အခန်း ၃၂၈

အပိုင်း ၃၂၈

တုချွမ်း ၏ ဖိတ်ခေါ်သံအဆုံးတွင် အခမ်းအနားမှူးအမျိုးသမီးက လင်းဖန် ကို စင်မြင့်ထက်သို့ လမ်းပြခေါ်ဆောင်သွားခဲ့သည်။

​အောက်တွင် ထိုင်နေကြသော ပရိသတ်များမှာ တိုးတိုးတိုးတိုးဖြင့် စတင်ဆွေးနွေးနေကြပြီ ဖြစ်သည်။

​မကြာသေးမီက အခြားသူများ၏ သော့ချက်မိန့်ခွန်းများကို နားထောင်နေစဉ်မှာပင် လုံထန်ဂရုဖ်သည် ပြခန်းဧရိယာ၌ အဆင့်မြင့် စမတ်ရိုဘော့တစ်ရုပ်ကို ပြသထားကြောင်း သူတို့ သိရှိခဲ့ကြသည်။ ယခုအခါ သတင်းများကို ဖွင့်ကြည့်လိုက်သည်နှင့် ဤရိုဘော့အကြောင်း ရေးသားထားသည့် သတင်းမှတ်တမ်းများကို အတိုင်းသား မြင်တွေ့နိုင်နေပြီ ဖြစ်သည်။

​တုနှိုင်းမဲ့ဉာဏ်ရည် နယ်ပယ်တွင် လုံထန်ဂရုသည် အခြားကုမ္ပဏီများထက် သိသိသာသာ ရှေ့ပြေးနေပြီဖြစ်ကြောင်း ထင်ရှားလှသည်။ အင်တာနက်လောကတွင် "တုနှိုင်းမဲ့ဉာဏ်ရည်ကို ပိုင်စိုးသူသည် ကမ္ဘာကြီးကို အောင်နိုင်လိမ့်မည်" ဟူသော စကားပုံတစ်ခု ရှိသည်။

​နိုင်ငံတော်ကလည်း သက်ဆိုင်ရာ မူဝါဒများကို ချမှတ်ထားပြီး ထုတ်ပြန်ထားသော စာရွက်စာတမ်းများတွင်ပင်- "တစ်နိုင်ငံလုံး၏ ကြိုးပမ်းအားထုတ်မှုဖြင့် ၂၀၃၀ ပြည့်နှစ်တွင် ကမ္ဘာ့တုနှိုင်းမဲ့ဉာဏ်ရည်နယ်ပယ်၏ အမြင့်ဆုံးကွပ်ကဲမှုဗဟိုချက်ကို သိမ်းပိုက်ရမည်" ဟု ဖော်ပြထားသည်။

​ဒါသည် လေထဲက စကားဗလာ မဟုတ်ဘဲ သက်ဆိုင်ရာ မူဝါဒများကိုပါ အတည်ပြု ထုတ်ပြန်ထားပြီးခြင်း ဖြစ်သည်။ တစ်ကမ္ဘာလုံးက တုနှိုင်းမဲ့ဉာဏ်ရည် အခွင့်အလမ်းကို လုယူရန် ပြိုင်ဆိုင်နေကြရာ မိမိတို့နိုင်ငံအနေဖြင့်လည်း ဤကဏ္ဍတွင် အခြားသူများနောက်ကျ ကျန်မနေစေရန် သဘာဝကျကျပင် ကြိုတင်စီမံကိန်းများ စတင်ချမှတ်နေပြီ ဖြစ်သည်။ တုနှိုင်းမဲ့ဉာဏ်ရည်သည် နောင်လာမည့် အချိန်ကာလအတော်ကြာအထိ အရေးကြီးသော ခေါင်းစဉ်တစ်ခု ဖြစ်နေပေလိမ့်မည်။

​ယခုအခါ လုံထန်ဂရုသည် တုနှိုင်းမဲ့ဉာဏ်ရည်နယ်ပယ်ရှိ ဘီလူးကြီးသုံးအုပ်စုကို သိသိသာသာ အမီလိုက်နိုင်ခဲ့ပြီ ဖြစ်ရာ လုံထန်ဂရု၏ အရှိန်အဝါသည် နောင်အနာဂတ်တွင် ဆက်လက်မြင့်မားလာမည်မှာ သေချာလှသည်။

​အကယ်၍ စမတ်လက်ထောက်တစ်ခုတည်းသာ ဆိုပါက အဓိက နည်းပညာဘီလူးကြီးများက အလွန်အမင်း အာရုံစိုက်ချင်မှ စိုက်ကြပေလိမ့်မည်။ သို့သော် ယခုအခါ စမတ်ရိုဘော့ပါ ပေါ်ထွက်လာပြီဖြစ်ရာ လူတိုင်း မဖြစ်မနေ အာရုံစိုက်ကြရတော့မည် ဖြစ်သည်။ လုံထန်ဂရုသည် အခြားသူများကို ကျော်တက်ကာ တုနှိုင်းမဲ့ဉာဏ်ရည် လုပ်ငန်းကဏ္ဍ၏ ရှေ့ဆောင်လမ်းပြများထဲက တစ်ဦး ဖြစ်လာခဲ့ချေပြီ။

​လင်းဖန် စင်ပေါ်သို့ ရောက်ရှိလာသောအခါ ညီလာခံခန်းမတစ်ခုလုံး ချက်ချင်း ငြိမ်သက်သွားပြီး လူတိုင်း၏ အကြည့်များက သူ့ထံသို့သာ စုပြုံရောက်ရှိသွားသည်။

​ယခုနှစ် အင်တာနက်ညီလာခံ၏ ဆောင်ပုဒ်မှာ တုနှိုင်းမဲ့ဉာဏ်ရည်နှင့် ဆက်စပ်နေသည်။ တုနှိုင်းမဲ့ဉာဏ်ရည်၏ ရှေ့ဆောင်တစ်ဦးအနေဖြင့် လင်းဖန် ပြောမည့် စကားလုံးများမှာ အလေးအနက် အရာရောက်လှသည်။ နည်းပညာပိုင်းအရ သူသည် လုံထန်စမတ်ဖုန်းလည်ပတ်ရေးစနစ်ကို တီထွင်ခဲ့သည်၊ စမတ်လက်ထောက် 'ပန်ကူးကို အဆင့်မြှင့်တင်ခဲ့သည်၊ ထို့အပြင် တရုတ်စာလုံးသုံး ဒုတိယမြောက် ကွန်ပျူတာပရိုဂရမ်မင်းဘာသာစကားကိုပါ ဖန်တီးခဲ့သူ ဖြစ်သည်။

​လင်းဖန် သည် ငယ်ရွယ်လွန်းလှသော်လည်း ဤအချက်ကြောင့် သူ့ကို မည်သူမျှ လျှော့မတွက်ရဲကြပေ။ လင်းဖန်သည်လည်း ဩဇာအရှိဆုံးသော နည်းပညာဘီလူးကြီးများထဲက တစ်ဦး ဖြစ်နေပြီ မဟုတ်ပါလား။

​လင်းဖန် သည် စင်မြင့်ထက်ရှိ စကားပြောစင်ပလ္လင်တွင် မတ်တတ်ရပ်လိုက်ပြီး စင်ပေါ်ရှိ မိန့်ခွန်းမူကြမ်းကို တစ်ချက် လှမ်းကြည့်လိုက်သည်။ ဒါသည် ဤကဲ့သို့ ကြီးမားသော စင်မြင့်ထက်တွင် သူ ပထမဆုံးအကြိမ် ရပ်ရခြင်းဖြစ်ရာ ရင်ထဲ၌ အနည်းငယ်တော့ စိတ်လှုပ်ရှားမိသည်။

​စိတ်လှုပ်ရှားမှုများကို ဖြေဖျောက်ကာ အသက်ကို ပြင်းပြင်းတစ်ချက် ရှူသွင်းလိုက်ပြီးနောက် လင်းဖန် ခေါင်းမော့ကာ ပရိသတ်အားလုံးကို စိုက်ကြည့်လိုက်သည်။

​"အားလုံးပဲ မင်္ဂလာပါဗျာ၊ ကျွန်တော်ကတော့ လုံထန်ဂရုက လင်းဖန် ဖြစ်ပါတယ်" လင်းဖန် က ဖြည်းညင်းစွာ စတင်ပြောဆိုလိုက်သည်။

​ပရိသတ်အားလုံး စိတ်ကို မြှင့်တင်ကာ အာရုံစိုက် နားထောင်ကြတော့သည်။

​"တုနှိုင်းမဲ့ဉာဏ်ရည်ဆိုတာ ကျွန်တော်တို့နဲ့ အဝေးကြီးမှာ မဟုတ်တော့ပါဘူး။ လွန်ခဲ့တဲ့ ဆယ်ရက်လောက်ကတင် သိပ္ပံနဲ့ နည်းပညာဝန်ကြီးဌာနက အစည်းအဝေးတစ်ခု ကျင်းပပြီး နိုင်ငံတော်ရဲ့ မျိုးဆက်သစ် တုနှိုင်းမဲ့ဉာဏ်ရည် ပွင့်လင်းမြင်သာတဲ့ ဆန်းသစ်တီထွင်မှု ပလက်ဖောင်း ပထမဆုံးအသုတ်ကို ကြေညာခဲ့ပါတယ်"

​"ပိုင်ဒူးရဲ့ အလိုအလျောက်မောင်းနှင်စနစ်၊ အလီ ရဲ့ မြို့ပြဦးနှောက်၊ ပင်ဂွင်းရဲ့ ဆေးဘက်ဆိုင်ရာ ပုံရိပ်ဖော်စနစ်နဲ့ စုန့်ဖေးရဲ့ စမတ်အသံ အချိန်နဲ့တပြေးညီ ဘာသာပြန်စနစ်တို့ ဖြစ်ကြပါတယ်"

​တုနှိုင်းမဲ့ဉာဏ်ရည်ကို ထိန်းချုပ်နိုင်သူသည် ကမ္ဘာကြီး၏ အရှင်သခင် ဖြစ်လာနိုင်သည်။ ကမ္ဘာ့တုနှိုင်းမဲ့ဉာဏ်ရည်၏ အမြင့်ဆုံးကွပ်ကဲမှုဗဟိုချက်ကို သိမ်းပိုက်မည့် တိုက်ပွဲမှာ ထိုအခိုက်အတန့်ကတည်းက စတင်နေခဲ့ပြီ ဖြစ်သည်။

​"နောင်အနာဂတ်မှာ လုံထန်ဂရုဟာလည်း ဒီတိုက်ပွဲထဲကို ဝင်ရောက်မှာဖြစ်ပြီး ကမ္ဘာ့တုနှိုင်းမဲ့ဉာဏ်ရည်ရဲ့ အမြင့်ဆုံးဗဟိုချက်ကို သိမ်းပိုက်နိုင်ဖို့ ကူညီပေးသွားမှာပါ။ အခြေအနေတွေက စတင်ပြောင်းလဲနေပြီဖြစ်လို့ ဘယ်သူ အရင်ဆုံး ပြုတ်ကျကျန်ရစ်မလဲဆိုတာ ကျွန်တော်တို့ ဘယ်သူမှ ကြိုမသိနိုင်ပါဘူး"

​"လုံထန်ဟာ တုနှိုင်းမဲ့ဉာဏ်ရည်လောကထဲကို အသစ်ဝင်ရောက်လာတာ ဖြစ်ပေမဲ့ ဒီနယ်ပယ်ထဲက ဘယ်လိုစိန်ခေါ်မှုကိုမဆို လက်ခံဖို့ ယုံကြည်ချက် အပြည့်ရှိပါတယ်။ နောင်အနာဂတ်မှာ တုနှိုင်းမဲ့ဉာဏ်ရည်ကို ကုန်ထုတ်လုပ်မှု၊ ဆေးဘက်ဆိုင်ရာနဲ့ အခြားကဏ္ဍတွေမှာ အသုံးချသွားမှာပါ"

​"ကျွန်တော်တို့ကုမ္ပဏီရဲ့ နောက်ဆုံးပေါ် စမတ်ရိုဘော့နည်းပညာကို တီထွင်ပြီးစီးသွားပါပြီ။ နောင်အနာဂတ်မှာ ခင်ဗျားတို့ စဉ်းစားလို့ရမယ့် စမတ်အိမ်အကူ၊ ငွေကိုင်၊ စားပွဲထိုး၊ ကလေးထိန်း စတဲ့ လုပ်ငန်းကဏ္ဍမျိုးစုံ ဖြစ်လာနိုင်ပါတယ်"

​အလိုအလျောက်မောင်းနှင်စနစ်က ယာဉ်မောင်းများကို အလုပ်လက်မဲ့ ဖြစ်သွားစေနိုင်သလို၊ စမတ်ဘာသာပြန်စနစ်က ဘာသာပြန်ဆရာများကို ရှားပါးသတ္တဝါများ ဖြစ်သွားစေနိုင်သည်။ တုနှိုင်းမဲ့ဉာဏ်ရည်ခေတ်သည် မကြုံစဖူးသော အခွင့်အလမ်းဖြစ်သလို မကြုံစဖူးသော စိန်ခေါ်မှုလည်း ဖြစ်သည်။

​"ကျွန်တော်တို့ စဉ်းစားရမှာက ဒီပတ်ဝန်းကျင်နဲ့ ဘယ်လို လိုက်လျောညီထွေ နေထိုင်မလဲဆိုတာပါပဲ။ မစ္စတာ ရော်ဘင်လီပြောခဲ့တဲ့ စကားကို ကျွန်တော် အလွန်သဘောတူပါတယ် - 'နောင်အနာဂတ်မှာ AI ဟာ အင်တာနက်ထုတ်ကုန်တွေအပေါ် အတိုင်းအဆမဲ့ တိုက်ခိုက်မှု (dimensionality reduction attack) တစ်ခု ဖြစ်လာလိမ့်မယ်' ဆိုတာပါပဲ"

​လင်းဖန် သည် စင်ပေါ်တွင် ရဲရဲဝံဝံ ရုပ်လုံးဖော် ပြောကြားနေခဲ့သည်။ သူ၏ အမြင်အရ တုနှိုင်းမဲ့ဉာဏ်ရည်ခေတ်မှာ ရောက်ရှိနေပြီ ဖြစ်သည်။ စနစ်၏ အကူအညီဖြင့် သူသည် အင်တာနက်ကမ္ဘာတစ်ခုလုံး၏ အပြောင်းအလဲများကို သိရှိနိုင်သည်။ လက်ရှိအင်တာနက်လောကသည် သူ့အတွက်မူ နှစ်ဖက်မြင်ကမ္ဘာ (two-dimensional world) တွင် ရောက်ရှိနေသကဲ့သို့ အလွန် နှမြောစရာကောင်းလောက်အောင် အားနည်းလွန်းလှသည်။

​အောက်က ပရိသတ်များမှာ သေချာနားထောင်ရင်း ရံဖန်ရံခါ တွေးတောသည့် အမူအရာများ ပြသနေကြသည်။

​လူသားမျိုးနွယ်၏ ဖွံ့ဖြိုးတိုးတက်မှု သမိုင်းကြောင်းသည် ပိုမိုလွယ်ကူစွာ အသုံးပြုနိုင်သော ကိရိယာများကို တီထွင်လာသည့် သမိုင်းကြောင်းပင် ဖြစ်သည်။ ကျောက်ခေတ်ကိရိယာများ၊ ကြေးထည်များ၊ သံထည်များ၊ ရေနွေးငွေ့အင်ဂျင်များ၊ လျှပ်စစ်ပစ္စည်းများ၊ သတင်းအချက်အလက်နည်းပညာနှင့် ဉာဏ်ရည်တုခေတ်။

​လူသားများကို သက်သောင့်သက်သာ နေထိုင်ခွင့်ပေးခြင်းမှာ ဖွံ့ဖြိုးတိုးတက်မှု၏ လားရာပင် ဖြစ်သည်။ ထို့ကြောင့် လူသားများအနေဖြင့် တုနှိုင်းမဲ့ဉာဏ်ရည်၏ တည်ရှိမှုအပေါ် မည်မျှပင် စိုးရိမ်ပူပန်နေပါစေ ဤလားရာကို ပြောင်းလဲ၍မရပေ။ အကယ်၍ မိမိတို့က မတီထွင်ပါက အခြားသူများက တီထွင်ကြမည်ဖြစ်ရာ ၎င်းမှာ မိမိတို့ ပြုတ်ကျကျန်ရစ်ခဲ့မည်ဟူသော သဘောပင် ဖြစ်သည်။

​လုံထန်ဂရု၏ စမတ်ရိုဘော့များနှင့် ပေါင်းစပ်ကာ လင်းဖန် သည် ကဏ္ဍမျိုးစုံတွင် ၎င်း၏ အသုံးချပုံများကို သေချာ ရှင်းလင်းပြောကြားခဲ့သည်။ ကမ္ဘာကြီးသည် တုနှိုင်းမဲ့ဉာဏ်ရည်ကို လက်ခံရန် အဆင်မသင့်သေးပေ၊ အနည်းဆုံးတော့ ယခုအချိန်အထိပေါ့။

​"မစ္စတာကျိုး… လင်းဖန် ရဲ့ စကားတွေကို ခင်ဗျား ဘယ်လိုထင်လဲဗျ"

​စင်အောက်တွင် ယွီချန်နန် က သူ့ဘေးရှိ ကျိုးဟုန်ဝေ ကို လှမ်းမေးလိုက်သည်။ သူတို့တင်မကဘဲ အခြားသူများလည်း လင်းဖန် ၏ စကားများနှင့် ပတ်သက်၍ တိုးတိုးတိုးတိုး ပြောဆိုနေကြသည်။

​"ပြောရခက်တယ်၊ သူက အရမ်းယုံကြည်ချက်ရှိတာပဲ။" ကျိုးဟုန်ဝေ က ပြောလိုက်သည်။

​လင်းဖန် ၏ စကားများအရ လုံထန်ဂရုသည် တုနှိုင်းမဲ့ဉာဏ်ရည် နယ်ပယ်တွင် အလွန်တရာ ပြင်းထန်သော ယုံကြည်ချက် ရှိနေကြောင်း ကြားသိနိုင်သည်။

​"လုံထန်ဂရုရဲ့ ရိုဘော့တွေက သူ့ရဲ့ ယုံကြည်မှုရဲ့ မြစ်ဖျားခံရာ ဖြစ်လိမ့်မယ်။ နည်းပညာက ရင့်ကျက်နေပုံရတယ်။ လူနဲ့ စက်ပစ္စည်း အပြန်အလှန် ဆက်သွယ်မှုနဲ့ နက်ရှိုင်းစွာ လေ့လာခြင်း (deep learning) ကဏ္ဍတွေမှာ လုံထန်ဂရုဟာ ထိပ်တန်းအကျဆုံး နယ်ပယ်ထဲမှာ ရှိနေသင့်တယ်"

​"ဒီကမ္ဘာကြီးက မကြာခင် ဒီလူငယ်တွေရဲ့ လက်ထဲကို ရောက်တော့မယ့်ပုံပဲ။" ယွီချန်နန် က ခံစားချက်အပြည့်ဖြင့် ပြောလိုက်ရာ -

​"ခင်ဗျားလည်း မအိုသေးပါဘူးဗျာ။"

​သူတို့ စကားပြောရင်းဖြင့် နှစ်ဦးစလုံး ရယ်မောလိုက်ကြသည်။

​မိန့်ခွန်းပြောကြားမှုမှာ ငါးမိနစ်မျှသာ ကြာမြင့်ခဲ့သော်လည်း ကြားလိုက်ရသည့် အရာများမှာ လူအများအပြားအတွက် ပြန်လည်တွေးတောရန် လုံလောက်လှသည်။ လင်းဖန် သူ၏ သော့ချက်မိန့်ခွန်းကို ပြောကြားပြီးစီးသွားသောအခါ ဖွင့်ပွဲဖိုရမ်မှာလည်း အဆုံးသတ်သို့ ရောက်ရှိသွားခဲ့သည်။

​ယွီချန်နန် နှင့် အခြားလူအချို့နှင့်အတူ ပြခန်းဧရိယာသို့ လှည့်လည်ကြည့်ရှုပြီး မနက်စာ စားသောက်ကာ ခေတ္တမျှ စကားပြောဆိုပြီးနောက် သူသည် မိုရှင်းယာ နှင့်အတူ သူတို့တည်းခိုသည့် ဟိုတယ်သို့ အပြေးအလွှား ပြန်လာခဲ့သည်။

​"ဥက္ကဋ္ဌကြီး… ရိုဘော့ကိစ္စကြောင့် ကျွန်မတို့ကုမ္ပဏီဟာ အခုဆို အဓိက မီဒီယာကြီးတွေရဲ့ အာရုံစိုက်မှုကို ခံနေရပါတယ်ရှင့်။ အချို့မီဒီယာတွေက ဥက္ကဋ္ဌကြီးကို သီးသန့်အင်တာဗျူးလုပ်ချင်နေကြပါတယ်"

​"ဘယ်မီဒီယာလဲ"

​"ပြည်သူ့နေ့စဉ်သတင်းစာပါရှင့်။" မိုရှင်းယာ က ပြောလိုက်သည်။

​"လူက နာမည်ကြီးမှာ ကြောက်ရပြီး ဝက်က ဝဖြိုးမှာ ကြောက်ရတယ် (လူဆိုတာ နာမည်ကြီးလာရင် ပြဿနာများတတ်တယ်) ဆိုတာ ဒါမျိုးလား" လင်းဖန် က ခါးသက်သက် ပြုံးလိုက်မိသည်။ သူ အပြင်သို့ ထွက်လာသည်မှာ အကြိမ်နည်းငယ်သာ ရှိသေးသော်လည်း ကိစ္စမျိုးစုံက တစ်ခုပြီးတစ်ခု ပေါ်ပေါက်လာခဲ့ချေပြီ - "တော်သေးတာပေါ့၊ မွန်းလွဲပိုင်းမှာ တခြားအစီအစဉ်တွေ မရှိဘူး။ အချိန်ရှိတုန်း သူတို့ကို အခုပဲ ဒီကို လာခဲ့ဖို့ အကြောင်းကြားလိုက်ပါ"

​"ကောင်းပါပြီရှင့်။"

​လျူချင်း ဖုန်းချလိုက်ပြီးနောက် စိတ်လှုပ်ရှားလွန်း၍ ခုန်ပေါက်မိသွားသည်။

​သူတို့သည် လုံထန်ဂရု၏ တည်ထောင်သူ လင်းဖန် ၏ သီးသန့်အင်တာဗျူးကို ရရှိခဲ့ခြင်း ဖြစ်သည်။ ဒါသည် လင်းဖန် အနေဖြင့် ပထမဆုံးအကြိမ် အင်တာဗျူးကို လက်ခံခြင်း ဖြစ်သည်။ သူသည် အစက မျှော်လင့်ချက် အများကြီး မထားခဲ့သော်လည်း ယခုအခါ အောင်မြင်သွားခဲ့ချေပြီ။ အယ်ဒီတာက သူ့ကို ဤသီးသန့်အင်တာဗျူးကို တာဝန်ပေးအပ်ခဲ့သဖြင့် သူ စိတ်လှုပ်ရှားသလို ရင်လည်း တုန်နေမိသည်။

​သေချာစွာ ပြင်ဆင်ဝတ်ဆင်ပြီးနောက် လျူချင်း သည် သူနှင့်အတူ ပါလာမည့် ဓာတ်ပုံဆရာကို ခေါ်ကာ လင်းဖန် ရှိရာ ဟိုတယ်သို့ အပြေးအလွှား သွားခဲ့သည်။ ထိုကဲ့သို့သော လူကြီးမင်းများတွင် အချိန်အများကြီးမရှိသဖြင့် သူ အခြားသူများကို အကြာကြီး မစောင့်ခိုင်းရဲပေ။

​"လျူချင်း… မင်းအမြင်အရ ဒီလင်းဖန်က ဘယ်လိုလူမျိုး ဖြစ်မလဲ" လမ်းခရီးတွင် ဓာတ်ပုံဆရာတစ်ဦးက လှမ်းမေးလိုက်သည်။

​"ဘယ်သူသိမှာလဲ..ငါတို့က သူ့ကို သူ့ရဲ့ မိန့်ခွန်းတွေကတစ်ဆင့်ပဲ သိတာလေ၊ အနီးကပ် တစ်ခါမှ မမြင်ဖူးဘူး။" လျူချင်း က ပြောသည်။

​"ရုပ်ရှင်တွေထဲမှာတော့ အဲလို တကယ့်ကို အစွမ်းထက်တဲ့သူတွေမှာ ထူးဆန်းတဲ့ အကျင့်တွေ ရှိတတ်ကြတယ်။ ဥပမာ- အညစ်အကြေး ကြောက်တတ်တာဒါမှမဟုတ် စိတ်တိုတတ်တာမျိုးပေါ့။ ငါတို့ အဲဒီကိုသွားရင် ဘာတွေ သတိထားရမလဲ" ဟု ဓာတ်ပုံဆရာက မေးသည်။

​"မင်း ရုပ်ရှင်တွေ ကြည့်လွန်းနေပြီ။" အခြားဓာတ်ပုံဆရာတစ်ဦးက သူ့ကို မကျေမနပ်ဖြင့် မျက်စောင်းထိုးကာ ပြောလိုက်တော့သည်။

...................................................................

​