အခန်း ၉၄
Vol. 10 Ch. 94
အခန်း (၉၄) မင်း ဆုံးဖြတ်ချက် ချနိုင်လို့လား
ရှန်းဝမ်စန်း၏ စျေးနှုန်းသတ်မှတ်ချက်ကို ကြားရသောအခါ ဝမ်ရှင်းတယ်က စိတ်ထဲ၌ ချိန်ဆတွေးတောနေမိသည်။
သူသည် ယခင်က အခြား မြို့ကြီးများသို့ သွားရောက်ကာ အုတ်မြစ်ချခြင်း ဆေးလုံးကို ရှာဖွေဖူးသဖြင့် ဝယ်ယူရန် ခက်ခဲသော်လည်း စျေးနှုန်းကမူ ယခုထက် အနည်းငယ် ပိုမိုသက်သာကြောင်း သိထားသည်၊ အုတ်မြစ်ချခြင်း ဆေးလုံးတစ်လုံး၏ စျေးနှုန်းမှာ အဆင့်နိမ့် ဝိညာဉ်ကျောက်တုံး ၄၀၀၀ ဝန်းကျင်ခန့်သာ ရှိပေသည်။
ဝမ်ရှင်းတယ်က ရှန်းဝမ်စန်းအား ကြည့်ရင်း ဤရှန်းဝမ်စန်းက တမင်သက်သက် လုပ်နေခြင်း ဖြစ်မည်ဟု သံသယ ဝင်နေမိသည်၊ သူသည် အစောပိုင်းက သူပြုလုပ်ခဲ့သော အပြုအမူအတွက်ပင် အနည်းငယ် နောင်တရမိသွားသည်။
သို့သော်လည်း အုတ်မြစ်ချခြင်း ဆေးလုံးတစ်လုံးက အုတ်မြစ်ချခြင်းအဆင့် ကျင့်ကြံသူတစ်ဦးကို ကိုယ်စားပြုနေပေသည်။
ထို့ပြင် တစ်လုံးလျှင် အဆင့်နိမ့် ဝိညာဉ်ကျောက်တုံး ၅၀၀၀ ဆိုသည့် စျေးနှုန်းကို သူတို့ ဝမ်မိသားစုအနေနှင့် ဝယ်ယူနိုင်စွမ်း ရှိပါသေးသည်။
ယခုအချိန်၌ မဝယ်ယူဘဲ အခြားမိသားစုများက ဝယ်ယူသွားခဲ့လျှင် သူတို့ ဝမ်မိသားစု၏ ခွန်အားက နောင်တွင် အခြားမိသားစုများ၏ ကျော်တက်ခြင်းကို ခံရရန်သာ စောင့်ဆိုင်းရတော့မည် ဖြစ်သည်။
ဝမ်ရှင်းတယ်က သွားကို တင်းတင်းကြိတ်ကာ ၅၀၀၀ ဆိုလည်း ၅၀၀၀ ပေါ့ဟု ဆုံးဖြတ်လိုက်သည်။ "ငါ ငါးလုံး ဝယ်မယ်"
"ကောင်းပါပြီ၊ အုတ်မြစ်ချခြင်း ဆေးလုံး ငါးလုံးဆိုရင် အဆင့်နိမ့် ဝိညာဉ်ကျောက်တုံး ၂၅၀၀၀ ပါ၊ ဒါက ဆေးလုံးတွေပါ၊ သေချာ စစ်ဆေးကြည့်ပါဦး၊ ကောင်တာကနေ ထွက်သွားရင်တော့ ပြန်လဲပေးတာမျိုး၊ ပြန်အမ်းပေးတာမျိုး မရှိပါဘူး"
အုတ်မြစ်ချခြင်း ဆေးလုံးများ ထည့်ထားသည့် ကျောက်စိမ်းပုလင်း ငါးလုံးကို ရှန်းဝမ်စန်းက ကောင်တာပေါ်သို့ တင်ပေးလိုက်သည်။
ရှန်းဝမ်စန်းက ဝမ်ရှင်းတယ်အား လေးနက်သော အဓိပ္ပာယ်ဖြင့် ကြည့်လိုက်မိသည်၊ သခင် ပြောခဲ့သည်မှာ တကယ်ပဲ မမှားပေ ၊ ဤစျေးနှုန်း ဖြစ်နေလျှင်ပင် ဤမိသားစုများက မတတ်သာသည့် အဆုံး နှာခေါင်းရှုံ့ကာ ဝယ်ယူကြမည် ဖြစ်ပြီး စိတ်လိုလက်ရပင် ဝယ်ယူကြပေလိမ့်မည်။
ဝမ်ရှင်းတယ်က ကျောက်စိမ်းပုလင်း ငါးလုံးကို သတိကြီးစွာဖြင့် လှမ်းယူလိုက်ပြီး တစ်လုံးချင်းစီကို သေသေချာချာ စစ်ဆေးကြည့်နေသည်။
သူနှင့် ရှန်းဝမ်စန်းအကြား၌ အဆင်မပြေမှု အနည်းငယ် ရှိခဲ့ဖူးသဖြင့်လည်းကောင်း တစ်လုံးလျှင် ၅၀၀၀ ဆိုသည့် အုတ်မြစ်ချခြင်း ဆေးလုံးကလည်း မပေါ့တန်သဖြင့်လည်းကောင်း သူက ဆေးလုံးတစ်လုံးချင်းစီကို သေချာပေါက် အပြတ်အသတ် စစ်ဆေးရမည် ဖြစ်သည်။
ဝမ်ရှင်းတယ်ကိုယ်တိုင်လည်း အုတ်မြစ်ချခြင်း ဆေးလုံးကို သုံးစွဲဖူးသဖြင့် ဆေးလုံးကို လက်ထဲသို့ ယူလိုက်သည့် အချိန်မှာပင် ဆေးလုံး၌ ပြဿနာမရှိကြောင်း သူ အတည်ပြုနိုင်ခဲ့သည်။
သို့သော်လည်း သူ့အား အံ့ဩသွားစေသည့် အချက်မှာ အုတ်မြစ်ချခြင်း ဆေးလုံးထက်၌ ရွှေရောင် ချည်မျှင်အရစ် တစ်ကြောင်း ရှိနေခြင်း ဖြစ်ပေသည်။
ဝမ်ရှင်းတယ်က စိတ်ထဲ၌ တိတ်တဆိတ် ရေရွတ်လိုက်မိသည်။ "အဆင့်နိမ့် ဝိညာဉ်ကျောက်တုံး ၅၀၀၀ က တန်ပါတယ်၊ မရှုံးပါဘူး"
အဆင့်နိမ့် ဝိညာဉ်ကျောက်တုံး ၅၀၀၀ ဖြင့် အလယ်အလတ်အဆင့် အုတ်မြစ်ချခြင်း ဆေးလုံးတစ်လုံး ရရှိခြင်းက မည်သို့ပင် တွက်ချက်ပါစေ မရှုံးပေ ၊ ဤစျေးနှုန်းက အလွန်အမင်း တန်လွန်းလှသည်။
အလယ်အလတ်အဆင့် အုတ်မြစ်ချခြင်း ဆေးလုံးက အဆင့်နိမ့် ဆေးလုံးထက် အဆပေါင်းများစွာ ပိုမိုကောင်းမွန်ပြီး အောင်မြင်စွာ အုတ်မြစ်ချနိုင်မည့် ရာခိုင်နှုန်းကလည်း အခြေခံအားဖြင့် ရှစ်ဆယ်ရာခိုင်နှုန်း ရှိပေသည်။
ဝမ်ရှင်းတယ်က ရှန်းဝမ်စန်းအား မသိစိတ်ဖြင့် ဇဝေဇဝါ ကြည့်လိုက်မိသည်။ "မူလကတည်းက ငါ့ရဲ့ အမြင်ကပဲ ကျဉ်းမြောင်းနေခဲ့တာပဲ၊ သူက ငါ့ကို တမင်သက်သက် ပစ်မှတ်ထားပြီး ဒီလောက် စျေးကြီးကြီး ရောင်းနေတယ်လို့ ထင်နေခဲ့တာ၊ ငါကပဲ သူ့ကို အထင်လွဲခဲ့တာပဲ"
"ဒါက အဆင့်နိမ့် ဝိညာဉ်ကျောက်တုံး ၂၅၀၀၀ ပါ၊ ကျေးဇူးတင်ပါတယ်"
ရှန်းဝမ်စန်းက ဝမ်ရှင်းတယ် ကောင်တာပေါ် တင်ပေးလာသော သိုလှောင်အိတ်ကို ကြည့်ပြီးမှ ဝမ်ရှင်းတယ်အား မော့ကြည့်လိုက်သည်။
ဤလူက တစ်ခုခု ချို့ယွင်းနေတာတော့ မဟုတ်ပါဘူးနော် သူ့ဆီက ဝိညာဉ်ကျောက်တုံးတွေ ဒီလောက်အထိ အမြတ်ထုတ်ထားတာကို သူက ကျေးဇူးတင်ပါတယ်လို့တောင် ပြောနေသေးတယ်။
ရှန်းဝမ်စန်းက သိုလှောင်အိတ်ကို ဖွင့်ကာ စစ်ဆေးကြည့်လိုက်ရာ တိတိကျကျ ဝိညာဉ်ကျောက်တုံး ၂၅၀၀၀ ရှိနေပေသည်။
အသိစိတ်တစ်ချက်ဖြင့်ပင် ရှန်းဝမ်စန်း လက်ရှိ သိုလှောင်လက်စွပ်ထံမှ ဝိညာဉ်စွမ်းအား လှိုင်းတစ်ခု လှုပ်ခတ်သွားခဲ့သည်။
ဝမ်ရှင်းတယ် ပေးအပ်လာသော သိုလှောင်အိတ်အတွင်းရှိ ဝိညာဉ်ကျောက်တုံးများ အားလုံးက ချန်ကျီ ပေးထားခဲ့သော သိုလှောင်လက်စွပ်အတွင်းသို့ ကူးပြောင်းရောက်ရှိသွားခဲ့ပြီ ဖြစ်သည်။
"ရော့... မင်းရဲ့ သိုလှောင်အိတ်" ရှန်းဝမ်စန်းက ပြောရင်း ဝမ်ရှင်းတယ်၏ သိုလှောင်အိတ်ကို ပြန် ပေးလိုက်သည်။
"မလိုတော့ပါဘူး၊ မလိုတော့ပါဘူး" ဝမ်ရှင်းတယ်က ပျော်ရွှင်မှုများ မျက်နှာထက်၌ အထိုက်အလျောက် ပေါ်ပေါက်နေခဲ့သည်၊ သူက သူ့ဘက်က အဆမတန် အမြတ်ထွက်သွားသည်ဟု ခံစားနေရသဖြင့် သိုလှောင်အိတ်တစ်ခုက ဝိညာဉ်ကျောက်တုံး အနည်းငယ်မျှသာ တန်ဖိုးရှိပေသည်။
ရှန်းဝမ်စန်းကမူ ပြုံးလျက် ခေါင်းခါပြလိုက်ပြီး ကောင်တာပေါ်၌ တင်ထားသော သိုလှောင်အိတ်ကို လှမ်းမယူပေ ။
"အားနာစရာကြီး" ဝမ်ရှင်းတယ်က အနည်းငယ် စိတ်မသက်မသာဖြင့် သိုလှောင်အိတ်ကို ပြန်လည် သိမ်းဆည်းလိုက်ရသည်၊ သူကပဲ အများကြီး တွေးမိသွားခြင်း ဖြစ်ပေသည်။
"နောက်လည်း လာ အားပေးဖို့ ဖိတ်ခေါ်ပါတယ်" ရှန်းဝမ်စန်းက ယခင်အတိုင်း မျက်နှာအမူအရာ မပျက်ဘဲ ပြောလိုက်သည်။
ဝမ်ရှင်းတယ်ကမူ လက်သီးဆုပ် နှုတ်ဆက်လိုက်သည်။ "ကျေးဇူးအများကြီး တင်ပါတယ်"
ရှန်းဝမ်စန်းက မျက်နှာထက်၌ အပြုံးကို ထိန်းသိမ်းထားသော်လည်း စိတ်ထဲ၌မူ ပြောနေခဲ့သည်။ "လုံးဝ မလိုပါဘူး"
ဝမ်ရှင်းတယ်ကဲ့သို့သော လူမျိုးနှင့် ရှန်းဝမ်စန်းက မိတ်ဆွေဖွဲ့ ရန် စိတ်မဝင်စားပေ ၊ သူ့ထံမှ ဝိညာဉ်ကျောက်တုံးများကို အမြတ်ထုတ်နိုင်လျှင်ပဲ ရပြီ ဖြစ်သည်။
ဝမ်ရှင်းတယ်သည်လည်း ဆက်လက် ရှိနေလျှင် ပို၍ အနေရခက်ရုံသာ ရှိတော့မည်ကို သိရှိသဖြင့် ကျေးဇူးတင်စကား ပြောကြားပြီးနောက် အနန္တ ကုန်စုံဆိုင်အတွင်းမှ တိတ်တဆိတ် ထွက်ခွာသွားခဲ့တော့သည်။
ဝမ်ရှင်းတယ် ထွက်ခွာသွားပြီးနောက် ရှန်းဝမ်စန်းက ချန်ကျီကို လှမ်း၍ ဆက်သွယ်လိုက်သည်။
"သခင်... ခုနက ဝမ်မိသားစုက ဝမ်ရှင်းတယ် လာပြီး အုတ်မြစ်ချခြင်း ဆေးလုံး ငါးလုံး ဝယ်သွားပါတယ်၊ သခင် သတ်မှတ်ပေးထားတဲ့ ဝိညာဉ်ကျောက်တုံး ၅၀၀၀ ဆိုတဲ့ စျေးနှုန်းကိုလည်း သူက ဝမ်းမြောက်ဝမ်းသာ လက်ခံသွားပြီး ဘာမှ မကန့်ကွက်ခဲ့ပါဘူး"
"ဒါဆိုရင်လည်း... နောက်ပိုင်းကျရင် ဒီစျေးအတိုင်းပဲ ရောင်းလိုက်တော့"
"ဟုတ်ကဲ့ပါ သခင်"
ရှန်းဝမ်စန်းက ချန်ကျီနှင့် ဆက်သွယ်မှု ပြီးဆုံးရုံမျှသာ ရှိသေးသော်လည်း အနန္တ ကုန်စုံဆိုင်အတွင်းသို့ နောက်ထပ် လူတစ်ယောက် လှမ်းဝင်လာခဲ့ပြန်သည်။
ရှန်းဝမ်စန်းက ဤလူအား ရိုးရှင်းစွာ တစ်ချက်မျှ ကြည့်လိုက်ရုံဖြင့် ဤလူက သေချာပေါက် မရိုးရှင်းကြောင်း သိလိုက်သည်။
မျှော်လင့်ထားသည့်အတိုင်းပင် ဤလူသည်လည်း ဝမ်နန်မြို့အတွင်းရှိ မိသားစု အင်အားစုများထဲမှ ဖြစ်သင့်ပေသည်။
"မင်္ဂလာပါ ၊ ဘာပစ္စည်း ဝယ်ယူချင်လို့လဲ"
တစ်ဖက်လူကမူ ပြန်လည် မဖြေကြားဘဲ ပြောင်းပြန် မေးမြန်းလာခဲ့သည်။ "မင်းက ဒီကုန်စုံဆိုင်ရဲ့ ဆိုင်ရှင်လား"
ရှန်းဝမ်စန်းက သူ့အား နားမလည်နိုင်စွာ ကြည့်ရင်း ခေါင်းညိတ်ပြလိုက်သည်။
ဒါက အလွန်အမင်း ထင်ရှားနေသည့် ကိစ္စ ဖြစ်ပေသည် မဟုတ်ပါလော။ တစ်ဆိုင်လုံးရှိ အနန္တ ကုန်စုံဆိုင်အတွင်း၌ တတိယမြောက် လူတစ်ယောက်ကို ရှာဖွေတွေ့ရှိနိုင်ဦးမည်တဲ့လား။
"ဒီဆိုင်ကို မင်း ဆုံးဖြတ်ချက် ချနိုင်လို့လား" ဤလူက ရှန်းဝမ်စန်းက အနန္တ ကုန်စုံဆိုင်၏ တကယ့် နောက်ကွယ်မှ အဓိက ဆုံးဖြတ်ပိုင်ခွင့်ရှိသူ မဟုတ်ကြောင်း ရိပ်မိသွားပုံရသည်။
ရှန်းဝမ်စန်း စိတ်ထဲ၌ ဇဝေဇဝါ ဖြစ်သွားရသည်၊ သူက တစ်ခုခုကို ရိပ်မိသွားတာလား။
သို့သော်လည်း ရှန်းဝမ်စန်းက ယခင်အတိုင်း မျက်နှာအမူအရာ မပျက်ဘဲ တည်ငြိမ်ရင့်ကျက်စွာဖြင့် ပြော လိုက်သည်။ "ဟဲဟဲ... အခြားနေရာတွေကိုတော့ ကျွန်တော် မသိဘူး၊ ဒါပေမဲ့ လက်ရှိ ဒီအနန္တ ကုန်စုံဆိုင်အတွင်းမှာတော့... အရာအားလုံးကို ကျွန်တော်ပဲ ဆုံးဖြတ်ပါတယ်"
"ဟားဟား... ကောင်းပြီ၊ ဒါဆိုရင်လည်း... မင်း ရောင်းချမယ့် အုတ်မြစ်ချခြင်း ဆေးလုံး အားလုံးကို... ငါ အကုန်ယူမယ်"
ရှန်းဝမ်စန်း၏ စိတ်ထဲ၌ လှမ်းဝင်လာသောလူက မည်သူဖြစ်ကြောင်း အကြမ်းဖျင်း ခန့်မှန်းမိသွားခဲ့ပြီ ဖြစ်သည်၊ ဝမ်နန်မြို့အတွင်း၌ ဤကဲ့သို့သော စကားလုံးမျိုးကို ပြောဆိုနိုင်မည့်သူမှာ ယဲ့မိသားစုဝင်ကလွဲ၍ အခြား မည်သူ ရှိနိုင်ဦးမည်နည်း။
တစ်ဖက်လူက ဤစကားကို ပြောဆိုနိုင်သဖြင့် ရောက်လာသူက အများအားဖြင့် ယဲ့မိသားစုဝင် ဖြစ်ကြောင်း ရှန်းဝမ်စန်း စိတ်ထဲ၌ သိရှိလိုက်သည်။
သို့သော်လည်း သူက ယဲ့မိသားစုဝင်များနှင့် မရင်းနှီးသဖြင့် လာရောက်သူက ယဲ့မိသားစု၏ မည်သည့်ပုဂ္ဂိုလ် ဖြစ်ကြောင်းကိုမူ သူ မသိပေ ။
သို့သော် ရှန်းဝမ်စန်း စိတ်ထဲ၌ အနည်းငယ်မျှ ထိတ်လန့်ခြင်း မရှိပေ ၊ ယဲ့မိသားစုဝင်တစ်ယောက်မျှသာ ဖြစ်ပေသည် မဟုတ်ပါလော။
သူတို့ကို စောင့်မျှော်နေခဲ့ရသည်မှာ ကြာလှပြီ ဖြစ်ပေသည်။
"ဟမ့်... ဒါဆိုရင်တော့ မင်း အကုန်ကုန်အောင် ယူနိုင်မှာမဟုတ်ဘူးလို့ ကျွန်တော် ထင်တယ်" ရှန်းဝမ်စန်းက အထင်သေးသော လေသံဖြင့် ပြောလိုက်ရင်း စိတ်က ချန်ကျီကို ထပ်မံ ဆက်သွယ်လိုက်သည်။
"သခင်... ယဲ့မိသားစုက လူ ရောက်လာပါပြီ"
"ကောင်းပြီ... ငါ လာခဲ့မယ်"
ခဏချင်းအတွင်းမှာပင် ချန်ကျီ၏ အသိစိတ်က ရှန်းဝမ်စန်း၏ ခန္ဓာကိုယ်ပေါ်သို့ သက်ဆင်း ရောက်ရှိလာခဲ့ပြီ ဖြစ်သည်။
လက်ရှိ ရှန်းဝမ်စန်းက လူတစ်ယောက်အဖြစ် ပြောင်းလဲသွားခဲ့ပြီ ဖြစ်သော်လည်း ယဲ့မိသားစုကလူကမူ မည်သည့် အရိပ်အယောင်မျှ ရိပ်မိခြင်း မရှိပေ ။
၎င်းနောက်တွင် ချန်ကျီက ရှေ့မှ ယဲ့မိသားစုဝင်အား အကဲခတ်ကြည့်လိုက်သည်။
ရှေ့မှ ဤယဲ့မိသားစုဝင်က ရုပ်ရည်ကိုသာ ကြည့်မည်ဆိုလျှင် အသက် လေးဆယ်ဝန်းကျင်ခန့် ရှိပေသည်။
တစ်ဖက်လူ၏ ခွန်အားကိုမူ ချန်ကျီက တစ်ဖက်လူ ရိပ်မိသွားမည်ကို စိုးရိမ်သဖြင့် အတင်း စစ်ဆေးခြင်း မပြုလုပ်ပေ ၊ သို့သော်လည်း ဤလူက အလိုအလျောက်ပင် သူ့အား ခန့်ညားထည်ဝါသော ခံစားချက်မျိုး ပေးစွမ်းနေခဲ့သည်။
ချန်ကျီက စိတ်ထဲ၌ တိုးတိုးလေး ရေရွတ်လိုက်သည်။ "ကောင်းကင်မျက်စိ စွမ်းရည်"
သူက ကောင်းကင်မျက်စိ စွမ်းရည်ကို အသုံးပြု၍ အခြားသူ၏ ခွန်အားကို စစ်ဆေးခြင်းမှာ ဤပထမဆုံးအကြိမ် ဖြစ်ပေသည်။
ချန်ကျီက ကောင်းကင်မျက်စိ စွမ်းရည်ကို အသုံးပြုသည့် အချိန်တွင် စနစ်ထံမှ မည်သည့် အချက်အလက် မျှ ပေါ်မလာခဲ့ပေ ။
သို့သော်လည်း ချန်ကျီက ဂရုတစိုက်ဖြင့် ကြည့်လိုက်ရာ အမှတ် ၁၀၀ နုတ်ယူခြင်း ခံလိုက်ရသည်ကို သတိပြုမိလိုက်သည်။
ဤပမာဏကို ချန်ကျီအနေနှင့် လက်ခံနိုင်ပါသေးသည်၊ အလွန်အမင်း ကြီးမားလွန်းခြင်းမျိုး မဟုတ်ပေ ။
ကောင်းကင်မျက်စိ စွမ်းရည်ကို အသုံးပြုပြီးနောက် ခဏအကြာတွင်ပင် ချန်ကျီက တစ်ဖက်လူ၏ ကျင့်ကြံခြင်းအဆင့်ကို သိရှိသွားခဲ့ပြီ ဖြစ်သည်။
အုတ်မြစ်ချခြင်း အဆင့် ၉ ၊ အုတ်မြစ်ချခြင်း အထွတ်အထိပ် အဆင့် ဖြစ်ပေသည်။
တစ်ဖက်လူ၏ ကျင့်ကြံခြင်းအဆင့်ကို ကြည့်ရုံမျှဖြင့် ချန်ကျီ စိတ်ထဲ၌ သဘောပေါက်သွားခဲ့ပြီ ဖြစ်သည်၊ အလွဲအချော်မရှိလျှင် ရှေ့မှ ဤလူက ယဲ့မိသားစု၏ ခေါင်းဆောင် 'ယဲ့ကျန်ထျန်း' ဖြစ်သင့်ပေသည်။
တော်သေးသည်မှာ ယဲ့မိသားစု၏ ရွှေအူတိုင်အဆင့် ကျင့်ကြံသူ ရောက်လာခြင်း မဟုတ်ပေ ၊ ယဲ့ကျန်ထျန်းကိုမူ သူက စိတ်ကြိုက် ကိုင်တွယ်နိုင်ပေသည်။
ယဲ့ကျန်ထျန်းက ရှန်းဝမ်စန်း ပြောလိုက်သော ဤစကားကို ကြားရသောအခါ စိတ်ထဲ၌ အနည်းငယ် အံ့ဩသွားခဲ့ရသည်။
ဤအနန္တ ကုန်စုံဆိုင်၏ ဆိုင်ရှင်က သူ မည်သူဖြစ်ကြောင်းကို မသိသဖြင့်သာ ဤကဲ့သို့သော စကားမျိုးကို ရဲရဲဝံ့ဝံ့ ပြောဆိုရဲခြင်း ဖြစ်ပေလိမ့်မည်။
သို့မဟုတ်ပါက တစ်ဖက်လူတွင် သူ တကယ်ပဲ အကုန်ကုန်အောင် မဝယ်ယူနိုင်လောက်သည့် အုတ်မြစ်ချခြင်း ဆေးလုံး အရေအတွက် ရှိနေခြင်း ဖြစ်ပေလိမ့်မည်။
ယဲ့ကျန်ထျန်းက စိတ်ထဲ၌ ခေတ္တ ချိန်ဆတွေးတောပြီးနောက်တွင် ပြော လိုက်သည်။ "ငါ့ကိုယ်ငါ မိတ်ဆက်ပေးဖို့ မေ့သွားတယ်၊ ငါ့နာမည်က ယဲ့ကျန်ထျန်း ပါ"