အခန်း ၁

အခန်း (၁) SSS အဆင့် ပင်ကိုစွမ်းရည်၊ အကန့်အသတ်မဲ့ အဆင့်မြှင့်တင်ခြင်း

"သင့်၏ ထူးကဲသော အရိုးတည်ဆောက်ပုံနှင့် ပြိုင်ဘက်ကင်း ပင်ကိုစွမ်းရည်ကို ထောက်လှမ်းတွေ့ရှိပါသည်"

"ဂုဏ်ယူပါသည်... သင်သည် နတ်ဘုရားနှင့်မိစ္ဆာကမ္ဘာ ၏ ကစားသမားအဖြစ် ရွေးချယ်ခံရပါသည်"

"သတိပြုရန်... နတ်ဘုရားနှင့်မိစ္ဆာကမ္ဘာသည် ကစားသမား သန်း ၁၀၀ ရှိသည့် အစစ်အမှန်ကမ္ဘာတစ်ခု ဖြစ်သည်... ယခု စတင်ပို့ဆောင်ပါမည်"

အတန်းတက်နေသော ကျိုးဟန်၏ ခေါင်းထဲတွင် အကြောင်းအရင်းမရှိဘဲ အီလက်ထရောနစ် အချက်ပြသံတစ်ခု ထွက်ပေါ်လာသည်။

သူ သတိမဝင်လာသေးခင်မှာပင် အဖြူရောင်အလင်းတန်းတစ်ခုက သူ့ကို လွှမ်းခြုံသွားခဲ့သည်။

စာသင်ခန်းထဲမှ သူ ရုတ်တရက် ပျောက်ကွယ်သွားမှုကြောင့် ဘေးနားရှိ အတန်းဖော်များအားလုံး ကြက်သေ သေသွားကြသည်။

ကျိုးဟန် ဖြည်းညှင်းစွာ မျက်လုံးဖွင့်လိုက်ချိန်တွင် သူသည် ရှေးဟောင်းမြို့တော်တစ်ခုထဲသို့ ရောက်ရှိနေကြောင်း တွေ့လိုက်ရသည်။

လမ်းမပေါ်တွင် လက်နက်အပြည့်အစုံ တပ်ဆင်ထားသော စစ်သားများက ကင်းလှည့်နေကြပြီး သူတို့ထံမှ သတ်ဖြတ်လိုသော အငွေ့အသက်များ ထွက်ပေါ်နေသဖြင့် စစ်ပွဲများကို ဖြတ်သန်းထားရသူများဖြစ်ကြောင်း သိသာလှသည်။

မြို့ပြင်မှနေ၍ ကြောက်မက်ဖွယ် သားရဲကြီးများ၏ ဟိန်းဟောက်သံများ ဆက်တိုက်ထွက်ပေါ်နေခြင်းက ဤကမ္ဘာကြီးသည် အလွန်အန္တရာယ်များကြောင်း သက်သေပြနေသည်။

"တောက်... ဒါကတော့ လွန်လွန်းနေပြီ"

ကျိုးဟန်မှာ ပြောစရာစကားပင် မရှိတော့ပေ။

ကျောင်းသားတစ်ယောက်ဖြစ်ပြီး လောကဓံကိုပင် မကြုံဖူးသေးသော သူက ပို၍အန္တရာယ်များသော အခြားကမ္ဘာတစ်ခုဆီသို့ အတင်းအကျပ် ခေါ်ဆောင်ခံလိုက်ရသဖြင့် ဖိအားတွေ အလွန်ကြီးမားနေသည်။

"ဒေသတွင်း ကြေညာချက်... သင်တို့ လက်ရှိရောက်ရှိနေသော နေရာသည် နယ်မြေအမှတ် ၆၆၆ ဖြစ်သည့် ချန်းလဲ့မြို့ ဖြစ်ပြီး ကစားသမား အရေအတွက် ၁ သိန်း ရှိပါသည်"

"ကစားသမားအားလုံးကို ပို့ဆောင်ပြီးပါပြီ... အထောက်အကူပြုစနစ်ကို တရားဝင် စတင်လိုက်ပြီဖြစ်ပြီး ဤစနစ်သည် နတ်ဘုရားနှင့်မိစ္ဆာကမ္ဘာအား တိုက်ခိုက်သိမ်းပိုက်ရာတွင် သင်တို့နှင့်အတူ ပါဝင်သွားမည် ဖြစ်ပါသည်"

"သတိပေးချက်... စိတ်ဆန္ဒ သို့မဟုတ် အသံကို အသုံးပြု၍ အထောက်အကူပြုစနစ်ထံ ညွှန်ကြားချက်များ ပေးပို့နိုင်ပါသည်"

အချက်ပြသံနှင့်အတူ ကျိုးဟန်၏ ခေါင်းထဲတွင် စနစ်ဖန်သားပြင်တစ်ခု ပေါ်လာပြီး ၎င်းပေါ်တွင် စကားပြောချန်နယ်၊ အရောင်းအဝယ်ဇုန် နှင့် ကိုယ်ရေးအချက်အလက် စသည့် အပိုင်းများစွာ ပါဝင်သည်။

"စကား​ပြောချန်နယ်ကို ဖွင့်ပါ"

ကျိုးဟန်က စမ်းသပ်သည့်အနေဖြင့် စိတ်ထဲမှ ရေရွတ်လိုက်သည်။

မကြာမီ မြင်ကွင်းပြောင်းသွားပြီး သူ့ရှေ့တွင် စကားပြောချန်နယ် စခရင်တစ်ခု ပေါ်လာသည်။

ထိုစခရင်မှာ 3D ပုံရိပ်ယောင်ဖန်သားပြင်တစ်ခုနှင့် ဆင်တူနေသည်။ ဤအထောက်အကူပြုစနစ်မှာ တကယ်ပင် ဉာဏ်ရည်မြင့်မားပြီး စိတ်ဆန္ဒဖြင့် ညွှန်ကြားချက်များ ပေးနိုင်သဖြင့် အလွန်အဆင်ပြေလှသည်။

ကျိုးဟန်သည် အခြေအနေကို လေ့လာရန် စကားပြောချန်နယ်ထဲသို့ ဝင်လိုက်သည်။

လက်ရှိတွင် သူ နားလည်မှုလွဲနေဆဲဖြစ်ရာ အသုံးဝင်မည့် အချက်အလက်များ ရနိုင်မလားဟု ကြည့်လိုက်ခြင်း ဖြစ်သည်။

လူတိုင်းက အပြင်းအထန် ဆွေးနွေးနေကြပြီး မဖတ်ရသေးသော မက်ဆေ့ချ် ၉၉၉+ ရှိနေသည်။

"ဒါက ဘယ်လို ငရဲမျိုးလဲ... ငါ ပြန်ချင်တယ်... ငါ့ကို ဆက်ခံဖို့ စောင့်နေတဲ့ ကုဋေချီတဲ့ ပိုင်ဆိုင်မှုတွေ ရှိသေးတယ်ကွ"

"အမလေး ကြောက်စရာကြီး... ခုလေးတင် မြို့ပြင်မှာ ဆင်လောက်ကြီးတဲ့ မီးမှုတ်နိုင်တဲ့ ဝံပုလွေတစ်ကောင်ကို ငါတွေ့ခဲ့တယ်"

"မင်း ငါ့ကို မခြောက်ပါနဲ့... အဲဒီလောက်တောင် ကြောက်စရာကောင်းတာလား... ငါ မသေချင်သေးဘူး... အမေ ကျွန်တော် အိမ်ပြန်ချင်တယ်... အသက် ၄၀ ပြည့်တဲ့အထိ ရည်းစားတောင် မထားရသေးဘူး​ဗျ"

"ဘာလို့ ပြန်သွားရမှာလဲ... ၉၉၆ အလုပ်သမားဘဝနဲ့ ဆက်ပြီး ကျေးကျွန်ခံဖို့ ပြန်သွားကြမှာလား"

"ငါ ခုလေးတင် မြို့ထဲက ဒေသခံတစ်ယောက်နဲ့ စကားပြောကြည့်လိုက်တယ်"

"နတ်ဘုရားနဲ့မိစ္ဆာကမ္ဘာမှာ ကံတရားသာ ကောင်းမယ်ဆိုရင် နတ်ဘုရားတစ်ပါးတောင် ဖြစ်လာနိုင်တယ်လို့ ကြားတယ်... ဘုရင်တွေ စစ်သူကြီးတွေဆိုတာ မွေးရာပါမှ မဟုတ်တာ... နတ်ဘုရားဖြစ်မယ့်နေ့က ဒီနေ့ပဲ"

"ငါက ရဲ့ချန်ပါ... အရင်က ထိပ်သီး ၅၀၀ စာရင်းဝင် ကုမ္ပဏီတစ်ခုမှာ လုံခြုံရေး လုပ်ခဲ့တယ်... အခု အခွင့်အရေးက မျက်စိရှေ့မှာ ရောက်နေပြီဆိုတော့ ဘာလို့ ဆုပ်ကိုင်မထားရမှာလဲ... ကံကြမ္မာကို ပြောင်းပြန်လှန်နိုင်လောက်တယ်။"

"အစ်ကိုချန်က မိုက်တယ်ဗျာ... ကျွန်တော် အားပေးတယ်"

ကျိုးဟန် အတန်ကြာ ကြည့်ရှုပြီးနောက် အချက်အလက်အချို့ကို သိရှိလာရသည်။ ဤကမ္ဘာသည် အွန်လိုင်းဂိမ်းစနစ်ကို အသုံးပြုထားသော်လည်း ပုံရိပ်ယောင်ကမ္ဘာတစ်ခု မဟုတ်ပေ။

ရွေးချယ်ခံရသော ကစားသမားများ အလွန်များပြားပြီး လူကုံထံသားများ၊ ၉၉၆ အလုပ်သမားများ၊ လုံခြုံရေးဝန်ထမ်းများ၊ အသက်ကြီး လူပျိုကြီးများ စသည်ဖြင့် နောက်ခံအမျိုးမျိုး ပါဝင်ကြသည်။

သို့သော် ယခင်က မည်သည့်အဆင့်အတန်းတွင် ရှိခဲ့စေကာမူ ဤကမ္ဘာသို့ ရောက်ရှိလာချိန်တွင် လူတိုင်း တန်းတူညီမျှဖြစ်ပြီး စတင်ရမည့် အမှတ်က အတူတူပင် ဖြစ်သည်။

"ဒေသတွင်း ကြေညာချက်... ၁၀ မိနစ်ကြာပြီးနောက် ကစားသမားတိုင်းအတွက် ပင်ကိုစွမ်းရည်များကို ကျပန်း ရွေးချယ်ပေးပါမည်"

"ပင်ကိုစွမ်းရည် အဆင့်များကို F၊ E၊ D၊ C၊ B၊ A၊ S နှင့် အထက် ဟူ၍ ခွဲခြားထားပါသည်"

"ပင်ကိုစွမ်းရည်များသည် ကစားသမားများ၏ စွမ်းရည်ကို မြှင့်တင်ရန်၊ ရန်သူများကို ရင်ဆိုင်ရန်နှင့် အထွတ်အထိပ်သို့ တက်လှမ်းရန် ကူညီပေးနိုင်ပါသည်"

ဤကြေညာချက်ကို ကြားပြီးနောက် စကားပြောချန်နယ်ထဲတွင် ထပ်မံ၍ ပွက်လောညံသွားသည်။

ပင်ကိုစွမ်းရည် အနိမ့်အမြင့်က နောက်ဆုံးအောင်မြင်မှုကို ကိုယ်စားမပြုသော်လည်း အစပိုင်း တိုးတက်မှုအမြန်နှုန်းကိုတော့ ဆုံးဖြတ်ပေးသည်။

အဆင့်မြင့် ပင်ကိုစွမ်းရည်ကို ပိုင်ဆိုင်ထားပါက သေချာပေါက် လျင်မြန်စွာ ထင်ပေါ်လာပြီး အသာစီးရနိုင်မည် ဖြစ်သည်။

"တောက်... ပင်ကိုစွမ်းရည်တွေပါ ပွင့်လာဦးမှာလား... အရမ်းစိတ်လှုပ်ရှားစရာကောင်းတာပဲ... ဒီလိုဆိုရင် လူတိုင်းက မတူညီနိုင်တော့ဘူး... ကွာဟချက်တွေက ကြီးမားလာတော့မယ်"

"ဘယ်လို ပင်ကိုစွမ်းရည်မျိုး နိုးထလာမလဲ မသိဘူး... အရမ်း ရင်ခုန်နေပြီ... နှလုံးရောဂါ အရေးပေါ်ဆေး ရှိလား တစ်လုံးလောက် ပေးပါ"

"ကံကောင်းခြင်းနတ်ဘုရားကြီး ကျေးဇူးပြုပြီး ကျွန်တော့်ကို စောင့်ရှောက်ပေးပါ... ကျွန်တော့် တောင်းဆိုချက်က နည်းနည်းလေးပါ... A အဆင့် ပင်ကိုစွမ်းရည်လောက်ဆို လုံလောက်ပါပြီ"

"ခွေးကောင် မင်းရဲ့ တောင်းဆိုချက်က နည်းသေးတယ်ပေါ့... နိုးထလာနိုင်တဲ့ ရာခိုင်နှုန်းက ဘယ်လောက်ရှိလဲတောင် မသိတာကို"

"ဆက်မပြောကြနဲ့တော့... ၁၀ မိနစ် ပြည့်သွားပြီ... ကံကြမ္မာကို ဆုံးဖြတ်မယ့်အချိန် ရောက်လာပြီ"

"ဒေသတွင်း ကြေညာချက်... ကစားသမားများ ခင်ဗျာ... ပင်ကိုစွမ်းရည်များကို ကျပန်းရွေးချယ်မှု ပြီးစီးသွားပါပြီ... ဇာတ်ကောင်၏ အခြေခံအချက်အလက်များ စနစ်ဖန်သားပြင်ကို ဖွင့်လှစ်လိုက်ပြီဖြစ်ရာ ကိုယ်တိုင် ဝင်ရောက်ကြည့်ရှုနိုင်ပါပြီ"

"မြို့ထဲသည် ဘေးကင်းဇုန် ဖြစ်သည်... သင်တို့အတွက် အစပြုသူ ကာကွယ်ရေးကာလ ၃ ရက် ရှိပြီး မြို့ထဲတွင် အခမဲ့ နေထိုင်နိုင်ပါသည်"

"ကစားသမားများ အလွန်အမင်း ပျင်းရိနေခြင်းကို ရှောင်ရှားရန် ၃ ရက်ကြာပြီးနောက် ညအိပ်ခအဖြစ် ရွှေဒင်္ဂါး ၁ ပြားကို ညစဉ် ပေးဆောင်ရမည် ဖြစ်သည်... သို့မဟုတ်ပါက မြို့ထဲမှ နှင်ထုတ်ခံရပါမည်"

"နောက်ဆုံးအနေဖြင့် ထပ်မံသတိပေးလိုသည်မှာ ဤသည်က အစစ်အမှန်ကမ္ဘာ ဖြစ်သည်... အဆင့် ၁၀၀ သို့ မရောက်မီ အသက်သည် တစ်ချောင်းတည်းသာ ရှိသောကြောင့် ဂရုတစိုက်ဖြင့် တိုးတက်အောင် လုပ်ဆောင်ကြပါ"

"ကံကောင်းပါစေ"

ထိုအရာများကို ကြားပြီးနောက် ကျိုးဟန်မှာ ချက်ချင်းပင် အချိန်လုရမည့် ခံစားချက်မျိုး ဖြစ်ပေါ်လာသည်။ သူ့တွင် အချိန် ၃ ရက်သာ ရှိသည်။

မြို့ထဲတွင် စစ်တပ်၏ ကာကွယ်မှု ရှိသောကြောင့် အလွန်ဘေးကင်းသော်လည်း မြို့ပြင်တွင်မူ အန္တရာယ်မျိုးစုံဖြင့် ပြည့်နှက်နေသည်။

အထူးသဖြင့် ညဘက်များတွင် ပိုမို အစွမ်းထက်သော မျိုးနွယ်စုများ ထွက်ပေါ်လာတတ်သည်။

၃ ရက်ကြာပြီးနောက် ရွှေဒင်္ဂါးများ မပေးဆောင်နိုင်ပါက မြို့ထဲမှ နှင်ထုတ်ခံရမည်ဖြစ်ရာ နောက်ဆက်တွဲရလဒ်ကို တွေးကြည့်၍ပင် ရနေသည်။ အခြားကမ္ဘာဆိုသည်မှာ ဤမျှပင် ရာဇဝတ်ကင်းမဲ့လှသည်။

"ဒါနဲ့ ပင်ကိုစွမ်းရည်... ငါ ဘယ်လို ပင်ကိုစွမ်းရည်မျိုး နိုးထလာမလဲ မသိဘူး"

ကျိုးဟန်သည် စိတ်ထဲမှ မျှော်လင့်တကြီး ရေရွတ်လိုက်သည်။ သူသည် ကိုယ်ရေးအချက်အလက် ကို နှိပ်၍ ဝင်ကြည့်လိုက်သည်။

ကစားသမား - ကျိုးဟန်

အဆင့် - ၁ (၀ ရာခိုင်နှုန်း)

ကစားသမား အလုပ်အကိုင် - လက်ရှိတွင် မရှိသေးပါ (အဆင့် ၁၀ ရောက်လျှင် ရွေးချယ်နိုင်မည်)

အသက် - ၁၀၀

တိုက်ခိုက်မှု - ၁၀

ကာကွယ်မှု - ၀

ပင်ကိုစွမ်းရည် - အကန့်အသတ်မဲ့ အဆင့်မြှင့်တင်ခြင်း (SSS အဆင့်၊ စကြဝဠာတစ်ခုလုံးတွင် တစ်ခုတည်းသာရှိသော)

ကနဦးအဆင့်မှာ အဆင့် ၁ ဖြစ်ပြီး ကနဦး တိုက်ခိုက်မှုမှာ ၁၀ မှတ် ဖြစ်သည်။ ကစားသမား အလုပ်အကိုင်အနေဖြင့် အဆင့် ၁၀ သို့ ရောက်ရှိပြီးမှသာ ပြောင်းလဲနိုင်မည် ဖြစ်သည်။

လက်ရှိ ကျိုးဟန်၏ ကိုယ်ပေါ်တွင် ကျောင်းဝတ်စုံသာ ဝတ်ဆင်ထားသဖြင့် ကာကွယ်မှုမှာ ၀ ဖြစ်နေသည်။ နောက်တစ်ခုကတော့ ပင်ကိုစွမ်းရည်ပင်။

"ဟင်..."

"ဘာကြီး..."

"SSS အဆင့်…"

ကျိုးဟန်၏ မျက်ဝန်းများ ကျုံ့ဝင်သွားသည်။

သူ၏ ပင်ကိုစွမ်းရည်ကို မြင်လိုက်ရချိန်တွင် SSS အဆင့်ရှိသော အကန့်အသတ်မဲ့ အဆင့်မြှင့်တင်ခြင်း ဖြစ်နေရုံသာမက စကြဝဠာတစ်ခုလုံးတွင် တစ်ခုတည်းသာရှိသော ပင်ကိုစွမ်းရည် ဖြစ်နေသည်။

သူ အတော်လေး အံ့သြသွားပြီးနောက် စိတ်ထဲတွင် အလွန် ဝမ်းသာသွားသည်။

သူလည်း တစ်ကြိမ်လောက်တော့ ကံကောင်းခြင်းနတ်ဘုရား ဝင်ပူးသလို ကံကောင်းနိုင်ခဲ့ပြီ။ စိတ်လှုပ်ရှားမှုကို အနည်းငယ် ပြေလျော့စေပြီးနောက် ကျိုးဟန်က အသေးစိတ်ကို နှိပ်၍ ကြည့်လိုက်သည်။

အကန့်အသတ်မဲ့ အဆင့်မြှင့်တင်ခြင်း - အဆင့်မြှင့်ပွိုင့် ပမာဏတစ်ခုကို အသုံးပြု၍ မိမိကိုယ်ကိုမှလွဲ၍ အခြားအရာအားလုံးကို အဆင့်မြှင့်တင်နိုင်သည်... အဆင့်မြှင့်တင်ပြီးနောက် အထူးစွမ်းရည်အချို့ကို ကျပန်းဖန်တီးပေးမည်ဖြစ်ပြီး အဆင့်မြှင့်တင်သည့် အကြိမ်ရေ များလေလေ အာနိသင်က ပို၍ ကောင်းမွန်လေလေ ဖြစ်ပါသည်။

ဤရှင်းလင်းချက်မှာ အလွန်ဝေဝါးနေပြီး မည်သည့်အာနိသင် ဖြစ်မည်ကို တိတိကျကျ မသိရသေးပေ။ နောက်ပိုင်းကျမှ သူ့ဘာသာ ဖြည်းဖြည်းချင်း လေ့လာရမည်ဟု ထင်ရသည်။

"ဒါနဲ့ အဆင့်မြှင့်ပွိုင့်... ငါ့ဆီမှာ အဆင့်မြှင့်ပွိုင့် ဘယ်လောက်ရှိလဲ... ပြီးတော့ အဆင့်မြှင့်ပွိုင့်တွေကို ဘယ်လိုရနိုင်မလဲ"

ကျိုးဟန်က စိတ်ထဲမှ တိတ်တဆိတ် မေးလိုက်သည်။

"စနစ် အချက်ပြချက်... သင်၏ လက်ရှိ အဆင့်မြှင့်ပွိုင့်မှာ ၀ ဖြစ်ပါသည်... သို့သော် သင်သည် ပင်ကိုစွမ်းရည်ကို ယခုမှ စတင်အသက်သွင်းလိုက်ခြင်းဖြစ်သောကြောင့် စနစ်က အခမဲ့ အဆင့်မြှင့်တင်ခွင့် တစ်ကြိမ် လက်ဆောင်ပေးပါမည်"

"အဆင့်တက်ခြင်း၊ သတ္တဝါများကို သတ်ဖြတ်ခြင်း၊ တာဝန်ဆုကြေးများ စသည့် နည်းလမ်းများမှတစ်ဆင့် မတူညီသော အဆင့်မြှင့်ပွိုင့်များကို ရရှိနိုင်ပါသည်... ရရှိလာသော အဆင့်မြှင့်ပွိုင့်များကို စနစ်ဖန်သားပြင်ပေါ်တွင် စုစည်းပြသထားမည်ဖြစ်ပြီး အချိန်မရွေး ဝင်ရောက်ကြည့်ရှုနိုင်ပါသည်"

ဉာဏ်ရည်တု အထောက်အကူပြုစနစ်က ကျိုးဟန်၏ မေးခွန်းများကို တိုက်ရိုက် ဖြေကြားပေးခဲ့သည်။

ကျိုးဟန် ခေါင်းညိတ်လိုက်သည်။ အဆင့်မြှင့်ပွိုင့်များ ရနိုင်မည့် နည်းလမ်းရှိနေသရွေ့ အဆင်ပြေသွားပြီ ဖြစ်သည်။

"တခြား ကစားသမားတွေရဲ့ ပင်ကိုစွမ်းရည်တွေကရော ဘယ်အဆင့်တွေများ ဖြစ်မလဲ"

ကျိုးဟန် အနည်းငယ် သိချင်သွားသည်။

အဘယ်ကြောင့်ဆိုသော် ထိုကစားသမားများအားလုံးသည် နယ်မြေ ၆၆၆ ထဲတွင် ရှိနေကြပြီး အနာဂတ်တွင် သူ၏ ပြိုင်ဘက်များ ဖြစ်လာနိုင်သောကြောင့်ပင်။

ရန်သူကိုသိ၊ မိမိကိုယ်ကိုသိလျှင် တိုက်ပွဲရာချီတိုက်တိုင်း အနိုင်ရနိုင်သည်ဆိုသော စကားရှိရာ တစ်ဖက်လူ၏ အခြေအနေကို နားလည်ထားရန်က အလွန်အရေးကြီးသည်။

ကျိုးဟန်၏ အကြည့်များက စကားပြောချန်နယ်ဆီသို့ ပြန်ရောက်သွားသည်။

"ဟားဟားဟား ငါတော့ လေဟုန်စီးပြီဟေ့... D အဆင့် ပင်ကိုစွမ်းရည် ကာကွယ်မှု တိုးမြင့်ခြင်း နိုးထလာတယ်... ဘယ်သူရှိသေးလဲလို့ တစ်ခွန်းလောက် မေးချင်တယ်"

"တော်တော် မိုက်တာပဲ... ဘော့စ်ကို အားကျတယ်... ငါကတော့ F အဆင့် ပင်ကိုစွမ်းရည်တဲ့... သောက်ရမ်းကို သနားစရာကောင်းတာပဲ"

"အသေးအဖွဲ D အဆင့် ပင်ကိုစွမ်းရည်လောက်နဲ့တောင် ကြွားဝံ့သေးတယ်... ငါ ရဲ့ချန် က B အဆင့် ပင်ကိုစွမ်းရည် သွေးစွမ်းအင် လောင်ကျွမ်းခြင်းကွ... ငါကမှ ကောင်းကင်ဘုံက ရွေးချယ်ထားတဲ့ သားတော်ပဲ"

"အစ်ကိုချန်က လန်းတယ်ဗျာ... ကျွန်တော်က E အဆင့် ပင်ကိုစွမ်းရည်လေးပဲ ရတယ်... ကံကို မကောင်းပါဘူးဗျာ ဝူးဝူး"

"ညီမလေးကတော့ အားကိုးချင်ပါတယ်... ညီမလည်း E အဆင့် ပင်ကိုစွမ်းရည်ပဲ ရတယ်... ဒါက ညီမရဲ့ သီးသန့် ဓာတ်ပုံလေးပါနော်"

"ညီမလေး မကြောက်နဲ့... အစ်ကို လာကာကွယ်ပေးမယ်"

"အမလေးဗျာ သွားပါပြီ... သည်းမခံနိုင်တော့ဘူး... အပေါ်ကလူ အကြိုက်က တော်တော် ဆန်းတာပဲ... ဒါက ဖစ်တာ နောက်က အန်တီကြီး မဟုတ်ဘူးလား"

"အော့ လစ်ပြီ လစ်ပြီ"

"အားလုံးက ဘယ်လိုလုပ် အဲ့လောက်တောင် လန်းနေကြတာလဲ... ငါကတော့ အစွမ်းအနည်းဆုံး F အဆင့် ပင်ကိုစွမ်းရည်ပဲ ရတယ်"

"F အဆင့် +၁။"

"F အဆင့် +၂။"

"F အဆင့် +၁၀၀၀၁။"

မကြာမီ စကားပြောချန်နယ်ထဲတွင် F အဆင့် ဆိုသော စာလုံးများဖြင့် ပြည့်နှက်သွားပြီး ဤအဆင့်ရှိသူ အများဆုံးဖြစ်ကြောင်း သိသာလှသည်။

လူအများစုမှာ F အဆင့် ပင်ကိုစွမ်းရည်ရှင်များဖြစ်ပြီး ဒုတိယအများဆုံးက E အဆင့် ဖြစ်သည်။

D အဆင့်နှင့် အထက် ပင်ကိုစွမ်းရည်များကတော့ အလွန် ရှားပါးလှပေပြီ။

S အဆင့်နှင့်အထက် ရှိသူများကို မကြားဖူးသလို SSS အဆင့်ဆိုလျှင် ပြောစရာပင် မလိုတော့ပေ။