အခန်း ၁၅၇

အခန်း (၁၅၇) စီနီယာ့ရဲ့ အကူအညီအတွက် ကျေးဇူးတင်ပါတယ်

မိန်နျင်သည် ချက်ချင်းပင် အလင်းတန်းတစ်ခုသဖွယ် ပြောင်းလဲသွားပြီး ယန်ယွီမျှော်စင်သို့ ပြန်လာခဲ့သည်။ သူမ ယန်ယွီမျှော်စင်သို့ ရောက်သောအခါ မျှော်စင်တစ်ခုလုံး ဗလာကျင်းနေသည်။

ဪ… မဟုတ်သေး၊ ဗလာကျင်းနေသည် မဟုတ်သေးပေ။

မိန်နျင်သည် အဝိုင်းပုံစင်မြင့်ပေါ်တွင် ချမ်ချန်ကန်းတစ်ယောက် အိပ်နေသည်ကို တွေ့လိုက်ရသည်။ သူသည် စင်မြင့်ပေါ်တွင် လှဲလျောင်းကာ နှစ်နှစ်ခြိုက်ခြိုက် အိပ်ပျော်နေပြီး ကြည့်ရသည်မှာ သာမန်လူတစ်ယောက်ကဲ့သို့ ထူးခြားမှုမရှိပေ။

အကယ်၍ မိန်နျင်သာ သူ၏အကြောင်းကို အနည်းငယ်မျှ မသိထားခဲ့လျှင် သူ့ရှေ့က လူငယ်က ထိတ်လန့်စရာကောင်းလှသော အစွမ်းထက်သည့် အင်မော်တယ်သူတော်စင်တစ်ဦးဖြစ်နေလိမ့်မည်ဟု သူမ ထင်ထားခဲ့မည် မဟုတ်ပေ။

ယခင်က မိန်နျင်၏စိတ်ထဲတွင် သံသယများစွာ ရှိနေခဲ့သော်လည်း ယခု ဝတ်စုံဖြူနှင့်လူငယ်၏ ရှေ့မှောက်တွင် ပျက်စီးသွားသော ကူချင်အိုကြီးကို မြင်လိုက်ရသောအခါ သူမ၏ သံသယများအားလုံး လွင့်စင်သွားခဲ့ပြီဖြစ်သည်။

ထိုကူချင်ကို သူမ အသုံးပြုခဲ့ခြင်းဖြစ်ပြီး သူမ၏ အင်မော်တယ်စွမ်းအားများ စိမ့်ဝင်နေခဲ့ပေသည်။ မိန်နျင်ကိုယ်တိုင် အင်မော်တယ်အရှင်သခင်အဆင့် ကျင့်ကြံသူဖြစ်သည်။ သူမ၏ စွမ်းအားများ ကိန်းအောင်းနေသော ထိုကူချင်ကို အခြေခံအုတ်မြစ်တည်ဆောက်ခြင်းအဆင့်မဆိုထားနှင့် ရွှေအမြုတေအဆင့်ကျင့်ကြံသူပင်လျှင် တီးခတ်ပါက ဤကဲ့သို့ ကျိုးပဲ့သွားအောင် တီးခတ်နိုင်မည်မဟုတ်ပေ။ ထို့ကြောင့် သူ့ရှေ့တွင်ရှိသော ချမ်ချန်ကန်းသည် သာမန်လူတစ်ယောက်ကဲ့သို့ မြင်တွေ့ရသော်လည်း ၎င်းမှာ အပေါ်ယံအသွင်အပြင်သာဖြစ်ရမည်ဟု သူမ တွေးလိုက်မိသည်။

*ဒါတွေအားလုံးက တကယ်ကို ဖုံးကွယ်ထားတာပဲ ဖြစ်ရမယ်*

ဝတ်ရုံဖြူနှင့်လူငယ်မှာ နားမလည်နိုင်လောက်အောင် စွမ်းအားကြီးသည့် ပုဂ္ဂိုလ်ကြီးဖြစ်ပြီး အင်မော်တယ်သူတော်စင်ဖြစ်မည်မှာ သေချာလှပေသည်။

မိန်နျင်သည် ဝေခွဲမရဖြစ်နေသော်လည်း အရှေ့သို့ တိုးသွားလိုက်သည်။ ထိုကဲ့သို့သော ပုဂ္ဂိုလ်ကြီး၊ အထူးသဖြင့် သူမ၏ ကျင့်ကြံမှုအဆင့် တက်လှမ်းနိုင်အောင် ကူညီပေးခဲ့သူအား မိန်နျင်က အလွန်တရာရိုသေလေးစားနေမိသည်။

“စီနီယာရဲ့ အကူအညီအတွက် ကျေးဇူးတင်ပါတယ်ရှင်”

ယန်ယွီမျှော်စင်က ငြိမ်သက်နေပြီး ချမ်ချန်ကန်း၏ အိပ်မောကျနေသော အသက်ရှူသံကိုသာ ကြားနေရသည်။

“စီနီယာ… အိပ်ပျော်နေတာလား”

မိန်နျင်က တိတ်ဆိတ်သွားသည်။ သူမသည် ဤကဲ့သို့ ကြုံရလိမ့်မည်ဟု မမျှော်လင့်ထားပေ။ သို့သော်လည်း စီနီယာ့ကဲ့သို့ အင်မော်တယ်သူတော်စင်ကြီးများမှာ ထူးဆန်းသော စရိုက်ရှိတတ်ကြသည်မှာ သဘာဝပင်ဖြစ်ကြောင်း သူမ နားလည်နိုင်ပေသည်။ သူမသည် ချမ်ချန်ကန်းကို ထပ်မနှိုးတော့ဘဲ ဘေးတွင် ငြိမ်သက်စွာ စောင့်ဆိုင်းနေလိုက်သည်။

ချမ်ချန်ကန်းမှာမူ စက်ဝိုင်းပုံစင်မြင့်ပေါ်၌ ပုံမပျက်ဘဲ အိပ်ပျော်နေဆဲဖြစ်သည်။ ယခုအခါ ဟွာလုံမြို့၏ ဘေးအန္တရာယ်မှာ ပြီးဆုံးသွားခဲ့ပြီဖြစ်ရာ ယန်ယွီမျှော်စင်မှ ထွက်ပြေးတိမ်းရှောင်သွားကြသော မိန်းကလေးများ ပြန်လည်ရောက်ရှိလာကြသည်။ မိန်နျင်သည် စီနီယာ့ကို မနှောင့်ယှက်စေရန် မမြင်နိုင်သော စွမ်းအားတစ်ခုဖြင့် ထိုမိန်းကလေးများ မဝင်နိုင်အောင် တားဆီးလိုက်သည်။

ချမ်ချန်ကန်းမှာ ပင်ပန်းလွန်းသဖြင့် အိပ်ပျော်သွားသော်လည်း အိပ်မောကျနေခြင်း မဟုတ်ပေ။ သန်းခေါင်ယံအချိန်၌ သူက ဝေဝေဝါးဝါးဖြင့် နိုးလာခဲ့သည်။ ဤစက်ဝိုင်းပုံစင်မြင့်မှာ မာကျောလွန်းလှသဖြင့် သူ့တစ်ကိုယ်လုံး နာကျင်နေသည်။ သို့သော် သူသည် နိုးနိုးချင်း မိန်နျင်ကို မြင်လိုက်ရသဖြင့် အံ့သြသွားသည်။

*မိန်နျင်... ဘာလို့ ဒီမှာ ရှိနေတာလဲ။ သူမတို့ ထွက်သွားတာ မဟုတ်ဘူးလား။ ဘာလို့ ပြန်ရောက်လာရတာလဲ။ အန္တရာယ်တွေ ပြေသွားလို့လား၊ ဒါမှမဟုတ် သူမကို ကူချင်တီးပေးတာ သင်ခိုင်းဖို့ ပြန်လာတာလား။*

ချမ်ချန်ကန်းသည် ဘေးနားတွင် ပျက်စီးနေသော ကူချင်ကို မြင်ပြီး အားနာသွားမိသည်။ ဤကူချင်မှာ မိန်နျင်၏ပစ္စည်းဖြစ်သည်။ ယခုတော့ သူ၏လက်ချက်ဖြင့် ပျက်စီးသွားလေပြီ။ သူမက လျော်ကြေးတောင်းရန် ပြန်လာခြင်းများလား။

ညနက်နေပြီဖြစ်ပြီး မျှော်စင်အတွင်း ချမ်ချန်ကန်းနှင့် မိန်နျင်တို့ နှစ်ဦးတည်းသာ ရှိတော့သည်။ မိန်နျင်၏ ကိုယ်သင်းရနံ့ကိုပင် သူက အနံ့ရနေမိသည်။ ချမ်ချန်ကန်းက ခေါင်းကိုပွတ်ရင်း ဝေဝေဝါးဝါးဖြင့် ပြောလိုက်သည်။

“မိန်နျင်...မင်းရဲ့ကူချင်ကို ငါ တမင်တကာ ဖျက်ဆီးတာ မဟုတ်ပါဘူး။ မင်း ဘယ်လောက်လိုချင်လဲ ပြောပါ၊ ငါ လျော်ပေးပါ့မယ်”

မိန်နျင်က ကြောင်အသွားသည်။ ချမ်ချန်ကန်းက ထိုသို့ပြောလိမ့်မည်ဟု သူမ မထင်ထားပေ။ သူမက ခေါင်းကို အမြန်ခါယမ်းရင်း ရိုသေစွာ ပြောလိုက်သည်။

“စီနီယာ...၊ ဒါက ကူချင်တစ်လက်ပဲဟာကို။ ဒါ့အပြင် စီနီယာက ဟွာလုံမြို့က သန်းနဲ့ချီတဲ့ ဝိညာဉ်တွေကို ကယ်တင်ပေးခဲ့ပြီး ကျွန်မရဲ့ ကျင့်ကြံခြင်းကိုလည်း တိုးတက်အောင် ကူညီပေးခဲ့တာပါ။ ကျွန်မကသာ စီနီယာ့ကို ကျေးဇူးတင်ရမှာ၊ ဘယ်လိုလုပ် လျော်ကြေးတောင်းရဲမှာလဲ”

ချမ်ချန်ကန်းက အံ့အားသင့်သွားသည်။ သူ ကူချင်တီးနေသည်ကို မိန်နျင်သိလိမ့်မည်ဟု သူ မမျှော်လင့်ထားပေ။ သို့သော် သူမ၏ ကျင့်ကြံခြင်းအဆင့်အား တိုးတက်အောင် ကူညီပေးခဲ့သည်ဆိုသည်မှာ အဘယ်နည်း။

မကြာမီပင် ချမ်ချန်ကန်း စဉ်းစားမိသွားသည်။ သူသည် ကူချင်တီးနေစဉ် အစစ်အမှန်တာအို၏ လုပ်ဆောင်ချက်နှင့် အမှတ်ပြည့်အထူးလုပ်ဆောင်ချက် စွမ်းအားများကို အသုံးပြုခဲ့သည်။ ထိုစဉ်က မိန်နျင်နှင့် ရှဲ့ပေါ်တို့၏ တိုက်ပွဲကို သူ မြင်တွေ့ခဲ့ရသည်။

ထိုအချိန်က ကူချင်သံများသည် အစစ်အမှန်တာအို၏ လုပ်ဆောင်ချက်နှင့် ရောယှက်ကာ မိန်နျင်၏ ခန္ဓာကိုယ်အတွင်းသို့ စိမ့်ဝင်သွားခဲ့ခြင်း ဖြစ်နိုင်ပေသည်။ ထိုအချက်ကြောင့် သူမ၏ ကျင့်ကြံခြင်း တိုးတက်သွားခြင်း ဖြစ်နိုင်သည်။

*ငါက တော်တော်လေး လျှို့ဝှက်နေတာတောင်မှ ဒီလိုလှပတဲ့ မိန်းကလေးက ငါ့ကို စီနီယာလို့ ခေါ်နေပါလား။ တကယ်ပါပဲ...၊ ငါ ဘယ်လောက်ပဲ သာမန်လိုပဲ နေနေ၊ ငါ့ရဲ့ ထူးခြားတဲ့ အငွေ့အသက်ကို ဖုံးကွယ်လို့ မရပါလား*

ချမ်ချန်ကန်းက ပြုံးလိုက်မိသည်။ ထို့နောက် သူ၏အကြည့်တို့က မိန်နျင်ထံသို့ ကျရောက်သွားသည်။ သူသည် ကူချင်သံမှတစ်ဆင့် မိန်နျင်နှင့် ဦးလေးရှဲတို့၏ တိုက်ပွဲကို ကြည့်ရှုခဲ့သည်။

အမှန်စင်စစ် ယခုချမ်ချန်ကန်းသည် အင်မော်တယ်များစွာနှင့် ထိတွေ့ခဲ့ပြီး အင်မော်တယ်အရှင်သခင်များပင် သူ၏ အကာအကွယ်ကို လိုအပ်နေကြပြီဖြစ်သည်။