အခန်း ၉၃၀

အခန်း(၉၃၀)

နတ်ဘုရားတစ်ပိုင်းအဆင့်သစ်

"လောလောဆယ်တော့ မလိုသေးပါဘူး" ချင်ယွမ်ဖုန်းက ခေါင်းခါယမ်းလိုက်ပြီး "ဒီနတ်ဘုရားတစ်ပိုင်းအဆင့်ကို သတ်ပြီး စာရင်းပြန်တင်ရရင် ဘယ်လိုလဲ" ဟု ဆိုချေသည်။

ချင်ယွမ်ဖုန်း၏ စကားကြောင့် လူတိုင်း ဆွံ့အသွားကြကုန်၏။

ယင်းတို့သည် ပင်လယ်ပြင်တွင် တစ်နှစ်ပတ်လုံး မိစ္ဆာများကို အမဲလိုက်ခဲ့ကြသော်လည်း နတ်ဘုရားတစ်ပိုင်းအဆင့် စွမ်းအားရှင်တစ်ဦးကို အမဲလိုက်ရန်မူကား တစ်ကြိမ်တစ်ခါမျှ မတွေးဝံ့ခဲ့ကြပေရာ။

အကြောင်းမူကား နတ်ဘုရားတစ်ပိုင်းအဆင့်၏ စွမ်းပကားသည် လွန်စွာကြီးမားလှသဖြင့် ယင်းတို့အနေဖြင့် မည်သို့မျှ မခုခံနိုင်သောကြောင့် ဖြစ်ချေသည်။

"ဒီကောင်က နတ်ဘုရားတစ်ပိုင်းအဆင့်ကို ခုတင်တင် တက်လှမ်းထားတဲ့ စွမ်းအားရှင်ပဲ၊ နတ်ဘုရားတစ်ပိုင်းအဆင့်ရဲ့ အောက်ဆုံးမှာပဲ ရှိသေးတာ အသေအချာပဲ၊ ငါသူ့ကို ယှဉ်ပြိုင်တိုက်ခိုက်နိုင်တယ်လို့ ယုံကြည်ချက်ရှိတယ်၊ ဒါ့အပြင် မင်းတို့အားလုံး ကူညီပေးရင် ဒီတိုက်ပွဲကို အမြန်ဆုံး အဆုံးသတ်နိုင်လိမ့်မယ်" ဟု ချင်ယွမ်ဖုန်းက ဆို၏။

ချင်ယွမ်ဖုန်း၏ ယုံကြည်ချက်အပြည့် ရှိနေသော အမူအရာကို မြင်ရလျှင် လူတိုင်းက သဘောတူညီသည့်အနေဖြင့် ခေါင်းငြိတ်ကြလေသည်။

"အို... မင်းတို့တွေ ထွက်မပြေးကြဘူးပေါ့၊ မင်းတို့ ဘယ်က သတ္တိတွေ ရနေတာလဲဆိုတာ ငါ တကယ်ပဲ မသိတော့ဘူး" ဟု ထိုတစ်ပါးကျွန်းသား မိစ္ဆာက လှောင်ပြုံးပြုံးရင်း ဆိုချေသည်။

"ကဲပါ... ကိုယ့်ကိုယ်ကိုယ် အဟုတ်ကြီး ထင်မနေစမ်းပါနဲ့၊ ဒီနေ့ မင်းထက်သာတဲ့သူ ရှိတယ်ဆိုတာကို ငါ ပြပေးရတာပေါ့" ချင်ယွမ်ဖုန်းက အေးစက်စွာ နှာခေါင်းရှုံ့လိုက်ပြီးနောက် လက်ထဲတွင် အနန္တပုံရိပ်မှ ပြောင်းလဲသွားသော ငွေရောင်ဓားရှည်တစ်လက် ပေါ်လာချေသည်။

ဒွမ်ကျန့်ဓားသည် ရှာလော့နှင့် တိုက်ပွဲတွင် ပျက်စီးသွားခဲ့ပြီ ဖြစ်ပေရာ ချင်ယွမ်ဖုန်း ဤတစ်နှစ်အတွင်း အသုံးပြုခဲ့သော မှော်လက်နက်များအားလုံးသည် အနန္တပုံရိပ်ကို ပုံသဏ္ဌာန်ဖော်၍ အသုံးပြုခဲ့ခြင်း ဖြစ်ချေသည်။

အကြောင်းမူကား အနန္တပုံရိပ်သည် စိတ်အလိုရှိတိုင်း ပုံသဏ္ဌာန်ပြောင်းလဲနိုင်သော စွမ်းအားကြီးမှော်လက်နက် ဖြစ်သဖြင့် မည်သို့ပင် အသုံးပြုသည်ဖြစ်စေ လွန်စွာအဆင်ပြေလှသောကြောင့် ဖြစ်၏။

"ဒါဆိုရင်တော့ မင်း ဒီမှာပဲ သေပေတော့" ထိုမိစ္ဆာက ဒေါသတကြီး အော်ဟစ်လိုက်ပြီး ခန္ဓာကိုယ်သည် လူသားပုံသဏ္ဌာန် မိစ္ဆာကောင်ကြီးအဖြစ် ပြောင်းလဲသွားကာ ကိုယ်ပေါ်ရှိ ထူထဲလှသော အကြေးခွံများသည် ဓားကဲ့သို့ ထက်မြက်စွာ ပွင့်အာပိတ်သိပ်နေချေသည်။

သို့သော် ဤမိစ္ဆာသည် အခြားမိစ္ဆာများနှင့် မတူပေ။ ယင်း၏ ခန္ဓာကိုယ် အစိတ်အပိုင်း အများအပြားတွင် အရိုးဆူးများ စွန်းထွက်မနေဘဲ လက်ဖဝါး အပြင်ဘက်မှသာ ထက်မြက်သော အရိုးဆူးတစ်ခု ဖြည်းညှင်းစွာ ထွက်ပေါ်လာချေသည်။

ယင်းက ထက်မြက်သော ဓားရှည်ကြီးနှစ်လက်ကဲ့သို့ ဖြစ်တန်ရာ၏။

ချန်ဖန်းနှင့် အခြားသုံးဦးသည် ချက်ချင်း နောက်ဆုတ်သွားကြပြီး ချင်ယွမ်ဖုန်း ရှိရာနေရာနှင့် ဝေးရာသို့ ရွှေ့ပြောင်းလိုက်ကြ၏။ ယင်းတို့သည် ဤမျှအဆင့်မြင့်လှသော တိုက်ပွဲတွင် ဝင်ရောက် မပတ်သက်နိုင်ပေရာ ဘေးမှသာ ပံ့ပိုးကူညီမှု ပေးနိုင်ကြပေသည်။

ထိုမိစ္ဆာက ချင်ယွမ်ဖုန်းကို ကြည့်ကာ နှုတ်ခမ်းထောင့်တွင် အေးစက်သော အပြုံးတစ်ခု ပေါ်လာချေသည်။ ယင်း၏ ပုံရိပ်သည် ရုတ်တရက် ပေသုံးဆယ်ခန့်အကွာတွင် ပေါ်လာပြီးနောက် ပေအနည်းခန့်အကွာသို့ ဖျတ်ခနဲ ရောက်ရှိလာကာ တဖန် ဖျတ်ခနဲ လှုပ်ရှားလိုက်ပြန်ရာ ချင်ယွမ်ဖုန်း၏ ရှေ့မှောက်သို့ ရောက်ရှိလာတော့၏။

"မြန်လိုက်တာ" ချင်ယွမ်ဖုန်းပင်လျှင် မချီးကျူးဘဲ မနေနိုင်တော့ပေ။

မိစ္ဆာက ယင်း၏ အရိုးဆူးဓားရှည်နှစ်လက်ကို ဝှေ့ယမ်းလိုက်ရာ ဓားသွားများက အေးစက်စွာ တောက်ပသွားပြီး ချင်ယွမ်ဖုန်း၏ ဦးခေါင်းတည့်တည့်သို့ ပြင်းထန်စွာ ခုတ်ပိုင်းချလိုက်ချေသည်။

ချင်ယွမ်ဖုန်းက အနန္တပုံရိပ် ဓားရှည်ကို ဦးခေါင်းထက်တွင် အမြန် ကာကွယ်လိုက်စဉ် ရုတ်တရက် ပြင်းထန်လှသော စွမ်းအားကြီးတစ်ခု သက်ရောက်လာသည်ကို ခံစားလိုက်ရ၏။

အနန္တပုံရိပ်က ထိုတစ်ပါးကျွန်းသား မိစ္ဆာ၏ တိုက်ခိုက်မှုကို တားဆီးပေးနိုင်ခဲ့သော်လည်း ထိုကြီးမားလှသော စွမ်းအားက ချင်ယွမ်ဖုန်းကို ပင်လယ်ပြင်ထဲသို့ တိုက်ရိုက် ရိုက်ချလိုက်ချေသည်။

ရေဖွေးဖွေးများ စင်တက်သွားပြီး မိစ္ဆာ၏ လှောင်ပြုံးက ပိုမိုနက်ရှိုင်းလာ၏။

ထိုစဉ် ကောင်းကင်ယံမှ မိုးကြိုးလျှပ်စီးတစ်ခု ဝုန်းခနဲ ကျရောက်လာပြီး မိစ္ဆာ၏ ကိုယ်ပေါ်သို့ တည့်တည့် ထိမှန်သွားချေသည်။

မိစ္ဆာ၏ ခန္ဓာကိုယ်က တုန်ခါသွားပြီး အကြေးခွံများပေါ်တွင် လျှပ်စီးပတ်လမ်းများပင် ဖျတ်ဖျတ်လူးသွားချေသည်။ သို့သော် ထိုကောင်းကင်မိုးကြိုးသည် မိစ္ဆာကို တစ်စုံတစ်ရာ မထိခိုက်စေနိုင်ဘဲ ယင်း၏ မျက်လုံးများထဲရှိ ရက်စက်ကြမ်းကြုတ်သော အလင်းတန်းကို ပိုမိုတောက်ပလာစေချေသည်။

ယင်းက အဝေးရှိ ချန်ဖန်းကို ကြည့်လိုက်ရာ မျက်ဝန်းထဲတွင် ရက်စက်လိုသော အရိပ်အယောင်တစ်ခု ဖျတ်ခနဲ ပေါ်လာပြီး ချန်ဖန်းရှိရာသို့ ရုတ်တရက် ပြေးဝင်ရန် ပြင်လိုက်၏။

ထိုစဉ် မိစ္ဆာ၏ ခြေဖဝါးအောက်မှ အေးစက်လှသော အရှိန်အဝါတစ်ခု ထွက်ပေါ်လာသဖြင့် ယင်းက အံ့အားသင့်စွာ မျက်လုံးပြူးသွားပြီး ဘေးဘက်သို့ အလျင်အမြန် ရှောင်တိမ်းလိုက်ရချေသည်။

အေးစက်သော အလင်းတန်းတစ်ခု ဖျတ်ခနဲ ဖြတ်သန်းသွားပြီး ယင်း၏ အကြေးခွံတစ်ခုကို လှီးဖြတ်သွား၏။ ယင်းက ပင်လယ်ထဲမှ ခုတင်တင် ထွက်ပေါ်လာသော ချင်ယွမ်ဖုန်း ဖြစ်ချေသည်။

ပထမအကြိမ် တိုက်ခိုက်မှု မအောင်မြင်သဖြင့် ချင်ယွမ်ဖုန်းသည် ထိုတစ်ပါးကျွန်းသား မိစ္ဆာနှင့် မလှမ်းမကမ်းတွင် ပေါ်လာပြီး မျက်နှာက တည်တံ့လေးနက်နေချေသည်။

ယင်းက ထိုတစ်ပါးကျွန်းသား မိစ္ဆာနှင့် ခုတင်တင် ထိတွေ့တိုက်ခိုက်မိပြီးနောက် ဤနတ်ဘုရားတစ်ပိုင်းအဆင့် မိစ္ဆာ၏ စွမ်းအားသည် မိမိမျှော်လင့်ထားသည်ထက် ကျော်လွန်နေကြောင်း သိရှိသွား၏။ မိမိ၏ စွမ်းအားက နဝမအဆင့် မဟာဆရာနယ်ပယ်ထက် သာလွန်နေသော်လည်း ယင်းကို မယှဉ်နိုင်သေးပေ။

"ကောင်းပြီ... ဒါဆို မင်းကို အရင်သတ်ရတာပေါ့"

မိစ္ဆာ၏ ခန္ဓာကိုယ်က တစ္ဆေတစ်ကောင်ကဲ့သို့ ပျောက်ကွယ်သွားပြီး ဘေးပတ်ဝန်းကျင်တွင် လေပြင်းတိုးဝှေ့သံများသာ ကျန်ရစ်ခဲ့သဖြင့် လူကို စိတ်လှုပ်ရှား တင်းမာလာစေချေသည်။

ချင်ယွမ်ဖုန်းက အနန္တပုံရိပ် ဓားရှည်ကို ရင်ဘတ်ရှေ့တွင် အလျားလိုက် ကိုင်စွဲထား၏။ ယင်း၏ ဝိညာဉ်စွမ်းအားသည် မီတာငါးထောင်ပတ်လည်အထိ ဖြန့်ကြက်ထားပြီး ဖြစ်သော်လည်း ထိုတစ်ပါးကျွန်းသား မိစ္ဆာ၏ လျင်မြန်လှသော လှုပ်ရှားမှုကို ခဲယဉ်းစွာသာ မြင်တွေ့နေရချေသည်။

"အပေါ်မှာ"

ချင်ယွမ်ဖုန်းက ရုတ်တရက် အော်ဟစ်လိုက်ပြီး အနန္တပုံရိပ် ဓားရှည်ကို အထက်သို့ ပြင်းထန်စွာ ထိုးစိုက်လိုက်၏။

ဖျတ်ခနဲ အသံတစ်ခုနှင့်အတူ ချင်ယွမ်ဖုန်းသည် အသားထဲသို့ တစ်စုံတစ်ရာ စူးဝင်သွားသော အသံကို ကြားလိုက်ရပြီး မိမိ၏ ပုခုံးကို ထိတ်လန့်တကြား ငုံ့ကြည့်လိုက်ရာ နက်ရှိုင်းသော ဒဏ်ရာတစ်ခုကို တွေ့ရှိလိုက်ရချေသည်။

ထိုအချိန်တွင် တပါးကျွန်းသား မိစ္ဆာသည် အနန္တပုံရိပ် ဓားသွား၏ ဖျားပေါ်တွင် မတ်တပ်ရပ်နေ၏။

"ဟဲ..." မိစ္ဆာက လှောင်ပြုံးပြုံးလိုက်ပြီး ခန္ဓာကိုယ်က ထပ်မံ ပျောက်ကွယ်သွားပြန်သည်။

ချင်ယွမ်ဖုန်း ထိတ်လန့်သွား၏။ ဤတစ်ပါးကျွန်းသား မိစ္ဆာသည် အလွန်တရာ မြန်ဆန်လှပေရာ မိမိ၏ ဝိညာဉ်စွမ်းအားဖြင့်ပင် ခဲယဉ်းစွာသာ မြင်နိုင်ပြီး မြင်ရလျှင်ပင် အချိန်မီ တုံ့ပြန်ရန် မတတ်နိုင်ချေ။

ဖျတ်ခနဲ

နောက်ထပ် အသံတစ်ခုနှင့်အတူ ချင်ယွမ်ဖုန်း၏ ကျောပြင်မှ သွေးများ ပန်းထွက်သွားပြီး နက်ရှိုင်းသော ဒဏ်ရာတစ်ခု ပေါ်လာပြန်ချေသည်။

"တောက်..." ချင်ယွမ်ဖုန်းက အံကြိတ်လိုက်မိ၏။ မိမိအနေဖြင့် ဤတစ်ပါးကျွန်းသား မိစ္ဆာ၏ အရှိန်ကို လုံးဝ မမှီနိုင်ပေရာ ယင်းသို့ဖြစ်လျှင် မည်သို့ တိုက်ခိုက်နိုင်ပါအံ့နည်း။

အချိန်တိုအတွင်းမှာပင် ချင်ယွမ်ဖုန်း၏ ခန္ဓာကိုယ်ပေါ်၌ ဒဏ်ရာ တစ်ဒါဇင်ကျော် ရရှိသွားခဲ့ပြီ ဖြစ်ချေသည်။ ဒဏ်ရာတစ်ခုချင်းစီက မနည်းလှပေရာ စိမ့်ထွက်လာသော သွေးများကြောင့် ချင်ယွမ်ဖုန်းသည် သွေးချင်းချင်းနီနေသော လူသားတစ်ဦးကဲ့သို့ ဖြစ်သွားချေသည်။

ဤအတိုင်းသာ ဆက်သွားပါက ထိုမိစ္ဆာက လက်ပင် မြှောက်စရာမလိုဘဲ ချင်ယွမ်ဖုန်းကို သွေးထွက်လွန်၍ သေဆုံးသွားစေနိုင်ပေ၏။

အဝေးရှိ ချန်ဖန်း၊ မာထျန်းနှင့် အခြားသူများသည်လည်း အလွန် စိုးရိမ်ပူပန်နေကြသော်လည်း ထိုတစ်ပါးကျွန်းသား မိစ္ဆာ၏ အရှိန်က မြန်လွန်းလှသဖြင့် ယင်းတို့အနေဖြင့် ပုံရိပ်ကို အာရုံမဖမ်းနိုင်သောကြောင့် ချင်ယွမ်ဖုန်းကို မကူညီနိုင်ကြပေ။

ချင်ယွမ်ဖုန်းသည် ထိတ်လန့် ဒေါသထွက်သွား၏။ ယင်း၏ မျက်ခုံးကြားရှိ မီးလျှံဝိညာဉ် အမှတ်အသားက ရုတ်တရက် တောက်လောင်လာပြီး ခန္ဓာကိုယ်က ကြီးထွားလာကာ မီးလျှံလူသားတစ်ဦးအဖြစ် ပြောင်းလဲသွားတော့သည်။

ကောင်းကင်ယံတွင် အေးစက်သော အလင်းတန်းတစ်ခု ထပ်မံ ဖြတ်သန်းသွားပြီး ချင်ယွမ်ဖုန်း၏ မီးလျှံခန္ဓာကိုယ်တွင် အက်ကွဲကြောင်းတစ်ခု ပေါ်လာချေသည်။ သို့သော် ထိုအက်ကွဲကြောင်းသည် မီးတောက်များကြောင့် ချက်ချင်းပင် ပြန်လည် ပြည့်စုံသွား၏။

မိစ္ဆာသည်လည်း လွန်စွာ အံ့အားသင့်သွားချေသည်။ ချင်ယွမ်ဖုန်းက မိမိ၏ ခန္ဓာကိုယ်ကို မီးတောက်အဖြစ် ပြောင်းလဲနိုင်ပြီး ရုပ်ပိုင်းဆိုင်ရာ တိုက်ခိုက်မှုများကို လုံးဝ လျစ်လျူရှုနိုင်လိမ့်မည်ဟု ယင်းက မထင်မှတ်ထားခဲ့ပေရာ။

ယင်းက တိုက်ခိုက်မှုပုံစံကို ပြောင်းလဲလိုသော်လည်း အရှိန်က မြန်ဆန်လွန်းလှသဖြင့် ထပ်မံ၍ ခုတ်ပိုင်းလိုက်ပြန်ရာ ယခုတစ်ကြိမ်တွင် မီးလျှံလူသား၏ ဦးခေါင်းကို ဦးတည်လိုက်ချေသည်။

ချင်ယွမ်ဖုန်း၏ ဦးခေါင်းသည် ထိုအေးစက်သော အလင်းတန်းကြောင့် ကွဲကြေသွားသော်လည်း ပျက်စီးသွားသော ဦးခေါင်းမှ ရွှေရောင်မိုးကြိုးလျှပ်စီးများ ရုတ်တရက် ပေါက်ကွဲထွက်လာပြီး မိစ္ဆာ၏ အရိုးဆူးများတစ်လျှောက် ယင်း၏ ခန္ဓာကိုယ်သို့ ရိုက်ခတ်သွားတော့၏။

ရွှေရောင်မိုးကြိုးလျှပ်စီးကြောင့် ပြင်းထန်လှသော ထုံကျဉ်ခြင်း ဝေဒနာက မိစ္ဆာ၏ ခန္ဓာကိုယ်ကို မရည်ရွယ်ဘဲ ခဏမျှ တန့်သွားစေချေသည်။ ဤခဏမျှ တန့်သွားခြင်းကပင် ချင်ယွမ်ဖုန်းကို မိစ္ဆာ၏ ခန္ဓာကိုယ်အား အမိအရ အာရုံဖမ်းယူနိုင်ခွင့် ပေးလိုက်ခြင်း ဖြစ်၏။

"ဝုန်း"

ချင်ယွမ်ဖုန်းက လက်သီးတစ်ချက် ပစ်သွင်းလိုက်ရာ မိစ္ဆာ၏ ရင်ဘတ်သို့ ပြင်းထန်စွာ ထိမှန်သွားပြီး ယင်းကို ပေသုံးဆယ်ကျော်ခန့် လွင့်စင်သွားစေချေသည်။ ချင်ယွမ်ဖုန်း၏ ဦးခေါင်းကမူ ဖြည်းညှင်းစွာ ပြန်လည် နဂိုအတိုင်း ဖြစ်လာ၏။

"ဟေး... လှည့်ကွက်တွေ အများကြီးပဲကိုး" မိစ္ဆာက ယင်း၏ ရင်ဘတ်ပေါ်ရှိ မီးတောက်များကို ပုတ်ခါလိုက်ရင်း လှောင်ပြုံးပြုံးကာ "နှမြောစရာပဲ... ဒါတွေအားလုံးက အလကားပဲ" ဟု ဆိုချေသည်။

ချင်ယွမ်ဖုန်း ဒေါသအမျက်ချောင်းချောင်း ထွက်သွားပြီး ခန္ဓာကိုယ်ပတ်လည်တွင် မီးတောက်များ ဖျတ်ဖျတ်လူးသွားကာ လက်ထဲရှိ အနန္တပုံရိပ် ဓားရှည်ပေါ်တွင်လည်း ပြင်းထန်သော မီးလျှံလွှာတစ်ခု ဖုံးလွှမ်းသွားတော့၏။

"နဂါးသတ်ချက်"

စစ်မှန်သော နဂါးပုံရိပ်တစ်ခုက မီးတောက်များထဲမှ ထွက်ပေါ်လာပြီး ချင်ယွမ်ဖုန်းနှင့်အတူ ဆင်းသက်လာချေသည်။ တောက်လောင်နေသော စစ်မှန်သော နဂါးပုံရိပ်က ဟိန်းဟောက်ကာ ထိုတစ်ပါးကျွန်းသား မိစ္ဆာထံသို့ ပြေးဝင်သွားတော့၏။

ပင်လယ်ပြင်ထက်တွင် ဖြူဖွေးသော မြူခိုးငွေ့အမြောက်အမြား ရုတ်တရက် ထွက်ပေါ်လာရာ ယင်းက ခရမ်းရောင်မီးတောက်များကြောင့် ပင်လယ်ရေထု အမြောက်အမြား ချက်ချင်း အငွေ့ပျံသွားခြင်းကြောင့် ဖြစ်ချေသည်။

မိစ္ဆာ၏ အမူအရာကလည်း အနည်းငယ် တည်တံ့လေးနက်သွား၏။ ယင်း၏ ခန္ဓာကိုယ်မှ မိစ္ဆာချီ အမြောက်အမြား ပေါက်ကွဲထွက်လာပြီး ယင်း၏ နောက်ကျောဘက်တွင် သွေးကဲ့သို့ နီမြန်းသော မျက်လုံးတစ်စုံ ရုတ်တရက် ပွင့်အာလာတော့သည်။