အခန်း ၉၃

အခန်း ၉၃ - ဘဏ်ကတ်နှင့် အရုပ်များ။

ဝေ့ဝူသည် သူ၏ စိတ်အာရုံဖြင့် ဘဏ်ကတ်ကို လွှမ်းခြုံကြည့်ရှုလိုက်ရာ ဤပစ္စည်းကို အသွေးအသားဖြင့် သခင်ချည်နှောင်ခြင်း ပြုလုပ်၍ ရကြောင်း သိရှိလိုက်ရသည်။

သို့သော်လည်း ချည်နှောင်ပြီးနောက်တွင် မည်သည့်ထူးခြားမှုမျှ ဖြစ်မလာခဲ့ချေ။

"ဝိညာဉ်ချီနဲ့ လှုံ့ဆော်ကြည့်ရင် ရမလားမသိဘူး။"

သူသည် ဝိညာဉ်ချီမျှင်တန်းတစ်ခုကို ဘဏ်ကတ်အတွင်းသို့ စီးဆင်းစေလိုက်သည်။

ထို့နောက်တွင်မူ...

ထိုဝိညာဉ်ချီများသည် ဘဏ်ကတ်ပြားလေးအတွင်းသို့ စုပ်ယူခြင်း ခံလိုက်ရလေသည်။

"?"

ဝေ့ဝူ*စိတ်ဝင်စားသွားခဲ့သည်။

သူက စိတ်အာရုံဖြင့် ထပ်မံအာရုံခံကြည့်လိုက်ရာ ဘဏ်ကတ်အတွင်း၌ ဝိညာဉ်ချီအနည်းငယ် သိုလှောင်ထားသည့် နေရာတစ်ခု ပေါ်ပေါက်လာပြီး ၎င်းဝိညာဉ်ချီများကို ပြန်လည်ထုတ်ယူ၍ရကြောင်း တွေ့ရှိလိုက်ရသည်။

ဝေ့ဝူ၏ စိတ်ထဲတွင် အတွေးတစ်ခု လက်ခနဲ ပေါ်လာပြီး စိတ်လှုပ်ရှားသွားခဲ့သည်။

သူသည် ဝိညာဉ်ကျောက်တုံးအနည်းငယ်ကို ထုတ်ယူ၍ ဘဏ်ကတ်ဘေးတွင် ချထားလိုက်ပြီးနောက် စိတ်ကူးဖြင့် လှုံ့ဆော်လိုက်ရာ ဘဏ်ကတ်မှ စုပ်ယူမှုအားတစ်ခု ထွက်ပေါ်လာပြီး ဝိညာဉ်ကျောက်တုံးများအတွင်းရှိ ဝိညာဉ်ချီအားလုံးကို စုပ်ယူသွားခဲ့တော့သည်။

ဆက်လက်၍ သူသည် ဘဏ်ကတ်အတွင်းရှိ ဝိညာဉ်ချီများကို ပြန်လည်ထုတ်ယူရန် ကြိုးစားကြည့်ရာ အလွန်တရာ ချောမွေ့နေသည်ကို တွေ့ရသည်။

"ဒါ... ဒါက တကယ်ကြီး ဝိညာဉ်ချီတွေကို သိုလှောင်နိုင်တာလား။"

ထို့အပြင် ဤဆန်းကြယ်သော နေရာလွတ်သည် အခြားနေရာတစ်ခုနှင့် ဆက်သွယ်ထားသကဲ့သို့ သူ မှိန်ဖျဖျ အာရုံရနေသည်။

သူသည် မိုဘိုင်းဖုန်းကို အသုံးပြု၍ ဝေ့ကျင်းပေါ်ကို ဆက်သွယ်လိုက်သည်။

"အဖေ... ဒီဘက်ကို ခဏလာခဲ့ပါဦး။"

ဝေ့ကျင်းပေါ်အမြန်ရောက်ရှိလာပြီးနောက် ဝေ့ဝူက သူ့အား အခြားဘဏ်ကတ်တစ်ခုကို အသွေးအသားဖြင့် ချည်နှောင်ခိုင်းလိုက်သည်။

ဝေ့ကျင်းပေါ်ချည်နှောင်ပြီးသွားသောအခါ ဝေ့ဝူသည် ထိုဘဏ်ကတ်ပေါ်ရှိ ဂဏန်းများကို မှတ်သားလိုက်သည်။

ထို့နောက် စိတ်အာရုံဖြင့် ညွှန်ကြားလိုက်ရာ မိမိဘဏ်ကတ်အတွင်းရှိ ဝိညာဉ်ချီများမှာ အနည်းငယ် လျော့နည်းသွားခဲ့သည်။

တစ်ပြိုင်နက်တည်းမှာပင်ဝေ့ကျင်းပေါ်က ရုတ်တရက် ရေရွတ်လိုက်သည်။

"ဟင်... ငါ့ကတ်ထဲကို ဝိညာဉ်ချီတွေ ဘယ်လိုလုပ် ချက်ချင်းရောက်လာတာလဲ။"

ဝေ့ဝူ၏ မျက်လုံးများ ပြူးကျယ်သွားခဲ့သည်။

တကယ်ကြီး အောင်မြင်တာပဲ။

ချက်ချင်းပင် သူသည် ဤဘဏ်ကတ်၏ ကြီးမားလှသော အရေးပါပုံကို နားလည်သွားခဲ့သည်။

ဒါက ကျင့်ကြံခြင်းလောကရဲ့ ငွေကြေးစနစ်အတွက် လုံးဝကို တော်လှန်ရေးတစ်ရပ်ပဲ။

ယခုအချိန်မှစ၍ ဝိညာဉ်ကျောက်တုံးများရှိ ဝိညာဉ်ချီများကို ဘဏ်ကတ်အတွင်း သိုလှောင်ထားနိုင်ရုံတင်မကဘဲ တစ်ဦးမှတစ်ဦးထံသို့ လွှဲပြောင်းပေးနိုင်ပြီ ဖြစ်သည်။

နောင်တွင် ဝေ့မိသားစုဝင်များ အပြင်ထွက်သည့်အခါ ဝိညာဉ်ကျောက်တုံးများကို သယ်ဆောင်သွားရန် မလိုတော့ချေ။ ကတ်တစ်ကတ် လက်ထဲရှိရုံဖြင့် ကမ္ဘာပတ်နိုင်ပြီ ဖြစ်သည်။

ကတ်အတွင်းရှိ ဝိညာဉ်ချီများ ကုန်ဆုံးသွားလျှင်ပင် မိသားစုဌာနချုပ်မှ တိုက်ရိုက် လွှဲပြောင်းပေးပို့နိုင်မည် ဖြစ်သည်။

ဆက်လက်၍ ဝေ့ဝူသည် အသေးစိတ် အချက်အလက်အချို့ကို စမ်းသပ်ကြည့်သည်။

ဥပမာအားဖြင့် လွှဲပြောင်းပြီးနောက် ဝိညာဉ်ချီပမာဏ ပြောင်းလဲမှု ရှိမရှိ စမ်းသပ်ရာ လွှဲပြောင်းမှုပြုလုပ်တိုင်း တစ်ထောင်ပုံ တစ်ပုံခန့် လျော့နည်းသွားသည်ကို တွေ့ရသည်။ ၎င်းမှာ ဝန်ဆောင်ခဖြတ်တောက်ခံရခြင်း ဖြစ်နိုင်ပေသည်။

ဤမျှ တိကျသော ပမာဏကို သူ မည်သို့ သိရှိသနည်းဆိုသည်ကိုမူ လာမမေးပါနှင့်။

နောက်ထပ် မေးခွန်းတစ်ခုမှာ ဝိညာဉ်ချီ စုပ်ယူမှု အရှိန်နှုန်းပင် ဖြစ်သည်။

အဖြေမှာ ဝိညာဉ်ကျောက်တုံးကို တိုက်ရိုက်စုပ်ယူရသည့် အရှိန်နှင့် အတူတူပင် ဖြစ်သည်။

ဝေ့ဝူသည် အဆင့်နိမ့် ဝိညာဉ်ကျောက်တုံးနှင့် အဆင့်လတ် ဝိညာဉ်ကျောက်တုံးများကို အသီးသီး စမ်းသပ်ခဲ့သည်။

ထိုဝိညာဉ်ကျောက်တုံး နှစ်မျိုးစလုံး ဘဏ်ကတ်အတွင်းသို့ ရောက်ရှိသွားသောအခါ အချင်းချင်း ရောနှောမသွားဘဲ သီးခြား နယ်မြေနှစ်ခုအဖြစ် ပေါ်ပေါက်လာသည်ကို သူ တွေ့ရှိရသည်။

အဆင့်နိမ့် ဝိညာဉ်ကျောက်တုံး နယ်မြေမှ စုပ်ယူရသည်မှာ နှေးကွေးပြီး အဆင့်လတ်နယ်မြေမှ စုပ်ယူရသည်မှာ ပိုမိုမြန်ဆန်သည်။ ၎င်းမှာ ပုံမှန်အတိုင်း ဝိညာဉ်ကျောက်တုံးများကို စုပ်ယူရသည့် အရှိန်နှုန်းနှင့် အတူတူပင် ဖြစ်သည်။

သူက စိတ်လှုပ်ရှားစွာဖြင့် ရေရွတ်လိုက်သည်။

"အကယ်၍ ငါ ကန်စွန်းဥရဲ့ ဝိညာဉ်ချီတွေကိုသာ ဒီထဲမှာ သိမ်းထားနိုင်ရင် စုပ်ယူရတဲ့အရှိန်က အရမ်းမြန်မှာပဲ။ ဒါက အကန့်အသတ်မရှိကြီးမားတဲ့ ဝိညာဉ်ချီစုဆောင်းခြင်း ဆေးလုံးတစ်လုံးနဲ့ အလားတူပဲ မဟုတ်လား။"

ဝေ့ဝူသည် အနာဂတ်ကို စိတ်ကူးယဉ်ရင်း သွားများကျွတ်မတတ် ပြုံးဖြဲဖြဲ ဖြစ်နေခဲ့သည်။

ဘဏ်ကတ်တွင် လျှို့ဝှက်ကုဒ်ဖြင့် အကာအကွယ်ပေးထားမှုလည်း ရှိရာ အခြားသူတစ်ဦးက ရရှိသွားလျှင်ပင် အတွင်းမှ ဝိညာဉ်ချီများကို ထုတ်ယူရန် ခက်ခဲလိမ့်မည် ဖြစ်သည်။

သူသည် မိမိအတွက် ဘဏ်ကတ်တစ်ခုကို ချန်ထားပြီး ကျန်ကတ်လေးခု၏ ဂဏန်းများကို မှတ်သားကာ ကလေးသူငယ် ရုပ်ပြဖတ်စာ၊ အိမ်ရာကျမ်းတို့နှင့်အတူ ဝေ့ကျင်းပေါ်ထံသို့ လွှဲပြောင်းပေးအပ်လိုက်သည်။

ကလေးသူငယ် ရုပ်ပြဖတ်စာ၏ စွမ်းဆောင်ရည်ကို ကြားသိရသောအခါ ဝေ့ကျင်းပေါ်၏ မျက်လုံးများ အရောင်တောက်သွားပြီး ၎င်း၏ ကြီးမားသော အရေးပါပုံကို သဘောပေါက်သွားခဲ့သည်။

ဝေ့ကျင်းပေါ်ထွက်ခွာသွားပြီးနောက်ဝေ့ဝူသည် အဓိက အစီအစဉ်ဖြစ်သော အန်နီမေး အရုပ်များကို စတင်စစ်ဆေးတော့သည်။

သူသည် ယခုတစ်ခေါက် ကမ္ဘာမြေမှ အရုပ်ပုလ္လင် စုစုပေါင်း ၂၁ ရုပ် ယူဆောင်လာခဲ့ပြီး မျှော်လင့်ထားသည့်အတိုင်း ၎င်းတို့အားလုံးမှာ ရုပ်သေးရုပ်များ ဖြစ်လာကြသည်။

ထို့အပြင် လီယိုနှင့် နှိုင်းယှဉ်ပါက ဤရုပ်သေးရုပ်များမှာ ပိုမို၍ အသက်ဝင်ကာ အသွေးအသားဖြင့် တည်ဆောက်ထားသကဲ့သို့ ရှိပြီး ထိတွေ့ရသည်မှာ လူသားအစစ်အတိုင်းဖြစ်ကာ ဝိညာဉ်အသိဉာဏ် အရိပ်အယောင်ပင် ရှိနေကြသည်။

ဥပမာအားဖြင့် ကောက်ရိုးဦးထုပ်ဆောင်းကာ ပြုံးဖြဲဖြဲလုပ်နေသော Luffyကို ထိတွေ့ကြည့်ရာ အရေပြားမှာ အလွန်မာကျောလှသည်။

League of Legends ဂိမ်းထဲမှTeemoလေးမှာမူ အမွှေးပွပွလေး ဖြစ်နေသည်။

ထို့အပြင် ဤရုပ်သေးရုပ်များသည် မိမိတို့ ဇာတ်ကောင်အသီးသီး၏ အထူးစွမ်းရည်များကိုပါ ထိန်းသိမ်းထားကြသည်။

Teemoသည် ကိုယ်ပျောက်နိုင်ပြီး မှိုဗုံးများ ထောင်နိုင်သည်။

Nasusသည် တိုက်ခိုက်မှုစွမ်းအားကို ထပ်ဆင့်မြှင့်တင်နိုင်သည်။

Narutoတွင်Rasenganနှင့် အရိပ်ခွဲကျင့်စဉ်ရှိသည်။

Mewtwo တွင် စိတ်စွမ်းအင်ဖြင့် ထိန်းချုပ်နိုင်စွမ်း ရှိသည်။

Ultraman Zတွင် Zအကာအကွယ်နှင့် Zဓားပျံ စသည့် စွမ်းရည်များ ရှိသည်။

Empressတွင်Mero Mero no Mi၏ စွမ်းအား ရှိသည်။

Foxကမူ သေနတ်ပစ်နိုင်သည်။

…စသည်ဖြင့် ဖြစ်သည်။

သို့သော်လည်း ဇာတ်ကောင်အများစု၏ စွမ်းအားမှာ ကျင့်ကြံခြင်းလောကနှင့်အညီ လျော့နည်းသွားခဲ့ရာ ဥပမာအားဖြင့် မြူတူး ဘီလီရယ်နှင့် ရေကွမ်ဇာတို့မှာ မူရင်းဇာတ်လမ်းထဲကကဲ့သို့ အနိုင်မခံရှုံးမရှိ စွမ်းအားမျိုး မဟုတ်တော့ချေ။

သူ တစ်ရုပ်ချင်းစီ စမ်းသပ်မှုအရ အရုပ်များ၏ အဆင့်အတန်း ခွဲခြားမှုမှာ အောက်ပါအတိုင်း ဖြစ်သည်။

မန်ရှင်းအဆင့် ၄:Kasumigaoka Utaha။

အင်း... သူမကိုတော့ ငါ့ဘေးနားမှာ အစေခံအဖြစ် ထားလို့ရတယ်။

မန်ရှင်းအဆင့် ၆:SWAT ရဲသား။

မန်ရှင်းအဆင့် ၇:အာထရာမန်း ဇက်၊ ဆာစကေး၊ ဟီနာတာ၊ နာမီ၊ ရေကွမ်ဇာ၊ အက်ရှ်၊ မန္ဒာလာ၊ မြေခွေးမလေး။

မန်ရှင်းအဆင့် ၈: တီဂါ၊ နာရူတို၊ လူဖီ၊ မြူတူး။

မန်ရှင်းအဆင့် ၉:ဘီလီရယ်၊ ဆူနာဒေ၊ ဟန်ကော့ခ်။

League of Legends မှ ဇာတ်ကောင်လေးခုဖြစ်သော ဂျင့်စ်၊ တီမို၊ နာဆပ်စ်နှင့် ဆိုရာကာတို့၏ တိကျသော စွမ်းအားကိုမူ တိုင်းတာရန် ခက်ခဲလှသည်။

အကြောင်းမှာ သူတို့၏ အဓိက အသုံးဝင်ပုံမှာ အထူးစွမ်းရည်များပေါ်တွင်သာ တည်ရှိသောကြောင့် ဖြစ်သည်။ ဂျင့်စ်သည် အဝေးပစ်တိုက်ခိုက်မှု ရှိပြီး နာဆပ်စ်သည် ရန်သူများကို သတ်ဖြတ်ခြင်းဖြင့် စွမ်းအားကို ထပ်ဆင့်မြှင့်တင်နိုင်သည်။ ဆိုရာကာမှာမူ အစွမ်းထက်သော ကုသရေးစွမ်းရည်ရှိပြီး တီမိုကမူ ကိုယ်ပျောက်ခြင်းနှင့် မှိုဗုံးထောင်ခြင်းတွင် အထူးပြုသည်။

ဝေ့ဝူအခြေအနေကို သုံးသပ်ကြည့်လိုက်သည်။

ဤအရုပ်များ၏ စွမ်းအားမှာ အများအားဖြင့် မန်ရှင်းအဆင့်၏ အထက်ပိုင်း အဆင့်သုံးဆင့်တွင် ရှိနေကြပြီး မန်ရှင်းအဆင့် ၉ ရှိသူ သုံးဦးတောင် ပါဝင်နေသည်။

တစ်နည်းအားဖြင့် ဆိုရသော် ယခုအခါ ဝေ့မိသားစုတွင် ထူးခြားသော League of Legends ဇာတ်ကောင်လေးခုအပြင် အဆင့် ၉ ရှိသူ ၃ ဦး၊ အဆင့် ၈ ရှိသူ ၄ ဦး အဆင့် ၇ ရှိသူ ၈ ဦးနှင့် အဆင့် ၆ ရှိသူ ၁ ဦးတို့က မိသားစုကို စောင့်ရှောက်ရန် ရှိနေကြပြီ ဖြစ်သည်။

ဝေ့ဝူအနေဖြင့် ယခုတစ်ခေါက် ကမ္ဘာမြေသို့ သွားရောက်ရခြင်း၏ ရည်ရွယ်ချက်မှာ ဤမငြိမ်မသက်ဖြစ်နေသော ကာလအတွင်း မိသားစုကို ကာကွယ်ပေးနိုင်မည့် အရာများကို ယူဆောင်လာရန်ဖြစ်ရာ ယခုအခါ သူ၏ ဆန္ဒပြည့်ဝသွားသဖြင့် ရုတ်တရက် စိတ်သက်သာရာရသွားခဲ့သည်။

အကယ်၍ နောက်ထပ် ကျူးကျော်မှုတစ်ခုနှင့် ကြုံတွေ့ရလျှင်ပင် ယခင်တစ်ခေါက်ကကဲ့သို့ ဝမ်းနည်းပူဆွေးဖွယ် ဖြစ်ရပ်မျိုး ကြုံရတော့မည် မဟုတ်ချေ။

"ဒီရုပ်သေးရုပ်တွေကို မိသားစုထဲမှာပဲ အခြေစိုက်ထားလို့ရသလို အကြီးအကဲတစ်ယောက်ချင်းစီဆီကိုလည်း တစ်ရုပ်စီ ခွဲဝေပေးလို့ရတယ် ဒါကိုတော့ အဖေနဲ့ ဆက်ပြီး ဆွေးနွေးရဦးမယ်။"

ယခုအချိန်မှစ၍ ဝေ့မိသားစုသည် ဝိညာဉ်သန္ဓေအဆင့်အောက်ရှိ အစွမ်းအထက်ဆုံး အင်အားစုများထဲမှ တစ်ခုဟု သတ်မှတ်နိုင်ပြီ ဖြစ်သည်။

သို့သော်လည်း ဝိညာဉ်သန္ဓေအဆင့်အောက်ရှိသူ အားလုံးမှာ ပုရွက်ဆိတ်ကဲ့သို့သာ ဖြစ်ရာ သူအနေဖြင့် ဘဝင်မြင့်၍ မရသေးချေ။

ထို့အပြင် အဆုံးစွန်၌ ဤအရာများသည် ပြင်ပအထောက်အပံ့များသာ ဖြစ်သဖြင့် ထာဝရ အားကိုး၍မရနိုင်ပေ။

အစွမ်းထက်သော ရုပ်သေးရုပ်များကို အသုံးပြု၍ ဘေးအန္တရာယ်များမှ ကာကွယ်ခြင်းသည် နည်းလမ်းတစ်ခုသာ ဖြစ်ပြီး အဓိက ရည်မှန်းချက်မှာ ဝေ့မိသားစုကို မိမိတို့ကိုယ်ပိုင် စွမ်းအားများ မြှင့်တင်ရန်အတွက် အချိန်နှင့် အခွင့်အလမ်းများ ပေးနိုင်ရန်သာ ဖြစ်သည်။

မဟုတ်ပါက ရုပ်သေးရုပ်များက သင့်ကို တစ်သက်လုံး ကာကွယ်ပေးနိုင်လျှင်ပင် သင့်သက်တမ်း ကုန်ဆုံးမည့်ရက် ရောက်ရှိလာမည် မဟုတ်ပါလား။

ကျင့်ကြံခြင်းအဆင့် နိမ့်ပါးပြီး သက်တမ်းတိုတောင်းလှပါက ရုပ်သေးရုပ်များသည် သင် အသက်ရှင်စဉ် ကာကွယ်ပေးရုံတင်မကဘဲ သေဆုံးသွားသည့်အခါ သင်၏ ခေါင်းတလားကိုပါ ထမ်းရမည့် အခြေအနေ ရောက်သွားပေလိမ့်မည်။

မိမိကိုယ်တိုင် သန်မာမှသာလျှင် စိုးရိမ်ပူပန်မှုမရှိဘဲ အိပ်စက်နိုင်မည် ဖြစ်သည်။

ဝေ့ဝူသည်ဝေ့မိသားစုကို စစ်မှန်သော မသေမျိုးမိသားစုတစ်ခုအဖြစ် တည်ဆောက်လိုသည်။ အစွမ်းထက်ပြီး ထာဝရ တည်တံ့မည့် မိသားစုမျိုး ဖြစ်သည်။

နောက်ထပ်အချက်တစ်ခုမှာ ဤရုပ်သေးရုပ်များသည် ဝိညာဉ်ချီ အမြောက်အမြားကို စားသုံးကြသဖြင့် ကန်စွန်းဥများသာ မရှိပါက ဝေ့မိသားစုအနေဖြင့် သူတို့ကို ထိန်းသိမ်းထားနိုင်ရန် လုံးဝ တတ်နိုင်မည် မဟုတ်ချေ။

"ကန်စွန်းဥတွေက တကယ်ကို အရေးကြီးဆုံးပဲ မြန်မြန် ရင့်မှည့်ပါတော့။"

ဝေ့ဝူသည် သူ၏ မသေမျိုးဂူအတွင်း၌ တင်ပလ္လင်ခွေထိုင်ရင်း ရှေ့ဆက်ရမည့် လမ်းစဉ်ကို စိတ်ကူးပုံဖော်နေခဲ့သည်။

ဤအတောအတွင်း ဝေ့ကျင်းပေါ်က သူ့ထံသို့ စာသားတစ်ခု ပေးပို့လာပြီး ချန်ချွမ်တောင်သို့ လာခဲ့ရန် ပြောကြားလာခဲ့သည်။

ချန်ချွမ်တောင်သို့ ရောက်ရှိချိန်တွင် ဘိုးဘေးဝေ့ချွမ်ဟဲပါ ရှိနေပြီး အခြားအကြီးအကဲများမှာမူ အပြင်ဘက်တွင် ရှိနေကြသည်။

"ပိုင်ရှန်းချိုင့်ဝှမ်းမှာရှိတဲ့ဟွမ်ထိုင်ဂိုဏ်းဆီကနေ သတင်းတစ်ခု ရောက်လာတယ်။"

ပိုင်ရှန်းချိုင့်ဝှမ်းသည် ဝေ့မိသားစု၏ မြောက်ဘက်တွင် ရှိသော ဒေသတစ်ခုဖြစ်ပြီး ယခင်က ဝေ့ဝူနှင့် တွေ့ဆုံခဲ့ဖူးသော လန်ယွဲ့ဂိုဏ်းအပါအဝင် အင်အားစု အနည်းငယ် ရှိသည်။

ဟွမ်ထိုင်ဂိုဏ်းမှာ ပိုင်ရှန်းချိုင့်ဝှမ်းတွင် အစွမ်းအထက်ဆုံး ဖြစ်ပြီး မန်ရှင်းအဆင့် ၆ ကျွမ်းကျင်သူတစ်ဦးက စောင့်ရှောက်ထားသည်။

ဝေ့ကျင်းပေါ်က ဆက်လက်၍‌ပြောကြားသည်။

"ပြီးခဲ့တဲ့တစ်ခေါက် သွေးမြစ်ဂိုဏ်းနဲ့ ကျိုးမိသားစုတို့က လွတ်လပ်သောကျင့်ကြံသူတွေနဲ့ ပူးပေါင်းပြီး ပိုင်မိသားစုနယ်မြေထဲမှာ သောင်းကျန်းခဲ့တုန်းက အင်အားစု တော်တော်များများ ပျက်စီးခဲ့ရတယ်။ အချို့နယ်မြေတွေဆိုရင် အခုထိ တခြားသူတွေ သိမ်းပိုက်ထားတုန်းပဲ။ အဲဒီထဲမှာ ပိုင်ရှန်းချိုင့်ဝှမ်း အနီးက လုံထန်ဂိုဏ်း) လည်းပါဝင်တယ်။"

"လုံထန်ဂိုဏ်းက အဲဒီညကပဲ ပျက်စီးသွားပြီး သူ့နယ်မြေကို ကျားနီခန်းမက ဝင်ရောက်သိမ်းပိုက်လိုက်တယ်။ အဲဒီထဲက ကျင့်ကြံသူတွေက အရှေ့ဘက်က ထွက်ပြေးလာတဲ့ ဒုက္ခသည်တွေ များပြီး စွမ်းအား တော်တော်ထက်ကြတယ်။ သူတို့ထဲမှာ မန်ရှင်းအဆင့် ၆ ရှိသူ လေးယောက်တောင် ပါဝင်တယ်။ ဟွမ်ထိုင်ဂိုဏ်းက ပြောတာတော့ အခြေအနေတွေ ခေတ္တငြိမ်သက်သွားပြီးနောက်မှာ ကျားနီခန်းမက လူတွေက သူတို့ရဲ့ အစွယ်တွေကို ပြန်ထုတ်ပြလာကြပြီတဲ့။"

"သွေးမြစ်ဂိုဏ်းနဲ့ ကျိုးမိသားစုတောင်မှ ချင်းလုံဂိုဏ်းရဲ့ သတိပေးခြင်းကို ခံထားရတာပဲ။ ကျားနီခန်းမက လူတွေက ပြဿနာရှာရဲသေးတာလား။"

"သူတို့က အားနည်းလွန်းလို့ ချင်းလုံဂိုဏ်းက ဝင်မပါတာ ဖြစ်လိမ့်မယ်။ ပြီးတော့ ကြားရတာတော့ ကျားနီခန်းမက လုံထန်ဂိုဏ်းနေရာကို အစားထိုးပြီးတဲ့နောက် ပိုင်မိသားစုဆီကို အညံ့ခံတဲ့အနေနဲ့ အရင်းအမြစ် တော်တော်များများ ဆက်သခဲ့တယ်တဲ့။ အဲဒီအရင်းအမြစ်တွေ ဘယ်ကရလဲဆိုတာကတော့ ဘေးချိတ်ထားပေါ့။ ဒါပေမဲ့ ပိုင်မိသားစုက ဒီအတောအတွင်း တည်ငြိမ်မှုကိုပဲ ရှာဖွေနေပြီး သူတို့ရဲ့ ကိုယ်ပိုင်စွမ်းအားကလည်း အရင်လိုမဟုတ်တော့တဲ့အတွက် သွေးမြစ်ဂိုဏ်းနဲ့ ပူးပေါင်းပြီး နယ်မြေလုခဲ့တဲ့သူတွေကို အရေးမယူနိုင်သေးတာ ဖြစ်နိုင်တယ်။"

"ဟွမ်ထိုင်ဂိုဏ်းက ပြောတာတော့ ကျားနီခန်းမက ပိုင်ရှန်းချိုင့်ဝှမ်းထဲက အင်အားစုအသီးသီးကို လက်ဦးမှုယူ တိုက်ခိုက်လာဖို့ ရှိတယ်တဲ့။"

"အဲဒါကို ဟွမ်ထိုင်ဂိုဏ်းက ကျွန်တော်တို့ ဝေ့မိသားစုကို ဘာလို့ လာပြောတာလဲ။ ကျွန်တော်တို့က မိသားစုအသိုင်းအဝိုင်း သေးသေးလေးပဲလေ။"

"သူတို့က ရှောင်ချီနဲ့ လီယိုကို ငှားချင်လို့လေ။"

ဝေ့ဝူအံ့အားသင့်သွားရသည်။ လန်ယွဲ့ဂိုဏ်းသည် ရှောင်ချီနှင့် လီယို၏ တည်ရှိမှုကို သိရှိထားသဖြင့် ပိုင်ရှန်းချိုင့်ဝှမ်းအတွင်းရှိ ဟွမ်ထိုင်ဂိုဏ်းက သိရှိနေခြင်းမှာလည်း အံ့ဩစရာ မဟုတ်ပေ။

"ကျွန်တော်က ဘာလို့ သူတို့ကို ငှားရမှာလဲ။"