အခန်း ၃၉

အခန်း (၃၉) ကျိုးဟန်က နောက်ခံအင်အား ရှိနေတာလား

ကျိုးဟန် ရုတ်တရက် အတွေးတစ်ခု ဝင်လာပြီး မျှော်လင့်ချက်အချို့ ဖြစ်ပေါ်လာသည်။

မည်သို့ပင်ဖြစ်စေ အာရုံခံခြင်း က အသုံးမဝင်သဖြင့် ပေါင်းစပ်လိုက်သည်က ပိုကောင်းသည်။ အမှိုက်စွမ်းရည် တစ်ခု ထွက်လာလျှင်တောင် ပြဿနာမရှိပေ။

အကဲဖြတ်ခြင်း စွမ်းရည်ကို ကစားသမားတိုင်း ရရှိထားပြီး ပြန်လည် သင်ယူလိုပါက ရွှေဒင်္ဂါး ၁၀ ပြားသာ ကျသင့်မည် ဖြစ်သည်။

ထို့ကြောင့် ကျိုးဟန်က အကဲဖြတ်ခြင်း စွမ်းရည် ဆုံးရှုံးသွားမည်ကို မစိုးရိမ်တော့ပေ။

တွေးမိသည်နှင့် ကျိုးဟန် ချက်ချင်း စမ်းသပ်ကြည့်လိုက်သည်။

"စနစ် သတိပေးချက်... စွမ်းရည်များ ပေါင်းစပ်မှု အောင်မြင်ပြီး ကြေးအဆင့်သို့ ရောက်ရှိသွားပါပြီ..."

"စနစ် သတိပေးချက်... စွမ်းရည်အသစ် ထွက်ပေါ်လာပါပြီ... ကျေးဇူးပြု၍ အချက်အလက်များကို စစ်ဆေးကြည့်ပါ..."

၉၀ ရာခိုင်နှုန်းသော ဖြစ်နိုင်ချေဖြင့် ကြေးအဆင့်သို့ ရောက်ရှိသွားခြင်းမှာ ထင်ထားသည့်အတိုင်းပင် ဖြစ်သည်။

စွမ်းရည်အမည်မှာ အငွေ့အသက် အာရုံခံခြင်း ဟု ပြောင်းလဲသွားသည်။

ကျိုးဟန်က တိုက်ရိုက် ၃ ကြိမ် အဆင့်မြှင့်လိုက်ရာ အကျိုးသက်ရောက်မှုများ ထွက်ပေါ်လာသည်။

အငွေ့အသက် အာရုံခံခြင်း (၃ ကြိမ်မြှင့်)

ဖော်ပြချက် - ၃၀ မီတာ ပတ်လည်အတွင်းရှိ အငွေ့အသက်များကို အာရုံခံနိုင်စွမ်း ရှိသည်

ပေါင်းစပ်ပြီးနောက် တကယ်ကို ပိုမို အစွမ်းထက်လာခဲ့သည်။

တစ်ဟုန်ထိုး ၃၀ မီတာ အကွာအဝေးအထိ ရောက်ရှိသွားသည်။

ယခင် အာရုံခံခြင်း စွမ်းရည်က အန္တရာယ်ကိုသာ အာရုံခံနိုင်ပြီး အကွာအဝေးမှာလည်း အလွန် နည်းပါးလှသည်။

ယခုမူ အငွေ့အသက် အမျိုးမျိုးကို အာရုံခံနိုင်ပြီ ဖြစ်သည်။ အန္တရာယ်ရှိသော၊ ရင်းနှီးသော၊ အေးစက်သော၊ ပူပြင်းသော အငွေ့အသက် အားလုံးကို အာရုံခံနိုင်ပြီ ဖြစ်ရာ အလွန် ကောင်းမွန်သော အထောက်အကူပြု စွမ်းရည် တစ်ခုဟု ဆိုနိုင်သည်။

'အရင်ဆုံး ဘယ်လို အကျိုးသက်ရောက်မှု ရှိလဲ စမ်းကြည့်ရမယ်...'

ကျိုးဟန် ချက်ချင်းပင် အငွေ့အသက် အာရုံခံခြင်း ကို အသုံးပြုလိုက်ရာ အလွန် နက်နဲဆန်းကြယ်လှသည်။

ပတ်ဝန်းကျင်ရှိ အငွေ့အသက်များက သာမန်အတိုင်းပင် ဖြစ်ပြီး ထူးခြားချက် မရှိပေ။

ဟင်...

ရုတ်တရက် ကျိုးဟန်၏ မျက်နှာက ပြောင်းလဲသွားသည်။ အဘယ်ကြောင့်ဆိုသော် အေးစက်စက် အငွေ့အသက် တစ်ခုကို သူ ခံစားလိုက်ရပြီး သူ့အပေါ် ရန်လိုနေပုံပေါ်သောကြောင့် ဖြစ်သည်။

ချက်ချင်းပင် ထိုဘက်သို့ သူ လှမ်းကြည့်လိုက်သည်။ တစ်ဖက်လူက သာမန် လယ်သမား တစ်ယောက်ကဲ့သို့ ဝတ်ဆင်ထားပြီး လူအုပ်ထဲတွင် လုံးဝ သတိထားမိစရာ အကြောင်းမရှိပေ။

ကျိုးဟန် ကြည့်နေသည်ကို မြင်သောအခါ ထိုသူက သဘာဝကျကျပင် မျက်နှာလွှဲသွားပြီး အလွန် လျှို့ဝှက်စွာ ဟန်ဆောင်နေသည်။

အကယ်၍ အငွေ့အသက်ကိုသာ အာရုံမခံနိုင်ပါက ထိုသူ၏ သရုပ်ဆောင်မှုအောက်တွင် လှည့်စားခံရနိုင်ပေသည်။

'ဒါ ဘယ်သူလဲ... ငါ သူ့ကို သွားမရှုပ်ခဲ့မိပါဘူး...'

ကျိုးဟန် စိတ်ထဲတွင် သံသယ ဝင်သွားပြီး တစ်ဖက်လူ၏ အချက်အလက်များကို စစ်ဆေးကြည့်လိုက်သည်။

အမှောင်မိစ္ဆာစောင့်

ဖော်ပြချက် - မြူခိုးချောက်ကမ်းပါးရှိ အတွေ့ရအများဆုံး မိစ္ဆာမျိုးနွယ် ဖြစ်ပြီး ပုန်းကွယ် ခြေရာခံရာတွင် ကျွမ်းကျင်ကာ မှောင်မိုက်သော နေရာမှနေ၍ ရန်သူအား အသေအလဲ တိုက်ခိုက်လေ့ ရှိသည်

'မိစ္ဆာမျိုးနွယ် ထပ်ပေါ်လာပြန်ပြီလား... ကြည့်ရတာ သူက ငါ့ကို ပစ်မှတ်ထားနေပြီ ထင်တယ်...'

ကျိုးဟန်က မနေ့က အရိပ်မိစ္ဆာ ကိစ္စကြောင့် မိစ္ဆာမျိုးနွယ်များက သူ့ကို စတင် သတိထားမိသွားပြီဟု ချက်ချင်း တွေးမိလိုက်သည်။

"ကျိုးဟန်... ဘာတွေ ငေးနေတာလဲ... ငါ ဘာရလဲဆိုတာ ကြည့်ပါဦး... ဒီနေ့ ကံကောင်းတယ်..."

ဟန်ရှန်နင်က ကျိုးဟန်၏ ပခုံးကို ပုတ်ကာ စိတ်လှုပ်ရှားစွာဖြင့် ပြောလိုက်သည်။

"အိုး... ဘာရလို့ ဒီလောက်တောင် ပျော်နေရတာလဲ..."

ကျိုးဟန်က အနည်းငယ် အံ့သြစွာဖြင့် မေးလိုက်သည်။

"ရွှေအဆင့် ခါးပတ်လေ... ဘယ်လောက် မိုက်လဲ..."

ဟန်ရှန်နင်က ဂုဏ်ယူဝင့်ကြွားစွာဖြင့် ပြောလိုက်သည်။

"..."

'ဒါလေးလား... ငါကများ ပစ္စည်းကောင်းများ ထင်နေတာ...'

ရွှေအဆင့် ပစ္စည်းကို ကျိုးဟန် တစ်ချက်ပင် မကြည့်ချင်တော့ပေ။

ထိုသို့ အနှောင့်အယှက်လေး ပြီးသွားပြီးနောက် ကျိုးဟန်က အမှောင်မိစ္ဆာစောင့် ရှိရာသို့ ပြန်ကြည့်လိုက်ရာ လူအုပ်ထဲတွင် ရောနှော ပျောက်ကွယ်သွားပြီ ဖြစ်သည်။

သို့သော် ကျိုးဟန်က လွတ်သွားသည့်တိုင် နှမြောတသ ဖြစ်မနေပေ။ သူ့တွင် အငွေ့အသက် အာရုံခံခြင်း စွမ်းရည် ရှိနေသဖြင့် မိစ္ဆာမျိုးနွယ်များ၏ ပုန်းကွယ်မှုများက သူ့ရှေ့တွင် အလဟဿသာ ဖြစ်သည်။

ထို့ကြောင့် သူက စိုးရိမ်စရာ မရှိပေ။ တစ်ဖက်လူ၏ ပုံစံကို သူ သေချာ မှတ်မိသွားပြီ ဖြစ်သည်။

ဆန့်ကျင်ဘက်အနေဖြင့် သူကသာ တစ်ဖက်လူကို ပြန်လည် ခြေရာခံပြီး အဖွဲ့အစည်း တစ်ခုလုံးကို ရှာဖွေကာ အမြစ်ပြတ် ရှင်းလင်းရမည် ဖြစ်သည်။

"ကျိုးဟန်... ငါတို့ အရင်သွားနှင့်မယ်နော်... ဝိညာဉ်တစ္ဆေ ချောက်ကမ်းပါးကို သွားပြီး အတွေ့အကြုံမှတ် ယူမလို့..."

ဟန်ချင်ရွှဲ့က ပြုံးကာ ပြောလိုက်သည်။ ကျိုးဟန် လူရည်ချွန် ရွေးချယ်ပွဲ၏ နောက်ဆုံးအဆင့်သို့ ဝင်ရောက် ယှဉ်ပြိုင်ရမည်ကို သူမ သိထားသည်။

"မင်းတို့ ဂရုစိုက်နော်... ဝိညာဉ်တစ္ဆေ ချောက်ကမ်းပါးက အခြား ဒေသတွေနဲ့ ဆက်နေတာ... တခြား ကစားသမားတွေကို သတိထားဦး..."

ကျိုးဟန်က အချိန်ကိုက် သတိပေးလိုက်သည်။

ယနေ့သည် တတိယမြောက်နေ့ ဖြစ်သဖြင့် အဆင့် ၁၀ သို့ ရောက်ရှိသူ ပိုမို များပြားလာမည် ဖြစ်သည်။ ထို့ကြောင့် ဝိညာဉ်တစ္ဆေ ချောက်ကမ်းပါးတွင် ကစားသမား အရေအတွက် နည်းမည် မဟုတ်ပေ။

"စိတ်ချပါ... ငါလို ကုသသူ ရှိနေတဲ့အပြင် ရှန်နင်ရဲ့ မှော်ဆရာ စွမ်းရည်တွေနဲ့ဆိုတော့ အထင်သေးလို့တော့ မရဘူးနော်..."

ဟန်ရှန်နင်က ဂုဏ်ယူစွာဖြင့် ရင်ကော့ကာ ပြောလိုက်သည်။

ကျိုးဟန်လည်း အမြန် မျက်နှာလွှဲလိုက်ရသည်။

...

"ထိပ်ဆုံး ၁၀ ယောက်စာရင်းထဲ ဝင်သွားတဲ့အတွက် ဂုဏ်ပြုပါတယ်... ဒီနေ့ကတော့ ချန်ပီယံနေရာကို ဆုံးဖြတ်မယ့် နောက်ဆုံးအဆင့် ဖြစ်ပါတယ်..."

လေဟုန်တပ်ဖွဲ့မှ ဗိုလ်မှူးက စင်မြင့်ပေါ်တွင် အားမာန်အပြည့်ဖြင့် ဟောပြောနေသည်။

"ချန်းလဲ့မြို့ကို ကာကွယ်ဖို့အတွက်..."

ကျိုးဟန်ကတော့ အောက်တွင် နားထောင်ရင်း သမ်းဝေနေသည်။ ကျောင်းအုပ်ကြီးက စင်မြင့်ပေါ်တွင် မိန့်ခွန်းပြောနေသလို ခံစားနေရသည်။

"ကောင်းပြီ... အခု ပြိုင်ပွဲ စည်းကမ်းတွေကို ပြောမယ်... ဒါက အဆင့်သတ်မှတ်ချက် ပြိုင်ပွဲ ဖြစ်တယ်... မင်းတို့ ၁၀ ယောက်က အချင်းချင်း ယှဉ်ပြိုင်ရမယ်... ၉ ပွဲစလုံး နိုင်တဲ့သူက ပထမနေရာကို ရရှိလိမ့်မယ်..."

ဟင်...

'အဆင့်သတ်မှတ်ချက် ပြိုင်ပွဲလား... စိတ်ဝင်စားစရာပဲ...'

"မင်းတို့ အထင်တော့ ဘယ်သူ ပထမ ရမလဲ... ငါကတော့ ကျန်းချန် ကို သဘောကျတယ်..."

"ကျန်းချန် က ဘာမှမဟုတ်ပါဘူး... ငါတို့ ဟုန် မိသားစုက ဟုန်ဖန် ကမှ လူငယ်မျိုးဆက်တွေထဲမှာ နံပါတ်တစ်ပဲ..."

"တော်ကြပါတော့... အကုန်လုံးက ကျွမ်းကျင်သူတွေချည်းပဲ... ကြည့်ရတာ အားရဖို့ ကောင်းရင် ပြီးတာပဲ..."

"ဟင်... ဟို နံပါတ် ၁၉ ကို ကြည့်စမ်း... သူက မနေ့က သိုးဖြူလေး မဟုတ်ဘူးလား..."

"တောက်... တကယ်ပဲဟ... သူက ဘယ်လိုလုပ်ပြီး ထိပ်ဆုံး ၁၀ ယောက်ထဲ ရောက်လာတာလဲ... မနေ့က စင်ပေါ်မှာ သူ့ကို မတွေ့မိပါဘူး..."

"နောက်ခံနဲ့ ဝင်လာတာ ဖြစ်မယ်... ဒီကောင့်ကို ကြည့်ရတာ ပိုက်ဆံ ရှိပုံပဲ..."

"ဟီးဟီး... ကြည့်စမ်း သူ အိပ်နေတုန်းပဲ... မကြာခင် အရိုက်ခံရတော့မယ် ထင်တယ်... အရမ်းကို စောင့်ကြည့်ချင်နေပြီ..."

နောက်ဆုံးအဆင့်သို့ ရောက်လာသည်နှင့် ပြိုင်ပွဲများက အလွန် ကြည့်ကောင်းလာပြီး အားလုံးက ပထမနေရာကို မည်သူ ရရှိမည်ကို ဆွေးနွေးနေကြသည်။

ထိုအချိန်တွင် ကျိုးဟန်ကို တွေ့လိုက်ရသည်။

မနေ့က ကျိုးဟန်သည် သူတို့၏ ပစ္စည်းများကို မဝယ်ခဲ့သဖြင့် သူတို့က အလွန် မကျေမနပ် ဖြစ်နေကြသည်။

ယခု ကျိုးဟန်က နောက်ခံအင်အားဖြင့် ဝင်လာသူကဲ့သို့ ဖြစ်နေသည်ကို မြင်သောအခါ အားလုံးက ကျိုးဟန် အရိုက်ခံရမည့် အချိန်ကို မျှော်လင့်နေကြသည်။

"အခု ပြိုင်ပွဲကို စတင်ပါတော့မယ်... နံပါတ် ၁၉ ကျိုးဟန် နဲ့ နံပါတ် ၉၀ ဟန်လီ တို့ ယှဉ်ပြိုင်ရပါမယ်..."

ဒိုင်လူကြီးက အသံကျယ်ကျယ်ဖြင့် ကြေညာပြီးနောက် အနည်းငယ် ကြောင်အမ်းသွားသည်။

ထိပ်ဆုံး ၁၀ ယောက်စာရင်းထဲ ဝင်လာသူများမှာ အလွန် အစွမ်းထက်သော လူငယ်ပါရမီရှင်များ ဖြစ်ကြသော်လည်း ဤနံပါတ် ၁၉ ကိုတော့ သူ လုံးဝ မမှတ်မိပေ။

ရုတ်တရက်ကြီး ပေါ်လာသလို ဖြစ်နေသည်။

'နောက်ခံအင်အားနဲ့လား...'

ဒိုင်လူကြီး၏ စိတ်ထဲတွင် ဤစကားလုံးများ ချက်ချင်း ဝင်လာသည်။

တရားမျှတမှုကို လိုလားသော သူဖြစ်သဖြင့် ကျိုးဟန်ကို ကြည့်ရသည်မှာ အနည်းငယ် မျက်မုန်းကျိုးနေသည်။

ဟန်လီ စင်ပေါ်သို့ တက်လာသောအခါ ဒိုင်လူကြီးက သူ၏ နားနားသို့ ကပ်၍ ပြောလိုက်သည်။

အဓိပ္ပာယ်မှာ ကျိုးဟန်ကို သေချာ ပညာပေးရန် ဖြစ်သည်။

"စိတ်ချပါ... ခင်ဗျားကို စိတ်မပျက်စေရပါဘူး... သူ ဒီပြိုင်ပွဲကို ဝင်ပြိုင်မိတာ နောင်တရသွားစေရမယ်..."

ဟန်လီ၏ မျက်နှာပေါ်တွင် အပြုံးတစ်ခု ထွက်ပေါ်လာသော်လည်း ရက်စက်မှုများ ပြည့်နှက်နေသည်။

သူက ဆင်းရဲသား မိသားစုမှ ဆင်းသက်လာပြီး မလျှော့သော ဇွဲလုံ့လဖြင့် ကြိုးစားခဲ့၍သာ ယခုကဲ့သို့ အောင်မြင်မှု ရရှိလာခြင်း ဖြစ်သည်။

နောက်ခံအင်အားဖြင့် နေရာယူသူများကို သူ အမုန်းဆုံး ဖြစ်သဖြင့် ဒိုင်လူကြီး၏ စကားကို ကြားပြီးနောက် သူ၏ စိတ်ထဲတွင် ဒေါသများ ပေါက်ကွဲထွက်လာပြီး တစ်ဖက်လူကို သေချာပေါက် ပညာပေးရန် ဆုံးဖြတ်လိုက်သည်။

ကျိုးဟန်က ပျင်းရိစွာဖြင့် စင်ပေါ်သို့ တက်လာခဲ့သည်။ ဗိုလ်မှူး၏ မိန့်ခွန်းက အိပ်ဆေးများကဲ့သို့ ဖြစ်နေသည် မဟုတ်ပါလား။

"မင်းက ကျိုးဟန် လား..."

ဟန်လီက ကျိုးဟန်၏ ပုံစံကို ကြည့်ကာ အထင်သေးသော အပြုံးဖြင့် မေးလိုက်သည်။

ဒီလိုကောင်မျိုးက ထိပ်ဆုံး ၁၀ ယောက်စာရင်းထဲ ရောက်လာတာကို သူက အတူယှဉ်ပြိုင်ရမည်ဆိုသည်ကိုပင် ရှက်မိသည်။

"ဟင်... ငါက အဲဒီလောက်တောင် နာမည်ကြီးနေတာလား... မင်းက ငါ့ကို ဘယ်လိုလုပ် သိတာလဲ..."

ကျိုးဟန် အနည်းငယ် အံ့သြသွားသည်။ ကစားသမားများ ကြားတွင် သူ နာမည်ကြီးသည်မှာ ဟုတ်သော်လည်း ချန်းလဲ့မြို့မှ လူများကပါ သူ့ကို သိနေမည်ဟု မထင်ထားခဲ့ပေ။

'ဒါမှမဟုတ် ငါက အရမ်း ချောနေလို့လား... အင်း... ငါ ဒီလောက်တောင် နှိမ့်ချနေတာကိုတောင် စွမ်းအားတွေက ဖုံးကွယ်ထားလို့ မရဘူးပဲ...'