အခန်း ၁၀၈

အခန်း ၁၀၈ - အပြစ်ရှိစိတ်။

ဝေ့ဝူသည် ချွီရွှေမြို့တော်မှ ထွက်ခွာပြီးနောက် တောင်နက်ပိုင်းအတွင်းသို့ ဝင်ရောက်ကာ ဝမ်မင်းနှင့် ပထမဆုံးဆုံခဲ့သည့် နေရာသို့ ရောက်ရှိလာခဲ့သည်။ ထို့နောက် ဆီးနှင်းဝိညာဉ်မှိုထည့်ထားသည့် ဆေးသေတ္တာကို သစ်ပင်ကြီးတစ်ပင်အောက်တွင် မြေမြှုပ်ထားခဲ့လိုက်သည်။

အကယ်၍ ဝမ်မင်းသာ အသတ်ခံရလျှင်ပင် တစ်စုံတစ်ယောက်က ဤမှိုကို လာရောက်တူးဖော်ပြီး သူ့ကျင့်ကြံဖော်၏အသက်ကို ကယ်တင်နိုင်မည် ဖြစ်သည်။

ထို့နောက် ဝေ့ဝူသည် ကောင်းကင်ယံထက်သို့ မြင့်မားစွာ ပျံသန်းလိုက်ပြီး ချီရွှမ်မဟာမိတ်အဖွဲ့တည်ရှိရာ အရပ်မျက်နှာသို့ ဦးတည်လိုက်တော့သည်။

လေလံပွဲမှ ပိုလျှံလာခဲ့သည့် ဝိညာဉ်ကျောက်တုံး လေးထောင်ကိုမူ ဝေ့ဝူပြန်လည်သိမ်းဆည်းရန် မရည်ရွယ်ခဲ့ချေ။ အကြောင်းမှာ နောက်ရက်အနည်းငယ်အတွင်း ဝမ်မင်းသည် အခြားသူများ၏ စောင့်ကြည့်ခြင်းကို ခံရနိုင်သောကြောင့် ဖြစ်သည်။

တစ်ဖက်တွင်မူ ချွီရွှေမြို့တော်အတွင်း၌ ထိုလူစုသည် ဝမ်မင်းနောက်သို့ တစ်ညလုံး လိုက်လံစောင့်ကြည့်ခဲ့ကြပြီးနောက် နောက်ထပ် မအောင့်အီးနိုင်တော့ဘဲ ဆိတ်ငြိမ်သောနေရာတစ်ခုတွင် သူ့ကို ပိတ်ဆို့တားဆီးလိုက်ကြတော့သည်။

ဝမ်မင်းသည်လည်း ချက်ချင်းပင် ဆုံးဖြတ်ချက်ချကာ မိမိထံတွင် ဝိညာဉ်ပိတ်လှောင်ခြင်း အစီအရင် မရှိကြောင်း သက်သေပြရန် သူ၏သိုလှောင်အိတ်ကို ထုတ်ပြလိုက်ပြီး မိမိအသက်ကို ကယ်တင်ရန်အတွက် ဝိညာဉ်ကျောက်တုံး လေးထောင်ကိုပါ လိုလိုလားလား ပေးအပ်လိုက်သည်။

ထိုအခါမှသာ ထိုလူစုသည် တစ်ညလုံးပတ်လုံး ဝိညာဉ်ပိတ်လှောင်ခြင်း အစီအရင်ကို အခြားတစ်စုံတစ်ယောက်က သူတို့မသိလိုက်ဘဲ ကြားဖြတ်လုယူသွားခဲ့ခြင်း ဖြစ်ကြောင်း သဘောပေါက်သွားကြတော့သည်။

သူတို့သည် တစ်ညလုံး ဝမ်မင်းကို စိုက်ကြည့်နေခဲ့ခြင်းဖြစ်ရာ ထိုပစ္စည်းက မည်သည့်အချိန်တွင် အခိုးခံလိုက်ရသလဲဆိုသည်ကို အလွန်ပင် ဇဝေဇဝါ ဖြစ်သွားခဲ့ရသည်။

သို့သော်လည်းဝမ်မင်းသည် တစ်ညလုံး နေရာအနှံ့ လျှောက်သွားခဲ့ခြင်း ဖြစ်သဖြင့် သေချာပြန်စဉ်းစားကြည့်လျှင် ထိုသို့လက်လှည့်ကွက်သုံးရန် အခွင့်အရေးများစွာ ရှိနေခဲ့သည်ပင်။

"ထားလိုက်ပါတော့... ထားလိုက်ပါတော့..."

"ငါတို့တွေ တစ်စုံတစ်ယောက်ရဲ့ ကစားတာကို ခံလိုက်ရလိမ့်မယ်လို့ မထင်ထားမိဘူးပဲ။"

သူသည် ဝမ်မင်းမှာ ချီသန့်စင််ခြင်းအဆင့်မျှသာ ရှိသည်ကို မြင်သဖြင့် စူးစမ်းလိုစိတ်ဖြင့် လူလွှတ်ကာ နောက်ယောင်ခံခိုင်းခဲ့ခြင်း ဖြစ်ပြီး ယခုအခါ ပစ္စည်းမရှိတော့သဖြင့် ဆက်လက်၍ အရေးမလုပ်တော့ချေ။

ဝမ်မင်းသည်လည်း ယခုအခါ ဝိညာဉ်ကျောက်တုံးများ ပေါ်သွားခဲ့ပြီဖြစ်ရာ ၎င်းတို့ကို ဆက်လက်သိမ်းဆည်းထားပါက သေဘေးကိုသာ ဖိတ်ခေါ်ရာရောက်လိမ့်မည် ဖြစ်ကြောင်း ကောင်းစွာနားလည်ပေသည်။

ထို့ကြောင့် သူသည် လူအများရှေ့မှောက်တွင်ပင် ဝိညာဉ်ကျောက်တုံး လေးထောင်ကို ပစ်ချပေးလိုက်ပြီး မိမိကို ထွက်ခွာခွင့်ပြုရန် တောင်းပန်လိုက်သည်။

ကျန်ရှိသောလူများကလည်း သူ့ကို ဆက်လက်၍ ဒုက္ခမပေးကြတော့ချေ။ သူတို့သည် ဝမ်မင်းမှာလည်း အသုံးချခံလိုက်ရခြင်း ဖြစ်ကြောင်း သိရှိကြသဖြင့် သူ့ထံမှ ဘာမှထွက်လာမည်မဟုတ်ကြောင်း သိကာ ဝိညာဉ်ကျောက်တုံးများကိုသာ အလျင်အမြန် ခွဲဝေယူလိုက်ကြတော့သည်။

ဘေးကင်းရာသို့ ထွက်ပြေးလွတ်မြောက်လာပြီးနောက်ဝမ်မင်းသည် သေဘေးမှ သီသီလေးလွတ်မြောက်လာခဲ့သည့် စိတ်လှုပ်ရှားမှုနှင့်အတူ သက်ပြင်းအရှည်ကြီးတစ်ချက် ချလိုက်မိသည်။

သူသည် မြို့အတွင်း၌ ရက်အနည်းငယ်မျှ အခြေအနေစောင့်ကြည့်နေထိုင်ပြီးမှသာ တောင်ပေါ်သို့ တက်ရောက်၍ ဆီးနှင်းဝိညာဉ်မှိုကို ပြန်လည်တူးဖော်ခဲ့သည်။

နောက်တစ်ဆင့်အနေဖြင့် သူသည် သူ၏ကျင့်ကြံဖော်၏အသက်ကို ကယ်တင်ရန် ဆေးဖော်စပ်ပေးနိုင်မည့် အဂ္ဂိရတ်ပညာရှင်တစ်ဦးကို ရှာဖွေရပေဦးမည်။

ချီရွှမ်မဟာမိတ်အဖွဲ့သည် ရှန်ထုမိသားစုနှင့် နီးကပ်စွာ တည်ရှိနေသည်။ ဝေ့ဝူသည် နာရီအနည်းငယ်မျှ ပျံသန်းပြီးနောက် လမင်းမူးယစ်မြို့တော်သို့ ရောက်ရှိလာခဲ့သည်။

ဤမြို့တော်မှာ အိပ်မက်အရိပ်မျှော်စင် ၏ အုပ်ချုပ်မှုအောက်တွင် ရှိပြီး အဓိကအားဖြင့် အပန်းဖြေနားနေစရာ နေရာတစ်ခု ဖြစ်ပေရာ စားသောက်ဆိုင်များမှသည် ပြည့်တန်ဆာအိမ်များအထိ အစားအသောက် အသောက်အစားနှင့် ဖျော်ဖြေရေးစုံလင်စွာ ရှိနေခဲ့သည်။

သူသည် မိုဘိုင်းဖုန်းအတွင်းမှ ဗီဒီယိုဖိုင်ကို ရုပ်ပုံမှတ်တမ်းတင် ကျောက်စိမ်းတုံးများအတွင်းသို့ ကူးယူထားပြီး ဖြစ်သည်။

မတော်တဆမှုတစ်ခုခု ဖြစ်ပွားခြင်းမှ ကာကွယ်ရန်အတွက် စုစုပေါင်း ငါးစုံအထိ ကူးယူထားခဲ့ခြင်း ဖြစ်သည်။

ယခုတစ်ကြိမ်တွင်လည်း သူသည် မိမိ၏ အထောက်အထားကို လုံးဝ အသိမခံရဲချေ။

အကယ်၍ လူအများက ဤဗီဒီယိုဖိုင်ကို ပေါက်ကြားစေသူမှာ သူဖြစ်ကြောင်း သိရှိသွားကြပါက သွေးမြစ်ဂိုဏ်းနှင့် ကျိုးမိသားစုတို့သည် သူ့ကို အရိုးပါမကျန် ကြိတ်ခြေပစ်ကြလိမ့်မည် ဖြစ်ပြီး ထုံယွမ်ဂိုဏ်းကပင် သူ့ကို အသေသတ်ချင်နေပေလိမ့်မည်။

သူသည် ယခင်က ဤအရာမှတစ်ဆင့် ငွေအနည်းငယ် ရှာဖွေရန် ရည်ရွယ်ခဲ့သော်လည်း ယခုအခါတွင်မူ ထိုစိတ်ကူးကို လက်လျှော့လိုက်ပြီ ဖြစ်သည်။

မည်သို့လုပ်ဆောင်ရမည်နည်းဆိုသည်ကိုမူ ဝေ့ဝူသည် သူ၏ လှည့်ကွက်ဟောင်းကိုပင် ထပ်မံအသုံးပြုရန် ဆုံးဖြတ်လိုက်သည်။

ယခုအချိန်သည် ပိုင်မိသားစုနှင့် ဆုံတွေ့ခဲ့ပြီးနောက် စတုတ္ထမြောက်နေ့ဖြစ်သည့် ရှင်းမောက်နေ့၏ မွန်းလွဲပိုင်းအချိန်သို့ ရောက်ရှိနေပြီ ဖြစ်ရာ မနက်ဖြန်ဆိုလျှင် ရန်ချန်နေ့သို့ ရောက်ရှိတော့မည် ဖြစ်သည်။

ယခုတစ်ကြိမ်တွင်မူ သူ့အတွက် ကိစ္စရပ်များကို လုပ်ဆောင်ပေးမည့်သူမှာ ဝမ်မင်းထက်ပင် ပိုမို၍ အန္တရာယ်များနိုင်ချေ ရှိသဖြင့် သူသည် လူဆိုးတစ်ယောက်ကိုသာ အတတ်နိုင်ဆုံး ရှာဖွေခဲ့သည်။

ထို့ကြောင့် သူသည် ဓားပြဂိုဏ်းတစ်ခု၏ စခန်းကို ရှာဖွေလိုက်ပြီး ၎င်းတို့၏ ခေါင်းဆောင်ကို ဆွဲထုတ်လာခဲ့တော့သည်။

ဝေ့ဝူသည် ထိုသူ့ထံသို့ သေတ္တာတစ်ခုအတွင်း ထည့်ထားသည့် ရုပ်ပုံမှတ်တမ်းတင် ကျောက်စိမ်းတစ်တုံးကို ပေးအပ်လိုက်သည်။

သေတ္တာပေါ်တွင် တားမြစ်ချက်အစီအရင်တစ်ခုကို ကြိုတင်ပြုလုပ်ထားပြီး ဖြစ်ရာ ချီသန့်စင်ခြင်းအဆင့် ၇ မျှသာရှိသော ဤဓားပြခေါင်းဆောင်အနေဖြင့် ၎င်းကို လုံးဝ ဖွင့်လှစ်နိုင်မည် မဟုတ်ချေ။

၎င်းပြင် အိပ်မက်အရိပ်မျှော်စင်က သူ၏ဝိညာဉ်စွမ်းအင် အရှိန်အဝါကို သိရှိသွားမည်ကို ကာကွယ်ရန်အတွက် သူသည် ဝိညာဉ်စွမ်းအင် တားမြစ်ချက်ကို မသုံးဘဲ သေးငယ်သော အစီအရင်တစ်ခုကိုသာ အသုံးပြုထားခဲ့သည်။

ထို့နောက် ထိုသူ၏ ရှေ့မှောက်တွင်ပင် ဝေ့ဝူသည် မန္တန်စက္ကူတစ်ခုကို မီးရှို့လိုက်သည်။

"ငါ မင်းအပေါ်မှာ ယင်ယန်အသက်နှုတ်ကျိန်စာကို တိုက်ကျွေးထားပြီးပြီ။ အကယ်၍ မင်း တစ်ခုခု လှည့်စားဖို့ ကြိုးစားရင် မင်း ချက်ချင်းပဲ အသက်ပျောက်သွားလိမ့်မယ်။"

ထိုသူမှာ အသက်ဝိညာဉ်ပါ လွင့်မတတ် ထိတ်လန့်သွားခဲ့ရပြီး မြေပြင်ပေါ်တွင် တဒုန်းဒုန်းနှင့် အကြိမ်ကြိမ် ဒူးထောက်အရိုအသေပြုတော့သည်။

အစစ်အမှန်တွင်မူ သူ၏ထံ၌ မည်သည့် ယင်ယန်အသက်နှုတ်ကျိန်စာမျှ မရှိချေ။ ထိုသူကို လှည့်စားလိုက်ခြင်းသာ ဖြစ်သည်။

နောက်တစ်ဆင့်အနေဖြင့်ဝေ့ဝူသည် ထိုသူ့ကို လမင်းယစ်မူးမြို့တော်သို့ သွားရောက်ရန် ခိုင်းစေလိုက်သည်။

သူသည် ထုံးစံအတိုင်း နောက်ကွယ်မှ နေ၍ လိုက်ပါစောင့်ကြည့်ခဲ့သည်။ ထိုသူသည် လမင်းယစ်မူးမြို့တော်ဘက်သို့ ဦးတည်သွားနေကြောင်း အတည်ပြုနိုင်ပြီးသည့်နောက်တွင်မှ သူသည် မိမိ၏မျက်နှာဖုံးကို ချွတ်လိုက်ကာ အရှိန်မြှင့်၍ မြို့အတွင်းသို့ ကြိုတင်ကာ တိတ်တဆိတ် ဝင်ရောက်နှင့်ခဲ့လိုက်တော့သည်။

ထို့နောက် သူသည် အိပ်မက်အရိပ်မျှော်စင်၏ အနီးအနားသို့ ရောက်ရှိလာခဲ့သည်။ အတန်ကြာပြီးနောက် ထိုဓားပြခေါင်းဆောင် ပေါ်လာပြီး အိပ်မက်အရိပ်မျှော်စင်အတွင်းသို့ ဝင်ရောက်သွားသည်ကို မြင်တွေ့လိုက်ရသည့် အခါမှသာ သူ၏စိတ်မှာ လုံးဝ သက်သာရာရသွားခဲ့တော့သည်။

"နောက်တစ်ဆင့်ကတော့... ထိုင်ပြီး ပွဲကြည့်ရုံပဲ။ တစ်ရက်ဆိုတဲ့ အချိန်က အိပ်မက်အရိပ်မျှော်စင်အတွက် ရုပ်ပုံမှတ်တမ်းတင် ကျောက်စိမ်းတွေကို အမြောက်အမြား ကူးယူပြီး ရောင်းချဖို့ လုံလောက်တဲ့ အချိန်ပဲ။"

ဝေ့ဝူသည် အလွန် စိတ်ရွှင်လန်းနေခဲ့ပြီး ဤနေရာရှိ စားသောက်ဆိုင်တစ်ဆိုင်ကို ရှာဖွေကာ အစားအသောက် စားသောက်နေခဲ့သည်။

ကမ္ဘာမြေပေါ်ကထက်ပင် ပိုမို၍ အရသာရှိလှသော အစားအစာများကို စားသောက်ရသည်မှာ ခဲယဉ်းလှပေသည်။ ၎င်းတို့အားလုံးကို မိစ္ဆာသားရဲများနှင့် ဝိညာဉ်အပင်များဖြင့် ပြုလုပ်ထားခြင်း ဖြစ်ရာ ကျင့်ကြံခြင်းအတွက်လည်း များစွာ အထောက်အကူပြုပေသည်။

"လမင်းယစ်မူးမြို့တော်က တကယ့်ကို အပန်းဖြေဖို့ အကောင်းဆုံးနေရာပါပဲ။"

လမ်းမပေါ်တွင် လျှောက်လှမ်းနေကြသော အမျိုးသားအမျိုးသမီးများပင်လျှင် အခြားသော နေရာများထက် ပိုမို၍ ညို့ဓာတ်ပြင်းကြသည်မှာ ထင်ရှားလှပေသည်။

ဝေ့ဝူ၏ လက်ထဲတွင် ရှိနေသော ဗီဒီယိုဖိုင်မှာ အလွန်ပင် အရောင်းသွက်မည့် ကုန်ပစ္စည်းတစ်ခု ဖြစ်သည်။

ဤကဲ့သို့သော ရုပ်ပုံများကို ရောင်းချခြင်းမှာ အိပ်မက်အရိပ်မျှော်စင်၏ အရေးကြီးလှသော ဝင်ငွေအရင်းအမြစ်များထဲမှ တစ်ခု ဖြစ်ပြီး သူတို့သည် ၎င်းတို့အတွက် ခိုးယူကူးယူခြင်း ကာကွယ်ရေးစနစ်များကိုပင် အထူးတလည် သုတေသနပြုလုပ်ထားကြသည်။

၎င်းပြင် အရောင်းရဆုံးသော အရာများမှာ အချို့သော အစွမ်းထက် အင်အားစုကြီးများမှ တပည့်များ၏ ရုပ်ပုံမှတ်တမ်းများ ဖြစ်ကြသည်။ အမျိုးသားရော အမျိုးသမီးပါ ဈေးကွက်ရှိကြပေသည်။

ထုံယွမ်ဂိုဏ်းကဲ့သို့သော အင်အားစုကြီးတစ်ခုအတွက်မူ ၎င်း၏ ကျော်ကြားမှု အရှိန်အဝါကြောင့်ပင် ကြည့်ရှုမည့် ပရိသတ်နယ်ပယ်မှာ ပိုမို၍ ကျယ်ပြန့်လှပေရာ ချင်းလုံဂိုဏ်းနယ်မြေတစ်ခုလုံးရှိ လူများအားလုံးက သူမ၏ အလှအပကို တစ်ချက်မက လှမ်း၍ ရှုစားချင်ကြမည်မှာ သေချာလှပေသည်။

သို့သော်လည်း ပိုမိုအစွမ်းထက်သော ဂိုဏ်းများမှ တပည့်များ၏ ရုပ်ပုံများကို ရရှိရန်မှာ အလွန်ခက်ခဲလှသည် ဖြစ်ရာ ယွီချန့်ယန်ကဲ့သို့သော အရေးပါသည့် ပုဂ္ဂိုလ်တစ်ဦး၏ အရာဆိုလျှင်မူ ပြောနေရန်ပင် မလိုတော့ချေ။

ထို့ကြောင့်အိပ်မက်အရိပ်မျှော်စင်အနေဖြင့် ယွီချန့်ယန်၏ ရုပ်ပုံမှတ်တမ်းကို အလွန်အမင်း အရေးတကြီး သတ်မှတ်ကြမည်မှာ ဧကန်မသွေ ဖြစ်သည်။

ပြောရလျှင်မူ အိပ်မက်အရိပ်မျှော်စင်မှ လူများသည် ၎င်း၏ အကြောင်းအရာကို မြင်လိုက်ရသည်နှင့် တစ်ပြိုင်နက် ချက်ချင်းပင် ထုတ်လုပ်မှုများကို စတင်ရန် အလွန်အမင်း စိတ်အားထက်သန်သွားကြလိမ့်မည် ဖြစ်သည်။

ဝေ့ဝူခန့်မှန်းထားခဲ့သည့်အတိုင်းပင် အိပ်မက်အရိပ်မျှော်စင်မှ လူများသည် သေတ္တာကို ဖွင့်လှစ်ပြီး ရုပ်ပုံမှတ်တမ်းတင် ကျောက်စိမ်းကို စစ်ဆေးကြည့်လိုက်ကြသည့်အခါချက်ချင်းပင် လူစုတစ်စုကို စုစည်းကာ အရေးပေါ် ဆွေးနွေးပွဲ ပြုလုပ်ခဲ့ကြသည်။

"ဒီဗီဒီယိုနဲ့ဆိုရင် ငါတို့တွေ မိုးပေါ်ကကျတဲ့ အမြောက်အမြားရှိလှတဲ့ ဝင်ငွေတွေကို ဖန်တီးနိုင်လိမ့်မယ်။"

၎င်းပြင် ဤကုန်ပစ္စည်းကို လာရောက်ပေးအပ်သူမှာ ၎င်း၏ အထောက်အထားကို ပေါ်ပေါက်ရန် မလိုလားကြောင်း ထင်ရှားလှသဖြင့် သူတို့အနေဖြင့် မည်သူ့ကိုမျှ အကျိုးအမြတ် ခွဲဝေပေးရန်လည်း မလိုချေ။

ဒါက ကောင်းကင်က ပေးတဲ့ လာဘ်လာဘကြီးပဲ။

ထို့ကြောင့် အိပ်မက်အရိပ်မျှော်စင်၏ ဒုတိယအဆင့် ဗဟိုမျှော်စင်သည် အရေးပေါ် ဆုံးဖြတ်ချက်တစ်ခု ချမှတ်လိုက်ပြီး အခြားသော မန္တန်သရုပ်ပြချက်များ စွန့်စားခန်းနည်းလမ်းများနှင့် မိစ္ဆာသားရဲ အရသာစုံ အစရှိသည့် ရုပ်ပုံမှတ်တမ်းတင်ခြင်း အားလုံးကို ယာယီရပ်ဆိုင်းထားလိုက်ကာ သိုလှောင်ရုံအတွင်းရှိ ရုပ်ပုံမှတ်တမ်းတင် ကျောက်စိမ်းအားလုံးကို ယွီချန့်ယန်၏ ရုပ်ပုံများ ကူးယူရန်အတွက်သာ အသုံးပြုရန်နှင့် နည်းပညာဝန်ထမ်း အားလုံးကိုလည်း ဤလုပ်ငန်းစဉ်အတွင်း၌ ပါဝင်ခိုင်းလိုက်တော့သည်။

အိပ်မက်အရိပ်မျှော်စင်၏ လုပ်ဆောင်နိုင်စွမ်းမှာ ချက်ချင်းပင် အမြင့်ဆုံးသို့ ရောက်ရှိသွားခဲ့ပြီးတစ်ညတာအတွင်းမှာပင် အချပ်ရေ သောင်းနဲ့ချီ၍ ကူးယူနိုင်ခဲ့ကြချေပြီ။

၎င်းပြင် အရေအတွက်မှာလည်း ဆက်တိုက် တိုးပွားနေဆဲ ဖြစ်သည်။

ထို့အပြင်သူတို့သည် အခြားသော ဌာနခွဲများတွင်လည်း အလျင်အမြန်ပင် ကူးယူမှတ်တမ်းတင်နိုင်ကြစေရန်အတွက် အရေးပေါ် ပို့ဆောင်ရေးစနစ်များဖြင့် ကုန်ကြမ်းများကို ပေးပို့ခဲ့ကြသေးသည်။

ချင်းလုံဂိုဏ်း နယ်မြေတစ်ခုလုံးတွင် ကြီးမားလှသော လှုပ်ခတ်မှုကြီးတစ်ခု ဖြစ်ပေါ်ရန် အရှိန်အဟုန်များ ပြင်ဆင်နေခဲ့ပြီ ဖြစ်သည်။

ဤအချိန်တွင်မူ ဝေ့ဝူသည် အိမ်အပြန်လမ်းသို့ ရောက်ရှိနေခဲ့ပြီ ဖြစ်သည်။

သူ လုပ်ဆောင်ရန် လိုအပ်သမျှသော အရာများအားလုံး ပြီးမြောက်သွားခဲ့ပြီ ဖြစ်သည်။ နောက်တစ်ဆင့်အနေဖြင့်မူ ပိုင်မိသားစုသည် အကြပ်အတည်းကို ဖြေရှင်းနိုင်မည့် နည်းလမ်းကို ရရှိသွားကြလိမ့်မည် ဖြစ်ပြီးဝေ့မိသားစု၏ နောက်ကွယ်တွင် သူတို့ကို အမည်ခံ အကာအကွယ်ပေးထားသည့် လျှို့ဝှက်ဆန်းကြယ်သော အင်အားစုကြီးရှိနေကြောင်းကိုလည်း အခိုင်အမာ ယုံကြည်သွားကြတော့မည် ဖြစ်သည်။

သူတို့အနေဖြင့်လည်း ကာလတစ်ခုအထိ ပေါ်ပေါ်ထင်ထင် ဖွံ့ဖြိုးတိုးတက်အောင် လုပ်ဆောင်နိုင်ကြတော့မည် ဖြစ်သည်။

ဝိညာဉ်သွေးကြောများ ပေါက်စီများ၊ လျှို့ဝှက်ဆန်းကြယ်လှသော ဆေးလိပ်များ၊ ရိုလက်စ်နာရီများနှင့် ကလေးပုံပြစာအုပ်များပင်သူတို့၏ အခန်းကဏ္ဍများကို စတင်၍ ပါဝင်ပြသရမည့် အချိန်သို့ ရောက်ရှိလာခဲ့ပြီ ဖြစ်သည်။

သဘာဝကျကျပင် ဤအရာများအပြင် ဝေ့ဝူ၏ နှလုံးသားအတွင်း၌ အပြစ်ရှိစိတ်တစ်ခုတော့ ရှိနေခဲ့ဆဲပင်။

ယခင်က ထျန်ရှင်းတောင်ဂူများအတွင်း၌ ရှိနေစဉ်အတွင်းသူသည် မိမိ၏ မိသားစုဝင်များ၏ စွန့်လွှတ်အနစ်နာခံမှုများကို သိရှိခဲ့ရသဖြင့် အလွန်အမင်း ဒေါသထွက်နေသော အခြေအနေအတွင်း၌ ဤဗီဒီယိုဖိုင်ကို ရိုက်ကူးခဲ့ခြင်း ဖြစ်သည်။

သူ ယခု လုပ်ဆောင်နေသောအရာမှာ ကမ္ဘာမြေပေါ်ရှိ လူသားတိုင်း ကဲ့ရဲ့ရှုတ်ချကြမည့် အရာမျိုး ဖြစ်ပေရာ အကယ်၍ အခြေအနေများကသာ ဖိအားမပေးခဲ့လျှင် သူသည် ဤကဲ့သို့သော အောက်တန်းကျလှသည့် လှည့်ကွက်မျိုးကို လုံးဝ အသုံးပြုချင်ခဲ့မည် မဟုတ်ချေ။

ဤကဲ့သို့သော ရုပ်ပုံမျိုးစုံမှာ ကျင့်ကြံခြင်းလောက အတွင်း၌ သာမန်ကာလျှံကာ ဖြစ်ရိုးဖြစ်စဉ် သဘာဝတရားတစ်ခုမျှသာ ဖြစ်သော်လည်း သူသည် ငယ်စဉ်ကတည်းက ကမ္ဘာမြေ၏ ပညာရေးကို ရရှိခဲ့သူဖြစ်ရာ သူ၏နှလုံးသားအတွင်း၌ မိမိကိုယ်ကို ပြန်လည်အပြစ်တင်နေမိခြင်းမှာ ရှောင်လွှဲ၍ မရနိုင်ချေ။

ဝေ့ဝူသည် အကျင့်စာရိတ္တပိုင်းဆိုင်ရာ အတွေးအမြင်များမှ ရုန်းထွက်နိုင်ရန် သူ၏ခေါင်းကို ခါယမ်းလိုက်ရင်း အိမ်အပြန်လမ်းသို့ အရှိန်မြှင့်၍ ထွက်ခွာခဲ့တော့သည်။

(မှတ်ချက် - ဤအကြောင်းအရာမှာ ဇာတ်ကွက်လိုအပ်ချက်အရ ရေးသားထားခြင်းသာ ဖြစ်သဖြင့် အလေးအနက် မထားကြပါရန် မေတ္တာရပ်ခံအပ်ပါသည်။)