အခန်း ၈၉၉

အခန်း(၈၉၉) ပြီးပြည့်စုံသော ခန္ဓာကိုယ်

ထိုသို့သော ထူးခြားဆန်းပြားသည့် ဖြစ်တည်မှု အလုံးစုံတို့က ချင်နန်ယွင်၏ ခန္ဓာကိုယ်သည် ယခုအခါ၌ စိတ်ကူးပင် ယဉ်ကြည့်၍မရနိုင်သော စွမ်းအားတို့ ကိန်းအောင်းနေပြီး လောကဝယ် အင်အားအကြီးမားဆုံးသော ရုပ်ကလာပ် ဖြစ်လာခဲ့ပြီဟူသောအချက်ကို ညွှန်ပြနေချေသည်။

ချင်ယွမ်ဖုန်းသည် လွန်စွာမှ ရင်တမမ ဖြစ်နေရပေရာ နဖူးပြင်ထက်၌ ချွေးစေးများပင် ပျံတက်နေတော့သည်။ ဤအရာအားလုံးကို လုပ်ဆောင်ရန်အတွက်ပင် နှစ်ရက်မျှသော အချိန်သည် ကုန်လွန်သွားခဲ့ပြီ ဖြစ်ချေသည်။

ယင်းက ချင်နန်ယွင်၏ ပြီးပြည့်စုံလုနီးပါးဖြစ်နေသော ခန္ဓာကိုယ်ကို ကြည့်ရှုလိုက်ပြီး စိတ်အကြံတစ်ခုဖြင့် ခရမ်းရောင်မီးလျှံငယ်တစ်ခုကို ချင်နန်ယွင်၏ ညာဘက်လက်မောင်းထက်သို့ ကျရောက်စေလိုက်သည်။

ခရမ်းရောင်မီးလျှံများသည် ချင်နန်ယွင်၏ ခန္ဓာကိုယ်ထဲသို့ စိမ့်ဝင်ပေါင်းစပ်သွားကြပြီး သူမ၏ ညာဘက်လက်မောင်းတစ်ခုလုံးကို လွှမ်းခြုံပတ်ဆန်းသွားချေသည်။

ထိုသို့ဖြင့် ချင်နန်ယွင်သည်လည်း သူနည်းတူ ရွှေရောင်မိုးကြိုးနှင့် ခရမ်းရောင်မီးဟူသော အစွမ်းထက်သည့် ဓာတ်စွမ်းအင်နှစ်ခုကို ပိုင်ဆိုင်သွားခဲ့ပြီ ဖြစ်တန်ရာသည်။

"နောက်ဆုံးတော့ ပြီးသွားခဲ့ပြီပဲ၊ နန်ယွင်ရဲ့ ခန္ဓာကိုယ်က အခုဆိုရင် အကောင်းဆုံး အခြေအနေကို ရောက်သွားပါပြီ" ချင်ယွမ်ဖုန်းသည် တိုးညင်းစွာ ရေရွတ်လိုက်မိချေသည်။

ရှောင်လင်သည် ချင်ယွမ်ဖုန်း၏ စိတ်ဝိညာဉ်နယ်ပယ်ထဲ၌ ပေါ်လာကာ "အရှင်သခင်၊ သမီးငယ်ရဲ့ ခန္ဓာကိုယ်က လောကမှာ တစ်ခုတည်းသော ဖြစ်တည်မှု ဖြစ်သွားပါပြီ၊ သူမရဲ့ နောင်အနာဂတ် အောင်မြင်မှုတွေက အံ့မခန်း ဖြစ်လာမှာ အသေအချာပါပဲ" ဟု ပြောကြားလာသည်။

"ငါကတော့ သူမ ဘေးကင်းဖို့ပဲ တောင်းဆုပြုပါတယ်" ချင်ယွမ်ဖုန်းက တည်ငြိမ်စွာဖြင့်ပင် "ဒီနေ့ကစပြီး ဘယ်သူပဲဖြစ်ဖြစ် နန်ယွင်ကို အန္တရာယ်ပြုဖို့ ကြိုးစားလာရင် ငါကတော့ အလွတ်ပေးမှာ မဟုတ်ဘူး" ဟု ဆိုလိုက်ချေသည်။

ရှောင်လင်က ခေါင်းညိတ်ပြလျက် "အရှင်သခင်၊ ကျွန်မတို့ သမီးငယ်ရဲ့ ဝိညာဉ်နဲ့ ခန္ဓာကိုယ်ကို ပေါင်းစပ်ပေးဖို့အတွက် နတ်သက်ကြွေဆေးလုံးကို ဖော်စပ်ဖို့ လိုပါသေးတယ်" ဟု သတိပေးရှာသည်။

"သိသားပဲ။"

ချင်ယွမ်ဖုန်းသည် မတ်တတ်ထရပ်လိုက်ပြီး ထိုနားမှ ဖြတ်သွားသော ကူကူးကို လှမ်းခေါ်လိုက်ချေသည်။

"ကူကူး၊ လင်ဇီအာဆီကနေ နတ်သက်ကြွေဆေးမြက် အရွက်အနည်းငယ်လောက် သွားတောင်းပေးပါဦး။"

ချင်ယွမ်ဖုန်း၏ စကားကို ကြားရလျှင် ကူကူးသည် အလျင်အမြန်ပင် ခေါင်းညိတ်ပြကာ အပြင်သို့ ပြေးထွက်သွားတော့သည်။ မကြာမီအချိန်အတွင်းမှာပင် သူမသည် နတ်သက်ကြွေဆေးမြက် အရွက်အချို့ကို ကိုင်ဆောင်လျက် ပြန်လည်ရောက်ရှိလာချေသည်။

"ကျေးဇူးပါ ကူကူး" ချင်ယွမ်ဖုန်းက ခပ်ဖွဖွလေး ပြုံးပြလိုက်သည်။

အဆိုးဝါးဆုံးနှင့် အခက်ခဲဆုံး အဆင့်ကို ကျော်ဖြတ်ပြီးသွားပြီဖြစ်ရာ ချင်ယွမ်ဖုန်း၏ စိတ်အစုံသည် များစွာ ပေါ့ပါးသွားခဲ့ရချေသည်။

"ကျွန်မကို အများကြီး ပေးထားတာပဲဥစ္စာ၊ အခုလို ကူညီပေးရတာလေးကို အားနာမနေပါနဲ့" ကူကူးက ပြုံးရွှင်စွာ ပြောရှာသည်။

ချင်ယွမ်ဖုန်းသည် ခေါင်းညိတ်ပြလိုက်ပြီးနောက် ကူကူး အပြင်သို့ မထွက်ခွာမီ နတ်သက်ကြွေဆေးလုံး ဖော်စပ်ရန်အတွက် လိုအပ်သော ဝိညာဉ်ဆေးပင်များကိုပါ ထပ်မံစုဆောင်းခိုင်းလိုက်ချေသည်။

ဆေးဖော်စပ်ရန် လိုအပ်သော ပစ္စည်းအလုံးစုံတို့ကို နဂါးဖမ်းဆေးမီးဖိုထဲသို့ ထည့်သွင်းလိုက်သည်။ ချင်ယွမ်ဖုန်းသည် သတ္တမအဆင့် ဆေးဖော်စပ်သူတစ်ဦးသာ ဖြစ်သော်လည်း အဋ္ဌမအဆင့်ရှိသော နတ်သက်ကြွေဆေးလုံးကို ဖော်စပ်ရန်အတွက်မူ မည်သို့မျှ စိုးရိမ်ပူပန်ခြင်း မရှိချေ။

ယင်းက သူသည် အဋ္ဌမအဆင့် ဆေးလုံးများကို အမှတ်မထင်ပင် လွယ်လွယ်ကူကူ ထုတ်လုပ်နိုင်သည့်အလား ရှိနေပေသည်။

ချင်နန်ယွင်၏ ခန္ဓာကိုယ်သည် ဆေးမီးဖိုထဲ၌ ရှိနေဆဲဖြစ်သော်လည်း ချင်ယွမ်ဖုန်း၏ ဆေးဖော်စပ်မှုကို တစ်စုံတစ်ရာ အနှောင့်အယှက် မဖြစ်စေဘဲ ဆေးအဆီအနှစ်အားလုံးကို လျင်မြန်စွာပင် သန့်စင်ပြီးစီးသွားချေသည်။

ကြီးမားလှသော ဝိညာဉ်စွမ်းအား အရှိန်အဝါတို့သည် ဆေးမီးဖိုထဲသို့ စီးဆင်းသွားပြီး အဆီအနှစ်အားလုံးကို ဗဟိုချက်ဆီသို့ ဖိသိပ်စုစည်းစေရာ ယင်းအဆီအနှစ်တို့သည် ချက်ချင်းပင် တစ်သားတည်း ပေါင်းစပ်သွားကြတော့သည်။

မကြာမီအချိန်၌ပင် ဆေးလုံး၏ ဘေးပတ်လည်၌ မှေးမှိန်သော နတ်ဘုရားအမှတ်အသား ထင်ဟပ်နေသည့် နတ်သက်ကြွေဆေးလုံးတစ်လုံးကို ဖော်စပ်ပြီးစီးသွားခဲ့ချေပြီ။

"ဟူး... အရာအားလုံး နောက်ဆုံးတော့ အဆင်သင့် ဖြစ်သွားပြီ" ချင်ယွမ်ဖုန်းသည် တိုးညင်းစွာ ညည်းတွားလိုက်သည်။

ဤအချိန်တွင်မူ ချင်ယွမ်ဖုန်းကိုယ်တိုင်ပင် အနည်းငယ် ရင်ဖိုလှုပ်ရှားလာရချေသည်။

"အရှင်သခင်၊ အမြန်ဆုံး စတင်ကြရအောင်၊ သမီးငယ်ရဲ့ ဝိညာဉ်က သုံးရက်အတွင်းမှာ ပျက်ပြယ်သွားမှာဖြစ်ပြီး အခုဆိုရင် တစ်ရက်တောင် မပြည့်တော့ပါဘူး" ရှောင်လင်က လောဆော်လာသည်။

ချင်ယွမ်ဖုန်း ခေါင်းညိတ်လိုက်ပြီး နတ်သက်ကြွေဆေးလုံးကို ချင်နန်ယွင်၏ ပါးစပ်ထဲသို့ ထည့်ပေးလိုက်ကာ သူ၏ လက်ဝါးကို ချင်နန်ယွင်၏ ထိပ်ဦးကလာပ်ထက်သို့ တင်လိုက်ချေသည်။

"နန်ယွင်၊ ပြန်လာရမယ့် အချိန်ရောက်ပြီ။" ချင်ယွမ်ဖုန်း၏ အသံသည် အမှောင်ထုထဲ၌ ဟိန်းထွက်သွားသည်။

ချင်နန်ယွင်သည် သူမ၏ နှစ်ခြိုက်စွာ အိပ်ပျော်နေရာမှ မျက်ဝန်းတို့ကို ဖြည်းညင်းစွာ ဖွင့်ဟလာပြီး "ဖေဖေလားဟင်" ဟု မေးရှာသည်။

"ဖေဖေပါပဲ၊ ဖေဖေ့နောက်ကို လိုက်ခဲ့ပါ၊ သမီးကို ဘဝသစ်တစ်ခု ပေးပါ့မယ်။"

ချင်ယွမ်ဖုန်းသည် ချင်နန်ယွင်ကို ဦးဆောင်ကာ အလင်းတန်းများရှိရာသို့ လျှောက်လှမ်းသွားချေသည်။

နဂါးဖမ်းဆေးမီးဖိုသည် ရုတ်တရက်ပင် စူးရှတောက်ပသော အလင်းတန်းများကို ထုတ်လွှတ်လာပြီး ချင်နန်ယွင်၏ ပွင့်လင်းမြင်သာလုနီးပါး ဖြစ်နေသော ခန္ဓာကိုယ်မှလည်း စူးရှသော အလင်းရောင်များ ဖြာထွက်လာကာ ကောင်းကင်ယံထက်၌ ကြီးမားသော ဝဲကရက်ကြီးတစ်ခုအသွင် ပုံဖော်သွားချေသည်။

ခတ္တမျှကြာပြီးနောက် အလင်းရောင်များသည် ဖြည်းညင်းစွာ ကွယ်ပျောက်သွားပြီး ချင်နန်ယွင်၏ ပါးစပ်ထဲမှ နတ်သက်ကြွေဆေးလုံးသည်လည်း ပျောက်ကွယ်သွားကာ နန်ယွင်၏ ခန္ဓာကိုယ်ထဲသို့ စိမ့်ဝင်ပေါင်းစပ်သွားခဲ့ပြီ ဖြစ်ချေသည်။

ချင်ယွမ်ဖုန်း၏ ခန္ဓာကိုယ်သည် အနည်းငယ် တုန်ရင်သွားရပေသည်။ သူသည် နဂါးဖမ်းဆေးမီးဖိုနားသို့ တိုးကပ်သွားပြီး "နန်ယွင်၊ နိုးထလာခဲ့ပါတော့" ဟု ခပ်တိုးတိုး လှမ်းခေါ်လိုက်မိသည်။

သို့သော်လည်း ချင်နန်ယွင်သည် မည်သည့် တုံ့ပြန်မှုမျှ မရှိဘဲ ဒဏ္ဍာရီလာ အိပ်စက်နေသော မင်းသမီးလေးအလား ငြိမ်သက်စွာ လဲလျောင်းနေဆဲပင် ဖြစ်ချေသည်။

"နန်ယွင်..." ချင်ယွမ်ဖုန်းသည် ရုတ်တရက် စိုးရိမ်စိတ်များ မြင့်တက်လာရသည်။ ချင်နန်ယွင်သည် အဘယ်ကြောင့် ယခုတိုင် နိုးထမလာသေးရသနည်း။

သူသည် ဆေးမီးဖိုထဲသို့ လက်ကို ဆန့်သွင်းလိုက်ရာ ချင်နန်ယွင်၏ သွေးခုန်နှုန်းနှင့် နှလုံးခုန်သံတို့သည် ပြန်လည်ကောင်းမွန်လာပြီဖြစ်သော်လည်း နိုးထလာမည့် အရိပ်အယောင်မူ မတွေ့ရသေးချေ။

"ရှောင်လင်၊ ဒါက ဘာဖြစ်တာလဲ" ချင်ယွမ်ဖုန်းက ပြာပြာသလဲ မေးလိုက်သည်။

ရှောင်လင်က ခေါင်းခါပြလျက် "ကျွန်မလည်း မသိတော့ပါဘူး၊ သမီးငယ်က အခုအချိန်ဆို နိုးလာရမှာပါ၊ ဘာလို့ နိုးမလာသေးတာလဲမသိဘူး" ဟု ပြန်ပြောရှာသည်။

ချင်ယွမ်ဖုန်းသည် ချင်နန်ယွင်၏ ဝိညာဉ်ကို ထပ်မံစစ်ဆေးကြည့်လိုက်ရာ ယင်းက တစ်စုံတစ်ရာ စိတ်အားငယ်နွမ်းလျနေပြီး ပြင်းထန်စွာ ဒဏ်ရာရရှိထားသည့်အလား ဖြစ်နေသည်ကို တွေ့ရှိလိုက်ရပေသည်။

"သမီးငယ်ရဲ့ ကျင့်စဉ်အဆင့်က အရင်က သိပ်နိမ့်လွန်းတာရယ်၊ ဝိညာဉ်က ခန္ဓာကိုယ်ထဲကနေ ထွက်ခွာသွားခဲ့တာရယ်ကြောင့် ဖြစ်နိုင်ပါတယ်၊ အခု သူမရဲ့ ဝိညာဉ်က နှစ်ခြိုက်စွာ အိပ်ပျော်နေတဲ့ အခြေအနေကို ရောက်သွားလို့ ထင်ပါတယ်" ရှောင်လင်က သုံးသပ်ပြချေသည်။

ချင်ယွမ်ဖုန်းသည် စိတ်ပျက်အားလျော့သွားဟန်ဖြင့် မျက်တောင်ဖျက်အတွင်းမှာပင် များစွာ အိုစာနွမ်းလျသွားသည့်အလား ထင်မှတ်ရပေသည်။

စက္ကန့်ပိုင်းမျှအကြာတွင် ချင်ယွမ်ဖုန်းသည် အလွန် မိုက်မဲလှသော အကြံအစည်တစ်ခုကို တွေးတောမိသွားချေသည်။

သူသည် ဝိညာဉ်များကို ဝိညာဉ်စွမ်းအားအဖြစ် ပြောင်းလဲပေးနိုင်သော ဆန်းကြယ်သည့် မှော်လက်နက်ဖြစ်သည့် တစ္ဆေတံဆိပ်တော်ကို ထုတ်ယူလိုက်ရာ ယင်းထက်ရှိ တစ္ဆေခေါင်းကြီးမှာ အလွန်ပင် ကြောက်မက်ဖွယ်ကောင်းလှချေသည်။

ချင်ယွမ်ဖုန်း၏ မျက်ဝန်းများသည် ချက်ချင်းပင် ပြတ်သားတုန်လှုပ်မှု မရှိတော့ပေ။ ဤအချိန်၌ သူသည် နန်ယွင်၏ ဖခင်တစ်ဦးဖြစ်နေပေရာ မိမိ၏ ရင်သွေးကို ကယ်တင်နိုင်ရန်အတွက် မည်သည့်အရာကိုမဆို လုပ်ဆောင်ရန် ဝန်လေးမည်မဟုတ်ချေ။

ကျင့်စဉ်အဆင့် နတ်ဘုရားတစ်ပိုင်းအဆင့်နှင့် နှိုင်းယှဉ်နိုင်သော ကြီးမားလှသည့် ဝိညာဉ်စွမ်းအားများသည် ချင်ယွမ်ဖုန်း၏ ခန္ဓာကိုယ်မှ ပေါက်ကွဲထွက်လာချေသည်။

ချင်ယွမ်ဖုန်းသည် ယခင်က မိမိ၏ ဝိညာဉ်စွမ်းအားကို အမျှင်ပေါင်း ၃၃ မျှင်အထိ ခွဲခြမ်းစိတ်ဖြာနိုင်ခဲ့ဖူးရာ ယင်းက လောက၌ မရှိဖူးသေးသော အံ့မခန်းစွမ်းဆောင်ချက် ဖြစ်ခဲ့ပေသည်။ သို့သော်လည်း ယခုအချိန်၌မူ ချင်ယွမ်ဖုန်းသည် မိမိ၏ ဝိညာဉ်စွမ်းအား အမျှင်တစ်ခုကို ဖြတ်တောက်ရန် စိုးစဉ်းမျှ တုံ့ဆိုင်းမနေခဲ့ချေ။

ခန္ဓာကိုယ်မှ လက်မောင်းတစ်ဖက်ကို ဖြတ်တောက်လိုက်ရသကဲ့သို့ ပြင်းထန်လှသော နာကျင်မှုဝေဒနာသည် ချင်ယွမ်ဖုန်း၏ နှလုံးသားအစုံမှ တိုးဝှေ့တက်လာသော်လည်း ချင်ယွမ်ဖုန်းသည် မျက်မှောင်ကြုတ်လိုက်ရုံမျှသာ ရှိပြီး ညည်းတွားသံတစ်ချက်ပင် မပြုခဲ့ချေ။

ချင်ယွမ်ဖုန်း မသိရှိလိုက်သည်မှာ သူ၏ နောက်ကွယ်၌ လူရိပ်တစ်ခုသည် အစအဆုံး စောင့်ကြည့်နေခဲ့ခြင်းပင် ဖြစ်ချေသည်။ ချင်ယွမ်ဖုန်းက မိမိ၏ ဝိညာဉ်ကို ကိုယ်တိုင်ဖြတ်တောက်နေသည်ကို မြင်ရလျှင် ထိုလူရိပ်သည်လည်း သူနှင့်ထပ်တူ နာကျင်ရသည့်အလား မျက်မှောင်ကို ပြင်းထန်စွာ ကြုတ်လိုက်မိရှာသည်။

"ယွမ်ဖုန်း..." မုန့်ချီလော့သည် နှလုံးသားထဲမှ အောင့်တက်လာသော နာကျင်မှုနှင့်အတူ တိုးညင်းစွာ ရေရွတ်လိုက်မိသည်။

သူမ အစဉ်အမြဲ သဘောကျနှစ်သက်ခဲ့ရသော လူသားသည် နောက်ဆုံး၌ ဖခင်ကောင်းတစ်ဦး၏ အရည်အချင်းများ ပြည့်ဝလာခဲ့ချေပြီ။ ဤအရာသည် ကောင်းမွန်သောအချက်ဖြစ်ကြောင်း သူမ သိရှိပေသည်၊ အကယ်၍ သူမသာ ဤနေရာ၌ ရှိနေခဲ့လျှင်လည်း ချင်ယွမ်ဖုန်းသည် တုံ့ဆိုင်းမှုမရှိဘဲ ဤသို့ပင် လုပ်ဆောင်ပေးလိမ့်မည် ဖြစ်ချေသည်။

ထို့ကြောင့် သူမသည် ဖြည်းညင်းစွာ လျှောက်လှမ်းသွားပြီး ချင်ယွမ်ဖုန်းကို နောက်ကျောဘက်မှနေ၍ သိုင်းဖက်လိုက်တော့သည်။

"ယွမ်ဖုန်း၊ သမီးနဲ့အတူ ကျွန်မ ရှိနေပေးပါ့မယ်" မုန့်ချီလော့က တိုးညင်းစွာ ကတိပြုရှာသည်။

ချင်ယွမ်ဖုန်းသည် မိမိ၏ ခန္ဓာကိုယ်ထဲ၌ ခွန်အားများ ရုတ်တရက် တိုးပွားလာသကဲ့သို့ ခံစားလိုက်ရပေသည်၊ သူသည် မည်သည့်အခါမျှ တစ်ယောက်တည်း မဟုတ်ခဲ့ချေ။

ဖြတ်တောက်လိုက်သော ကြီးမားလှသည့် ဝိညာဉ်စွမ်းအားများသည် တစ္ဆေတံဆိပ်တော်ထဲသို့ တိုက်ရိုက် စုပ်ယူခြင်း ခံလိုက်ရပေသည်။ ချင်နန်ယွင်၏ ကျင့်စဉ်အဆင့်မှာ ယခုအချိန်၌ အလွန်ပင် အားနည်းလွန်းနေသေးသဖြင့် ချင်ယွမ်ဖုန်းသည် ဝိညာဉ်စွမ်းအားများကို တစ်ပြိုင်နက်တည်း အလွန်အကျွံ ထည့်သွင်းရန် မဝံ့ရဲချေ။

ချင်ယွမ်ဖုန်းသည် တစ္ဆေတံဆိပ်တော်မှတစ်ဆင့် သန့်စင်ပြောင်းလဲပေးလိုက်သော ဝိညာဉ်စွမ်းအားများကို ချင်နန်ယွင်၏ ခန္ဓာကိုယ်ထဲသို့ ဖြည်းညင်းစွာ ထည့်သွင်းပေးလိုက်ပြီး ချင်နန်ယွင်၏ ဝိညာဉ်ကို စုပ်ယူစေလိုက်သည်။

ယခင်က အားအင်ချိနဲ့နေသော ဝိညာဉ်သည် အလွန်အစွမ်းထက်သည့် အာဟာရဆေးတစ်ခွက်ကို ရရှိလိုက်သည့်အလား ရုတ်တရက်ပင် ဖြည်းဖြည်းချင်း အားအင်ပြည့်ဝလာကာ ပိုမိုခိုင်မာတောင့်တင်းလာချေပြီ။

နောက်ဆုံးတွင် ဝိညာဉ်အလုံးစုံတို့သည် ချင်နန်ယွင်၏ ခန္ဓာကိုယ်ထဲသို့ အပြည့်အဝ ပေါင်းစပ်သွားကြပြီး ချင်နန်ယွင်သည် သူမ၏ မျက်ဝန်းစုံကို ဖြည်းညင်းစွာ ဖွင့်ဟလာခဲ့ချေပြီ။

သူမ၏ ပွင့်လင်းမြင်သာနေသော အရေပြားသည်လည်း ပုံမှန်အခြေအနေသို့ ပြန်လည်ရောက်ရှိသွားခဲ့ပြီး အပြင်ပန်းအားဖြင့် ကြည့်လျှင် ရင်ဘတ်ထက်၌ ထူးခြားသော တက်တူးတစ်ခုအလား ရှိနေသည့် သစ်ရွက်ပုံစံ အမှတ်အသား သုံးခုမှလွဲ၍ တစ်စုံတစ်ရာ ထူးခြားဆန်းပြားမှု မရှိတော့ချေ။

"နန်ယွင်။" ချင်ယွမ်ဖုန်းသည် နန်ယွင်၏ လက်ကို ဆုပ်ကိုင်လိုက်ပြီး သူမကို ဆေးမီးဖိုထဲမှနေ၍ အပြင်သို့ ပွေ့ချီထုတ်ဆောင်ခဲ့လိုက်တော့သည်။