အခန်း ၄၂

အခန်း (၄၂) မြို့စားမင်းသမီး... ပိုင်လင်းလုံ

စင်မြင့်ပေါ်တွင် တိုက်ခိုက်နေသော လူနှစ်ယောက်၏ စွမ်းအားက တကယ်ကို အစွမ်းထက်လှသည်။

၎င်းတို့သည် ကျိုးဟန် ယခုအချိန်အထိ ချန်းလဲ့မြို့တွင် မြင်ဖူးသမျှ အစွမ်းထက်ဆုံး လူငယ်များ ဖြစ်သည်။

ဘယ်ဘက်ရှိ လူငယ်၏ အမည်မှာ ကျန်းချန် ဖြစ်ပြီး ကျန်း မိသားစု၏ မျိုးဆက် တစ်ယောက်ဖြစ်ကြောင်း ကျိုးဟန် ကြားသိရသည်။

ချန်းလဲ့မြို့မှာ အလွန် ကြီးမားကျယ်ပြန့်သော မြို့တော်ကြီး တစ်ခုဖြစ်ပြီး အတွင်း၌ အဖွဲ့အစည်း အသီးသီးက အမြစ်တွယ်နေကြကာ ကောင်းသောသူနှင့် ဆိုးသောသူများ ရောနှောနေကြသည်။

စနစ်၏ သတင်းအချက်အလက်များနှင့် ပတ်ဝန်းကျင်မှ လူများ၏ ပြောစကားများအရ ချန်းလဲ့မြို့ရှိ အဖွဲ့အစည်းများ၏ အခြေအနေကို ကျိုးဟန် အကြမ်းဖျင်း နားလည်ထားသည်။

လက်ရှိအချိန်တွင် အင်အားအကြီးဆုံး မိသားစု လေးခုမှာ ပိုင်၊ ကျန်း၊ နျဲ့ နှင့် ဟုန် မိသားစုများ ဖြစ်ကြသည်။

သူတို့က ချန်းလဲ့မြို့ရှိ ရင်းမြစ်များ၏ ၉၉ ရာခိုင်နှုန်းကို ချုပ်ကိုင်ထားကြသည်။

ဒုတိယ အင်အားအကြီးဆုံးဖြစ်သော ကျန်း မိသားစုတွင် သေချာပေါက် ကြီးမားသော နောက်ခံအင်အားများ ရှိပေလိမ့်မည်။

ကျန်းချန်ကလည်း ထူးချွန်သော ပင်ကိုစွမ်းရည်ကြောင့် မိသားစု၏ အဓိက လေ့ကျင့်ပေးခြင်းကို ခံရကာ အလွန် အစွမ်းထက်လာခဲ့ခြင်း ဖြစ်သည်။

ထို့ကြောင့် သူက ထိပ်ဆုံး သုံးယောက်စာရင်းထဲသို့ အလွယ်တကူ ဝင်ရောက်နိုင်ခဲ့ခြင်း ဖြစ်သည်။

ညာဘက်တွင် ရပ်နေသူကတော့ ပိုင် မိသားစုမှ ပိုင်လင်းလုံ ဖြစ်ပြီး ချန်းလဲ့မြို့စား၏ သမီးတော်ပင် ဖြစ်သည်။

သူမက အံ့မခန်း ပင်ကိုစွမ်းရည်များ ပိုင်ဆိုင်ထားရုံသာမက ပြိုင်ဘက်ကင်းသော အလှတရားကိုလည်း ပိုင်ဆိုင်ထားသဖြင့် ချန်းလဲ့မြို့၏ နံပါတ်တစ် အလှလေးဟု တင်စားခေါ်ဝေါ်ကြသည်။

ယခုအချိန်တွင် သူမက အဖြူရောင် ဝတ်စုံလေးကို ဝတ်ဆင်ထားပြီး ဖြူဝင်းသော အသားအရေ၊ လှပသော ကိုယ်ဟန်အချိုးအစားနှင့် ပြီးပြည့်စုံသော မျက်နှာပေါက်ကြောင့် ပတ်ဝန်းကျင်ရှိ ကြည့်ရှုနေသူများ အားလုံး၏ သွားရည်ကျမှုကို ခံနေရသည်။

ထို့အပြင် သူမ၏ မြင့်မြတ်သော အဆင့်အတန်းကြောင့် နတ်သမီးလေး တစ်ပါးအလား အားလုံးက မော်ကြည့်ရုံသာ တတ်နိုင်ပြီး စော်ကားလိုစိတ်များပင် မမွေးရဲကြပေ။

"ပိုင် သခင်မလေးက တကယ်ကို ပိုပိုလှလာတာပဲ..."

"ငါ့ရဲ့ နတ်သမီးလေးလို့ ခေါ်ရလောက်အောင် တန်ပါတယ်... ဘုရားရေ... သူက ငါ့ကို တစ်ချက် လှမ်းကြည့်သွားတယ်..."

"မင်း ပါးစပ်ပိတ်ထားစမ်းပါ... သူမက ကျိုးဟန်ကို လှမ်းကြည့်နေတာ... မင်းလို အကောင်မျိုးက ကိုယ့်ကိုယ်ကိုယ် အထင်ကြီးမနေနဲ့..."

"တကယ်ပဲ အလှလေးတွေက အစွမ်းထက်တဲ့သူတွေကို သဘောကျကြတာပဲ... သနားစရာ ငါ့အတွက်တော့ အခွင့်အရေး လုံးဝ မရှိတော့ဘူး..."

ပိုင်လင်းလုံ၏ အလှတရားက မြှောက်ပင့်လိုသူများ၏ ချီးကျူးသံများကို ချက်ချင်းပင် ခေါ်ဆောင်လာခဲ့သည်။

'ဟင်...'

ပိုင်လင်းလုံ၏ အကြည့်များ ရောက်လာသည်ကို ကျိုးဟန် သတိထားမိလိုက်သည်။

သူမကို မသိကြောင်း ကျိုးဟန် သေချာပေါက် သိနေသဖြင့် အနည်းငယ် ဇဝေဇဝါ ဖြစ်သွားသည်။

အကြည့်ချင်း ဆုံသွားချိန်တွင် တစ်ဖက်လူ၏ မျက်လုံးများထဲမှ စိန်ခေါ်လိုသည့် အငွေ့အသက်များကို ကျိုးဟန် ခံစားလိုက်ရသည်။

'ကြည့်ရတာ သူက ပထမနေရာကို ငါနဲ့ လုဖို့ သေချာပေါက် ယုံကြည်မှု ရှိနေပုံပဲ...'

'တောင်းပန်ပါတယ် အလှလေး... ငါ ကျိုးဟန် ရှိနေသရွေ့တော့ မင်းမှာ လုံးဝ အခွင့်အရေး မရှိဘူး...'

မကြာမီ စင်မြင့်ပေါ်ရှိ နှစ်ယောက်လုံး စတင် တိုက်ခိုက်ကြတော့သည်။

တိုက်ပွဲက ချက်ချင်းပင် အရှိန်အဟုန် ပြင်းထန်လာပြီး ဓားအလင်းတန်းများ လေထဲတွင် ပျံဝဲကာ အရှိန်အဝါများက ကောင်းကင်သို့ ထိုးတက်သွားတော့သည်။

"မြို့စားမင်း... ကိုယ်တိုင် ကြွလာတယ်ပေါ့..."

အထက်ဘက်ရှိ စင်မြင့်ပေါ်တွင်တော့ ဗိုလ်မှူး ဝေ့ချောင်းက သူ့ဆီသို့ လျှောက်လာနေသော အသက်လတ်ပိုင်း အမျိုးသားကို အလွန် ရိုသေလေးစားစွာဖြင့် အရိုအသေပေးလိုက်သည်။

"အင်း... ဘယ်လိုလဲ... ပါရမီရှင်လေးတွေ တွေ့ပြီလား..."

ပိုင်ဝူဟိန်က ခေါင်းညိတ်ကာ အလယ်ခေါင်ရှိ နေရာတွင် ဝင်ထိုင်လိုက်ပြီး အေးအေးဆေးဆေး မေးလိုက်သည်။

သူက အလုပ်များနေသည့် ကြားမှနေ၍ သမီးဖြစ်သူ၏ စွမ်းဆောင်ရည်ကို ကြည့်ရှုရန်နှင့် ပါရမီရှင်အသစ်များ ရှိမရှိ လာရောက် စစ်ဆေးခြင်း ဖြစ်သည်။

"မြို့စားမင်းကို သတင်းပို့ပါတယ်... တကယ်ပဲ ထူးခြားတဲ့ ပါရမီရှင် တစ်ယောက် ပေါ်လာပါတယ်..."

ဝေ့ချောင်းက အလျင်အမြန် ပြန်ဖြေလိုက်သည်။

"အိုး... ထူးခြားတယ်... ဘယ်လိုမျိုး ထူးခြားတာလဲ..."

ပိုင်ဝူဟိန်က စင်မြင့်ပေါ်ရှိ ပိုင်လင်းလုံ၏ တိုက်ပွဲကို အာရုံစိုက်နေရင်း ပေါ့ပေါ့ပါးပါး မေးလိုက်သည်။

"လူငယ် တစ်ယောက်ပါ... သူ့ရဲ့ ပြိုင်ဘက် မှန်သမျှ တစ်ချက်တည်းနဲ့ အပြတ်အသတ် ရှုံးကြတာချည်းပါပဲ... ပြန်လည် ခုခံဖို့တောင် အခွင့်အရေး မရလိုက်ကြဘူး..."

"ဒီလောက်တောင် အစွမ်းထက်တဲ့ လူငယ်မျိုး ရှိတယ်လား... နာမည်က ဘယ်သူလဲ..."

ပိုင်ဝူဟိန်က ချက်ချင်း စိတ်ဝင်စားသွားပြီး မေးလိုက်သည်။

"သူ့နာမည်က ကျိုးဟန် လို့ ခေါ်ပါတယ်... သူ့ရဲ့ ဓားသိုင်းက အရမ်း နက်နဲဆန်းကြယ်ပြီး ရွယ်တူတွေထက် အများကြီး သာလွန်ပါတယ်..."

ဝေ့ချောင်းက ကျိုးဟန် ထိုင်နေသည့် နေရာကို လက်ညှိုးထိုးပြကာ ရှင်းပြလိုက်သည်။

သူတို့လို အသက် ၃၀ ကျော် အရွယ်များပင် ကျိုးဟန်၏ ဓားသိုင်း အဆင့်သို့ ရောက်ရန် ခဲယဉ်းလှသဖြင့် ဝေ့ချောင်း၏ စိတ်ထဲတွင် အလွန် သဘောကျနေမိသည်။

"ကျိုးဟန်... မိသားစုကြီး လေးခုက လူ မဟုတ်ဘူးပေါ့... အရင်ကလည်း ဒီနာမည်ကို မကြားဖူးပါဘူး..."

ပိုင်ဝူဟိန်က မုတ်ဆိတ်မွေးများကို ပွတ်သပ်ကာ မျက်လုံးများ အရောင်လက်သွားပြီး အတွေးထဲ နစ်မြုပ်သွားသည်။

"ကျွန်တော် အထူးတလည် စုံစမ်းကြည့်ပြီးပါပြီ... သူက ဘယ်အဖွဲ့အစည်းကမှ မဟုတ်ပါဘူး... ရုတ်တရက်ကြီး ပေါ်လာသလို ဖြစ်နေတော့ တကယ်ကို ယုံကြည်နိုင်စရာ မရှိဘူး..."

အကြိမ်ကြိမ် အတည်မပြုရသေးပါက ဝေ့ချောင်းပင် ကျိုးဟန်ကို မိစ္ဆာမျိုးနွယ်များ၏ သူလျှိုဟု သံသယ ဝင်မိလိမ့်မည်။

မည်သို့ပင်ဖြစ်စေ ဤမျှ အစွမ်းထက်သော လူငယ်တစ်ယောက်က ဤမျှ ကာလပတ်လုံး တိတ်ဆိတ်နေပြီး ယနေ့မှ ရုတ်တရက် ထွက်ပေါ်လာခြင်းမှာ မဖြစ်နိုင်ပေ။

ထို့ကြောင့် ဤအရာ၏ နောက်ကွယ်တွင် သေချာပေါက် လျှို့ဝှက်ချက် တစ်ခုခု ရှိနေမည်ဖြစ်သော်လည်း မည်သည့်အရာ ဖြစ်သည်ကိုတော့ သူ မသိနိုင်ပေ။

"အင်း... ငါ သိပြီ... ခဏနေ သူ့ရဲ့ စွမ်းဆောင်ရည်ကို ငါ သေချာ ကြည့်လိုက်မယ်..."

မြို့စား တစ်ယောက်အနေဖြင့် ပိုင်ဝူဟိန်က လျှို့ဝှက်ချက် များစွာကို သိထားသည်။

နတ်ဘုရားနှင့်မိစ္ဆာကမ္ဘာ မှာ အလွန် နက်နဲဆန်းကြယ်ပြီး အခြား ကမ္ဘာများမှ လူများလည်း ရောက်လာတတ်ကြောင်း သူ သိထားသည်။

ထို့ကြောင့် ဤကျိုးဟန် ဆိုသူမှာ အခြား ကမ္ဘာမှ ရောက်လာသူ ဖြစ်နိုင်ခြေ အလွန် များသည်။

မည်သည့် အကြောင်းကြောင့် ရောက်လာသည်ဖြစ်စေ၊ မည်သည့် ရည်ရွယ်ချက် ရှိသည်ဖြစ်စေ သူ့အတွက် အရေးမကြီးပေ။

ချန်းလဲ့မြို့ကို အန္တရာယ် မပြုသရွေ့ အားလုံး အဆင်ပြေသည်။

ဤသို့ တွေးမိပြီးနောက် သူက အတွေးစများကို ဖြတ်လိုက်သည်။

"လင်းလုံ ရဲ့ စွမ်းအားတွေက အများကြီး တိုးတက်လာတာပဲ... သူနဲ့ ကျိုးဟန် ယှဉ်ရင် ဘယ်သူ ပိုစွမ်းမလဲ ဆိုတာ တကယ်ကို မျှော်လင့်စရာပဲ..."

ပိုင်ဝူဟိန်က မုတ်ဆိတ်မွေးများကို ပွတ်သပ်ကာ ပြုံးရင်း ပြောလိုက်ပြီး သူ၏ မျက်လုံးများထဲတွင် သဘောကျ နှစ်သက်မှုများ ပြည့်နှက်နေသည်။

"သခင်မလေးက မြို့စားမင်းဆီကနေ တိုက်ရိုက် သင်ယူထားတာဆိုတော့ တားဆီးလို့ ရနိုင်မှာ မဟုတ်ပါဘူး... ရလဒ်ကတော့ ရှင်းနေတာပဲ မဟုတ်လား..."

"မင်းကလည်း... အမြဲတမ်း နားထောင်လို့ ကောင်းတာတွေချည်းပဲ ရွေးပြောနေတော့တာပဲ..."

ပိုင်ဝူဟိန်က အနည်းငယ် အပြစ်တင်သည့်ဟန်ဖြင့် ပြောလိုက်သော်လည်း စိတ်ထဲတွင်တော့ အလွန် ပျော်ရွှင်နေပြီ ဖြစ်သည်။ ပိုင်လင်းလုံက သူ ကိုယ်တိုင် သင်ကြားပေးထားခြင်း ဖြစ်သည်။

သူက ချန်းလဲ့မြို့၏ အငြင်းပွားဖွယ် မရှိသော နံပါတ်တစ် ကျွမ်းကျင်သူ ဖြစ်ရာ သူ၏ သင်ကြားမှုက အခြားသူများနှင့် ယှဉ်နိုင်မည် မဟုတ်ပေ။

ကျိုးဟန်ကို အနိုင်ယူနိုင်မည်မှာ သေချာသော်လည်း ကျိုးဟန်က မည်မျှအထိ တောင့်ခံနိုင်မည်နည်း ဆိုသည်က အဓိက ဖြစ်သည်။

'ဟင်... ဖေဖေလည်း လာကြည့်နေတာပဲ... ငါ့ရဲ့ အစွမ်းကုန် ကြိုးစားပြမှ ဖြစ်မယ်... ကျိုးဟန်... နင့်အတွက်တော့ တောင်းပန်ပါတယ်...'

အထက်ဘက်ရှိ စင်မြင့်ပေါ်တွင် ပိုင်ဝူဟိန်ကို တွေ့လိုက်ရသဖြင့် ပိုင်လင်းလုံ၏ မျက်လုံးများ အရောင်လက်သွားသည်။

သူမက သေချာပေါက် အစွမ်းကုန် ကြိုးစားပြီး အားလုံးကို အံ့သြသွားစေကာ ဖခင်ဖြစ်သူ မျက်နှာပွင့်အောင် လုပ်ပြရမည် ဖြစ်သည်။

သူမက အစွမ်းကုန် ကြိုးစားမည်ဆိုပါက တစ်ဖက်မှ ကျိုးဟန်မှာ သေချာပေါက် ဒုက္ခရောက်မည် ဖြစ်ပြီး ပြင်းထန်သော ဒဏ်ရာများ ရရှိသွားနိုင်သည်။

'ပြီးရင်တော့ သူ့ကို လျော်ကြေးအနေနဲ့ ပစ္စည်းတွေ နည်းနည်း ပိုပေးလိုက်မယ်... တောင်းပန်တဲ့ သဘောပေါ့...'

ပိုင်လင်းလုံ၏ စိတ်ထဲတွင် ကျိုးဟန်ကို အနိုင်ယူပြီးသည့် မြင်ကွင်းများကိုပင် ကြိုတွေးထားပြီး ဖြစ်ကာ မျက်နှာပေါ်တွင် ပြင်းထန်သော ယုံကြည်မှုများ ထွက်ပေါ်နေသည်။

ယခင်က ကျိုးဟန်က ၈ ပွဲ ဆက်တိုက် အနိုင်ရရှိခဲ့ပြီး ပြင်းထန်သော စွမ်းအားများကို ပြသခဲ့ရာ အလွန် အစွမ်းထက်သည်ဟု ဆိုနိုင်သည်။

သို့သော် ၎င်းမှာ အခြားသူများ၏ အမြင်တွင်သာ ဖြစ်သည်။ သူမ၏ အမြင်တွင်တော့ ဤမျှနှင့် မလုံလောက်သေးပေ။

သူမက မြို့စား၏ သမီးတော် ဖြစ်ပြီး အလှတရားနှင့် စွမ်းအားများကို ပိုင်ဆိုင်ထားသော ထိပ်တန်း ပါရမီရှင် တစ်ယောက် ဖြစ်သည်။

ပိုပိုသာသာ ပြောရလျှင် ချန်းလဲ့မြို့ တစ်မြို့လုံးရှိ လူငယ်ပါရမီရှင် အားလုံးကို သူမက အဖတ်ပင် လုပ်မည် မဟုတ်ပေ။

သူမထက် အသက်တစ်အုပ် ကြီးသူများပင် သူမ၏ ပြိုင်ဘက် မဟုတ်ကြပေ။ ဤသည်မှာ သူမ မာနကြီးရခြင်း၏ အဓိက အကြောင်းရင်းပင် ဖြစ်သည်။

"နံပါတ် ၁၉ ကျိုးဟန်... စင်ပေါ်တက်ပြီး ဒီနေ့ရဲ့ ပထမနေရာအတွက် ယှဉ်ပြိုင်ပါ..."

ဒိုင်လူကြီး၏ အသံကျယ်ကြီး ထွက်ပေါ်လာပြီးနောက် ကျိုးဟန်က ပခုံးတွန့်ကာ စင်မြင့်ပေါ်သို့ ဖြည်းဖြည်းချင်း တက်လာခဲ့သည်။

ပိုင်လင်းလုံက စင်မြင့်ပေါ်တွင် ကြိုတင် စောင့်ဆိုင်းနေပြီး သူမ၏ မျက်လုံးများထဲတွင် အေးစက်မှုများ ပြည့်နှက်နေသည်။

'ဒီကောင်... ယောကျ်ားပီသမှု လုံးဝ မရှိတာပဲ... ဒီလောက် နှေးကွေးနေရလား... ဘယ်ယောကျ်ားမှ ငါ့ကို ဒီလောက်ကြာအောင် မစောင့်ခိုင်းဖူးဘူး...'

ကျိုးဟန်၏ ဂရုမစိုက်သည့် အမူအရာကို မြင်သောအခါ ပိုင်လင်းလုံ အနည်းငယ် မကျေမနပ် ဖြစ်သွားသည်။

သူမလို အလှလေးကို မြင်လျှင် မည်သည့် ယောကျ်ားမဆို မျက်နှာချိုသွေးကာ မိမိ၏ အကောင်းဆုံး ပုံစံကို ပြသချင်ကြသည် မဟုတ်ပါလား။

ဤကောင်ကတော့ ကောင်းလှသည်။ သူမကို လုံးဝ လျစ်လျူရှုရဲသည်။

"ကျိုးဟန်... နင့်ရဲ့ တကယ့် အစွမ်းတွေကို ပြလိုက်စမ်းပါ... နင့်ကို ငါ လုံးဝ အပြတ်အသတ် နိုင်ပြမယ်..."

ပိုင်လင်းလုံက အင်္ကျီစများ လေနှင်ရာ လွင့်ခါနေပြီး ပြုံးရင်း ပြောလိုက်သည်။

တစ်ဖက်လူက အစွမ်းကုန် ကြိုးစားမှသာ သူမက အနိုင်ယူပြီးနောက် ပိုမို ကြီးမားသော တုန်လှုပ်မှုများကို ဖန်တီးနိုင်မည် ဖြစ်သည်။

ဤသို့ဆိုလျှင် ရှင်းလင်းသော နှိုင်းယှဉ်ချက် တစ်ခုကို ဖြစ်ပေါ်စေမည် မဟုတ်ပါလား။