အခန်း ၂၈၁

ပြိုင်ဘက်ကင်း အင်ပါယာ။ အပိုင်း ၂၈၁

ဘာသာပြန် - Ko Yoohtoo

True Immortal Team

(ဝယ်ယူဖတ်ရှုအားပေးနေတဲ့ စာဖတ်သူတွေကို ကျေးဇူးတင်သောအားဖြင့် စာစဥ် ၂၉ နဲ့ ၃၀ တို့ကို free ချပေးလိုက်ပါတယ်ခင်ဗျာ။ ဆက်လက်ပြီး အားပေးဖို့ တောင်းဆိုလိုပါတယ်ဗျ။ Free ခဏခဏချပေးပြီး မြန်မြန်လည်း ထွက်ပေးပါမယ်ဗျို့။)

လူအပေါင်း၏ မနာလိုဝန်တိုမှု အပြည့်ဖြင့် စိုက်ကြည့်နေကြသည့် အကြည့်များအောက်၌ ထိပ်တန်းအဆင့် စိတ်ဝိညာဉ်ကျောက်တုံး တစ်ဘီလီယံခွဲမှာ လင်းချန်၏ သိုလှောင်အိတ်အတွင်းသို့ ရောက်ရှိသွား၏။

​အထူးသဖြင့် ကျန်းခယ်ရန်မှာမူ မျက်လုံးများမှ မီးတောက်များ ထွက်မတတ် လင်းချန်ကို စိုက်ကြည့်နေမိသည်။

​သူသည် ဒေါသလွန်ကဲလှသဖြင့် သွားများကို ကျိခနဲ မြည်အောင် ကြိတ်ထားပြီး လက်ရှစ်ဖက်စလုံးကို တင်းတင်းဆုပ်ထားသော်လည်း မည်သို့မျှ မတတ်နိုင်ချေ။

​အဘယ်ကြောင့်ဆိုသော် သူသည် မြောက်ပိုင်းဌာနခွဲ၏ မျိုးနွယ်စုခေါင်းဆောင်တစ်ဦး ဖြစ်နေသောကြောင့်ပင်။

​ထိုကဲ့သို့သော ဝါရင့်ပုဂ္ဂိုလ်တစ်ဦးက လင်းချန်ကဲ့သို့သည့် လူငယ်လေးတစ်ဦးအပေါ် လက်ဖျားနှင့်မျှ ထိပါးဝံ့မည် မဟုတ်ချေ။

​အကယ်၍ သူသည် ရတနာလောင်းကစားပွဲ၌ အရှက်မရှိဘဲ အတင်းအဓမ္မ ပြုမူလျှင်ပင် ကျန်းထျန်ရှင်းသည် တွန့်ဆုတ်မနေဘဲ သတ်ဖြတ်ပစ်မည်မှာ အမှန်ပင်ဖြစ်၏။

​ဤနေရာသည် မျိုးနွယ်စု၏ နယ်မြေဖြစ်သဖြင့် သူ ထင်တိုင်းကြဲရန် နေရာမဟုတ်ပေ။

​ထို့အပြင် ဤမျိုးနွယ်စု စုံညီပွဲတော်အတွင်း၌ လက်ရှစ်ဖက်ပင်လယ်မျိုးနွယ်နှင့် လူသားမျိုးနွယ်တို့သည် ချစ်ကြည်ရေးအတွက် တစ်ဦးနှင့်တစ်ဦး လုံးဝ တိုက်ခိုက်ခြင်း မပြုရဟူသည့် ကတိကဝတ်လည်း ရှိနေသေးသည်။

​ရတနာလောင်းကစားပွဲ၏ စည်းကမ်းချက်များသည်လည်း ရန်စနှောက်ယှက်သူများအပေါ် မည်သည့်မျက်နှာမျှ ထောက်ထားခြင်းမရှိဘဲ အလွန်ပင် တင်းကျပ်လှ၏။

​ကျန်းခယ်ရန်ပင် ဘာမျှမလုပ်ရဲသဖြင့် အခြားသူများမှာလည်း လင်းချန် ထွက်ခွာသွားသည်ကို မနာလိုစွာဖြင့် ငေးကြည့်နေရုံမှတစ်ပါး အခြားမရှိတော့ချေ။

​ထို့နောက်၌မူ လူအုပ်ကြီးသည်လည်း လူစုကွဲသွားကြပြီး ရတနာသိုက်ခန်းမအနှံ့၌ ကံစမ်းရန်အတွက် ရတနာများကို ဆက်လက် ရှာဖွေကြသည်။

​ဘေးမှ စောင့်ကြည့်နေသူ အများအပြားမှာလည်း လင်းချန်၏ အောင်မြင်မှုကို အားကျကာ မိမိတို့ စိတ်တိုင်းကျရွေးချယ်ထားသည့် ပစ္စည်းများကို ပြတ်ပြတ်သားသားပင် ဝယ်ယူလိုက်ကြ၏။

​ထို့နောက် ဖုန်သန့်စင်ဆေးရည်များဖြင့် အချိန်ကာလ၏ အငွေ့အသက်များကို အလျင်အမြန် ဆေးကြောသန့်စင်ကာ စိတ်လှုပ်ရှားစွာဖြင့် စစ်ဆေးကြသည်။

​"ဟားဟားဟား... ငါတော့ အကြီးအကျယ် ပေါက်ပြီဟေ့"

​"တောက်... ဘယ်လိုဖြစ်ရတာလဲ။ ငါတော့ မွဲပြီ"

​အချို့မှာ ကံကောင်းသဖြင့် ရတနာအစစ်အမှန်များကို ရွေးချယ်မိကာ စိတ်ဝိညာဉ်ကျောက်တုံးများစွာ ရရှိကြသော်လည်း အချို့မှာမူ အပေါ်ယံအသွင်အပြင်ကို ကြည့်၍ မှားယွင်းဝယ်ယူမိသဖြင့် မိမိတို့၏ တစ်သက်တာ စုဆောင်းမှုများကို အသုံးမဝင်သည့် အမှိုက်များအတွက် အဆုံးရှုံးခံလိုက်ရရှာ၏။

​ထိုသူတို့၏ ကံကြမ္မာနှင့် ညည်းတွားသံများကို လင်းချန်မှာမူ ကြားနိုင်ခြင်း မရှိတော့ချေ။

​သူသည် ရတနာသိုက်ခန်းမအတွင်း လှည့်လည်ရင်း အခြားသော ပစ္စည်းများကိုသာ ဆက်လက် ကြည့်ရှုနေသည်။

​လင်းချန်၏ ဘေး၌ လျှောက်လှမ်းနေသည့် ယီစင်းက သဘောတကျ ရယ်မောလိုက်၏။

"ဟားဟား... အဲဒီ ကျိုးပဲ့နေတဲ့ ဓားထဲမှာ ဒီလောက် နက်နဲတဲ့ လျှို့ဝှက်ချက် ရှိမယ်လို့ တကယ်ကို မထင်ထားဘူး။ ကျန်းခယ်ရန်ကတော့ ကိုယ့်တွင်းကိုယ်တူးလိုက်တာပဲ။ မိန်း ထင်တာတော့ သူ ချန်လေးကို နောက်ထပ် ရန်စရဲတော့မှာ မဟုတ်ဘူး။"

​သူမသည် အလွန်ပင် ကျေနပ်နေပုံရသည်။

​လင်းချန်က ယီစင်း၏ လက်ကို ဆုပ်ကိုင်ထားရင်း သူ၏ မျက်လုံးများ၌ ကြောက်ရွံ့မှု အလျဉ်းမရှိဘဲ ပြောလိုက်သည်။

"အနည်းဆုံးတော့ ရတနာသိုက်ခန်းမထဲမှာ ရန်ပြုမှာ မဟုတ်ဘူး။ ဒါပေမဲ့ ရှေ့ဆက် ပြဿနာရှာဦးမလားဆိုတာ ဘယ်သူသိမှာလဲ။"

​ကျန်းဇီတဲက အလျင်အမြန် ရှင်းပြလိုက်၏။

"သူ အဲဒီလို လုပ်မှာ မဟုတ်ဘူး။ လက်ရှစ်ဖက်ပင်လယ်မျိုးနွယ်စုဟာ ပြိုင်ဆိုင်မှုကို ခွင့်ပြုပေမဲ့ အချင်းချင်း သတ်ဖြတ်တာကို လုံးဝ ခွင့်မပြုဘူး။ အရှေ့ပိုင်းဌာနခွဲရဲ့ ခေါင်းဆောင်က မင်းရဲ့ မဟာမိတ်ဆိုတော့ ကျိန်းသေ ကာကွယ်ပေးလိမ့်မယ်။ မြောက်ပိုင်းဌာနခွဲက ဘာမှလုပ်လို့မရဘူး။ အနည်းဆုံးတော့ ပင်လယ်နယ်မြေထဲမှာ ဒီအတိုင်းပဲ။ ဒါပေမဲ့ ညီအစ်ကိုလင်းနဲ့ ဝူချွန်ရှန်းတို့ရဲ့ ကိစ္စက လူသားမျိုးနွယ်ချင်း ဖြစ်တာမလို့ ငါတို့ ဝင်မစွက်ဖက်တာ အကောင်းဆုံးပဲ။ ကုန်းမြေပေါ် ရောက်ရင်တော့ မင်းဘာသာမင်း ဖြေရှင်းရလိမ့်မယ်။"

​ဘေးနားရှိ လီယွမ်ဖုန်းကလည်း ခနဲ့တဲ့တဲ့ ရယ်မောလိုက်သည်။

"ဟားဟား... ယွမ်ဟိုင်ဂိုဏ်းရဲ့ ဂိုဏ်းခွဲခေါင်းဆောင်က လူပြက်တစ်ယောက်ပါပဲ။ ကုန်းမြေပေါ်မှာဆိုရင် သူ ပိုတောင် မြန်မြန် သေလိမ့်ဦးမယ်။"

​သူတို့နှင့်အတူ လျှောက်လာသည့် ကျန်းချီက စိတ်လှုပ်ရှားစွာ ပြောလိုက်၏။

"ဒါနဲ့ ငါတို့ရဲ့ ချစ်လှစွာသော မြောက်ပိုင်းဌာနခွဲ ခေါင်းဆောင်ကျေးဇူးကြောင့် အမြတ်တွေ အများကြီး ရလိုက်တယ်။ ထိပ်တန်းအဆင့် စိတ်ဝိညာဉ်ကျောက်တုံး တစ်ဘီလီယံခွဲတောင်လေ။"

​ထိုအခါ ကျန်းဝမ်ရွှမ်းက ရယ်မောလျက် ကျန်းချီကို အသာအယာ တွန်းလိုက်သည်။

"ဟီးဟီး... ဒါက သူများ ရှာထားတဲ့ အမြတ်လေ။ ရှင့်ဟာ မဟုတ်ဘဲနဲ့ ဘာလို့ ငါတို့ လို့ ပြောနေရတာလဲ။"

​ကျန်းဝမ်ရွှမ်း၏ စကားကို လင်းချန်က ပြုံးလျက် ပြန်လည် တုံ့ပြန်လိုက်၏။

"ငါတို့အားလုံးက သူငယ်ချင်းတွေပဲလေ။ ရတနာလောင်းကစားပွဲ ပြီးရင် ငါရရှိထားတဲ့ ကျောက်တုံးတွေကို အားလုံးနဲ့ ဝေမျှပေးမယ်။ ပျော်ရွှင်မှုကို အတူတူ ခံစားရတာကမှ တကယ့် ပျော်ရွှင်မှု အစစ်အမှန်ပေါ့။"

​လင်းချန်သည် ဤစကားကို ရိုးသားစွာ ပြောကြားခြင်း ဖြစ်သည်။ နောင်တစ်ချိန်၌ စိတ်ဝိညာဉ်ကျောက်တုံးများ ရှာဖွေခြင်းမှာ လင်းချန်အတွက် အလွန်ပင် လွယ်ကူသည့် အလုပ် ဖြစ်လာပေလိမ့်မည်။

​ဟွာရှာအင်ပါယာမှ ထွက်ရှိသည့် ပစ္စည်းများကိုသာ ထုတ်ရောင်းလိုက်လျှင် လူတိုင်း အလုအယက် ဝယ်ယူကြမည်ကို လင်းချန် ယုံကြည်နေ၏။

​ရတနာလောင်းကစားပွဲသည် တစ်လတိတိ ကြာမြင့်မည် ဖြစ်သဖြင့် လင်းချန်နှင့် အပေါင်းအဖော်များသည် ထိုတစ်လလုံးကို ရတနာသိုက်ခန်းမအတွင်း လှည့်လည်ကြည့်ရှုရင်း ကုန်ဆုံးစေကြသည်။

​အခြားသူများမှာမူ ပျော်ရွှင်စရာတစ်ခုအဖြစ် လာရောက်ကြည့်ရှုကြသော်လည်း တကယ်တမ်း ဝယ်ယူမည် မဝယ်ယူမည်မှာမူ လင်းချန်၏ ဆုံးဖြတ်ချက်အပေါ်၌သာ မူတည်နေ၏။

​ယခုအခါ လူတိုင်း၏ မျက်စိထဲ၌ လင်းချန်၏ ထိုးထွင်းသိမြင်မှုမှာ အလွန်ပင် ကြောက်မက်ဖွယ် ကောင်းနေလေပြီ။ ဟင်းလင်းပြင်ကျောက်တုံးကိုပင် ကျိုးပဲ့နေသည့် ဓားအတွင်း၌ ရှာဖွေတွေ့ရှိခဲ့သည် မဟုတ်ပါလော။

​သို့သော် လင်းချန်သည် ဟွာရှာအင်ပါယာ၏ နောက်ခံအင်အားကို အသုံးပြုနေခြင်း ဖြစ်သည်ကိုတော့ သူတို့မသိကြချေ။

​ကောင်းကင်လက်မှုပညာဌာနမှ ကျူးကော့မင်၏ ဦးဆောင်မှုအောက်၌ မှားယွင်းသည့် ဆုံးဖြတ်ချက်ဟူသည် မရှိသလောက်ပင် ဖြစ်သည်။

​အရာရာတိုင်းမှာ အလုံးစုံ မှန်ကန်နေမည်ဟု ဆိုလိုသည်တော့ မဟုတ်ပေ။ ရတနာလောင်းကစားပွဲရှိ ရတနာများမှာ အကာအကွယ် အစီအရင်များဖြင့် အုပ်မိုးထားသဖြင့် စိတ်ဝိညာဉ်စွမ်းအားဖြင့် စစ်ဆေးရန် ခက်ခဲလှ၏။

​ထို့ကြောင့် အမှားအယွင်းများ ရှိနိုင်သော်လည်း ကျူးကော့မင်၏ အဆင့်နှင့် အမြင်အရဆိုလျှင် ဤပစ္စည်းများမှာ ကလေးကစားစရာများကဲ့သို့ပင် ဖြစ်သဖြင့် အမှားအယွင်း ဖြစ်နိုင်ခြေမှာ အလွန်ပင် နည်းပါးလှသည်။

​ပထမနေ့ ပြီးဆုံးသွားသည့်အခါ လင်းချန်သည် ကျန်းဇီတဲကို ခေါ်ဆောင်၍ ကျန်းထျန်ရှင်းနှင့် သွားရောက်တွေ့ဆုံကာ အရောင်းအဝယ်တစ်ခု ပြုလုပ်၏။

​နောက်ရက်များ၌ လင်းချန် ဝယ်ယူခဲ့သည့် ပစ္စည်းများကို အလယ်ခန်းမ၌ မထားရှိတော့ဘဲ ညအချိန်ရောက်လျှင် ပစ္စည်းစစ်ဆေးသူများအား ပြသကာ လက်ရှစ်ဖက်ပင်လယ်မျိုးနွယ်စုထံသို့ ပြန်လည် ရောင်းချခဲ့သည်။

​လင်းချန်၏ စူးရှသော မျက်လုံးများအကြောင်းကို ကြားရသည့်အခါ ကျန်းထျန်ရှင်းသည် အလွန်ပင် ဝမ်းမြောက်စွာ ကြိုဆို၏။

​လက်ရှစ်ဖက်ပင်လယ်မျိုးနွယ်စုမှာ ယခုအခါ အင်အားအကြီးဆုံး ဖြစ်သဖြင့် ဤရတနာများကို ဝယ်ယူရန်မှာ သူတို့အတွက် ခက်ခဲသည့် အလုပ်မဟုတ်ချေ။

​ထို့နောက် လီယွမ်ဖုန်းသည် ဤအကြောင်းကို ကျိုးယီအန်အား ပြောပြရာ ကျိုးယီအန်သည်လည်း ကိုယ်တိုင်ကိုယ်ကျ လာရောက်တွေ့ဆုံကာ နှောင်ကြိုးမဲ့ဂိုဏ်းအတွက် အချို့သော ပစ္စည်းများကို ရောင်းချပေးရန် တောင်းဆိုသဖြင့် လင်းချန်ကလည်း သဘောတူလိုက်သည်။

​တစ်ချိန်တည်းမှာပင် လင်းချန်သည် ကောင်းမွန်သည့် ပစ္စည်းအချို့ကို အရှေ့ပိုင်းဌာနခွဲနှင့် ဖလှယ်ရန်အတွက်လည်း ချန်ထား၏။

​အဘယ်ကြောင့်ဆိုသော် သူသည် ကျန်းနျန်ရှင်းအား အရှေ့ပိုင်းဌာနခွဲကို အင်အားတောင့်တင်းစေမည်ဟု ကတိပေးထားသောကြောင့်ပင်။ ကတိပေးပြီးလျှင် တည်အောင်လုပ်တတ်ခြင်းမှာ လင်းချန်၏ စရိုက်ပင် ဖြစ်သည်။

​ဤကဲ့သို့ သီးသန့် အရောင်းအဝယ် ပြုလုပ်ခြင်းမှာလည်း လင်းချန်အတွက် လူအများ၏ အာရုံစိုက်မှုကို လွှဲဖယ်ရန် နည်းလမ်းတစ်ခု ဖြစ်၏။

​သူသည် နေ့ခင်းဘက်များ၌ တန်ဖိုးမရှိသည့် ပစ္စည်းအချို့ကို တမင်တကာ ဝယ်ယူပြကာ ကောလာဟလတစ်ခုကိုလည်း ပျံ့နှံ့စေခဲ့သည်။

​ထိုကျိုးပဲ့နေသည့် ဓားအတွင်း၌ ဟင်းလင်းပြင်ကျောက်တုံး ပါရှိနေသည်ကို သိခဲ့ခြင်းမှာ သူဖတ်ဖူးခဲ့သော လက်နက်သွန်းလုပ်ခြင်း ဆိုင်ရာ ကျမ်းစာများကြောင့်သာ ဖြစ်ပြီး လက်နက်သွန်းလုပ်ရာ၌ ကျွမ်းကျင်သူ မဟုတ်သဖြင့် စိတ်ကူးယဉ်ကြည့်ရာမှ တိုက်ဆိုင်စွာ မှန်သွားခြင်းဖြစ်သည်ဟု သတင်းလွှင့်ခဲ့ခြင်း ဖြစ်၏။

​ဤလုပ်ရပ်များကြောင့် လူအများမှာ လင်းချန်၏ ရတနာရွေးချယ်မှုမှာ ကံကောင်းခြင်းသက်သက်သာ ဖြစ်သည်ဟု ယုံကြည်သွားကြသည်။

​လင်းချန်သည် အခြားသူများက သူ့နောက်သို့ တကောက်ကောက်လိုက်ကာ သူဝယ်သမျှကို လိုက်လံ လုယက်ဝယ်ယူခြင်း မပြုနိုင်စေရန်အတွက် ဤသို့ ကြိုတင်စီစဉ်ခဲ့ခြင်း ဖြစ်၏။

​ရတနာလောင်းကစားပွဲမှာ ပုံမှန်အတိုင်း ဆက်လက် ကျင်းပနေသော်လည်း အမှန်တကယ် တန်ဖိုးရှိသည့် ပစ္စည်းများကို လင်းချန်က ယူဆောင်သွားပြီ ဖြစ်ကြောင်းကိုမူ မည်သူမျှ မသိနိုင်ကြချေ။

​အချို့ကို စိတ်ဝိညာဉ်ကျောက်တုံးများ ရရှိရန်အတွက် ပြန်လည် ရောင်းချခဲ့ပြီး အချို့သော စူးစမ်းလေ့လာရန် တန်ဖိုးရှိသည့် ကုန်ကြမ်းများကိုမူ ဟွာရှာအင်ပါယာရှိ ကျူးကော့မင်ထံသို့ ပေးပို့လိုက်သည်။

​ရတနာလောင်းကစားပွဲ ပြီးဆုံးချိန်၌ လင်းချန် သန်းထောင်ချီသည့် ထိပ်တန်းအဆင့် စိတ်ဝိညာဉ်ကျောက်တုံးများကို ရရှိခဲ့ပြီ ဖြစ်၏။

​အခြားသူများအတွက် ဤပမာဏမှာ များပြားလှသည့် ပမာဏ ဖြစ်သော်လည်း ဟွာရှာအင်ပါယာအတွက်မူ သမုဒ္ဒရာထဲမှ ရေတစ်စက်မျှသာ ဖြစ်၏။ သို့သော်လည်း ဤသည်မှာ အစကောင်းတစ်ခုပင် ဖြစ်သည်။

​ရတနာလောင်းကစားပွဲ ပြီးဆုံးသွားသည်နှင့်အမျှ အဖွဲ့အစည်းအသီးသီးတို့မှာလည်း ထွက်ခွာသွားကြပြီဖြစ်၏။

​ထိုသူတို့၏ ခရီးမှာ ဤ၌ လမ်းဆုံးသွားပြီ ဖြစ်သော်လည်း လင်းချန်အတွက်မူ ယခုမှသာ စတင်ခြင်း ဖြစ်သည်။ အဘယ်ကြောင့်ဆိုသော် လူသားမျိုးနွယ်စု၏ ရှေးဟောင်းအမွေအနှစ်နေရာများမှာ မကြာမီ ဖွင့်လှစ်တော့မည် ဖြစ်သောကြောင့်ပင်။

​လင်းချန်နှင့် သူ၏ အပေါင်းအဖော်များသည် တောင်ပိုင်းပင်လယ်နယ်မြေရှိ အခြားသော အင်အားကြီး ပင်လယ်မျိုးနွယ်စုဝင် ပါရမီရှင်များ၊ လူသားမျိုးနွယ်စုမှ ထူးချွန်သည့် လူငယ်များနှင့် ရင်ဆိုင်ကြုံတွေ့ရတော့လေမည်။

ပြိုင်ဘက်ကင်း အင်ပါယာ။ အပိုင်း ၂၈၁ ပြီး။

ဘာသာပြန် - Ko Yoohtoo

True Immortal Team