အခန်း ၂၁၁

အခန်း (၂၁၁)သေခြင်းမှ ပြန်လည်ရှင်သန်ခြင်း... ဒါက ဘယ်လိုလုပ် ဖြစ်နိုင်မှာလဲ...

ရွှယ်ဝူအင်မော်တယ်နယ်မြေ။

ဝူမင်နှင့်တကွ အင်မော်တယ်အရှင်သခင်များ၊ အင်မော်တယ်အင်ပါယာများ အားလုံး ရောက်ရှိနေချိန်၌ပင် နောက်ဆုံးတော့ ဟွမ်ဖူမိသားစုမှ အင်မော်တယ်များ ရောက်ရှိလာကြ၏။

သူတို့က ဝူမင်၊ မိန်နျင်နှင့် လင်းပေါင်အာတို့ကို ကာကွယ်ပေးထားပြီး ဤနေရာသို့ ရောက်ရှိနေသော အင်မော်တယ်များကို သတိဝီရိယအပြည့်ဖြင့် အသင့်အနေအထား ရင်ဆိုင်နေကြသည်။

ထိုထိပ်တန်းအဆင့် တာအိုစည်းချက်ပစ္စည်းများ၏ အရေးပါမှုကြောင့် အင်အားကြီး အင်မော်တယ်မျိုးနွယ်စုများမှ လာရောက်ကြသော ဤအင်မော်တယ်များက ဝူမင်တို့ကို အလွတ်ပေးရန် ရည်ရွယ်ထားပုံ မပေါ်ချေ။

ဘာပဲဖြစ်ဖြစ် ဤထိပ်တန်းအဆင့် တာအိုစည်းချက်ပစ္စည်းများက မဟာတာအို၏ နိမိတ်များကိုပင် ဆွဲဆောင်နိုင်လောက်အောင် အလွန်အဖိုးတန်လှသည်။

အကယ်၍ ဟွမ်ဖူမိသားစု၏ လက်ထဲသို့သာ ရောက်သွားလျှင် ဟွမ်ဖူမိသားစု၏ အင်အားက သေချာပေါက် ပိုမို သန်မာလာမည်ဖြစ်၏။

ထိုအချိန်ရောက်လျှင် ရွှယ်ဝူအင်မော်တယ်နယ်မြေတစ်ခုလုံးတွင် ဟွမ်ဖူမိသားစုကို ယှဉ်နိုင်မည့်သူ တစ်ယောက်မျှရှိတော့မည်မဟုတ်ဟု သူတို့ စိုးရိမ်နေကြသည်။

ဤသည်က သူတို့ မမြင်တွေ့ချင်ဆုံးသော ရလဒ်ပင် ဖြစ်၏။

“တာအိုစည်းချက်ပစ္စည်းတွေကို ပေးလိုက်စမ်း... မဟုတ်ရင် မင်းတို့ ဒီနေရာကနေ အသက်ရှင်လျက် ပြန်ထွက်သွားနိုင်မှာ မဟုတ်ဘူး...”

“ဟွမ်ဖူမိသားစု... အရမ်းအနိုင်မကျင့်နဲ့နော်...”

ယခုတစ်ကြိမ်တွင် ဟွမ်ဖူမိသားစုက အင်မော်တယ်အင်ပါယာငါးပါးနှင့် အင်မော်တယ်အရှင်သခင် ဆယ်ပါးကို စေလွှတ်ခဲ့သည်။

သူတို့၏ ခန္ဓာကိုယ်ထဲတွင် အင်မော်တယ်စွမ်းအားများက အရှိန်အဟုန်ဖြင့် လောင်ကျွမ်းနေသော အင်မော်တယ် မီးဖိုကြီးတစ်ခုကဲ့သို့ လှိမ့်တက်နေပြီး ကောင်းကင်နှင့် မြေကြီး၏ အရောင်ကိုပင် ပြောင်းလဲသွားစေ၏။

သူတို့ထဲတွင် ဟွမ်ဖူယိသောက်ဟု အမည်ရသော အင်မော်တယ်အင်ပါယာ တစ်ပါးမှာ ဟွမ်ဖူမိသားစု၏ အဆင့်မြင့်အကြီးအကဲဖြစ်ပြီး ယခုတစ်ကြိမ် မိန်နျင်၊ လင်းပေါင်အာနှင့် ဝူမင်တို့ကို အစောင့်အရှောက်ပေးရန် အဓိက တာဝန်ယူရသူလည်းဖြစ်သည်။

သူက ဤနေရာရှိ အင်မော်တယ်များကို အေးစက်စွာ ဝေ့ကြည့်လိုက်၏။

“မင်းတို့က ဒီတာအိုစည်းချက်ပစ္စည်းတွေကို မဖြစ်မနေ လုယူမယ်ဆိုရင် ဟွမ်ဖူမိသားစုရဲ့ ဒေါသကို ခံနိုင်ရည် ရှိမရှိ အရင် တွေးကြည့်ကြ...”

“ငါတို့ဟွမ်ဖူမိသားစုက အနိုင်ကျင့်တာလား... ဒါမှမဟုတ် မင်းတို့က အနိုင်ကျင့်နေတာလား...”

“ဟွန့်... ဟွမ်ဖူယိသောက်... ငါတို့က တာအိုစည်းချက်ပစ္စည်းတွေကို လုယူဖို့ ဒီနေရာအထိ ရဲရဲဝံ့ဝံ့လာခဲ့မှတော့ မင်းတို့ ဟွမ်ဖူမိသားစုကို ကြောက်နေသေးတယ်လို့ ထင်နေတာလား...”

“ဟုတ်တယ်... မင်းတို့ ဟွမ်ဖူမိသားစုက ဘယ်လောက်ပဲ သန်မာနေပါစေ ဒီရွှယ်ဝူအင်မော်တယ်နယ်မြေက ငါတို့ကျန်းမိသားစုက မကြောက်ဘူးကွ..”

“ဒီတာအိုစည်းချက်ပစ္စည်းတွေ အားလုံးကို အေးအေးဆေးဆေး ပေးလိုက်တာ ကောင်းမယ်... မဟုတ်ရင် မင်းတို့ အားလုံး သေရလိမ့်မယ်...”

“…”

ဤနေရာရှိ အင်မော်တယ်များက ဆူညံစွာ အော်ဟစ်နေကြပြီး သတ်ဖြတ်လိုသော အငွေ့အသက်များ ပြည့်နှက်နေ၏။

ဟွမ်ဖူမိသားစုမှ အင်မော်တယ်များက ထိုစကားများကိုကြားသောအခါ သူတို့၏ မျက်နှာများ အလွန်ပျက်ယွင်းသွားကြသည်။

ရိုးရိုးသားသား ပြောရလျှင် ဟွမ်ဖူမိသားစုက ကျူးရှိူ့တိုက်ကြီးမှ ပြန်လာသော မိန်နျင်ကို အလွန်အလေးထားပြီး ဖြစ်သော်လည်း မိန်နျင် ယူဆောင်လာခဲ့သော တာအိုစည်းချက်ပစ္စည်းများက မဟာတာအို၏ နိမိတ်များကိုပင် ဆွဲဆောင်နိုင်လိမ့်မည်ဟု သူတို့ အိပ်မက်ပင် မမက်ခဲ့ဖူးချေ။

သူမ ယူဆောင်လာခဲ့သော ထိပ်တန်းအဆင့် တာအိုစည်းချက်ပစ္စည်းများမှာ တစ်ခုတည်းသာ မကပေ။

ဤသည်က ဟွမ်ဖူမိသားစု လုံးဝ မျှော်လင့်မထားခဲ့သော ရလဒ်ပင်ဖြစ်၏။

အကယ်၍ ဤသို့ဖြစ်မည်ကို ကြိုသိခဲ့လျှင် ဟွမ်ဖူမိသားစုက အင်မော်တယ်အင်ပါယာငါးပါးနှင့် အင်မော်တယ်အရှင်သခင် ဆယ်ပါးကိုသာ စေလွှတ်ခဲ့မည် မဟုတ်ချေ။

ဟွမ်ဖူယိသောက်က အခြေအနေ၏ ကြီးလေးမှုကို သတိပြုမိသွားသော်လည်း အကူအညီ ထပ်မံစေလွှတ်ပေးရန် ဟွမ်ဖူမိသားစုထံသို့ အချက်ပြပြီးဖြစ်၏။

သို့သော် ယခုအခါ ဤအင်မော်တယ် အင်အားစုများမှ အစွမ်းထက်သော အင်မော်တယ်များက ဟွမ်ဖူမိသားစုကို ထိုအခွင့်အရေး လုံးဝပေးမည်မဟုတ်ပေ။

သူတို့မှာ သတ်ဖြတ်လိုစိတ်များ ပြည့်နှက်နေသည်။

လက်ရှိ အခြေအနေတွင် တိုက်ပွဲတစ်ခုသာ ရှိတော့ကြောင်း အလွန်ရှင်းလင်းနေ၏။

ဤသည်က ဟွမ်ဖူယိသောက် မြင်တွေ့ချင်သော ရလဒ်မဟုတ်ပေ။

သို့သော် ထိုအချိန်တွင် ဝူမင်က သူ၏ ကိုယ်ပေါ်ရှိ တာအိုစည်းချက်ပစ္စည်းများ အားလုံးကို ထုတ်ယူလိုက်ပြီး မိန်နျင်ကိုလည်း သူမ၏ ကိုယ်ပေါ်ရှိ တာအိုစည်းချက်ပစ္စည်းများကို ထုတ်ယူရန် ပြောလိုက်သည်ကို တွေ့လိုက်ရ၏။

ဝူမင်တွင် ကိုယ်ပိုင်အစီအစဉ်ရှိနေကြောင်း သိလိုက်ရသဖြင့် မိန်နျင်က ခေါင်းညိတ်လိုက်သည်။

တာအိုစည်းချက်ပစ္စည်း တစ်ခုပြီးတစ်ခုကနေ တာအိုစည်းချက်၏ တောက်ပသော အလင်းတန်းများ စီးဆင်းလာ၏။

ထွက်ပေါ်လာသည်နှင့် တစ်ပြိုင်နက် မဟာတာအို၏ နိမိတ်များကို ချက်ချင်း ဆွဲဆောင်နိုင်ခဲ့သည်။

ဤနေရာရှိ အင်မော်တယ်များ၏ မျက်လုံးများမှာ တောက်ပလာပြီး ထိုအရာအားလုံးကို စောင့်ကြည့်ရင်း သူတို့၏ အမူအရာများမှာ လှုပ်ရှားသွားကာ အံ့အားသင့်သွားကြ၏။

“ဒါက တကယ့်ကို တာအိုစည်းချက်ပစ္စည်းတွေပဲ...”

“ဘယ်လောက်တောင် သန့်စင်ပြီး ခမ်းနားတဲ့ တာအိုစည်းချက်တွေလဲ... သေချာပေါက် ထိပ်တန်းအဆင့်တွေပဲဖြစ်ရမယ်...”

“ဟုတ်တယ်... ဟုတ်တယ်... ဒီတာအိုစည်းချက်ပစ္စည်းတွေက အင်မော်တယ်နယ်မြေရဲ့ အရှင်သခင် တစ်ပါးကိုတောင် မွေးထုတ်ပေးနိုင်လောက်တယ်...”

“ဒီတာအိုစည်းချက်ပစ္စည်းတွေကို သေချာပေါက် ရအောင် ယူရမယ်...”

“…”

ဤအင်မော်တယ်များ၏ စကားများကို နားထောင်ပြီးနောက် ဝူမင်က အေးစက်စွာ ပြုံးလိုက်၏။

“ဤတာအိုစည်းချက်ပစ္စည်းတွေကို ငါ့သခင်က ငါတို့ကို လေလံတင်ဖို့ ပေးလိုက်တာ။ မင်းတို့က လုယူချင်တယ်ဆိုရင် လာယူလှည့်...”

“ဒါပေမဲ့ အဝေးကြီး မရောက်ခင်မှာပဲ ငါ့သခင်ရဲ့ ကလဲ့စားချေမှုကို စောင့်နေလိုက်တော့...”

ဝူမင်၏ စကားကြောင့် အင်မော်တယ်များ အားလုံး မျက်မှောင်ကြုတ်သွားကြ၏။

ဤတာအိုစည်းချက်ပစ္စည်းများမှာ ဟွမ်ဖူမိသားစုမှ မဟုတ်ဘဲ ဟွမ်ဖူမိသားစုထံသို့ လေလံတင်ရန် အပ်နှံထားခြင်းဖြစ်မည်ဟု သူတို့ ထင်မထားခဲ့ပုံရသည်။

သို့သော် ဝူမင် ပြောလိုက်သော သခင်ဆိုသည့် စကားလုံးကိုလည်း သူတို့ သတိထားမိလိုက်ကြ၏။

ဝူမင်ထံမှ ထွက်ပေါ်လာသော အင်မော်တယ်စွမ်းအားများက အလွန် ကြောက်မက်ဖွယ် ကောင်းလှသည်။

နယ်မြေအရှင်သခင်တစ်ယောက်အနေဖြင့် ပြန်လည်ဝင်စားလာသူ ဖြစ်သော်လည်း နယ်မြေအရှင်သခင်၏ စွမ်းအားများက သူ၏ ခန္ဓာကိုယ်ပေါ်တွင်ရှိနေဆဲဖြစ်၏။

သူ့ကိုသာ အချိန်အနည်းငယ် ပေးလိုက်လျှင် နယ်မြေအရှင်သခင် တစ်ဖန်ပြန်ဖြစ်လာရန်မှာ မခက်ခဲလှချေ။

ဤအင်မော်တယ်များ လုံးဝ တွေးမထားခဲ့သည့် အရာတစ်ခုမျှသာဖြစ်၏။

မြင့်မြတ်သော နယ်မြေအရှင်သခင် ဖြစ်သည့် ဤဝူမင်က အမှန်တကယ်ပင် ကျွန်တစ်ယောက်မျှသာ ဖြစ်နေသည်တဲ့လား။

*သူ့မှာ သခင်ရှိနေတယ် ဟုတ်လား…*

နယ်မြေအရှင်သခင်၏ သခင်ဆိုသည်မှာ မည်သို့သော အဆင့်အတန်းမျိုး ရှိနေမည်နည်း။

ဤအခိုက်အတန့်တွင် ဝူမင်၏ စကားများက ဤအင်မော်တယ်များ၏ ရင်ထဲတွင် အနည်းငယ် လေးလံသွားစေ၏။

ဝူမင်က သူ့စကားများ အလုပ်ဖြစ်သွားကြောင်း တွေ့လိုက်ရသောအခါ စိတ်သက်သာရာ ရသွားသော်လည်း အပြင်ပန်းတွင်မူ ပို၍ပို၍ အေးစက်ကာ မောက်မာလာသည်။

“အင်မော်တယ်တစ်သောင်းနယ်မြေမှာ အင်မော်တယ်ဘယ်နှယောက်ကများ ထိပ်တန်းအဆင့်၊ အဆင့်မြင့် တာအိုစည်းချက်ပစ္စည်း ဆယ်ခုလောက်ကို တစ်ကြိမ်တည်း ထုတ်ပေးနိုင်လဲဆိုတာ မင်းတို့ သိသင့်တယ်။ နယ်မြေအရှင်သခင်တောင် ဒါကို မလုပ်နိုင်ဘူး... မင်းတို့က ဒီတာအိုစည်းချက်ပစ္စည်းတွေကို လုယူချင်တယ်ဆိုရင် ဦးနှောက်သုံးပြီး သေချာစဉ်းစားကြ။ ငါသခင်ရဲ့ ဒေါသကို မင်းတို့ ခံနိုင်ရည်ရှိရဲ့လားလို့...”

“ငါ့သခင်အတွက် နယ်မြေအရှင်သခင် တစ်ယောက်ကို သတ်တာက ခွေးတစ်ကောင်ကို သတ်ရသလို လွယ်ကူလွန်းတယ်။ သူက လူသေကိုတောင် ပြန်ရှင်အောင် လုပ်ပေးနိုင်တဲ့ စွမ်းရည်ရှိပြီး သူ့ရဲ့ နည်းလမ်းတွေက ခန့်မှန်းရခက်လောက်အောင် နက်နဲတယ်။ ငါ့သခင်သာ တကယ် ဒေါသထွက်လာရင် မင်းတို့လို လူတွေကို မပြောနဲ့ ရွှယ်ဝူအင်မော်တယ်နယ်မြေ တစ်ခုလုံးတောင်မှ ငါသခင်ရဲ့ လက်တစ်ချက် ဝှေ့ယမ်းရုံနဲ့ ပျက်စီးသွားလိမ့်မယ်...”

“ဟားဟား... ဘုန်းကြီးလေး... မင်းရဲ့ အဓိပ္ပာယ်မရှိတဲ့ စကားတွေကို ငါတို့ယုံမယ် ထင်နေတာလား...”

“နယ်မြေအရှင်သခင်ကို ခွေးတစ်ကောင် သတ်သလို သတ်တယ်ဟလား။ သေတဲ့သူကို ပြန်ရှင်အောင် လုပ်ပေးနိုင်တဲ့စွမ်းအား ရှိတယ်ဟလား။ အင်မော်တယ်တစ်သောင်းနယ်မြေထဲမှာ ဒီလိုနည်းလမ်းမျိုးရှိတဲ့လူကို တစ်ခါမှ မကြားဖူးပါဘူး...”

“အဓိပ္ပာယ်မရှိတာ...”

“ဟုတ်တယ်... လွန်ခဲ့တဲ့ နှစ်သိန်းလောက်က နတ်ဆိုးဗုဒ္ဓအရှင်တောင် ဤလိုစွမ်းရည်မျိုး မရှိခဲ့ဘူး...”

“ဝူမင်... မင်းက အခု နယ်မြေအရှင်သခင် မဟုတ်တော့ဘူး။ ပြီးတော့ ဒီနေရာက ရှမီအင်မော်တယ်နယ်မြေလည်း မဟုတ်ဘူး

ဒီတာအိုစည်းချက်ပစ္စည်းတွေ အားလုံးကို အမြန်ပေးလိုက်စမ်း... မဟုတ်ရင် မင်း အရင်ဆုံး သေရလိမ့်မယ်...”

ဝူမင်က ရယ်မောလိုက်ပြီး မောက်မာနေဆဲ ဖြစ်၏။

“မင်းတို့က မယုံဘူးဆိုမှတော့ ဒီနေ့ ဒီဘုန်းကြီးက ငါ့သခင်ရဲ့ စွမ်းရည်တွေကို မင်းတို့ကို ပြရတာပေါ့...”

ဝူမင်က ဟွမ်ဖူမိသားစု အင်မော်တယ်များ၏ အကာအကွယ်အောက်မှ ထွက်လာခဲ့သည်။

မိန်နျင်နှင့် လင်းပေါင်အာတို့က ဝူမင်ကို ကြည့်လိုက်ပြီး သူ ဘာလုပ်ချင်သည်ကို သိလိုက်ကြ၏။

ဤအင်မော်တယ်များကို မနာလိုဖြစ်အောင် လုပ်ရန် တစ်ခုတည်းသော နည်းလမ်း ဖြစ်ကောင်းဖြစ်နိုင်သည်။

“အင်မော်တယ်အရှင်သခင်ချန်မိန်... သူ ဘာလုပ်ချင်နေတာလဲ...”

ဟွမ်ဖူယိသောက်က မိန်နျင်ကို မေးလိုက်၏။

မိန်နျင်က ပြောလိုက်သည်။

“ဒီနယ်မြေအရှင်က ဒီအင်မော်တယ်တွေ တာအိုစည်းချက်ပစ္စည်းတွေကို လုယူချင်စိတ် ကုန်သွားအောင် စီနီယာရဲ့ နည်းလမ်းတွေကို ပြချင်နေတာပါ...”

“စီနီယာရဲ့ နည်းလမ်းတွေ ဟုတ်လား...”

ဘေးနားရှိ လင်းပေါင်အာက ဝူမင်၏ ကျောပြင်ကို လေးစားအားကျသော မျက်ဝန်းများဖြင့် ကြည့်နေ၏။

သူမ၏ ဆရာက ဝူမင်ကို အကြိမ်များစွာ သတ်ခဲ့ဖူးပြီး သူမ၏ရှေ့တွင်လည်း တစ်ကြိမ် သတ်ခဲ့ဖူးကြောင်း သူမ ကြားဖူးထားသည်။

လင်းပေါင်အာမှာ ယခုအချိန်အထိ မသေဖူးသေးသဖြင့် သေရသည့် ခံစားချက်က ဘယ်လိုမျိုးလဲဆိုတာကို သူမ အနည်းငယ် သိချင်နေမိ၏။

“ဆရာ့ရဲ့ နည်းလမ်းတွေက ကောင်းကင်လောက် မြင့်မားပြီး သူ့ရဲ့ ခွန်အားကလည်း ခန့်မှန်းရခက်လောက်အောင် နက်နဲလွန်းတယ်။ ဒါပေမဲ့ ဒီအင်မော်တယ်တွေက အရင်က မမြင်ဖူးကြဘူးလေ။ မကြာခင် ဆရာရဲ့ နည်းလမ်းတွေကို ဝူမင်ဆီကနေ သူတို့ မြင်တွေ့ရတော့မှာပါ...”

“ဒီဘုန်းကြီး ဤနေရာမှာ ရပ်နေတယ်။ မင်းတို့ထဲက ဘယ်သူက ရှေ့ထွက်ပြီး ဒီဘုန်းကြီးကို သတ်မလဲ...”

အင်မော်တယ်များက တစ်ယောက်မျက်နှာ တစ်ယောက်ကြည့်လိုက်ကြပြီး ဤဝူမင် ဘာလုပ်ချင်နေသည်ကို နားမလည်နိုင် ဖြစ်နေကြ၏။

*ကိုယ့်ကိုယ်ကိုယ် သတ်သေချင်နေတာများလား…*

မည်သူမျှ ရှေ့မထွက်လာသည်ကို မြင်သောအခါ ဝူမင်က လှောင်ပြုံး ပြုံးလိုက်သည်။

“ဘာလဲ... မင်းတို့ထဲက တစ်ယောက်မှ ဒီဘုန်းကြီးကို မသတ်ရဲဘူးလား... သတ္တိကြောင်တဲ့ ကောင်တွေ...”

“ဟွန့်... မင်းက သေချင်နေတယ်ဆိုမှတော့ မင်းဆန္ဒကို ဖြည့်ဆည်းပေးရမှာပေါ့...”

အင်မော်တယ်အင်ပါယာတစ်ပါးက အေးစက်စွာ နှာမှုတ်လိုက်ပြီး ခုန်ပျံလာကာ ဝူမင်၏ ရှေ့တွင်ပေါ်လာ၏။

ဝူမင်က ပြုံးလိုက်ပြီး ခုခံခြင်း မပြုချေ။

“အရမ်းကောင်းတယ်... လာပြီး ဒီဘုန်းကြီးကို သတ်လိုက်စမ်း။ ပြီးရင် ဒီဘုန်းကြီးကို ပြန်ရှင်လာအောင် လုပ်ပေးနိုင်တဲ့ ငါ့သခင်ရဲ့ စွမ်းရည်ကို မင်းတို့ကို ပြမယ်...”

“သေခြင်းကနေ ပြန်ရှင်လာတယ်ဟလား... အဲ့ဒါက လူဝင်စားခြင်းလမ်းစဉ်ခြောက်သွယ်ကိုတောင် ကျော်လွန်နေပြီ... ငါ မယုံဘူး...”

ထိုအင်မော်တယ်အင်ပါယာက လုံးဝ အားနာမနေဘဲ သူ၏ စွမ်းအားများ ပေါက်ကွဲထွက်လာကာ လက်ဝါးဖြင့် ရိုက်ချလိုက်၏။

ဝူမင်က ခုခံခြင်း မပြုဘဲ အင်မော်တယ်အင်ပါယာ၏ လက်ဝါးချက်ဖြင့် သွေးမြူမှုန်အဖြစ် တိုက်ရိုက် ရိုက်ချေခံလိုက်ရတော့သည်။

အင်မော်တယ်အင်ပါယာက ဝူမင်၏ သက်စောင့်စွမ်းအားကို မခံစားရတော့သဖြင့် အေးစက်စွာ နှာမှုတ်လိုက်၏။

“လျှို့ဝှက်ဆန်းကြယ်တဲ့ပုံ လုပ်နေပေမဲ့ ဒီလောက်ပါပဲ...”

သို့သော် စကားဆုံးသည်နှင့်တစ်ပြိုင်နက် အင်မော်တယ်အင်ပါယာ၏ လက်ဝါးချက်ဖြင့် အသတ်ခံလိုက်ရသော ဝူမင်မှာ ဤအခိုက်အတန့်တွင် နောက်တစ်ကြိမ် ပြန်လည်ရှင်သန်လာတော့သည်။

ဤဝူမင်ကို ကြည့်လိုက်ပါ။

အသက်ရှင်လျက်နှင့် ကျန်းကျန်းမာမာ ဘေးကင်းလုံခြုံစွာရှိနေသည် မဟုတ်ပါလော။

ဝူမင်က လက်အုပ်ချီလိုက်ပြီး မောက်မာစွာ ပြောလိုက်၏။

“အမိတ္တဘ.. ဒကာ ဒီဘုန်းကြီး လှည့်စားနေတယ်လို့ ထင်နေတုန်းပဲလား...”

အင်မော်တယ်အင်ပါယာမှာမူ လုံးဝ မှင်တက်သွားတော့သည်။

“ဒါ... ဒါ မဖြစ်နိုင်ဘူး... မင့်ရဲ့ သက်စောင့်စွမ်းအားတွေ လုံးဝ ပြတ်တောက်သွားတာ ရှင်းနေတာပဲ... ဘယ်လိုလုပ် အသက်ပြန်ရှင်လာနိုင်မှာလဲ...”

“အရာအားလုံးက ဖြစ်နိုင်ပါတယ်...”

ဝူမင်၏ မျက်နှာတွင် ဂုဏ်ယူဝင့်ကြွားမှုများ ပြည့်နှက်နေ၏။

ဤနေရာရှိ အင်မော်တယ်များအတွက်မူ မိန်နျင်နှင့် လင်းပေါင်အာတို့မှလွဲ၍ အင်မော်တယ်များ အားလုံးမှာ မှင်တက်သွားကြပြီး တိတ်ဆိတ်သွားကာ သေခြင်းမှ ပြန်လည်ရှင်သန်လာသော ဝူမင်ကို ကြောင်တောင်တောင်ဖြင့် စိုက်ကြည့်နေကြတော့သည်။

သူတို့၏ ရှေ့တွင် ဖြစ်ပျက်သွားသည့် အရာများက သူတို့၏ သိမှတ်နားလည်ထားမှုများကို လုံးဝ ပြောင်းပြန်လှန်ပစ်လိုက်ပြီဟု ခံစားနေရ၏။

သူတို့ကို ရယ်စရာကောင်းလွန်းသည်ဟု ခံစားရစေသည်။

*သေခြင်းမှ ပြန်လည်ရှင်သန်ခြင်း... ဒါက ဘယ်လိုလုပ် ဖြစ်နိုင်မှာလဲ…*