အခန်း ၂၀၆

အခန်း (၂၀၆) နွေဦးပေါက် ရတနာရှာဖွေခြင်း... တောင်ထဲက အဖိုးတန် ပစ္စည်းများ

အချိန် နှစ်ရက် ထပ်မံ ကုန်လွန်သွားခဲ့သည်။

အသစ်တည်ဆောက်ထားသော မှန်လုံအိမ်များက တဖြည်းဖြည်း ပုံစံပေါ်လာပြီ ဖြစ်၏။

တောင်ထဲရှိ ရေခဲနှင့် နှင်းများက စတင် အရည်ပျော်လာပြီး မြစ်များကလည်း တစ်ဖန် ပြန်လည် စီးဆင်းလာကြသည်။ တစ်နှစ်တာအတွက် တောင်ထွက်ပစ္စည်းများ ကောက်ယူရမည့် အချိန်သို့ ရောက်ရှိလာပြန်ပြီ ဖြစ်၏။

အသက်မွေးဝမ်းကျောင်း ပြုနေသော တောတောင်ရှာဖွေသူများက နွေ... ဆောင်းဦး နှင့် ဆောင်းရာသီ များတွင် တောင်ထဲသို့ ဝင်ရောက်တတ်ကြပြီး မိသားစု အသုံးစရိတ်အတွက် တောင်ထွက်ပစ္စည်းများကို ရှာဖွေလေ့ ရှိကြသည်။

အခြေခံအားဖြင့် ရာသီတိုင်းတွင် တောင်ထဲ၌ မှိုများ... လင်ဇီးမှိုများ ကဲ့သို့သော အရာများ ရှိတတ်ပေသည်။ သို့သော် ရွှီယန် တောင်ထဲ ဝင်ရာတွင် ရှာဖွေချင်သည့် အရာများက ဤအရာများ မဟုတ်ဘဲ တကယ်ကို တန်ဖိုးရှိသော ရတနာများသာ ဖြစ်၏။

ထိုနေ့တွင် ရွှီယန်က ထုံးစံအတိုင်း တောင်ထဲသို့ ဝင်လာခဲ့သည်။ ဒရုန်းက မြင့်မားစွာ ပျံသန်းနေပြီး တောင်ထဲရှိ မြင်ကွင်း အားလုံးကို လိုက်ဖ်လွှင့်ပေးနေ၏။

နှင်းများ အနည်းငယ် အရည်ပျော်သွားသဖြင့် တောင်ပေါ်လမ်းများက သွား၍ ရနေပြီ ဖြစ်သည်။ နေရာ အတော်များများတွင် မြေကြီးများက အေးခဲ တောင့်တင်းနေပြီး နှင်းခဲအလွှာလေး တစ်ထပ် ဖုံးလွှမ်းနေ၏။

ကျားသစ်လေး ရှောင်ဟွာက ရွှီယန်၏ ဘေးတွင် အတူတကွ လိုက်ပါလာပြီး တောင်ထဲသို့ အတူ ဝင်လာခဲ့သည်။ ဤသည်က တောင်တောင်ရှာဖွေခြင်း၏ နေ့စဉ်ဘဝပင် ဖြစ်၏။

ရှောင်ဟွာ ပါလာသဖြင့် လိုက်ဖ်ထဲတွင် ကြည့်ရှုသူ အရေအတွက်က ပို၍ များပြားလာခဲ့သည်။ သာမန်အချိန် တောင်ထဲ ဝင်ပါက သုံးသောင်း လေးသောင်းခန့်သာ ရှိသော်လည်း ကျားသစ်လေး ပါလာပါက ကြည့်ရှုသူ အရေအတွက်က အလွယ်တကူပင် ငါးသောင်းကျော်အထိ ရောက်ရှိသွားနိုင်ပေသည်။

"အခု နွေဦးပေါက်ပြီ ဆိုတော့ ရေခဲတွေ နှင်းတွေ စပြီး အရည်ပျော်နေပြီ... မြစ်ရေက နေ့ဘက်ဆို စီးဆင်းပြီး ညဘက်ဆို ပြန်အေးခဲသွားတယ်... ဒီလိုပဲ အဆုံးမရှိ လည်ပတ်နေတာပေါ့"

"တောင်ထဲကို တစ်ပတ်လောက် ပတ်ကြည့်ပြီး ဘာတွေ စိတ်ဝင်စားစရာ ရှိလဲ ဆိုတာ ကြည့်ရအောင်"

"တောင်ထဲက ရှုခင်းတွေက တော်တော်လေး ကောင်းတယ်... လေကလည်း ရှူရတာ အရမ်း လန်းဆန်းတယ်"

"တောင်ထဲက အငွေ့အသက်လေးကို ကျွန်တော် ပိုသဘောကျတယ်... အေးချမ်းပြီး သက်သောင့်သက်သာ ရှိတယ်လေ"

ရွှီယန်က တောင်တန်းကြီးထဲတွင် လမ်းလျှောက်နေရင်း ပြောလိုက်၏။ သူက တောင်ထဲတွင် လမ်းလျှောက်ရသည်ကို အမြဲတမ်း နှစ်သက်ပြီး သဘာဝအတိုင်း ရှိနေသော ရှုခင်းများကို သဘောကျပေသည်။

[ချန်ပိုင်တောင်တန်း ရဲ့ နံပါတ်တစ် လမ်းသရဲကြီး ဆိုတဲ့ နာမည်နဲ့ တကယ် လိုက်ဖက်တာပဲ]

[လောင်ရွှီ သွားတဲ့ နေရာတွေက တကယ့် တောနက်ကြီးတွေချည်းပဲ... အရည်အချင်း မရှိရင် တကယ် မသွားရဲဘူး]

[သဘာဝဥယျာဉ် ရဲ့ ရှုခင်းတွေက ကောင်းပါတယ်... တခြား နေရာတွေကိုတော့ ကျွန်တော်တို့ ရမ်းသမ်း မသွားရဲဘူးလေ]

[လိုက်ဖ်ကို ကြည့်လိုက်ရုံနဲ့တင် ငါလည်း အတူတူ သွားလိုက်ရသလိုပဲ ခံစားရတယ်]

[ရှောင်ဟွာ ကို မတွေ့ရတာ တော်တော် ကြာပြီနော်]

[အဲဒါ တကယ့် ကျားသစ် အစစ်ကြီးလား... ဒီလိုက်ဖ်လွှင့်သူ က ကျားသစ်တောင် မွေးထားတာလား... အဲဒီလောက်တောင် အစွမ်းထက်တာလား]

ကွန်မန့်များက အဆက်မပြတ် လိမ့်ဆင်းနေပြီး လူအမျိုးမျိုး ပါဝင်နေကြ၏။ ပရိသတ်ဟောင်းများ ရှိသလို အသစ်များလည်း ရှိကြသည်။

ဗီဒီယိုအတို လိုက်ဖ်လွှင့်ခြင်း ဆိုသည်မှာ ဤသို့ပင် ဖြစ်၏။ လူကြိုက်များမှုက အလွန် ကြီးမားလွန်းသဖြင့် လူများက လူကြိုက်များသည့် အရာများနောက်သို့သာ လိုက်ကြစမြဲပင်။

တောင်ထဲရှိ ရှုခင်းများက အလွန် လှပလှသည်။ ရှောင်ဟွာက အပြင်မထွက်ရသည်မှာ ကြာပြီဖြစ်သဖြင့် အလွန် ပျော်ရွှင်နေပြီး ပတ်ဝန်းကျင်တွင် ဟိုခုန်ဒီပေါက် လုပ်နေ၏။

ကြောင်မျိုးရင်းဝင် တိရစ္ဆာန်များ၏ အပြုအမူကို တစ်ခါတစ်ရံ ခန့်မှန်းရန် အလွန် ခက်ခဲလှပေသည်။ ဥပမာအားဖြင့် သူတို့က ပြေးနေရင်းမှ ရုတ်တရက် ရှေ့သို့ တစ်ပတ် လိမ့်ချလိုက်ခြင်းမျိုးဖြစ်ပြီး ဘာလုပ်ချင်မှန်းကို မသိနိုင်ချေ။ ရှောင်ဟွာက ဘေးတွင် ဟိုခုန်ဒီပေါက် လုပ်နေ၏။

ရွှီယန်လည်း အလွန် ပေါ့ပါးနေသည်ဟု ခံစားနေရသည်။ သူက ယနေ့ ကျောပိုးအိတ်ကိုသာ လွယ်ထားပြီး တောင်တက်ဝတ်စုံကို ဝတ်ဆင်ထားကာ လက်ထဲတွင် တောင်တက်တုတ် တစ်ချောင်းကို ကိုင်ဆောင်ထား၏။ ဤရာသီတွင် အန္တရာယ်က နှိုင်းယှဉ်ကြည့်မည် ဆိုပါက နည်းပါးလှပေသည်။

အဆိပ်ရှိသော ပိုးမွှားများ... မြွေများ မရှိသလို မြင်ကွင်းကလည်း နှိုင်းယှဉ်ကြည့်မည် ဆိုပါက အတော်လေး ရှင်းလင်းနေ၏။ တစ်ခါတစ်ရံတွင် ရှဉ့်လေးများ ထွက်လာကာ သစ်ကိုင်းများပေါ်တွင် လှုပ်ရှားသွားလာနေသည်ကို မြင်တွေ့ရတတ်သည်။

အဝေးတစ်နေရာတွင်တော့ တုံးအအ ဒရယ်ပြောက် အချို့က နှင်းပြင်ထဲတွင် ခုန်ပေါက်နေကြပြီး သူတို့က အတူတကွ စုရုံးကာ မြက်စားရင်း ပတ်ဝန်းကျင်ကိုလည်း လှမ်းကြည့်နေကြ၏။

သဘာဝ ရှုခင်းများ၏ အလှတရားက မျက်စိရှေ့တွင် ပေါ်လာခဲ့သည်။ အချို့သော တိရစ္ဆာန်များကို တောင်ထဲတွင်သာ မြင်တွေ့နိုင်ပေသည်။ ရွှီယန်က အသက်ဝင် လှုပ်ရှားနေသော တောရိုင်း တိရစ္ဆာန်များကို ကြည့်ရှုရသည်ကို အလွန် နှစ်သက်ပြီး ၎င်းတို့က သူ့ကို အမြဲတမ်း တက်ကြွ လန်းဆန်းသည့် ခံစားချက်မျိုး ပေးစွမ်းနိုင်၏။

ရွှီယန်က တုံးအအ ဒရယ်ပြောက်များကို လှမ်းကြည့်လိုက်ရာ ရှောင်ဟွာကလည်း လိုက်ကြည့်နေသည်။ ၎င်းက လည်ပင်းကို ဆန့်ထုတ်ကာ ခေါင်းကို မော့ပြီး တုံးအအ ဒရယ်ပြောက်များကို ရဲရဲတင်းတင်းပင် စိုက်ကြည့်နေ၏။

တုံးအအ ဒရယ်ပြောက်များက နောက်လှည့်ကြည့်လိုက်ရာ ဤဘက်ရှိ ဧရာမ ကျားသစ် မျက်နှာကြီးကို မြင်သောအခါ ချက်ချင်းပင် တစ်ချက် ခုန်လိုက်ပြီး နှင်းပြင်ထဲမှ တစ်ခုန်ချင်းစီ ပြေးထွက်သွားကြတော့သည်။

ရွှီယန်က ဘေးရှိ တုံးအအ ကျားသစ်လေးကို တစ်ချက် လှမ်းကြည့်လိုက်ရာ ၎င်း၏ မျက်လုံးများက အပြစ်ကင်းစင်နေဆဲပင် ဖြစ်၏။ ရွှီယန်က ဘာမှ ထပ်မပြောတော့ဘဲ အရှေ့သို့ ဆက်လက် လျှောက်သွားလိုက်သည်။

တကယ်ဆိုလျှင် ကျားသစ်များက သားကောင်ကို စောင့်ကြည့်ရာတွင် အလွန် သတိထားတတ်ပြီး ပုန်းအောင်းရာတွင်လည်း အလွန် ကျွမ်းကျင်ကြပေသည်။ ဤကောင်လေး ကတော့ အမဲလိုက်ရမည့် သတိလေး အနည်းငယ်မျှပင် မရှိချေ။

ပြီးပြီ... မွေးထားတာ အလကား ဖြစ်သွားပြီ။

သို့သော်လည်း မတတ်နိုင်ချေ။ မမွေးလျှင်လည်း ဤသို့ပင် ဖြစ်နေမည်သာ ဖြစ်၏။ မဟုတ်ပါက ထိုစဉ်က တားဟွာ မှာ ဤမျှလောက် ခေါင်းကိုက်ခဲ့မည် မဟုတ်ချေ။ အဆုံးတွင် ရှောင်ဟွာကို ရွှီယန်ထံသို့ပင် အပ်နှံသွားခဲ့သေးသည်။

တောင်ထဲရှိ ရှုခင်းများက အလွန် လှပလှ၏။

ရွှီယန်က အရှေ့သို့ တောက်လျှောက် လျှောက်သွားရာ သိပ်မကြာခင်မှာပင် မြစ်တစ်စင်း၏ ဘေးသို့ ရောက်ရှိသွားခဲ့သည်။

ချန်ပိုင်တောင်တန်း တွင် ရေအရင်းအမြစ် အလွန် ပေါကြွယ်ဝပြီး သူတို့ရွာ၏ အနောက်ဘက်တွင်လည်း မြစ်ငယ်လေး တစ်စင်း ရှိပေသည်။

မျက်စိရှေ့ရှိ မြစ်၏ မျက်နှာပြင်ပေါ်တွင် ရေခဲလွှာ တစ်ထပ် ဖုံးလွှမ်းနေဆဲ ဖြစ်သော်လည်း အောက်ဘက်ရှိ မြစ်ရေများကတော့ စီးဆင်းနေပြီ ဖြစ်၏။ ကြည့်ရသည်မှာ အလွန် ထူးဆန်းလှပေသည်။

"ရေတွေက အရည်ပျော်နေပြီ... ရေစီးသံကိုတောင် ကြားနေရတယ်"

"မျက်နှာပြင်ပေါ်မှာတော့ ရေခဲ အလွှာလေး ရှိနေတုန်းပဲ"

"ဒီရေခဲလွှာ က အရမ်း ပါးတယ်... နည်းနည်းလေး နင်းလိုက်တာနဲ့ ကွဲသွားမှာပဲ"

ရွှီယန်က ဘေးမှ ကျောက်တုံးကြီး တစ်တုံးကို ကောက်ယူကာ ရေခဲပြင် အလယ်သို့ ပစ်ချလိုက်၏။ ခွပ် ဟူသော အသံနှင့်အတူ ရေခဲပြင်က ချက်ချင်းပင် အက်ကွဲကြောင်း အများအပြား ဖြစ်ပေါ်သွားတော့သည်။

ကျောက်တုံးကလည်း မြစ်ရေထဲသို့ အောင်မြင်စွာ ကျသွားခဲ့၏။

[ကြည့်ရတာ တော်တော် ဆော့လို့ ကောင်းမယ့်ပုံပဲ]

[မဟုတ်သေးဘူးလေ... လိုက်ဖ်ထဲမှာ လူဒီလောက်များတာ လိုက်ဖ်လွှင့်သူ ဒါလုပ်တာကို ကြည့်ဖို့လား]

[ငါလည်း ရေခဲပြင်ကို ခွဲချင်တယ်... ကျောက်တုံး တစ်တုံးလောက် ပေးပါ]

[ကြည့်ရတာ အရမ်း မိုက်တာပဲ... ငါလည်း ခွဲချင်တယ်]

ကွန်မန့်များက ထပ်မံ များပြားလာခဲ့၏။ ရွှီယန်ကိုယ်တိုင်ပင် မထင်မှတ်ထားခဲ့ချေ။ ရေခဲလွှာ၏ အထူကို အလွယ်တကူ စမ်းသပ်လိုက်ခြင်းကပင် လူအများအပြား၏ တုံ့ပြန်မှုကို ဖြစ်ပေါ်စေလိမ့်မည်ဟု မည်သူ ထင်မှတ်ထားခဲ့မည်နည်း။

ကြည့်ရသည်မှာ အားလုံးက တကယ်ကို ပျင်းရိနေကြပုံရ၏။ ထို့နောက် ရွှီယန်က မြစ်ရေစီးကြောင်း အတိုင်း အထက်သို့ ဆန်တက်သွားလိုက်သည်။ အရှေ့ဘက်တွင် ရွှေမြစ် ရှိနေ၏။

ရွှေမြစ် ဧရိယာရှိ မြစ်ရေက အလွန် တိမ်ပြီး ဧရိယာကလည်း အလွန် ကြီးမားလှသည်။ အောက်ဘက်တွင် စုပုံနေသော ရွှံ့နွံများနှင့် သဲများ အများအပြား ရှိနေ၏။ ဤဧရိယာက အမှန်တကယ်ပင် ထူးခြားလှပေသည်။ ထူးခြားသော မြေမျက်နှာသွင်ပြင်က ကြားခံ နယ်မြေ တစ်ခုကို ဖန်တီးပေးထားပြီး ဆန်ခါ တစ်ခုကဲ့သို့ပင် ဖြစ်၏။

ကျောက်စရစ်ခဲများ... ကျောက်မှုန်များ... ရွှေမှုန်များ ကဲ့သို့သော အရာများက ဤဧရိယာထဲတွင် ကျန်ရစ်နေခဲ့မည် ဖြစ်သည်။ ဤနေရာက ရွှီယန်၏ ရွှေတွင်း နေရာလည်း ဖြစ်၏။

လိုက်ဖ်လွှင့်နေဆဲ ဖြစ်သဖြင့် ရွှီယန်က ရွှေကျင်ခြင်း မပြုလုပ်သေးဘဲ ရွှေမြစ်၏ အခြေအနေကိုသာ ကြည့်ရှုနေလိုက်သည်။

"မြစ်ရေတွေ အကုန် အရည်ပျော်သွားပြီ... ပြီးတော့ တော်တော်လေး တိမ်တာဆိုတော့ ရွှေမှုန်တွေ ကျင်လို့ ရနေပြီ"

"အခု တောင်ထွက်ပစ္စည်း တွေ သိပ်မရှိသေးတော့ ဒီဘက်ကို လာပြီး ပုံမှန် ဝင်ငွေလေး လာရှာရတာပေါ့"

"ဒါပေမဲ့ မနှစ်က ကျွန်တော် လာတုန်းက ရှာတွေ့တဲ့ ရွှေမှုန်တွေက အရမ်း သေးလွန်းတယ်"

"ဒီနေ့တော့ အပေါ်ဘက်ကို နည်းနည်း ထပ်တက်ကြည့်ပြီး အခြေအနေကို သွားကြည့်ရမယ်"

ရွှီယန်က စိတ်ထဲမှ ဆုံးဖြတ်ချက် ချလိုက်၏။ သူက ဆက်လက်၍ အထက်သို့ ဆန်တက်သွားလိုက်သည်။ ရေတိမ်ပိုင်း ဧရိယာကို ဖြတ်ကျော်ပြီးနောက် အရှေ့ဘက်တွင်တော့ မြစ်ရေ စီးဆင်းမှုက အလွန် မြန်ဆန်နေပြီ ဖြစ်၏။

ဒရုန်းက အမြင့်ပိုင်းတွင် လိုက်ဖ်လွှင့်နေပြီး သစ်တော၏ မြင်ကွင်းကို အပေါ်စီးမှ ရိုက်ကူးနေသည်။ ယှက်နွယ်နေသော မြစ်များဘေးတွင် လမ်းလျှောက်နေသည့် လူတစ်ယောက်နှင့် ကျားသစ် တစ်ကောင်ကို မြင်တွေ့လိုက်ရပြီး မြင်ကွင်းက ပြောမပြတတ်အောင်ပင် ခမ်းနားလှပေသည်။

ဤကဲ့သို့သော မြင်ကွင်းမျိုးကို ရွှီယန်၏ လိုက်ဖ်ထဲတွင်သာ မြင်တွေ့နိုင်မည် ဖြစ်၏။ ရွှီယန်က မြစ်ကြောင်း အတိုင်း အရှေ့သို့ ဆက်လက် လျှောက်သွားလိုက်သည်။ ဤကဲ့သို့ စီးဆင်းမှု မြန်ဆန်သော မြစ်များထဲတွင် ရွှေမှုန်များ ကျန်ရစ်နေရန် အလွန် ခက်ခဲလှပေသည်။ ဤကဲ့သို့သော နေရာမျိုးတွင် ရွှေကျင်မည့်သူလည်း ရှိမည် မဟုတ်ချေ။

ရေတိမ်ပိုင်း ဧရိယာသို့ သွားမှသာ ရမည် ဖြစ်၏။

သိပ်မကြာခင်မှာပင် အရှေ့ဘက်တွင် မြစ်ခွဲများ ပေါ်လာခဲ့သည်။ မြစ်ငယ် အတော်များများ ပေါင်းစုံသွားမှသာ မျက်စိရှေ့ရှိ ဤမြစ်ကြီး ဖြစ်ပေါ်လာခြင်း ဖြစ်၏။

ရွှီယန်က အထဲသို့ အနည်းငယ် ထပ်ဝင်သွားပြီးနောက် ရတနာရှာဖွေရေး သံလိုက်အိမ်မြှောင်ကို အသုံးပြုရန် ရွေးချယ်လိုက်သည်။ သူက ဖုန်းမြေပုံကို ကြည့်လိုက်ရာ မြေပုံက ရှာတွေ့ထားသော ရတနာသည် ထိုမြစ်ငယ်များထဲမှ တစ်ခုထဲတွင် ရှိနေကြောင်း ပြသနေ၏။ ၎င်းက ရွှေမှုန်များ ဖြစ်မည်မှာ သေချာပေသည်။

ရွှီယန်က ကောက်ယူရန် မလောသေးဘဲ ဤမြစ်ကြောင်း အတိုင်း အတွင်းဘက်သို့ ဆက်လက် လျှောက်သွားလိုက်သည်။ လမ်းခွဲများ ရှိပါက ရတနာရှာဖွေရေး သံလိုက်အိမ်မြှောင်ကို အသုံးပြုကာ တည်နေရာကို ရှာဖွေလိုက်၏။

ကြည့်ရသည်မှာ သူက မြစ်ကြောင်း အတိုင်း ရှုခင်းများကို ကြည့်ရှုနေပုံရသော်လည်း တကယ်တမ်းတွင်တော့ ရွှီယန်က ရွှေမှုန်များ အများအပြား စုဆောင်းမိနေသည့် ဧရိယာကို ရှာဖွေနေခြင်း ဖြစ်သည်။

လူအမျိုးမျိုးက မတူညီသော ရှုခင်းများကို မြင်တွေ့ကြရပေသည်။ တစ်ခါတစ်ရံ မြစ်ကမ်းဘေးတွင် တိရစ္ဆာန်လေးများ ရေသောက်နေသည်ကိုလည်း မြင်တွေ့ရတတ်၏။ ဤတိရစ္ဆာန်များက အသံကြားသည်နှင့် ချက်ချင်းပင် လန့်ပြေးသွားကြတော့သည်။

ရွှီယန်က အထက်သို့ တောက်လျှောက် ဆန်တက်သွားလိုက်၏။ နောက်ဆုံးတွင် အရှေ့ဘက်၌ ရေကန်ကြီး တစ်ခု ပေါ်လာခဲ့သည်။ ရေကန်က အလွန် ကြည်လင်နေပြီး ရင်းမြစ်မှ ရေရှင်များ အဆက်မပြတ် စီးဝင်လာကာ အောက်ခြေမှလည်း ရေများ အဆက်မပြတ် စီးထွက်သွားပြီး မြစ်ငယ်လေး တစ်စင်း ဖြစ်ပေါ်လာခဲ့၏။

ဤသည်မှာ သဘာဝ ရေလှောင်ကန် တစ်ခုပင် ဖြစ်သည်။

ရွှီယန်က ရတနာရှာဖွေရေး သံလိုက်အိမ်မြှောင်ကို နောက်တစ်ကြိမ် ထပ်မံ အသုံးပြုလိုက်၏။

ထင်ထားသည့် အတိုင်းပင်။

ရတနာရှာဖွေရေး သံလိုက်အိမ်မြှောင်မှ ပြသထားသော ရတနာတစ်ခု၏ တည်နေရာက ဤရေကန်ထဲတွင်ပင် ဖြစ်သည်။

"တကယ် ရှာတွေ့သွားပြီပဲ"

"ဒီနေရာမှာ စုပုံနေတဲ့ ရွှေမှုန်တွေက ရေတိမ်ပိုင်းက ဟာတွေထက် အများကြီး ပိုများမှာ သေချာတယ်"

"ရေတိမ်ပိုင်းက ရွှေမှုန်တွေက မြစ်ရေနဲ့ အတူ မျောပါသွားနိုင်သေးတယ်လေ"

"တကယ်လို့ ရေကန်ထဲမှာ ဆိုရင်တော့ ရွှေမှုန်တွေက ရေကန် အောက်ခြေကို ရောက်သွားပြီး အပြင်ကို ပြန်ထွက်ဖို့ အရမ်း ခက်သွားပြီ"

ရွှီယန်က ရေကန်ဘေးတွင် ရပ်ကာ ရေခဲလွှာလေး ဖုံးလွှမ်းနေဆဲ ဖြစ်သော ရေကန်မျက်နှာပြင်ကို ကြည့်ရင်း မျက်လုံးများတွင် အနည်းငယ် စိတ်လှုပ်ရှားနေသည့် အရိပ်အယောင်များ ပေါ်လာခဲ့၏။

အင်တာနက်သုံးစွဲသူများကတော့ သူသည် လှပသော ရှုခင်းများကို ကြည့်ကာ အံ့ဩသွားခြင်း ဖြစ်မည်ဟု ထင်မှတ်နေကြသည်။

[ဒီရေကန်က အရမ်း လှတာပဲ... ရေခဲတွေလည်း ဖုံးနေတော့ တကယ့် မှန်ကြီး တစ်ချပ် နဲ့တောင် တူနေသေးတယ်]

[တောင်ထဲက ရှုခင်းတွေက တကယ် ကောင်းတာပဲ]

[နှမြောစရာပဲ တောနက်ကြီးထဲမှာ ဖြစ်နေလို့... မြေမျက်နှာသွင်ပြင်ကလည်း အရမ်း ရှုပ်ထွေးတော့ သဘာဝဥယျာဉ် အဖြစ်တောင် ပြောင်းလို့ မရဘူး]

[ဒီလိုမျိုးက ပြောင်းလို့ မရပါဘူး... ပြီးတော့ လိုလည်း မလိုပါဘူး... တောင်ထဲမှာ နေရာတိုင်း အဲဒီလိုချည်းပဲလေ]

အားလုံးကလည်း အသီးသီး မှတ်ချက်ပေးနေကြ၏။

ရွှီယန်က နေရာတစ်ခုကို ရှာကာ ထိုင်လိုက်ပြီးနောက် ကျောပိုးအိတ်ထဲမှ သရေစာ အချို့ကို ထုတ်ယူကာ စားရင်း အနားယူနေလိုက်သည်။

စားစရာ ရှိသည်ကို မြင်သောအခါ ရှောင်ဟွာက ချက်ချင်းပင် အနားသို့ ကပ်လာတော့၏။

ရွှီယန်က အမဲသားခြောက်ကို စားနေခြင်း ဖြစ်ပြီး လက်ထဲတွင် အပြားလေး တစ်ပြား ကိုင်ထားသည်။ ရှောင်ဟွာက နှာခေါင်းကို ကပ်ကာ အနံ့ခံကြည့်လိုက်သေး၏။

"မင်းက အသားစိမ်း စားရတာလေ... ပြန်ရောက်မှ စား... ဒါက စားလို့ မရဘူး"

ရွှီယန်က အေးဆေးတည်ငြိမ်စွာပင် ပြောလိုက်သည်။

ထိုစကားကို ကြားသောအခါ ရှောင်ဟွာက ချက်ချင်းပင် ခြေတစ်လှမ်း နောက်ဆုတ်သွားပြီး သူ့ဘေးတွင် ဝပ်ကာ အနားယူနေလိုက်၏။

အင်တာနက်သုံးစွဲသူများကတော့ ချက်ချင်းပင် ပျော်ရွှင်သွားကြတော့သည်။

[လောင်ရွှီ... သူ့ကို မကျွေးရင် မင်းကို ပြန်စားသွားမှာ မကြောက်ဘူးလား]

[ရှောင်ဟွာ က အရမ်း စကားနားထောင်တာပဲ]

[ဒီကျားသစ်ကြီးက အရမ်း ချစ်စရာ ကောင်းတာပဲ... မွေးချင်လိုက်တာ]

[ဟုတ်တယ်... အသည်းယားစရာလေး]

ရွှီယန်က အမဲသားခြောက်ကို စားနေရင်း ရေကန်၏ လှပသော ရှုခင်းကို ခံစားနေလိုက်၏။ ရေခဲလွှာက သိပ်မထူသဖြင့် ဖွဖွလေး နင်းလိုက်လျှင်ပင် ကွဲသွားမည် ဖြစ်သည်။

ဤသည်က ရေကန်၏ အပူချိန် ထိုမျှလောက် မနိမ့်ကျကြောင်း သက်သေပြနေခြင်းပင် ဖြစ်၏။ ယနေ့ ရာသီဥတုက ကောင်းမွန်ပြီး ယခုက နေ့လယ် ၁၂ နာရီခွဲ ဖြစ်ရာ အပူချိန်ကလည်း သင့်တော်ပေသည်။

တကယ်ကို ဆောင်းတွင်း ရေကူးရန် အကောင်းဆုံး အချိန်ပင် ဖြစ်၏။

ဆောင်းတွင်းတွင် အချို့လူများက ရေခဲနှင်းပြင်ထဲ၌ ဆောင်းတွင်း ရေကူးလေ့ ရှိကြသည်။ မည်သို့ပင်ဖြစ်စေ ရေခဲနှင့် ရေ ရောနှောနေသော အခြေအနေ၏ အပူချိန်က သုညဒီဂရီ ဝန်းကျင်ခန့်သာ ရှိသဖြင့် ထိုမျှလောက် အလွန်အမင်း အေးစက်နေခြင်း မရှိချေ။

ရွှီယန်က အန္တရာယ် စွန့်ရသည်ကို မနှစ်သက်သဖြင့် ထိုသို့ တစ်ခါမှ မလုပ်ဖူးခဲ့ပေ။

ယခု ရတနာရှာဖွေရန် အတွက်တော့ တစ်ခါလောက် စမ်းသပ် ခံစားကြည့်၍ ရနိုင်ပေသည်။ သေချာသည်မှာ လိုက်ဖ်လွှင့်ခြင်းကိုတော့ ပိတ်ရမည်သာ ဖြစ်၏။

နောက်ဆက်တွဲ သူ လုပ်ဆောင်မည့် ကိစ္စများကို လိုက်ဖ်လွှင့်၍ မရနိုင်ချေ။