အခန်း ၃၇

အခန်း (၃၇) သိုင်းကျမ်းပေါင်းစပ်ခြင်းနှင့် ဓားလေဆင်နှာမောင်း

လူအုပ်ကြီးမှာ သိုးဖြူလေးကို ခေါင်းပုံမဖြတ်လိုက်ရသဖြင့် မကျေမနပ်ဖြစ်ကာ မနာလိုစိတ်များဖြင့် ကြည့်နေကြသည်။

အားလုံးက ကျိုးဟန်ကို အငြိုးထားသွားကြပြီး ပညာနည်းနည်းပေးမည်ဟု ခြိမ်းခြောက်ပြောဆိုနေကြသည်။

ချန်းလဲ့မြို့ထဲတွင် ရန်ဖြစ်ခြင်းကို တားမြစ်ထား၍သာ မဟုတ်ပါက သူတို့က စောစောကတည်းက လက်ပါပြီးလောက်ပြီ ဖြစ်သည်။

ယခုအချိန်တွင် ကျိုးဟန်ကတော့ အကြောင်းပြချက်မရှိဘဲ လူတစ်စု၏ အငြိုးထားခံလိုက်ရကြောင်း လုံးဝ မသိရှိခဲ့ပေ။

သိခဲ့လျှင်တောင် သူက ဂရုစိုက်မည် မဟုတ်ပေ။

ဤကဲ့သို့သော အမှိုက်ကောင်များကို သူက အဖတ်လုပ်နေမည် မဟုတ်ပေ။

"စနစ် သတိပေးချက်... သင်ယူထားခြင်း မရှိသေးသော သိုင်းကျမ်းကို ထောက်လှမ်းတွေ့ရှိပါသည်... သင်ယူလိုပါသလား..."

ကျိုးဟန်က လူသူကင်းမဲ့သော ထောင့်တစ်နေရာကို ရှာ၍ ရှေးဦးရှေးဟောင်းကျမ်း ကို ထုတ်ယူလိုက်ချိန်တွင် စနစ်၏ သတိပေးချက် ထွက်ပေါ်လာသည်။

"သင်ယူမယ်..."

"စနစ် သတိပေးချက်... သင်သည် ရှေးဦးရှေးဟောင်းကျမ်း အကြွင်းအကျန်ကို အောင်မြင်စွာ သင်ယူတတ်မြောက်သွားပါပြီ... ကျေးဇူးပြု၍ စစ်ဆေးကြည့်ပါ..."

ကျိုးဟန် ချက်ချင်း မကြည့်သေးဘဲ ၆ ကြိမ် တိုက်ရိုက် အဆင့်မြှင့်တင်လိုက်သည်။

အဘယ်ကြောင့်ဆိုသော် ယခု သူ၏ လက်ထဲတွင် အဆင့်မြှင့်ပွိုင့်များ လုံလောက်နေသောကြောင့် ဖြစ်သည်။

သိုင်းကျမ်းပေါင်းစပ်ခြင်း (၆ ကြိမ်မြှင့်)

ဖော်ပြချက် - မည်သည့် စွမ်းရည်များကိုမဆို ပေါင်းစပ်နိုင်ပြီး အသစ်ထွက်ပေါ်လာမည့် စွမ်းရည်သည် ၉၀ ရာခိုင်နှုန်းသော ဖြစ်နိုင်ချေဖြင့် အရည်အသွေးအဆင့် မြင့်တက်သွားမည်။

စစ်ဆေးကြည့်ပြီးနောက် ကျိုးဟန် မျက်လုံးများ ဝင်းလက်သွားသည်။

သူ သေချာ မှတ်မိနေသေးသည်က ယခင် ရှင်းလင်းချက်တွင် ဆင်တူသော စွမ်းရည် နှစ်ခုကိုသာ ပေါင်းစပ်၍ရမည်ဟု အတိအကျ ဖော်ပြထားခြင်း ဖြစ်သည်။

ယခုမူ ထိုကန့်သတ်ချက်များ မရှိတော့ဘဲ မည်သည့်စွမ်းရည်ကိုမဆို ပေါင်းစပ်၍ရသွားကာ အရေအတွက် ကန့်သတ်ချက်လည်း မရှိတော့ပေ။

အရင်က စွမ်းရည်အသစ်၏ အရည်အသွေးအဆင့် တက်ရန် အလွန်နည်းပါးသော ဖြစ်နိုင်ချေသာ ရှိခဲ့သည်။

ယခု ဖြစ်နိုင်ချေက ၉၀ ရာခိုင်နှုန်းအထိ မြင့်တက်လာပြီဖြစ်ရာ ကံအလွန်မဆိုးပါက သေချာပေါက် အောင်မြင်မည်ဟု ဆိုနိုင်သည်။

ကျိုးဟန် အလွန် ကျေနပ်သွားပြီး ပေါင်းစပ်ပြီးနောက် ထွက်ပေါ်လာမည့် စွမ်းရည်အသစ်က မည်ကဲ့သို့ ဖြစ်လာမည်ကို စမ်းသပ်ကြည့်ချင်စိတ်များ ပြင်းပြလာသည်။

သို့သော် သူ အနည်းငယ် တုံ့ဆိုင်းနေမိသည်။

မည်သည့်စွမ်းရည်များကို ပေါင်းစပ်ရမည်ကို သူ စဉ်းစားနေမိသည်။

လက်ရှိ သူ၏ စွမ်းရည်များမှာ လေခွင်းဓား... အရပ်ရှစ်မျက်နှာ ကောင်းကင်ခွဲ ဓားချက်... သစ်ရွက်ကြွေ ဓား နှင့် အရိပ်ဝိညာဉ် ဆူး တို့ဖြစ်သည်။

ဓားဝိညာဉ် အလုပ်အကိုင်၏ မွေးရာပါ စွမ်းရည်များဖြစ်သည့် ကြက်ခြေခတ် ဓားချက်... လေဟုန်စီးခြင်း နှင့် ဓားပညာ ကျွမ်းကျင်မှု တို့လည်း ရှိသေးသည်။

သူ ပြန်စဉ်းစားကြည့်လိုက်ရာ အရပ်ရှစ်မျက်နှာ ကောင်းကင်ခွဲ ဓားချက် တွင် မူးဝေစေသည့် အကျိုးသက်ရောက်မှု ပါဝင်နေသဖြင့် လောလောဆယ် မထိသေးရန် ဆုံးဖြတ်လိုက်သည်။

အရိပ်ဝိညာဉ် ဆူး မှာလည်း ဝိညာဉ်ပိုင်းဆိုင်ရာ တိုက်ခိုက်မှုဖြစ်ပြီး အလစ်အငိုက် တိုက်ခိုက်ရာတွင် အသုံးဝင်သဖြင့် ၎င်းကိုလည်း မထိသေးရန် ရွေးချယ်လိုက်သည်။

လေခွင်းဓား... သစ်ရွက်ကြွေ ဓား နှင့် ကြက်ခြေခတ် ဓားချက် တို့ကို အရင် ပေါင်းစပ်လိုက်မည်။

မည်သို့ပင်ဆိုစေ ထိုစွမ်းရည်များ၏ တိုက်ခိုက်မှု စွမ်းအားက ယခုအချိန်တွင် အနည်းငယ် နိမ့်ကျနေပြီ ဖြစ်သည်။

"စနစ် သတိပေးချက်... သင်ရွေးချယ်ထားသော စွမ်းရည်များ ပေါင်းစပ်မှု အောင်မြင်သွားပါပြီ... မူလစွမ်းရည်များ ပျောက်ကွယ်သွားပြီး အဆင့်မြှင့်ပွိုင့်များ ပြန်လည် ရရှိပါသည်..."

'ဟင်... အဆင့်မြှင့်ပွိုင့်တွေ ပြန်ရတာလား... တကယ်ကောင်းတာပဲ... ဒါဆို အဆင့်မြှင့်ပွိုင့်တွေ အများကြီး သက်သာသွားတာပေါ့...'

"စနစ် သတိပေးချက်... စွမ်းရည်အသစ် ဓားလေဆင်နှာမောင်း ထွက်ပေါ်လာပါပြီ... ကျေးဇူးပြု၍ စစ်ဆေးကြည့်ပါ..."

အဆင့်မြှင့်ပြီးနောက် အကျိုးသက်ရောက်မှုများကို စစ်ဆေးကြည့်လိုက်သည်။

ဓားလေဆင်နှာမောင်း (၆ ကြိမ်မြှင့်)

ဖော်ပြချက် - ရာနှင့်ချီသော ဓားစွမ်းအင်များကို ထုတ်လွှတ်ကာ လေဆင်နှာမောင်း တစ်ခုကို ဖန်တီးပြီး ၂၀ မီတာ ပတ်လည်အတွင်းရှိ ရန်သူအားလုံးကို ၁၅ ဆ အစစ်အမှန် ထိခိုက်မှု ပေးစွမ်းနိုင်ပြီး စောင့်ဆိုင်းချိန် ၂၀ စက္ကန့် ကြာမြင့်မည်။

'သောက်ကျိုးနည်း... ၁၅ ဆ အစစ်အမှန် ထိခိုက်မှုကြီးလား...'

နတ်ဘုရားအဆင့် ရှေးဦးရှေးဟောင်းကျမ်း က တကယ်ကို ကြောက်စရာကောင်းလွန်းလှသည်။

အလွယ်တကူ ပေါင်းစပ်လိုက်ရုံဖြင့် အစစ်အမှန် ထိခိုက်မှု အကျိုးသက်ရောက်မှု ထွက်ပေါ်လာခဲ့သည်။

ကျန်ရှိနေသော စွမ်းရည်အချို့ကို ကြည့်ကာ တိုက်ရိုက် ပေါင်းစပ်ပစ်ချင်သည့် ဆန္ဒများ ကျိုးဟန်၏ စိတ်ထဲတွင် ပြင်းပြလာခဲ့သည်။

သို့သော် သူ အောင့်အည်း သည်းခံလိုက်သည်။

ဤစွမ်းရည်များက လောလောဆယ်တွင် အလွန် အသုံးဝင်နေသေးသဖြင့် အလျင်စလို ပေါင်းစပ်လိုက်ပါက သူ၏ တိုက်ခိုက်ရေးစွမ်းအား ပြန်ကျသွားနိုင်သည်။

အရာအားလုံး စီစဉ်ပြီးနောက် ကျိုးဟန်က လူရည်ချွန် ရွေးချယ်ပွဲတွင် ပါဝင်ရန် စာရင်းသွားပေးတော့သည်။

မကြာမီ တစ်နာရီခန့် တန်းစီပြီးနောက် သူ၏ အလှည့်သို့ ရောက်လာခဲ့သည်။

"ဒါက မင်းရဲ့ နံပါတ်ပြားပဲ... မင်းနဲ့ မတူညီတဲ့ ပြိုင်ဘက်တွေကို ကျပန်း ရွေးချယ်ပေးလိမ့်မယ်... အကုန်လုံးကို အနိုင်ရမှသာ နောက်ဆုံး အဆင့်ဆီ ရောက်နိုင်မှာ..."

စာရင်းပေးလက်ခံသည့် နေရာရှိ မိန်းကလေးက ကျိုးဟန်၏ အချက်အလက်များကို မှတ်တမ်းတင်ပြီးနောက် ကျိုးဟန်ကို သစ်သားပြား တစ်ခု ကမ်းပေးရင်း စည်းကမ်းချက်များကို ရှင်းပြလိုက်သည်။

ကျိုးဟန်က ခေါင်းညိတ်လိုက်ပြီး သစ်သားပြားကို ကြည့်လိုက်ရာ နံပါတ် ၁၉ ဟု ရေးထားသည်ကို တွေ့လိုက်ရသည်။

ပြိုင်ပွဲဝင် နံပါတ်ပြား

ဖော်ပြချက် - တာဝန်နှင့် သက်ဆိုင်သည့် ပစ္စည်းဖြစ်ပြီး ဤနံပါတ်ပြားဖြင့် ရွေးချယ်ပွဲတွင် ပါဝင်ယှဉ်ပြိုင်ခွင့် ရရှိမည်။

'ဒါကို အဆင့်မြှင့်လိုက်ရင် ဘယ်လို အကျိုးသက်ရောက်မှု ထွက်လာမလဲ မသိဘူး...'

ယခု ကျိုးဟန်မှာ အကျင့်ပါနေပြီဖြစ်ပြီး မည်သည့်အရာကို မြင်မြင် အရင်ဆုံး အဆင့်မြှင့်ရန်သာ တွေးမိတော့သည်။

တစ်ကြိမ် အဆင့်မြှင့်ရာတွင် ထူးခြားချက် မတွေ့ရပေ။

နှစ်ကြိမ် အဆင့်မြှင့်လိုက်သည်။

'ဟင်... ပြောင်းလဲသွားပြီ...'

ပြိုင်ပွဲဝင် နံပါတ်ပြား (၂ ကြိမ်မြှင့်)

ဖော်ပြချက် - တာဝန်နှင့် သက်ဆိုင်သည့် ပစ္စည်းဖြစ်ပြီး ဤနံပါတ်ပြားဖြင့် ထိပ်ဆုံး ၁၀၀ နေရာသို့ တိုက်ရိုက် ရောက်ရှိသွားမည်။

သုံးကြိမ် အဆင့်မြှင့်လိုက်သည်။

ပြိုင်ပွဲဝင် နံပါတ်ပြား (၃ ကြိမ်မြှင့်)

ဖော်ပြချက် - တာဝန်နှင့် သက်ဆိုင်သည့် ပစ္စည်းဖြစ်ပြီး ဤနံပါတ်ပြားဖြင့် ထိပ်ဆုံး ၁၀ နေရာသို့ တိုက်ရိုက် ရောက်ရှိသွားမည်။

"စနစ် သတိပေးချက်... သင်သည် လူရည်ချွန် ရွေးချယ်ပွဲတွင် ယာယီ အဆင့် ၁၀ သို့ ရောက်ရှိသွားပါပြီ... တာဝန်ပြီးမြောက်ရန် စံနှုန်းနှင့် ကိုက်ညီသွားပြီဖြစ်ရာ တာဝန်ကို ချက်ချင်း အပြီးသတ် သတ်မှတ်လိုပါသလား..."

သုံးကြိမ် အဆင့်မြှင့်လိုက်ပြီးနောက် စနစ်၏ သတိပေးသံ တိုက်ရိုက် ထွက်ပေါ်လာသည်။

ဤသည်မှာ တကယ်ကို မိုက်လွန်းလှသည်။

အဆင့်မြှင့်လိုက်ရုံဖြင့် အဆင့် ၁၀ သို့ တိုက်ရိုက် ရောက်သွားသဖြင့် အရမ်းကို အဆင်ပြေလွန်းနေသည်။

"တာဝန်ကို ချက်ချင်း အပြီးသတ် မသတ်မှတ်သေးဘူး..."

တာဝန်၏ ဆုလာဘ်က အဆင့်သတ်မှတ်ချက်အပေါ် မူတည်ပြီး ရရှိမည်ဖြစ်သည်။

အဆင့် ၁၀ ၏ ဆုလာဘ်က အလွန် နည်းပါးလွန်းလှသဖြင့် ကျိုးဟန်၏ ပစ်မှတ်မှာ အဆင့် ၁ နေရာသာ ဖြစ်သည်။

"နောက်တစ်ကြိမ် ထပ်မြှင့်မယ်..."

"စနစ် သတိပေးချက်... ဤပစ္စည်း၏ အဆင့်မြှင့်တင်နိုင်စွမ်း အကန့်အသတ်သို့ ရောက်ရှိသွားပါပြီ... အဆင့်မြှင့်တင်မှု မအောင်မြင်ပါ..."

"မအောင်မြင်ဘူးလား..."

ကျိုးဟန်၏ မျက်လုံးများထဲတွင် စိတ်ပျက်သည့် အရိပ်အယောင် မရှိပေ။

အကယ်၍ ထပ်ပြီး အဆင့်မြှင့်၍ ရနေသေးပါက သူ့ကို တိုက်ရိုက် ဆုပေးလိုက်သည်ကမှ ပိုကောင်းမည် မဟုတ်ပါလား။

တာဝန်ရှိသူကို မေးမြန်းကြည့်ရာ အဆင့် ၁၀ အတွင်း ဝင်သူများက နောက်ဆုံး ဗိုလ်လုပွဲသို့ တက်ရောက်ခွင့် ရမည်ဖြစ်ကြောင်း သိရသည်။

ယနေ့က အကြိုရွေးချယ်ပွဲသာ ဖြစ်ပြီး မနက်ဖြန်မှ တကယ့် ဗိုလ်လုပွဲကို စတင်မည် ဖြစ်သည်။

'ဒါလည်း ကောင်းတာပဲ... ဒီမှာ အချိန်ကုန်ခံနေစရာ မလိုတော့ဘူး... မြို့ပြင်ထွက်ပြီး သားရဲသွားသတ်လို့ ရပြီ...'

ကျိုးဟန်လည်း အချိန်မဆွဲတော့ဘဲ ဝိညာဉ်တစ္ဆေ ချောက်ကမ်းပါး အတွင်းသို့ ဝင်ရောက်သွားတော့သည်။

မကြာမီ အဆက်မပြတ် ရှင်းလင်းမှုများ ပြုလုပ်ပြီးနောက် ကျိုးဟန်၏ အတွေ့အကြုံမှတ်က အဆင့် ၂၀ သို့ ရောက်ရှိသွားသည်။

အဆင့်မြှင့်ပွိုင့်များလည်း သောင်းဂဏန်းကျော်အထိ ရရှိခဲ့သည်။

သူ ကြုံတွေ့ခဲ့ရသော သားရဲအများစုမှာ ငွေအဆင့်များ ဖြစ်ကြပြီး ရွှေအဆင့် အနည်းငယ်လည်း ပါဝင်သည်။

'အတွေ့အကြုံမှတ် တိုးမြှင့်ပေးတာ မပါတော့ အဆင့်တက်တာ တကယ် နှေးသွားတာပဲ... ဒါပေမဲ့ ဒီနေ့အတွက်ကတော့ မဆိုးပါဘူး...'

ကျိုးဟန်က သစ်ပင်တစ်ပင်ကို မှီ၍ အနားယူကာ စစ်ဆေးကြည့်လိုက်သည်။

သားရဲများကို သတ်ဖြတ်စဉ်က ကျလာသော ပစ္စည်းများအားလုံးကို သေချာ မစစ်ဆေးဘဲ ကျောပိုးအိတ်ထဲသို့ အကုန် ပစ်ထည့်ထားခဲ့ခြင်း ဖြစ်သည်။

ယခု အနားယူနေစဉ် ကျိုးဟန်က ရရှိလာသည့် ပစ္စည်းများကို ပြန်လည် ရေတွက်ကြည့်လိုက်သည်။

ရွှေဒင်္ဂါး ၁၀၀၀ ကျော်... ငွေအဆင့် ပစ္စည်း ၁၂ ခုနှင့် ရွှေအဆင့် ပစ္စည်း ၃ ခု တို့ကို ရရှိခဲ့သည်။

သို့သော် ယခု ကျိုးဟန်တွင် ဝိညာဉ်သရဲ အစုံလိုက်ဝတ်စုံ ရှိနေပြီဖြစ်ရာ ရွှေအဆင့် ပစ္စည်းများက သူ့အတွက် အသုံးမဝင်တော့ပေ။

'ဟူး... နှမြောစရာပဲ... ရွှေအဆင့် ဓားလက်နက် တစ်လက်မှ မပါလာဘူး...'

ကျိုးဟန် ညည်းတွားနေစဉ် စနစ်၏ ကြေညာချက် နှစ်ခု ရုတ်တရက် ထွက်ပေါ်လာသည်။

"ဒေသတွင်း ကြေညာချက်... ကစားသမား ဟန်ရှန်နင် သည် ဒုတိယမြောက် အဆင့် ၁၀ သို့ ရောက်ရှိသူ ဖြစ်ပါသဖြင့် ဆုကြေးအဖြစ် ရွှေဒင်္ဂါး ၂၀၀ နှင့် ရွှေ သေတ္တာ ၁ လုံး ရရှိပါသည်..."

"ဒေသတွင်း ကြေညာချက်... ကစားသမား ဟန်ချင်ရွှဲ့ သည် တတိယမြောက် အဆင့် ၁၀ သို့ ရောက်ရှိသူ ဖြစ်ပါသဖြင့် ဆုကြေးအဖြစ် ရွှေဒင်္ဂါး ၁၀၀ နှင့် ငွေ သေတ္တာ ၂ လုံး ရရှိပါသည်..."

စနစ်၏ ကြေညာချက်ကို ကြားလိုက်ရပြီးနောက် ကျိုးဟန် ပြုံးလိုက်မိသည်။

'ငါ မခေါ်သွားတော့ သူတို့ အဆင့်တက်တာ နည်းနည်း နှေးသွားတာပဲ...'

မနေ့က သူတို့ အဆင့် ၉ သို့ ရောက်ရှိနေပြီ ဖြစ်ကြောင်း ကျိုးဟန် မှတ်မိနေသေးသည်။

ယခု နေဝင်ချိန်ရောက်မှ အဆင့် ၁၀ သို့ ရောက်ရှိသွားခြင်းမှာ တကယ်ကို နှေးကွေးလွန်းလှသည်။

"စနစ် သတိပေးချက်... သူငယ်ချင်းဆီမှ စာတို ရရှိပါသည်... ကျေးဇူးပြု၍ စစ်ဆေးကြည့်ပါ..."

'သူငယ်ချင်းဆီက စာတို ဟုတ်လား...'

သူ့တွင် သူငယ်ချင်းဟူ၍ ဟန်ချင်ရွှဲ့ ညီအစ်မနှစ်ယောက်သာ ရှိသည်။

ကြည့်ရသည်မှာ သူတို့က သူ့ကို သတင်းကောင်း လာပြောခြင်း ဖြစ်ရမည်။

'သူငယ်ချင်း စာရင်းကို ဖွင့်မယ်...'

ဖွင့်ကြည့်လိုက်ရာ စာတိုများ ဝင်နေသည်ကို တွေ့လိုက်ရသည်။

ညီအစ်မနှစ်ယောက်လုံးက စာပို့ထားခြင်း ဖြစ်သည်။

ဟန်ရှန်နင်က "ငါ အဆင့် ၁၀ ကို ရောက်သွားပြီဟေ့... အရမ်း ဝမ်းသာတာပဲ..." ဟု ပို့ထားသည်။

ဟန်ချင်ရွှဲ့က "ကျိုးဟန်... နင့်ကို ကျေးဇူးတင်ပါတယ်... ငါတို့ အားလုံး အဆင့် ၁၀ ကို ရောက်သွားပြီ..." ဟု ပို့ထားသည်။

ကျိုးဟန်က "ပထမဆုံးအနေနဲ့ ဂုဏ်ပြုပါတယ်... နင်တို့က ဘယ်အလုပ်အကိုင်ကို ရွေးဖို့ စဉ်းစားထားလဲ..." ဟု ပြန်ပို့လိုက်သည်။

ဟန်ချင်ရွှဲ့က "ငါလည်း သေချာ မစဉ်းစားရသေးဘူး... ဒီညကျရင် နင်နဲ့ တိုင်ပင်ကြည့်မလို့..." ဟု ပြန်ဖြေသည်။

ဟန်ရှန်နင်က "ကျိုးဟန်... ငါ့ရဲ့ ရွှေ သေတ္တာကို နင်ပဲ ဖွင့်ပေးပါလား... ငါက အရင်တစ်ခါကလို ကံဆိုးသွားမှာ ကြောက်လို့..." ဟု ပို့လာသည်။

ယခင်တစ်ခါက သာမန်အဆင့် ပစ္စည်းတစ်ခုသာ ရခဲ့သဖြင့် သူမ၏ စိတ်ထဲတွင် အမြဲတမ်း စိုးရိမ်နေခဲ့ခြင်း ဖြစ်သည်။