အခန်း ၁၉

အခန်း (၁၉) ဓားတစ်ချက်တည်းနဲ့ ချက်ချင်းသတ်ဖြတ်ခြင်း နှင့် ချန်ပေ့ရွှမ်၏ ရန်စမှု

ကြီးမားသော လူအုပ်ကြီးမှာ ထွက်ခွာသွားကြပြီး အနည်းငယ်သာ ကျန်ရစ်ကာ စောင့်ကြည့်နေကြသည်။

"ဟူး... နောက်ဆုံးတော့ အမီရောက်လာပြီပဲ..."

မြေကွက်လပ်ပေါ်ရှိ ဘော့စ်ကို မြင်လိုက်ရချိန်တွင် ပြေးလာသော ကျိုးဟန်မှာ သက်ပြင်းချလိုက်မိသည်။

တစ်မိနစ်ခန့် အမောဖြေပြီးနောက် ကျိုးဟန်က သွေးဆာနေသော မိစ္ဆာပင့်ကူကြီးအပေါ် အကဲဖြတ်ခြင်း စွမ်းရည်ကို အသုံးပြုလိုက်သည်။

"စနစ် သတိပေးချက်... ပစ်မှတ်နှင့် သင့်ကြားရှိ လယ်ဗယ် ကွာဟချက် အရမ်းကြီးမားလွန်းသဖြင့် အကဲဖြတ်ခြင်း မအောင်မြင်ပါ..."

'ဟင်... အကဲဖြတ်လို့ မရဘူးလား...'

ဤကဲ့သို့ အခြေအနေမျိုးကို ကျိုးဟန် ကြုံတွေ့ရသည်မှာ ပထမဆုံးအကြိမ် ဖြစ်သည်။ အကဲဖြတ်ခြင်း စွမ်းရည်က အစပြုစွမ်းရည်တစ်ခု ဖြစ်သော်လည်း အလွန် အသုံးဝင်လှသည်။

ပစ်မှတ်၏ အချက်အလက်များကို သိရှိထားမှသာ သင့်လျော်သော တိုက်ခိုက်ရေး နည်းဗျူဟာများကို ရေးဆွဲနိုင်မည် မဟုတ်ပါလား။

'အဆင့်မြှင့်ပြီးရင် ဘယ်လို အကျိုးသက်ရောက်မှု ရှိမလဲ မသိဘူး...'

"စနစ် သတိပေးချက်... သင်သည် ပင်ကိုစွမ်းရည် အကန့်အသတ်မဲ့ အဆင့်မြှင့်တင်ခြင်းကို အသုံးပြုလိုက်ပါသည်... အကဲဖြတ်ခြင်း စွမ်းရည်ကို နှစ်ကြိမ် အဆင့်မြှင့်တင်မှု အောင်မြင်ပါသည်... ကျေးဇူးပြု၍ စစ်ဆေးကြည့်ပါ..."

အကဲဖြတ်ခြင်း (၂ ကြိမ်မြှင့်)

အကျိုးသက်ရောက်မှု - လယ်ဗယ် ကွာဟချက်ကို လျစ်လျူရှုကာ မည်သည့် ပစ်မှတ်၏ အချက်အလက်များကိုမဆို စစ်ဆေးနိုင်ပါသည် ထို့အပြင် ပစ်မှတ်၏ အားနည်းချက်ကို ဖော်ထုတ်ပေးနိုင်ပြီး အားနည်းချက်ကို တိုက်ခိုက်ပါက ၂ ဆမှ ၅ ဆအထိ ထိခိုက်မှု ပိုမို ရရှိစေမည်ဖြစ်ပါသည်

တကယ်ပင် အကျိုးသက်ရောက်မှု ရှိသွားသည်။ ထို့အပြင် အားနည်းချက်ကို ဖော်ထုတ်ပေးနိုင်ပြီး အားနည်းချက်ကို တိုက်ခိုက်ပါက အပြင်းအထန် ထိခိုက်မှုများကိုပါ ပေါင်းထပ်၍ ရနိုင်သေးသည်။

ယခင်က ကျိုးဟန်သည် အကဲဖြတ်ခြင်း ကို အထောက်အကူပြု စွမ်းရည်တစ်ခုအဖြစ်သာ သတ်မှတ်ထားပြီး ဂရုမစိုက်ခဲ့ပေ။ ယခု အချက်အလက်များကို စစ်ဆေး၍မရသော အခြေအနေမျိုး မကြုံရပါက သူ အဆင့်မြှင့်တင်ရန် တွေးမိမည်မဟုတ်ပေ။

ဤမျှ အသုံးဝင်မည်မှန်း သိပါက စောစောကတည်းက သူ အဆင့်မြှင့်ထားပြီး ဖြစ်မည်။

ထပ်မံ၍ အကဲဖြတ်ကြည့်လိုက်သောအခါ ပစ်မှတ်၏ အချက်အလက် ဖန်သားပြင်မှာ ထွက်ပေါ်လာခဲ့သည်။

သွေးဆာနေသော မိစ္ဆာပင့်ကူကြီး

အရည်အသွေး - ငွေအဆင့်

အဆင့် - ၂၀

သွေးပမာဏ - ၂၁၀၀

တိုက်ခိုက်မှု - ၅၁၃

အကာအကွယ် - ၁၇၇

စွမ်းရည် ၁ - အဆိပ်ငွေ့ (၁၀ မီတာ ပတ်လည်အတွင်းရှိ ရန်သူအားလုံးကို ၁၀ စက္ကန့်ကြာ တစ်စက္ကန့်လျှင် သွေး ၁၀၀၀ လျော့ကျစေမည်ဖြစ်ပြီး စောင့်ဆိုင်းချိန် ၂၅ စက္ကန့် ကြာမြင့်မည်)

စွမ်းရည် ၂ - သွေးစုပ်ခြင်း (ထိခိုက်မှု ဖြစ်စေပြီးနောက် တိုက်ခိုက်မှု၏ ၆၀ ရာခိုင်နှုန်းနှင့် ညီမျှသော သွေးပမာဏကို ပြန်လည် ပြည့်ဝစေမည်)

ဖော်ပြချက် - အဆိပ်ပြင်းထန်ပြီး သွေးပြန်တက်နှုန်း အလွန်မြန်ဆန်သဖြင့် အချိန်ဆွဲ၍ မတိုက်ခိုက်သင့်ပါ ခေါင်းနှင့် ခြေထောက်များမှာ အားနည်းချက် ဖြစ်ပါသည်

"ဒါက ငွေအရည်အသွေးရှိတဲ့ ကမ္ဘာ့ဘော့စ်လား... ဒီလောက်တောင် အားနည်းတာလား..."

အချက်အလက်များကို ကြည့်ပြီးနောက် ကျိုးဟန်က ညည်းတွားလိုက်သည်။

ဒီကစားသမားတွေက တကယ်ကို အသုံးမကျလွန်းဘူးပဲ။ လူတွေ ဒီလောက် အများကြီး ဝိုင်းတိုက်နေတာတောင် ဘော့စ်ကို နည်းနည်းလေးမှ ထိခိုက်အောင် မလုပ်နိုင်ကြဘူး။ ဒီလို ဘော့စ်မျိုးဆိုလျှင် ကျိုးဟန် တစ်ယောက်တည်း ဆယ်ကောင်လောက်ကို သက်တောင့်သက်သာ ရှင်းပစ်နိုင်သည်။

အဆိပ်ငွေ့ စွမ်းရည်က သွေးလျော့မြန်သော်လည်း ကျိုးဟန်တွင် အဆိပ်ဒဏ်ခံနိုင်ရည် ရှိနေသည့်အပြင် တစ်စက္ကန့်လျှင် သွေး ၉၀၀ ပြန်တက်သည့် အထူးစွမ်းရည်လည်း ရှိနေသေးရာ သူ့အတွက် ဘာအန္တရာယ်မှ မရှိပေ။

သွေးပြန်တက်စေသည့် သွေးစုပ်ခြင်း စွမ်းရည် ရှိနေသော်လည်း စုစုပေါင်း သွေးပမာဏ ၂၁၀၀ သာ ရှိသည့်အတွက် ကျိုးဟန်အတွက်တော့ ပျော့ဖတ်နေသော အကောင်လေး တစ်ကောင်မျှသာ ဖြစ်သည်။

ကျိုးဟန်က အချိန်ဆွဲမနေတော့ဘဲ သံမဏိဓားကို ကိုင်ကာ ရှေ့သို့ တက်သွားလိုက်သည်။ သူ အမြန်လှုပ်ရှားရမည် ဖြစ်သည်။

အဘယ်ကြောင့်ဆိုသော် ကမ္ဘာ့ဘော့စ် ထွက်ပေါ်လာသည့် အချိန်မှာ ကန့်သတ်ချက် ရှိနေသောကြောင့် ဖြစ်သည်။ သတ်မှတ်ထားသော အချိန်အတွင်း မသတ်ဖြတ်နိုင်ပါက အလိုအလျောက် ပျောက်ကွယ်သွားမည် ဖြစ်သည်။

ထို့ကြောင့် ကျက်ပြီးသား ဘဲတစ်ကောင်ကို သူ အလွတ်ခံမည် မဟုတ်ပေ။

"ဟေး လူလေး... မင်းက အခုမှ ရောက်လာတာမလား... သွားပြီး အသေမခံနဲ့... ဒီဘော့စ်က မင်း တစ်ယောက်တည်း ရင်ဆိုင်နိုင်တဲ့ကောင် မဟုတ်ဘူး..."

ကျိုးဟန်က ဘော့စ်ဆီသို့ တိုက်ရိုက် လျှောက်သွားသည်ကို မြင်သောအခါ သဘောကောင်းသော ကစားသမား တစ်ယောက်က အလျင်အမြန် သတိပေးလိုက်သည်။

ကျိုးဟန်က နောက်မှ ရောက်လာသူဖြစ်သဖြင့် အစောပိုင်းက ကစားသမား အများအပြား သေဆုံးသွားခဲ့သည့် ကြောက်မက်ဖွယ် မြင်ကွင်းကို မမြင်ခဲ့ရဟု သူက ထင်နေသည်။

ကျိုးဟန်က ထိုလူ၏ စကားကို ကြားသောအခါ တစ်ချက် ကြည့်လိုက်ပြီး ခေါင်းညိတ်ပြလိုက်သည်။ ထို့နောက် တားဆီးမှုများကို ဂရုမစိုက်ဘဲ ရှေ့သို့သာ ဆက်လက် လျှောက်သွားခဲ့သည်။

"ဟ... ဒီကောင်လေး ငါ ပြောတာကို နားမလည်တာလား..."

"ဟီးဟီး... လူငယ်တွေဆိုတာ ဒီလိုပါပဲ... လူလုံးထွက်ပြချင်ကြတာပေါ့... ဒါပေမဲ့ ဒီတစ်ခါတော့ ပေးဆပ်ရမယ့် တန်ဖိုးက ကြီးသွားလိမ့်မယ်..."

"အကောင်းဆိုး နားမလည်တဲ့ကောင်... ဒီဘော့စ်က သတ်ဖို့ အရမ်း လွယ်နေမယ်ဆိုရင် ငါတို့ လူအုပ်ကြီးက ဒီမှာ ဘာလို့ ငုတ်တုတ် ထိုင်စောင့်နေပါ့မလဲ..."

"အထာဖမ်းချင်ရင်တောင် နေရာကြည့်ရွေးဦးလေ... အခုတော့ အသက်နဲ့ ရင်းရတော့မယ်..."

"အဆင့်တစ် နေရာက ကျိုးဟန်တောင် ဒီလောက် အထာမဖမ်းဘူး... အစွမ်းထက်တဲ့သူတွေက ဘယ်လောက်တောင် နှိမ့်ချပြီး နေသလဲ ဆိုတာ ကြည့်ဦး..."

"ဟုတ်တယ်... မင်း ကြည့်နေလိုက်... ဘော့စ်အနား ရောက်တာနဲ့ ဒီကောင် ချက်ချင်း သေသွားလိမ့်မယ်..."

ယခုအချိန်တွင် ကျိုးဟန်က ဘော့စ်၏ အားနည်းချက်ကို တိတိကျကျ တိုက်ခိုက်နိုင်ရန်အတွက် အနီးကပ် ချဉ်းကပ်သွားခြင်း ဖြစ်သည်။

သွေးဆာနေသော မိစ္ဆာပင့်ကူကြီးက ကျိုးဟန် ဝင်ရောက်လာသည်ကို မြင်သောအခါ မျက်လုံးများထဲတွင် ဒေါသများ ထွက်ပေါ်လာပြီး အဆိပ်ငွေ့များကို မှုတ်ထုတ်လိုက်သည်။

"အဲဒီ အစိမ်းရောင် အငွေ့တွေပဲ... အခု ချက်ချင်း သေတော့မယ်... ငါ စက္ကန့် မှတ်ပြမယ်... တစ်စက္ကန့်..."

"နှစ်စက္ကန့်..."

"သုံးစက္ကန့်... ဘာအခြေအနေကြီးလဲ... သုံးစက္ကန့်ရှိနေပြီကို မသေသေးဘူးလား..."

"တစ်ခုခု မှားနေပြီ... ဒါ လုံးဝ မဖြစ်နိုင်ဘူး..."

"ဒီလူက နည်းနည်းတော့ ကြမ်းတဲ့ပုံပဲ..."

"သေစမ်း... ဒါက ဘော့စ် တစ်ယောက်ပဲ... ငါတို့ အထင်သေးမိသွားတာ..."

အဆိပ်ငွေ့ကို ရင်ဆိုင်ရချိန်တွင် ကျိုးဟန်က အနည်းငယ်မျှ မကြောက်ရွံ့ပေ။

ဓားဖြင့် တစ်ချက် ခုတ်ချလိုက်ပြီး လေခွင်းဓား စွမ်းရည်ကို ထုတ်လွှတ်လိုက်ရာ ပြင်းထန်လှသော ဓားစွမ်းအင် သုံးခုက သွေးဆာနေသော မိစ္ဆာပင့်ကူကြီး၏ ခေါင်းဆီသို့ တိုက်ရိုက် ဝင်ရောက်သွားသည်။

''-၂၇၆၉''

အားနည်းချက်ကို တိုက်ခိုက်နိုင်မှု အကျိုးသက်ရောက်မှုနှင့် လေခွင်းဓား ၏ ၅ ဆသော ထိခိုက်မှုတို့ ပေါင်းစပ်သွားသည်။

ဓားတစ်ချက်တည်းနှင့် ချက်ချင်း သတ်ဖြတ်လိုက်ခြင်းပင်။

"ဘုန်း..."

ထုတ်လွှတ်ခဲ့သော ထိခိုက်မှု ပမာဏ

၁ ကျိုးဟန် ၁၀၀ ရာခိုင်နှုန်း

သွေးဆာနေသော မိစ္ဆာပင့်ကူကြီး၏ ကြီးမားသော ခန္ဓာကိုယ်ကြီးက မြေပြင်ပေါ်သို့ ပြင်းထန်စွာ ပြုတ်ကျသွားပြီး အသိစိတ်မဲ့စွာဖြင့် တဆတ်ဆတ် တုန်ယင်နေတော့သည်။

"ဒါ... ဒါ ဘာဖြစ်သွားတာလဲ... ဒီလိုနဲ့ပဲ ဘော့စ်ကြီး သေသွားပြီလား..."

"ဘာ... မဖြစ်နိုင်တာ... ဒီလောက် အစွမ်းထက်တဲ့သူကို ငါ တစ်ခါမှ မမြင်ဖူးဘူး..."

"အခု မင်း မြင်ရပြီလေ... ဘုရားရေ... ဒါက တကယ်ကို ကြောက်စရာကောင်းလွန်းတယ်..."

"ချက်ချင်း သတ်လိုက်တာလား... မင်း ငါ့ကို နောက်နေတာလား... ဒီဘော့စ်က သူ့ရှေ့မှာ စက္ကူရုပ်လိုပဲ... အလွယ်လေး အသတ်ခံလိုက်ရတယ်..."

"ငါ့ရဲ့ ယုံကြည်မှုတွေတောင် ပြောင်းလဲသွားပြီ..."

"ဒေသတွင်း ကြေညာချက်... ကစားသမား ကျိုးဟန်သည် ကမ္ဘာ့ဘော့စ်ကို အောင်မြင်စွာ သတ်ဖြတ်နိုင်ခဲ့ပါသည်... ဆုကြေးအနေဖြင့် ရွှေဒင်္ဂါး ၂၀ ပြားနှင့် ငွေသေတ္တာ ၂ လုံး ရရှိပါသည်..."

မကြာမီ စနစ်ကြေညာချက်က လူတိုင်း၏ ခေါင်းထဲတွင် ထွက်ပေါ်လာခဲ့သည်။

"ကျိုးဟန် သတ်လိုက်တာလား... ဒါဆို ဒီရှေ့က လူက..."

"သူက ကျိုးဟန်ပေါ့... ဒါကြောင့် သူက ဒီလောက် ယုံကြည်ချက်တွေ အပြည့်နဲ့ သတ္တိရှိနေတာကိုး... ငါက ခုနက သူ့ကိုတောင် သွားပြီး လှောင်နေသေးတယ်..."

"ထင်တဲ့အတိုင်းပဲ... ဒါက အဆင့်တစ် နေရာကလူရဲ့ အရှိန်အဝါပဲ..."

"အရမ်း မိုက်ပြီး အရမ်း ယောကျ်ားဆန်တာပဲ... ရည်းစား ရှိနေပြီလား မသိဘူး..."

ထိုအချိန်တွင် သွေးဆာနေသော မိစ္ဆာပင့်ကူကြီး၏ အလောင်းက ပေါက်ကွဲထွက်သွားပြီး ငွေရောင် အလင်းတန်း အချို့ လွင့်ထွက်လာကာ လေထဲတွင် ခေတ္တမျှ တောက်ပနေပြီးနောက် မြေပြင်ပေါ်သို့ ကျလာခဲ့သည်။

'ငွေရောင် အလင်းတန်းလား...'

'ငွေအရည်အသွေး ပစ္စည်းတွေ ကျလာတာလား...'

'ပစ္စည်းတွေ အများကြီးပဲ...'

'ကမ္ဘာ့ဘော့စ်က ဒီလောက်တောင် ပစ္စည်းတွေ ကျတာလား...'

'ဒါက ငါ့ရဲ့ ထိခိုက်မှု ပမာဏ ရာခိုင်နှုန်းနဲ့ သက်ဆိုင်နေလို့ ဖြစ်မယ်...'

မည်သို့ပင်ဆိုစေကာမူ သူက ထိခိုက်မှု ၁၀၀ ရာခိုင်နှုန်းကို ရယူထားပြီး နောက်ဆုံး သေစေနိုင်သည့် တိုက်ခိုက်မှုကိုလည်း သူကသာ လုပ်ခဲ့သည် မဟုတ်ပါလား။ ဤဆုကြေးများ အားလုံးက သူ့အတွက်သာ ဖြစ်သည်။ ကျိုးဟန်၏ စိတ်ထဲတွင် အလွန် ပျော်ရွှင်သွားမိသည်။

"သေစမ်း... ငါ ငွေရောင် အလင်းတန်း ၅ ခုကို တွေ့လိုက်တယ်... ဒါက ငွေအရည်အသွေး ပစ္စည်း ၅ ခု ဆိုတဲ့ အဓိပ္ပာယ်ပဲ..."

"သောက်ကျိုးနည်း... တကယ်ကို မနာလိုဖြစ်စရာပဲ... ငါသာ တစ်ခုလောက် ရရင် သိပ်ကောင်းမှာပဲ..."

"ဒီငွေအရည်အသွေး ပစ္စည်းတွေနဲ့ဆို ကျိုးဟန်က ပိုပြီး ကြောက်စရာ ကောင်းလာတော့မှာပဲ..."

ဤမြင်ကွင်းကို မြင်လိုက်ရသည့်အခါ ကစားသမားများ၏ တုံ့ပြန်မှုများက မတူညီကြပေ။

တချို့က အားကျနေကြပြီး တချို့က မနာလို ဖြစ်နေကြသည်။ တစ်ယောက်ချင်းစီ၏ မျက်လုံးများက တောက်ပနေကြပြီး စိတ်ထဲတွင် ဘာတွေ တွေးနေကြမှန်း မသိနိုင်ပေ။

လူအုပ်ထဲတွင် ရပ်နေသော ချန်ပေ့ရွှမ်က အစကတည်းက ကျိုးဟန်၏ လှုပ်ရှားမှုများကို ကြည့်နေခဲ့သည်။

သူ၏ စိတ်ထဲတွင် လောဘတရားများနှင့် အမုန်းတရားများ ပြည့်နှက်နေသည်။ သူက B အဆင့် ပင်ကိုစွမ်းရည်ရှင် ဖြစ်ပြီး ပါရမီပါသူ တစ်ယောက် ဖြစ်သော်လည်း ကျိုးဟန်၏ ပြိုင်ဘက် လုံးဝ မဟုတ်ပေ။

ကျိုးဟန် တစ်ခုခု အခွင့်အရေး ရသွားမည်ဟု သူ ခန့်မှန်းမိသည်။

"ကျိုးဟန်... ငွေအရည်အသွေး ပစ္စည်းတွေကို ထုတ်ပေးလိုက်စမ်း... ငါတို့ လူတွေ ဒီလောက်အများကြီး ရှိနေတာ ဘာတစ်ခုမှ မရလိုက်ဘူး... မင်း တစ်ယောက်တည်း အကုန် ယူချင်နေတာလား..."

ချန်ပေ့ရွှမ်က ခဏမျှ စဉ်းစားပြီးနောက် လူအုပ်ထဲမှ ထွက်လာကာ ကျိုးဟန်ကို တိုက်ရိုက် ရန်စလိုက်သည်။

သေချာပေါက် သူ တစ်ယောက်တည်းဖြင့် ကျိုးဟန်ကို အနိုင်မယူနိုင်မှန်း သိသည်။ ထို့ကြောင့် သူက ဤနေရာရှိ လူအားလုံး၏ လောဘကို အသုံးချလိုက်ခြင်း ဖြစ်သည်။

သူကသာ အစဖော်ပေးလိုက်ပါက လူတိုင်း၏ စိတ်လှုပ်ရှားမှုများ မြင့်တက်လာပြီး ကျိုးဟန်ကို အားလုံးက ဝိုင်းဝန်း ဆန့်ကျင်ကြမည် ဖြစ်သည်။

"ကျိုးဟန် မင်း အရမ်း လွန်လွန်းနေပြီ... ပစ္စည်းတွေကို အမြန် ထုတ်ပေးလိုက်စမ်း..."

"ဟုတ်တယ်... မင်းက အဆင့်တစ် နေရာကို ရောက်နေပြီလေ... ငါတို့က အခုထိ သာမန် ပစ္စည်းတွေတောင် မရသေးဘူး..."

"ငါတို့ကို အကျိုးအမြတ် နည်းနည်းပါးပါးမှ မခွဲပေးဘူးဆိုရင် ဒီနေ့ မင်း ဒီကနေ ထွက်သွားရမယ် မထင်နဲ့..."

"သူ့ဆီမှာ ပစ္စည်းကောင်းတွေ အများကြီး ရှိနေမှာပဲ... အားလုံးပဲ သူ့ကို တားထားကြ... ထွက်ပြေးခွင့် မပေးနဲ့..."