အခန်း ၇၉

အခန်း (၇၉) မြို့ပျက်ကြီး၏ တိုက်ပွဲ

ကားများဖြင့် တည်ဆောက်ထားသော ဧရာမဝင်္ကပါကြီး။ ကားတိုင်း၏ အတွင်း၌ အလေးချိန်စီးသော ပစ္စည်းများကို အပြည့်အသိပ် ထည့်ထားကာ ဘီးများကိုလည်း မြေပြင်တွင် လုံးဝ မြဲမြံစွာ ချည်နှောင်ထားသည်။ ဤသည်မှာ ဇွန်ဘီများ၏ အစွမ်းကုန် ဝင်တိုက်မှုကို ခံနိုင်ရည်ရှိစေရန် ပြင်ဆင်ထားခြင်း ဖြစ်သည်။

ထိုဝင်္ကပါကြီး၏ အတွင်းဘက်တွင် ကားများဖြင့် ဝိုင်းရံထားသော သီးသန့်ကွက်လပ် အများအပြား ရှိနေသည်။ ကားများ၏ အရှေ့နှင့်အနောက်ကို ချိတ်ဆက်ကာ တည်ဆောက်ထားသော ကာကွယ်ရေးစစ်ကြောင်း။ နေရာအနှံ့အပြားတွင်မူ လူတစ်ယောက်သာ ဝင်ထွက်နိုင်သော ကွာဟချက်များကို ချန်လှပ်ထားခဲ့သည်။ ချူဟန် ဖွဲ့စည်းပေးခဲ့သော စစ်ကြောင်းများက ထိုကွက်လပ်များအတွင်း နေရာယူထားကြသည်။ ဆယ်ယောက်မှ ဆယ့်ငါးယောက်အထိ ပါဝင်သော အဖွဲ့များက လက်နက်များကို တင်းကျပ်စွာ ကိုင်ဆောင်ထားရင်း ငြိမ်သက်စွာ ပုန်းအောင်းနေကြသည်။

ကွင်းပြင်တစ်ခုလုံး နေရာယူထားသော ကားဝင်္ကပါကြီးသည် မြေပြင်မှနေ၍ ရုတ်တရက် ပေါ်ထွက်လာသည့်အလား ခမ်းနားကြီးကျယ်ကာ အံ့မခန်းဖွယ်ရာ ခန့်ညားလှသည်။

ဝင်္ကပါ၏ ရှေ့တွင်ရှိသော ဝင်ပေါက်နေရာမှာမူ ကျယ်ပြန့်သော ပန်းခြံမြေကွက်လပ်ကြီး ဖြစ်သည်။ ယခု ထိုနေရာရှိ နေရာဆယ်ခုကျော်မှ အဖြူရောင် မီးခိုးတန်းလေးများ ထွက်ပေါ်နေသည်။ မြေကြီးအောက်တွင် တစ်စုံတစ်ရာကို မြှုပ်နှံထားဟန် တူသော်လည်း ဤနေရာမှကြည့်လျှင် ရှင်းလင်းစွာ မမြင်ရပေ။ ရှင်းလင်းစွာ သိမြင်နိုင်သည်မှာ မီးခိုးများ ထွက်ပေါ်နေသော နေရာတိုင်းမှ ကြိုးတစ်ချောင်းစီ ထွက်လာကာ ဝင်္ကပါ၏ အတွင်းပိုင်းအထိ သွယ်တန်းထားခြင်းပင် ဖြစ်သည်။

ထိုစနက်ကြိုးများမှ ပြင်းထန်သော ဓာတ်ဆီနံ့များ ထွက်ပေါ်နေကာ အစွန်းတစ်ဖက်စီတွင်မူ A, B, C, D အစရှိသော အက္ခရာများ တပ်ထားသည်။ ထိုကြိုးများ၏ ဘေးတွင် ချန်ရှောက်ရယ်က မီးတုတ်ကို ကိုင်ဆောင်ထားရင်း ချူဟန်၏ အမိန့်ကို ငြိမ်သက်စွာ စောင့်ဆိုင်းနေသည်။

ချန်ရှန်ကော်၊ ယဲ့ချန်နှင့် ယွဲ့ဇီတို့မှာမူ ထရပ်ကားကြီးများ၏ အမိုးပေါ်တွင် နေရာယူကာ သေနတ်များကို ချိန်ရွယ်ထားကြသည်။ ရှန်ကျိုတီနှင့် ပိုင်ယွန့်အာတို့သည်လည်း ထို့အတူပင်။ လော့ရှောင်ရှောင်က ချူဟန်၏ ဘေးတွင် ကပ်ရပ်ကာ သေနတ်ပြောင်းဝကို ရှေ့သို့ ချိန်ရွယ်ထားသည်။ လူတိုင်းတွင် တာဝန်ကိုယ်စီ ရှိနေကြပြီး မည်သူတစ်ဦးတစ်ယောက်မျှ အလကား အချောင်နေသူ မရှိပေ။

အားလုံးက အသက်ရှူသံပင် မထွက်ရဲလောက်အောင် ငြိမ်သက်နေကြသည်။ စခန်းတစ်ခုလုံးတွင် ပဲ့တင်ထပ်နေသည်မှာ တစ်စတစ်စ နီးကပ်လာသော ဇွန်ဘီများ၏ ရွံရှာဖွယ် ဟိန်းသံများသာ ဖြစ်သည်။

ချူဟန်သည် အမြင့်ဆုံး ကားအမိုးပေါ်တွင် မတ်မတ်ရပ်နေကာ ညာလက်တွင် သံပုဆိန်ကို ပေါ့ပါးစွာ ကိုင်ဆောင်ထားပြီး ဘယ်လက်ဖြင့် အသံချဲ့စက်ကို ငြိမ်သက်စွာ ဆုပ်ကိုင်ထားသည်။

သူသည် ဤသေရေးရှင်ရေး တိုက်ပွဲ၏ စစ်သေနာပတိချုပ်ပင်။

စနစ်ကျသော စစ်ရေးစစ်ရာလည်းမရှိ၊ ဗဟိုကို ကာကွယ်မည့် အထူးတပ်ဖွဲ့လည်း မရှိသလို အဆင့်မြင့် လက်နက်ကိရိယာများလည်း မရှိပေ။ လေ့ကျင့်ထားသော စစ်သည်တစ်ယောက်မျှ မရှိသည့်အပြင် မိမိကိုယ်တိုင် ကိုင်ဆောင်ထားသော တစ်လက်တည်းသော သေနတ်ကိုပင် အခြားသူများကို ပေးအပ်ထားခဲ့ပြီ ဖြစ်သည်။

ဤတိုက်ပွဲ၏ ခေါင်းဆောင်မှာ သူ တစ်ယောက်တည်းသာ ရှိသည်။ စစ်တပ်တစ်ခုလုံးက သူ၏ အမိန့်ကိုသာ နာခံကြရမည်။

မိမိတို့ဘက်မှ အင်အားမှာ လူခုနစ်ရာကျော်သာ ရှိသော်လည်း ရန်သူ့အင်အားမှာ သောင်းဂဏန်းချီသော ဇွန်ဘီလှိုင်းကြီး ဖြစ်နေသည်။ ချူဟန်က ဤလူခုနစ်ရာဖြင့် အကောင်နှစ်သောင်းနီးပါးရှိသော မကောင်းဆိုးဝါးများကို အကုန်လုံး သတ်ပစ်မည်ဟု အခြားသူများ သိရှိသွားပါက သူ ရူးသွားပြီဟုသာ သေချာပေါက် ပြောကြမည် ဖြစ်သည်။

အလွန်အမင်း ကွာဟလှသော အင်အားက ဤတိုက်ပွဲ၏ ရလဒ်ကို ကြိုတင် ဟောကိန်းထုတ်နေသည့်အလားပင်။ ဤလူခုနစ်ရာမှာ အရိုးထဲက ရိုးတွင်းအဆီအထိ စုပ်စားခံရမည့် ကံကြမ္မာသာ ရှိသည် မဟုတ်ပါလော။

သို့သော် ချူဟန်က အနည်းငယ်မျှ ဆုတ်တွန့်ခြင်း မရှိပေ။ ထို့ပြင် သူက ဤတိုက်ပွဲကို အနိုင်ရမည်ဟု အပြည့်အဝ ယုံကြည်နေခဲ့သည်။

ရှေ့မှ ရန်သူများမှာ အသိဉာဏ် အနည်းငယ်မျှ မရှိသော လမ်းလျှောက်နေသည့် အလောင်းကောင်များသာ ဖြစ်သည်။

အချိန်တွေက တစ်မိနစ်ပြီး တစ်မိနစ် ရက်စက်စွာ ကုန်ဆုံးသွားသည်။ လူတိုင်း၏ စိုးရိမ်တကြီး စောင့်ကြည့်နေမှုအောက်တွင် ရှေ့မှ ဇွန်ဘီလှိုင်းလုံးကြီးက လက်တစ်ကမ်းအလိုသို့ ရောက်ရှိလာခဲ့ပြီ ဖြစ်သည်။ မကောင်းဆိုးဝါးများက ရွှံ့နွံများပမာ တိုးဝှေ့လာကြကာ ပြင်းထန်သော အပုပ်နံ့များကို လေထုထဲသို့ ဖြန့်ကြက်လာကြသည်။ ပွင့်ဟနေသော ပါးစပ်ကြီးများမှ အဝါရောင် ပြည်များနှင့် သွေးမည်းများ ကပ်ငြိနေသော အစွယ်များကို မြင်တွေ့နေရကာ နောက်ကျိနေသော မျက်လုံးဖြူများက နေရောင်အောက်တွင် ပိုမို ရူးသွပ်သော အငွေ့အသက်များကို ထုတ်လွှတ်နေသည်။ အဝတ်အစားများ စုတ်ပြဲနေကာ အရေပြားများ အက်ကွဲပုပ်ဟောင်းနေပြီး စက်ရုပ်များပမာ တရွေ့ရွေ့ တက်လှမ်းလာကြသည်။

သူတို့သည် ပန်းခြံထဲသို့ ဝင်ရောက်လာခဲ့ပြီ ဖြစ်သည်။ ထိုနေရာသည် စခန်းနေသူများ ချွေးတလုံးလုံးဖြင့် စိုက်ပျိုးထားသော စိုက်ခင်းများပင်။ စိမ်းလန်းစိုပြေနေသော ဟင်းသီးဟင်းရွက်များကို ဇွန်ဘီများက ညှာတာမှုကင်းမဲ့စွာ နင်းချေကာ မြေပြင်ပေါ်တွင် ပုပ်ဟောင်းနေသော အသားစများနှင့် သွေးမည်းများ ပြန့်ကျဲသွားတော့သည်။ ထိုမြင်ကွင်းကို ကြည့်ကာ လယ်ယာလုပ်ငန်း လုပ်ကိုင်သူများမှာ အံကြိတ်သွားကြသည်။ နောက်ထပ် လအနည်းငယ်ကြာလျှင် ရိတ်သိမ်းရတော့မည့် အဖိုးတန် စားနပ်ရိက္ခာများမှာ ယခု မျက်မြင်ကိုယ်တွေ့ပင် ရွှံ့ဗွက်များအဖြစ် ပြောင်းလဲသွားခဲ့ပြီ ဖြစ်သည်။

အကုန်ပျက်စီးသွားပြီ။ အရာအားလုံး ပျက်စီးသွားပြီ။

ဇွန်ဘီအုပ်ကြီးသည် ပိုမို ပြည့်နှက်လာကာ ပန်းခြံတစ်ခုလုံးကို ဖုံးလွှမ်းသွားပြီး နေထိုင်ရာ စခန်း၏ အရှေ့ဘက်သို့ ပြင်းထန်သော အရှိန်အဟုန်ဖြင့် တိုးဝှေ့လာတော့သည်။

"ဇုန် A ... ဖောက်ခွဲတော့"

ချူဟန်၏ ပြတ်သားသော အသံက အသံချဲ့စက်မှတစ်ဆင့် စစ်တလင်းကြီးတစ်ခုလုံးသို့ ဟိန်းထွက်သွားတော့သည်။

ကွပ်ကဲမှု နေရာတွင် ရပ်နေသော သူ၏ ခန္ဓာကိုယ်မှာ လှံလုံးကြီးတစ်ချောင်းပမာ မတ်မတ်ရပ်နေကာ လေတိုက်ခတ်မှုကို အန်တုရင်း သံပုဆိန်ကို ကိုင်ဆောင်ထားပြီး မျက်နှာပေါ်တွင်လည်း လွန်စွာ အေးစက်တည်ငြိမ်သော အမူအရာများ ရှိနေသည်။

ခပ်လှမ်းလှမ်းတွင် ရှိနေသော ချန်ရှောက်ရယ်က ချက်ချင်းပင် မီးတုတ်ကို လှုပ်ရှားလိုက်ကာ A အက္ခရာ တပ်ထားသော စနက်ကြိုးကို မီးရှို့လိုက်တော့သည်။

ရှဲ...

ဓာတ်ဆီ စိမ်ထားသော ကြိုးက ချက်ချင်းပင် မီးတောက်လောင်သွားကာ မီးနဂါးကြီးတစ်ကောင်အသွင်ဖြင့် ကားဝင်္ကပါကြီးကို ဖြတ်ကျော်သွားတော့သည်။ ပြင်းထန်သော အရှိန်ဖြင့် မီးတောက်များ ပြေးသွားကာ မျက်စိတစ်မှိတ်အတွင်း ပန်းခြံမြေအောက်၌ မြှုပ်နှံထားသော မီးခိုးထွက်ရာ နေရာများသို့ ရောက်ရှိသွားတော့သည်။

ထိုနေရာမှာ မရေမတွက်နိုင်သော ဇွန်ဘီများ တိုးဝှေ့တက်လှမ်းနေသည့် ခြေရင်းပင် ဖြစ်သည်။

စနက်ကြိုးမှ မီးတောက်များက မြေအောက်ရှိ ယမ်းများနှင့် တွေ့ဆုံသွားတော့သည်။

အုန်း...

ရုတ်တရက် မြေပြင်တစ်ခုလုံးကို ဆွဲဖြဲပစ်တော့မည့်အလား ပြင်းထန်လှသော ပေါက်ကွဲသံကြီး ထွက်ပေါ်လာတော့သည်။

မြေကြီးကို တုန်ခါစေသော ပြင်းထန်သည့် လှိုင်းလုံးကြီးများ ပျံ့နှံ့သွားကာ ဝေးကွာသော အရပ်ဆီသို့ ဟိန်းထွက်သွားသည်။ စခန်း၏ အနောက်ဘက်ဆုံးရှိ အဆောက်အအုံများအထိပင် ထိုအသံက ပဲ့တင်ထပ်သွားတော့သည်။

ပေါက်ကွဲမှု၏ ဗဟိုချက်ဖြစ်သော ဇုန် A ၏ မြေပြင်မှာ အပြင်းအထန် ပေါက်ကွဲထွက်သွားကာ မရေမတွက်နိုင်သော ဦးခေါင်းခွံများနှင့် ကလီစာများ ကောင်းကင်သို့ လွင့်စင်သွားတော့သည်။ ၎င်းသည် စစ်မြေပြင်ကြီးထဲတွင် ပွင့်လန်းလာသော သွေးနေကြာပန်းကြီး တစ်ပွင့်ပမာပင်။ ချက်ချင်းပင် အစိတ်စိတ်အမွှာမွှာ ဖြစ်သွားသော အသားစများက မိုးရွာချသည့်အလား ကျဆင်းလာတော့သည်။ ပြည့်နှက်နေသော မည်းမှောင်သည့် ဇွန်ဘီအုပ်ကြီး၏ တစ်စိတ်တစ်ပိုင်းမှာ ဧရာမ ချိုင့်ခွက်ကြီးတစ်ခုပမာ ဟာလာဟင်းလင်း ဖြစ်သွားကာ လွင့်စင်သွားသော ခြေလက်အင်္ဂါများ ဘေးပတ်ဝန်းကျင်သို့ ပြန့်ကျဲသွားတော့သည်။

စီးကျလာသော သွေးမည်းများက ခြောက်သွေ့နေသော မြေပြင်ကို တစ်ခဏချင်း၌ပင် ရွှံ့နွံကြီးတစ်ခုအဖြစ် ပြောင်းလဲပစ်လိုက်သည်။

ချူဟန်က တက်လာသော ယမ်းခိုးများကို ငြိမ်သက်စွာ ကြည့်နေရင်း နှုတ်ခမ်းထက်တွင် ရက်စက်ကြမ်းကြုတ်သော၊ ရူးသွပ်မှုများ ပြည့်နှက်နေသော အပြုံးတစ်ခု ပေါ်လာတော့သည်။

ဇုန် A... ဖောက်ခွဲမှု အောင်မြင်သည်။

ခန့်မှန်းခြေအရ ဇွန်ဘီ ခုနစ်ရာခန့် သေဆုံးသွားသည်။

ပြင်းထန်လှသော ရိုက်ခတ်မှုကြီးက အသက်ရှင်ကျန်ရစ်သူများ၏ ရင်ဘတ်ကို ထိုးဖောက်သွားတော့သည်။

မကောင်းဆိုးဝါး ခုနစ်ရာလောက်ကို မျက်စိတစ်မှိတ်အတွင်း အပြတ်ရှင်းလိုက်တာလား။

ချန်ရှန်ကော်သည် မယုံကြည်နိုင်စွာဖြင့် မျက်လုံးများ ပြူးသွားတော့သည်။ လွန်စွာ တိုက်ရိုက်ကျကာ အလွန် ကြမ်းတမ်းလှသော တိုက်ခိုက်မှုပင် ဖြစ်သည်။

'ချူဟန်ဆိုတဲ့ကောင်... ဘယ်လိုလုပ်ပြီး ဒီလိုအရာမျိုးကို လုပ်နိုင်ခဲ့တာလဲ။ ဟိုအောက်မှာ ဘာတွေ မြှုပ်ထားခဲ့တာလဲ။ မြေမြှုပ်မိုင်းတွေ အများကြီးလား။ မဟုတ်ဘူး... ငါတို့ အဲ့ဒီလောက် အများကြီး မစုဆောင်းခဲ့သလို ရဖို့လည်း မဖြစ်နိုင်ဘူး'

ယဲ့ချန်သည်လည်း အံ့အားသင့်လွန်းသဖြင့် မျက်နှာကြွက်သားများပင် တဆတ်ဆတ် တုန်ယင်လာခဲ့ပြီ ဖြစ်သည်။ အမြဲတမ်း ခံစားချက် ကင်းမဲ့သူ ဖြစ်သော်လည်း ချူဟန် ရောက်လာပြီးကတည်းက မျက်မှန်ကို အကြိမ်ကြိမ် ပင့်တင်နေရသူ ဖြစ်သည်။

"ဝိုး... မိုက်လိုက်တာ။ တကယ့် ပါရမီရှင်ပဲဗျာ"

ယွဲ့ဇီက စိတ်လှုပ်ရှားလွန်းသဖြင့် အော်ဟစ်လိုက်ကာ ကြီးမားသော ခန္ဓာကိုယ်ကြီးမှာ ကားအမိုးပေါ်တွင် ခုန်ပေါက်လုနီးပါး ဝမ်းသာအားရ ဖြစ်နေတော့သည်။

ကားဝင်္ကပါကြီးအတွင်း ပုန်းအောင်းနေသော စစ်သည် ခုနစ်ရာမှာလည်း ဝမ်းသာအားရ အော်ဟစ်လိုက်ကြသည်။ အပြင်ဘက်ကို မြင်ရသည်မှာ ဝေဝါးနေသော်လည်း ပြင်းထန်လှသော ပေါက်ကွဲမှုကြီးနှင့် လွင့်စင်သွားသော အလောင်းများကိုမူ ရှင်းလင်းစွာ မြင်တွေ့လိုက်ရသည်။ အများစုမှာ အချင်းချင်း ဖက်တွယ်ကာ မျက်ရည်များ ကျဆင်းရင်း ရယ်မောလိုက်ကြသည်။ ဤမျှလောက် အံ့မခန်းဖွယ်ကောင်းသော၊ အသက်ရှင်သန်ရန် မျှော်လင့်ချက်များကို တောက်ပစေသော ပေါက်ကွဲမှုကြီးပင် ဖြစ်သည်။

ပိုင်ယွန့်အာက ရှည်လျားသော ဆံပင်များကို သပ်တင်လိုက်ရင်း ချူဟန်ကို ကြည့်လိုက်သော အေးစက်စက် မျက်ဝန်းထဲတွင် မှော်ဆန်လှသော အလင်းတန်းများ တောက်ပလာတော့သည်။

ရှန်ကျိုတီ၏ ပါးပြင်နှစ်ဖက်မှာ နီရဲနေကာ ရင်ခုန်သံများ ပြင်းထန်စွာ မြန်ဆန်နေခဲ့ပြီ ဖြစ်သည်။ ဤသည်မှာ သူ ရွေးချယ်ထားသော ယောက်ျားပင် ဖြစ်သည်။

ချန်ရှောက်ရယ်က လက်ကို ပြင်းထန်စွာ ဝှေ့ယမ်းလိုက်ကာ မျက်နှာပေါ်ရှိ အဆီများ တုန်ခါသွားသည်အထိ စိတ်လှုပ်ရှားစွာ အော်ဟစ်လိုက်တော့သည်။

"ကဲ...နောက်တစ်ခု လာထား"

လော့ရှောင်ရှောင်မှာ ချူဟန်၏ ဘေးတွင် ကပ်ရပ်ကာ ခုန်ပေါက်ချင်စိတ်များကို အသည်းအသန် ထိန်းချုပ်ထားရသည်။ ဤကဲ့သို့ အရေးကြီးသော အခြေအနေတွင် အစ်ကိုချူဟန်ကို အနှောင့်အယှက် ပေး၍မဖြစ်ပေ။

ကွပ်ကဲမှု နေရာပေါ်တွင် ရပ်နေသော ချူဟန်က စိတ်ထဲတွင် အေးစက်စက်ဖြင့် အချိန်ကို တွက်ချက်နေခဲ့သည်။ ခုနက ပေါက်ကွဲမှုမှာ အနည်းငယ် စောသွားသည်။ စက္ကန့်အနည်းငယ် လွဲချော်သွားမှုကြောင့် မူလက ဇွန်ဘီတစ်ထောင်ခန့် သေဆုံးနိုင်သော်လည်း ခုနစ်ရာခိုင်နှုန်းခန့်သာ သေဆုံးသွားခဲ့သည်။

သို့သော် ပြဿနာ မရှိပေ။ တိုက်ပွဲ၏ စည်းချက်ကို သူ ဖမ်းဆုပ်နိုင်ခဲ့ပြီ ဖြစ်သည်။

ဇုန် A ၏ ပြင်းထန်သော ပေါက်ကွဲမှုကြီးကို ကြုံတွေ့လိုက်ရသော်လည်း အသိဉာဏ်မဲ့သော ဇွန်ဘီများမှာ ကြောက်ရွံ့မှု အနည်းငယ်မျှ ဖြစ်ပေါ်လာခြင်း မရှိချေ။ လစ်ဟာသွားသော နေရာကို ချက်ချင်း ပြန်လည် အစားထိုးလိုက်ကြကာ လဲကျနေသော အလောင်းများကို ညှာတာမှုကင်းမဲ့စွာ နင်းချေရင်း ရှေ့သို့ တိုးလာကြသည်။ မရေမတွက်နိုင်သော ခြေလက်အင်္ဂါများမှာ ရွှံ့ဗွက်များထဲတွင် နစ်မြုပ်သွားကာ ပုပ်ဟောင်းနေသော ခြေထောက်များက ထိုအပေါ်မှ ဖြတ်လျှောက်သွားကြသည်။ ခဲနေသော သွေးမည်းများနှင့် ပုပ်ပွနေသော အသားစများကို နင်းဖြတ်ရင်း နာကျင်မှုကို မသိရှိဘဲ ဆာလောင်မွတ်သိပ်သော ဟိန်းဟောက်သံများပေးလျက် စက်ရုပ်များပမာ ဆက်လက် တိုးဝင်လာကြတော့သည်။

"ဇုန် B... ဖောက်ခွဲစမ်း"

ချူဟန်၏ အသံက အသံချဲ့စက်မှတစ်ဆင့် ထပ်မံ ဟိန်းထွက်လာပြန်သည်။ ထိုအသံထဲတွင် အနည်းငယ်မျှ ယိမ်းယိုင်ခြင်းမရှိသော တည်ငြိမ်မှုနှင့် စစ်မြေပြင်ကြီးကို စိုးမိုးချင်သော ရက်စက်သည့် ရည်မှန်းချက်များ ပြည့်နှက်နေသည်။

နိုင်ရမယ်။ ဒီသေရေးရှင်ရေး တိုက်ပွဲမှာ သေချာပေါက် အနိုင်ရမယ်။

ရှဲ...ရှဲ...

B အက္ခရာ တပ်ထားသော စနက်ကြိုးကို ချန်ရှောက်ရယ်က လျင်မြန်စွာ မီးရှို့လိုက်သည်။

အုန်း...

ပေါက်ကွဲသံကြီး ထပ်မံ ဟိန်းထွက်လာပြန်သည်။ ဒီတစ်ကြိမ် ပေါက်ကွဲမှုတွင် ပါဝင်သွားသော ဇွန်ဘီအရေအတွက်မှာ ကိုးရာဝန်းကျင်ခန့် ရှိသည်။

အစိတ်စိတ်အမွှာမွှာ ဖြစ်သွားသော ခြေလက်များ ထပ်မံ ကောင်းကင်သို့ လွင့်စင်သွားကာ လေထဲတွင် ပြင်းထန်စွာ ကွဲထွက်သွားတော့သည်။ ခပ်လှမ်းလှမ်းမှ ကြည့်လျှင် ထိုအရာများမှာ ရွံရှာဖွယ်ကောင်းသော မြင်ကွင်းမဟုတ်ဘဲ ဤငရဲစစ်ပွဲ၏ အစကို ကြေညာကာ အောင်ပွဲကို ဟောကိန်းထုတ်နေသည့် လှပပြီး ခမ်းနားလှသော မီးရှူးမီးပန်းများအလားပင် ဖြစ်သည်။

ဆက်တိုက် ထွက်ပေါ်လာသော ပေါက်ကွဲသံကြီးများကြောင့် နေထိုင်ရာ အဆောက်အအုံများဆီသို့ ထွက်ပြေးပုန်းအောင်းနေသော လူဖျင်းတစ်ရာနှင့် တိုက်ခိုက်နိုင်စွမ်းမရှိသော လူအို၊ ကလေး နှစ်ရာကျော်တို့မှာလည်း ပြတင်းပေါက်များတွင် လာရောက် ကပ်ကြည့်နေကြတော့သည်။ ဤနေရာမှဆိုလျှင် အမြင်အာရုံမှာ ပိုမို ကျယ်ပြန့်ကာ အောက်ခြေတွင် ဖြစ်ပေါ်နေသော အံ့မခန်းဖွယ်ရာ မြင်ကွင်းများက သူတို့၏ မျက်ဝန်းထဲသို့ ရှင်းလင်းစွာ ရောက်ရှိလာတော့သည်။

ထိုကားဝင်္ကပါကြီးကိုလည်းကောင်း၊ ဝေးကွာသော နေရာ၌ ဖြစ်ပေါ်နေသည့် နတ်ဘုရားများ ဖန်ဆင်းထားသည့်အလား ပြင်းထန်လှသော ပေါက်ကွဲမှုကြီးများကိုလည်းကောင်း ရှင်းလင်းစွာ မြင်တွေ့နေရလေတော့သည်။