အခန်း ၄၈

အခန်း (၄၈) အိုဟွမ် လန့်သွားခြင်းနှင့် စွမ်းရည် ဖွင့်လှစ်ခြင်း

သူတို့က အိုဟွမ်၏ တပည့်များ ဖြစ်လာရခြင်းမှာလည်း အသက်ရှင်သန်ရန်အတွက် မတတ်သာ၍သာ ဖြစ်သည်။

အဓိက အကြောင်းရင်းမှာ ကျိုးဟန်က တပည့် လက်မခံသဖြင့် အိုဟွမ်၏ နောက်သို့သာ လိုက်ရခြင်း ဖြစ်သည်။

ထို့ကြောင့် သူတို့၏ ရည်ရွယ်ချက်မှာ ကျိုးဟန်ကို အဆက်မပြတ် နှိမ့်ချရန်နှင့် သူ့ကို နာမည်ကျော်ကြားမှုများ ဆက်လက် မရရှိစေရန် ဖြစ်သည်။

ယခုအချိန်တွင် အိုဟွမ်၏ မျက်နှာက အနည်းငယ် ပျက်ယွင်းနေသည်။ ဆိုင် အဆင့်သတ်မှတ်ချက်တွင် သူက ဒုတိယနေရာသို့ ရောက်သွားသည်ကို မြင်လိုက်ရသောကြောင့် ဖြစ်သည်။

ပထမနေရာ ရရှိထားသော ရတနာတိုက် ဆိုသည်မှာ ကျိုးဟန်၏ ဆိုင်ပင် ဖြစ်သည်။

'ဒီပစ္စည်းတွေကို သူ ဘယ်ကနေ ရလာလဲ ဘယ်သူသိမှာလဲ... သေချာပေါက် လူသတ်ပြီး လုလာတာ ဖြစ်ရမယ်...'

အိုဟွမ်က မကျေမနပ်ဖြင့် တွေးလိုက်ပြီး ထိုကဲ့သို့ ခန့်မှန်းလိုက်သည်။

သေချာပေါက် သူက စကားပြောချန်နယ် တွင် ဤသို့ ထုတ်ပြောမည်တော့ မဟုတ်ပေ။

သူက လူမိုက် တစ်ယောက် မဟုတ်သဖြင့် ချန်ပေရွှမ်းလိုမျိုး ကျိုးဟန်ကို ထွက်ပြီး ရင်ဆိုင်မည် မဟုတ်ပေ။ ချန်ပေရွှမ်း၏ အဆုံးသတ်က အလွန် ဆိုးရွားလှသည် မဟုတ်ပါလား။

ကျိုးဟန်ကို ရင်ဆိုင်ရန် သေချာပေါက် ယုံကြည်မှု မရှိသေးသရွေ့ သူက ကျိုးဟန်နှင့် ထိပ်တိုက် တွေ့မည် မဟုတ်ပေ။

အလွန်ဆုံး သူ၏ တပည့်များကိုသာ သတင်းအမှားများ လွှင့်ခိုင်းပြီး ကျိုးဟန်ကို တိုက်ခိုက်ခိုင်းမည် ဖြစ်သည်။

"ဒီညီအစ်ကို ပြောတာ မှန်တယ်... အခု ငါ့မှာ ငွေအဆင့် ပစ္စည်းတွေ ထုတ်စရာ မရှိတော့ဘူး..."

ကျိုးဟန်က ပြုံးကာ ဤစာကို ပို့လိုက်သည်။

ထင်ထားသည့်အတိုင်း ဤစာကို ပို့လိုက်ပြီးနောက် လှောင်ပြောင်မှုများ ပိုမို ထွက်ပေါ်လာတော့သည်။

"ဟီးဟီး... ကျိုးဟန် ဆိုတာလည်း ဒီလောက်ပါပဲ... ငါက ဘယ်လောက်တောင် အစွမ်းထက်လဲလို့..."

"မင်းတို့တွေ သူ့ကို အလကား အထင်ကြီးနေကြတာပဲ..."

"ငါ့စကား မဆုံးသေးဘူးလေ... အခု ငါ့ဆီမှာ ရွှေအဆင့် ပစ္စည်းတွေပဲ ရှိတော့တယ်... ငွေအဆင့်လား... ဆောရီးပဲ... ငါ တကယ်ကို အထင်မကြီးတာ..."

ကျိုးဟန်က ထိုသို့ ပြန်ပို့လိုက်သည်။

ထိုစာကို ပို့ပြီးနောက် ကျိုးဟန်က ကျောပိုးအိတ်ထဲရှိ ရွှေအဆင့် ပစ္စည်း အားလုံးကို ဆိုင်တွင် တင်လိုက်သည်။

ရွှေအဆင့် ပစ္စည်းများ

ဈေးနှုန်း - ရွှေဒင်္ဂါး ၅၀၀ သို့မဟုတ် ညီမျှသော ပစ္စည်းများ

အရေအတွက် - ၈၆

"စနစ် သတိပေးချက်... ရွှေအဆင့် ပစ္စည်းများကို အောင်မြင်စွာ တင်ရောင်းလိုက်ပါပြီ..."

"သောက်ကျိုးနည်း... လေလုံးထွားနေတာတော့ မဟုတ်ပါဘူးနော်... အစ်ကိုဟန် ငါက အစ်ကို့ကို ထောက်ခံပေမဲ့ ရွှေအဆင့် ပစ္စည်းတွေက ရဖို့ ဒီလောက် မလွယ်ပါဘူး..."

"ဟုတ်တယ်... ငါလည်း မယုံဘူး... သိပ်ပြီး မဖြစ်နိုင်သလိုပဲ..."

"ကျိုးဟန်... တွေ့လား... ကိုယ့်ကိုယ်ကိုယ် နံပါတ်တစ် ဆိုပြီး လေလုံးထွားလို့ ရမယ် မထင်နဲ့..."

မကြာမီ ကျိုးဟန်ကို အားပေးထောက်ခံသူများပင် မယုံကြည်နိုင် ဖြစ်လာကြသည်။

ရွှေအဆင့် ပစ္စည်း ဆိုသည်မှာ သူတို့၏ စိတ်ကူးယဉ်မှု ပြင်ပတွင် ရှိနေသောကြောင့် ဖြစ်သည်။

သို့သော် တစ်မိနစ်ပင် မပြည့်သေးသည့် အချိန်အတွင်း အခြေအနေများ ပြောင်းလဲသွားတော့သည်။

"အစ်ကိုဟန် ကို မယုံတဲ့ကောင်တွေ ကိုယ့်ပါးကိုယ် ပြန်ရိုက်ဖို့သာ ပြင်ထားတော့... ဒါ ဘာလဲဆိုတာ ကိုယ်တိုင်သာ ကြည့်လိုက်... ရွှေရောင် ဓားရှည်..."

"သောက်ကျိုးနည်း... တကယ်ကြီး ရွှေအဆင့် ပစ္စည်းတွေပဲ... အခု ၈၆ ခုတောင် တင်ထားတာ... တကယ်ကို ကြောက်စရာ ကောင်းလိုက်တာ..."

"အစ်ကိုဟန် ကို လှောင်နေတဲ့ကောင်တွေ အခု ထွက်လာခဲ့စမ်း... သတ္တိရှိရင် ထပ်ပြောကြည့်လေ..."

"အကုန် ထွက်လာခဲ့ကြ... အစ်ကိုဟန် ကို စော်ကားရဲတယ်ပေါ့... သေချင်နေကြတာပဲ..."

သေချာပေါက် အိုဟွမ်၏ ပြဿနာရှာသော တပည့်များ အားလုံး အသံတိတ်သွားကြပြီး သူတို့၏ မျက်နှာများမှာ ဖြတ်ရိုက်ခံလိုက်ရသကဲ့သို့ နာကျင်နေကြသည်။

အိုဟွမ်လည်း အလွန် အံ့အားသင့်သွားသည်။ ရွှေအဆင့် ပစ္စည်းက မည်သို့သော အဓိပ္ပာယ် ဖြစ်ကြောင်းကို အခြားသူများထက် သူက ပိုသိနေသောကြောင့် ဖြစ်သည်။

ထို့အပြင် အရေအတွက်က ၈၆ ခုတောင် ဖြစ်သည်။ ဤသည်မှာ ကြွားဝါနေခြင်း မဟုတ်ဘဲ တကယ်ကို ကြောက်စရာကောင်းသည့် ကိစ္စပင် ဖြစ်သည်။ ကြည့်ရသည်မှာ သူက ကျိုးဟန်၏ ပြိုင်ဘက် လုံးဝ မဟုတ်သေးပေ။

သူက တပည့်များကို အလျင်အမြန် တားဆီးလိုက်ပြီး ကျိုးဟန်ကို ဆက်လက် ရန်မစရန် အမိန့်ပေးလိုက်သည်။ သူ၏ မျက်နှာက အုံ့မှိုင်းနေပြီး အကြည့်များက နက်ရှိုင်းနေသည်။

'ငါ ဆက်ပြီး သည်းခံနေမှ ဖြစ်မယ်... ငါ့ကို အချိန်နည်းနည်း ပေးလိုက်ရင် သူ့ကို ကျော်တက်ဖို့ ပြဿနာ မရှိဘူး...'

အိုဟွမ်က သူ၏ A အဆင့် ကံကောင်းခြင်း မြှင့်တင်မှု ပင်ကိုစွမ်းရည် အပေါ် အလွန် ယုံကြည်မှု ရှိနေသည်။

"အစ်ကိုဟန် တကယ် မိုက်တယ်... နံပါတ်တစ် ဆိုတဲ့ နာမည်နဲ့ တကယ် လိုက်ဖက်တယ်... အရှိန်အဝါ အပြည့်ပဲ..."

"အစ်ကိုဟန် အစွမ်းပြပြီဟေ့... ဂိုဏ်း ထောင်တဲ့အခါကျရင် ငါတို့ အစ်ကို့နောက် လိုက်မယ်..."

"တောင်းပန်ပါတယ်... ကျွန်တော် အစ်ကိုဟန် ကို မသင်္ကာ မဖြစ်ခဲ့သင့်ဘူး..."

"တောင်းပန်ပါတယ် +၁..."

"တောင်းပန်ပါတယ် +၂..."

မကြာမီ စကားပြောချန်နယ် တစ်ခုလုံး တောင်းပန်ပါတယ် ဟူသော စာသားများဖြင့် ပြည့်နှက်သွားတော့သည်။

ကျိုးဟန် ကြည့်ပြီးနောက် ပြုံးရုံသာ ပြုံးလိုက်ပြီး ဘာမှ ဆက်မပြောတော့ပေ။

သူက ဆိုင်ကို ပြန်ဖွင့်ကြည့်လိုက်သည်။

ရတနာတိုက်

ဆိုင်ရှင် - ကျိုးဟန်

မန်နေဂျာ - မရှိ

အရောင်းအဝယ် ပမာဏ - ၃၅၃၀၀

ဆိုင်အဆင့် - ၃

လာရောက်ကြည့်ရှုသူ - ၁.၀၄၅ သန်း

ရောင်းချမည့် ပစ္စည်း - ရွှေအဆင့် ပစ္စည်း ၃၆ ခု

ဒေသတွင်း အဆင့်သတ်မှတ်ချက် - ၁

ဝယ်ယူမည့် နေရာ - မဖတ်ရသေးသော စာ ၉၉+ စောင်

မှတ်ချက် - ဝယ်ယူမည့် နေရာ အသစ်တိုးလာသည် ကစားသမားများက မိမိတို့ ရောင်းချလိုသော ပစ္စည်း ပုံများကို တင်ထားပြီး ဈေးနှုန်း သတ်မှတ်နိုင်သည်

ဝယ်ယူမည့် နေရာ ကို မြင်လိုက်ရချိန်တွင် ကျိုးဟန် မျက်လုံးများ အရောင်လက်သွားသည်။

ဤသို့ဆိုလျှင် အခြား ကစားသမားများထံတွင် ပစ္စည်းကောင်းများ ရှိပါက မိမိ၏ ရင်းမြစ်များဖြင့် လဲလှယ်၍ ရနိုင်ပြီ ဖြစ်သည်။ ဤသည်က တကယ်ကို အဆင်ပြေလွန်းလှသည်။

အရောင်းအဝယ် ပမာဏက ရွှေဒင်္ဂါး ၃၅၃၀၀ သို့ ရောက်ရှိသွားပြီး ဆိုင်အဆင့် ကလည်း အဆင့် ၃ သို့ အောင်မြင်စွာ တက်လှမ်းသွားပြီ ဖြစ်သည်။

ရွှေအဆင့် ပစ္စည်း ၃၆ ခု ကျန်သေးပြီး အခု ၅၀ ရောင်းရပြီး ဖြစ်သည်။ မည်သို့ပင်ဖြစ်စေ ရွှေဒင်္ဂါး ၅၀၀ ဖြစ်ရာ လူ ၉၀ ရာခိုင်နှုန်းက ထိုမျှလောက် ငွေကြေး မရှိကြပေ။

ထို့ကြောင့် ရွှေအဆင့် ပစ္စည်းများမှာ ချက်ချင်း ကုန်မသွားခြင်း ဖြစ်သည်။ သို့သော် ယနေ့ အရောင်းအဝယ် အခြေအနေအရ ကြည့်လျှင် သေချာပေါက် အကုန် ရောင်းထွက်သွားမည် ဖြစ်သည်။

'ဒါနဲ့ မန်နေဂျာ က ဘာလုပ်ဖို့လဲ...'

"စနစ် သတိပေးချက်... သင်သည် ဆိုင်ကို စီမံခန့်ခွဲရန် မန်နေဂျာ ငှားရမ်းနိုင်ပြီး ပစ္စည်းများ တင်ရောင်းခြင်းနှင့် ကြော်ငြာခြင်းတို့ကို တာဝန်ယူ လုပ်ဆောင်ပေးမည် ဖြစ်သည်..."

စနစ်၏ ဖြေကြားချက်ကို ကြားပြီးနောက် ကျိုးဟန် သဘောပေါက်သွားသည်။

သူ့အနေဖြင့် ဆိုင်ကို ကြီးကြပ်ရန် အချိန်များစွာ မရှိပေ။ ဝယ်ယူမည့် နေရာ တွင် နေ့စဉ် ဝင်လာသော စာများကို တစ်စောင်ချင်း ဖတ်ရန်လည်း သူ စိတ်ရှည်မည် မဟုတ်ပေ။

ထိုသို့ဆိုလျှင် ပစ္စည်းကောင်း အချို့ကို လက်လွတ်ဆုံးရှုံးသွားနိုင်ချေ ရှိသည်။

ထို့ကြောင့် လူတစ်ယောက် ငှားရမ်းလိုက်ခြင်းက အချိန်နှင့် လုပ်အားကို များစွာ သက်သာစေမည် ဖြစ်သည်။

ဤကဲ့သို့ အဆင်ပြေအောင် ဖန်တီးပေးထားသဖြင့် နတ်ဘုရားနှင့်မိစ္ဆာကမ္ဘာ စနစ်၏ အစွမ်းထက်မှုကို ကျိုးဟန် အမှန်တကယ် လေးစားသွားမိသည်။

မန်နေဂျာ နေရာအတွက် ကျိုးဟန်တွင် အဖြေရှိပြီးသား ဖြစ်သည်။ ထိုသူမှာ ဟန်ချင်ရွှဲ့ ပင် ဖြစ်သည်။

သူမ၏ စိတ်နေသဘောထားက ပိုမို တည်ငြိမ်ပြီး သေချာသဖြင့် သူမလောက် သင့်တော်မည့်သူ မရှိတော့ပေ။

"ချင်ရွှဲ့... ငါ့ဆိုင်ကို မန်နေဂျာ အနေနဲ့ ကြီးကြပ်ပေးဖို့ အကူအညီ တောင်းချင်လို့... မင်း ဘယ်လိုသဘောရလဲ..."

ကျိုးဟန်က ဆုံးဖြတ်ပြီးနောက် သူမကို မေးလိုက်သည်။

"ဟင်... ငါ... ငါလား..."

ဟန်ချင်ရွှဲ့က ကျိုးဟန် သူမကို ကြီးကြပ်ခိုင်းမည်ဟု ထင်မထားခဲ့သဖြင့် မျက်နှာလေး နီရဲသွားသည်။

သူမက ယောကျ်ားဖြစ်သူ၏ ငွေများကို မိန်းမဖြစ်သူက ကိုင်တွယ်ရသည့် အခြေအနေမျိုးကို ချက်ချင်း တွေးလိုက်မိသည်။ ထို့နောက် ဟန်ရှန်နင်ကို အကဲခတ်ကြည့်လိုက်ရာ ဘာမှ မထူးခြားသည်ကို မြင်လိုက်ရသဖြင့် သက်ပြင်းချလိုက်မိသည်။

"ဟုတ်တယ် မင်းပဲ... ကိစ္စတွေက နည်းနည်းတော့ ရှုပ်လိမ့်မယ်... အဆင်ပြေရဲ့လား..."

လစာ ကိစ္စများကို ကျိုးဟန် လုံးဝ ထည့်မပြောတော့ပေ။ ယခု သူတို့ သုံးယောက်၏ ဆက်ဆံရေးက သာမန် မဟုတ်တော့သဖြင့် ဤအရာများကို ပြောနေလျှင် အဓိပ္ပာယ် မရှိတော့ပေ။

သေချာပေါက် ပစ္စည်းကောင်းများ ရှိလာပါက ညီအစ်မ နှစ်ယောက်အတွက် ချန်ထားပေးမည်သာ ဖြစ်သည်။

"လုပ်မယ်... သေချာပေါက် လုပ်မယ်..."

ဟန်ချင်ရွှဲ့က အလျင်အမြန် ပြန်ဖြေလိုက်သည်။

ကျိုးဟန်၏ ဝန်ထုပ်ဝန်ပိုးများကို မျှဝေခံစားပေးနိုင်သဖြင့် သူမ အလွန် ပျော်ရွှင်နေမိသည်။ အနည်းဆုံးတော့ သူမက အပိုလူ တစ်ယောက် မဟုတ်တော့ပေ။

သူမ သဘောတူလိုက်သည်ကို မြင်သောအခါ ကျိုးဟန်က ကျေနပ်စွာ ခေါင်းညိတ်လိုက်သည်။

"ငါ အခုပဲ လုပ်ပိုင်ခွင့် ပေးလိုက်မယ်... မင်း ဝင်ပြီး လေ့လာကြည့်လိုက်ဦး..."

"စနစ် သတိပေးချက်... ကစားသမား ဟန်ချင်ရွှဲ့ ကို ဆိုင်၏ လုပ်ပိုင်ခွင့်များ ပေးအပ်မည်လား..."

ကျိုးဟန် သဘောတူလိုက်ပြီးနောက် ဟန်ချင်ရွှဲ့ ထံသို့ သတိပေးချက် ရောက်သွားသည်။

ထို့နောက် သူမက ဝယ်ယူမည့် နေရာ သို့ ဝင်ရောက်သွားပြီး အချက်အလက်များကို ဖြေရှင်းတော့သည်။ သူမက ချက်ချင်းပင် အလုပ်ထဲသို့ အာရုံစိုက်သွားတော့သည်။

ဤနေရာရှိ ကိစ္စများလည်း ပြီးဆုံးသွားပြီ ဖြစ်သည်။ သူတို့ သုံးယောက်က မီးတိမ် တောင်တန်း နယ်မြေထဲမှ ထွက်ခွာလာခဲ့ရာ လေထုက အနည်းငယ် အေးမြလာတော့သည်။

မှောင်ရန် နာရီအနည်းငယ် လိုသေးသည်။ ယနေ့ အဆင့် ၂၅ သို့ ရောက်ရှိပြီး ပထမဆုံး အလုပ်အကိုင် ပြောင်းလဲခြင်း ကို ပြုလုပ်နိုင်ရန်အတွက် အချိန်လု၍ သားရဲများကို သတ်ဖြတ်ရမည် ဖြစ်သည်။

အမြဲတမ်း ၅ ဆ အတွေ့အကြုံမှတ် တိုးမြှင့်ခြင်း အထူးစွမ်းရည် ရှိနေသဖြင့် အချိန်များစွာ လိုမည် မဟုတ်ပေ။

သို့သော် သားရဲများ မသတ်ဖြတ်မီ ကျိုးဟန်၏ အပြင်းထန်ဆုံး အထူးစွမ်းရည် ကို ဖွင့်လှစ်ရမည် ဖြစ်သည်။

"ဓားတစ်သောင်း မူလဆီသို့ စွမ်းရည်ကို ဖွင့်လှစ်မယ်..."

ကျိုးဟန်က ပြောလိုက်သည်။

"စနစ် သတိပေးချက်... သင်၏ တိုက်ခိုက်မှု စွမ်းအားမှာ ၂၀၀၀ သို့ ရောက်ရှိသွားပြီဖြစ်ရာ ဖွင့်လှစ်ရန် စံနှုန်းနှင့် ကိုက်ညီပါသည်..."

"စနစ် သတိပေးချက်... ရွှေဒင်္ဂါး ၃၀၀၀၀ နှုတ်ယူသွားပြီး ဖွင့်လှစ်ခြင်း အောင်မြင်ပါသည် ကျေးဇူးပြု၍ စစ်ဆေးကြည့်ပါ..."