အခန်း ၁၀၁

အခန်း ၁၀၁ - ဝိညာဉ်သွေးကြောကို စုပ်ယူခြင်း။

ဟွမ်ထိုင်ဂိုဏ်းသို့ ရောက်ရှိလာသည်နှင့် ဝေ့ဝူသည် နာရူတို၊ မန်ဒလာ၊ ရှောင်ချီနှင့် လီယိုတို့ကို ထိုနယ်မြေတစ်ခုလုံးအား ဝိုင်းရံထားစေပြီးနောက်ဝိညာဉ်စွမ်းအားကို အသုံးပြု၍ သူ၏အသံကို ကျယ်လောင်စေကာ တပည့်အားလုံးကို စုဆောင်းလိုက်တော့သည်။

ကနဦးတွင် တပည့်အများအပြားက မနာခံဘဲ ငြင်းဆန်ခဲ့ကြသော်လည်း ရုပ်သေးရုပ်လေးရုပ်က သူတို့ထဲမှ လူအချို့ကို သတ်ဖြတ်ပြလိုက်ပြီးနောက်တွင်မူ သူတို့သည် အလွန်အမင်း ထိတ်လန့်တုန်လှုပ်စွာဖြင့် ဗဟိုတောင်ထွတ်သို့ စုရုံးလာကြတော့သည်။

ဟွမ်ထိုင်ဂိုဏ်း၏ မန်ရှင်းအဆင့်ကျင့်ကြံသူများမှာ လုံးဝဥဿုံ သုတ်သင်ရှင်းလင်းခြင်း ခံထားရချေပြီ။

"ငါတို့ကို ဟွမ်ထိုင်ဂိုဏ်းရဲ့ ရတနာတိုက်ဆီ ခေါ်သွားပြီး အစီအရင်ပိတ်ပင်ချက်တွေကို ဖွင့်စမ်း။ ဒါဆိုရင် မင်းရဲ့အသက်နဲ့ ဒီလူတွေရဲ့အသက်တွေကို ငါ ချမ်းသာပေးမယ်။"

ဝေ့ဝူက ယွီကျန့်ရှီးကိုပြောလိုက်သည်။

မိမိ၏ဂိုဏ်းမှာ ပျက်စီးလုနီးပါး ဖြစ်နေသည်ကို မြင်တွေ့ရသဖြင့် ယွီကျန့်ရှီးသည် လုံးဝ စိတ်ပျက်အားငယ်သွားခဲ့ရသော်လည်းများပြားလှသော တပည့်များ၏ အသက်ဘေးအတွက် သူ နာခံလိုက်ရုံမှတစ်ပါး အခြားမရှိတော့ချေ။

ရတနာတိုက်ကို ဖွင့်လှစ်ပြီးနောက် ဝေ့ဝူနှင့် ဘိုးဘေး ဝေ့ချွမ်ဟဲတို့သည် ရုပ်သေးရုပ်များ၏ အကူအညီဖြင့် ထိုနေရာရှိ လူပေါင်းနှစ်ရာကျော်လုံး၏ ကျင့်ကြံခြင်းစွမ်းအားများကို ဖျက်ဆီးကာ မောင်းထုတ်ပစ်လိုက်ကြသည်။

ယွီကျန့်ရှီးသည်လည်း ချွင်းချက်မရှိခဲ့ချေ။

ဝေ့ဝူသည် နာရူတိုအား သူ၏ ဝိညာဉ်နန်းတော်ကို ဖျက်ဆီးခိုင်းလိုက်သဖြင့် သူသည် သာမန်လူသားတစ်ဦးအဖြစ်သို့ ရောက်ရှိသွားခဲ့ရပြီး ထွက်ခွာသွားခဲ့ရတော့သည်။

မျက်စိတစ်မှိတ်အတွင်းမှာပင် ဟွမ်ထိုင်ဂိုဏ်းတစ်ခုလုံးမှာ လုံးဝ ဟာလာဟင်းလင်း ဖြစ်သွားပြီး လူစုကွဲသွားခဲ့ကြရလေသည်။

ထို့နောက်တွင် သူတို့သည် ရတနာတိုက်အတွင်းသို့ ဝင်ရောက်ခဲ့ကြသည်။

ရတနာတိုက်ကြီးမှာ အလွန်ပင် ကြီးမားလှပြီး စွဲမက်ဖွယ်ကောင်းသော ပစ္စည်းမျိုးစုံဖြင့် ပြည့်နှက်နေခဲ့သည်။

ဝိဉာဥ်ကျောက်တုံးများ၊ရတနာများ၊ သတ္တုရိုင်းများ၊ ဝိညာဉ်ဆေးဖက်ဝင်အပင်များ၊ အစီအရင်များ၊ သားရဲရိုင်းပစ္စည်းများနှင့် အခြားသော ရှားပါးရတနာမျိုးစုံ စသည်ဖြင့် ရှိနေကြသည်။

ဝေ့ဝူနှင့် ဘိုးဘေးဝေ့ချွမ်ဟဲတို့၏ မျက်လုံးများမှာ တောက်ပသွားခဲ့ကြသည်။ သူတို့က လက်တစ်ချက် ဝှေ့ယမ်းလိုက်ရုံဖြင့် အတွင်းရှိ ရတနာအားလုံးမှာ သူတို့၏ သိုလှောင်အိတ်များထဲသို့ လှိမ့်ဝင်သွားခဲ့ကြတော့သည်။

ထို့နောက်တွင် သူတို့သည် ဟွမ်ထိုင်ဂိုဏ်း၏ ကျမ်းစာဂိုဒေါင်သို့ သွားရောက်ကာ ကျင့်စဉ်များနှင့် မန္တန်စာအုပ်အားလုံးကို အပြတ်ရှင်း သိမ်းဆည်းလိုက်ကြသည်။ ၎င်းတို့ကို ကျင့်ကြံခြင်းအဆင့်နိမ့်သော မိသားစုဝင်များအတွက် အသုံးပြုနိုင်ပေသည်။

ဟွမ်ထိုင်ဂိုဏ်း၏ ဝိညာဉ်စိုက်ခင်းများထဲရှိ ဝိညာဉ်အပင်များနှင့် ဆေးဖက်ဝင်အပင်များကိုမူ သူတို့ ရသလောက် ဆွတ်ခူးခဲ့ကြသည်။

ကံကောင်းထောက်မစွာဖြင့် ဝေ့ဝူ၏ထံတွင် ပလတ်စတစ်အိတ် အတော်များများ ရှိနေသေးသဖြင့်သာ တော်တော့သည်။

မဟုတ်ပါက သူတို့၏ သိုလှောင်အိတ်များမှာ ပစ္စည်းအားလုံးကို ဆံ့ဝင်နိုင်မည် မဟုတ်ချေ။

"ဒီတစ်ခါတော့ ငါတို့ တကယ်ပဲ ပေါက်သွားပြီ။"

ဘိုးဘေး ဝေ့ချွမ်ဟဲသည် ဝမ်းသာအားရဖြင့် ပြုံးပျော်နေခဲ့သည်။

ဘေးနားတွင်မူ သူတို့သည် ရရှိလာသော စစ်သုံ့ပန်းပစ္စည်းများကို စတင်ရေတွက်ကြတော့သည်။

ဟွမ်ထိုင်ဂိုဏ်းထံမှ လုယူရရှိသော ဝိဉာဥ်ကျောက်တုံး စုစုပေါင်းမှာ နှစ်သောင်း ဝန်းကျင်ခန့် ရှိသည်။

ဤပမာဏမှာ နည်းပါးသည်ဟု ထင်ရသော်လည်း အမှန်တကယ်တွင်မူ များပြားလှသော ကျောက်တုံးများကို ဟွမ်ထိုင်ဂိုဏ်း ကျင့်ကြံသူများ၏ သိုလှောင်အိတ်များထဲတွင် ထည့်သွင်းသိမ်းဆည်းထားကြခြင်း ဖြစ်သည်။

အထူးသဖြင့် ချိုးချန်ကျွင်းတစ်ဦးတည်းထံမှာတင် ကျောက်တုံး ရှစ်ထောင် ရှိနေခဲ့သည်။ အခြားသူများထံမှ စုစုပေါင်းမှာမူ တစ်သောင်းခွဲကျော် (၁၇,၀၀၀ ခန့်) ရှိသည်။

ထို့ကြောင့် ဟွမ်ထိုင်ဂိုဏ်းထံမှ စုစုပေါင်း လုယူရရှိမှုမှာ ကျောက်တုံး လေးသောင်းခွဲ (၄၅,၀၀၀) ဖြစ်ပေသည်။

ဝေ့ဝူအံ့ဩသွားရသည်မှာ ကျားနီခန်းမ ကျင့်ကြံသူများ၏ သိုလှောင်အိတ်များထဲတွင်မူ အမှန်တကယ်ပင် ကျောက်တုံး ငါးသောင်း (၅၀,၀၀၀) မျှ ပါဝင်နေခြင်း ဖြစ်သည်။

သူ အနည်းငယ် တွေးတောကြည့်ပြီးနောက်တွင် သဘောပေါက်သွားခဲ့သည်။

ကျားနီခန်းမ၏ ယခင်ဂိုဏ်းမှာ လုံထန်ဂိုဏ်း ဖြစ်ပြီး ၎င်းသည် မန်ရှင်းအဆင့် ၇ကျင့်ကြံသူတစ်ဦး စောင့်ကြပ်ခဲ့သော အင်အားစု ဖြစ်သဖြင့် ဟွမ်ထိုင်ဂိုဏ်းထက်ပင် ပိုင်ဆိုင်မှု ပိုမိုထည်ဝါခဲ့သည်။

ကျားနီခန်းမက လုံထန်ဂိုဏ်းကို ဖျက်ဆီးပြီးနောက်ဟဤကျင့်ကြံသူများသည် ၎င်း၏ အရင်းအမြစ်များကို ရူးသွပ်စွာဖြင့် လုယက်ခဲ့ကြသည်။ ထို့အပြင် သူတို့သည် ရေရှည်အင်အားစုတစ်ခု တည်ထောင်ရန် ရည်ရွယ်ချက်မရှိဘဲ ငွေရသလောက် ရှာရန်သာ ဆန္ဒရှိခဲ့ကြသည်။

ထို့ကြောင့် သူတို့သည် ကျောက်တုံးများကို ရတနာတိုက်ထဲတွင် ဘယ်တော့မှ မသိမ်းဆည်းထားဘဲ မိမိတို့၏ သိုလှောင်အိတ်များထဲသို့သာ အကုန် ထည့်သွင်းခဲ့ကြခြင်း ဖြစ်ရာ ဤမျှလောက် များပြားနေခြင်းမှာ အံ့ဩစရာ မဟုတ်ချေ။

၎င်း၏ အထွတ်အထိပ်ကာလတွင် လုံထန်ဂိုဏ်း၌ ကျောက်တုံး ငါးသောင်းထက်မက များစွာ ပိုမိုရှိခဲ့မှာ သေချာသော်လည်း စစ်ပွဲကြီးတစ်ခုကို ဖြတ်သန်းပြီး အများအပြား သုံးစွဲခဲ့ရပြီးနောက် ယခုအချိန်တွင် ဤမျှလောက် ကျန်ရှိနေသေးခြင်းမှာပင် အတော်လေး အဆင်ပြေလှပေပြီ။

နောက်ပိုင်းတွင် အင်အားစု ရှစ်ခုမှ ပေးပို့လာမည့် လေးသောင်းကို ပေါင်းထည့်လိုက်ပါက သူတို့တွင် စုစုပေါင်း ကျောက်တုံး တစ်သိန်းသုံးသောင်းငါးထောင် (135,000) ရရှိမည် ဖြစ်ပေသည်။

ဤပမာဏသည် ဝိညာဉ်ပိတ်ဆို့ခြင်း အစီအရင်အတွက် လိုအပ်သော တစ်သိန်းသုံးသောင်းကိုပင် ကျော်လွန်သွားခဲ့ချေပြီ။

သို့သော်လည်း လေလံပွဲများမှာ ခန့်မှန်းရခက်ခဲလှပြီး ဝိညာဉ်ပိတ်ဆို့ခြင်း အစီအရင်၏ ဈေးနှုန်းမှာ ထိုအချိန်တွင် ပိုမိုမြင့်မားသွားနိုင်သဖြင့် လုံးဝ စိတ်ချရသည့် အခြေအနေတော့ မဟုတ်သေးချေ။

ဝေ့ဝူသည် ကျားနီခန်းမထံသို့လည်း နောက်ထပ်တစ်ခေါက် သွားရောက်ရန် စီစဉ်လိုက်သည်။ အများကြီး မကျန်တော့လျှင်တောင်မှ ထောင်ဂဏန်းခန့် ရရှိလျှင်ပင် အဆင်ပြေလှပေသည်။

ယခုအချိန်တွင် ပုံမှန်အားဖြင့် အမြဲတမ်း စည်ကားသိုက်မြိုက်နေတတ်သော ဟွမ်ထိုင်ဂိုဏ်းကြီးမှာ အလွန်ပင် တိတ်ဆိတ်ငြိမ်သက်နေခဲ့ပြီး ငှက်များနှင့် သားရဲအချို့၏ အော်မြည်သံများသာ ထွက်ပေါ်နေတော့သည်။

မြေးဖိုးနှစ်ဦးသည် ဗဟိုခန်းမဆောင်၏ တံခါးဝလှေကားထစ်များပေါ်တွင် ထိုင်နေရင်းကျောက်တုံးများ သူတို့၏ တံခါးဝရှေ့သို့ လာရောက်အပ်နှံမည့်အချိန်ကို စောင့်ဆိုင်းနေကြသည်။

"ဒီနေရာက တကယ်ကို ကောင်းတဲ့ မြေပြန့်လွင်ပြင်ပဲ ငါတို့ ဝေ့မိသားစုရဲ့ ချန်ချွမ်တောင်ထက် အများကြီး ပိုကောင်းတယ်။"

"ကျွန်တော်တို့ ထွက်သွားပြီးရင် ဒီနေရာက အခြားလူတွေအတွက် အလကား သက်သက် အကျိုးအမြတ် ဖြစ်သွားမှာ မဟုတ်ဘူးလား။"

ဝေ့ဝူက ပြုံးလျက် ဆိုလိုက်သည်။

"အဲဒါကတော့ ဘာမှလုပ်လို့မရဘူး။ ငါတို့မှာ လူအင်အားလည်းနည်း ကျင့်ကြံခြင်းကလည်း နိမ့်တော့ ဒီနေရာကို မသိမ်းပိုက်ထားနိုင်ဘူးလေ။"

ဘိုးဘေး ဝေ့ချွမ်ဟဲက နှမြောတသသော လေသံဖြင့် ပြောလိုက်သည်။

"ဟွမ်ထိုင်ဂိုဏ်းရဲ့ အောက်မှာရှိတဲ့ ဝိညာဉ်သွေးသွေးကြေက ဘယ်လောက်အထိ ရှည်လျားမလဲဆိုတာ ကျွန်တော် သိချင်မိတယ်။"

"မိုင်အနည်းငယ်တော့ ရှိလိမ့်မယ် ထင်တယ်။"

"ဒီလို ဝိညာဉ်သွေးကြောတစ်ခုက ဝိညာဉ်ချီ ဘယ်လောက်အထိ သိုလှောင်ထားနိုင်မလဲ မသိဘူးနော်။"

"အဲဒါကို ဘယ်သူက အသေအချာ တွက်ချက်နိုင်မှာလဲ။"

ဝေ့ဝူက တိုးတိုးလေး ရေရွတ်လိုက်သည်။

"အကယ်၍ ကျွန်တော်တို့က ဝိညာဉ်ချီအားလုံးကို စုဆောင်းလိုက်ရင်ဘယ်လောက်ရှိလဲဆိုတာ တွက်ချက်နိုင်မှာပေါ့။"

"ဒါက သက်ရှိ‌အကြောမှ မဟုတ်တာမင်းက ဘယ်လိုလုပ်ပြီး..."

ဤနေရာသို့ ရောက်သောအခါ ဘိုးဘေး ဝေ့ချွမ်ဟဲသည် ရုတ်တရက် စကားရပ်သွားခဲ့ပြီးနောက် မျက်လုံးများ ပြူးကျယ်သွားကာဝေ့ဝူကို လှမ်းကြည့်လိုက်သည်။

"ဝူအာ... မင်း ဆိုလိုတာက..."

"ဘဏ်ကတ်က ဝိညာဉ်သွေးကြောရဲ့ ဝိညာဉ်ချီတွေကို စုပ်ယူနိုင်တယ် မဟုတ်လား။"

ထိုလူနှစ်ဦးသည် ချက်ချင်းပင် မတ်တပ်ရပ်လိုက်ကြသည်။

"သွားကြစို့ဟဝိညာဉ်မျက်စိကို သွားရှာရအောင်။"

ဝိညာဉ်မျက်စိဟု ခေါ်ဆိုခြင်းမှာ ဝိညာဉ်သွေးကြောတစ်ခု၏ လှုပ်ရှားမှုအရှိဆုံး အစိတ်အပိုင်း ဖြစ်သည်။

ဝိညာဉ်သွေးကြောတစ်ခုတွင် ဝိညာဉ်မျက်စိ အများအပြား ရှိနိုင်ပြီး ၎င်းတို့ကို မြေပြင်ပေါ်တွင် သို့မဟုတ် မြေအောက်တွင် တွေ့ရှိနိုင်သည်။

သူတို့သည် တောင်ထွတ်တစ်ခုသို့ ရောက်ရှိလာခဲ့ကြပြီး ၎င်းမှာ မူလက ချိုးချန်ကျွင်းကျင့်ကြံခဲ့သော နေရာ ဖြစ်သည်။

သူတို့သည် တောင်ကုန်းတစ်ဝက်ခန့်တွင် ဂူတစ်ခုကို တွေ့ရှိခဲ့ကြသည်။ ထိုနေရာမှ ဝင်ရောက်ကာ အောက်ခြေအထိ လျှောက်လှမ်းသွားခဲ့ကြရာရေတွင်းနက်ကြီးတစ်ခုနှင့် တူသော မှောင်မည်းနေသည့် အပေါက်ကြီးတစ်ခုကို တွေ့လိုက်ရပြီး ၎င်း၏ တံခါးဝတွင် ဝိညာဉ်ဖုံးကွယ်ခြင်း အစီအရင်တစ်ခုကို တပ်ဆင်ထားခဲ့သည်။

"ဝိညာဉ်မျက်စိပဲ။"

ဘိုးဘေး ဝေ့ချွမ်ဟဲက ဝမ်းသာအားရ ပြောလိုက်သည်။

ဝေ့ဝူသည် ဝိညာဉ်ဖုံးကွယ်ခြင်း အစီအရင်အတွင်းသို့ ဝင်ရောက်လိုက်ရာ ခန့်ညားထည်ဝါလှသော ဝိညာဉ်ချီလှိုင်းလုံးကြီးတစ်ခုက သူ့ထံသို့ တိုးဝှေ့ဝင်ရောက်လာခဲ့သဖြင့် သူ၏ ခန္ဓာကိုယ်ရှိ ချွေးပေါက်တိုင်းမှာ အာဟာရဓာတ်များ ရရှိသွားသကဲ့သို့ ခံစားလိုက်ရသည်။

"ကျွန်တော် စမ်းကြည့်ပါရစေ။"

ဝေ့ဝူသည် ဘဏ်ကတ်ကို ထုတ်ယူကာ အသာအယာ ပစ်လွှတ်လိုက်ရာ ၎င်းမှာ ဝိညာဉ်မျက်စိ၏ အထက်တွင် ဝဲပျံနေခဲ့သည်။

"စုပ်ယူစမ်းးး"

ဝေ့ဝူသည် ဘဏ်ကတ်ကို အသက်သွင်းလိုက်ရာ ချက်ချင်းဆိုသလိုပင် သိပ်သည်းလှသော ဝိညာဉ်ချီများမှာ ၎င်းထံသို့ လုံးဝဥဿုံ စုပြုံစီးဝင်သွားခဲ့တော့သည်။

မျက်စိတစ်မှိတ်အတွင်းမှာပင် ဘဏ်ကတ်၏ ပတ်ဝန်းကျင်၌ ဝဲကရက်တစ်ခု ဖြစ်ပေါ်လာခဲ့ပြီး ဝိညာဉ်ချီများကို ပြင်းထန် စူးရှစွာဖြင့် စုပ်ယူလိုက်တော့သည်။

"တကယ်ကို အလုပ်ဖြစ်တာပဲ။"

ဝေ့ဝူ*နှင့် ဘိုးဘေးဝေ့ချွမ်ဟဲတို့နှစ်ဦးစလုံးမှာ အလွန်အမင်း ဝမ်းသာအားရ ဖြစ်သွားခဲ့ကြသည်။

"ဘိုးဘေး... ဘိုးဘေလည်း ဘဏ်ကတ်ကို ထုတ်ပြီး ဝိညာဉ်ချီတွေကို စုပ်ယူလိုက်ဦးလေ။"

"ကောင်းပြီ။"

ဘိုးဘေးဝေ့ချွမ်ဟဲသည် အနည်းငယ် စိတ်လှုပ်ရှားနေခဲ့ပြီး သူ၏ ဘဏ်ကတ်ကို အလျင်အမြန် ထုတ်ယူကာ ဝေ့ဝူကဲ့သို့ပင် ဝိညာဉ်ချီများကို စတင်စုပ်ယူတော့သည်။

များပြားလှသော ဝိညာဉ်ချီ ပမာဏကြီးမှာ ကူးခတ်နေသော နဂါးများကဲ့သို့ ဘဏ်ကတ်နှစ်ခုအတွင်းသို့ စီးဝင်သွားခဲ့ကြသည်။

ထို့အပြင် ဤဝိညာဉ်ချီမှာ ဝိညာဉ်ကြောတစ်ခုမှ လာခြင်း ဖြစ်သဖြင့် ၎င်းကို ထုတ်ယူရခြင်းမှာ ကျောက်တုံးများထံမှ ထုတ်ယူရသကဲ့သို့ နှေးကွေးခြင်း မရှိချေ။

ဝိညာဉ်ကြောတစ်ခု၏ ဝိညာဉ်ချီမှာ ကန်စွန်းဥများနှင့် အလားသဏ္ဌာန် တူညီပေသည်။ မိမိအနေဖြင့် ခံနိုင်ရည်ရှိသရွေ့ဟတိုတောင်းသော အချိန်ကာလအတွင်း များပြားလှသော ပမာဏကို သိမ်းဆည်းရယူနိုင်ပေသည်။

အချိန်များမှာ တရွေ့ရွေ့ ကုန်လွန်သွားခဲ့ပြီး သူတို့သည် ဆက်လက်၍ စုပ်ယူနေခဲ့ကြသည်။

၁၅ မိနစ်ခန့် ကြာပြီးနောက်တွင် စုပ်ယူမှုနှုန်းမှာ သိသိသာသာ နှေးကွေးသွားကြောင်း သူတို့ သတိပြုမိလိုက်ကြသည်။

နာရီဝက်ခန့် ကြာပြီးနောက်တွင်မူ ပို၍ပင် နှေးကွေးသွားခဲ့ရသည်။

၄၅ မိနစ်ခန့် ကြာပြီးသည့်အခါ၌မူ ဤနေရာရှိ ဝိညာဉ်ချီများမှာ အလွန်ပင် ပါးလွှာသွားခဲ့ချေပြီ။

ဘဏ်ကတ်များမှာလည်း ပြည့်လျှံသွားခဲ့ကြသည်။

"ဒီလောက်ဆို ရလောက်ပါပြီ။"

ဝေ့ဝူက ဆိုလိုက်သည်။

"ဘိုးဘေး.. ဘိုးဘေးရဲ့ ကတ်ထဲမှာ ဝိညာဉ်ချီ ဘယ်လောက်အထိ ရှိသွားပြီလဲ။"

ဘိုးဘေး ဝေ့ချွမ်ဟဲသည် သူ၏ စိတ်အာရုံကို ဘဏ်ကတ်အတွင်းသို့ ထည့်သွင်းကြည့်ရှုလိုက်သည်။

"ငါ ကြည့်လိုက်ဦးမယ်..."

"ကျောက်တုံး ရှစ်သောင်း (၈၀,၀၀၀) ခန့်နဲ့ အလားတူပဲ။"

ဝေ့ဝူသည်လည်း မိမိ၏ ဘဏ်ကတ်ကို စစ်ဆေးကြည့်လိုက်ရာ၊ ၎င်းမှာလည်း ထိုပမာဏနှင့် အတူတူပင် ဖြစ်နေခဲ့သည်။

ထို့ကြောင့် စုစုပေါင်း တစ်သိန်းခြောက်သောင်း (160,000) ရရှိခဲ့ခြင်း ဖြစ်ပေသည်။

အမှန်တကယ်တွင်မူ ဝိညာဉ်သွေးကြောတစ်ခု၏ အရေးကြီးဆုံးသော အချက်မှာ ရာစုနှစ်ပေါင်းများစွာ သို့မဟုတ် ထောင်စုနှစ်ပေါင်းများစွာတိုင်အောင် ဝိညာဉ်ချီများကို ရေရှည် ပံ့ပိုးပေးနိုင်စွမ်း ရှိခြင်းပင် ဖြစ်သည်။

အချိန်ကြာလာသည်နှင့်အမျှ စုဆောင်းမိလာသော အမှန်တကယ် ပံ့ပိုးပေးနိုင်သည့် ဝိညာဉ်ချီ ပမာဏမှာ ကြောက်မက်ဖွယ်ကောင်းသော ကိန်းဂဏန်းတစ်ခု ဖြစ်လာပေလိမ့်မည်။

ဥပမာအားဖြင့် ဟွမ်ထိုင်ဂိုဏ်း၏ ဤဝိညာဉ်သွေးကြောသည် ရာစုနှစ်ပေါင်းများစွာတိုင်အောင် ဟွမ်ထိုင်ဂိုဏ်းအတွက် ဝိညာဉ်ချီ ပေါင်း သန်းချီ၍ ပံ့ပိုးပေးခဲ့ဖူးမှာ သေချာသည်။

သို့သော်လည်း သူတို့အနေဖြင့် ဥဥသည့် ငန်းကို သတ်ပစ်လိုက်ခြင်းဖြစ်သဖြင့် သူတို့သည် ဝိညာဉ်ချီ ပမာဏအနည်းငယ်ကိုသာ တစ်ခါတည်း ရရှိလိုက်ကြခြင်း ဖြစ်သည်။

ဝေ့ဝူသည် ဝိညာဉ်မျက်စိကို လှမ်းကြည့်လိုက်ရာ ထိုနေရာတွင် ဝိညာဉ်ချီ အရိပ်အယောင် အနည်းငယ်သာ ပျံ့လွင့်နေတော့သည် ဖြစ်ရာ ဤဝိညာဉ်သွေးကြောမှာ ယခုအခါတွင် ပျက်စီးသွားခဲ့ချေပြီ။

အကယ်၍ ယခုအချိန်တွင် များပြားလှသော ဝိညာဉ်ချီများကို ၎င်းထံသို့ ပြန်လည် ထည့်သွင်းပေးလိုက်မည်ဆိုပါက ၎င်းကို ကယ်တင်နိုင်ကောင်း ကယ်တင်နိုင်ပေလိမ့်မည်။

သို့သော် အချိန်အတန်ကြာ ကုန်လွန်သွားပြီး ဝိညာဉ်သွေးကြော တည်ရှိမှု၏ အရိပ်အယောင်များ လုံးဝ ကွယ်ပျောက်သွားခဲ့ပြီးနောက်တွင်မူ များပြားလှသော ဝိညာဉ်ချီများ ရှိနေလျှင်ပင် ဝိညာဉ်သွေးကြောအသစ်တစ်ခုကို ထပ်မံ မွေးဖွားပေးနိုင်တော့မည် မဟုတ်ချေ။

ဤနေရာသည်လည်း တဖြည်းဖြည်းနှင့် ၎င်း၏ ဝိညာဉ်စွမ်းအားများ ဆုံးရှုံးသွားကာ သာမန်နေရာတစ်ခုအဖြစ်သို့ ပြောင်းလဲသွားပေလိမ့်မည်။ တောင်ပေါ်ရှိ သားရဲရိုင်းများသည် အခြားသော နေရာများကို ရှာဖွေသွားကြလိမ့်မည် ဖြစ်ပြီးတောင်ပေါ်ရှိ ဝိညာဉ်အပင်များသည် ညှိုးနွမ်းခြောက်သွေ့ကာ သေဆုံးသွားကြလိမ့်မည်။

ဝိညာဉ်စမ်းချောင်းများ ခန်းခြောက်သွားမည် ဖြစ်ပြီး ၎င်းသည် နောက်ဆုံးတွင် အလွန် သာမန်ဆန်လှသော တောင်ထွတ်တစ်ခုအဖြစ်သို့သာ ရောက်ရှိသွားတော့ပေလိမ့်မည်။