အခန်း ၅၉

အခန်း (၅၉) နိုးထခြင်း တာဝန်... ဓားနတ်ဘုရား ကျောင်းတော်

"ဝိညာဉ်ကျောက်တုံး ၁၀၀၀ တောင်... မဆိုးဘူးပဲ... ဆုကြေးက တော်တော် များတာပဲ..."

ဝိညာဉ်ကျောက်တုံး ဆိုသည်မှာ ပိုမို အဆင့်မြင့်သော ငွေကြေး တစ်မျိုး ဖြစ်ပြီး ဘုရင်အဆင့် ဘော့စ်ကို သတ်ဖြတ်ခြင်း၊ အဆင့်မြင့် ရတနာသေတ္တာများ ဖွင့်လှစ်ခြင်း၊ တာဝန်များ ပြီးမြောက်ခြင်း စသည့် နည်းလမ်းများဖြင့် ရရှိနိုင်သည်။

အသုံးဝင်ပုံကလည်း အလွန် ကျယ်ပြန့်သည်။ ခုနက ကျိုးဟန် ကြည့်ခဲ့သည့် ဒုတိယ အလုပ်အကိုင်ကတ် လဲလှယ်ခြင်း၊ အဆင့်မြင့် ပစ္စည်းများ လဲလှယ်ခြင်း စသည်တို့ အားလုံးက ဝိညာဉ်ကျောက်တုံး နှင့် မကင်းကွာနိုင်ပေ။

တွေးမိသည်နှင့် ကျိုးဟန် က ကိုယ်ပိုင် အချက်အလက် ဖန်သားပြင် ကို ဖွင့်၍ ကြည့်ရှုလိုက်သည်။

ကျိုးဟန်

အဆင့် - ၂၅ (၀.၆%)

အလုပ်အကိုင် - ဓားဝိညာဉ် (ပထမအကြိမ် နိုးထနေဆဲ)

သွေးပမာဏ - ၈၇၅၀+၁၄၀၀၀

တိုက်ခိုက်မှု - ၁၁၁၀+၇၂၀၀

အကာအကွယ် - ၆၄၀+၈၀၀

ပင်ကိုစွမ်းရည် - အကန့်အသတ်မဲ့ အဆင့်မြှင့်တင်ခြင်း

ဂုဏ်ပုဒ် - နာမည်ကျော်ကြားခြင်း (၃ ကြိမ်မြှင့်) တိုက်ခိုက်မှု ၅၀၀ အပိုဆောင်း တိုးမည်

လက်နက် - တိမ်စိမ်း ဓား (၆ ကြိမ်မြှင့်) သွေးစုပ်မည်၊ ၆ ဆ တိုက်ခိုက်မည်၊ အကာအကွယ် ဖောက်ခွင်းမည်

ဒုတိယ လက်နက် - နာမည်ကျော်ဓား စီမင် (၇ ကြိမ်မြှင့်) လုံးဝ ထိခိုက်မှုမရှိသော အခြေအနေ၊ ထိခိုက်မှု လျှော့ချမည်၊ ခံနိုင်ရည်

လက်စွပ် - စစ်မှန်သော ဝိညာဉ် လက်စွပ် (၅ ကြိမ်မြှင့်) အကာအကွယ် ဖောက်ခွင်းမည်၊ စစ်မှန်သော ဝိညာဉ်၊ ခံနိုင်ရည်

နားကပ် - လရောင် နားကပ် (၆ ကြိမ်မြှင့်) အပြင်းအထန် တိုက်ခိုက်နိုင်စွမ်း၊ ခံနိုင်ရည်၊ သွေးပြန်တက်မည်

အသုံးအဆောင် - တစ္ဆေ ဝတ်စုံ (၅ ကြိမ်မြှင့်)

နတ်ဘုရားသတ် ကျောင်းတော် စွမ်းအားမြှင့်တင်ခြင်း - သွေးပမာဏ ၆၀၀၀ တိုးမည်

အချက်အလက်များကို ကြည့်ပြီးနောက် ကျိုးဟန် ကိုယ်တိုင်ပင် အံ့အားသင့်သွားသည်။ သူ ဤမျှ အစွမ်းထက်လာခဲ့သည်ကို သတိမထားမိလိုက်ပေ။

သွေးပမာဏက ၂ သောင်းကျော်သွားပြီး တိုက်ခိုက်မှုကလည်း ၈၃၀၀ ကျော်နေပြီဖြစ်ရာ မကြာမီ ၁ သောင်းအထိ ရောက်ရှိတော့မည် ဖြစ်သည်။

အကာအကွယ်က ၁၄၀၀ ကျော် ရှိပြီး ပစ္စည်းများနှင့် လက်နက်များ၏ အချက်အလက်များပါ ပေါင်းလိုက်ပါက ကြောက်မက်ဖွယ်ကောင်းသော ထိခိုက်မှု ပမာဏကို ဖန်တီးနိုင်ပြီ ဖြစ်သည်။

အချက်အလက်များကို သေချာ ကြည့်နေစဉ် ကျိုးဟန် ရုတ်တရက် သတိပေးသံ တစ်ခု ကြားလိုက်ရသည်။

"စနစ် သတိပေးချက်... သင်သည် အဆင့် ၂၅ သို့ ရောက်ရှိသွားပါပြီ... ပထမအကြိမ် နိုးထခြင်း ကို စတင်မည်လား..."

'မျှော်လင့်နေတဲ့ အချိန် ရောက်လာခဲ့ပြီပဲ... နောက်ဆုံးတော့ နိုးထတော့မှာလား...'

ကျိုးဟန် အနည်းငယ် စိတ်လှုပ်ရှားသွားသည်။

"စတင်မယ်..."

"စနစ် သတိပေးချက်... သင်၏ အလုပ်အကိုင်မှာ ဓားဝိညာဉ် ဖြစ်ကြောင်း ထောက်လှမ်းသိရှိရပါသည်... ချန်းလဲ့မြို့ ရှိ ဓားနတ်ဘုရား ကျောင်းတော် သို့ သွားရောက်၍ နိုးထခြင်း တာဝန် ကို ရယူပါ..."

"စနစ် သတိပေးချက်... နိုးထခြင်း တာဝန် ကို အဖွဲ့ဖွဲ့၍ လုပ်ဆောင်ခွင့် မရှိပါ..."

'နိုးထခြင်း တာဝန် ရှိသေးတာလား...'

ကျိုးဟန် အနည်းငယ် သံသယ ဝင်သွားသည်။ တိုက်ရိုက် နိုးထနိုင်မည်ဟု သူ ထင်ထားခဲ့ခြင်း ဖြစ်သည်။ တာဝန် လုပ်ရဦးမည်ဟု မထင်ထားခဲ့ပေ။

သို့သော် အွန်လိုင်းဂိမ်း အများအပြားတွင် ဤကဲ့သို့ ပုံစံမျိုး ဖန်တီးထားလေ့ရှိကြောင်း တွေးမိသောအခါ နားလည်သွားတော့သည်။

အခြေခံအားဖြင့် ကြိုတင် တာဝန်အချို့ကို ပြီးမြောက်အောင် လုပ်ရပြီး ရန်သူအချို့ကို အနိုင်ယူကာ မိမိကိုယ်ကိုယ် စွမ်းအားရှိကြောင်း သက်သေပြရမည် ဖြစ်သည်။

ဤအချက်ကို နားလည်သွားပြီးနောက် ကျိုးဟန် ပြုံးလိုက်သည်။

"သွားကြစို့... မြို့ထဲ ပြန်ရအောင်... အခု မှောင်တော့မယ်... ဒီနေရာက မလုံခြုံဘူး..."

ကျိုးဟန် က နာမည်ကျော်ဓား နှင့် တိမ်စိမ်း ဓား တို့ကို ကျောဘက်တွင် လွယ်ထားပြီး ညီအစ်မ နှစ်ယောက်ကို ပြောလိုက်သည်။

"အိုကေ... နင် အခု အဆင့် ၂၅ ရောက်သွားပြီဆိုတော့ နိုးထဖို့ စတင်ရတော့မှာလား..."

"နင် နိုးထပြီးရင် အလုပ်အကိုင် ဂုဏ်ပုဒ်က ဘာဖြစ်မလဲ... ငါတို့ကို မြန်မြန် ပြောပြပါဦး..."

ဟန်ရှန်နင် နှင့် ဟန်ချင်ရွှဲ့ တို့ နှစ်ယောက်လုံးက သိချင်စိတ်ဖြင့် မေးလိုက်ကြသည်။ မည်သို့ပင်ဖြစ်စေ နိုးထခြင်း ၏ ဆွဲဆောင်မှုက ကြီးမားလွန်းလှပြီး တိုက်ခိုက်ခြင်းကို မနှစ်သက်သော သူတို့ပင်လျှင် အလွန် စိတ်ဝင်စားနေကြသည်။

"အဲဒါကိုတော့ ငါလည်း မသိသေးဘူး... နိုးထဖို့ မတိုင်ခင်မှာ တာဝန်တွေ အများကြီး လုပ်ရဦးမှာ... ဒီလောက် လွယ်မယ် ထင်နေလား..."

ကျိုးဟန် က ဟန်ရှန်နင် ၏ ခေါင်းလေးကို ပွတ်သပ်ကာ ပြုံးပြီး ပြောလိုက်သည်။ အစက သူလည်း ဟန်ရှန်နင် ကဲ့သို့ပင် တွေးခဲ့မိခြင်း ဖြစ်သည်။

"ဒီလောက်တောင် ရှုပ်ထွေးတာလား..."

"ဒါက ကောင်းတဲ့ ကိစ္စပါ... အခက်အခဲ အမျိုးမျိုးကို ဖြတ်သန်းပြီးမှ နိုးထတာက ပိုပြီး စိတ်ဝင်စားဖို့ ကောင်းတယ် မဟုတ်လား..."

"အင်း... အဲဒီလိုပဲ ဖြစ်ရမယ်..."

"ဒါနဲ့... နိုးထခြင်း တာဝန် ကို တစ်ယောက်တည်းပဲ လုပ်ခွင့်ရှိတာ... မနက်ဖြန် မင်းတို့ဘာသာ အဆင့်သွားတင်ကြတော့နော်..."

ချန်းလဲ့မြို့ ထဲသို့ ဝင်ရောက်လာချိန်တွင် ကျိုးဟန် က ရုတ်တရက် သတိရသွားပြီး ပြောလိုက်သည်။

ယခု ညီအစ်မ နှစ်ယောက်လုံးက ကျိုးဟန် အဆင့်မြှင့်ထားသော ပစ္စည်းများကို ဝတ်ဆင်ထားကြရာ နယ်မြေ၏ ထိပ်ဆုံး ဆယ်ယောက်စာရင်းဝင် ကစားသမားများကိုဖြစ်စေ ရွှေအဆင့် သားရဲများကိုဖြစ်စေ လွယ်ကူစွာ အနိုင်ယူနိုင်ပြီ ဖြစ်သည်။

ထို့ကြောင့် ကျိုးဟန် က ဘာမှ စိတ်ပူစရာ မရှိတော့ပေ။

"အိုကေ... နင် စိတ်ချလက်ချ နိုးထလိုက်ပါ... ငါတို့ ကိုယ့်ဘာသာ ဂရုစိုက်ပါ့မယ်..."

"ဒါဆို ငါတို့ အရင် ပြန်နှင့်မယ်... နင်လည်း မြန်မြန် ပြန်လာခဲ့နော်..."

ပြောပြီးနောက် ကျိုးဟန် နှင့် ညီအစ်မ နှစ်ယောက် လမ်းခွဲလိုက်ကြပြီး မြေပုံ၏ လမ်းညွှန်မှုအတိုင်း ဓားနတ်ဘုရား ကျောင်းတော် သို့ ရောက်လာခဲ့သည်။

ကျိုးဟန် က အဝေးမှနေ၍ ကျောင်းတော် အပြင်ဘက်ရှိ ကြီးမားသော ဓားရုပ်တုကြီးကို မြင်လိုက်ရသည်။ အမြင့် မီတာ တစ်ရာခန့်နှင့် အကျယ် သုံးလေးမီတာခန့် ရှိသည်။

ခမ်းနားကြီးကျယ်သော အရှိန်အဝါ တစ်ခုက မျက်နှာဆီသို့ ဝင်ရောက်လာသည်။ မမြင်ရသော ထက်မြက်သည့် ဓားစွမ်းအင်များကိုလည်း ထုတ်လွှင့်နေသည်။ စွမ်းအား မရှိသူများ ဆိုလျှင် ဓားနတ်ဘုရား ကျောင်းတော် အနီးသို့ပင် ကပ်နိုင်မည် မဟုတ်ပေ။

'ဓားနတ်ဘုရား ကျောင်းတော် က တကယ်ကို အစွမ်းထက်တာပဲ...'

ရုပ်တု တစ်ခုတည်းကပင် ဤမျှ အရှိန်အဝါ ရှိနေမှတော့ အတွင်းရှိ လူများကလည်း သေချာပေါက် သာမန် မဟုတ်နိုင်ပေ။

ကျိုးဟန် စိတ်ကို တည်ငြိမ်အောင် ထိန်းကာ လျှောက်သွားလိုက်သည်။

"ဟေ့... မင်း ဘာလုပ်မလို့လဲ... ရှေ့မှာ ဓားနတ်ဘုရား ကျောင်းတော် နော်..."

လမ်းသွားလမ်းလာ တစ်ယောက်က ကျိုးဟန် ကို အလျင်အမြန် တားဆီးကာ ပြောလိုက်သည်။

"ငါ ဓားနတ်ဘုရား ကျောင်းတော် ကို သွားမလို့လေ... ဘာကိစ္စ ရှိလို့လဲ..."

ကျိုးဟန် က အနည်းငယ် သံသယဖြင့် ပြောလိုက်သည်။

"စွမ်းအား မရှိရင် ဝင်လို့ မရဘူး... တံခါးဝက ဓားစောင့်ရဲမက် နှစ်ယောက်ကို မမြင်ဘူးလား... မင်းလို ငယ်ငယ်ရွယ်ရွယ်နဲ့တော့ မဖြစ်လောက်ဘူး..."

'ရူးနေတာလား...'

ကျိုးဟန် အနည်းငယ် ဆွံ့အသွားပြီး သူ့ကို ဂရုမစိုက်တော့ပေ။ ဤကဲ့သို့ အရူးမျိုးက အွန်လိုင်း ဝတ္ထုများထဲတွင်သာ ရှိသည် မဟုတ်ပါလား။ နတ်ဘုရားနှင့်မိစ္ဆာကမ္ဘာ တွင်လည်း ပေါ်လာလိမ့်မည်ဟု မထင်ထားခဲ့ပေ။

"ဟေ့ ဟေ့ ဟေ့... မင်းက တားတာကို နားမထောင်ဘူးလား... ခဏနေရင် ဒုက္ခရောက်လိမ့်မယ်..."

"ဒီကောင်လေး ငယ်ငယ်ရွယ်ရွယ်နဲ့... ဓားနတ်ဘုရား ကျောင်းတော် ကို ဝင်ရတာ အဲဒီလောက် လွယ်တယ်များ ထင်နေလား... ဒီလူ့ကို ကြည့်ရတာ မျက်နှာစိမ်းပဲ... အခုမှ ရောက်လာတဲ့ အတွေ့အကြုံ မရှိတဲ့ကောင် သေချာတယ်..."

"ထားလိုက်ပါ... လူငယ်တွေဆိုတာ သင်ခန်းစာ နည်းနည်း ရမှ ကောင်းတာ... ပွဲကောင်း ကြည့်ရတော့မယ်..."

"ကြည့်နေလိုက်... ဒီကောင်လေး ခဏနေရင် တော်တော် ဒုက္ခရောက်လိမ့်မယ်..."

ဤနေရာတွင် ဘယ်အချိန်ကတည်းက ရောက်နေမှန်း မသိသော ပွဲကြည့်ပရိသတ် အချို့လည်း ရှိနေသည်။ အားလုံးက ပွဲကြည့်ချင်သည့် ပုံစံများ ဖြစ်နေပြီး ပျင်းစရာကောင်းသော ဘဝအတွက် ပျော်ရွှင်မှု အနည်းငယ် ရှာဖွေနေကြခြင်း ဖြစ်သည်။

"သူရဲကောင်း... ဘာကိစ္စ ရှိလို့လဲ..."

"ဒီနေရာက ဓားနတ်ဘုရား ကျောင်းတော် ပဲ... အခွင့်မရှိဘဲ ဝင်ခွင့် မပြုဘူး..."

ကျောင်းတော် အပေါက်ဝရှိ ဓားစောင့်ရဲမက် နှစ်ယောက်က ကျိုးဟန် ၏ လမ်းကို တားဆီးလိုက်သည်။ မျက်နှာထား တင်းမာစွာဖြင့် မေးမြန်းလိုက်သည်။

"ငါက နိုးထ ဖို့ လာတာပါ... အစ်ကိုတို့ နှစ်ယောက် ခွင့်ပြုပေးလို့ ရမလား..."

ကျိုးဟန် က တည်ငြိမ်စွာဖြင့် ပြောလိုက်သည်။

"နိုးထ မယ်... မင်းလို ငယ်ငယ်ရွယ်ရွယ်နဲ့ နိုးထ တော့မလို့လား..."

ရဲမက်၏ မျက်လုံးများထဲတွင် သံသယ အချို့ ထွက်ပေါ်လာပြီး လုံးဝ မယုံကြည်သည့်ပုံ ပေါက်နေသည်။

"တကယ်ကို မှန်ပါတယ်... ငါ သက်သေပြရမလား..."

"ဒီလိုဆိုလည်း ကောင်းတာပေါ့... စကားသက်သက်နဲ့တင် မရဘူးလေ... မင်းရဲ့ စွမ်းအားက ဘယ်လောက်ရှိလဲဆိုတာ ငါတို့ကို ပြစမ်းပါ..."

"မင်း ငါတို့ ညီအစ်ကို နှစ်ယောက်နဲ့ ယှဉ်တိုက်ပြီး ၃ ကွက်လောက် တောင့်ခံနိုင်ရင် မင်း အောင်မြင်တယ်လို့ သတ်မှတ်ပေးမယ်... ဘယ်လိုလဲ..."

သူတို့၏ မျက်နှာပေါ်တွင် ယုံကြည်မှု အပြည့် ရှိနေပြီး လက်ပိုက်ကာ ပြုံးပြီး ပြောလိုက်သည်။ ဤသည်မှာ ဓားနတ်ဘုရား ကျောင်းတော် မှ ရဲမက်များ၏ ယုံကြည်မှုပင် ဖြစ်သည်။

"စနစ် သတိပေးချက်... သင်၏ နိုးထခြင်း တာဝန် စတင်ပါပြီ..."

"စနစ် သတိပေးချက်... နိုးထခြင်း တာဝန် ၁ ကို ထောက်လှမ်းသိရှိရပါသည်... လက်ခံမည်လား..."

"လက်ခံမယ်..."

နိုးထခြင်း တာဝန် ၁

ဖော်ပြချက် - ဓားနတ်ဘုရား ကျောင်းတော် ဓားစောင့်ရဲမက် ၏ စွမ်းရည် ၃ ခုကို အောင်မြင်စွာ ခုခံပါ။

"ကောင်းပြီ... ငါ လက်ခံတယ်..."

"ဒါပေမဲ့ ၃ ကွက်တောင် မလိုပါဘူး... ငါ တစ်ကွက်တည်းနဲ့ လုံလောက်ပါတယ်..."

ကျိုးဟန် က ခေါင်းကို ညင်သာစွာ ခါယမ်းလိုက်ပြီး ဂရုမစိုက်သည့်ပုံစံဖြင့် ပြောလိုက်သည်။ အဘယ်ကြောင့်ဆိုသော် တစ်ဖက်လူ၏ အချက်အလက်များကို သူ ရှင်းလင်းစွာ မြင်တွေ့နေရသောကြောင့် ဖြစ်သည်။

ကျောင်းတော် ဓားစောင့်ရဲမက်

အဆင့် - ၄၅

သွေးပမာဏ - ၅၁၀၀

တိုက်ခိုက်မှု - ၂၆၀၀

အကာအကွယ် - ၁၀၂၃

လက်နက် - ချိန်ကျွန်း ဓား

အသုံးအဆောင် - ဓားဝိညာဉ် ဝတ်စုံ

အဆင်တန်ဆာ - အပြစ်ကင်းစင်သော ကျောက်စိမ်းဆွဲကြိုး

သိုင်းကျမ်း - မာန ဓားသိုင်း

တစ်ဖက်လူ၏ သွေးပမာဏနှင့် တိုက်ခိုက်မှု စွမ်းအား နှစ်မျိုးစလုံးက သူ့ထက် အများကြီး နိမ့်ကျနေသည် မဟုတ်ပါလား။ မည်သို့ ယှဉ်တိုက်မည်နည်း။

ကျိုးဟန် ၏ အသံက မကျယ်လောင်သော်လည်း ပတ်ဝန်းကျင်ရှိ ပွဲကြည့်ပရိသတ်များ ကြားသွားကြသည်။ ချက်ချင်းပင် လှောင်ပြောင် ရယ်မောသံများ ပေါက်ကွဲထွက်လာတော့သည်။

"ငါ ကြီးလာတဲ့အထိ ဒီလောက် မာနကြီးတဲ့လူမျိုး တစ်ခါမှ မမြင်ဖူးဘူး... လူငယ်ဆိုတော့ သွေးဆူတာပေါ့... ဟွန့်... တစ်ကွက်တည်းနဲ့ အနိုင်ယူမယ်တဲ့လား..."

"ဒီကောင်လေး လေလုံးက တကယ် ကြီးတာပဲ... သူ့ပြိုင်ဘက်က ဓားနတ်ဘုရား ကျောင်းတော် ဓားစောင့်ရဲမက် လေ... ဒါက သာမန်လူတွေ ယှဉ်နိုင်တဲ့ အဆင့် မဟုတ်ဘူး..."

"အရင်တစ်ခေါက်က ကောင်တစ်ကောင် ဓားနတ်ဘုရား ကျောင်းတော် ကို လာစော်ကားလို့ ရိုက်နှက်ခံလိုက်ရတာ မျက်နှာတွေတောင် ရောင်ကိုင်းပြီး သွားနှစ်ချောင်းတောင် ကျွတ်သွားသေးတယ်..."

"နည်းနည်းတော့ သနားဖို့ ကောင်းတယ်... ဒီကောင်လေးလည်း အဲဒီလိုပဲ ဖြစ်မှာ သေချာတယ်... နောက်လာမယ့် မြင်ကွင်းကို တကယ် မျှော်လင့်နေမိပြီ... ဟားဟား..."