အခန်း ၇

အခန်း (၇) အဆင့် ၂ သို့ တက်လှမ်းခြင်း

လမ်းခရီးတွင် ကျိုးဟန်သည် သားရဲများစွာနှင့် ထပ်မံဆုံတွေ့ခဲ့သော်လည်း အစွမ်းထက်သော ကာကွယ်မှု ရှိနေပြီဖြစ်ရာ ယခင်ကကဲ့သို့ သတိထားနေရန် မလိုတော့ပေ။ သားရဲအုပ်နှင့် တိုးလျှင်လည်း ရှောင်မနေတော့ဘဲ တိုက်ရိုက် တိုးဝင်၍ အကြမ်းပတမ်း နှိမ်နင်းလိုက်သည်။

"စနစ် သတိပေးချက်... သင်၏ အဆင့်မြှင့်ပွိုင့်မှာ လုံလောက်နေပြီဖြစ်သဖြင့် သံချေးတက်နေသော သံဓားကို ဒုတိယအကြိမ် အဆင့်မြှင့်တင်မည်လား"

"အဆင့်မြှင့်မယ်"

ကျိုးဟန် ခေါင်းညိတ်လိုက်သည်။

"စနစ် သတိပေးချက်... သင်သည် ပင်ကိုစွမ်းရည် - အကန့်အသတ်မဲ့ အဆင့်မြှင့်တင်ခြင်းကို အသုံးပြုလိုက်ပြီး အဆင့်မြှင့်ပွိုင့် ၁၀ မှတ် ကုန်ကျကာ သာမန်အဆင့်လက်နက် သံချေးတက်နေသော သံဓား ကို ဒုတိယအကြိမ် အဆင့်မြှင့်တင်မှု အောင်မြင်သွားပြီ ဖြစ်ပါသဖြင့် အချက်အလက် အသစ်များကို စနစ်ဖန်သားပြင်မှာ ဝင်ကြည့်လိုက်ပါ"

"ကောင်းပြီ... အဆင့်မြှင့်တင်မှု အောင်မြင်နှုန်းက ၁၀၀ ရာခိုင်နှုန်းပဲကိုး"

ကျိုးဟန်က ဤသည်မှာ ဖုံးကွယ်ထားသော အကျိုးသက်ရောက်မှုတစ်ခုဟု ယူဆလိုက်သည်။ မည်သို့ပင်ဆိုစေ ယခုအထိ လေးကြိမ် အဆင့်မြှင့်ရာတွင် တစ်ကြိမ်မှ မကျရှုံးဘဲ အားလုံး အောင်မြင်ခဲ့သည်။

အဖြူရောင် အလင်းတန်းတစ်ခုက သံဓားပေါ်တွင် ဝဲပျံသွားပြီးနောက် အချက်အလက်များက စနစ်ဖန်သားပြင်ပေါ်တွင် ဖြည်းညှင်းစွာ ထွက်ပေါ်လာသည်။ ကျိုးဟန် စူးစိုက်ကြည့်လိုက်သည်။

သံဓား (၂ ကြိမ်မြှင့်)

အဆင့် - သာမန်အဆင့်

အမျိုးအစား - ဓားရှည် လက်နက်

အခြေခံအချက်အလက် - တိုက်ခိုက်မှု +၉၀

အထူးစွမ်းရည် ၁ - ပြင်းထန်သော သွေးဆိပ်တက်ခြင်း ဖြစ်ပြီး ပစ်မှတ်သည် သင်၏ သာမန်တိုက်ခိုက်မှုကို ခံရပါက သေချာပေါက် သွေးဆိပ်တက်သွားမည် ဖြစ်ပါသည်... ပြင်းထန်သော သွေးဆိပ်တက်နေချိန်တွင် ပစ်မှတ်သည် ၁၀ စက္ကန့်အတွင်း တစ်စက္ကန့်လျှင် သွေး ၁၂၀ မှတ် လျော့ကျသွားမည် ဖြစ်ပါသည်။

အထူးစွမ်းရည် ၂ - ဓားအရှိန်အဝါ ဖြစ်ပြီး သာမန်တိုက်ခိုက်မှု သုံးကြိမ်ပြုလုပ်ပြီးတိုင်း... နောက်တစ်ကြိမ်တွင် ၃ မီတာ ပတ်လည်ရှိ ရန်သူအားလုံးကို (တိုက်ခိုက်မှု x ၃) ပမာဏ ထိခိုက်မှု ပေးနိုင်ပါသည်။

ဖော်ပြချက် - သံချေးတက်နေသော သံဓားမှာ ပိုမိုထက်မြက်လာပြီး နက်နဲသော လျှို့ဝှက်ချက်များ ကိန်းအောင်းနေကာ သာမန်မဟုတ်သည့် ပုံစံမျိုး ရှိနေပါပြီ။

"လန်းလိုက်တာ... အရမ်း အစွမ်းထက်တာပဲ။"

ကျိုးဟန် အားရပါးရ ရယ်မောလိုက်သည်။ အခြေခံ တိုက်ခိုက်မှုနှင့် ပေါင်းလိုက်ပါက သူ၏ စုစုပေါင်း တိုက်ခိုက်မှုမှာ ယခုအခါ ၁၀၀ မှတ်အထိ ရှိနေပြီ ဖြစ်သည်။ အထူးစွမ်းရည်များကလည်း ပို၍ အစွမ်းထက်လာသည်။

သွေးဆိပ်တက်ခြင်းက ယခင် ၅၀ ရာခိုင်နှုန်းမှ ယခု ၁၀၀ ရာခိုင်နှုန်း ဖြစ်သွားပြီ ဖြစ်ရာ ကျိုးဟန်၏ တိုက်ခိုက်မှု တစ်ချက်တိုင်းက တိုက်ခိုက်မှု ၁၀၀ ပေးနိုင်ရုံသာမက တစ်ဖက်လူကို သွေး ၁၂၀ မှတ်ပါ ဆက်တိုက် လျော့ကျစေမည် ဖြစ်သည်။ တိုက်ခိုက်ရေးစွမ်းရည်မှာ ချက်ချင်းပင် အထွတ်အထိပ်သို့ ရောက်သွားခဲ့ပြီ။ ဓားအရှိန်အဝါမှာလည်း အုပ်စုလိုက် ထိခိုက်မှု ၃၀၀ ပေးနိုင်သောကြောင့် ဝိုင်းရံတိုက်ခိုက်ခံရချိန်တွင် ပို၍ လွယ်ကူသွားမည် ဖြစ်သည်။

"ဝီ... ဝီ..."

ပန်းခင်းတစ်ခုထဲမှ ဧရာမ ပျားတုပ်ကောင် ၁၀ ကောင်ကျော် ထွက်ပေါ်လာပြီး ကျိုးဟန်ကို အပြင်းအထန် တိုက်ခိုက်လာသည်။

"ကျေးဇူးပဲ... ကိုယ်တိုင်လာပို့ပေးတာပဲ"

ကျိုးဟန်က ပြုံးလိုက်ပြီး လုံးဝ မကြောက်မရွံ့ဘဲ ရှေ့သို့ တိုးဝင်လိုက်သည်။ ဤနေရာမှာ သူ ယခင်က ရှောင်သွားခဲ့ရသော နေရာဖြစ်သော်လည်း ယခုမူ ဤပျားတုပ်ကောင်များမှာ သူ့အတွက် ဘာဖိအားမှ မရှိတော့ပေ။

"စနစ် သတိပေးချက်... သင်သည် ဓားအရှိန်အဝါ အထူးစွမ်းရည်ကို အောင်မြင်စွာ ဖန်တီးနိုင်ခဲ့ပြီး အုပ်စုလိုက် ထိခိုက်မှု ဖြစ်စေပါမည်"

စနစ်၏ သတိပေးချက်နှင့်အတူ ဓားအရှိန်အဝါများ ပေါက်ကွဲထွက်ပေါ်လာသည်။ ပျားတုပ်ကောင်အများစုမှာ ခဏအတွင်း အသတ်ခံလိုက်ရပြီး ကျန်ရှိနေသော အကောင်များမှာလည်း ထိတ်လန့်တကြား ထွက်ပြေးသွားကြသည်။

မီးတောက်ဝံပုလွေကို လိုက်လံသတ်ဖြတ်စဉ်က အတော်လေး ဝေးဝေးသို့ ရောက်သွားခဲ့သဖြင့် ကျိုးဟန်သည် လမ်းတစ်လျှောက်ရှိ သားရဲများကို သွေးချောင်းစီးအောင် ရှင်းလင်းပစ်ပြီးနောက် ယခင်က ကျောက်တောင် နံရံရှိရာ နေရာသို့ ပြန်လည် ရောက်ရှိလာသည်။

"ကျိုးဟန်... ကျိုးဟန် ဘယ်မှာလဲ"

ဟန်ရှန်နင်က စိုးရိမ်တကြီး အော်ဟစ်နေသည်။

"စိတ်အေးအေးထားပါဦး... မြေပြင်ပေါ်မှာ မီးတောက်ဝံပုလွေ အလောင်းတွေ အများကြီးပဲ... ဘာတွေ ဖြစ်သွားတာလဲ" ဟန်ချင်ရွှဲ့က သတိပေးလိုက်သည်။

"ဒါဆို သူ တကယ်ပဲ ဝံပုလွေအုပ်ကို အနိုင်ယူလိုက်တာလား"

ဟန်ရှန်နင်၏ မျက်ဝန်းထဲတွင် မျှော်လင့်ချက်အရိပ်အယောင်များ ထွက်ပေါ်လာသည်။ ဤသည်မှာ ခက်ခဲမှန်း သိသော်လည်း ကျိုးဟန် အသက်ရှင်နေဖို့ကိုသာ သူမ ဆုတောင်းနေမိသည်။

"ဟက်... ဝံပုလွေအုပ်ကို အနိုင်ယူတယ် ဟုတ်လား... သေချာပေါက် အရိုးတောင် ရှာမရအောင် သေသွားလောက်ပြီ"

ချိုက်လန်က စိတ်ထဲမှ လှောင်ရယ်နေမိသည်။ သူက ကျိုးဟန်၏ ကာကွယ်ရေးဝတ်စုံကို ကောက်ယူရန် ကျောက်တောင်ပေါ်မှ ဆင်းလာခြင်း ဖြစ်သည်။ သို့သော် သူ စတင် ရှာဖွေရန် ပြင်လိုက်စဉ်မှာပင် မျက်လုံးအစွန်းမှ ပုံရိပ်တစ်ခုကို မြင်လိုက်ရသည်။

"မင်း... မင်း မသေဘူးလား"

ချိုက်လန်မှာ လိပ်ပြာလွင့်မတတ် ထိတ်လန့်သွားပြီး မြေပြင်ပေါ်သို့ ဖင်ထိုင်လျက် ပြုတ်ကျသွားကာ အလွန်အမင်း ကြောက်လန့်နေသည်။

"မင်းကို စောင့်နေတာ ကြာပြီ"

ကျိုးဟန်၏ မျက်နှာပေါ်တွင် အေးစက်သော အပြုံးတစ်ခု ရှိနေသည်။

"ငါ ရှင်းပြပါရစေ... ငါ မင်းကို မတော်တဆ ကန်မိသွားတာပါ... ငါ တောင်းပန်ပါတယ်... ငါ တကယ် တမင်လုပ်တာ မဟုတ်ဘူး"

ချိုက်လန်မှာ နှုတ်ခမ်းများ တုန်ရီနေပြီး အလောတကြီး အသနားခံလိုက်သည်။

"ဟက်... တောင်းပန်တယ် ဟုတ်လား... မင်းက တကယ် ကလေးဆန်တာပဲ... မင်းက ဒါကို ကလေး ကစားစရာလို့ ထင်နေတာလား... ဒီနေ့က မင်းရဲ့ သေနေ့ပဲ"

ကျိုးဟန်က သံဓားကို ကိုင်၍ ချိုက်လန်ဆီသို့ ဖြည်းညှင်းစွာ ချဉ်းကပ်သွားသည်။ သူ၏ မျက်ဝန်းထဲတွင် အဆုံးမဲ့ သတ်ဖြတ်လိုသော အရှိန်အဝါများ ပြည့်နှက်နေသည်။

"မင်း... မင်း မလာနဲ့ဦး... ငါ မှားသွားပါပြီ... တစ်ကြိမ်လောက် ခွင့်လွှတ်ပေးပါ"

ကျိုးဟန်က ဘာမှ ပြန်မပြောဘဲ တစ်လှမ်းချင်း တိုးဝင်သွားသည်။ အေးစက်လှသော အကြည့်များကြောင့် ချိုက်လန်မှာ တုန်ရီနေသည်။

"ကောင်းပြီလေ... မင်းက ငါ့ကို သတ်ချင်မှတော့... ငါလည်း မင်းနဲ့ အသေခံ တိုက်မယ်ကွာ"

ချိုက်လန်က ရက်စက်သော မျက်နှာထားဖြင့် သံဓားကို မြှောက်၍ ကျိုးဟန်ဆီသို့ ခုတ်ချလိုက်သည်။

“-၀”

“-၀”

'ဘာဖြစ်တာလဲ... သူ့ ကာကွယ်မှုကို မဖောက်နိုင်ဘူးလား’

ရှေ့မှာရှိတဲ့ ကျိုးဟန်မှာ တောင်ကြီးတစ်လုံးကဲ့သို့ မယိမ်းမယိုင် ရှိနေသည်။ ချိုက်လန်၏ မျက်နှာပေါ်တွင် မျှော်လင့်ချက် ကင်းမဲ့ခြင်းနှင့် နောင်တရခြင်းများ ချက်ချင်း ပြည့်နှက်သွားသည်။ အကယ်၍သာ ကြိုသိခဲ့လျှင် ကျိုးဟန်ကို ဘာကြောင့် သွားရောက် ရန်စခဲ့မိပါသနည်း။

"မင်း ခုတ်လို့ ဝပြီလား... ဝပြီဆိုရင်တော့ သေလို့ရပြီ"

စကားအဆုံးတွင် သံဓားက ဝှေ့ယမ်းသွားပြီး ချိုက်လန်မှာ အသက်ပျောက်သွားတော့သည်။ လူသတ်ရခြင်းနှင့် သားရဲသတ်ရခြင်း ခံစားချက်မှာ မတူညီပေ။ ကျိုးဟန်က ပြတ်ပြတ်သားသား သတ်လိုက်သော်လည်း သူကိုယ်တိုင်မှာ အသက် ၁၈ နှစ်အရွယ် လူငယ်လေးသာ ဖြစ်ရာ အနည်းငယ်တော့ စိတ်လှုပ်ရှားနေမိသည်။

ဤသည်မှာ သူ ဖြည်းဖြည်းချင်း အသားကျအောင် လုပ်ရမည့် အရာပင် ဖြစ်ပေမည်။ နတ်ဘုရားနှင့်မိစ္ဆာကမ္ဘာမှာ အစွမ်းထက်သူကသာ အရာရာကို ဆုံးဖြတ်ပြီး အားနည်းသူက အားကောင်းသူ၏ ဝါးမြိုခြင်းကို ခံရမည် ဖြစ်သည်။ အစွမ်းထက်သူ ဖြစ်လာရန်အတွက် ခိုင်မာသော စိတ်ဓာတ် ရှိရန် လိုအပ်သည်။ ကျိုးဟန်သည် ဤကမ္ဘာ၏ ရက်စက်မှုကို နားလည်သွားပြီး သတ်ဖြတ်လိုသော အရှိန်အဝါများနှင့်အတူ မူလနေရာဆီသို့ ပြန်လည် လျှောက်လှမ်းသွားသည်။

"ကျိုးဟန်... တိုက်ဆိုင်လိုက်တာ... နတ်ဘုရားနှင့်မိစ္ဆာကမ္ဘာမှာ နင့်ကို တွေ့ရလိမ့်မယ်လို့ မထင်ထားဘူး"

ဟန်ရှန်နင်က အပြေးလေး လာမေးသည်။

"တကယ်ကို တိုက်ဆိုင်တာပဲ"

ကျိုးဟန်က ပြောလိုက်သည်။ မည်သို့ပင်ဆိုစေ လူတိုင်းက နတ်ဘုရားနှင့်မိစ္ဆာကမ္ဘာသို့ ရောက်လာခြင်း မဟုတ်ဘဲ ကျပန်းရွေးချယ်ခံရခြင်း ဖြစ်သည်။ ဟန်ရှန်နင်မှာ သူတို့ကျောင်း၏ နာမည်ကြီးအလှပဂေးဖြစ်ပြီး မိသားစု နောက်ခံလည်း အလွန် တောင့်တင်းကာ အပြစ်ပြောစရာမရှိသည့် အလှပဂေးလေး တစ်ဦး ဖြစ်သည်။ သူတို့နှစ်ဦးမှာ ကျောင်းတွင် သိကျွမ်းမှု အနည်းငယ် ရှိခဲ့ဖူးသဖြင့် လူရင်းများဟု ဆိုနိုင်သည်။

"ဘာကိစ္စ ရှိသေးလို့လဲ... မရှိရင်တော့ ငါ မြန်မြန် သားရဲ သွားသတ်ရတော့မယ်"

ကျိုးဟန်မှာ စကားဖောင်ဖွဲ့နေရန် အစီအစဉ် မရှိပေ။ အဆင့်မြှင့်ပွိုင့် ရရှိရန်ကသာ ပထမဦးစားပေး ဖြစ်သည်။ မည်သို့ပင်ဆိုစေ SSS ပင်ကိုစွမ်းရည် - အကန့်အသတ်မဲ့ အဆင့်မြှင့်တင်ခြင်း ကသာ သူ၏ အစွမ်းထက်မှုအတွက် အခြေခံ ဖြစ်သည်။

"အာ... ဒီလောက် မြန်မြန် သွားတော့မှာလား"

ဟန်ရှန်နင်က စကားကောင်းကောင်း ပြောချင်သေးသည်။

"ကျိုးဟန်... ငါက ရှန်နင်ရဲ့ အစ်မ ဟန်ချင်ရွှဲ့ပါ... ငါတို့ နင်နဲ့ အသင်းဖွဲ့ချင်လို့ စဉ်းစားပေးလို့ ရမလား"

ဟန်ချင်ရွှဲ့က မြန်မြန် ပြောလိုက်သည်။ မည်သို့ပင်ဖြစ်စေ ကျိုးဟန် ပြသလိုက်သော အစွမ်းအစက အလွန် အစွမ်းထက်လှရာ သူ၏ ကာကွယ်မှုအောက်တွင် သူတို့ ညီအစ်မနှစ်ယောက် ပို၍ ဘေးကင်းနိုင်မည် ဖြစ်သည်။

ဤကမ္ဘာတွင် သားရဲများ၏ တိုက်ခိုက်မှုသာမက အမျိုးသမီးများအပေါ် ရမ္မက်ဇောဖြင့် ကြည့်နေကြသော အမျိုးသား ကစားသမားများစွာလည်း ရှိနေသည်။ မည်သို့ပင်ဖြစ်စေ သူမတို့မှာ ထိပ်တန်း အလှပဂေးများ ဖြစ်ကြရာ အမျိုးသားအများစုမှာ စိတ်ကို ထိန်းချုပ်ရန် မလွယ်ကူကြပေ။

"ဒါကတော့... ငါက တစ်ယောက်တည်း သတ်ရတာ ပိုပြီး လွတ်လပ်သလိုပဲ"

ကျိုးဟန်က ငြင်းပယ်လိုက်သည်။ မည်သို့ပင်ဆိုစေ အလှပန်းလေး နှစ်ပွင့်မှာ ကြည့်ရသည်မှာ မျက်စိပသာဒ ဖြစ်သော်လည်း ဘာမှ အသုံးဝင်မည့်ပုံ မပေါ်ဘဲ ဝန်ထုပ်ဝန်ပိုး ဖြစ်ကာ သူ၏ သားရဲသတ်သည့် အရှိန်ကို နှောင့်နှေးစေလိမ့်မည်ဟု ထင်နေသည်။

"ကျိုးဟန်... ကျေးဇူးပြုပြီး ငါတို့ကို ခေါ်သွားပေးပါဦး"

ဟန်ရှန်နင်က မျှော်လင့်ချက် အပြည့်ဖြင့် သနားစဖွယ် အသနားခံလိုက်သည်။

"ဟုတ်တယ်လေ... ငါတို့ ညီအစ်မနှစ်ယောက်ရဲ့ ပင်ကိုစွမ်းရည်က အကြားအာရုံနဲ့ အမြင်အာရုံ တိုးမြင့်တာဆိုတော့... သေချာပေါက် အသုံးဝင်မှာပါ... နင့်အတွက်လည်း အကူအညီ ဖြစ်မှာပါ... နင် တစ်ယောက်တည်းဆိုတော့ အာရုံစိုက်နိုင်စွမ်းက အကန့်အသတ် ရှိတာပဲလေ... ငါတို့က ဘယ်နေရာမှာ သားရဲတွေ အများကြီး ရှိလဲ... ဘယ်မှာ အန္တရာယ် ရှိလဲဆိုတာကို ခွဲခြမ်းစိတ်ဖြာ ပေးနိုင်ပါတယ်... ပြီးတော့ ရှာရခက်တဲ့ ရတနာတွေကိုလည်း ရှာပေးနိုင်ပါတယ်"

ဟန်ချင်ရွှဲ့က အကျိုးကျေးဇူးများစွာကို တန်းစီ၍ ပြောပြလိုက်သည်။ အမှန်တကယ်ပင် သူမတို့၏ ပင်ကိုစွမ်းရည်က တိုက်ခိုက်ရေးတွင် အားနည်းသော်လည်း အထောက်အကူပြု အပိုင်းတွင်မူ အလွန် အသုံးဝင်လှသည်။ ကျိုးဟန်မှာ သူမတို့၏ အလှအပကြောင့် စိတ်လှုပ်ရှားသွားခြင်း မဟုတ်သော်လည်း သူမတို့ ပြောသည်မှာ ယုတ္တိရှိသည်ဟု ခံစားလိုက်ရသည်။

ကျိုးဟန်က စနစ်တွင် အသင်းဖွဲ့ခြင်းအကြောင်း မေးမြန်းလိုက်ရာ အတွေ့အကြုံမှတ် ခွဲဝေမှုက ပြဿနာမရှိမှန်း သိလိုက်ရသည်။ ဤသို့ဆိုလျှင် အတွေ့အကြုံမှတ် ဆုံးရှုံးမှုမှာလည်း အလွန် မပြင်းထန်လှဘဲ အလှပဂေး နှစ်ဦး၏ အကူအညီ ရယူခြင်းကလည်း မဆိုးလှပေ။

"ကျိုးဟန်... ဒီနေရာက အရမ်း အန္တရာယ်များတယ်... ငါတို့ နင့်ကိုပဲ ယုံကြည်တယ်... တခြားလူတွေကို မယုံဘူး"

ဟန်ရှန်နင်က ဆက်ပြောလိုက်သည်။

"ဘာစောင့်နေတာလဲ... သားရဲ သွားရှာကြစို့လေ"

"ကျိုးဟန်... နင် ငါတို့ကို ခေါ်သွားဖို့ သဘောတူပြီလား... ပျော်လိုက်တာ"

အသင်းဖွဲ့ပြီးနောက် ညီအစ်မနှစ်ယောက်မှာ ချက်ချင်းပင် အသုံးဝင်လာသည်။ ဟန်ရှန်နင်က သူမ၏ ပင်ကိုစွမ်းရည်ကို အသုံးချကာ သားရဲများ ရှိနိုင်သည့် နေရာကို အတိအကျ ပြောပြခဲ့သည်။

"ကောင်းပြီ"

ကျိုးဟန်သည် မြေပုတ်ခွေးအုပ်ကို ခဏအတွင်း အပြတ်ရှင်းလိုက်သည်။ ဤရလဒ်ကြောင့် ကျိုးဟန် အလွန် ကျေနပ်သွားသည်။ ညီအစ်မနှစ်ယောက်မှာ အမှန်တကယ်ပင် အသုံးဝင်လှသည်။ အပြန်အလှန် ပူးပေါင်းရင်းနှင့် သူတို့ကြားတွင် နားလည်မှုများ ရရှိလာကာ ကျိုးဟန်လည်း အလွန် အားရပါးရ သတ်ဖြတ်နေသည်။ ဤအဆင့် ၁ သားရဲများမှာ သူ၏ ပြိုင်ဘက် မဟုတ်ကြပေ။

"ကျိုးဟန်... နင် တကယ်ကို အစွမ်းထက်တာပဲ... ဒီသားရဲတွေက နင့်ကို လုံးဝ ပြန်မတိုက်နိုင်ဘူး"

ဟန်ရှန်နင်၏ မျက်ဝန်းထဲတွင် လေးစားအားကျသော အကြည့်များ ထွက်ပေါ်နေသည်။

"ဘယ်လိုလဲ... ငါ့ကို ချစ်သွားပြီလား"

ကျိုးဟန်က စနောက်လိုက်သည်။

"ငါ... ငါ..."

ဟန်ရှန်နင်က ရှက်ရွံ့စွာဖြင့် မျက်နှာလေး နီရဲသွားသည်။ သူမ၏ အမြင်တွင် ကျိုးဟန်မှာ အေးစက်တည်ငြိမ်သူဟု ထင်ခဲ့သော်လည်း ယခုကဲ့သို့ လူဆိုးလေး လုပ်လိမ့်မည်ဟု မထင်ထားခဲ့ပေ။ သို့သော် ဤကဲ့သို့ စနောက်ခံရခြင်းကို ဟန်ရှန်နင် မုန်းတီးဟန် မပေါ်ပေ။

"အဟမ်း... အဟမ်း... နင်တို့တွေကတော့ တကယ်ကို ကဲကြတာပဲ"

ဟန်ချင်ရွှဲ့က ကြားဖြတ်၍ ချောင်းဟန့်လိုက်သည်။ သူမ၏ ရှေ့တွင်ပင် ညီမဖြစ်သူကို လာရောက် စနောက်နေခြင်းကြောင့် ဖြစ်သည်။ ကျိုးဟန်လည်း သူ လွန်သွားသည်ကို ရိပ်မိလိုက်ပြီး သူမ၏ အစ်မဖြစ်သူ၏ သတိပေးခြင်းကို ခံလိုက်ရသည်။

သူသည် စနောက်ချင်သော စိတ်ကို ထိန်းချုပ်လိုက်ပြီး သူ၏ အတွေ့အကြုံမှတ်များကို ကြည့်လိုက်ရာ မကြာမီ အဆင့်တက်တော့မည် ဖြစ်သည်။

"အဆင့်မြင့်တဲ့ သားရဲတွေကို ရှာရတော့မယ် ထင်တယ်"

အဆင့် ၁ သားရဲများက အတွေ့အကြုံမှတ် အလွန်နည်းပြီး ပစ္စည်းကောင်းများလည်း မကျသဖြင့် ကျိုးဟန်အတွက် စိန်ခေါ်မှု မရှိတော့ပေ။

"ကျိုးဟန်... စနစ်ရဲ့ သတိပေးချက်အရ မြူခိုးတောအုပ်ရဲ့ အတွင်းပိုင်းကို ရောက်လေလေ... သားရဲတွေက ပိုပြီး အစွမ်းထက်လေလေပဲ"

"အင်း... ဒါဆို အတွင်းပိုင်းကို ဆက်သွားကြစို့"

မကြာမီ သူတို့ သုံးယောက် အတွင်းပိုင်းသို့ ဝင်ရောက်လာသည်နှင့်အမျှ သားရဲများမှာလည်း အတော်လေး အစွမ်းထက်လာသည်။

"ကျိုးဟန်... ရှေ့မှာ ဂူတစ်ခု ရှိတယ်... အဆင့် ၂ သားရဲရဲ့ ခြေရာကို တွေ့တယ်"

ဟန်ချင်ရွှဲ့က အမြင့်ပိုင်း တစ်နေရာမှနေ၍ သူမ၏ အမြင်အာရုံ ပင်ကိုစွမ်းရည်ကို အသုံးပြု၍ စစ်ဆေးပြီးနောက် အမြန် အစီရင်ခံလိုက်သည်။ ကျိုးဟန် စိတ်လှုပ်ရှားသွားပြီး သတ်မှတ်ထားသော လမ်းကြောင်းအတိုင်း တိုက်ရိုက် သွားလိုက်သည်။

ဂူဝတွင် မြွေကလေးအချို့ ပျင်းရိစွာ နေပူစာလှုံနေသည်။ တစ်ကိုယ်လုံး စိမ်းဖန်နေပြီး ကြည့်ရသည်မှာ ရန်စရန် မလွယ်ကူသည့် ပုံပေါ်သည်။ ကျိုးဟန်က အကဲဖြတ်ခြင်း စွမ်းရည်ကို အသုံးပြုလိုက်သည်။

မြွေစိမ်း

အရည်အသွေး - သာမန်အဆင့်

အဆင့် - ၂

သွေး - ၃၁၀

တိုက်ခိုက်မှု - ၄၃

ကာကွယ်မှု - ၂၉

စွမ်းရည် - မြွေဆိပ် (အဆိပ်ရည်များကို မှုတ်ထုတ်ပြီး ထိမှန်သွားသော ပစ်မှတ်သည် ၅ စက္ကန့်အတွင်း တစ်စက္ကန့်လျှင် သွေး ၃၀ မှတ် လျော့ကျသွားမည် ဖြစ်ပါသည်... စောင့်ဆိုင်းချိန် ၄၀ စက္ကန့် ကြာမြင့်မည်)

ဖော်ပြချက် - အဆိပ် အလွန် ပြင်းထန်သောကြောင့် သွေးပြန်တက်ဆေးများ ကြိုတင်ပြင်ဆင်ထားရန် အကြံပြုပါသည်။

အဆင့် ၂ သားရဲများက အဆင့် ၁ များထက် ပိုမို အစွမ်းထက်သော်လည်း သွေးပြန်တက်ခြင်း အထူးစွမ်းရည် ရှိသော ကျိုးဟန်အတွက် ဘာမှ မဟုတ်ပေ။

"နင်တို့ နောက်ဆုတ်နေကြပါ... ဒီအဆိပ်က နင်တို့ ရင်ဆိုင်နိုင်တဲ့ အရာ မမဟုတ်ဘူး"

ကျိုးဟန်က ၎င်းတို့ကို ချက်ချင်း သတိပေးလိုက်ပြီး ဤနေရာမှ ဝေးဝေးသို့ သွားခိုင်းလိုက်သည်။ ၎င်းတို့၏ သွေးပမာဏမှာ ၁၀၀ သာ ရှိသေးသဖြင့် အဆိပ်မိပါက ခဏအတွင်း အသက်ဆုံးရှုံးသွားနိုင်သောကြောင့် ဖြစ်သည်။

ညီအစ်မနှစ်ယောက်မှာလည်း ဤအရာ၏ အန္တရာယ်ကို သိထားသဖြင့် ဝေးဝေးသို့ ရှောင်နေကြသည်။

ကျိုးဟန်က တိတ်တဆိတ် ချဉ်းကပ်သွားပြီး မြွေစိမ်းတစ်ကောင်ကို ဓားဖြင့် ခုတ်လိုက်သည်။ ရှေ့တွင် ရှိနေသော မြွေစိမ်း ၅ ကောင်မှာ ချက်ချင်း တုံ့ပြန်လာပြီး ကျိုးဟန်ဆီသို့ အဆိပ်ရည်များ မှုတ်ထုတ်လိုက်ကြသည်။

“-၁၅၀”

သွေး ၁၅၀ မှတ် ရုတ်တရက် လျော့သွားသော်လည်း ကျိုးဟန် မထိတ်လန့်ပေ။ ၁ စက္ကန့်အကြာတွင် သွေးပမာဏက အလိုအလျောက် ပြန်ပြည့်သွားသည်။ စတုတ္ထအကြိမ် တိုက်ခိုက်မှု အပြီးတွင် ဓားအရှိန်အဝါတစ်ခု ထွက်ပေါ်လာပြီး ပတ်ဝန်းကျင်သို့ ပေါက်ကွဲထွက်သွားသည်။

“-၃၀၀”

“-၃၀၀”

မြွေစိမ်းများမှာ အပိုင်းပိုင်း ပြတ်ထွက်ကုန်ပြီး သွေးအနည်းငယ်သာ ကျန်တော့သော နှစ်ကောင်လည်း ရှိနေသည်။ ကျိုးဟန် အခွင့်အရေးကို ဆုပ်ကိုင်၍ အားလုံးကို အပြတ်ရှင်းလိုက်သည်။

"စနစ် သတိပေးချက်... ဂုဏ်ယူပါသည်... သင်သည် မြွေစိမ်းကို အောင်မြင်စွာ သတ်ဖြတ်နိုင်ခဲ့သောကြောင့် အဆင့်မြှင့်ပွိုင့် ၂ ခု... အတွေ့အကြုံ ၅ မှတ်နှင့် ကြေးဒင်္ဂါး ၂၀ ရရှိပါသည်"

စနစ်၏ သတိပေးချက်များက ဆက်တိုက် ထွက်ပေါ်လာသည်။

"စနစ် သတိပေးချက်... ဂုဏ်ယူပါသည်... သင်သည် အဆင့် ၂ သို့ အောင်မြင်စွာ တက်လှမ်းနိုင်ခဲ့ပြီး အဆင့်မြှင့်ပွိုင့် ၂၀ ရရှိကာ ကိုယ်ရေး အချက်အလက် အသစ်များကို စနစ်ဖန်သားပြင်မှာ ဝင်ကြည့်လိုက်ပါ"

"ဟူး... နောက်ဆုံးတော့ အဆင့်တက်သွားပြီ"

ကျိုးဟန်၏ စိတ်ထဲတွင် အလွန် ဝမ်းသာသွားသည်။ အဆင့်တက်ပြီးနောက် အချက်အလက်များကို ကြည့်ရန် ပြင်ဆင်နေစဉ် သူ၏မျက်လုံးများ ဝင်းလက်သွားသည်။ ဤတစ်ကြိမ်တွင် ကံကောင်းစွာဖြင့် ပစ္စည်းတစ်ခု ကျလာသည်ကို တွေ့လိုက်ရသည်။