အခန်း ၈၀၄

အခန်း ၈၀၄ - ထိုက်ရွှိအမိန့်တံဆိပ်ကို ရယူခြင်း၊ ထိုက်ရွှိဂိုဏ်းမှ ရတနာ

ဝှစ်၊ ဝှစ်၊ ဝှစ်။

မျက်စိတစ်မှိတ်စာ အချိန်အတွင်းမှာပင်၊ ကောင်းကင် ပိုင်ငှက် မျိုးနွယ်စုမှ ယွမ်ယင်းအဆင့် အကြီးအကဲများသည် သတင်းကို ရရှိလိုက်ပြီး ရတနာ နန်းဆောင်သို့ အလျင်စလို ရောက်ရှိလာကြလေသည်။

သို့သော် ရတနာ နန်းဆောင်မှာ မည်သည့် ထိခိုက်ပျက်စီးမှုမျှ မရှိဘဲ ပကတိ အတိုင်း ရှိနေလေသည်။

မည်သည့် ရန်သူကမျှ ကျူးကျော်ဝင်ရောက်လာခြင်း မရှိခဲ့သည့် အလားပင်။

ဤအခြေအနေမှာ အလွန်တရာ ထူးဆန်းလှပေသည်။ အကယ်၍ မည်သူကမျှ ကျူးကျော်မလာခဲ့ပါက၊ အကြီးအကဲများ မည်သို့ သေဆုံးသွားခဲ့ကြသနည်း။

သို့သော် ရတနာ နန်းဆောင် အတွင်းသို့ သူတို့ ဝင်ရောက်သွားပြီးနောက်တွင်၊ သူတို့၏ မျက်နှာများမှာ အစိမ်းရောင်အဖြစ်သို့ ပြောင်းလဲသွားခဲ့လေသည်။

"ပျောက်ကုန်ပြီ၊ အထဲမှာရှိတဲ့ ရတနာတွေ အကုန်လုံး ပျောက်ကုန်ပြီ။ ငါတို့ ကောင်းကင် ပိုင်ငှက် မျိုးနွယ်စု အပင်ပန်းခံ စိုက်ပျိုးထားတဲ့ ဝိညာဉ်ဆေးပင်တွေ အခိုးခံလိုက်ရပြီ။ ဘယ်ခွေးကောင်က ဒါကို လုပ်တာလဲ။"

ကောင်းကင် ပိုင်ငှက် မျိုးနွယ်စုမှ ယွမ်ယင်းအဆင့် အကြီးအကဲ တစ်ဦးက ကျယ်လောင်စွာ ကျိန်ဆဲလိုက်ပြီး၊ ဒေါသထွက်လွန်း၍ မျက်နှာပေါက် ခုနစ်ပေါက်မှ မီးခိုးများပင် ထွက်လုမတတ် ဖြစ်နေလေသည်။

၎င်း အသက်ရှင်လာခဲ့သည့် တစ်လျှောက်လုံး ဤကဲ့သို့သော ကိစ္စမျိုးကို တစ်ကြိမ်တစ်ခါမျှ မမြင်တွေ့ခဲ့ဖူးချေ။

ပုံမှန်အားဖြင့်၊ ရတနာ နန်းဆောင်ကို ယွမ်ယင်းအဆင့် ကိုးဦးက စောင့်ကြပ်နေပြီး၊ ၎င်းမှာ သန့်ရှင်းသော နယ်မြေ အတွင်း၌ တည်ရှိလေသည်။

မည်သည့် ရန်သူကမျှ ဤနေရာသို့ ဝင်ရောက်နိုင်စွမ်း မရှိသင့်ချေ။

သို့သော် ယခုအခါတွင်မူ သူတို့ ဘာကိုမျှ သတိမထားမိလိုက်ဘဲ ရန်သူက ရတနာ နန်းဆောင် အတွင်းသို့ ထိုးဖောက် ဝင်ရောက်လာပြီး အထဲရှိ ရတနာ အားလုံးကို အေးအေးဆေးဆေး ခိုးယူသွားခဲ့လေသည်။

ဤသည်မှာ လုံးဝ အရှက်ကွဲခြင်းဖြစ်ပြီး၊ ကောင်းကင် ပိုင်ငှက် မျိုးနွယ်စု အတွက် အလွန်တရာ အရှက်ရစရာ ကိစ္စရပ်ပင် ဖြစ်လေသည်။

"ဝိညာဉ်ဆေးပင်တွေ ချည်းပဲ မဟုတ်ဘူး။ မျိုးနွယ်စု အမျိုးမျိုးဆီကနေ ငါတို့ လုယူလာခဲ့တဲ့ မှော်ရတနာတွေ အကုန်လုံးလည်း ပြောင်သလင်းခါအောင် အခိုးခံလိုက်ရပြီ။ အနိမ့်ဆုံးအဆင့် မှော်ရတနာ တစ်ခုလေးတောင် မချန်ထားခဲ့ဘူး။ ဒီခွေးကောင်က ရူးလောက်အောင်ကို လောဘကြီးတာပဲ။"

အခြား ယွမ်ယင်းအဆင့် အကြီးအကဲ တစ်ဦးမှာလည်း ဒေါသထွက်လွန်း၍ ရူးသွပ်သွားမတတ် ဖြစ်နေလေသည်။

ကောင်းကင် ပိုင်ငှက် မျိုးနွယ်စု းသည် လွှမ်းမိုးသူ မျိုးနွယ်စု တစ်ခု ဖြစ်လာကတည်းက၊ အားနည်းသော မျိုးနွယ်စုများကို အပတ်တကုတ် ဖိနှိပ်ခဲ့ပြီး လျှို့ဝှက်နယ်မြေ ကမ္ဘာများကို လုယက်ခဲ့ကြရာ၊ မျိုးနွယ်စုဝင် မည်မျှလောက် သေကျေဒဏ်ရာ ရခဲ့သည်ကိုပင် မသိနိုင်ဘဲ ဤမျှလောက် များပြားသော ရတနာများကို စုဆောင်းရန် ခက်ခက်ခဲဲခဲ ကြိုးပမ်းခဲ့ရလေသည်။

သို့သော် ယခုအခါ အရာအားလုံးမှာ အချည်းနှီး ဖြစ်သွားခဲ့ပြီး သူတစ်ပါးအတွက် မင်္ဂလာဝတ်စုံ ချုပ်ပေးလိုက်ရသကဲ့သို့ ဖြစ်သွားခဲ့လေပြီ။

ပုံမှန် သူခိုးများမှာ တန်ဖိုးရှိသော မှော်ရတနာများကိုသာ ခိုးယူလေ့ရှိကြ၏။

သို့သော် ထိုခွေးကောင်ကမူ တစ်ပြားတစ်ချပ် တန်သည့် အရာမှန်သမျှကို ယူဆောင်သွားခဲ့ပြီး အမွှေးတစ်ပင်လေးမျှပင် ချန်မထားခဲ့ရာ၊ မည်မျှလောက် လောဘကြီးကြောင်း ပြသနေပြီး တကယ်ကို ရွံရှာမုန်းတီးဖွယ် ကောင်းလှပေသည်။

"မှော်ရတနာတွေတင် မကဘူး၊ ဟို ကြမ်းပြင် အုပ်ကြွပ်တွေကို ကြည့်စမ်း။ အဲဒါတွေက အတော်အသင့် ကောင်းမွန်တဲ့ ရတနာ သန့်စင်ရေး ပစ္စည်းတွေ ဖြစ်တဲ့ 'မြေကမ္ဘာ သလင်းကျောက်'တွေနဲ့ လုပ်ထားတာ။ ဒါပေမယ့် အဲဒီသူခိုးက ဒါတွေကိုပါ ကလော်ပြီး ယူသွားသေးတယ်။ အကယ်လို့ ငါတို့သာ မြန်မြန် မရောက်လာခဲ့ရင်၊ ရတနာ နန်းဆောင်ရဲ့ အဓိက ထောက်တိုင်တွေကိုတောင် သူတို့ သယ်သွားလောက်တယ်။ ဒီခွေးကောင်က ဘယ်လောက်တောင် ရဲတင်းနေတာလဲ။"

ကောင်းကင် ပိုင်ငှက် မျိုးနွယ်စုမှ ယွမ်ယင်းအဆင့် အကြီးအကဲ အမြောက်အမြားမှာ အံကြိတ်လိုက်ကြပြီး၊ ထိုသူခိုးကို ချက်ချင်း ဖမ်းဆီးကာ အစိတ်စိတ်အမွှာမွှာ ဆုတ်ဖြဲပစ်ချင်နေကြလေသည်။ ထိုခွေးကောင်မှာ ကိုယ့်အိမ်ကိုယ့်ယာ အတိုင်း ဝင်ထွက်သွားခဲ့ခြင်း ဖြစ်လေသည်။

အလွန်အမင်း ရွံရှာမုန်းတီးဖွယ် ကောင်းလွန်းလှပြီး၊ လက်ရှိအချိန်တွင် သူတို့ မည်မျှလောက် ဒေါသထွက်နေကြသည်ကို မည်သူကမျှ စိတ်ကူးယဉ်နိုင်မည် မဟုတ်ချေ။

အကယ်၍ သူတို့၏ ဒေါသများသာ အစိုင်အခဲ တစ်ခုအဖြစ် ပြောင်းလဲသွားနိုင်မည် ဆိုပါက မိုင်တစ်သောင်း အတွင်းရှိ မြေပြင်ကို ပြာအဖြစ်သို့ ပြောင်းလဲပစ်နိုင်မည် ဖြစ်လေသည်။

"အဲဒီခွေးကောင်က ဒါကို ဘယ်လို လုပ်သွားတာလဲ။ ငါတို့ရဲ့ ဧရာမ အစီအရင်ကြီးကတောင် အာရုံမခံမိဘဲ ငါတို့ သန့်ရှင်းသော နယ်မြေထဲကို ဘယ်လိုများ တိတ်တဆိတ် ထိုးဖောက် ဝင်ရောက်သွားနိုင်တာလဲ၊ တကယ်တမ်း ဘာတွေ ဖြစ်ခဲ့တာလဲ။"

"သန့်ရှင်းသော နယ်မြေထဲကို ထိုးဖောက် ဝင်ရောက်တာတင် မကဘူး။ ရတနာ နန်းဆောင်ကို စောင့်ကြပ်နေတဲ့ အကြီးအကဲ ကိုးယောက်ကို မျက်စိတစ်မှိတ်အတွင်း သတ်ဖြတ်သွားတာ၊ အကူအညီတောင်းတဲ့ အချက်ပြသံလေး တစ်ခုတောင် မပို့လိုက်နိုင်ဘူး။ ဒီလို စွမ်းအားမျိုးကို ဘယ်လို သက်ရှိက ပိုင်ဆိုင်ထားတာလဲ၊ ဝိညာဉ်အသွင်ပြောင်းအဆင့် ကျင့်ကြံသူများ ဖြစ်နေမလား။"

"အထွတ်အထိပ် မျိုးနွယ်စု လေးခုကလွဲရင် တခြား ဝိညာဉ်အသွင်ပြောင်းအဆင့် ကျင့်ကြံသူတွေ အနီးအနားမှာ ရှိနေသေးလို့လား။"

"ရိုးရိုးသားသား ပြောရရင် မဖြစ်နိုင်တာတော့ မဟုတ်ဘူး။ ဘာလို့လဲဆိုတော့ အနောက်ဘက် တိုက်ကြီးက အရမ်းကို ကျယ်ပြန့်လွန်းတော့၊ ဝိညာဉ်အသွင်ပြောင်းအဆင့် ကျင့်ကြံသူ တစ်ယောက်၊ နှစ်ယောက်လောက် တိတ်တဆိတ် ပုန်းကွယ်နေနိုင်တယ်။"

"ငါတို့ရဲ့ ဘိုးဘေး သုံးပါး မရှိတဲ့ အချိန်ကို အခွင့်ကောင်းယူပြီး အဲဒီခွေးကောင်က လှုပ်ရှားလိုက်တာ ဖြစ်မယ်လို့ ငါ ထင်တယ်။ ငါတို့ ကောင်းကင် ပိုင်ငှက် မျိုးနွယ်စုရဲ့ ရတနာ နန်းဆောင်ကို လုယက်ဖို့နဲ့ ငါတို့ ပင်ပင်ပန်းပန်း စုဆောင်းထားတဲ့ ရတနာတွေကို လုယူဖို့ အခွင့်ကောင်းယူသွားတာပဲ။"

"ပြဿနာက ရတနာ နန်းဆောင် တစ်ခုလုံးမှာ ဘာခြေရာ လက်ရာမှ မကျန်ခဲ့တာပဲ။ ရန်သူက ဘယ်သူလဲ ဆိုတာရော၊ ဘယ်မျိုးနွယ်စုက ကျင့်ကြံသူတွေ ဆိုတာကိုပါ ငါတို့ မသိရဘူး။"

"ပိုပြီး အရေးကြီးတာက အခု ရန်သူက ဘယ်မှာလဲ၊ ပြီးတော့ သူတို့ ဘယ်လို ထွက်ပြေးသွားတာလဲ။ ငါတို့ အတော်လေး အလျင်အမြန် ရောက်လာခဲ့ပေမယ့် အရာအားလုံးကို သူတို့ ယူသွားနိုင်ခဲ့တယ်။ ဒါကို ဘယ်လိုများ လုပ်ဆောင်သွားတာလဲ။"

ကောင်းကင် ပိုင်ငှက် မျိုးနွယ်စုမှ ယွမ်ယင်းအဆင့် အကြီးအကဲ အများအပြား၏ မျက်နှာအမူအရာများမှာ အလွန်တရာ ဆိုးရွားနေလေသည်။

ကောင်းကင် ပိုင်ငှက် မျိုးနွယ်စု၏ ရတနာ နန်းဆောင်သို့ လာရောက် ခိုးယူသွားသော ကျင့်ကြံသူများမှာ အလွန်တရာ လျှို့ဝှက်ဆန်းကြယ်ပြီး အစွမ်းထက်ကာ၊ သေချာပေါက် ဝိညာဉ်အသွင်ပြောင်းအဆင့် ဖြစ်ရမည်ဟု သူတို့ ခံစားမိကြလေသည်။ ထိုသို့မှမဟုတ်ပါက ဤကိစ္စကို လုပ်ဆောင်နိုင်မည် မဟုတ်ချေ။

သို့သော် အစွမ်းထက်သော ဝိညာဉ်အသွင်ပြောင်းအဆင့် ကျင့်ကြံသူ တစ်ဦး အနေဖြင့် ဤကဲ့သို့ အသေးအဖွဲ ခိုးမှုမျိုးကို ကျူးလွန်ရလောက်အောင် မည်မျှလောက် အရှက်ကင်းမဲ့နေသနည်း။

ပို၍ ဒေါသထွက်စရာ ကောင်းသည်မှာ၊ သူတို့ မည်သည့် သဲလွန်စကိုမျှ လုံးဝ ရှာမတွေ့နိုင်ခြင်းပင် ဖြစ်လေသည်။

ရန်သူမှာ လေထဲမှ ရုတ်တရက် ထွက်ပေါ်လာပြီး လေထဲသို့ပင် ပြန်လည် ပျောက်ကွယ်သွားသည့်အလားပင် ဖြစ်လေသည်။

"အကြီးအကဲ... အရေးကြီးတဲ့ သတင်းတစ်ခု ကျွန်တော် အခုလေးတင် ရခဲ့တယ်။"

"ငါတို့ ကောင်းကင် ပိုင်ငှက် မျိုးနွယ်စုရဲ့ ရတနာ နန်းဆောင် တစ်ခုတည်း ဖောက်ထွင်းခံရတာ မဟုတ်ဘူး။"

"ကျောင်းနဂါး မျိုးနွယ်စု၊ မသေမျိုး မြေခွေး မျိုးနွယ်စု နဲ့ ရေခဲဝိညာဉ် မျိုးနွယ်စု တွေရဲ့ ရတနာ နန်းဆောင်တွေလည်း လျှို့ဝှက်ဆန်းကြယ်တဲ့ ရန်သူ တစ်ယောက်ရဲ့ တိုက်ခိုက်တာကို ခံလိုက်ရတယ်။"

"သူတို့လည်း အကြီးအကျယ် ဆုံးရှုံးသွားကြပြီး ရတနာတွေ အများကြီး လုံးဝ အခိုးခံလိုက်ရတယ်။"

ထိုအခိုက်အတန့်တွင် ကောင်းကင် ပိုင်ငှက် မျိုးနွယ်စုမှ ကျင့်ကြံသူ တစ်ဦးက ချက်ချင်း အော်ဟစ်လိုက်ပြီး၊ အရေးကြီးသော သတင်းအချက်အလက် တစ်ခုကို ထုတ်ဖော် ပြောကြားလိုက်လေသည်။

မည်သို့ပင်ဆိုစေ ကောင်းကင် ပိုင်ငှက် မျိုးနွယ်စုသည် အခြား ပဉ္စမအဆင့် မျိုးနွယ်စု သုံးခု အတွင်း၌ သူလျှိုများ ထည့်သွင်းထားသဖြင့်၊ သူတို့ထံတွင် မည်သည့်အရာ ဖြစ်ပျက်နေပါစေ ၎င်းကို ချက်ချင်း သိရှိနိုင်ကြလေသည်။

"ဘာ။ ရန်သူက ငါတို့ ကောင်းကင် ပိုင်ငှက် မျိုးနွယ်စုကိုတင် ပစ်မှတ်ထားတာ မဟုတ်ဘဲ တခြား ပဉ္စမအဆင့် မျိုးနွယ်စုတွေကိုပါ ပစ်မှတ်ထားတာလား။ ဒါက ကြိုတင် စီစဉ်ထားတဲ့ လှုပ်ရှားမှု တစ်ခုများ ဖြစ်နေမလား။"

ကောင်းကင် ပိုင်ငှက် မျိုးနွယ်စုမှ အကြီးအကဲ တစ်ဦးမှာ လန့်ဖြန့်သွားလေသည်။

သူတို့ မျိုးနွယ်စု တစ်ခုတည်းသာ ဒုက္ခရောက်နေသည်ဟု မူလက ထင်မှတ်ထားခဲ့သော်ငြား၊ ကျောင်းနဂါး မျိုးနွယ်စုလည်း တိုက်ခိုက်ခံရလိမ့်မည်ဟု မမျှော်လင့်ထားခဲ့ချေ။ ဤအချက်က သူတို့ကို အနည်းငယ် စိတ်သက်သာရာ ရသွားစေခဲ့လေသည်။ အနည်းဆုံးတော့ ကောင်းကင် ပိုင်ငှက် မျိုးနွယ်စု တစ်ခုတည်း ကံဆိုးနေခြင်း မဟုတ်ဘဲ၊ ကံဆိုးမှုကို မျှဝေခံစားရန် အခြားသူများ ရှိနေသေးသည် မဟုတ်ပါလော။

……………