အခန်း ၂၁၂

အခန်း (၂၁၂) တောင်ထဲဝင်ခြင်း... ရှောင်ဟွာကို ခေါ်ပြီး မိန်းမသွားရှာမယ်

လယ်ယာခြံဝင်း၏ နေ့စဉ်ဘဝမှာ အမြဲတမ်း စိတ်ဝင်စားစရာ ကောင်းနေသည်။

ရွှီယန်က အုန်းရည်သောက်ရင်း အပြင်သို့ ထွက်လာကာ မြေခွေးများ၏ အခြေအနေကို လာရောက် ကြည့်ရှုလိုက်၏။ သူက အသားခြောက်များနှင့် သစ်သီးခြောက်များကိုလည်း တကူးတက ယူဆောင်လာခဲ့သည်။

လိုက်ဖ်လွှင့်ခြင်းကိုလည်း တစ်ပြိုင်နက်တည်း ဖွင့်ထား၏။ တစ်ခါတစ်ရံ အားနေချိန်တွင် လိုက်ဖ်လွှင့်လိုက်ခြင်းဖြင့် နာမည်ကျော်ကြားမှု ရမှတ် အချို့ကို ရရှိနိုင်ပေသည်။

မြေခွေးအထီး နှစ်ကောင်က ရွှီယန် လာသည်ကို မြင်သောအခါ အပြေးအလွှား လာရောက် ကြိုဆိုကြသည်။ ရွှီယန်က သူတို့ကို တစ်ချက် ပွတ်သပ်ပေးလိုက်ပြီးနောက် မြေခွေးမလေး၏ အခြေအနေကို ဆက်လက် ကြည့်ရှုလိုက်၏။

"ဒါက မြေခွေးလေးရဲ့ ပထမဆုံး ကိုယ်ဝန်ဆိုတော့ သေချာ ဂရုစိုက်ပေးမှ ရမယ်..."

"သူ့ရဲ့ ခန္ဓာကိုယ် အခြေအနေကို ကျွန်တော် စစ်ဆေးပြီးပြီ... လောလောဆယ်တော့ အရမ်း ကျန်းမာနေတယ်..."

"တောရိုင်း တိရစ္ဆာန်တွေ အတွက်က ကလေးမွေးပြီးခါစ အချိန်မှာ ပြဿနာ ဖြစ်ဖို့ အရမ်း လွယ်တယ်လေ... ဒါကြောင့် ကျွန်တော် သေချာ ဂရုစိုက်ပေးရမယ်..."

"ဒီတစ်ခါ မြေခွေးလေး ဘယ်နှကောင် မွေးလာမလဲ ဆိုတာတော့ မသိသေးဘူးပေါ့..."

ရွှီယန်က မြေခွေးလေးကို ပွတ်သပ်ရင်း အားလုံးကို ပြောလိုက်သည်။

မြေခွေးမိသားစု ရွှီယန်၏ လယ်ယာခြံဝင်းသို့ လာရောက် မီးဖွားခြင်းက လျှို့ဝှက်ချက် တစ်ခု မဟုတ်တော့ချေ။ အင်တာနက်သုံးစွဲသူ အတော်များများက ဤကိစ္စကို သိရှိထားကြပြီး အားလုံးကလည်း အထူး ဂရုစိုက် စောင့်ကြည့်နေကြသည်။ ရွှီယန်၏ လယ်ယာခြံဝင်းရှိ တိရစ္ဆာန်များက အလွန် ထူးဆန်းပြီး လူအများ၏ အချစ်ကို ရရှိထားကြ၏။

[လောင်ရွှီ... မွေးလာမယ့် မြေခွေးလေးတွေထဲက တစ်ကောင်လောက် ငါ့ကို ပေးလို့ရမလား]

[ငါလည်း လိုချင်တယ်]

အင်တာနက်သုံးစွဲသူ အချို့က မြေခွေးလေးများကို ကြိုတင် မှာယူရန် ကြိုးစားနေကြသည်။ ထိုကဲ့သို့သော မေးခွန်းများကိုတော့ ရွှီယန်က ပြန်မဖြေခဲ့ချေ။ ဤသည်တို့မှာ တောရိုင်း မြေခွေးများ ဖြစ်ရာ ကြိုတင် မှာယူ၍ မရနိုင်ပေ။

မြေခွေးလေးများက အသားခြောက်များနှင့် သစ်သီးခြောက်များကို စားသောက်ပြီးနောက် အလွန် ပျော်ရွှင်စွာ ရယ်မောနေကြ၏။ သူတို့အတွက်တော့ လယ်ယာခြံဝင်းက သုခဘုံလေး တစ်ခုပင် ဖြစ်သည်။ ဤသည်မှာ လယ်ယာခြံဝင်း အပြည့်အဝ မဖွံ့ဖြိုးသေးချိန်ပင် ဖြစ်ပြီး အကယ်၍ စိုက်ပျိုးသီးနှံများ ကြီးထွားလာပါက တိရစ္ဆာန်လေးများ အတွက် ပို၍ပင် လှပသော နေရာတစ်ခု ဖြစ်လာပေလိမ့်မည်။

ရွှီယန်က ဘေးရှိ စိုက်ခင်းများကို လှမ်းကြည့်လိုက်သည်။

နောက်နှစ်ရက်အတွင်း မြက်စေ့များ စတင် စိုက်ပျိုးတော့မည် ဖြစ်ပြီး အာလူးများကိုလည်း စိုက်ပျိုးတော့မည် ဖြစ်၏။ နွေဦးရာသီတွင် စိုက်ပျိုးပြီးနောက် ဆောင်းဦးရာသီ၏ ရိတ်သိမ်းချိန်ကို မျှော်လင့်ရမည် ဖြစ်ရာ ဤစိုက်ပျိုးသီးနှံများကို ပြုစုပျိုးထောင်ရာတွင်လည်း စိတ်အားထက်သန်စွာ လုပ်ဆောင်ရပေမည်။

ရွှီယန်က ခဏမျှ လှည့်လည်သွားလာပြီးနောက် လိုက်ဖ်ကို ပိတ်ကာ အခန်းထဲသို့ ပြန်လည် အနားယူရန် ဝင်သွားခဲ့သည်။

လူနေဆောင်များ ရှိရာဘက်တွင်တော့ ကျန်းရှန်ချန်က သူကိုယ်တိုင် ဝယ်ယူထားသော နပိန်းတုံး နှစ်ခုနှင့် သံတုံး တစ်ခုတို့ဖြင့် ကိုယ်ကာယ လေ့ကျင့်ခန်း လုပ်နေ၏။ သူက ပုံမှန်အားဖြင့် အိမ်မပြန်ဘဲ လယ်ယာခြံဝင်းတွင်သာ နေထိုင်လေ့ ရှိသည်။ သူ ထိုနေရာတွင် လေ့ကျင့်ခန်း လုပ်နေသဖြင့် တိရစ္ဆာန်လေးများက လုံးဝ အနားမကပ်ရဲကြချေ။ ကြည့်ရသည်မှာ အမှန်တကယ်ပင် ခန့်ညားထည်ဝါလှပေသည်။

ကျန်းရှန်ချန်မှာ အသံတိတ် နေတတ်သူ တစ်ဦးဖြစ်ပြီး စကားများများ မပြောတတ်သော်လည်း အလုပ်လုပ်ရာတွင်တော့ အလွန် တော်ပေသည်။

လယ်ယာခြံဝင်း၏ တိုးတက်မှုများက စနစ်တကျ ရှိလှ၏။ အလုပ်များဖြင့် ရှုပ်ယှက်ခတ်နေသည်မှာ ရက်အနည်းငယ် ရှိသွားပြီဖြစ်ရာ ရတနာရှာဖွေရေး သံလိုက်အိမ်မြှောင်၏ အကြိမ်ရေများလည်း တဖြည်းဖြည်း စုပုံလာခဲ့ပြီ ဖြစ်သည်။

ရွှီယန်လည်း တောင်ထဲသို့ ဝင်ရောက် လည်ပတ်ရန် အချိန်ရောက်ပြီ ဖြစ်၏။

သူက ချန်ပိုင်တောင်တန်း၏ မြေပုံကို ထုတ်ယူကာ သူ ရောက်ဖူးခဲ့သော နေရာများကို မှတ်သားလိုက်သည်။ တောင်တန်းကြီး၏ ဧရိယာက အလွန် ကြီးမားပြီး အချို့နေရာများက သဘာဝဥယျာဉ် အဖြစ် ပြောင်းလဲထားကာ အချို့နေရာများက တက်ရောက်၍ မရနိုင်သော မတ်စောက်သည့် တောင်ကုန်းများ ဖြစ်ပြီး အချို့နေရာများက သဘာဝ ထိန်းသိမ်းရေး နယ်မြေများ ဖြစ်ကြကာ အချို့နေရာများတွင်တော့ တောင်ပေါ်ရွာလေးများ ရှိနေကြသည်။

ဤသို့ ကြည့်မည်ဆိုပါက စူးစမ်းရှာဖွေနိုင်သည့် ဧရိယာက ထိုမျှလောက် မများပြားလှချေ။

'တောင်ထဲ ဝင်ပြီး တစ်ပတ်လောက် ပတ်ကြည့်ရမယ်...'

'တောင်ထဲ မဝင်တာ တော်တော် ကြာပြီပဲ...'

ရွှီယန်က စိတ်ထဲမှ တွေးလိုက်၏။

'ဒါပေမယ့် ချန်ပိုင်တောင်တန်း အကြောင်း အရမ်း သိနေတော့ အခု တောင်ထဲဝင်ရင် စိတ်လှုပ်ရှားစရာ နည်းနည်း လျော့သွားသလိုပဲ...'

ရွှီယန်က တောင်ထဲသို့ ဝင်ခဲ့သည်မှာ အကြိမ်ပေါင်းများစွာ ရှိနေပြီ ဖြစ်သည်။ တောင်ထဲရှိ ရှုခင်းများက သူ့ကို စိတ်အေးချမ်းသာ ရှိစေဆဲ ဖြစ်သော်လည်း တင်းမာမှု ခံစားချက်များ လျော့နည်းသွားသည်ဟု အမြဲတမ်း ခံစားနေရ၏။

မည်သို့ပင်ဖြစ်စေ ယခုအခါ သူ၏ ခန္ဓာကိုယ် ကြံ့ခိုင်မှုက အလွန် ကောင်းမွန်နေပြီး အန္တရာယ်ကိုလည်း ကြိုတင် သိရှိနိုင်ကာ တောင်ထဲရှိ အခြေအနေများကိုလည်း ကျွမ်းကျင်နေပြီဖြစ်ရာ တောင်ထဲသို့ ဝင်ရောက်ခြင်းက ပန်းခြံထဲတွင် လမ်းလျှောက်နေရသကဲ့သို့ပင် ဖြစ်နေပေသည်။ ပေါ့ပါး လွတ်လပ်လွန်းလှ၏။

ကံကောင်းစွာဖြင့် ရတနာရှာဖွေရေး သံလိုက်အိမ်မြှောင် ရှိနေသဖြင့် ရတနာရှာဖွေရေး တာဝန် နှစ်ခုခန့် လုပ်ဆောင်ရသည်မှာ အနည်းငယ် စိတ်လှုပ်ရှားစရာ ကောင်းပေသည်။ (VR) ဂိမ်းကစားနေရသကဲ့သို့ပင်။

ညဘက်သို့ ရောက်သောအခါ ရှောင်ဟွာက ခြံဝင်း အပြင်ဘက်တွင် ဆူညံနေ၏။ ၎င်းက ပုံမှန်အားဖြင့် အစာစားပြီးသည်နှင့် အသိုက်ထဲသို့ ဝင်ကာ အိပ်လေ့ရှိသော်လည်း ယနေ့တွင်တော့ ထိုသို့ မဟုတ်ဘဲ ခြံဝင်းထဲတွင် တစ်ပတ်ပြီးတစ်ပတ် လှည့်ပတ် လမ်းလျှောက်နေသည်။

ရှောင်ဟေးနှင့် ယွမ်ပေါင်တို့က ၎င်းကို ကြည့်ကာ ဘာဖြစ်နေသလဲ ဆိုသည်ကို နားမလည်နိုင်အောင် ဖြစ်နေကြ၏။ ရှောင်ဟွာက တစ်ခါတစ်ရံတွင် ရွှီယန်၏ တံခါးကို နှစ်ချက်ခန့် လာကုတ်တတ်သေးသည်။ ရွှီယန်က အသံကြားသည်နှင့် အပြင်သို့ ထွက်လာကာ ကြည့်ရှုလိုက်၏။

သူက တိရစ္ဆာန်များ၏ စရိုက်လက္ခဏာများကို အလွန် နားလည်ထားပြီး အထူးသဖြင့် ကျားသစ်များ၏ စရိုက်ကို ပို၍ နားလည်ပေသည်။ ရှောင်ဟွာ ဤသို့ ဖြစ်နေခြင်းက ၎င်း၏ အတွင်းစိတ်က မတည်ငြိမ်ဘဲ အလွန် ဂနာမငြိမ် ဖြစ်နေကြောင်း ဖော်ပြနေခြင်းပင်။

မည်သို့ပင်ဖြစ်စေ တောရိုင်း တိရစ္ဆာန် ဖြစ်ရာ စရိုက်လက္ခဏာက တောရိုင်း သဘာဝဘက်သို့ ပိုမို ယိမ်းယိုင်နေပေမည်။ တကယ်တော့ ရွှီယန်က ရှောင်ဟွာ၏ အကောင်းဆုံး အခြေအနေမှာ မြေခွေးလေးများကဲ့သို့ ပုံမှန်အချိန် တောထဲတွင် ဆော့ကစားနေပြီး လယ်ယာခြံဝင်းသို့ လာချင်သည့် အချိန်မှသာ လာခြင်းမျိုး ဖြစ်သည်ဟု ခံစားရ၏။

သို့သော်လည်း သားရဲတိရစ္ဆာန် ဖြစ်ရာ အကယ်၍ အမဲလိုက်ခြင်းကို စတင် လုပ်ဆောင်လာပါက လယ်ယာခြံဝင်း အတွင်းသို့ ဝင်ရောက်လာခြင်းက အန္တရာယ် ရှိလာနိုင်ပေသည်။ သို့မဟုတ် အကောင်းဆုံး အခြေအနေမှာ တားဟွာ ကဲ့သို့ လူသားများ အပေါ် သတိထားပြီး ရွှီယန်ကိုသာ ခင်မင်တွယ်တာခြင်းမျိုး ဖြစ်၏။

"အဖော် ရှာချင်နေတာပဲ... အရွယ်ရောက်လာပြီ ဆိုတော့လည်း..."

"ဒီဘက်က တွန်းအားက တော်တော် ပြင်းထန်တာကိုး..."

ရွှီယန်က ရှောင်ဟွာ၏ အခြေအနေကို ကြည့်ကာ တွက်ဆနေလိုက်သည်။ ရှောင်ဟွာက ချစ်စရာ ကောင်းနေဆဲဖြစ်ပြီး အလွန် ချွဲနွဲ့တတ်ပေသည်။ သို့သော် ကြည့်ရသည်မှာ ထိုမျှလောက် ရင့်ကျက်နေပုံ မပေါ်သေးချေ။

ရွှီယန်က ခဏစဉ်းစားပြီးနောက် တောင်ထဲဝင်မည့် အခွင့်အရေးကို အသုံးချကာ ရှောင်ဟွာကို ကျားနှင့် ကျားသစ် သဘာဝဥယျာဉ် ပတ်ဝန်းကျင် ဧရိယာသို့ ခေါ်သွားရန် ရည်ရွယ်လိုက်၏။ တောင်စောင့်နတ်လေး (ဝမ်တာတောင် နံပါတ် ၁) ၏ နယ်မြေ အပြင်ဘက်သို့သာ ဖြစ်သည်။

သူတို့ နှစ်ကောင်ကိုတော့ သေချာပေါက် ပေးတွေ့၍ မရနိုင်ချေ။ အဘယ်ကြောင့်ဆိုသော် ကျားများက ကျားသစ်များကို အမဲလိုက်တတ်သောကြောင့် ဖြစ်၏။ ထို့ကြောင့် ရွှီယန်ကလည်း အရမ်း နက်ရှိုင်းသော နေရာအထိတော့ ဝင်မည် မဟုတ်ပေ။

"ရှောင်ဟွာ... မနက်ဖြန် ငါနဲ့ တောင်ထဲ သွားရအောင်... ဒီတစ်ခါ ငါတို့ တောနက်ကြီးထဲကို နည်းနည်း ဝင်ကြည့်ကြမယ်..."

"တခြား ကျားသစ် တွေ ရှိမရှိ သွားရှာကြည့်ရအောင်..."

"မင်းလည်း ကိုယ့်ဘာသာကိုယ် ရပ်တည်နိုင်ဖို့ အချိန်တန်ပြီလေ... ဒီအသက်အရွယ်က ကွက်တိပဲ..."

"တကယ်လို့ မင်း အမဲလိုက်တာကို သင်ယူနိုင်ရင် နောက်ဘက်က တောင်ပေါ်မှာ နေလို့ ရတယ်... အဲဒီတောင်ပေါ်မှာ တောကြက် တွေ ယုန် တွေ တော်တော်များတယ်... ပြီးတော့ တောဝက်ပေါက်လေး တွေလည်း ရှိတော့ အစာအတွက် ပူစရာ မလိုဘူးလေ..."

ရွှီယန်က ရှောင်ဟွာကို ပြောလိုက်၏။ ရှောင်ဟွာက မျက်တောင်လေး ပုတ်ခတ်ပုတ်ခတ် လုပ်ကာ နားလည်သလို နားမလည်သလို နေနေသည်။

ရွှီယန်က စောစောပင် အိပ်ရာဝင်သွားခဲ့၏။

နောက်တစ်နေ့တွင် သူက ကားပေါ်သို့ တက်ကာ ရှောင်ဟွာကို ခေါ်ဆောင်ပြီး တောင်ထဲသို့ တောက်လျှောက် မောင်းနှင်သွားခဲ့သည်။ တောရိုင်း တိရစ္ဆာန်များကို ခွင့်ပြုချက်မရှိဘဲ သယ်ယူပို့ဆောင်ခြင်းက ဥပဒေကို ချိုးဖောက်ခြင်း ဖြစ်သော်လည်း ရွှီယန်တွင် သဘာဝ ထိန်းသိမ်းရေး စခန်း၏ အမည်ခံ ရှိနေပြီး အနီးအနားတွင်သာ ရွှေ့ပြောင်းခြင်း ဖြစ်သဖြင့် ပြဿနာ မရှိလှချေ။

ရှောင်ဟွာက ပထမဆုံးအကြိမ် ကားစီးရသဖြင့် အနည်းငယ် ကြောက်ရွံ့နေပြီး နောက်ခန်းတွင် ငြိမ်သက်စွာ ဝပ်နေ၏။ ရွှီယန်ကလည်း နောက်ခန်းတွင် ထိုင်ကာ ၎င်းကို အဖော်ပြုပေးနေသည်။

ယနေ့ တောင်ထဲ ဝင်ရခြင်းမှာ ရှောင်ဟွာ အတွက် မိန်းမ ရှာပေးရန်လည်း ဖြစ်၏။ ယခင်က ရွှီယန်က ဤနေရာတွင် ကျားသစ်နက် တစ်ကောင်ကို တွေ့ခဲ့ဖူးသည်။ ၎င်းမှာ အလွန် ခန့်ညားသော ကျားသစ်နက် တစ်ကောင် ဖြစ်၏။

ထိုစဉ်က ရွှီယန်က ၎င်းနှင့် အပြန်အလှန် စိုက်ကြည့်ခဲ့ဖူးပြီး အကြည့်များအရ ထိုအကောင်မှာ ကျားသစ်မ တစ်ကောင် ဖြစ်မည်ဟု ရွှီယန်က ခန့်မှန်းခဲ့သည်။ အဘယ်ကြောင့်ဆိုသော် သူက ကျားသစ်များနှင့် အတော်လေး ရင်းနှီးသဖြင့် အကြမ်းဖျင်းအားဖြင့် ကြည့်ရှု ခွဲခြားနိုင်သောကြောင့် ဖြစ်၏။ ထို့အပြင် ကျားသစ်နက်၏ အသက်ကလည်း မကြီးသေးဘဲ အကြည့်များက စူးရှသော်လည်း လောကဓံ အတွေ့အကြုံ ရင့်ကျက်နေသည့် အရိပ်အယောင် များများစားစား မရှိခဲ့ချေ။

ယခုက ကျားသစ်များ၏ မျိုးပွားရာသီ ဖြစ်ပြီး အရှေ့မြောက် ကျားသစ် အရေအတွက်ကလည်း အတော်လေး နည်းပါးသဖြင့် မျိုးတူ အဖော်ကို ရှာတွေ့ရန် အလွန် ခက်ခဲလှရာ ရှောင်ဟွာ အတွက်တော့ မျှော်လင့်ချက် အတော်လေး ကြီးမားပေသည်။ တားဟွာ က ကျားနှင့် ကျားသစ် သဘာဝဥယျာဉ် ထဲသို့ ပြန်ပြေးသွားခြင်းမှာလည်း သူ၏ မျိုးတူ အဖော်ကို ရှာဖွေရန် အတွက် ဖြစ်နိုင်ပေသည်။

ကားက ရပ်တန့်သွားပြီး လူတစ်ယောက်နှင့် ကျားသစ် တစ်ကောင်တို့က ကားပေါ်မှ ဆင်းလာခဲ့ကြ၏။

"သူဌေး... စိတ်ချလက်ချ သာ သွားပါ... ကျွန်တော် ဒီမှာ စောင့်ကြည့်ပေးထားပါ့မယ်..."

"ဒီတောင်ပေါ်လမ်းက ကား သိပ်မရှိပါဘူး... သူဌေးတို့ ပြန်လာရင် ကျွန်တော့်ဆီ မက်ဆေ့ချ် ပို့လိုက်... ကျွန်တော် လမ်းအခြေအနေကို ကြည့်ပြီး အကြောင်းပြန်ပေးမယ်..."

"ကားနဲ့ ကျားသစ် တင်လာတာကို ဘယ်သူမှ မမြင်စေရပါဘူး..."

မာဝန်က ရွှီယန်ကို ပြောလိုက်သည်။

"အိုကေ... ကြီးကြီးမားမား ကိစ္စတော့ မဟုတ်ပါဘူး... ဒါပေမယ့် လူတွေ မြင်သွားရင်တော့ သိပ်မကောင်းဘူးလေ..."

"မင်း အရင်ဆုံး မြို့ထဲကို ကားမောင်းသွားလိုက်ပါလား... ဝယ်စရာ ပစ္စည်းတွေ ရှိသေးတယ် မလား... ညနေ သုံးနာရီ လေးနာရီလောက်မှ ဒီနေရာကို ပြန်လာကြိုပေါ့..."

ရွှီယန်က သူ့ကို စီစဉ်ပေးလိုက်၏။ လယ်ယာခြံဝင်းက အနည်းငယ် ခေါင်သဖြင့် တစ်ခါတစ်ရံ တစ်ယောက်ယောက် မြို့ထဲသို့ သွားမည် ဆိုပါက အခြားသူများကလည်း ပစ္စည်း အချို့ကို မှာယူတတ်ကြသည်။

လယ်ယာခြံဝင်း အတွက်လည်း ရေပိုက်ခေါင်း... ရေပိုက်... လျှပ်စစ်ကြိုး... တံမြက်စည်း ကဲ့သို့သော ပစ္စည်း အချို့ကို ဝယ်ယူရန် လိုအပ်သေး၏။ ထို့ကြောင့် မာဝန်တွင်လည်း ရွှီယန် ခိုင်းထားသော အလုပ်များ ရှိနေသည်။

ရွှီယန်ကတော့ ကျားသစ်ကို ခေါ်ကာ တောင်ထဲသို့ ဝင်သွားခဲ့ပြီ ဖြစ်သည်။ သူက ကျောပိုးအိတ် တစ်လုံးကိုသာ လွယ်ထားပြီး အလွန် ပေါ့ပါး လွတ်လပ်နေပုံရ၏။

ယခု တောင်ထဲ ဝင်ရာတွင် တောင်ထွက်ပစ္စည်း များကို အတင်းအကြပ် ရှာဖွေရန် မလိုအပ်တော့ချေ။ မည်သို့ပင်ဖြစ်စေ သူက လောလောဆယ် ငွေကြေး မလိုအပ်သဖြင့် သာမန် မှိုများ... လင်ဇီးမှိုများ သို့မဟုတ် ဆေးဖက်ဝင် အပင်များကို အများအပြား တွေ့လျှင်ပင် ခူးယူရန် မလိုအပ်တော့ပေ။

ကိုယ့်ဘာသာကိုယ် စားချင်သော အရာများမှလွဲ၍ပေါ့။ စီးပွားရေး အခြေအနေက လူနေမှု အဆင့်အတန်းကို အဆုံးအဖြတ် ပေးသည်ဆိုတာ တကယ် မှန်ပေသည်။ ယခင်က အိတ်ကပ်ထဲတွင် ပိုက်ဆံ မရှိချိန်က ဝူဝေ့ကျစ် (Schisandra) နှင့် တောသစ်ကြားသီး ကဲ့သို့သော အရာများကို မြင်တွေ့ပါက ကိုယ်ပွားလေး အများအပြား ဖန်တီးကာ တောင်းများစွာဖြင့် ထမ်းယူသွားချင်စိတ် ပေါ်လာခဲ့၏။

ယခုတော့ ထိုသို့ တွေးမည် မဟုတ်တော့ချေ။ ကိုယ်တိုင် စားချင်သော မှိုများ ဥပမာ နွားအသည်းမှို... သိုးအူမှို... ကြက်ဆိတ်မှို ကဲ့သို့သော အရာများကိုသာ မြင်တွေ့လျှင် ခူးယူတော့မည် ဖြစ်သည်။ သို့မဟုတ် ဟွားရှုရုံ (Chaga mushroom) ကဲ့သို့သော ဈေးကြီးသည့် တောင်ထွက်ပစ္စည်း များကိုသာ ခူးယူတော့မည် ဖြစ်၏။

လူတစ်ယောက်နှင့် ကျားသစ် တစ်ကောင်တို့က တောင်ထဲသို့ ဝင်လာခဲ့ကြသည်။ မရင်းနှီးသော ဧရိယာ ဖြစ်သဖြင့် ရှောင်ဟွာ က အနည်းငယ် သတိထားနေပုံရ၏။ နေရာ အတော်များများတွင် ရွှီယန်၏ ခန္ဓာကိုယ်နှင့် ပူးကပ်နေတတ်သည်။

၎င်းက မကြုံစဖူး ခန္ဓာကိုယ်ကို ဝပ်ချကာ ပတ်ဝန်းကျင်ကို အကဲခတ်နေ၏။ ကျယ်ပြောလှသော တောအုပ်ကြီးထဲမှ ဖိအား အချို့ကို ခံစားနေရပုံရသည်။ ရွှီယန်က ၎င်း ဤသို့ ဖြစ်နေသည်ကို မြင်သောအခါ ချက်ချင်းပင် ရယ်မောလိုက်တော့သည်။

'မဆိုးဘူးပဲ... သွေးသားထဲက သဘာဝ နိုးထလာပြီပေါ့...'

'ကြည့်ရတာ တော်တော်လေး ဟန်ကျနေတာပဲ...'

'တကယ်လို့ သတိဝီရိယ ရှိလာပြီ ဆိုရင်တော့ တောင်ထဲက ဘဝကို အဆင်ပြေပြေ ဖြတ်သန်းနိုင်မှာပါ...'

လူတစ်ယောက်နှင့် ကျားသစ် တစ်ကောင်တို့က အတွင်းဘက်သို့ တောက်လျှောက် ဝင်ရောက်သွားကြသည်။ ဤဘက်ရှိ သစ်ပင်ပန်းမန်များက ပို၍ စိမ်းလန်းစိုပြေပြီး ဇီဝမျိုးကွဲများလည်း ပိုမို ကြွယ်ဝလှ၏။ ရေခဲနှင့် နှင်းများ အားလုံးနီးပါး အရည်ပျော်သွားပြီဖြစ်ပြီး မြက်ပင်များကလည်း စတင် ထွက်ပြူလာကာ ပတ်ဝန်းကျင်က အလွန် လှပနေပေသည်။

တစ်နာရီကျော်ခန့် လျှောက်လာပြီးနောက်မှသာ ရွှီယန်က လိုက်ဖ်လွှင့်ခြင်းကို ဖွင့်လိုက်၏။

ယနေ့ လိုက်ဖ်လွှင့်မည့် အကြောင်းအရာ... [တောနက်ကြီးထဲက အပန်းဖြေ လမ်းလျှောက်ခြင်း]

လိုက်ဖ် ခေါင်းစဉ်ကို မြင်သောအခါ အင်တာနက်သုံးစွဲသူများ ချက်ချင်းပင် အနည်းငယ် ဆွံ့အသွားကြတော့သည်။ ဘယ်သူကများ တောနက်ကြီးထဲမှာ အပန်းဖြေ လမ်းလျှောက် ထွက်တတ်သနည်း။ ဤသည်က သာမန်လူများ လုပ်နိုင်သော ကိစ္စလား။

ရွှီယန်သာလျှင် လုပ်နိုင်ပေလိမ့်မည်။

[လောင်ရွှီ... အပြင်ထွက် လမ်းလျှောက်ပြန်ပြီလား]

[ကျားသစ်လေး ပါ ခေါ်လာတာလား]

[ဒါ ဘယ်သွားမလို့လဲ]

[ဒီမြင်ကွင်းကို မြင်ရတိုင်း အမြဲတမ်း အားကျနေရတယ်... ငါလည်း ဒီလောက်ကြီးတဲ့ ကျားသစ် တစ်ကောင်လောက် လိုချင်လိုက်တာ]

မကြာသေးမီက ကျားသစ်များ အတော်လေး နာမည်ကြီးနေခဲ့ပြီး ကျားသစ် တစ်ကောင်က လူသားများ၏ နယ်မြေသို့ ရောက်လာကာ အကူအညီ တောင်းခံခဲ့ပြီးနောက် လူတိုင်းက ကျားသစ်များကို ပို၍ ဂရုစိုက်လာကြခြင်း ဖြစ်၏။

လူအတော်များများက ကျားသစ်များကို အရွယ်အစား ကြီးမားသော ကြောင်ဝါကြီးများနှင့် တူသည်ဟု ပြောကြသည်။ စရိုက်လက္ခဏာ အရ ကြည့်မည်ဆိုပါက ကျားသစ်များက ကြောင်များနှင့် တကယ်ကို ဆင်တူလှပေသည်။ အတူတူ သတိထားတတ်ပြီး အတူတူ သွက်လက်ကြ၏။

နှိုင်းယှဉ်ကြည့်မည်ဆိုပါက ကျားများက ပို၍ ခန့်ညားထည်ဝါပြီး တည်ငြိမ်ကာ ကြောင်များနှင့် သိပ်မတူညီတော့ချေ။

ရွှီယန်က ဤကျားသစ်လေးကို အလွန် သဘောကျပြီး ချစ်စရာ ကောင်းလွန်းလှပေသည်။ သူတို့ နှစ်ယောက်က တောထဲတွင် လမ်းလျှောက်ရင်း အတွင်းဘက်သို့ တောက်လျှောက် ဝင်လာခဲ့ကြ၏။

"အခုက ကျားသစ်တွေရဲ့ မျိုးပွားရာသီကို ရောက်နေပြီလေ... ရှောင်ဟွာ ကို ခေါ်လာပြီး ဒီဘက်မှာ အဖော်များ တွေ့မလားလို့ လာရှာကြည့်တာပါ..."

"ကျားသစ် ပေါက်လေးတွေ များများ ဖန်တီးနိုင်မလားလို့..."

"အရှေ့မြောက် ကျားသစ်တွေက အရှေ့မြောက် ကျားတွေထက်တောင် ရှားပါးသေးတယ်... တကယ်လို့ ကျားသစ် ပေါက်လေးတွေ မွေးနိုင်ခဲ့ရင် ဇီဝမျိုးကွဲတွေ ပိုပြီး ကြွယ်ဝလာတာပေါ့..."

ရွှီယန်က အင်တာနက်သုံးစွဲသူများကို ဤခရီးစဉ်၏ ရည်ရွယ်ချက်ကို ရှင်းပြလိုက်သည်။

ထိုစကားကို ကြားသောအခါ အားလုံးက ချက်ချင်းပင် မျှော်လင့်လာကြတော့၏။

'ဟာ...'

'ကျားသစ် ကို ခေါ်ပြီး မိန်းမ လာရှာတာလား...'

'ဒီတုံးအအ ကောင်လေးကို သဘောကျမယ့် ကျားသစ်မ ရှိပါ့မလား...'

သို့သော် ရွှီယန်၏ စိတ်ထဲတွင်တော့ ရှောင်ဟွာ က အနည်းငယ် တုံးအအ ဖြစ်သော်လည်း ရုပ်ထွက်ကတော့ အလွန် ကောင်းမွန်လှပေသည်။ ထို့အပြင် ကောင်းစွာ ကျွေးမွေး ပြုစုထားသဖြင့် ခန္ဓာကိုယ်က အလွန် ကြံ့ခိုင် တောင့်တင်းနေပြီး အမွေးများကလည်း အလင်းရောင် ထွက်နေသကဲ့သို့ တောက်ပနေကာ မျက်နှာ တစ်ခုလုံးကလည်း ပြည့်ဖြိုးနေ၏။ ကြည့်ရသည်မှာ အလွန် ချမ်းသာကြွယ်ဝသည့်ပုံ ပေါက်နေသည်။

ဤကဲ့သို့ ခန့်ညားသော ကျားသစ်လေးက သေချာပေါက် သဘောကျ ခံရမည် ဖြစ်၏။