အခန်း ၈၉

အခန်း ၈၉ - ကစားစရာ သုံးမျိုး။

ဝေ့ကျင်းပေါ်က အရှေ့ဘက် အရပ်မျက်နှာမှ အရေးကိစ္စများအတွက် စိုးရိမ်ပူပန်နေချိန်တွင် ဝေ့ဝူသည် လျူမိသားစု နေအိမ်သို့ ရောက်ရှိနေခဲ့သည်။ သူသည် စိတ်ကျန်းမာရေး ဆေးဝါး ၆ မျိုးလုံးမှ ဆေးအနည်းငယ်စီနှင့်အတူကျောက်ကပ်အားဆေးတို့ကို ထုတ်ယူကာလျူရှုယွီအား စစ်ဆေးကြည့်ရန် ပေးအပ်လိုက်သည်။

"ဝေ့ဝူ... တခြား ဆေးနှစ်မျိုးက ကိုင်တွယ်ရလွယ် ပေမဲ့ စိတ်၀ိဉာဉ်အတွက် သုံးတဲ့ ဒီဆေးလုံးတွေကမန်ရှင်း မှာ သုံးတဲ့အရာတွေ ဒါမျိုးတွေကို ပုံမှန်အားဖြင့် အဆင့် ၃ ဆေးဆရာတွေပဲ သုတေသနလုပ်ကြတာ မင်း ငါ့ကို တကယ် အကျပ်ရိုက်အောင် လုပ်တာပဲ။"

"ဒါတွေက သာမန် စိတ်၀ိဉာဉ်ဆေးလုံးတွေ မဟုတ်ပါဘူး​ စမ်းကြည့်ရုံပဲ စမ်းကြည့်ပေးပါ။"

ဝေ့ဝူသည် ဆေးဝါးများနှင့် ပတ်သက်သည့် အချက်အလက်များကို သိရှိရန်အတွက် စနစ် ကို အသုံးမပြုချင်ပေ။ ထိုသို့ပြုလုပ်ပါကမသေမျိုးဂူဖွင့်လှစ်မည့် အချိန်ကို ပိုမို ကြာမြင့်စေမည် ဖြစ်သောကြောင့် ဖြစ်သည်။

သာမန်အခြေအနေတွင် ပြဿနာမရှိသော်လည်း အဓိကအချက်မှာ သူသည် ရွှီချင်းချန်နှင့် နှစ်လနှင့် ငါးရက်အကြာတွင် မိဘများထံ ပြန်လည်ကန်တော့ရန် ကတိပြုထားပြီးသား ဖြစ်သည်။ အကယ်၍ အချိန်ကြန့်ကြာသွားပါက သူ၏ မိဘများ ရက်အနည်းငယ်မျှ ပိုမိုပူပန်ရမည် ဖြစ်သည်။

ဤဆေးဝါးများ၏ လမ်းညွှန်ချက် စာသားများနှင့် ပတ်သက်၍မူ ကျင့်ကြံခြင်းလောကသို့ ရောက်ရှိလာပြီးနောက် မည်သည့်အချက်အလက်မှ ပြောင်းလဲခြင်း မရှိသဖြင့် လုံးဝ အသုံးမဝင်တော့ချေ။

ဥပမာအားဖြင့် ကွန်ပေါင်း စီရီဘရိုပရိုတင်း ဟိုက်ဒရိုလိုင်ဆိတ် ဆေး၏ ညွှန်ကြားချက်တွင်

၎င်းသည် ဦးနှောက်အတွက် သီးသန့်ဖြစ်သော အာရုံကြောအာဟာရ ဖြစ်သည်။ ဗဟိုအာရုံကြောစနစ်အပေါ် နည်းလမ်းမျိုးစုံဖြင့် သက်ရောက်နိုင်ကာ ဆဲလ်များ၏ ဇီဝကမ္မဖြစ်စဉ်ကို ထိန်းညှိမြှင့်တင်ပေးခြင်း အာရုံခံဆဲလ်ချိတ်ဆက်မှု ဖြစ်ပေါ်ခြင်းကို အားပေးခြင်းဆဲလ်များ ကြီးထွားကွဲပြားခြင်းကို လှုံ့ဆော်ပေးခြင်းနှင့် ဆဲလ်များကို သွေးအားနည်းခြင်းနှင့် အဆိပ်သင့်ခြင်း အမျိုးမျိုးမှ ကာကွယ်ပေးနိုင်သည်ဟု ရေးသားထားသည်။

ဝေ့ဝူသည် ထိုအထဲမှ စကားလုံး အနည်းငယ်ကိုသာ ကောက်နုတ်လိုက်သည်။

ဆဲလ်များကို ကာကွယ်ပေးသည်။

၎င်းသည် ထိုစဉ်က ဝေ့ဝူကကျိုးထုံကွမ်အား အာရုံကြောများကို ကာကွယ်ပြုပြင်ပေးနိုင်သည့် ဆေးဝါးအချို့ ယူဆောင်လာရန် တောင်းဆိုခဲ့သည့် အချက်နှင့် ကိုက်ညီနေသည်။

ထို့ကြောင့် ဤလောကတွင် ဆေးညွှန်းစာသားများသည် အသုံးမဝင်တော့ပေ။

သို့မဟုတ်ပါက ကျင့်ကြံခြင်းလောကသို့ ရောက်ရှိလာချိန်တွင် ညွှန်ကြားချက်စာသားများက သက်ဆိုင်ရာ ရတနာများ၏ ဖော်ပြချက်အဖြစ် အလိုအလျောက် ပြောင်းလဲသွားမည်ဆိုလျှင် ဝေ့ဝူအနေဖြင့် ကမ္ဘာမြေတွင် ရှိနေစဉ်ကတည်းက မိမိဘာသာ လမ်းညွှန်ချက်များ ရေးသားလာခဲ့ရုံသာ ရှိပြီး စနစ်ကို လုံးဝ အားကိုးနေစရာ လိုမည်မဟုတ်ချေ။

စိတ်ကျန်းမာရေးဆေးဝါးများ ကိစ္စကို စီစဉ်ပြီးနောက် သူသည် လျူရှုယွီအား ပေါက်စီကို ကျွေးလိုက်သည်။ လျူရှုယွီသည် ငြင်းဆန်ခြင်းမရှိဘဲ လွယ်လွယ်ကူကူပင် စားလိုက်သည်။

ပေါက်စီ နှစ်လုံး စားပြီးနောက်တွင် လျူရှုယွီ၏ ကျင့်ကြံခြင်းအဆင့်သည် ချီသန့်စင်ခြင်းအဆင့်၉ ၏ အနက်ရှိုင်းဆုံး အပိုင်းသို့ ရောက်ရှိသွားခဲ့သည်။

ဝေ့ဝူခေတ္တမျှ စဉ်းစားပြီးနောက် တတိယမြောက် ပေါက်စီကို မပေးရန် ဆုံးဖြတ်လိုက်သည်။ သူ၏ အတွေ့အကြုံအရ တတိယမြောက်လုံး၏ အာနိသင်မှာ အလွန်အမင်း ကန့်သတ်ချက်ရှိသွားမည် ဖြစ်သဖြင့် ဖြုန်းတီးရာ ရောက်လိမ့်မည် ဖြစ်သည်။

ပြင်ပလူများကိုမူ လျူရှုယွီက သူသည် ကံကောင်းထောက်မစွာဖြင့် ဝိညာဉ်ဆေးဝါးတစ်မျိုးကို စားသုံးမိခဲ့၍ အဆင့်တက်လှမ်းနိုင်ခဲ့ခြင်း ဖြစ်ကြောင်းသာ ပြောဆိုခဲ့သည်။

"ကျင့်ကြံသူတွေရဲ့ အဆင့်ကို တစ်ပြိုင်နက်တည်း အများကြီး မြှင့်တင်ပေးနိုင်တဲ့အရာမျိုး ရှိလား။"

ဝေ့ဝူကမေးမြန်းလိုက်သည်။

"ဒဏ္ဍာရီလာ ဗောဓိသီး သုံးမျိုးကတော့ လုပ်နိုင်တယ်ဗျ။ ဗောဓိသီး သုံးမျိုးဟာ ကောင်းကင်အထက် မိုင်ပေါင်းသောင်းချီ အကွာအဝေးမှာ အမြစ်လည်းမရှိ အဖူးလည်းမထွက်ဘဲ လေဟာနယ်ထဲမှာတင် ဒီအတိုင်း အလိုအလျောက် သီးပွင့်လာတာလို့ ပြောကြတယ်။"

"​ညဉ့်ဦးယံမှာ အသီးတစ်လုံး၊ သန်းခေါင်ယံမှာ နှစ်လုံး၊ မိုးသောက်ယံမှာ လေးလုံး... အဲဒီလိုနဲ့ မိုးချုပ်ယံရောက်တဲ့အခါ ၄၀၉၆ လုံးအထိတောင် အဆမတန် သီးပွင့်လာတတ်တယ်။"

"အကယ်၍ ညဉ့်ဦးယံမှာ ခူးယူရင် မန်ရှင်းအဆင့် ၉ ကနေ လင်းထိုင်အဆင့်ကို တိုက်ရိုက် ပေါက်ကွဲထွက် အဆင့်တက်စေနိုင်တယ်။ အကယ်၍ သန်းခေါင်ယံမှာ ခူးယူရင် အဆင့်၈ က လူနှစ်ယောက်ကို အဆင့် ၉ သို့ တက်လှမ်းစေနိုင်ပြီး မိုးသောက်ယံမှာဆိုရင်အဆင့်၇ က လူလေးယောက်ကို..."

ဝေ့ဝူသည် စိတ်ထဲကနေ အကယ်၍ အဖေသာ တကယ်ပဲ အကြောင်းပြချက် ရှာမရတော့ရင် ဒီအသီးအကြောင်းကို ဆင်ခြေတစ်ခုအနေနဲ့ သုံးလို့ရတာပဲဟု တွေးလိုက်သည်။

ယွီဒင်းတောင်သို့ အပြန်လမ်းတွင် ဝေ့ဝူတစ်ယောက် စိတ်လှုပ်ရှားစွာဖြင့် သက်ပြင်းမချဘဲ မနေနိုင်ခဲ့ချေ။

ဤလောကတွင်လည်း အံ့ဩဖွယ်ရာ ကောင်းသောအရာများစွာ ရှိနေသည်ပင်။ ​ဥပမာအားဖြင့် ဗောဓိသီး သုံးမျိုးသည်လူပေါင်း ၂၅၆ ယောက်၏ အဆင့်ကို တိုက်ရိုက် မြှင့်တင်ပေးနိုင်ပြီး လူများကိုလင်းထိုင်အဆင့်သို့ပင် တိုက်ရိုက် ပေါက်ကွဲထွက် အဆင့်တက်စေနိုင်ရာ သူ၏ ပေါက်စီထက်ပင် ပိုမို ဆန်းကြယ်လှပေသည်။

"ဒါပေမဲ့ လောကမှာရှိတဲ့ အခွင့်အရေး အားလုံးထဲမှာ ငါ့ရဲ့ ကမ္ဘာနှစ်ခုကြားလမ်းကြောင်းကတော့ ထိပ်တန်းအဆင့်ထဲမှာ ပါဝင်နေတုန်းပဲ မဟုတ်လား။"

ယွီဒင်းတောင်သို့ ပြန်လည်ရောက်ရှိပြီး မသေမျိုးဂူအတွင်းသို့ ဝင်ရောက်လိုက်ချိန်တွင် သူ ဆွံ့အသွားရသည်။

ရှာလမွန်၏ သော့ချက်စာအုပ် ထည့်ထားသည့် ကျောက်စိမ်းသေတ္တာမှာ အစိတ်စိတ်အမြွှာမြွှာ ပျက်စီးနေသည်ကို သူ မြင်လိုက်ရသည်။

"ငါ့စာအုပ် ဘယ်ရောက်သွားတာလဲ ငါ့ရဲ့ ရှာလမွန်ရဲ့ သော့ချက်စာအုပ်ကော။"

သူသည် မသေမျိုးဂူတစ်ခုလုံးကို အထပ်ထပ်အခါခါ ရှာဖွေခဲ့သော်လည်း လုံးဝ ရှာမတွေ့ခဲ့ပေ။

ဝေ့ဝူသည် မျက်မှောင်ကို ပြင်းထန်စွာ ကုတ်လိုက်မိပြီး စိတ်ထဲတွင် မသိုးမသန့် ခံစားလိုက်ရသည်။

အကယ်၍ ၎င်းသည် အခြားစာအုပ်တစ်အုပ်သာ ဆိုပါက ပြဿနာမရှိသော်လည်း ဤစာအုပ်သည် မကောင်းဆိုးဝါး အငွေ့အသက်များကို ထုတ်လွှတ်နေသည့် အရာဖြစ်သည်။ ၎င်းသည် ဝေ့မိသားစု၏ ဌာနချုပ်အတွင်း၌ ပျောက်ဆုံးသွားခြင်း ဖြစ်ရာ မကောင်းသောအမှုအရာ တစ်ခုခု ဖြစ်ပွားလာမည်ကို သူ စိုးရိမ်မိသည်။

သူသည် စိတ်ပူပန်စွာဖြင့် ယွီဒင်းတောင်၊ ချန်ချွမ်တောင်နှင့် ဟွမ်ရန်တောင်တို့ကိုပါ လိုက်လံရှာဖွေခဲ့သော်လည်း မည်သည့်သဲလွန်စမျှ ရှာမတွေ့သဖြင့် လက်လျှော့လိုက်ရတော့သည်။

သူသည် မသေမျိုးဂူသို့ ပြန်လာပြီး ရှာလမွန်၏ သော့ချက်နှင့် ပတ်သက်သည့် စိုးရိမ်ပူပန်မှုများကို ခေတ္တဘေးဖယ်ကာ ကမ္ဘာမြေမှ ယူဆောင်လာသော ပစ္စည်းများကို စတင်လေ့လာတော့သည်။

သူသည် အလွယ်ကူဆုံးအရာများဖြစ်သည့် ကစားစရာ သေနတ် ကစားစရာ လေဆာဓားနှင့် ကစားစရာကားတို့မှ စတင်ခဲ့သည်။ ဝေ့ဝူ၏ အတွေ့အကြုံအရ ဤကဲ့သို့သောအရာများသည် ကျင့်ကြံခြင်းလောကသို့ ရောက်ရှိလာပါက မှော်ရတနာများအဖြစ် ပြောင်းလဲသွားတတ်သည်။

မျှော်လင့်ထားသည့်အတိုင်းပင် မူလက ပလတ်စတစ်ဖြင့် ပြုလုပ်ထားသော ကစားစရာ သေနတ်သည် ယခုအခါ ကျင့်ကြံခြင်းလောကတွင် ဆွဲဆောင်မှုရှိသော သတ္တုရောင်ဝါများ တောက်ပနေခဲ့သည်။ လက်ထဲတွင် ဆုပ်ကိုင်လိုက်သောအခါ တကယ့် အလေးချိန်အတိုင်း လေးလံသော ခံစားချက်ကို ပေးစွမ်းသည်။

သေနတ်နှင့်အတူ ပါလာသော ပလတ်စတစ် ကျည်ဆန်များသည်လည်း ရွှေရောင်ပုလဲလုံးလေးများအဖြစ် ပြောင်းလဲသွားခဲ့သည်။

သို့သော်လည်း ဝေ့ဝူ မျက်မှောင်ကုတ်လိုက်မိသည် ။

"ကျည်ဆန်က... အလုံး ၅၀ လောက်ပဲ ရှိတာလား ငါ အချက် ၅၀ ပဲ ပစ်လို့ရမှာလား။"

ဒါက တကယ်ကို မတန်တဆ ဖြစ်လွန်းသည်။

သူ ခေတ္တမျှ စဉ်းစားပြီးနောက် မသေမျိုးဂူထဲမှ ထွက်ခွာကာ လူသူအရောက်အပေါက်နည်းသော တောနက်တောင်နက်ထဲသို့ ခဏမျှ ပျံသန်းသွားခဲ့သည်။

သူသည် ကျည်ဆန်ကို သေနတ်ထဲသို့ ထည့်သွင်းကာ တောင်ကုန်းတစ်ခု၏ ကျောက်ဆောင် လျှိုမြှောင်စွန်းကို ချိန်ရွယ်ပြီး မောင်းခလုတ်ကို ဆွဲလိုက်သည်။

"ဒိုင်း..."

ရွှေရောင်အလင်းတန်းတစ်ခု ပေါက်ကွဲထွက်သွားသည်။ ထို့နောက် ပြင်းထန်သော ပေါက်ကွဲမှုကြီးတစ်ခု ဖြစ်ပွားခဲ့ပြီး ပေပေါင်း ရာဂဏန်း မြင့်မားသော ကျောက်ဆောင် လျှိုမြှောင်စွန်းကြီးမှာ တစ်စစီ ကြေမွသွားကာ ကျောက်တုံးကြီးများ မိုးရွာသကဲ့သို့ ပြိုကျလာခဲ့တော့သည်။

"ဒါက မန်ရှင်းအဆင့်၆ ရဲ့ စွမ်းအားပဲ။"

ဝေ့ဝူအလွန်အမင်း အံ့အားသင့်ကာ ဝမ်းသာသွားရသည်။

သို့သော်လည်း ဤအရာသည် သာမန် မှော်ရတနာများနှင့် အနည်းငယ် ကွဲပြားပုံရသည်။ သူ မောင်းခလုတ်ကို ဆွဲလိုက်ချိန်တွင် မည်သည့် ဝိညာဉ်ချီကိုမျှ အသုံးမပြုခဲ့ရချေ။

တစ်နည်းအားဖြင့် ဆိုရသော် သာမန်လူသားတစ်ဦးပင် ဤသေနတ်ကို ပစ်ခတ်နိုင်သည်ဟူသော အဓိပ္ပာယ် ဖြစ်သည်။

"ဒါက... တကယ်ကို အစွမ်းထက်လွန်းတယ်။ အကယ်၍ နောင်ကျရင် ဝေ့မိသားစုက သာမန်လူသား တိုင်းကို ဒီလိုသေနတ်တွေ တပ်ဆင်ပေးပြီး စစ်တပ်တစ်ခု ဖွဲ့စည်းလိုက်ရင် ငါတို့က အနိုင်မခံ အရှုံးမပေး ဖြစ်သွားမှာ မဟုတ်ဘူးလား။"

"ဒါနဲ့... အကယ်၍ တကယ့် သေနတ်အစစ်ကို ကျင့်ကြံခြင်းလောကထဲ ယူလာရင် ဘာဖြစ်မလဲမသိဘူး။"

သူ တွေးတောရင်း ပျက်စီးသွားသော ကျောက်ဆောင်ဆီသို့ ပျံသန်းသွားခဲ့သည်။ အနားသို့ ချဉ်းကပ်လိုက်သောအခါ ရွှေရောင် အလင်းစက်လေးတစ်ခုကို သူ တွေ့ရှိလိုက်ရသည်။

ကျောက်တုံးတစ်ခုပေါ်တွင် အချင်း တစ်မီတာခန့်ရှိသော နက်ရှိုင်းသည့် အပေါက်တစ်ပေါက် ရှိနေပြီး ၎င်း၏ အတွင်း၌ ရွှေရောင်အလင်းတန်းတစ်ခု ရှိနေသည်ကို သူ မြင်လိုက်ရသည်။

သူသည် ဝိညာဉ်ချီကို အသုံးပြု၍ ထိုရွှေရောင်အလင်းကို ပြန်လည် ဆွဲထုတ်လိုက်သည်။ ကျည်ဆန်မှာ သူ့လက်ထဲသို့ ပြန်လည်ရောက်ရှိလာခဲ့ပြီး ၎င်းသည် တောက်ပနေဆဲ ဖြစ်သော်လည်း မပစ်ခတ်မီကလောက် မလင်းလက်တော့သည်မှာ သိသာလှသည်။

ဝေ့ဝူစဉ်းစားကြည့်ပြီးနောက် ဝိညာဉ်ကျောက်တုံး အချို့ကို ထုတ်ယူလိုက်သည်။ ဝိညာဉ်ကျောက်တုံးများအတွင်းရှိ ဝိညာဉ်ချီများမှာ စုပ်ယူခြင်းခံလိုက်ရသဖြင့် လျင်မြန်စွာပင် သဲပွင့်များအဖြစ် ကြေမွသွားခဲ့ပြီး ကျည်ဆန်မှာ အနည်းငယ် ပြန်လည်လင်းလက်လာခဲ့သော်လည်း မူလအခြေအနေသို့မူ လုံးဝ ပြန်မရောက်ရှိသေးချေ။

"သြော်... ဒါက ပြန်ပြီး အားသွင်းလို့ရတာကိုး။"

"တစ်နည်းပြောရရင် ကျည်ဆန်တွေကို ပစ်ပြီးရင် ပြန်လိုက်ကောက်နိုင်သရွေ့ အကြိမ်ကြိမ် ပြန်သုံးလို့ရတာပဲ။"

သေနတ်၏ စွမ်းဆောင်ရည်ကို နားလည်သွားပြီးနောက် သူသည် လေဆာဓားကို ကြည့်လိုက်သည်။

ကစားစရာ လေဆာဓားမှာ မူလက LED မီးချောင်းမျှသာ ဖြစ်သော်လည်း ကျင့်ကြံခြင်းလောကသို့ ရောက်ရှိလာချိန်တွင်မူ -တကယ့် လေဆာဓားအစစ် ဖြစ်လာခဲ့သည်။

သူသည် ဓားရိုးကို ဆုပ်ကိုင်လိုက်ရာ သုံးပေခန့် ရှည်လျားသော လေဆာဓားသွားမှာ ချက်ချင်း ထွက်ပေါ်လာခဲ့သည်။

ဓားရိုးပေါ်တွင် ခလုတ်တစ်ခု ရှိနေပြီး သူ နှိပ်လိုက်သောအခါ

"ရွှီး..."

ပေတစ်ရာခန့် ရှည်လျားသော အနီရောင် လေဆာတန်းကြီးတစ်ခု ပေါက်ကွဲထွက်သွားသည်။

"ဒါက... တော်တော်လေး ချဲ့ကားလွန်းရာ ရောက်နေပြီ။ မီတာ ၄၀၊ ၅၀ လောက်အထိတောင် ရှည်သွားတာပဲ။"

သူ့စိတ်အာရုံ၏ စေခိုင်းမှုဖြင့် လေဆာတန်းမှာ ပြန်လည်ကျုံ့ဝင်သွားပြီး နောက်ဆုံးတွင် သူ၏ ဆန္ဒအတိုင်း သုံးပေခန့်သာ ရှည်လျားတော့သည်။

"အလိုအလျောက် စိတ်ကြိုက် ပြောင်းလဲလို့ရတာပဲ။"

"ရှည်စေ။"

အမိန့်ပေးလိုက်သည်။

လေဆာဓားသည် ချက်ချင်းပင် ပေတစ်ထောင်ခန့်အထိ ရှည်လျားသွားခဲ့သည်။ သို့သော်လည်း ၎င်းသည် ဝိညာဉ်ချီကို အလွန်အမင်း စုပ်ယူသဖြင့် သူ မကြာမီပင် ဆက်လက်မတောင့်ခံနိုင်တော့ဘဲ ဖြစ်သွားရသည်။

မူလအခြေအနေသို့ ပြန်လည်ပြောင်းလဲပြီးနောက် ဝေ့ဝူထပ်မံစစ်ဆေးကြည့်ရာ ဤလေဆာဓားသည် အဆင့် ၂ ထိပ်တန်းအဆင့် မှော်ရတနာဖြစ်ကြောင်း တွေ့ရှိလိုက်ရသည်။

"သာမန် အဆင့် 2 ထိပ်တန်းအဆင့် လေဆာဓားတစ်ချောင်းပဲပေါ့။"

ဝေ့ဝူက ရေရွတ်ရင်း ၎င်းကို သိုလှောင်အိတ်ထဲသို့ ထည့်လိုက်သည်။

ထို့နောက် သူသည် ကစားစရာကားကို စတင်လေ့လာတော့သည်။

၎င်းသည် ကာတွန်းကားများထဲကကဲ့သို့ ဆွဲဆောင်မှုရှိသော ဆေးရောင်ခြယ်မှုများနှင့် အနောက်ဘက်တွင် လေပင့်တောင်ပံပါရှိသည့် အလွန် လှပသော ကားတစ်စီး ဖြစ်သည်။

"ဒါက ဝိညာဉ်လှေဒါမှမဟုတ် ဝိညာဉ်စစ်သင်္ဘောတွေလိုမျိုး ယာဉ်တစ်မျိုးမျိုး ဖြစ်လိမ့်မယ်လို့ ငါထင်တယ်။"

တူညီသော လုပ်ငန်းစဉ်အတိုင်း သူသည် ပထမဆုံး အပိုင်ရယူရန် စမ်းသပ်ကြည့်လိုက်သည်။

"မျှော်လင့်ထားတဲ့အတိုင်းပဲ။"

သူ၏ ခန့်မှန်းချက် မှန်ကန်ခဲ့သည်။ စိတ်ကူးလိုက်ရုံမျှဖြင့် လက်ဖဝါးခန့်သာရှိသော ကစားစရာကားသည် ချက်ချင်းပင် ကြီးထွားလာပြီး ပေ ၃၀ (၁၀ မီတာခန့်) အထိ ရှိလာခဲ့သည်။

"လူ တော်တော်များများ စီးလို့ရတာပဲ ဒါကလည်း အဆင့် ၂ ထိပ်တန်းအဆင့် ဖြစ်ရမယ်။"

သူသည် ကားထဲတွင် ဝင်ထိုင်လိုက်ပြီးစိတ်ထဲက ခိုင်းလိုက်သည်။

"သွားးး"

သို့သော်လည်း ကားမှာ လုံးဝ မလှုပ်ရှားပေ။ ဝေ့ဝူရှာဖွေကြည့်ရာ ကားကိုယ်ထည်ပေါ်တွင် အပေါက်တစ်ခု ရှိနေသည်ကို တွေ့ရှိလိုက်ရသည်။

"ဒါကြီးက ဆီထည့်ဖို့ လိုနေတာတော့ မဟုတ်ပါဘူးနော်..."

ဒါက တကယ်ကို ရယ်စရာကောင်းလွန်းသည်။

"ကျင့်ကြံခြင်းလောကထဲမှာ မင်းအတွက် ဓာတ်ဆီ ဘယ်ကသွားရှာရမလဲ။"

သူ ရုတ်တရက် အကြံရသွားပြီး ဝိညာဉ်ကျောက်တုံး အလုံးတစ်ရာကို ထည့်သွင်းလိုက်သည်။

"ဝူး..."

ကစားစရာကားသည် ချက်ချင်းပင် စတင် လှုပ်ရှားသွားခဲ့ပြီး အရှိန်အဟုန်ဖြင့် မောင်းနှင်ကာ ဝေ့ဝူကို သယ်ဆောင်၍ ကောင်းကင်ယံထက်သို့ ပျံသန်းသွားခဲ့တော့သည်။