အခန်း ၉၉၇

အခန်း (၉၉၇) ဝိညာဉ်စစ်အောင်လံနှင့် သားရဲစစ်ငါးမျိုး။ (၁)

ကျန်းမိသားစုက ဧည့်သည်တော် အကြီးအကဲများကို ခန့်အပ်ရာတွင် သွေးသစ္စာ ကျမ်းစာကို လက်မှတ်ရေးထိုးစေသည်။ ဤကျမ်းစာလိပ်များသည် မဟာနတ်ဘုရား စွမ်းအားများဖြင့် ပြုလုပ်ထားခြင်း ဖြစ်သဖြင့် တန်ဖိုးကြီးမားလှပြီး အရေးကြီးသော ပုဂ္ဂိုလ်များအတွက်သာ ထုတ်ယူလေ့ ရှိသည်။

ကျန်းယောင်သည် စူးချန်ခုန်း၏ အခြေအနေကို ကျန်းမိသားစု၏ အဓိကဌာနချုပ်သို့ အစီရင်ခံခဲ့သည်။ စူးချန်ခုန်းမှာ ဝိညာဉ်ကြောများ ရှားပါးပြီး ဝိညာဉ်စွမ်းအင် နည်းပါးသော ဒေသမှ ထွက်ပေါ်လာသူဖြစ်ပြီး ပြန်လည်မွေးဖွားလာသူ မဟုတ်သော်လည်း ငယ်ရွယ်စဉ်မှာပင် ထူးခြားသော နတ်ဘုရားစွမ်းရည်များကို ပိုင်ဆိုင်ကာ မူလဝိညာဉ်ကို လေ့ကျင့်နိုင်ခဲ့သူ ဖြစ်သည်။ ထို့ကြောင့် ကျန်းမိသားစုက စူးချန်ခုန်းကို မိသားစု၏ ဧည့်သည်တော် အကြီးအကဲအဖြစ် ဖိတ်ခေါ်ရန် ဆုံးဖြတ်ပြီး သွေးသစ္စာ ကျမ်းစာလိပ်ကို ယူဆောင်လာခဲ့ခြင်း ဖြစ်သည်။

ထိုသို့သော ထူးချွန်သည့် ပါရမီရှင်မျိုးကို စောစီးစွာ ဆွဲဆောင်ထားရမည်ဖြစ်သည်။ အကယ်၍ သူသာ ကျန်းမိသားစုနှင့် ဆန့်ကျင်ဘက် အင်အားစုများထဲသို့ ဝင်ရောက်သွားပါက နောင်တစ်ချိန်တွင် ကြောက်မက်ဖွယ်ကောင်းသော ပြိုင်ဘက် ဖြစ်လာနိုင်သောကြောင့် ဖြစ်သည်။

စူးချန်ခုန်းက လက်ကိုဆန့်ထုတ်၍ သွေးသစ္စာ ကျမ်းစာလိပ်ကို ယူလိုက်ပြီး အတွင်းရှိ အချက်အလက်များကို အာရုံခံကြည့်သည်။ သွေးသစ္စာ ကျမ်းစာလိပ်တွင် နှစ်ဦးကြား သဘောတူညီချက်များ ပါဝင်သည်။ ကျန်းမိသားစုအနေဖြင့် စူးချန်ခုန်း၏ လိုအပ်ချက်များကို တတ်နိုင်သမျှ ဖြည့်ဆည်းပေးရမည် ဖြစ်ပြီး ကျန်းမိသားစု အကူအညီ လိုအပ်သည့်အချိန်တွင် စူးချန်ခုန်းက ကူညီပေးရမည် ဖြစ်သည်။ ထို့အပြင် စူးချန်ခုန်းအနေဖြင့် ကျန်းမိသားစု၏ အကျိုးစီးပွားကို ထိခိုက်စေမည့် လုပ်ရပ်မျိုး မလုပ်ရပေ။ သွေးသစ္စာကို ချိုးဖောက်ပါက မဟာနတ်ဘုရား တောင်တန်း သွေးသစ္စာ၏ တုံ့ပြန်မှုဒဏ်ကို ခံစားရမည်ဖြစ်သည်။ အကောင်းဆုံးအနေဖြင့် ကုသရန်ခက်ခဲသော ဒဏ်ရာကြီး ရရှိမည်ဖြစ်ပြီး အဆိုးဆုံးအနေဖြင့် ကျင့်ကြံရေးလမ်းကြောင်းတွင် တိုးတက်မှု မရှိတော့ဘဲ နာတာရှည် ထိခိုက်မှုများ ခံစားရမည် ဖြစ်သည်။

ထို့အပြင် ကျန်းမိသားစုတွင် သွေးသစ္စာကို တစ်ဖက်သတ် ပယ်ဖျက်ပိုင်ခွင့် ရှိပြီး စူးချန်ခုန်းအနေဖြင့်လည်း ကျန်းမိသားစုနှင့် ညှိနှိုင်း၍ ဖျက်သိမ်းနိုင်ပေသည်။ သို့သော် ထိုသို့ဖြစ်ပါက ကျန်းမိသားစုက ရင်းနှီးမြှုပ်နှံထားသော အရင်းအမြစ်များကို ဆယ်ဆခန့် ပြန်လည်ပေးဆပ်ရမည် ဖြစ်သည်။

စူးချန်ခုန်းက မူလဝိညာဉ်ဖြင့် ထပ်မံစစ်ဆေးကြည့်ရာ သွေးသစ္စာ၏ စည်းကမ်းချက်များမှာ ကျိုးကြောင်းဆီလျော်သည်ဟု ယူဆသည်။ စူးချန်ခုန်းမှာ ကျေးဇူးကို သိတတ်သူဖြစ်၍ ရရှိလာသည့် အကျိုးကျေးဇူးအတွက် ပြန်လည်ပေးဆပ်ရန် ဝန်မလေးပေ။

"ကောင်းပြီ" စူးချန်ခုန်းက စကားများစွာ မပြောတော့ပေ။ သွေးသစ္စာ ကျမ်းစာလိပ်တွင် အမှားအယွင်း မရှိသည်ကို စစ်ဆေးပြီးနောက် ချက်ချင်း သဘောတူလိုက်သည်။ သူ၏ လက်ချောင်းကို ဓားနှင့်ခွဲ၍ သွေးတစ်စက်ကို ကျမ်းစာလိပ်ပေါ်သို့ ချလိုက်သည်။ သွေးမှာ ကျမ်းစာလိပ်အတွင်းသို့ တိတ်တဆိတ် ပေါင်းစပ်သွားပြီး တောက်ပသော အလင်းရောင်များ ထွက်ပေါ်လာကာ လေထဲသို့ ပျောက်ကွယ်သွားသည်။ စူးချန်ခုန်းသည် မဟာနတ်ဘုရားတောင်တန်း သွေးသစ္စာ၏ ကြီးမားသော စွမ်းအားကို အနည်းငယ် ခံစားလိုက်ရသည်။

"အကြီးအကဲ စူး" ထိုမြင်ကွင်းကို မြင်ပြီးနောက် ကျန်းယောင်းမှာ ပြုံးရွှင်သွားပြီး စူးချန်ခုန်းကို ခေါ်ဝေါ်ပုံ ပြောင်းလဲလိုက်သည်။ ဝေးလံခေါင်ဖျားသော ဒေသမှ ထွက်ပေါ်လာပြီး ငယ်ရွယ်စဉ်မှာပင် ဤမျှအဆင့်ထိ ရောက်ရှိနေသည့် ထူးချွန်သော ပါရမီရှင်မှာ အကန့်အသတ်မရှိသော အလားအလာကို ပိုင်ဆိုင်ထားသည်ဟု ကျန်းယောင်က ယူဆသည်။

အထောက်အပံ့ အနည်းငယ် ရှိရုံဖြင့် သူသည် လျင်မြန်စွာ ကြီးထွားလာမည်မှာ အသေအချာပင်ဖြစ်သည်။ နောင်တစ်ချိန်တွင် သူသည် ရှေးဟောင်း နိုင်ငံတော်၏ အထွတ်အထိပ်တွင် မဟာနတ်ဘုရား စွမ်းအားရှင် တစ်ဦးအဖြစ် ရပ်တည်နိုင်လိမ့်မည် ဖြစ်သည်။

"အကြီးအကဲ စူး ဒါက ကျန်းမိသားစုရဲ့ ဧည့်သည်တော် အကြီးအကဲ အမှတ်အသား တိုကင်ပြားပဲ။ သတ်မှတ်ထားတဲ့ အကွာအဝေးအတွင်းမှာ အကြီးအကဲကို အနီးနားက ကောင်းကင်သူတော်စင် တောင်တန်းမှာရှိတဲ့ ကျန်းမိသားစုဝင်တွေနဲ့ အဆက်အသွယ် ရစေနိုင်တယ်" ဟု ပြောပြီး ကျန်းယောင်က ရှေးဟောင်းပုံစံဖြင့် ပြုလုပ်ထားသော အမှတ်အသား တိုကင်ပြားကို ထုတ်ပေးသည်။ ၎င်းတွင် လျှို့ဝှက်သော ပုံစံများ ထွင်းထုထားပြီး ရှေးဟောင်းစာ 'ကျန်း'ဟူသော စာလုံးပါဝင်သည်။

ကျန်းမိသားစု၏ ဧည့်သည်တော် အကြီးအကဲ အမှတ်အသားပြားမှာ ရှာယန်မိသားစု၏ အမှတ်အသားပြားနှင့် ဆင်တူသော်လည်း အဆင့်အတန်း ပိုမိုမြင့်မားပြီး ပိုမိုဝေးကွာသော နေရာများအထိ သတင်းပို့နိုင်သည်။ ကောင်းကင်သူတော်စင် တောင်တန်းရှိ နယ်ပယ်တိုင်းလိုလိုတွင် ကျန်းမိသားစု၏ ဌာနခွဲများ ရှိသည်။ အမှတ်အသားတိုကင်ပြားဖြင့် အခက်အခဲ ကြုံတွေ့ရချိန်တွင် ကောင်းကင်သူတော်စသ် တောင်တန်းရှိ ကျန်းမိသားစုဝင်များထံ သတင်းပို့နိုင်သည်။ စူးချန်ခုန်းက ၎င်းကို လက်ခံယူလိုက်သည်။

ထို့အပြင် ကျန်းယောင်က စူးချန်ခုန်းကို အလွန်အံ့သြစေမည့် နောက်ထပ်အကြောင်းအရာတစ်ခုကို ပြောပြသည်။ "အကြီးအကဲ စူး အရင်က တောင်းဆိုခဲ့တဲ့ သမင်၊ ဝက်ဝံ၊ မျောက် နဲ့ ငှက် အမျိုးအစား တိရစ္ဆာန်တွေရဲ့ ဝိညာဉ်အပိုင်းအစတွေနဲ့ အစွဲအလမ်းပါတဲ့ ရတနာတွေကိုလည်း ကျန်းမိသားစုဝင်တွေကို စုဆောင်းခိုင်းထားပါတယ်"

သွေးသစ္စာ ကျမ်းစာလိပ်ကို စူးချန်ခုန်းထံ ပေးပို့စဉ်ကပင် ကျန်းယောင်က စူးချန်ခုန်း၏ လိုအပ်ချက်များကို မိသားစုအား အသိပေးခဲ့သည်။ ကျန်းမိသားစုသည်လည်း တိရစ္ဆာန်လေးမျိုး၏ ဝိညာဉ်အပိုင်းအစများကို အချိန်တိုအတွင်း စုဆောင်းနိုင်ခဲ့ပြီး ကြိုဆိုသည့် လက်ဆောင်အဖြစ် ပေးအပ်ခဲ့သည်။ အားလုံးမှာ စူးချန်ခုန်းက ကျန်းမိသားစု၏ ဧည့်သည်တော် အကြီးအကဲအဖြစ် လက်ခံရန် သဘောတူခြင်းကြောင့် ဖြစ်သည်။

"ဒါက လွန်ခဲ့တဲ့ နှစ်ပေါင်း တစ်သောင်းက တိရစ္ဆာန် တစ်သောင်းဂိုဏ်းကို အခြေခံထားတဲ့ ဝိညာဉ်စစ်အောင်လံရဲ့ ပုံတူပဲ။ အဲ့ဒီထဲမှာ တိရစ္ဆာန်ငါးမျိုးရဲ့ ဝိညာဉ်အပိုင်းအစပေါင်း တစ်ရာနီးပါး ပါဝင်တယ်။ နှစ်ကာလတွေ ကြာမြင့်လာပြီး တိရစ္ဆာန် တစ်သောင်းဂိုဏ်း ကျဆင်းသွားတဲ့အခါ သူတို့ရဲ့မျိုးဆက်တွေက ဒီဝိညာဉ်စစ်အောင်လံကို အစ်ကိုတို့ ကျန်းမိသားစုကို ရောင်းချခဲ့တယ်။ ဒီဝိညာဉ်စစ်အောင်လံက ပုံတူသက်သက် ဖြစ်ပေမယ့် အကြီးအကဲ စူးလိုအပ်တဲ့ တိရစ္ဆာန်ငါးမျိုးရဲ့ ဝိညာဉ်အပိုင်းအစတွေကိုတော့ ထိန်းသိမ်းထားနိုင်ဆဲပဲ"

ကျန်းယောင်းက သူ၏ ရတနာသိုလှောင်ရာမှ အလံတစ်ခုကို ထုတ်ယူလိုက်သည်။ အလံမှာ လှုပ်ခတ်နေပြီး ထူးခြားရှားပါးသော သားရဲများ၏ ပုံရိပ်များကို အသက်ဝင်စွာ ခြယ်မှုန်းထားသည်။ ဝိညာဉ်စစ်အောင်လံမှာ ထိပ်တန်း နတ်ဘုရားရတနာ ဖြစ်ပြီး မူလက တိရစ္ဆာန် တစ်သောင်းဂိုဏ်း၏ ဘိုးဘေးဖြစ်သူ မဟာနတ်ဘုရားစွမ်းအားရှင် တစ်ဦး ပိုင်ဆိုင်ခဲ့ခြင်း ဖြစ်သည်။ ဂိုဏ်းကျဆင်းသွားပြီးနောက် ကျန်းမိသားစု လက်ထဲသို့ ရောက်ရှိလာသည်။

စူးချန်ခုန်း၏ လိုအပ်ချက်ကို သိရှိပြီးနောက် ကျန်းမိသားစုက ဝိညာဉ်စစ်အောင်လံထဲမှ တိရစ္ဆာန်လေးမျိုး၏ ဝိညာဉ်အပိုင်းအစများကို ထုတ်ယူ၍ ပုံတူပြုလုပ်ကာ သွေးသစ္စာ ကျမ်းစာလိပ်နှင့်အတူ ယူဆောင်လာခဲ့ခြင်း ဖြစ်သည်။

"ကျေးဇူးတင်ပါတယ်" စူးချန်ခုန်းက ကျေးဇူးတင်စကား ဆိုလိုက်သည်။ ကျန်းမိသားစုက သူ့အပေါ် ရင်းနှီးမြှုပ်နှံခြင်းမှာ အပြန်အလှန် အကျိုးရလဒ်များ ရှိနေသော်လည်း စူးချန်ခုန်း ရရှိခဲ့သော အကျိုးကျေးဇူးများမှာ လက်တွေ့ကျလှသည်။ ဤရတနာများကို သူကိုယ်တိုင် စုဆောင်းရန်မှာ အချိန်နှင့် ကြိုးစားအားထုတ်မှု အများအပြား လိုအပ်မည်ဖြစ်သည်။ ကျန်းမိသားစုကမူ သူ၏ လိုအပ်ချက်များကို အလွယ်တကူ ဖြည့်ဆည်းပေးခဲ့သည်။

"အကြီးအကဲစူး ကျေးဇူးတင်စရာ မလိုပါဘူးဗျာ။ တခြား လိုအပ်တာတွေ ရှိရင်လည်း အစ်ကို့ကိုပဲ ဖြစ်ဖြစ် အဖိုးလျိုကိုပဲ ဖြစ်ဖြစ် ဆက်သွယ်လို့ ရပါတယ်" ကျန်းယောင်က ပြုံးလျက် ပြောသည်။

စူးချန်ခုန်းက ခေါင်းညိတ်လိုက်သည်။ ရရှိလာသည့်အရာ များလေလေ ကျန်းမိသားစုအပေါ် တာဝန်ရှိလာလေလေ ဖြစ်ပြီး နောင်တွင် ကျန်းမိသားစု အခက်အခဲ ကြုံရပါက စူးချန်ခုန်းအနေဖြင့် ငေးကြည့်နေ၍ မရတော့ပေ။ သွေးသစ္စာ ကျမ်းစာလိပ်ကို လက်မှတ်ရေးထိုးပြီး လိုအပ်သော ရတနာများကို ရရှိပြီးနောက် စူးချန်ခုန်းက ကျန်းယောင်ကို နှုတ်ဆက်၍ ဝိညာဉ်စစ်အောင်လံကို ယူကာ လနက်ဂူဗိမာန်မှ ထွက်ခွာလာခဲ့သည်။