်မီးတောက်' လုံးမှာ ဟန်လိ ဟင်းလင်းပြင်အက်ကြောင်းအတွင်းသို့ ဝါးမြိုခံလိုက်ရပြီးနောက် အသည်းအသန် လိုက်လံဝင်ရောက်လာခဲ့ခြင်း ဖြစ်၍ ဟန်လိမှာ များစွာ စိတ်အေးသွားရသည်။ ၎င်းသည် လာမည့်တိုက်ပွဲအတွင်း၌ အလွန်တရာ အဖိုးတန်လှသော အကူအညီတစ်ခု ဖြစ်လာမှာ သေချာလှပေသည်။

ရှေးဟောင်းမိစ္ဆာမှာမူ ပတ်ဝန်းကျင်ကို စူးစမ်းကြည့်ပြီးနောက် သူ၏ မျက်နှာများထက်တွင် အံ့ဩတုန်လှုပ်ဟန်များ ပေါ်ထွက်လာသည်။ သည့်နောက် သူက ထူးဆန်းသော အမူအရာဖြင့် တဟားဟား ရယ်မောလိုက်ပြီး ဆိုလိုက်၏။ "ငါက သာလွန်ဝိညာဉ်ဥယျာဉ်ရဲ့ ဟင်းလင်းပြင်အကြွင်းအကျန်တစ်ခု ဒီမှာ ရှိနေလိမ့်မယ်လို့ ထင်မထားခဲ့ဘူး... ဘေးကပ်ဘေးနဲ့ ကြုံရခါနီးမှ ငါက ကြီးမားတဲ့ ကံကောင်းမှုကြီးနဲ့ လာကြုံရတာပဲ" ရှေးဟောင်းမိစ္ဆာသည် ရူးသွပ်စွာ အော်ဟစ်လိုက်ပြီးနောက် သူ၏ ခေါင်းတစ်ခုမှာ ထူးဆန်းစွာ လှည့်လာပြီး ဟန်လိကို စိုက်ကြည့်လိုက်သည်။

ဟန်လိသည် အေးစက်စွာ နှာခေါင်းရှုံ့လိုက်ပြီး သူ၏ လက်အင်္ကျီကို ခါယမ်းလိုက်ရာ ရွှေရောင်ဓား ဆယ်လက်ကျော်မှာ ဝုန်းခနဲ့ ထိုးထွက်သွားပြီး သူ၏ရှေ့တွင် ဓားအလင်းတန်းအရိပ်များအဖြစ် ချက်ခြင်း ပြောင်းလဲသွားသည်။ သို့သော်လည်း သူ၏ စိတ်ထဲ၌ အကြီးအကျယ် ထိတ်လန့်သွားရသည်မှာ သူ၏ 'ရွှေအနှစ်သာရ' ဖြင့် သန့်စင်မွန်းမံထားသော 'ဝါးတိမ်အုပ်ဓား' များထဲမှ နှစ်စင်း ပျောက်ဆုံးနေသည်ကို ရှာဖွေတွေ့ရှိလိုက်ရခြင်းပင်။ ဤဓားများသည် သူ၏ စိတ်ဝိညာဉ်နှင့် ချိတ်ဆက်ထားခြင်း ဖြစ်သော်လည်း အခုအခါတွင်မူ ၎င်းတို့၏ တည်ရှိမှုကို သူ လုံးဝ အာရုံခံမိခြင်း မရှိချေ။ ကြည့်ရသည်မှာ ထိုဓားနှစ်စင်းမှာ သူ့နှင့်အတူ ဟင်းလင်းပြင်အက်ကြောင်းအတွင်းသို့ မလာခဲ့ကြခြင်း ဖြစ်ပုံရသည်။

သူသည် စိတ်ထဲကနေ ခါးသီးစွာသာ ပြုံးမိ၏။ အကယ်၍ တခြားသော မှော်ရတနာများသာ ဖြစ်ခဲ့လျှင် ပြဿနာမရှိသော်လည်း သူ၏ ဝါးတိမ်အုပ်ဓားများမှာ အစုံလိုက် အသုံးပြုရခြင်း ဖြစ်ပြီး ထိုဓားနှစ်စင်း မရှိပါက သူသည် 'ရွှေရောင်ဓားအစီအရင်' ကို ထုတ်ဖော်နိုင်စွမ်း ရှိမည် မဟုတ်ချေ။ ဤသည်မှာ သူ၏ အမြင့်ဆုံး တိုက်ပွဲစွမ်းရည်ကို များစွာ လျော့ကျသွားစေမည် ဖြစ်သည်။

သူ၏ရင်ထဲတွင် အကူအညီမဲ့မှုကို ခံစားလိုက်ရသော်လည်း သူ၏ရှေ့မှ ဓားများထံသို့ လက်ညွှန်လိုက်ပြီး 'ဝိညာဉ်ဖိနှိပ်ခြင်းအဆောင်' ၏ စွမ်းအားနှင့် နတ်မိစ္ဆာနှိမ်နင်းခြင်းလျှပ်စီးတို့၏ အကူအညီကို ယူကာ သူ့ကိုယ်သူ ကာကွယ်ရန် ပြင်ဆင်လိုက်သည်။

ရှေးဟောင်းမိစ္ဆာသည် ဟန်လိ အသင့်ပြင်နေသည်ကို မြင်သောအခါ သူ၏ နှုတ်ခမ်းများကို ဖြန့်လိုက်ပြီး ရက်စက်ယုတ်မာသော အမူအရာဖြင့် သူ၏လျှာကို လှုပ်ရှားလိုက်၏။ ထို့နောက် သူ၏ခန္ဓာကိုယ်မှ မိစ္ဆာချီစွမ်းအင်များ ပေါက်ကွဲထွက်လာပြီး မျက်စိတစ်မှိတ်အတွင်းမှာပင် ၎င်းတဟုန်ထိုး လိမ့်တက်လာသော မိစ္ဆာချီများနှင့် ယင်ဓာတ်လေပြင်းများမှာ ဟင်းလင်းပြင်နယ်ပယ်၏ အစိတ်အပိုင်းအများစုကို လွှမ်းခြုံသွားသည်။

ဟန်လိသည် အသက်ပြင်းပြင်း ရှူလိုက်ပြီး ကျန်ရှိနေသေးသော နတ်မိစ္ဆာနှိမ်နင်းခြင်းလျှပ်စီး အားလုံးကို ချက်ခြင်း ဆင့်ခေါ်လိုက်သည်။ သူ၏ခန္ဓာကိုယ်မှ ရွှေရောင်အလင်းတန်းများ ပြင်းထန်စွာ တောက်ပလာပြီး ရွှေရောင်လျှပ်စီးတန်း တစ်ရာကျော်ကို ထုတ်လွှတ်လိုက်ရာ ၎င်းတို့မှာ တစ်ခုနှင့်တစ်ခု စုစည်းသွားကြပြီး လျှပ်စီးနဂါးကြီးများအဖြစ် သိပ်သည်းသွားကြသည်။ ထိုလျှပ်စီးနဂါးကြီးများသည် ဟန်လိ၏ ပတ်ပတ်လည်တွင် လှည့်ပတ်ပျံဝဲနေကြပြီး သူတို့၏ အစွမ်းကို ပြသသည့်အလား ကောင်းကင်ယံသို့ မာန်သွင်းဟိန်းဟောင်းလိုက်ကြ၏။

"မင်းဆီမှာ နတ်မိစ္ဆာနှိမ်နင်းခြင်းလျှပ်စီးတွေ ဒီလောက်အများကြီး ကျန်သေးတာလား..." ရှေးဟောင်းမိစ္ဆာမှာ အံ့ဩတုန်လှုပ်စွာဖြင့် လွှတ်ခနဲ မေးလိုက်မိသော်လည်း သူက ခဏအကြာတွင် အေးစက်စွာ ရယ်မောလိုက်ပြီး စကားတစ်လုံးမျှမဆိုဘဲ သူ၏ လက်များကို မြှောက်လိုက်သည်။ သူ၏ လက်နှစ်ဖက်မှ ယင်ဓာတ်လေပြင်း နှစ်ခု ရုတ်တရက် ထိုးထွက်သွားပြီး လေထဲရှိ မိစ္ဆာချီများနှင့် ပေါင်းစည်းသွားကာ မရေမတွက်နိုင်သော အရွယ်စုံ အနက်ရောင် လက်သည်းကြီးများအဖြစ် ပြောင်းလဲသွားသည်။

ဟန်လိ၏ နတ်မိစ္ဆာနှိမ်နင်းခြင်းလျှပ်စီးမှာ မိစ္ဆာချီစွမ်းအင်များကို အထူးနှိမ်နင်းနိုင်စွမ်း ရှိသော်လည်း ဤမျှ မရေမတွက်နိုင်အောင် များပြားလှသော ပမာဏကိုမူ အလွယ်တကူ ကျော်ဖြတ်နိုင်စွမ်း မရှိချေ။ ဟန်လိနှင့် ရှေးဟောင်းမိစ္ဆာ နှစ်ဦးစလုံးမှာ ဤအချက်ကို ကောင်းစွာ သဘောပေါက်ကြသဖြင့် ဟန်လိ၏ မျက်နှာအမူအရာမှာ များစွာ ခက်ထန်သွားသည်။ သို့သော်လည်း သူ့ကို အပူပန်ဆုံးဖြစ်စေသည့်အချက်မှာ သူ၏ 'သွေးအရိပ်ရှောင်တိမ်းခြင်း' အတတ်မှာ ဤဟင်းလင်းပြင်နယ်ပယ်အတွင်း၌ လုံးဝ အသုံးမဝင်ခြင်းပင် ဖြစ်သည်။ သို့ဖြစ်၍ သူသည် အသေအကြေ ရင်ဆိုင်တိုက်ခိုက်ရုံကလွဲ၍ အခြားရွေးချယ်စရာ မရှိချေ။

ရှေးဟောင်းမိစ္ဆာက ကျယ်လောင်စွာ မာန်သွင်းအော်ဟစ်လိုက်ရာ ထိုလက်သည်းကြီး အားလုံးမှာ လေထဲတွင် ရစ်ခွေသွားပြီး ဟန်လိရှိရာဘက်သို့ လွှမ်းမိုးနိုင်စွမ်းရှိသော ဖိအားများနှင့်အတူ တဟုန်ထိုး တိုးဝင်လာကြသည်။

ဟန်လိသည် စိတ်ကို ဒုံးဒုံးချလိုက်ပြီး သူ၏ခန္ဓာကိုယ်ပေါ်တွင် ရစ်ခွေနေသော ရွှေရောင်လျှပ်စီးနဂါးကြီးများကို ထိုလက်သည်းအုပ်ကြီးအား ရင်ဆိုင်တိုက်ခိုက်ရန် အမိန့်ပေးလိုက်သည်။ တဖက်တွင်မူ ခရမ်းရောင်မီးတောက်လုံးကိုမူ သူ၏ရှေ့တွင် အကာအကွယ်အတားအဆီး နံရံတစ်ခုအဖြစ် ပြောင်းလဲစေရန် သူ၏စိတ်ဖြင့် စေခိုင်းလိုက်၏။

တိုက်ပွဲကြီး ပြင်းထန်စွာ ဖြစ်ပွားလာသည်နှင့်အမျှ ဤဟင်းလင်းပြင်နယ်ပယ်တစ်ခုလုံးမှာ ရုတ်တရက် ပြင်းထန်စွာ တုန်ခါလာပြီး ကျယ်လောင်လှသော ညည်းတွားသံကြီးများ ထွက်ပေါ်လာသည်။ စူးရှတောက်ပလှသော အဖြူရောင်အလင်းတန်းတစ်ခုမှာ ကောင်းကင်ယံမှ ရုတ်တရက် လင်းလက်လာပြီး မကြာမီမှာပင် ငွေရောင်အဖြစ်သို့ ပြောင်းလဲသွားချေသည်။ ဟန်လိနှင့် ရှေးဟောင်းမိစ္ဆာ နှစ်ဦးစလုံးမှာ အံ့ဩတုန်လှုပ်သွားကြသဖြင့် သူတို့၏ တိုက်ခိုက်မှုများကို ချက်ခြင်း ရပ်တန့်လိုက်ကြ၏။

ကောင်းကင်ယံရှိ တိမ်တိုက်များမှာ ပြင်းထန်စွာ လှိုင်းထလာပြီး လိမ့်တက်လာသော ငွေရောင်မီးလျှံများအဖြစ်သို့ ပြောင်းလဲသွားသည်။ ထို့နောက် ကမ္ဘာမြေကြီးကို တုန်ဟိန်းသွားစေနိုင်သော ပေါက်ကွဲသံကြီးတစ်ခုနှင့်အတူ ကြီးမားလှသော ငွေရောင်အလင်းတန်းကြီးတစ်ခုမှာ ထိုမီးလျှံများထဲမှ ထိုးထွက်သွားပြီး ရှေးဟောင်းမိစ္ဆာ ရှိနေသည့်နေရာသို့ တည့်တည့်ကြီး ကျရောက်သွား၏။

ရှေးဟောင်းမိစ္ဆာကို ဗဟိုပြုလျက် ကြီးမားလှသော ငွေရောင်အလင်းတိုင်ကြီးတစ်ခု ပေါက်ကွဲထွက်လာပြီး ၎င်းနှင့် ထိတွေ့မိသမျှ မိစ္ဆာချီစွမ်းအင် အားလုံးကို ချက်ခြင်း သန့်စင်ဖျက်ဆီးပစ်သည်။ ထိုအခိုက်တွင် ဟန်လိသည် ရှေးဟောင်းမိစ္ဆာ၏ ထိတ်လန့်ကြောက်ရွံ့နေသော မျက်နှာအမူအရာကို လှမ်းမြင်လိုက်ရပြီးနောက် နတ်ဆိုးကြီးမှာ ငွေရောင်မီးလျှံများ၏ လောင်ကျွမ်းခြင်းကို ခံလိုက်ရကာ ချက်ခြင်းပင် ပြာအဖြစ်သို့ ပြောင်းလဲပျက်စီးသွား၏။

ထိုအလင်းတိုင်ကြီးမှာ ထပ်မံပေါက်ကွဲထွက်သွားပြီး မရေမတွက်နိုင်သော ငွေရောင်မီးပွားများမှာ ဟင်းလင်းပြင်နယ်ပယ်တစ်ခုလုံးတွင် ပြည့်နှက်သွားကာ ရှိနေသမျှ မိစ္ဆာချီ အားလုံးကို လုံးဝ သန့်စင်ပစ်လိုက်သည်။ ရှေးဟောင်းမိစ္ဆာ မူလက ရပ်နေခဲ့သော နေရာတွင်မူ လုံးဝ ပျက်စီးယိုယွင်းသွားခဲ့ပြီဖြစ်သော မှော်ရတနာအချို့သာ ကျန်ရစ်ခဲ့ချေသည်။

ရှေးဟောင်းမိစ္ဆာ၏ သဲလွန်စအားလုံး ပျက်စီးသွားပြီးနောက် ငွေရောင်မီးလျှံများမှာ လျင်မြန်စွာ ပြန်လည်ဆုတ်ခွာသွားပြီး မီးခိုးရောင်မြူထုကြီးမှာလည်း ပုံမှန်အခြေအနေသို့ ပြန်လည်ရောက်ရှိသွားသည်။ ဤနေရာတွင် ဟန်လိတစ်ဦးတည်းသာ ကျန်ရစ်ခဲ့ပြီး သူ၏ မျက်နှာထက်တွင်မူ လုံးဝ မယုံကြည်နိုင်လောက်အောင် ဖြစ်နေသော အမူအရာတစ်ခု ရှိနေဆဲ ဖြစ်သည်။

"ငွေရောင်မီးလျှံတွေလား... ဒီလိုရက်စက်လှတဲ့ အတားအဆီး ကန့်သတ်ချက်က လူသားလောကက အရာတစ်ခု မဟုတ်ပုံရတယ်... တကယ့်ကို အံ့ဩစရာပဲ..." ဟန်လိ ဘာလုပ်ရမှန်းမသိဘဲ မှင်သက်နေစဉ်မှာပင် သူ၏ ဦးခေါင်းနောက်ဘက်မှ ဝိညာဉ်သွေဖယ်ခြင်းအရှင် ၏ စကားသံကို ရုတ်တရက် ကြားလိုက်ရသည်။

"ဘာကို ဆိုလိုတာလဲ... ဒီငွေရောင်မီးလျှံတွေက ဘယ်ကနေ ရောက်လာတာလဲ..." ဟန်လိသည် သူ၏ မှင်သက်နေရာမှ ချက်ခြင်း သတိဝင်လာပြီး သူ၏မျက်နှာတွင် ဝမ်းသာရိပ်များ ပြည့်နှက်သွားသည်။ ထိုမျှ ကြောက်မက်ဖွယ်ကောင်းလှသော ရန်သူကြီးမှာ သူ အသက်ရင်း၍ စွန့်စားတိုက်ခိုက်ရခြင်းမရှိဘဲ လွယ်လင့်တကူ သေဆုံးသွားခဲ့ပြီ မဟုတ်လား။ ထို့နောက် သူသည် သူ၏လက်ကို ဝှေ့ယမ်းလိုက်ပြီး သူ၏ ရွှေရောင်လျှပ်စီးများ၊ ခရမ်းရောင်မီးတောက်နှင့် ဓားများကို ချက်ခြင်း ပြန်လည်သိမ်းဆည်းလိုက်သည်။

ဝိညာဉ်သွေဖယ်ခြင်းအရှင်သည် ခဏမျှ တိတ်ဆိတ်သွားပြီးနောက် သက်ပြင်းချကာ ဆိုလိုက်၏။ "ရှေးဟောင်းမိစ္ဆာကို ဒီလောက်လွယ်လွယ်နဲ့ အစအနဖျောက်နိုင်တဲ့ သူ့ရဲ့ စွမ်းအားကို ကြည့်ရင် ဒါဟာ ငါတို့ လူသားလောကက လာတဲ့အရာ မဟုတ်တာ သေချာတယ်။ ဒီငွေရောင်မီးလျှံတွေက မိစ္ဆာအော်ရာတွေကိုပဲ လိုက်လံရှာဖွေပြီး ရှေးဟောင်းမိစ္ဆာကိုပဲ ပစ်မှတ်ထားခဲ့တာကို ကြည့်ရင် ဒါဟာ ဝိညာဉ်ဘုံက ကျင့်ကြံသူတွေရဲ့ လက်ချက်ပဲ ဖြစ်ရမယ်။ အတိတ်တုန်းက ရှေးဟောင်းကျင့်ကြံသူတွေဟာ ရှေးဟောင်းနတ်ဆိုးတွေကို နောက်ဆုံးမှာ အနိုင်ရခဲ့တာဟာ ဝိညာဉ်ဘုံက ကျင့်ကြံသူတွေရဲ့ ဝင်ရောက်စွက်ဖက်မှုကြောင့် ဖြစ်လိမ့်မယ်"

ဟန်လိသည် ဤသည်ကို ကြားလိုက်ရသဖြင့် စိတ်လှုပ်ရှားသွားပြီး မေးလိုက်၏။ "စီနီယာဆိုလိုတာက ဒီဟင်းလင်းပြင်နယ်ပယ်ရဲ့ အရှင်သခင်တွေဟာ ဝိညာဉ်ဘုံက ကျင့်ကြံသူတွေလို့ ဆိုလိုတာလား..."

သူ၏ စကားသံထဲတွင် စိတ်လှုပ်ရှားမှုများ ပြည့်နှက်နေလျက် ဝိညာဉ်သွေဖယ်ခြင်းအရှင်က ဆိုသည်။ "မှန်တယ်။ ဒါဟာ ရှေးဟောင်းခေတ်က ကျော်ကြားလှတဲ့ သာလွန်ဝိညာဉ်ဥယျာဉ် တွေထဲက တစ်ခုရဲ့ အပျက်အစီး ဖြစ်ရမယ်။ အတိတ်တုန်းက အလွန်တရာ အစွမ်းထက်လှတဲ့ ကျင့်ကြံသူတွေဟာ ရတနာအချို့ရဲ့ အကူအညီကို ယူပြီး လူသားလောကထက် များစွာသာလွန်လှတဲ့ စိတ်ဝိညာဉ်ချီစွမ်းအင်တွေကို သုံးပြီး စိတ်ဝိညာဉ်ဆေးဝါးတွေ စိုက်ပျိုးဖို့အတွက် သေးငယ်တဲ့ ဟင်းလင်းပြင်နယ်ပယ်တစ်ခုကို ဖွင့်လှစ်နိုင်ခဲ့ကြတယ်လို့ ငါ ကြားဖူးတယ်။ ဒီဥယျာဉ်တွေက ရှားပါးလှတဲ့ စိတ်ဝိညာဉ်ဆေးပင် အမျိုးမျိုးကို စိုက်ပျိုးဖို့အတွက် အထူးပြုထားတာ။ ဒါပေမဲ့ မထင်မှတ်တဲ့ ဘေးကပ်ဘေးတစ်ခုကြောင့် သာလွန်ဝိညာဉ်ဥယျာဉ် အားလုံးဟာ သဲလွန်စမရှိ ပျောက်ကွယ်သွားခဲ့ပြီး နောက်ပိုင်းကျင့်ကြံသူတွေဟာ ဘယ်လိုမှ ရှာမတွေ့နိုင်ကြဘူး။ ငါက နတ်ဆိုးကျဆုံးခန်း ချောက်ကမ်းပါး ထဲမှာ ဒီလိုအရာတစ်ခု ရှိနေလိမ့်မယ်လို့ ထင်မထားခဲ့ဘူး။ ဒါပေမဲ့ ဒီသာလွန်ဝိညာဉ်ဥယျာဉ်က အမည်မသိ အကြောင်းရင်းတစ်ခုခုကြောင့် ပြိုကွဲပျက်စီးသွားခဲ့ပုံရတယ်။ ဒါဟာ မူလဥယျာဉ်ကြီးရဲ့ သေးငယ်တဲ့ အစိတ်အပိုင်းတစ်ခုပဲ ဖြစ်ရမယ်..."

"သာလွန်ဝိညာဉ်ဥယျာဉ် ဟုတ်လား... ကျုပ်လည်း အရင်က မှတ်တမ်းအချို့ထဲမှာ ဖတ်ဖူးခဲ့ပေမဲ့ ဒါကို ကောလာဟလတစ်ခုလို့ပဲ ထင်ခဲ့တာ... ဒါတွေက တကယ်ပဲ တည်ရှိနေလိမ့်မယ်လို့ မထင်ထားခဲ့ဘူး..." ဟန်လိသည် တီးတိုးရေရွတ်လိုက်ပြီး စိတ်လှုပ်ရှားစွာဖြင့် ပတ်ဝန်းကျင်ကို ဝေ့ဝိုက်ကြည့်ရှုလိုက်သည်။

ခဏအကြာတွင် သူ၏ အကြည့်မှာ ရှေးဟောင်းမိစ္ဆာ ချန်ထားခဲ့သော မှော်ရတနာများထံသို့ ကျရောက်သွားသည်။ သူက ၎င်းတို့ထံသို့ လက်ညွှန်လိုက်ရာ ထိုပစ္စည်းများသည် အလင်းတန်းများအဖြစ် သူ၏လက်ထဲသို့ ပျံသန်းရောက်ရှိလာ၏။

သူက ၎င်းတို့ကို တစ်ချက်ကြည့်ရှုလိုက်ပြီးနောက် စိတ်မကောင်းဖြစ်ရဟန်ဖြင့် မျက်မှောင်ကြုတ်လိုက်မိသည်။ ဤရတနာများသည် မိစ္ဆာချီစွမ်းအင်များ၏ ဖုံးလွှမ်းခြင်း ခံထားရသဖြင့် ငွေရောင်မီးလျှံများ၏ သန့်စင်ခြင်းကို ခံလိုက်ရပြီး သူတို့၏ ဝိညာဉ်သဘာဝများမှာ လုံးဝ ပျက်စီးသွားခဲ့ပြီ ဖြစ်သည်။ အကယ်၍ ၎င်းတို့ကို သည့်ထက်ပိုမို သန့်စင်မွန်းမံဦးမည်ဆိုလျှင်ပင် သူတို့၏ မူလစွမ်းအား၏ တစွန်းတစလောက်ကိုမျှ ထုတ်သုံးနိုင်စွမ်း ရှိကြမည် မဟုတ်ချေ။

ဟန်လိသည် ခေါင်းယမ်းလိုက်သော်လည်း ထိုပစ္စည်းများကို သူ၏ သိုလှောင်အိတ်အတွင်းသို့ ပေါ့ပေါ့ပါးပါးပင် ထည့်သိမ်းလိုက်၏။ ထို့နောက် သူ၏ခန္ဓာကိုယ်မှ ကြက်သွေးရောင်အလင်းတန်းများ တောက်ပလာစေကာ 'ဝိညာဉ်ဖိနှိပ်ခြင်းအဆောင်' ကို ပြန်လည်ရုတ်သိမ်းလိုက်သည်။ အဆောင်မှာ သူ၏ခန္ဓာကိုယ်ထဲမှ လျင်မြန်စွာ ပျံထွက်လာပြီး သူ၏လက်ထဲသို့ ရောက်ရှိလာချေသည်။

ဟန်လိသည် ၎င်းကို ကြည့်ရှုစစ်ဆေးလိုက်ပြီး တီးတိုးရေရွတ်လိုက်၏။ "ဒီ ဝိညာဉ်ဖိနှိပ်ခြင်းအဆောင်က နောက်ထပ် တစ်ကြိမ်ပဲ သုံးလို့ရမယ်... ကျုပ်က ဒါကို အကြိမ်အနည်းငယ်ပဲ သုံးရသေးတာ..."

သည့်နောက်တွင် ဟန်လိသည် မြေပြင်ပေါ်သို့ ဖြည်းဖြည်းချင်း ဆင်းသက်လိုက်ပြီး သူ၏ လက်အင်္ကျီကို ခါယမ်းလိုက်သည်။ နှင်းကဲ့သို့ ဖြူဖွေးလှသော မြေခွေးလေးတစ်ကောင်မှာ ပျံထွက်လာပြီး အဖြူရောင်အလင်းတန်းများ လင်းလက်သွားပြီးနောက် ငွေရောင်လ အသွင်သို့ ပြောင်းလဲသွားသည်။

ငွေရောင်လသည် ဟန်လိကို အရိုအသေပြုလိုက်ပြီး တခစ်ခစ် ရယ်မောကာ ဆိုလိုက်၏။ "ကျမက သခင်ဟာ ပြီးခဲ့တဲ့ တိုက်ပွဲတုန်းက ကျမကို ကူညီဖို့ ဆင့်ခေါ်လိမ့်မယ်လို့ ထင်နေတာ... အခုမှ ကျမကို ခေါ်လိမ့်မယ်လို့ မထင်ထားခဲ့ဘူး..."

"မင်းရဲ့ ကျင့်ကြံမှုအဆင့်က နိမ့်လွန်းလှသလို အဲ့ဒီတိုက်ပွဲမှာလည်း ဘာမှ အသုံးဝင်မှာ မဟုတ်ဘူး။ ဒါပေမဲ့ မင်းက လှုပ်ရှားမှုပညာရပ်တွေမှာ ကျွမ်းကျင်တာပဲ။ ငါ့ကို ကူညီပြီး ဒီပတ်ဝန်းကျင်မှာ ဖုံးကွယ်ထားတဲ့ လျှို့ဝှက်ချက်တွေ ဒါမှမဟုတ် အတားအဆီး ကန့်သတ်ချက်တွေ ရှိ၊ မရှိ ရှာဖွေပေးစမ်းပါ..."

"အမိန့်အတိုင်းပါ သခင်"

ငွေရောင်လက ခေါင်းညိတ်ပြလိုက်ပြီးနောက် သူမ၏ခန္ဓာကိုယ်မှာ ငွေရောင်အလင်းတန်းတစ်ခုနှင့်အတူ မြေကြီးထဲသို့ ဖြတ်ခနဲ စိမ့်ဝင်ပျောက်ကွယ်သွားသည်။

ဟန်လိသည် မြေပြင်ပေါ်တွင် တင်ပလ္လင်ခွေ ထိုင်လိုက်ပြီး သူ၏မျက်လုံးများကို မှိတ်ကာ သူ၏ အားကောင်းသောစိတ်ဝိညာဉ်အာရုံကို ဖြည်းဖြည်းချင်း ဖြန့်ကြက်လိုက်ပြီး ဤဟင်းလင်းပြင်နယ်ပယ်၏ လက်မတိုင်းတွင် လျှို့ဝှက်ချက်တစ်ခုခု ရှိနေမလားဟု သေသေချာချာ စူးစမ်းရှာဖွေနေသည်။

ဟန်လိ၏ မျက်နှာအမူအရာမှာ လုံးဝ တည်ငြိမ်နေသော်လည်း ဘာသဲလွန်စမျှ ရှာမတွေ့သည့်နောက်တွင် သူ၏မျက်နှာထက်၌ စိတ်ပျက်ရိပ်တစ်ခု မသိမသာ ပေါ်ထွက်လာသည်။ အချိန်အနည်းငယ် ထပ်မံကြာမြင့်သွားပြီးနောက် သူ၏ မျက်ခွံများမှာ လှုပ်ရှားသွားပြီး ရုတ်တရက် ထူးဆန်းသော မျက်နှာပေးတစ်ခု ဖြစ်ပေါ်လာကာ မျက်လုံးများကို ချက်ခြင်း ဖွင့်ကြည့်လိုက်၏။

သူသည် ချက်ခြင်း ထရပ်လိုက်ပြီး စိတ်လှုပ်ရှားစွာဖြင့် ဤဟင်းလင်းပြင်နယ်ပယ်၏ ထောင့်စွန်းတစ်ခုရှိရာဘက်သို့ လျှောက်လှမ်းသွားသည်။ ထိုနေရာတွင် ထူးဆန်းသော အပင်တစ်ပင်မှ ပေါက်ရောက်နေသည့် ခရမ်းရောင်သစ်သီး ဆယ်လုံးလောက် ရှိနေသည်။