အခန်း ၄၅၃

အခန်း။ ၄၅၃

ချန်ကျောက်ရှင်း မိသားစုထံ ပြန်ရောက်လာသည့်ကိစ္စမှာ ပျံ့နှံ့သွား၏။

ချန်ကျောက်ရှင်းက သူ့မှာ ကိုင်တွယ်စရာ ကိစ္စအနည်းငယ် ရှိသေးသည်ဟု ပြောသော်လည်း ချန်ကျီရှင်းထက်ပင် ပါရမီပိုထူးချွန်သည်ဟု သတ်မှတ်ခံထားရသည့် မိသားစု၏ ယခင်ပြိုင်ဘက်ကင်း ပါရမီရှင်တစ်ယောက်အဖြစ် သူ့ပြန်လာမှုကို ဘယ်သူကမျှ မသိအောင် ဖုံးကွယ်ထားလိုခြင်း မရှိပေ။

ချန်မိသားစုအတွင်း၌ပင် ချန်ကျောက်ရှင်း၏ ပါရမီက ချန်ကျီရှင်းထက်ပင် သာလွန်သည်ဟု ကောလာဟလများ ကျယ်ကျယ်လောင်လောင် ရှိခဲ့သည်။

လက်ရှိတွင် ချန်ကျီရှင်းသည် နိဗ္ဗာန်အဆင့် ရှစ်လွှာသို့ ရောက်ရှိနေပြီး အရှေ့ဖျားဒေသ၏ နှစ်တစ်ထောင်အတွင်း အထူးချွန်ဆုံး ပါရမီရှင်အဖြစ် ဂုဏ်သတင်းကျော်ဇောနေသည်။

နှစ်ပေါင်းများစွာ ကြာပြီးနောက်တွင်လည်း ချန်ကျီရှင်းထက် ပါရမီပိုသာသည်ဆိုသော ချန်ကျောက်ရှင်းကကော ထိုမျှလောက် ထူးချွန်နေပါဦးမလားဆိုသည့်မေးခွန်းပင်။

ဤမျှ အရေးပါသည့် ပုဂ္ဂိုလ်တစ်ဦး ချန်မိသားစုထံ ပြန်ရောက်လာခြင်းကို ချန်မိသားစုဝင်များက စိတ်လှုပ်ရှားစွာဖြင့် တောင်ပြောမြောက်ပြော ပြော၍ ဖြန့်ဝေနေကြသည်မှာ ထူးဆန်းသည်မဟုတ်ပေ။

ထိုကြောင့် မယားငယ်ယူရန် အလုပ်ရှုပ်နေသည့် အဘိုးအို ချန်ထျန်လျုံမှာလည်း ထိုင်မနေနိုင်ဘဲ ချက်ချင်း ရောက်လာခဲ့သည်။

တရားကျင့်ကြံနေသည့် မိသားစုအကြီးအကဲ အများအပြားပင် ချန်မိသားစု၏ ပါရမီရှင်ဟောင်းဖြစ်သူနှင့် တွေ့ဆုံရန်အတွက် တရားကျင့်ကြံခြင်းကို ရပ်ဆိုင်း၍ ထွက်လာခဲ့ကြသည်။

သို့သော် ချန်ကျောက်ရှင်းက သူတို့ကို တွေ့ဆုံရန် ငြင်းဆန်လိုက်သည်။

သူသည် ချန်ထျန်ချန်းမှတစ်ဆင့် သူ့၏ လက်ရှိကျင့်ကြံခြင်းမှာ နိဗ္ဗာန်အဆင့်သို့သာ အခုလေးတင် ရောက်ရှိထားသေးပြီး အခြေအနေကို တည်ငြိမ်အောင် အချိန်ယူရဦးမည်ဖြစ်ကြောင်းသာ အကြောင်းကြားခဲ့သည်။

ဤသည်မှာ ချန်မိသားစုအတွက် တကယ်ကို စိတ်ဝင်စားစရာ ကိစ္စတစ်ခု ဖြစ်နေသည်။

ချန်ကျီရှင်းက နိဗ္ဗာန်အဆင့် ရှစ်လွှာရောက်နေပြီး ချန်ကျောက်ရှင်းက နိဗ္ဗာန်အဆင့်ကို အခုမှ စရောက်တာလား။

မိသားစုအကြီးအကဲများက ကောလာဟလများကို ပြန်တွေးမိရင်း စိတ်ထဲတွင် ခံစားချက်များ ရှုပ်ထွေးသွားကြသည်။

"ငါကတော့ ကျောက်ရှင်း အိမ်ပြန်လာပြီဆိုတော့ ထိပ်သီးအဆင့်ကို ရောက်နေပြီ ထင်ထားတာ။ နိဗ္ဗာန်အဆင့်ပဲ ရှိသေးတာကိုး..."

"နိဗ္ဗာန်အဆင့်ဆိုတာလည်း အင်အားကြီးမားတာပါပဲ။ ကျောက်ရှင်းက ကျီရှင်းထက် လေးနှစ်ပိုကြီးပေမဲ့ မိသားစုထဲက တခြားရွယ်တူတွေက စစ်မှန်သောကိုယ်ပိုင်နယ်ပယ်အဆင့်ကိုတောင် မရောက်သေးဘူးလေ။ သူတို့ကို ကြည့်ရင် ကျောက်ရှင်းက ကျွန်တော်တို့ ချန်မိသားစုရဲ့ နဂါးလို့ ခေါ်ဆိုဖို့ ထိုက်တန်ပါတယ်"

"တကယ်ပါပဲ။ အရင်ဆုံး ကျီရှင်း အခု ကျောက်ရှင်း ပြန်လာ။ ဒီခေတ်က ကျွန်တော်တို့ ချန်မိသားစုအတွက် တောက်ပတဲ့ ခေတ်ကာလတစ်ခု ဖြစ်လာဖို့ သေချာနေပါပြီ ဟားဟား"

"တကယ်ပြောရရင် ကျီရှင်းသာ မရှိရင် ကျောက်ရှင်းရဲ့ ပါရမီက တောင်ပိုင်းဒေသမှာ ပြိုင်ဘက်ကင်းမှာပါ။ သန့်ရှင်းသော နယ်မြေတွေက တာအိုကျင့်ကြံသူတွေတောင် ဒီအရွယ်မှာ စစ်မှန်သောကိုယ်ပိုင်နယ်ပယ်အဆင့်ကိုပဲ ရောက်ကြမှာပါ။ သူက ကျွန်တော်တို့ ချန်မိသားစုမှာ မွေးဖွားလာတဲ့ သူတော်စင်ဘုရင်တစ်ပါးပါပဲ"

"ဒါဆို ကျောက်ရှင်းက သူတော်စင်ဘုရင် ဖြစ်ရင် ကျီရှင်းက ဘာဖြစ်မလဲ"

"ဒါကို ဘယ်လိုနှိုင်းယှဉ်လို့ ရမလဲ..."

"တကယ်လည်း နှိုင်းယှဉ်လို့ မရပါဘူး။ ကျီရှင်းရဲ့ ပါရမီက ရှေးခေတ်ကတည်းက ကြားဖူးနားဝ မရှိခဲ့တဲ့အရာပါ။ ဒဏ္ဍာရီထဲက နတ်ဘုရားတွေလောက်ပဲ သူ့နဲ့ တန်းတူ ရှိနိုင်မှာပေါ့ ဟုတ်တယ်မလား"

"တတိယအကြီးအကဲ ခင်ဗျား ပြောတာ လွန်သွားပြီ"

"လုံးဝ မလွန်ဘူး။ ဒီကောက်ချက်က ကျွန်တော်တို့ ချန်မိသားစုရဲ့ သမိုင်းမှတ်တမ်းတွေကို အသေးစိတ် စစ်ဆေးထားတာ။ မှတ်တမ်းတွေအရဆိုရင် နောက်ဆုံးခေတ်က မသေမျိုး ဘုရင်မင်းဆက်မှာတောင် ကျွန်တော်တို့ ချန်ကျီရှင်းလို ပါရမီရှင်မျိုး မရှိခဲ့ဘူး။ မသေမျိုး ဘုရင်အရှင်တောင်မှ အသက် ၂၅ နှစ်ရောက်မှ နိဗ္ဗာန်အဆင့်ကို ရောက်တာ။ တကယ်ပြောရရင် သူကိုယ်တိုင်တောင် ကျွန်တော်တို့ရဲ့ ကျောက်ရှင်းလောက် မတော်ဘူး။ ကျီရှင်းကိုတော့ ပြောစရာမလိုတော့ဘူး"

"အဲဒီလိုလား"

မေးခွန်းထုတ်သူမှာ ဝမ်းမြောက်ဝမ်းသာဖြင့် "ဒါဆိုရင် အနာဂတ်မှာ ကျွန်တော်တို့ ချန်မိသားစုက မသေမျိုး ဘုရင်မင်းဆက်တစ်ခု တည်ထောင်နိုင်မယ့် နေ့တစ်နေ့ ရောက်လာမှာပေါ့။ အနည်းဆုံးတော့ ထာဝရအသက်ရှည်ခြင်း နယ်မြေအထိတော့ မြှင့်တင်နိုင်မှာပဲ"

"ဒါက..."

တတိယအကြီးအကဲက ထိုစကားကို ကြား​သောအခါ သဘောကျစွာ ပြုံးလိုက်သည်။

သူသည် ချန်မိသားစု၏ နဂါးနှစ်ကောင်အပေါ် ယုံကြည်မှု အပြည့်ရှိသော်လည်း ချန်မိသားစု ရင်ဆိုင်နေရသော ယနေ့ကမ္ဘာက အတိတ်က ဧကရာဇ်မင်းမြတ် ရင်ဆိုင်ခဲ့ရသော အခြေအနေမျိုးနှင့် မတူတော့ကြောင်း သူ သိသည်။

...

ချန်ကျောက်ရှင်းသည် အပြင်ဘက်မှ လူများက သူ့ကို မည်သို့ ဖော်ပြနေကြသည်ကို မသိသလို မိသားစုဝင်များက သူ့အပေါ် မည်မျှ မျှော်လင့်ချက် ကြီးမားနေသည်ကိုလည်း မသိပေ။

သူသာ သိခဲ့လျှင် အံ့သြစွာ ပြုံးရုံသာ တတ်နိုင်ပေလိမ့်မည်။

သူ့၏ ကျင့်ကြံခြင်းစွမ်းအားမှာ မည်သို့ ရရှိလာသည်ကို သူ အကောင်းဆုံး သိသည်။

သူသည် ချန်မိသားစု၏ ဘိုးဘေး ထျန်ယွမ် ချန်ရစ်ခဲ့သော ထာဝရအသက်ရှည်ခြင်း အဆင့်အခြေခံကို အသုံးချကာ သူ့ကိုယ်ထဲသို့ ပိုင်ဆိုင်ရန် ကြိုးစားခဲ့သည့် ဝေတုလုံ၏ ဝိညာဉ်အကြွင်းအကျန်ကို ဝါးမြိုလိုက်ခြင်းဖြင့် လက်ရှိအဆင့်သို့ ရောက်လာခြင်းပင်။

သာမန်ဆိုလျှင် ငါးနှစ်အတွင်း သူသည် စစ်မှန်သောကိုယ်ပိုင်နယ်ပယ်အဆင့်မျှသာ ရှိနိုင်ပြီး မသေမျိုး ဘုရင်မင်းဆက်ခေတ်က ဧကရာဇ်မင်းမြတ်နှင့် ယှဉ်ပြိုင်ရန် ဝေးစွ စဉ်းစားပင် စဉ်းစားရဲမည် မဟုတ်ပေ။

သူ မမှတ်မိသော်လည်း သူ့ညီဖြစ်သူမှာမူ တကယ့်ကို ပါရမီရှင်စစ်စစ် ဖြစ်သည်။

သူ့ပါရမီမှာ မည်မျှ ထူးချွန်သလဲဆိုလျှင် မဟာစွမ်းအား ပြန်လည်ဝင်စားသူများတောင် မယှဉ်နိုင်ပေ။

သူသည် ကောင်းကင်တာအို၏ သားသမီးဖြစ်ပြီး ခေတ်ကာလ၏ အချစ်တော် ဖြစ်နေသည်။ ကျင့်ကြံခြင်း လမ်းကြောင်းတွင် အတားအဆီး မရှိရုံသာမက ကျင့်ကြံသည့် အရှိန်နှုန်းမှာလည်း သူ့ကဲ့သို့ ပါရမီရှင်ကိုပင် အမှီမလိုက်နိုင်အောင် ကျော်တက်သွားသည်။

"နိဗ္ဗာန်အဆင့် ရှစ်လွှာ"

လွန်ခဲ့သော တစ်နှစ်ကျော်က ချန်ကျီရှင်းကို နောက်ဆုံးတွေ့ခဲ့စဉ်က သူသည် စစ်မှန်သောကိုယ်ပိုင်နယ်ပယ်အဆင့်ကိုးလွှာတွင်သာ ရှိသေးသည်။

ချန်ကျောက်ရှင်းသည် သူ့ညီကို ဖော်ပြရန် စကားလုံးပင် မရှိတော့ပေ။

ထာဝရအသက်ရှည်ခြင်းအဆင့်ကနေ ပြန်လည်ဝင်စားလာတဲ့သူတွေတောင် သူ့ကို မယှဉ်နိုင်ဘူးဆိုတော့... သူက တကယ်ပဲ လူ့လောကထဲကို ဆင်းသက်လာတဲ့ မသေမျိုး နတ်ဘုရားတစ်ပါး ဖြစ်နေတာလား...

ဤသို့ တွေးမိသောအခါ ချန်ကျောက်ရှင်းသည် ခါးသီးစွာ ပြုံးလိုက်ရုံသာ တတ်နိုင်တော့သည်။ သူသည် ညီဖြစ်သူနှင့် ယှဉ်ပြိုင်ရန် ကြိုးစားနေသည့် အကြံအစည်ကို စွန့်လွှတ်လိုက်ပြီ ဖြစ်သည်။

"အဲဒါထက်... ငါ့ညီက ဘယ်လောက်တောင် မြန်တဲ့ အရှိန်နဲ့ ထိပ်သီးအဆင့်ကို တက်လှမ်းသွားမလဲ...

ထာဝရအသက်ရှည်ခြင်း တာအိုကို အောင်မြင်ဖို့အတွက်ကော နှစ်ပေါင်း ဘယ်လောက်တောင် ကြာဦးမလဲဆိုတာပဲ စောင့်ကြည့်ရတော့မှာပေါ့...ဟူသည်ကိုသာ စိတ်ကူးယဉ်နေမိသည်။

တစ်ချိန်တည်းမှာပင် သူသည် အလွန်သိချင်စိတ် ဖြစ်ပေါ်နေသည်။

"အကယ်၍ မင်းသာ တကယ်ပဲ ဒီလောက်မြန်မြန်နဲ့ ထာဝရအသက်ရှည်ခြင်း တာအိုကို သက်သေပြနိုင်ခဲ့ရင် ဒီခေတ်ကာလမှာ အချိန်အတော်ကြာအောင် ရုန်းကန်နေရတဲ့ လူတွေရဲ့ မျက်နှာပေါ်မှာ ဘယ်လောက်တောင် အံ့အားသင့်စရာကောင်းတဲ့ အမူအရာမျိုးတွေ ပေါ်လာမလဲဆိုတာ တကယ်ကို စိတ်ဝင်စားဖို့ကောင်းတာပဲ..."

...

ချန်ကျောက်ရှင်း အိမ်ပြန်ရောက်သည့်ကိစ္စကို ချန်ကျီရှင်း မသိရှိသေးပေ။

သို့မဟုတ်ပါက သူ မသိဘဲနေမည် မဟုတ်ပေ။

အကြောင်းမှာ သူသည် ယခင်က မိသားစုခေါင်းဆောင် ရာထူးမှ ဆင်းသက်ချိန်တွင် ဘိုးဘေး ထျန်ယွမ်က အရိပ်အမြွက် ပြောပြခဲ့ဖူးသောကြောင့်ပင်။

ဘိုးဘေးထျန်ယွမ်တွင် ချန်ကျောက်ရှင်းကို ပြန်ခေါ်လာနိုင်သည့် စွမ်းရည်ရှိကြောင်း ချန်ကျီရှင်း သိရှိထားသည်။

ဘိုးဘေးထျန်ယွမ်တွင် ထိုသို့သော နည်းလမ်းမျိုး ရှိနေခြင်းမှာ ကောင်းကင်ပင့်ကူအဖွဲ့အစည်းခေါ် မီးခဲအဖွဲ့အစည်းနှင့် ပတ်သက်နေသလားဆိုသည်မှာမူ စဉ်းစားစရာ ဖြစ်သည်။

သူ၏ ဘိုးဘေး ချန်ထျန်ယွမ်မှာ ထိပ်သီးအဆင့်၏ ထိပ်ဆုံးအထိ ရောက်ရှိနေသူဖြစ်သည်။

သူ့တွင် မိတ်ဆွေများမှာ အလွန်ပင် ပေါများလှသည်။

ထာဝရအသက်ရှည်ခြင်း အဆင့်ရှိသော သူငယ်ချင်းများပင် ရှိနေသေးသည်။

ထို့ကြောင့် ကောင်းကင်ပင့်ကူအဖွဲ့အစည်းအတွင်းတွင် တကယ့်အာဏာရှိသူ မိတ်ဆွေအချို့နှင့် တာလျို တာအိုနယ်မြေများတွင် ရင်းနှီးကျွမ်းဝင်သော သူငယ်ချင်းအချို့ ရှိနေခြင်းမှာ သဘာဝကျလှသည်။