အခန်း ၃၂၇
Vol. 33 Ch. 327
အပိုင်း ၃၂၇
"ရှင်းထျန်း… မင်းရဲ့ ပုံစံကို ပြောင်းလဲလို့ရမလား" ဓာတ်ပုံ၊ ဗီဒီယိုများ ရိုက်ကူးပြီးနောက် ကျားကျင် က စမ်းသပ်သည့်အနေဖြင့် လှမ်းမေးလိုက်သည်။
"ရပါတယ်ရှင်။"
ရှင်းထျန်း စကားပြောပြီးသည်နှင့် သူမ၏ ကိုယ်ဟန်အနေအထားကို ချက်ချင်း ပြောင်းလဲလိုက်ပြီး လက်နှစ်ချောင်းထောင်ထားသည့် ကတ်ကြေးပုံစံမှ နှလုံးသားပုံစံသို့ ပြောင်းလဲလုပ်ပြလိုက်သည်။ ထိုနေရာရှိ သတင်းထောက်အချို့မှာ စိတ်လှုပ်ရှားလွန်း၍ သွေးကြွသွားကြသည့်နှယ် ဖြစ်သွားရသည်။
ဤရိုဘော့၏ တုနှိုင်းမဲ့ဉာဏ်ရည်မှာ မယုံကြည်နိုင်လောက်အောင်ပင် ကောင်းမွန်လှသည်။
"ရှင်းထျန်း၊ သူတို့နဲ့ လက်ဆွဲနှုတ်ဆက်လိုက်ပါဦး။" လုဟုန်ယီ က ပြောလိုက်သည်။
"ကောင်းပါပြီရှင်။"
ရိုဘော့သည် မတ်တတ်ဖြောင့်ဖြောင့်ရပ်လိုက်ပြီးနောက် သတင်းထောက်အချို့ထံသို့ လျှောက်လှမ်းသွားခဲ့သည်။ ဤမြင်ကွင်းကြောင့် လူအချို့မှာ အံ့ဩတကြီး ရုန်းရင်းဆန်ခတ် ဖြစ်သွားကြပြီး ကင်မရာများကို ရိုဘော့ထံမှ မခွာတမ်း ချိန်ရွယ်ထားကြတော့သည်။
"မင်္ဂလာပါရှင် ကျွန်မကတော့ လုံထန်ဂရုရဲ့ ရှင်းထျန်းစီးရီး ရိုဘော့ နံပါတ် ၀၀၁ ပါရှင်..ကျွန်မကို ရှင်းထျန်းလို့ ခေါ်နိုင်ပါတယ်ရှင်။" ရှင်းထျန်း က လက်ကမ်းပေးရင်း သတင်းထောက်တစ်ဦးကို ပြောလိုက်သည်။
ညင်သာစွာ လက်ဆွဲနှုတ်ဆက်ပြီးနောက် ရိုဘော့သည် အခြားသတင်းထောက်တစ်ဦးထံသို့ ထပ်မံလျှောက်လှမ်းသွားခဲ့ပြန်သည်။
အကယ်၍ ဒါကို ကိုယ်တိုင်မျက်မြင်မတွေ့ခဲ့ရပါက ဤအရာသည် ရိုဘော့ဝတ်စုံ ဝတ်ဆင်ထားသည့် လူတစ်ယောက်ဟုသာ ဧကန်မုချ ထင်မှတ်မှားစရာ ဖြစ်သည်။
"သူ့မှာ တခြားလုပ်ဆောင်ချက်တွေ မရှိတော့ဘူးလားခင်ဗျာ?" ကျားကျင် က မေးလိုက်သည်။
- "သူ့ကို တစ်ခုလောက် သရုပ်ပြခိုင်းလို့ ရမလားခင်ဗျာ"
လုဟုန်ယီ က အနည်းငယ် ခေါင်းညိတ်ပြလိုက်ပြီး - "ရှင်းထျန်း… ဒီလူကြီးမင်းကို ရေတစ်ခွက်လောက် ချပေးလိုက်ပါဦး။"
သူ စကားပြောပြီးသည်နှင့် ရှင်းထျန်း သည် စားပွဲပေါ်ရှိ ရေသန့်ဗူးကို ကောက်ယူကာ ဖွင့်လိုက်ပြီး ဖန်ခွက်ထဲသို့ ရေထည့်ကာ ကျားကျင် ထံသို့ ကမ်းပေးလိုက်သည်။
- "လူကြီးမင်း… ခင်ဗျားအတွက် ရေပါရှင်။"
အနားတွင်ရှိနေသည့် သတင်းထောက်များအားလုံး ဆွံ့အသွားကြပြီး ရိုဘော့ကိုသာ စိုက်ကြည့်နေမိကြတော့သည်။
ဤရိုဘော့၏ ဉာဏ်ရည်မှာ မည်သည့်အဆင့်အထိ ရောက်ရှိနေပြီနည်း ရိုဘော့ခေတ်ကြီးက တကယ်ပဲ ရောက်ရှိလာပြီလား.သတင်းထောက်အချို့၏ စိတ်ထဲတွင် ကြီးမားသော မေးခွန်းသင်္ကေတတစ်ခု ပြိုင်တူ ပေါ်ပေါက်လာခဲ့သည်။
《မင်္ဂလာပါ လူသားမျိုးနွယ်!》—— ကမ္ဘာ့သတင်း
《ရိုဘော့ခေတ်ကြီး ရောက်ရှိလာပြီလား》—— ဖီးနစ်နည်းပညာ
《လုံထန်ရိုဘော့အိမ်အကူ —— ရှင်းထျန်း!》—— သတင်းထူး
《တုန်လှုပ်ချောက်ချားဖွယ် ရိုဘော့》—— ရှဥ့်လေးသတင်းဦး
……
အချိန်တိုအတွင်းမှာပင် ရိုဘော့နှင့်ပတ်သက်သည့် သတင်းမျိုးစုံက အဓိက မီဒီယာကြီးများတွင် ပြည့်နှက်သွားခဲ့သည်။ အင်တာနက်ညီလာခံမှ လုံထန်ဂရုဖ်၏ ရိုဘော့ဗီဒီယိုဖိုင်နှင့်အတူ အင်တာနက်လောကကြီးမှာ အချိန်တိုအတွင်း ဆူပွက်တုန်လှုပ်သွားခဲ့ရသည်။
လူအများအပြားမှာ ရိုဘော့များကို မြင်ဖူးကြသော်လည်း အများစုမှာ ရီမုကွန်ထရိုးဖြင့် ထိန်းချုပ်ရသည့် အရာများသာ ဖြစ်သည်။ ရီမုမပါသည့် အရာများမှာလည်း စကားပြောရိုဘော့ သို့မဟုတ် ဖုန်စုပ်ရိုဘော့များသာ ဖြစ်ကြပြီး အများကြီး မလုပ်ဆောင်နိုင်ကြပေ။
ယခုအခါ ရှင်းထျန်း ပေါ်ထွက်လာသောအခါမှသာ အစစ်အမှန် ခေတ်ရှေ့ပြေးနည်းပညာဆိုသည်မှာ ဘာလဲဆိုတာကို သူတို့ မြင်တွေ့ခွင့်ရလိုက်ခြင်း ဖြစ်သည်။
ရိုဘော့တွေရဲ့ ဉာဏ်ရည်က ဒီအဆင့်အထိ တောင် ရောက်နေပြီလား။
သူတို့သည် ဤကဲ့သို့သော နည်းပညာမျိုးကို သိပ္ပံစိတ်ကူးယဉ် ရုပ်ရှင်ကားကြီးများတွင်သာ မြင်ဖူးခဲ့ကြရာ ယခုကဲ့သို့ ရိုဘော့တစ်ရုပ် ရုတ်တရက် ပေါ်ထွက်လာခြင်းက သူတို့ကို ပို၍ပင် ထိတ်လန့်စရာကောင်းသောအရာကို မြင်တွေ့စေခဲ့သည်။
သတင်းဆောင်းပါးအမျိုးမျိုးအောက်တွင် အင်တာနက်အသုံးပြုသူများအားလုံး ပွက်လောရိုက်ကုန်ကြသည်။
"တာမီနေတာကြီး ရောက်လာတော့မှာလား"
"လူသားတွေအနေနဲ့ ဉာဏ်ရည်မြင့်ရိုဘော့တွေရဲ့ ခြိမ်းခြောက်မှုကို စိုးရိမ်ရမယ့်အချိန် ရောက်ပြီလား? လုံထန်ဂရုဖ်က တကယ်ကို ကြောက်စရာကောင်းတယ်၊ လင်းဖန် ကလည်း တကယ် ကြောက်ဖို့ကောင်းတာပဲ။ နိုင်ငံတော်က ဒါကို ဝင်မထိန်းချုပ်ဘူးလား"
"စစ်ပွဲသုံးရိုဘော့တွေ ပေါ်လာဖို့ကော အဝေးကြီး လိုသေးလို့လား"
"ဘီလ်ဂိတ် ပြောဖူးသလိုပဲ - အချို့လူတွေက တုနှိုင်းမဲ့ဉာဏ်ရည်ကို ဘာလို့ စိုးရိမ်စရာမရှိဘူးလို့ ထင်နေကြတာလဲဆိုတာ စိတ်ကူးရခက်လှတယ်"
ဆောင်းပါးအောက်ရှိ မှတ်ချက်အမျိုးမျိုးမှာ ရိုဘော့များ၏ ခြိမ်းခြောက်မှုအပေါ် စိုးရိမ်ပူပန်နေကြခြင်း ဖြစ်သည်။ သိပ္ပံစိတ်ကူးယဉ် ရုပ်ရှင်ကားကြီးများကို ကြည့်ရှုပြီးနောက် လူအများစုမှာ ရိုဘော့များ၏ အနာဂတ်ဖွံ့ဖြိုးတိုးတက်မှုအပေါ် မသိစိတ်မှ စိုးရိမ်ပူပန်မိသွားကြသည်။ သို့သော် ထိုသတင်းမှတ်ချက်များနှင့် မတူဘဲ ပြည်တွင်းရှိ လူသိများသော ဖိုရမ်တစ်ခုတွင်မူ ရှင်းထျန်းရိုဘော့နှင့် ပတ်သက်သည့် ပို့စ်များ၏ တုံ့ပြန်ပုံပုံစံမှာ လုံးဝ ကွဲပြားခြားနားနေခဲ့သည်။
"၁ ထပ်က ဆိုဖာပေါ်မှာ - ငါကတော့ ဒါကို သက်ရှိအရုပ်အဖြစ် လုပ်မှာပဲ၊ အိပ်ယာပေါ်ရောက်ရင် သူက အသံပြုမှာလား"
"၂ ထပ်က ၁ ထပ်ကို ပြန်ဖြေခြင်း.. - လေ့ကျင့်ခန်းလုပ်နေတုန်း သူ့ကို အသံထွက်ခိုင်းလိုက်လေ မင်း အော်ဟစ်နေလည်း မင်းရဲ့လည်ချောင်းကွဲမတတ် အော်နေတာကို ဘယ်သူမှ ဂရုစိုက်မှာမဟုတ်ဘူး။ သူကတော့ မင်းရဲ့ အမိန့်ကိုပဲ နာခံနေမှာ"
"၃ ထပ်... - လည်ချောင်းကွဲမတတ် တဲ့..."
"၄ ထပ်... - ရည်းစားမရှိလည်း မကြောက်ဘူး။ နိုင်ငံတော် ချမ်းသာလာရင် အချိုးကျ ခွဲဝေပေးမှာ သေချာတယ်"
……
ရှင်းထျန်းရိုဘော့ သတင်းပေါက်ကြားပြီးနောက် တစ်နာရီမပြည့်မီအချိန်အတွင်းမှာပင် အဓိက ဖိုရမ်များနှင့် သတင်းစာမျက်နှာများအားလုံး ရိုဘော့အကြောင်းအရာများဖြင့် ပြည့်နှက်သွားခဲ့သည်။
လုံထန်ဂရုဖ်၏ စမတ်လက်ထောက် (intelligent assistant) ပေါ်ထွက်လာပြီးနောက် တုနှိုင်းမဲ့ဉာဏ်ရည် (AI) မှာ အလွန် ရေပန်းစားနေခဲ့သည်။ ယခုတစ်ကြိမ်တွင်မူ အခြားသော စမတ်ရိုဘော့တစ်ခု ထပ်မံပေါ်ပေါက်လာခြင်း ဖြစ်သည်။ ၎င်းကို ဈေးကွက်ထဲသို့ မဖြန့်ချိရသေးသော်လည်း စမ်းသပ်ဆဲထုတ်ကုန်ကို မြင်တွေ့ရရုံမျှဖြင့် တုန်လှုပ်စရာ ကောင်းလှသည်။
ပြခန်းဧရိယာတွင် ရိုဘော့များ ရှိနေသော်လည်း ၎င်း၏ လှုပ်ရှားမှုမျိုးစုံကို ကြည့်ခြင်းအားဖြင့် နည်းပညာမှာ ရင့်ကျက်နေပြီဟု ဆုံးဖြတ်နိုင်သည်။
စမတ်ရိုဘော့ကြောင့် လုံထန်ဂရုသည် အင်တာနက်ညီလာခံ၏ ခေတ်ရှေ့ပြေးနည်းပညာများထဲတွင် ထူးထူးခြားခြား ပေါ်လွင်သွားခဲ့ပြီး သတင်းခေါင်းကြီးပိုင်းများကို သိမ်းပိုက်နိုင်ခဲ့သည်။ အခြားသော နည်းပညာများမှာ ဤပြောင်းလွယ်ပြင်လွယ်ရှိသော ရိုဘော့နှင့် နှိုင်းယှဉ်ပါက မှေးမှိန်သွားခဲ့ရသည်။
ညီလာခံစင်တာ၏ ခန်းမ (၁)။
လင်းဖန် သည် ပရိသတ်ကြားတွင် ထိုင်နေပြီး သူ့ဘေးတွင် ယွီချန်နန် ရှိနေသည်။
ယခုအခါ 'လုပ်ငန်းကဏ္ဍ၏ အသံ (Voice of the Industry)' အစီအစဉ် ဖြစ်သည်။ ယွီချန်နန် သည် ပထမဆုံးကိုယ်စားလှယ်အဖြစ် စင်ပေါ်တက်ကာ သော့ချက်မိန့်ခွန်း ပြောကြားပြီးနောက် ယခုအခါ အောက်သို့ ပြန်ဆင်းလာပြီး သူနှင့် စကားစမြည် ပြောနေခြင်း ဖြစ်သည်။
"ဥက္ကဋ္ဌလင်း… ဒီသတင်းကို ကြည့်လိုက်ဦး။" ယွီချန်နန် က သူ့လက်ထဲက မိုဘိုင်းလ်ဖုန်းကို လင်းဖန် ထံ ကမ်းပေးလိုက်သည်။
- "မင်းတို့ကုမ္ပဏီကတော့ တစ်ခါ ပြန်ပြီး လူပြောများပြန်ပြီ။"
လင်းဖန် သည် ယွီချန်နန် ၏ ဖုန်းဆီသို့ အာရုံစိုက်လိုက်ရာ ရိုဘော့အကြောင်း သတင်းမှတ်တမ်းများကို မြင်တွေ့လိုက်ရသည်။
သူ တစ်ချက်ကြည့်ရုံနှင့် မှတ်မိလိုက်သည်၊ ဒါသည် ပြခန်းဧရိယာရှိ ထိုရိုဘော့ပင် ဖြစ်သည်။ ဤရိုဘော့မှာ သူ ပထမဆုံး အောင်မြင်စွာ တပ်ဆင်နိုင်ခဲ့သည့် ရိုဘော့ဖြစ်ပြီး ၎င်းနောက်ပိုင်းတွင် ထွက်ရှိလာသည့် ရိုဘော့ ၁၀ ရုပ်မှာမူ အနည်းငယ် ပိုမိုမွမ်းမံထားခြင်း ဖြစ်သည်။ ထို့ကြောင့် စွမ်းဆောင်ရည် အနိမ့်ဆုံးဖြစ်သည့် ဤစက်ကိုသာ ပြပွဲအတွက် အသုံးပြုခဲ့ခြင်း ဖြစ်သည်။
"ဒီလောက်မြန်မြန် သတင်းခေါင်းကြီးပိုင်း ရောက်သွားတာလား"
လင်းဖန် က မိုဘိုင်းလ်ဖုန်းပေါ်ရှိ သတင်းများကို အံ့ဩတကြီး ကြည့်လိုက်သည်။ ရိုဘော့များ သတင်းခေါင်းကြီးပိုင်း ရောက်သွားခြင်းမှာ သူ ဘယ်တုန်းကမှ မမျှော်လင့်ထားသည့် အရာ ဖြစ်သည်။ ပြပွဲတွင် အခြားနည်းပညာကုမ္ပဏီများ၏ ခေတ်ရှေ့ပြေးနည်းပညာများစွာ ရှိနေခဲ့ရာ သူ့အမြင်တွင်မူ ဤရိုဘော့မှာ ပုံမှန်မျှသာ ဖြစ်သည်ဟု ထင်ခဲ့ခြင်း ဖြစ်သည်။
"ဒါက သတင်းအချက်အလက် ပေါက်ကွဲတဲ့ ခေတ်လေဗျာ။ သတင်းတွေ ဘယ်လောက်မြန်မြန် ပျံ့နှံ့လဲဆိုတာ မင်းက ငါ့ထက် ပိုသိတာပဲ။ လုံထန်ဂရုဖ်ရဲ့ နည်းပညာက ဒီအဆင့်အထိ ရောက်နေလိမ့်မယ်လို့ မမျှော်လင့်ထားမိဘူး" ဟု ယွီချန်နန် က ခံစားချက်အပြည့်ဖြင့် ပြောသည်။
လုံထန်ဂရုတည်ထောင်ပြီး မကြာသေးမီ အချိန်အတွင်းမှာပင် ဤမျှ ကြီးမားသော အောင်မြင်မှုများကို ရရှိခဲ့ခြင်းက လူအများကို အားကျခြင်းနှင့် မနာလိုခြင်းများ ဖြစ်ပေါ်စေသည်။
"ဒါက စမ်းသပ်ဆဲ အပိုင်းအစလေးတစ်ခုပါပဲဗျာ။" လင်းဖန် က ပြောလိုက်သည်။
"ပြပွဲတွေမှာ အများစုက စမ်းသပ်ဆဲ ထုတ်ကုန်တွေချည်းပါပဲ၊ ဒါပေမဲ့ သူတို့ကျတော့ ဘာလို့ သတင်းခေါင်းကြီးပိုင်း မရကြတာလဲ? မမျှော်လင့်ဘဲ လုံထန်ဂရုဖ်က စမတ်ရိုဘော့တွေကိုပါ ဦးတည်နေပြီပဲ။ အခုတော့ မင်းအပေါ် ထားတဲ့ ငါ့ရဲ့အမြင်ကို ပြောင်းလဲရတော့မယ် ထင်တယ်။"
"ဒီရိုဘော့ရဲ့ ဘက္ထရီသက်တမ်းက သုံးနာရီတောင်မပြည့်ပါဘူး။ နည်းပညာက မရင့်ကျက်သေးသလို အားနည်းချက်တွေ အများကြီး ရှိပါသေးတယ်။" လင်းဖန် က ပြုံးလျက် ပြောသည်။
- "ဈေးကွက်ထဲ ဖြန့်ဖို့ကတော့ မဖြစ်နိုင်သေးပါဘူး၊ သွားရမယ့် လမ်းကြောင်းက လိုပါသေးတယ်။"
သူတို့နှစ်ဦး စကားပြောနေစဉ်မှာပင် ချောင်ဆန်း (cheongsam) ဝတ်ဆင်ထားသည့် အခမ်းအနားမှူး အမျိုးသမီးတစ်ဦးက လင်းဖန် ထံသို့ လျှောက်လာပြီး ပြုံးလျက် ပြောလိုက်သည် - "မစ္စတာလင်း… ဥက္ကဋ္ဌကြီးအနေနဲ့ အဓိက သော့ချက်မိန့်ခွန်း ပြောကြားဖို့ စင်ပေါ်တက်ရမယ့် အချိန်ရောက်ပါပြီရှင့်။ ကျေးဇူးပြုပြီး ပြင်ဆင်ဖို့ ကျွန်မနောက်ကို လိုက်ခဲ့ပေးပါရှင်။"
"နောက်မှ ပြန်ပြောကြတာပေါ့။"
လင်းဖန် သည် ယွီချန်နန် ကို နှုတ်ဆက်လိုက်ပြီး ဧည့်ခံကျွေးမွေးရေးဝန်ထမ်း အမျိုးသမီး၏ လမ်းညွှန်မှုဖြင့် စင်နောက်ဘက်သို့ လျှောက်လှမ်းသွားခဲ့တော့သည်။
"ဒီနေရာမှာရှိတဲ့ လူတိုင်း 'လုံထန်ဂရု' ဆိုတဲ့ နာမည်ကို ကြားဖူးကြလိမ့်မယ် ထင်ပါတယ်ဗျာ။ လုံထန်ဂရုရဲ့ အရှိန်အဟုန်နဲ့ တိုးတက်လာမှုက နည်းပညာလောကရဲ့ ဒဏ္ဍာရီတစ်ခုပါပဲ။"
စင်မြင့်ထက်တွင် နာမည်ကြီး အစီအစဉ်တင်ဆက်သူ တုချွမ်း က အပြောကောင်းကောင်းဖြင့် တင်ဆက်နေခဲ့သည်။
"တုနှိုင်းမဲ့ဉာဏ်ရည် (AI) နယ်ပယ်က လောလောဆယ်မှာ အလွန်ရေပန်းစားနေတဲ့ အကြောင်းအရာဖြစ်သလို ဒီညီလာခံရဲ့ ဆောင်ပုဒ်လည်း ဖြစ်ပါတယ်ဗျာ။ လုံထန်ဂရုကတော့ တုနှိုင်းမဲ့ဉာဏ်ရည်နယ်ပယ်ရဲ့ ရှေ့ဆောင်လမ်းပြတွေထဲက တစ်ဦးဆိုတာ ငြင်းလို့မရပါဘူး။ အခုအချိန်မှာတော့ ကျွန်တော်တို့အနေနဲ့ လုံထန်ဂရုရဲ့ တည်ထောင်သူ မစ္စတာလင်းဖန် ကို အဓိက သော့ချက်မိန့်ခွန်း ပြောကြားပေးဖို့ စင်မြင့်ထက်သို့ လေးစားစွာ ဖိတ်ခေါ်အပ်ပါတယ်ဗျာ။"
.................................................................