အခန်း ၇၄
Vol. 8 Ch. 74
အခန်း ၇၄- ဗီဒီယို။
ယွီချန့်ရန် အပေါ် ကာမကြံစည်ရန် ကြိုးပမ်းရုံမျှဖြင့် ထုံယွမ်ဂိုဏ်း အနေဖြင့် သွေးမြစ်ဂိုဏ်းနှင့် ကျိုးမိသားစုတို့အား စစ်မီးမွှေရန် လုံလောက်မည်မဟုတ်ချေ။
ဤအင်အားစုများကို တစ်ဦးနှင့်တစ်ဦး ရန်သူဖြစ်သွားစေရန် မည်သည့်အရာက စွမ်းဆောင်နိုင်မည်နည်း။
ရုတ်တရက် သူ၏မျက်လုံးများ ဝေ့ဝဲသွားကာ စိတ်ကူးကောင်းတစ်ခု ရရှိသွားခဲ့သည်။
"ငါ့ဆီမှာသာ ပုံရိပ်မှတ်တမ်းတင် ကျောက်စိမ်းပြားရှိရင် သိပ်ကောင်းမှာပဲ။"
ပုံရိပ်မှတ်တမ်းတင် ကျောက်စိမ်းပြားဆိုသည်မှာ အမည်အတိုင်းပင် ကျင့်ကြံခြင်းလောက ၏ ကင်မရာတစ်မျိုးဖြစ်ပြီး ပုံရိပ်များကို သိမ်းဆည်းနိုင်စွမ်းရှိသည်။ ကံဆိုးစွာဖြင့် ဤပစ္စည်းမှာ အလွန်တန်ဖိုးကြီးလှပြီး သူ၏သိုလှောင်အိတ် အတွင်း၌လည်း တစ်ခုမျှမရှိချေ။
ထိုစဉ် သူသည် မိမိ၏ဦးခေါင်းကို ဖြန်းခနဲ ပြင်းထန်စွာ ရိုက်လိုက်မိသည်။ ကျင့်ကြံခြင်းလောကတွင် ကြာမြင့်စွာ နေထိုင်ခဲ့မိသဖြင့် သူ၏အတွေးအခေါ်များမှာ ကျင့်ကြံရေးသမားစတိုင် လုံးလုံး ဖြစ်နေခဲ့ချေပြီ။
သူ၏ထံတွင် ပုံရိပ်မှတ်တမ်းတင် ကျောက်စိမ်းပြားမရှိသော်လည်း မိုဘိုင်းဖုန်း ရှိနေသည်မဟုတ်ပါလော။
ပုံရိပ်မှတ်တမ်းတင် ကျောက်စိမ်းပြားအချို့နှင့် နှိုင်းယှဉ်ပါက မိုဘိုင်းဖုန်းမှာ များစွာပို၍ အဆင်ပြေရုံမက စွမ်းအင်ကုန်ဆုံးမှုလည်း မရှိသလောက်ပင် ဖြစ်သည်။
သူသည် ထိုကျောက်စိမ်းပြား သို့မဟုတ် မိုဘိုင်းဖုန်းကို မည်သည့်အတွက်ကြောင့် အသုံးပြုလိုသနည်းဆိုသော် သဘာဝကျကျပင် ပုံရိပ်များကို ဗီဒီယိုရိုက်ကူးရန် ဖြစ်သည်။
သူသည် အလွန်ယုတ်မာကောက်ကျစ်သော အစီအစဉ်တစ်ခုကို ကြံစည်လိုက်သည်။ စင်စစ် မိမိကိုယ်မိမိ ပြန်လည်သုံးသပ်ကြည့်လျှင်ပင် ယုတ်မာကောက်ကျစ်ခြင်းဆိုသည့် စကားလုံးမှာ အလွန်ကိုက်ညီလှသည်ဟု ခံစားရသည်။
ဤအပြုအမူမှာ ကြင်နာသနားမှုကင်းမဲ့ပြီး နာကျည်းမှုကို ဖြစ်ပေါ်စေနိုင်ရုံမက ကိုယ်ကျင့်တရားပိုင်းဆိုင်ရာ ဝေဖန်ပြစ်တင်မှုများကိုပင် ဖိတ်ခေါ်ရာရောက်နိုင်သည်။
သို့သော်ငြားလည်း ဤနေရာမှာ ကျင့်ကြံခြင်းလောက ဖြစ်သည်။
သွေးမြစ်ဂိုဏ်းနှင့် ကျိုးမိသားစုတို့သည် ဝေ့မိသားစု ကို အလုံးစုံပျက်စီးလုနီးပါး ဖြစ်အောင် ပြုလုပ်ခဲ့ကြချေပြီ။ သူ၏မိသားစုအတွက် ကလဲ့စားချေရမည်သာ ဖြစ်သည်။ ကြင်နာမှု ရှိသည်ဖြစ်စေ မရှိသည်ဖြစ်စေ ထူးခြားသော အခြေအနေများတွင် ထူးခြားသော နည်းဗျူဟာများကိုသာ အသုံးပြုရမည် ဖြစ်သည်။
သူသည် ယခုဖြစ်ပျက်နေသောအရာများကို ဗီဒီယိုရိုက်ကူးပြီးနောက် အရပ်ရပ်သို့ ဖြန့်ဝေပစ်မည်ဖြစ်သည်။
မိုဘိုင်းဖုန်းသည် လူတစ်ဦး၏ စိတ်ဝိဉာဥ် အတွင်း၌ ပေါင်းစပ်တည်ရှိနေပြီး စိတ်ဝိဉာဥ်နှင့် လက်တွေ့လောကတို့အကြား ချိတ်ဆက်မှုကို ကျောက်စိမ်းပြားများဖြင့် ပြုလုပ်လေ့ရှိသည်။
ဥပမာအားဖြင့် စိတ်ထဲရှိ ကျင့်စဉ်များကို စိတ်ဝိဉာဥ်မှတစ်ဆင့် ကျောက်စိမ်းပြားပေါ်သို့ မှတ်တမ်းတင်နိုင်သကဲ့သို့ ဖြစ်သည်။ ပုံရိပ်မှတ်တမ်းတင် ကျောက်စိမ်းပြားသည်လည်း အဆုံးစွန်၌ ကျောက်စိမ်းပြား အမျိုးအစားတစ်ခုသာ ဖြစ်သဖြင့် သူ၏မိုဘိုင်းဖုန်းအတွင်းရှိ အချက်အလက်များကို အခြားသူများ မြင်တွေ့နိုင်ရန် ပုံရိပ်မှတ်တမ်းတင် ကျောက်စိမ်းပြားတစ်ခုချင်းစီအတွင်းသို့ မှတ်တမ်းတင် ဖြန့်ဝေနိုင်ပေသည်။
အတိုချုပ်ဆိုရလျှင် သူ၏အစီအစဉ်မှာ ကျိုးကျုံးနှင့် ရှောင်ယီတို့ ယွီချန့်ရန်ကို စော်ကားဖျက်ဆီးနေသည့် မြင်ကွင်းကို ရိုက်ကူးကာ လူသိရှင်ကြား ဖြန့်ဝေပစ်ရန် ထုံယွမ်ဂိုဏ်းကို အရှက်တကွဲ ဖြစ်စေရန် သူတို့၏ မိုးကြိုးဆန်သော ဒေါသကို ဆွပေးရန်နှင့် သွေးမြစ်ဂိုဏ်း ကျိုးမိသားစုတို့နှင့် စစ်ဖြစ်လာအောင် ဖိအားပေးရန် ဖြစ်သည်။
ဤအစီအစဉ်မှာ တကယ့်ကို ယုတ်မာကောက်ကျစ်လှသည်ဟု ဆိုရပေမည်။
ဝေ့ဝူ ဆုံးဖြတ်ချက်ချပြီးသည်နှင့် သူ၏အကြည့်များမှာ ပိုမိုအေးစက်သွားပြီး ယွီချန့်ရန်ကို ကယ်တင်ရန် ကနဦးရည်ရွယ်ချက်မှာလည်း အစအနပင် မကျန်တော့ချေ။
သူသည် စိတ်ထဲတွင်သာ ဟန်ဆောင်ပန်ဆောင် အနူးအညွတ် တောင်းပန်လိုက်မိသည်။
သူသည် အမှောင်ရိပ်ထဲမှ ချောင်းမြောင်းရင်း သူ၏ရှေ့တွင် ဖြစ်ပျက်နေသမျှကို မြင်တွေ့နေရကာ မိုဘိုင်းဖုန်းအတွင်း၌ အကုန်သိမ်းဆည်းလိုက်သည်။
ရှေ့ရှိ အလင်းရောင်မှာ ကွက်တိဖြစ်နေသဖြင့် အရာအားလုံးကို အလွန်ရှင်းလင်းစွာ မြင်တွေ့နေရသည်။ ဖော်ပြရန်ခက်ခဲသော အသံများမှာလည်း ရှင်းလင်းစွာ ထွက်ပေါ်နေပြီး အတူတကွ မှတ်တမ်းတင်ခြင်း ခံလိုက်ရသည်။
တစ်စုံတစ်ခုသော အကြောင်းပြချက်ကြောင့် ဤမြင်ကွင်းမှာ အလွန်တရာ ကာမရာဂဆန်လှပြီး အထူးသဖြင့် ယွီချန့်ရန်မှာ လူ့လောက၏ ထိပ်တန်းအလှမယ်တစ်ဦး ဖြစ်နေသော်လည် ဝေ့ဝူသည် အသက် တစ်ဆယ့်ရှစ်နှစ် အရွယ်သို့ ရောက်ရှိနေပြီဖြစ်ကာ ယနေ့ထက်ထိ အမျိုးသားနှင့် အမျိုးသမီးအကြား ဆက်ဆံရေးကို မကြုံတွေ့ဖူးသေးသဖြင့် စိတ်လှုပ်ရှားကာ ဂယောက်ဂယက် ဖြစ်နေသင့်သော်လည်း သူ၏မျက်လုံးများထဲတွင်မူ အေးစက်မှုသာ ရှိနေခဲ့သည်။
အများဆုံးတွေ့နိုင်သည်မှာ သတ်ဖြတ်လိုသော အငွေ့အသက်အချို့သာဖြစ်ပြီး ၎င်းမှလွဲ၍ မသင့်တော်သော အတွေးအခေါ် တစ်စုံတစ်ရာမျှ မရှိချေ။
...
တစ်နာရီခန့် ကြာပြီးနောက် ကျိုးကျုံးနှင့် ရှောင်ယီတို့သည် အဝတ်အစားများ ပြန်လည်ဝတ်ဆင်ပြီးသွားခဲ့ကြပြီ။ ယွီချန့်ရန်မှာမူ ဖော်ပြ၍မရနိုင်သော အခြေအနေမျိုးဖြင့် မြေပြင်ပေါ်တွင် လဲလျောင်းနေခဲ့သည်။
ကျိုးကျုံးက စိတ်ကျေနပ်စွာဖြင့် စကားစလိုက်သည်။
"ညီအစ်ကို ရှောင်ယီ ဒီမိန်းမကတော့..."
သူ၏စကားမဆုံးမီမှာပင် ရှောင်ယီသည် လက်ညှိုးနှင့်လက်ခလယ်ကို ဆန့်ထုတ်လိုက်ရာ ငွေရောင်အလင်းတန်းတစ်ခု ဖြာထွက်သွားခဲ့သည်။
ကျိုးကျုံးနှင့် ပုန်းကွယ်နေသော ဝေ့ဝူတို့ သတိမပြုမိခင်မှာပင် ငွေအပ်တစ်ချောင်းသည် ယွီချန့်ရန်၏ နဖူးအလယ်ဗဟိုသို့ စိုက်ဝင်သွားခဲ့ပြီး သူမ၏ အသက်လက္ခဏာ အားလုံး ချုပ်ငြိမ်းသွားခဲ့ချေပြီ။
ကျိုးကျုံး အံ့ဩမသွားမီမှာပင် ရှောင်ယီသည် သူ၏လက်ညှိုးကို ကွေးလိုက်ရာ ငွေအပ်မှာ ပြန်လည်ပျံသန်းလာခဲ့သည်။ သူသည် လျှာကို ဆန့်ထုတ်ကာ အပ်ပေါ်ရှိ အနီရောင်အရာဝတ္ထုကို ဂရုတစိုက် လျက်လိုက်သေးသည်။
ကျိုးကျုံးသည် အတန်ကြာ ဆွံ့အသွားပြီးမှ စကားတစ်လုံးကို ဖြည်းဖြည်းချင်း ညှစ်ထုတ်လိုက်သည်။
"မိုက်တယ်။"
ထိုအချိန်တွင် ကျောက်နံရံနောက်ကွယ်ရှိ ဝေ့ဝူသည် နှလုံးသားထဲ၌ အေးစက်မှုကို ခံစားလိုက်ရသည်။ ရှောင်ယီသည် တကယ့်ကို စိတ်မမှန်သော စိတ်ဝေဒနာရှင်တစ်ဦး ဖြစ်ပေသည်။
ယွီချန့်ရန်ကို စော်ကားပြီးနောက်တွင် သူမကိုပါ သတ်ပစ်ခဲ့သည်။ ဤမြင်ကွင်းတစ်ခုလုံးကို ဝေ့ဝူက အပြည့်အဝ မှတ်တမ်းတင်ထားခဲ့ပြီး ဖြစ်သည်။
ဗီဒီယိုဖိုင်တစ်ခုသည် သူ၏မိုဘိုင်းဖုန်းအတွင်း၌ အဆင်သင့် သိမ်းဆည်းထားပြီး ဖြစ်သည်။
သူသည် ဤဗီဒီယိုကို အရပ်ရပ်သို့ ကျယ်ကျယ်ပြန့်ပြန့် ဖြန့်ဝေလိုက်ရုံဖြင့် ထုံယွမ်ဂိုဏ်းသည် အရှက်တကွဲ ဖြစ်သွားမည်ဖြစ်ပြီး ဂိုဏ်း၏ အဆင့်မြင့်အရာရှိကြီးများမှာလည်း အလွန်အမင်း ဒေါသထွက်ကြမည်မှာ သေချာလှသည်။
သူတို့၏ နှစ်ပေါင်းရာချီသော ကျင့်ကြံမှုများနှင့် ငြိမ်းချမ်းရေးကို ဦးစားပေးတတ်သော အလေ့အထ ရှိသော်လည်း သွေးမြစ်ဂိုဏ်းနှင့် ကျိုးမိသားစုကို တိုက်ခိုက်ခြင်းမပြုဘဲ အောင့်အီးထားနိုင်ကြလိမ့်မည် မဟုတ်ချေ။
ဗီဒီယိုကို ရရှိခဲ့ပြီဖြစ်ကာ ယွီချန့်ရန်လည်း သေဆုံးသွားခဲ့ပြီ။ ကျိုးကျုံးနှင့် ရှောင်ယီတို့မှာမူ ထိုအတွေ့အကြုံကို အရသာခံရင်း လုံးဝ စိတ်အေးလက်အေး ရှိနေကြဆဲ ဖြစ်သည်။
သို့သော် ဝေ့ဝူသည် နောက်ဆုံးတွင် သူ၏ အစွယ်များကို ထုတ်ပြတော့မည် ဖြစ်သည်။
ယခုအချိန်တွင် သူက အမှောင်ထဲ၌ရှိပြီး ပြိုင်ဘက်များမှာမူ အလင်းထဲတွင် ရှိနေကာ သတိလက်လွတ် အခြေအနေသို့ ရောက်ရှိနေကြသည်။ ဝေ့ဝူသည် သေစေနိုင်သော ထိုးနှက်ချက်တစ်ခုကို ရှာဖွေနေခဲ့သည်။
ဘယ်အချိန်ကတည်းက ရောက်နေသည်မသိရဘဲ သူ၏လက်ထဲတွင် ဖဲချပ်လေးချပ် ပေါ်လာခဲ့သည်။
သေချာစွာ စိုက်ကြည့်လိုက်လျှင် ၎င်းတို့မှာ... နံပါတ်၃လေးချပ်တစ်လုံးဖြစ်နေသည်။
"ငါ့မိသားစုအတွက်သွေးမြစ်ဂိုဏ်းနဲ့ ကျိုးမိသားစုအပေါ် ကလဲ့စားချေတာကို မင်းတို့နှစ်ယောက်နဲ့ပဲ စတင်ရတာပေါ့။"
သူသည် နံပါတ်၃လေးချပ်ကို အပြင်သို့ ဝှေ့ယမ်းပစ်လိုက်သည်။
ထို့ပြင် ၎င်းတို့ကို ကျောက်စိမ်းကို ဆွဲဆောင်ရန် ကျောက်ခဲဖြင့် ပစ်ပေါက်ခြင်း အတတ်ပညာနှင့် ပိုမိုအားဖြည့်လိုက်သည်။
ချက်ချင်းပင် ရွှေရောင်အလင်းတန်းများ လျှံထွက်လာခဲ့ပြီး ဝေ့ဝူ၏ မျက်လုံးများကို တောက်ပသွားစေခဲ့သည်။ တစ်ချိန်တည်းမှာပင် ဝေ့ဝူ၏ ခန္ဓာကိုယ်အတွင်းရှိ စိတ်ဝိဉာဥ်ချီများမှာလည်း လုံးဝ ခန်းခြောက်လုနီးပါး ဖြစ်သွားခဲ့ရသည်။
ဖဲချပ်လေးချပ်မှာ သီးခြားစီ ဖြစ်နေပုံရသော်လည်း အမှန်တကယ်တွင် တစ်ခုတည်းဖြစ်ပြီး ထိတ်လန့်ဖွယ် စိတ်ဝိဉာဥ်ချီများကို အလွန်သေးငယ်သော ဧရိယာတစ်ခုအတွင်းသို့ ဖိသိပ်ကာ သာမန်မျက်စိဖြင့် မမြင်နိုင်သော အရှိန်နှုန်းဖြင့် ထိုလူနှစ်ဦးထံသို့ တည့်တည့် ပစ်လွှတ်လိုက်တော့သည်။
ကျိုးကျုံးနှင့် ရှောင်ရီတို့သည် တစ်နာရီလုံးလုံး ပျော်ပါးထားခဲ့ကြသဖြင့် ယခုအချိန်တွင် ခန္ဓာကိုယ်များ ပျော့ခွေကာ ယွီချန့်ရန်၏ အလောင်းပေါ်သို့ ခြေထောက်များကို တင်၍ နားနေကြခြင်း ဖြစ်သည်။
ရုတ်တရက်။
သူတို့၏ အမွေးအမှင်များ ထောင်ထလာခဲ့ပြီး ပြင်းထန်သော ထိတ်လန့်ကြောက်ရွံ့မှုများက သူတို့၏ နှလုံးသားကို ချက်ချင်း လွှမ်းမိုးသွားခဲ့ရာ သူတို့၏ သွေးများပင် ရပ်တန့်သွားသကဲ့သို့ ခံစားလိုက်ရသည်။
အသိစိတ်၏ တွန်းအားကြောင့်ပင် နှစ်ဦးစလုံးသည် တစ်ပြိုင်နက်တည်း သူတို့၏ အကောင်းဆုံးသော ကာကွယ်ရေးလျှို့ဝှက်လက်နက်များကို ထုတ်သုံးလိုက်ကြသည်။
"ဒုန်းးး"
ကမ္ဘာပျက်မတတ် ကျယ်လောင်လှသည်မဟုတ်သော်လည်း ကြားရုံမျှဖြင့် အတိုင်းအဆမရှိသော စွမ်းအင်များကို သိရှိနိုင်သည့် ပေါက်ကွဲသံတစ်ခုသည် ကျောက်ခန်းမကြီးအတွင်း၌ ပေါက်ကွဲသွားခဲ့သည်။
ရွှေရောင်အလင်းတန်းမှာ နေမင်းကြီးကဲ့သို့ တောက်ပလှသည်။ ဖော်ပြရမည်ဆိုလျှင် ဝေ့ဝူ စိတ်ထဲတွင် မြင်ယောင်ဖူးသော နျူကလီးယားပေါက်ကွဲမှု မြင်ကွင်းသည် ယခုဖြစ်ပျက်နေသောအရာနှင့် အကိုက်ညီဆုံး ဖြစ်ပေလိမ့်မည်။
"ဝေါ့"
ရှောင်ယီနှင့် ကျိုးကျုံးတို့သည် သွေးများ အန်ထုတ်လိုက်ကြရသည်။ ရွှေရောင်အလင်းတန်းများ ပျောက်ကွယ်သွားသောအခါ ဝေ့ဝူ၏ မျက်နှာထက်တွင် ရက်စက်ကြမ်းကြုတ်သော အမူအရာတစ်ခု ထပ်မံဖုံးလွှမ်းသွားခဲ့သည်။
ဒီကောင်နှစ်ကောင်က တကယ်ပဲ မသေဘူးပေါ့။
သူ သဘာဝကျကျပင် မသိရှိခဲ့သော်လည်း ရှောင်ယီနှင့် ကျိုးကျုံးတို့မှာ ပို၍ပင် ထိတ်လန့်တုန်လှုပ်နေခဲ့ကြသည်။ သူတို့ ယခုလေးတင် ထုတ်သုံးလိုက်သောအရာများမှာ သူတို့၏ သက်ဆိုင်ရာ အကြီးအကဲများက ပေးသနားထားခဲ့သော တစ်ခါမျှ အသုံးမပြုဖူးသေးသည့် အသက်ကယ်ပစ္စည်းများ ဖြစ်ကြသည်။
သို့သော် ဤရွှေရောင်အလင်းတန်း တိုက်ခိုက်မှုသည် ထိုရတနာနှစ်ခုကို တိုက်ရိုက်ဖျက်ဆီးပစ်ရုံမက ၎င်းတို့ကို ပြင်းထန်စွာ ဒဏ်ရာရရှိစေရန်အတွက်ပါ လုံလောက်သော အကြွင်းအကျန်စွမ်းအင်များ ရှိနေသေးသည်။
ဒါက... စိတ်ကူးကြည့်ရန်ပင် ခက်ခဲလှသည်။
ထျန်ရှင်းတောင်အတွင်းရှိ လူတိုင်းမှာ မန်ရှင်းအဆင့် ၃ အောက်တွင်သာ ရှိကြသည်။ မည်သူကများ ဤမျှ စွမ်းဆောင်နိုင်မည်နည်း။ရွှေရောင်အလင်းတန်းမှာ အလွန်စူးရှလွန်းသဖြင့် သူတို့သည် ဖဲချပ်များ ရှိနေသည်ကိုပင် မမြင်လိုက်ရချေ။
"ဘယ်သူလဲ ဘယ်သူက ငါတို့နှစ်ယောက်ကို တိုက်ခိုက်ရဲရတာလဲ။"
"သေစမ်း။"
သူတို့ကို ပြန်လည်ဖြေကြားလိုက်သည်မှာ သစ်သီးလှီးဓားတစ်ချောင်း ဖြစ်သည်။ ပထမအကြိမ် တိုက်ခိုက်မှုက သူတို့ကို မသတ်နိုင်ခဲ့သည်ကို မြင်သောအခါ ဝေ့ဝူသည် ပြတ်သားစွာဖြင့် ထပ်မံတိုက်ခိုက်လိုက်ခြင်း ဖြစ်သည်။
သစ်သီးလှီးဓား ဦးတည်လာသောနေရာတွင် ကျိုးကျုံးနှင့် ရှောင်ရီတို့၏ သွေးများမှာ ထပ်မံ၍ ခဲရင်သွားပြန်သည်။
၎င်းမှာ အဆုံးစွန်အထိ ရက်စက်လှသည်။ တိုက်ခိုက်မှုနှစ်ခုကြားတွင် အနည်းငယ်မျှပင် ကွာဟချက်မရှိချေ။ တစ်ဖက်လူ၏ သတ်ဖြတ်လိုသော စိတ်ဆန္ဒမှာ မည်မျှအထိ ပြင်းထန်နေရသနည်း။ သူတို့ကို မည်သူက ဤမျှ ကြီးမားသော ရန်ငြိုးများ ရှိနေရတာလဲ။
"သခင်လေးးး။"
ကွက်တိ ထိုအချိန်မှာပင် ညာဘက်ရှိ ကျောက်လမ်းကြောင်းတစ်ခုမှ အနက်ရောင်အလင်းတန်း နှစ်ခု ပျံသန်းလာခဲ့ပြီး ကျိုးကျုံး၏ ရင်ဘတ်ရှေ့ သုံးလက်မအကွာတွင် သစ်သီးလှီးဓားနှင့် တိုက်မိသွားခဲ့သည်။
ထိုအနက်ရောင်အလင်းတန်းမှာ အင်းစာရွက်တစ်ရွက် ဖြစ်သည်။
၎င်းသည် သစ်သီးလှီးဓားနှင့် ထိမိသည်နှင့်တစ်ပြိုင်နက် သစ်သီးလှီးဓားကို လွှမ်းခြုံထားသော ပျစ်ချွဲသည့် အနက်ရောင်ရေထုအဖြစ်သို့ ချက်ချင်းပြောင်းလဲသွားကာ ၎င်း၏အရှိန်ကို သိသိသာသာ လျော့ကျသွားစေပြီး စွမ်းအားကို အားနည်းသွားစေခဲ့သည်။
ရှောင်ယီ၏ ရှေ့တွင်လည်း ထိုနည်းအတိုင်းပင် ဖြစ်ပွားခဲ့သည်။
လှုပ်ရှားမှုများစွာ ဖြစ်ပျက်ခဲ့ပုံရသော်လည်း လက်တွေ့တွင်မူ အားလုံးမှာ တစ်စက္ကန့်အတွင်း၌သာ ဖြစ်ပျက်ခဲ့ခြင်း ဖြစ်သည်။
မျက်တောင်တစ်ချက်ခတ်ရုံမျှဖြင့် ထိုဖြစ်စဉ်တစ်ခုလုံး ပြီးဆုံးသွားနိုင်သည်။ သစ်သီးလှီးဓား၏ စွမ်းအားမှာ အလွန်နိမ့်ကျသော အဆင့်သို့ လျော့နည်းသွားခဲ့ပြီး အင်းစာရွက်ကြောင့် ဖြစ်ပေါ်လာသော အနက်ရောင်ရေများမှာလည်း လုံးလုံးလျားလျား ခန်းခြောက်သွားကာ နောက်ဆုံးတွင် လုံးဝကွယ်ပျောက်သွားခဲ့သည်။
ယခုအချိန်တွင် သစ်သီးလှီးဓား၏ နောက်ဆုံးအကြွင်းအကျန် အားမာန်သည် သူတို့၏ ရင်ဘတ်ရှေ့တွင် ညင်သာစွာ ပေါက်ကွဲသွားခဲ့သည်။
"ဝေါ့"
ကျိုးကျုံးနှင့် ရှောင်ယီတို့၏ အဝတ်အစားများပေါ်တွင် တစ်လက်မပတ်လည် အရွယ်အစားရှိ အပေါက်တစ်ပေါက် ထွက်ပေါ်လာခဲ့သည်။
"ဒီလောက်တောင် စွမ်းအားတွေကို အာနိသင်ပျယ်အောင် လုပ်လိုက်တာတောင် ငါ့ရဲ့ ကာကွယ်ရေးအဝတ်အစားကို ဖောက်ထွက်နိုင်သေးတယ်ပေါ့။"
ကျိုးကျုံးသည် အလွန်တရာ ထိတ်လန့်တုန်လှုပ်သွားခဲ့ရသည်။
အကယ်၍ ဤအရာသည် သူ၏ခန္ဓာကိုယ်ပေါ်သို့ တည့်တည့်ကျရောက်ခဲ့မည်ဆိုပါက သူ့ကို ငါးကြိမ်မက သတ်ပစ်ရန် လုံလောက်သည်ထက် ပိုနေပေလိမ့်မည်။