အခန်း ၁၆၄

အခန်း (၁၆၄) ချဲ့ထွင်လိုက်ခြင်း၊ ကီလိုမီတာ၇၅၀၀၀

ကျင့်ကြံသူများသည် သေချာပေါက် မိန်နျင်အပေါ် ကျေးဇူးတင်စိတ်များ ပြည့်နှက်နေကြလေ၏။

မိန်နျင်က မျက်မှောင်ကြုတ်လိုက်သည်။

ဤသည်မှာ စီနီယာ၏ ကူချင်တီးခတ်ခဲ့ခြင်း သက်ရောက်မှု ဖြစ်ရမည်ကို သူမ သိလိုက်သည်။

သူတို့၏ခန္ဓာကိုယ်အတွင်း၌ စီးဆင်းနေသော တာအိုစည်းချက် အနည်းငယ်ကိုပင် ခံစားသိရှိနိုင်ပေသည်။

ဤသည်က သူတို့၏ နောင်အနာဂတ် ကျင့်ကြံခြင်းအတွက် ကြီးမားသောအကူအညီ ဖြစ်လာပေလိမ့်မည်။

ခန္ဓာကိုယ်ထဲ၌ စီးဆင်းနေသော တာအိုစည်းချက်များကို စုပ်ယူနိုင်ပါက သူတို့သည် အနာဂတ်တွင် သေချာပေါက် အားကောင်းသော ကျင့်ကြံသူများ ဖြစ်လာကြပေမည်။

စီနီယာသည် အင်မော်တယ်သူတော်စင်ဟူသောအမည်နှင့် အမှန်ပင် ထိုက်တန်ပြီး အလွန်လေးစားဖွယ် ကောင်းလှချေသည်။

မိန်နျင်က တုံ့ဆိုင်းမှုမရှိဘဲ ပြောလိုက်၏။

“ကျွန်မကို ကျေးဇူးတင်စရာမလိုဘူး”

မိန်နျင်၏ စကားကြောင့် ကျင့်ကြံသူများ နားမလည်နိုင် ဖြစ်သွားကြသည်။

“စီနီယာက ဟွာလုံမြို့ကို ကယ်တင်ပြီး ကျွန်တော်တို့ကို အခွင့်အရေး ပေးခဲ့တာကိုး ဘာလို့ ကျေးဇူးမတင်ရမှာလဲ”

“ကျွန်တော်တို့က စီနီယာ့ကို အရမ်း ကျေးဇူးတင်ရမှာပါ”

“ဟုတ်ပါတယ်၊ စီနီယာ့ရဲ့ အကူအညီသာ မပါရင် အခုဆို ဟွာလုံမြို့က သေမင်းတမန်မြို့တော် ဖြစ်နေလောက်ပြီ”

မိန်နျင်က ပြန်လည်ဖြေကြားလိုက်သည်။

“ဟွာလုံမြို့ကို ကယ်တင်ပြီး အခွင့်အရေး ပေးခဲ့တာ ကျွန်မ မဟုတ်ပါဘူး”

ထိုစကားထွက်လာသည်နှင့် ကျင့်ကြံသူအားလုံး အံ့အားသင့်သွားကြချေ၏။

မယုံနိုင်စရာဖြစ်နေသည်။

ယခုပင် မိန်နျင်၏ ခန္ဓာကိုယ်မှ ဤမျှ အားကောင်းသော စွမ်းအားလှိုင်းများ ပေါက်ကွဲထွက်ပေါ်လာခဲ့သည် မဟုတ်ပါလော။

ဟွာလုံမြို့တွင် ဤသို့ လုပ်ဆောင်နိုင်စွမ်းရှိသော အခြားကျင့်ကြံသူများရှိနေမည်ဟု သူတို့ မယုံကြည်ကြပေ။

“ဖေးရှန့်တောင်က စီနီယာ လာရောက်ကူညီပေးခဲ့တာပါ”

မိန်နျင်က သူတို့ကို ပြောပြလိုက်လေ၏။

ထိုစကားထွက်လာသည်နှင့် ကျင့်ကြံသူအားလုံး လုံးဝ တုန်လှုပ်သွားကြတော့သည်။

ထိုစီနီယာ ဖြစ်နေခဲ့သည်လော။

“ဒါကြောင့် ရှင်တို့ ကျေးဇူးတင်ရမှာ ကျွန်မ မဟုတ်ဘူး၊ အဲဒီ့စီနီယာကိုပါ”

သက်ရှည်ကျောင်းတော်ထဲတွင်။

ချမ်ချန်ကန်းသည် သူ၏ရှေ့ရှိ ကျူးရှိူ့ဒယ်စောက်ကို စူးစမ်းချင်စိတ်ဖြင့် ကြည့်နေလေ၏။

ကျူးရှိူ့ဒယ်စောက်သည် အင်မော်တယ်နယ်မြေရှိ အင်မော်တယ်စွမ်းအင် အများအပြားကို စုပ်ယူထားရာ အင်မော်တယ်အလင်းတန်းများက ကိုယ်ထည်တစ်ခုလုံးတွင် စီးဆင်းနေချေသည်။

ပို၍ ထူးခြားလာပုံရသည်။

ကျူးရှိူ့ဒယ်စောက်၏ စွမ်းအားကို ခံစားကြည့်ရာ ကျူးရှိူ့ပွဲတော်တွင် ရှိခဲ့စဉ်ကထက် ပိုမို အားကောင်းလာသည်ဟု ထင်ရပေသည်။

သို့သော် ဤအရာကို ချမ်ချန်ကန်းက စိတ်မဝင်စားပေ။

ချမ်ချန်ကန်းသည် ပြိုင်ဘက်ကင်းနယ်မြေထဲတွင် ရှိနေသော်လည်း ကျူးရှိူ့ဒယ်စောက်၏ အသိအမှတ်ပြုခြင်းကို မခံရသေးပေ။

ဤသည်မှာ ချမ်ချန်ကန်းအတွက် အံ့သြစရာတစ်ခုဖြစ်ခဲ့၏။

သေချာသည်မှာ ဤပြိုင်ဘက်ကင်းနယ်မြေထဲတွင် သူ၏ စွမ်းအားဖြင့် ကျူးရှိူ့ဒယ်စောက်ကို ဖျက်ဆီးပစ်ချင်ပါက

အလွန်လွယ်ကူသော ကိစ္စပင်ဖြစ်ချေသည်။

သို့သော်လည်း ချမ်ချန်ကန်းသည် အားယားနေ၍ ကျူးရှိူ့ဒယ်စောက်ကို ဖျက်ဆီးပစ်မည်မဟုတ်ပေ။

မည်သို့ပင်ဆိုစေ ဤကျူးရှိူ့ဒယ်စောက်၏ အသိအမှတ်ပြုမှုသည် ကောင်းကင်တာအိုအစောင့်အရှောက်နေရာနှင့် ပတ်သက်နေသည် မဟုတ်ပါလော။

ပို၍ အရေးကြီးသည်မှာ စနစ်ကို ဗားရှင်း ၅.၀ သို့ အဆင့်မြှင့်တင်ရမည့် ချမ်ချန်ကန်း၏ တာဝန်နှင့်လည်း ပတ်သက်နေခြင်းပင် ဖြစ်သည်။

ယနေ့တွင် အထက်ဘုံမှ အင်မော်တယ်များထံမှ ရရှိခဲ့သော သိုလှောင်ကွင်းလေးကွင်းထဲရှိ အင်မော်တယ်ကျောက်တုံးများက

ချမ်ချန်ကန်းအား နယ်မြေတန်ဖိုး ၇.၃၂ သန်း ရရှိစေခဲ့ပေသည်။

ယင်းတို့အနက် ကျွမ်းမင်သည် အထူးသဖြင့် စန်းလော့အင်မော်တယ်နယ်မြေမှ စန်းလော့ဂိုဏ်း၏ ဂိုဏ်းချုပ်သား ဖြစ်နေခြင်းကြောင့်

မြင့်မားသော အဆင့်အတန်းရှိ၏။

သူ၏ သိုလှောင်ကွင်းထဲတွင် ထိပ်တန်းအဆင့် အင်မော်တယ်ကျောက်တုံး ၄၀ ကျော် ပါရှိပေသည်။

အင်မော်တယ်ဆေးဝါးများနှင့် အင်မော်တယ်လက်နက်များလည်း အများအပြားပါရှိသေးသည်။

စကားတစ်ခွန်းတည်းဖြင့် ဖော်ပြရလျှင် ဤလူသည် ချမ်းသာပြီး အားကောင်းလှပေသည်။

ချမ်ချန်ကန်း၏ လက်ရှိ နယ်မြေတန်ဖိုးများနှင့် ပေါင်းလိုက်လျှင်

ယခုအခါ ချမ်ချန်ကန်း၏ နယ်မြေတန်ဖိုးသည် ၇.၅ သန်း ဝန်းကျင်ခန့် ရှိနေချေပြီ။

နယ်မြေတန်ဖိုး ၇.၅ သန်း။

အကယ်၍ အားလုံးကို နယ်မြေချဲ့ထွင်ရန်အတွက် အသုံးပြုလိုက်ပါက ပြိုင်ဘက်ကင်းနယ်မြေကို ကီလိုမီတာ ၇၅,၀၀၀ အထိ ချဲ့ထွင်နိုင်မည်ဖြစ်သည်။

ဤအကွာအဝေးသည် တောင်ပေါင်းတစ်သိန်းတောင်တန်းထဲတွင်ပင် ကြောက်မက်ဖွယ်ကောင်းလောက်အောင် ကျယ်ဝန်းလှပေသည်။

ထို့ကြောင့် ချမ်ချန်ကန်းသည် ပြိုင်ဘက်ကင်းနယ်မြေ အကွာအဝေးကို ချဲ့ထွင်ရန်အတွက် နယ်မြေတန်ဖိုး ၅.၅ သန်းကို အသုံးပြုလိုက်၏။

နယ်မြေတန်ဖိုးနှစ်သန်း ကျန်ရှိနေသေးသည်။

နယ်မြေတန်ဖိုးတစ်သန်းကို အရန်အဖြစ် ထားရှိလိုက်သည်။

နောက်ထပ် တစ်သန်းကိုလည်း ချန်ထားလိုက်၏။

ဤသည်မှာ စနစ်ကို ဗားရှင်း ၅.၀ သို့ အဆင့်မြှင့်တင်ရန် လိုအပ်ချက်များအနက် တစ်ခုဖြစ်သောကြောင့်ဖြစ်သည်

ကီလိုမီတာ ၇၅,၀၀၀ ဤသည်မှာ အလွန် ကြီးမားကျယ်ပြန့်သော အကွာအဝေးတစ်ခု ဖြစ်နေချေပြီ။

သို့သော် တောင်ပေါင်းတစ်သိန်းတောင်တန်း၊ တစ္ဆေပြည်နယ်နှင့် ကျူးရှိူ့တိုက်ကြီးတစ်ခုလုံးနှင့် ယှဉ်လိုက်ပါက ဘာမှမဟုတ်သေးပေ။

ချမ်ချန်ကန်းသည် လုံးဝ ဂုဏ်ယူဝင့်ကြွားနေခြင်းမရှိချေ။

သူ့ကို ပျော်ရွှင်စေသော တစ်ခုတည်းသော အရာမှာ သူ၏ နောက်ထပ် လှုပ်ရှားနိုင်မည့် နယ်ပယ် ကျယ်ဝန်းလာခြင်းပင်ဖြစ်သည်။

ထို့ပြင် နယ်မြေ ချဲ့ထွင်လိုက်သည်နှင့်အမျှ အင်မော်တယ်နယ်မြေသည်လည်း ကျယ်ဝန်းလာပေသည်။

ချဲ့ထွင်လိုက်သော ကီလိုမီတာ ၇၅,၀၀၀ ရှိသည့် ပြိုင်ဘက်ကင်းနယ်မြေသည်လည်း အင်မော်တယ်နယ်မြေအဖြစ်သို့ လုံးဝ ပြောင်းလဲသွားခဲ့ချေပြီ။

ဤနည်းအားဖြင့် အင်မော်တယ်နယ်မြေထဲတွင် နေထိုင်နိုင်သော သက်ရှိများမှာ ပိုမို များပြားလာမည်ဖြစ်သည်။

ပြိုင်ဘက်ကင်းနယ်မြေထဲရှိ သက်ရှိများ၏ ကျင့်ကြံခြင်းအဆင့် ချိုးဖျက်နိုင်မှုတိုင်းက

ချမ်ချန်ကန်းအတွက် စဉ်ဆက်မပြတ်သော နယ်မြေတန်ဖိုးများကို ယူဆောင်လာပေးနိုင်ပေသည်။

ကျူးရှိူ့ဒယ်စောက်ကို သိမ်းဆည်းလိုက်၏။

ချမ်ချန်ကန်းသည် သူရရှိထားသော လုပ်ဆောင်ချက်အသစ်ဖြစ်သည့် သန့်စင်သောစည်းချက်ပေါင်းစပ်ခြင်းကို စဉ်းစားလိုက်လေသည်။

ဤလုပ်ဆောင်ချက်အသစ်နှင့် ပတ်သက်၍ ချမ်ချန်ကန်းသည် အချို့အရာများကို သိရှိထားပြီးဖြစ်သည်။

သန့်စင်သောစည်းချက်ပေါင်းစပ်ခြင်းလုပ်ဆောင်ချက်ကို အသုံးပြုခြင်းသည်

အစစ်အမှန်တာအို၏လုပ်ဆောင်ချက်မှ တာအိုစွမ်းအားများကို ခိုင်မာသော နည်းလမ်းများအဖြစ် ပြောင်းလဲနိုင်ပြီး ပျော့ပြောင်းစွာ အသုံးပြုနိုင်စေခြင်းပင် ဖြစ်သည်။

ယခင်က ဟွာလုံမြို့တွင် ဖြစ်ခဲ့သကဲ့သို့ပင်။

ကူချင်တီးခတ်ခြင်းတွင် အမြင့်မြတ်ဆုံးသော လမ်းစဉ်များ ပါဝင်နေပြီး မိန်နျင်အား အင်မော်တယ်အရှင်သခင်နယ်ပယ်ကို ချိုးဖျက်နိုင်ရန် ကူညီပေးနိုင်ခဲ့သည်။

အလားတူပင် ၎င်းကို စိတ်ဝိညာဉ်ကို ပစ်မှတ်ထားသော သတ်ဖြတ်ခြင်း နည်းလမ်းအဖြစ်လည်း ပြောင်းလဲနိုင်ပေသည်။