အခန်း ၂၃

အခန်း (၂၃) ငါးကြိမ် အဆင့်မြှင့်တင်ခြင်းနှင့် ရွှေပစ္စည်းများ

ဤအချက်အလက်များက ကျိုးဟန် ယခုလေးတင် စနစ်မှတစ်ဆင့် သိရှိထားခဲ့ခြင်း ဖြစ်သည်။

"ကဲ... အခု ဘာမှမဖြစ်တော့ဘူး... ဘယ်လိုလဲ... အစ်ကိုက အရမ်းမိုက်တယ်မလား..."

ကျိုးဟန်က ကြောက်ရွံ့ပြီး မျက်လုံးမှိတ်ထားသော ဟန်ရှန်နင်ကို ကြည့်ကာ ဂုဏ်ယူဝင့်ကြွားစွာ ပြောလိုက်သည်။

ကျိုးဟန်က သွေးအရိပ် ပိုးမိစ္ဆာကို သတ်ဖြတ်လိုက်ပြီးနောက် မြေပြင်ပေါ်ရှိ များပြားလှသော ပိုးကောင်များအားလုံး မြေအောက်သို့ ပြန်လည် ဝင်ရောက်သွားကြပြီ ဖြစ်သည်။

"နင် ငါ့ကို လာမလိမ်နဲ့... ဒီလောက်များတဲ့ ပိုးကောင်တွေကို ဒီလောက်မြန်မြန် ဘယ်လိုလုပ် ရှင်းပစ်နိုင်မှာလဲ..."

ဟန်ရှန်နင်က ကျိုးဟန် သူမကို နောက်ပြောင်နေသည်ဟု ထင်ပြီး လုံးဝ မယုံကြည်ပေ။

"နင်က စကားမနားထောင်ဘူးပဲ... ဖြန်း..."

ကျိုးဟန်က သူမ၏ တင်ပါးကို လက်ဝါးဖြင့် တစ်ချက် ရိုက်ချလိုက်သည်။

ကျယ်လောင်သော အသံလေး ထွက်ပေါ်လာပြီး အထိအတွေ့က အလွန် နူးညံ့လှသည်။

ဟန်ရှန်နင် တစ်ယောက် ကြောင်အမ်းသွားပြီးနောက် အလျင်အမြန် မတ်တပ်ရပ်လိုက်ကာ မျက်နှာလေး နီရဲသွားတော့သည်။

"လူဆိုး... အရမ်း ရှက်စရာကောင်းတာပဲ... သူများ အဲဒီနေရာကို ရိုက်ရလား..."

ဟန်ရှန်နင်က ကျိုးဟန်ကို လက်သီးဆုပ်လေးများဖြင့် တရစပ် ထုရိုက်တော့သည်။

"စကားမနားထောင်လို့လေ... နောက်တစ်ခါ ထပ်ရဲသေးလား ကြည့်ရသေးတာပေါ့..."

ကျိုးဟန်က ပြောပြီးနောက် သေတ္တာအနီးသို့ လျှောက်သွားလိုက်သည်။

သော့ကို ယူ၍ သေတ္တာ၏ သော့ပေါက်ထဲသို့ ထည့်ကာ ဖြည်းညှင်းစွာ လှည့်လိုက်ရာ ပွင့်သွားတော့သည်။

သေတ္တာ ပွင့်သွားသည့်အချိန်တွင် ရွှေရောင် အလင်းတန်း နှစ်ခုက ကောင်းကင်သို့ ထိုးတက်သွားသည်။

လေထဲတွင် ခေတ္တမျှ တောက်ပနေပြီးနောက် သေတ္တာထဲသို့ ပြန်လည် ကျဆင်းသွားသည်။

'သောက်ကျိုးနည်း...'

'ရွှေ ပစ္စည်းတွေ ကျလာတာလား...'

'ထင်တဲ့အတိုင်းပဲ ပစ္စည်းနှစ်ခု ဖြစ်နေတယ်...'

ကျိုးဟန်က စိတ်လှုပ်ရှားမှုကို ထိန်းချုပ်ကာ သေတ္တာထဲသို့ အလျင်အမြန် နှိုက်ယူလိုက်သည်။

ပထမဆုံး ဖိနပ်တစ်ရန်ကို ထုတ်ယူလိုက်ရာ ရွှေရောင် စစ်ဖိနပ် ဖြစ်သည်။

ထို့နောက် လက်စွပ်တစ်ကွင်း ထွက်လာပြီး စစ်မှန်သော ဝိညာဉ် လက်စွပ် ဖြစ်သည်။

အခြား ငွေ ပစ္စည်း ၄ ခုလည်း ရှိသေးရာ ကျိုးဟန်က အသုံးဝင်မည့် အရာများကို လဲလှယ် ဝတ်ဆင်လိုက်သည်။

ပစ္စည်းများ အပြည့်အဝ ရရှိပြီးနောက် ကျိုးဟန်နှင့် ညီအစ်မနှစ်ယောက်တို့ ထိုနေရာမှ ထွက်ခွာလာခဲ့ကြသည်။

လက်ထဲတွင် အဆင့်မြှင့်ပွိုင့် သိပ်မရှိတော့သဖြင့် ကျိုးဟန် အလျင်စလို အဆင့်မမြှင့်သေးပေ။

သူက သားရဲများ စုဝေးရာ နေရာများစွာကို ရှာဖွေပြီး ရူးသွပ်စွာ သတ်ဖြတ်ခဲ့ရာ နောက်ဆုံးတွင် အဆင့်မြှင့်ပွိုင့် သောင်းဂဏန်းကျော် ရရှိသွားခဲ့သည်။

"ဟူး... အရမ်း ပင်ပန်းတာပဲ..."

ကျိုးဟန်၏ စွမ်းအားက အလွန် ကြီးမားသော်လည်း ဤကဲ့သို့ အဆက်မပြတ် ပြင်းထန်သော တိုက်ပွဲများကြောင့် အနည်းငယ် ပင်ပန်းနွမ်းနယ်လာသည်။

"စနစ် သတိပေးချက်... သင့်၏ အဆင့်သည် ဤမြေပုံ၏ အဆင့်ကန့်သတ်ချက်ကို ကျော်လွန်နေပါသဖြင့် နာရီဝက်အတွင်း ထွက်ခွာပေးပါ..."

"စနစ် သတိပေးချက်... သတ်မှတ်ချိန်အတွင်း မထွက်ခွာပါက တစ်မိနစ်လျှင် အတွေ့အကြုံမှတ် ၁% နုတ်ယူခံရမည်ဖြစ်ပါသည်..."

'အဆင့်ကန့်သတ်ချက်ကို ကျော်သွားပြီလား...'

မြူခိုးတောအုပ်၏ အမြင့်ဆုံး အဆင့်ကန့်သတ်ချက်မှာ အဆင့် ၁၀ သာ ဖြစ်ကြောင်းကို ကျိုးဟန် ရုတ်တရက် သတိရလိုက်သည်။

ယခု သူ၏ အတွေ့အကြုံမှတ်က အဆင့် ၁၀ (၅၀.၅%) သို့ ရောက်ရှိနေပြီ ဖြစ်သည်။

စနစ်၏ သတိပေးချက်ကို ကြားပြီးနောက် ကျိုးဟန်လည်း ဆက်မနားတော့ဘဲ ထွက်ပေါက်ရှိရာသို့ အလျင်အမြန် သွားတော့သည်။

ခက်ခက်ခဲခဲ ရရှိထားသော အတွေ့အကြုံမှတ်များ အနုတ်ခံရပါက သူ၏ စိတ်ကို အလွန် အနှောင့်အယှက် ဖြစ်စေလိမ့်မည်။

လမ်းလျှောက်နေစဉ် ကျိုးဟန်က သူ့အတွက် အသုံးဝင်မည့် အသုံးအဆောင်ပစ္စည်းများကို အဆင့်မြှင့်တင်လိုက်သည်။

မကြာမီ အချက်အလက်များ ထွက်ပေါ်လာသည်။

ရွှေရောင် စစ်ဖိနပ် (၅ ကြိမ်မြှင့်)

အရည်အသွေး - ရွှေ

အခြေခံဂုဏ်သတ္တိများ - သွားလာမှုအမြန်နှုန်း +၁၀၀ သွေးပမာဏ +၂၀၀၀

အထူးစွမ်းရည် ၁ - ၅၀% သော ဖြစ်နိုင်ချေဖြင့် ထိန်းချုပ်မှုများကို ခုခံနိုင်မည်

အထူးစွမ်းရည် ၂ - တိုက်ခိုက်ရေး အခြေအနေတွင် သွားလာမှု အမြန်နှုန်း ၆၀% တိုးလာမည်

အထူးစွမ်းရည် ၃ - ၃ မီတာအတွင်းရှိ မဟာမိတ်များအားလုံး၏ သွားလာမှု အမြန်နှုန်းကို ၁၀% တိုးစေမည်

ဖော်ပြချက် - အသွင်အပြင် လှပပြီး အလွန် မြန်ဆန်ကာ ထွက်ပြေးရာတွင် အလွန် ကောင်းမွန်သော လက်နက်တစ်ခု ဖြစ်ပါသည်

'တကယ် ကြမ်းတာပဲ... ငါးကြိမ် အဆင့်မြှင့်ထားတဲ့ အကျိုးသက်ရောက်မှုက တကယ်ကို မတူဘူးပဲ...'

အထူးစွမ်းရည် သုံးခု ထွက်ပေါ်လာပြီး ပို၍ ကြောက်စရာ ကောင်းလာသည်။

အထူးစွမ်းရည် ၁ ၏ ထိန်းချုပ်မှု ခုခံနိုင်စွမ်းမှာ ၅၀% အထိ တိုးလာပြီး အထူးစွမ်းရည် ၂ ကလည်း အနည်းငယ် တိုးလာသည်။

အသစ်ထွက်လာသော အထူးစွမ်းရည် ၃ ကတော့ မဟာမိတ်များကို စွမ်းအားမြှင့်ပေးနိုင်သည့် စက်ဝန်းပုံစံ စွမ်းရည်တစ်ခု ဖြစ်သည်။

နောင်တွင် အကြိမ်အရေအတွက် ပိုမို အဆင့်မြှင့်လိုက်ပါက သူ၏ ဘေးနားရှိ အသင်းဖော်များ ရရှိမည့် အကျိုးသက်ရောက်မှုက ပိုမို ကြီးမားလာမည်ဖြစ်ပြီး အားလုံးက မပျံသန်းချင်လျှင်တောင် ပျံသန်းနိုင်ကြတော့မည် ဖြစ်သည်။

ထို့နောက် အခြား ရွှေ အဆင်တန်ဆာ ၏ အချက်အလက်များကို ဆက်ကြည့်လိုက်သည်။

စစ်မှန်သော ဝိညာဉ် လက်စွပ် (၅ ကြိမ်မြှင့်)

အရည်အသွေး - ရွှေ

အခြေခံဂုဏ်သတ္တိများ - တိုက်ခိုက်မှု +၇၀၀

အထူးစွမ်းရည် ၁ - ၂၀% သော ဖြစ်နိုင်ချေဖြင့် ပစ်မှတ်၏ အကာအကွယ်ကို လျစ်လျူရှုမည်

အထူးစွမ်းရည် ၂ - ထိခိုက်မှု ပမာဏ ၁၀၀၀၀၀ ရရှိတိုင်း စစ်မှန်သော ဝိညာဉ် တစ်ခုကို တစ်ကြိမ် ဆင့်ခေါ်နိုင်မည် (၀/၁၀၀၀၀၀)

အထူးစွမ်းရည် ၃ - အစွမ်းသတ္တိ အားလုံး၏ ခံနိုင်ရည်ကို ၂၀% တိုးစေမည်

ဖော်ပြချက် - စစ်မှန်သော ဝိညာဉ်၏ ကာကွယ်စောင့်ရှောက်မှု ပါဝင်ပြီး တိုက်ခိုက်ရေး အကျိုးသက်ရောက်မှု အလွန် အစွမ်းထက်ပါသည်

တိုက်ခိုက်မှု စွမ်းအားက တိုက်ရိုက် ၇၀၀ တိုးသွားသည်။

အထူးစွမ်းရည် ၁ က အကာအကွယ်ကို လျစ်လျူရှုနိုင်ရာ တကယ်ကို အစွမ်းထက်လှသည်။ နောက်ပိုင်းတွင် ဘော့စ်များ၏ အကာအကွယ်မှာ မည်မျှ ကြောက်စရာကောင်းမည်ကို တွေးကြည့်စရာပင် မလိုပေ။

အကာအကွယ် လျစ်လျူရှုသည့် ဤအထူးစွမ်းရည် ပါရှိနေသဖြင့် တိုက်ခိုက်မှု ပိုင်းတွင် အလွန် လွယ်ကူသွားမည် ဖြစ်သည်။

အထူးစွမ်းရည် ၂ ၏ စစ်မှန်သော ဝိညာဉ်ကို ဆင့်ခေါ်သည့် အကျိုးသက်ရောက်မှုက မည်သို့ရှိမည်ကို အသေးစိတ် မဖော်ပြထားသဖြင့် သေချာ မသိရသေးပေ။

အထူးစွမ်းရည် ၃ ကတော့ အစွမ်းသတ္တိ အားလုံး၏ ခံနိုင်ရည်ကို တိုးမြှင့်ပေးခြင်းဖြစ်ရာ ၃၆၀ ဒီဂရီ နေရာစုံမှ ဘက်စုံ ဖွံ့ဖြိုးတိုးတက်လာမည့် အနေအထားပင် ဖြစ်သည်။

လျှို့ဝှက်ငွေရောင် ခါးပတ် (၄ ကြိမ်မြှင့်)

အရည်အသွေး - ငွေ

အခြေခံဂုဏ်သတ္တိများ - သွေးပမာဏ +၈၀၀ အကာအကွယ် +၅၀

အထူးစွမ်းရည် ၁ - တိုက်ခိုက်ရေး အခြေအနေသို့ ရောက်ရှိပါက သွေးပမာဏ ကန့်သတ်ချက် ၅၀% တိုးလာမည်ဖြစ်ပြီး တိုက်ခိုက်မှုမှ ၁၀ စက္ကန့် ကင်းကွာသွားပါက ချက်ချင်း ပျောက်ကွယ်သွားမည်

အထူးစွမ်းရည် ၂ - တိုက်ခိုက်ခံရပြီးနောက် တိုက်ခိုက်မှုစွမ်းအား ၃၀% တိုးလာမည်ဖြစ်ပြီး ထပ်မံ ပေါင်းထပ်၍ မရပါ... ၁၀ စက္ကန့်အတွင်း နောက်ထပ် တိုက်ခိုက်မှု မခံရပါက စွမ်းအားမြှင့်တင်ခြင်း အကျိုးသက်ရောက်မှု ပျောက်ကွယ်သွားမည်

ဖော်ပြချက် - လျှို့ဝှက်ငွေရောင်ဖြင့် ပြုလုပ်ထားပြီး တိုက်ခိုက်ရေး အခြေအနေတွင် အလွန် ကောင်းမွန်စွာ စွမ်းဆောင်နိုင်ပါသည်

ငွေ ပစ္စည်းဖြစ်ပြီး ၄ ကြိမ်သာ အဆင့်မြှင့်ထားသဖြင့် အကျိုးသက်ရောက်မှုများက ရှေ့မှ ရွှေ ပစ္စည်းများလောက် ကြောက်စရာ မကောင်းပေ။

ကျိုးဟန်လည်း အများကြီး ထပ်မကြည့်တော့ဘဲ တိုက်ရိုက် ဝတ်ဆင်လိုက်သည်။

ဤမျှ ကောင်းမွန်သော ပစ္စည်းများကို ကျိုးဟန်က အထင်သေးနေသည်ကို အခြားကစားသမားများသာ သိသွားပါက သူတို့၏ စိတ်ထဲတွင် သူ့ကို မည်သို့ ကျိန်ဆဲကြမည်ကို မသိနိုင်ပေ။

ကျန်ရှိနေသော ငွေ ပစ္စည်း သုံးခုက အချက်အလက် သိပ်မကောင်းသလို ခန္ဓာကိုယ် အစိတ်အပိုင်းများလည်း ထပ်နေသဖြင့် ကျိုးဟန်က နှစ်ကြိမ် အဆင့်မြှင့်ပြီးနောက် ညီအစ်မနှစ်ယောက်ထံသို့ ပစ်ပေးလိုက်သည်။

ထိုအခါ မိန်းကလေး နှစ်ယောက်မှာ အံ့သြတကြီး အော်ဟစ်လိုက်ကြပြီး သူတို့၏ လှပသော မျက်လုံးများထဲတွင် အလင်းရောင်များ တောက်ပသွားကြသည်။

တစ်ချိန်တည်းမှာပင် ကျိုးဟန်၏ ပင်ကိုစွမ်းရည်မှာ ပစ္စည်းများကို အဆင့်မြှင့်တင်ခြင်းနှင့် သက်ဆိုင်နေမည်ကို သူတို့ သေချာသွားကြသည်။

အဘယ်ကြောင့်ဆိုသော် ယခု လက်ခံရရှိထားသော ငွေ ပစ္စည်းများ၏ အကျိုးသက်ရောက်မှုများက သာမန် ရွှေ ပစ္စည်းများထက်ပင် ကျော်လွန်နေသောကြောင့် ဖြစ်သည်။

သို့သော် ဤအကြောင်းကို သူတို့ လုံးဝ ထုတ်ပြောမည် မဟုတ်ပေ။ အကယ်၍ ထုတ်ပြောလိုက်လျှင်တောင် ကျိုးဟန်၏ ဤမျှ အစွမ်းထက်သော စွမ်းအားဖြင့် မည်သူက သူ့ကို အနိုင်ကျင့်နိုင်မည်နည်း။

ပစ္စည်းများ လဲလှယ် ဝတ်ဆင်ပြီးနောက် ကျိုးဟန်က ဇာတ်ကောင် အချက်အလက် ဖန်သားပြင်ကို ဖွင့်ကြည့်လိုက်သည်။

ကျိုးဟန်

အဆင့် - ၁၀ (၅၀.၅%)

အလုပ်အကိုင် - ဓားဝိညာဉ် (အဆင့် ၂၅ တွင် ပထမအကြိမ် စွမ်းအားနိုးကြားမည်)

သွေးပမာဏ - ၃၀၀၀ + ၄၄၀၀

တိုက်ခိုက်မှု - ၅၀၀ + ၁၀၀၀

အကာအကွယ် - ၁၀၀ + ၃၀၀

ပင်ကိုစွမ်းရည် - အကန့်အသတ်မဲ့ အဆင့်မြှင့်တင်ခြင်း

အခြေခံ ဂုဏ်သတ္တိများအားလုံး အမြောက်အမြား တိုးတက်လာသည်ကို မြင်သောအခါ ကျိုးဟန် ကျေနပ်စွာ ခေါင်းညိတ်လိုက်သည်။

ထို့နောက် အသုံးအဆောင်ပစ္စည်းများ၏ အချက်အလက်များကို ဆက်ကြည့်လိုက်သည်။

လက်နက် - လျှို့ဝှက်ငွေရောင် ဓားရှည် (တိုက်ခိုက်မှု ၃ ဆ ချက်ချင်းသတ်ဖြတ်ခြင်း)

အဆင်တန်ဆာ - စစ်မှန်သော ဝိညာဉ် လက်စွပ် (အကာအကွယ် လျစ်လျူရှုခြင်း စစ်မှန်သော ဝိညာဉ် ဆင့်ခေါ်ခြင်း ခံနိုင်ရည် ၂၀%)

ဦးထုပ် - ငန်းမွေး ဦးထုပ် (ထိခိုက်မှု ၂၀% လျှော့ချခြင်း အပြင်းအထန်တိုက်ခိုက်ခံရနိုင်ချေ ၃၀% လျှော့ချခြင်း)

အင်္ကျီ - အလင်းနက် ဝတ်ရုံရှည် (တစ်စက္ကန့်လျှင် သွေး ၅၀၀ ပြန်တက်ခြင်း ရှောင်တိမ်းနိုင်စွမ်း ၄၀%)

လက်ပတ် - သံစိမ်း လက်ပတ် (တစ်စက္ကန့်လျှင် သွေး ၄၀၀ ပြန်တက်ခြင်း ထိခိုက်မှု ၂၀% လျှော့ချခြင်း)

ခါးပတ် - လျှို့ဝှက်ငွေရောင် ခါးပတ် (တိုက်ခိုက်ရေး အခြေအနေတွင် သွေးပမာဏ ၅၀% တိုးခြင်း တိုက်ခိုက်မှု ၃၀% တိုးခြင်း)

ဘောင်းဘီ - ကျားရေ ဘောင်းဘီ (မြေပြင်အနေအထားအား လျစ်လျူရှုခြင်း ပစ်မှတ်၏ တိုက်ခိုက်မှု အမြန်နှုန်း ၁၀% လျှော့ချခြင်း)

ဖိနပ် - ရွှေရောင် စစ်ဖိနပ် (ထိန်းချုပ်မှုများကို ခုခံနိုင်စွမ်း ၅၀% တိုက်ခိုက်ရေး အခြေအနေတွင် သွားလာမှု အမြန်နှုန်း ၆၀% တိုးခြင်း သွားလာမှု အမြန်နှုန်း ၁၀% တိုးစေသော စက်ဝန်း)

ယခု မြူခိုးတောအုပ်အတွင်းရှိ သားရဲများမှာ အလွန် အားနည်းလွန်းနေပြီဖြစ်ပြီး ကျိုးဟန်၏ သာမန် တိုက်ခိုက်မှု တစ်ချက်ကိုပင် ခံနိုင်ရည် မရှိကြတော့ပေ။

ထို့အပြင် ရရှိသော အတွေ့အကြုံမှတ်များကလည်း အလွန် နည်းပါးလှသည်။

စနစ်၏ မဖြစ်မနေ သတိပေးချက် မရှိလျှင်တောင် သူက မြေပုံကို ပြောင်းလဲတော့မည် ဖြစ်သည်။

အဘယ်ကြောင့်ဆိုသော် မြူခိုးတောအုပ်က သူ့အတွက် စိန်ခေါ်မှု မရှိတော့သလို ပစ္စည်းကောင်းများလည်း ထပ်မံ မရနိုင်တော့သောကြောင့် ဖြစ်သည်။

ဝင်ပေါက်နှင့် နီးလာလေလေ ကစားသမားများ ပိုများလာလေလေ ဖြစ်သည်။

အဘယ်ကြောင့်ဆိုသော် ဤနေရာက မြူခိုးတောအုပ်၏ အစွန်အဖျား ဒေသဖြစ်ပြီး သားရဲများ၏ အဆင့် အနိမ့်ဆုံး နေရာ ဖြစ်သောကြောင့် ဖြစ်သည်။

ကစားသမား အများစုမှာ အဆင့် ၁ သားရဲများကိုသာ သတ်ဖြတ်နိုင်ကြသေးသည်။

အဆင့် ၂ သားရဲများကို တွေ့ပါက ရှောင်ကွင်းသွားရုံသာ တတ်နိုင်ပြီး အနီးကပ် သွားကြည့်ရန်ပင် သတ္တိမရှိကြပေ။