အခန်း ၆၁

အခန်း (၆၁) ဓားနတ်ဘုရား ကျောင်းတော် အတွင်းသို့ ဝင်ရောက်ခြင်း

ကျိုးဟန် - "..."

'ဘာတွေလဲ...'

'ခုနကတင် ကောင်းနေတဲ့ လူနှစ်ယောက်က ဘာလို့ ရုတ်တရက်ကြီး ဒီလိုပုံစံ ဖြစ်သွားရတာလဲ...'

'ချီးကျူးလိုက်... အဆက်အသွယ် လာလုပ်လိုက်နဲ့... အခုတော့ မိန်းမတောင် ပေးစားချင်နေပြီ...'

ကျိုးဟန် အနည်းငယ် ဆွံ့အသွားသည်။

"သောက်ကျိုးနည်း... ငါ အမြင်မှားနေတာတော့ မဟုတ်ပါဘူးနော်... အမြဲတမ်း မာနကြီးနေတဲ့ ဓားစောင့်ရဲမက် တွေက အခုတော့ ဘာလို့ ဒီလောက်တောင် အောက်ကျို့နေရတာလဲ..."

"ငါလည်း ဓားစောင့်ရဲမက် တွေ ဒီလို ပုံစံမျိုး ဖြစ်နေတာ ပထမဆုံးအကြိမ် မြင်ဖူးတာပဲ... တကယ်ကို အံ့သြစရာပဲ..."

"မျက်စိကိုတောင် မယုံနိုင်ဘူး... နည်းနည်းတော့ လွန်လွန်းနေပြီ..."

"ဟို လူငယ်လေးက တကယ်ကို အစွမ်းထက်နေလို့ ဖြစ်မှာပေါ့... ငါတောင် သူ့ကို အဆက်အသွယ် သွားလုပ်ချင်နေပြီ... ဒါပေမဲ့ သူက ငါ့ကိုတော့ သေချာပေါက် ဂရုစိုက်မှာ မဟုတ်ဘူးလေ..."

ပတ်ဝန်းကျင်မှ ကြည့်ရှုနေသူများကလည်း အံ့အားသင့်စွာဖြင့် ပြောဆိုနေကြသည်။

အစွမ်းထက်သော ဓားစောင့်ရဲမက် များပင် ဤမျှ အောက်ကျို့ပြီး ဖားယားနေကြသည်ကို ကြည့်ခြင်းအားဖြင့် ထိုလူငယ်လေးသည် သေချာပေါက် ကောင်းကင်သို့ ပျံတက်တော့မည် ဖြစ်သည်။

"ဘယ်လိုလဲ... ငါ့ညီမလေးကို သဘောမကျဘူး ဆိုရင်လည်း ငါ့အစ်မ ရှိသေးတယ်... သူ့ရင်သားက တစ်ပိဿာလောက် အလေးချိန် ရှိမယ် ထင်တယ်... ခန္ဓာကိုယ် အချိုးအစားကတော့ မင်း သေချာပေါက် သဘောကျမှာ..."

"အစ်ကိုဟန်... အားရင် ငါတို့ နျဲ့ မိသားစု ဆီကို လာလည်ပါဦး... အတွေ့အကြုံတွေ ဖလှယ်ကြတာပေါ့..."

ဓားစောင့်ရဲမက် နှစ်ယောက်က ရပ်မနားဘဲ ဆက်တိုက် ပြောဆိုနေကြပြီး ကျိုးဟန် ကို အလုအယက် မိတ်ဖွဲ့ချင်နေကြသည်။

ကျိုးဟန် လုံးဝ သည်းမခံနိုင်တော့ဘဲ ပေါက်ကွဲရန် ပြင်လိုက်ချိန်တွင်...

ကျောင်းတော် အတွင်းမှ ဩဇာအာဏာ အပြည့်ပါသော အသံတစ်ခု ရုတ်တရက် ထွက်ပေါ်လာသည်။

"တော်ကြတော့... မင်းတို့ နှစ်ယောက် အရင် နောက်ဆုတ်နေကြ..."

ကျောင်းတော် အတွင်းမှ ပါးပြင် နှစ်ဖက် ချိုင့်ဝင်နေပြီး ထက်မြက်လှသော ဓားတစ်လက်အလား အရှိန်အဝါများ ထွက်ပေါ်နေသည့် အသက်လတ်ပိုင်း အမျိုးသား တစ်ဦး ထွက်လာသည်။

သူ၏ ခေါင်းပေါ်တွင် ဓားဘုရင် နျဲ့ထျန်ချန် ဟူသော ဂုဏ်ပုဒ်ကို ပြသထားသည်။

ကျိုးဟန် ကြည့်လိုက်ပြီးနောက် မျက်လုံးများ ကျုံ့ဝင်သွားသည်။

ဒီ ဓားဘုရင် မှာ အလွန် အစွမ်းထက်သော ကျွမ်းကျင်သူ တစ်ယောက် ဖြစ်ပြီး သူ၏ ကိုယ်ပေါ်တွင် ကြီးမားလှသော ဓားစွမ်းအင်များကို ဖုံးကွယ်ထားသည်။

ဓားဝိညာဉ် တစ်ယောက် အနေဖြင့် ကျိုးဟန် က ဤအရာကို အလွန် လျင်မြန်စွာ အာရုံခံမိသည်။

"ဒီ အသုံးမကျတဲ့ ကောင် နှစ်ကောင်ကြောင့် အားနာရပါတယ်..."

နျဲ့ထျန်ချန် က ပြုံးကာ လက်နှစ်ဖက် ယှက်၍ တောင်းပန်လိုက်သော်လည်း သူ၏ မျက်လုံးထောင့်များက ဓားစောင့်ရဲမက် နှစ်ယောက်ဆီသို့ ရောက်သွားချိန်တွင်မူ အလွန် အေးစက်သွားသည်။

ဒီကောင် နှစ်ကောင်က တကယ်ကို ပြောစရာ စကားပင် မရှိတော့ပေ။ အလွန် အရှက်ကွဲစရာ ကောင်းလွန်းလှသည်။

ဓားနတ်ဘုရား ကျောင်းတော် ၏ အပေါက်ဝတွင် အခြားသူများကို သွားပြီး ဖားယားနေကြခြင်းက ဓားနတ်ဘုရား ကျောင်းတော် ၏ ဂုဏ်သိက္ခာကို လုံးဝ ဂရုမစိုက်ရာ ရောက်နေသည်။

"ကိစ္စ မရှိပါဘူး... ကျွန်တော်က နိုးထ ဖို့အတွက် ရောက်လာတာပါ..."

ကျိုးဟန် က ဂရုမစိုက်သည့်ဟန်ဖြင့် ပြုံးပြလိုက်ပြီး သူ လာရောက်ရသည့် ရည်ရွယ်ချက်ကို ပြောပြလိုက်သည်။

"အင်း... မဆိုးဘူး... မင်းက ပထမအဆင့် စစ်ဆေးမှုကို အောင်မြင်စွာ ဖြတ်ကျော်နိုင်ခဲ့ပြီ... ဒါလေးကို အရင် ယူထားလိုက်..."

နျဲ့ထျန်ချန် က ခေါင်းညိတ်လိုက်ပြီး ကျိုးဟန် ထံသို့ အမိန့်ပြား တစ်ခု ကမ်းပေးလိုက်သည်။

"စနစ် သတိပေးချက်... သင်သည် နိုးထခြင်း တာဝန် ၁ ကို အောင်မြင်စွာ ပြီးမြောက်ခဲ့ပါသဖြင့် ရွှေဒင်္ဂါး ၁ သောင်း ရရှိပါသည်..."

"စနစ် သတိပေးချက်... သင်သည် တာဝန်ကို မျှော်မှန်းထားသည်ထက် ပိုမို ကောင်းမွန်စွာ လုပ်ဆောင်နိုင်ခဲ့သဖြင့် အပိုဆုကြေး အနေဖြင့် ရွှေဒင်္ဂါး ၅ သောင်း ထပ်မံ ရရှိပါသည်..."

အမိန့်ပြားကို ယူလိုက်သည်နှင့် တာဝန် ပြီးမြောက်ကြောင်း သတိပေးချက်ကို ကြားလိုက်ရသည်။

'မျှော်မှန်းထားသည်ထက် ပိုမို ကောင်းမွန်စွာ လုပ်ဆောင်နိုင်ခဲ့တယ် ဟုတ်လား...'

'တာဝန်က ဓားစောင့်ရဲမက် တွေရဲ့ တိုက်ကွက် ၃ ကွက်ကို ခုခံဖို့လေ... ငါက တစ်ကွက်တည်းနဲ့ သူတို့ကို အနိုင်ယူလိုက်တာဆိုတော့... ဒါကို မျှော်မှန်းထားတာထက် ပိုတယ်လို့ သတ်မှတ်တာ ဖြစ်ရမယ်...'

ကျိုးဟန် က စိတ်ထဲတွင် တွေးလိုက်သည်။

အပိုဆုကြေး အနေဖြင့် ရွှေဒင်္ဂါး ၅ သောင်း ရရှိလိုက်ခြင်းက အတော်လေး မဆိုးလှပေ။

"ဒီအမိန့်ပြားက ဘာအသုံးဝင်တာလဲ..."

အမိန့်ပြားက တံဆိပ်ခတ်နှိပ်ထားဆဲ အခြေအနေတွင် ရှိနေသဖြင့် ကျိုးဟန် က အသေးစိတ် အချက်အလက်များကို မစစ်ဆေးနိုင်ပေ။ ထို့ကြောင့် သူက မေးလိုက်ခြင်း ဖြစ်သည်။

"ဒါက သိမြင်ခြင်း ကျောင်းတော် ကို ဝင်ဖို့ သော့တံပဲ... ဓားနတ်ဘုရား ရဲ့ အငွေ့အသက်တွေကို ခံစားသိရှိဖို့အတွက် သုံးရတာ..."

"သိမြင်ခြင်း ကျောင်းတော်..."

ကျိုးဟန် က ဤအကြောင်းကို တစ်ခါမှ မကြားဖူးသဖြင့် သံသယဖြင့် မေးလိုက်သည်။

"ဟုတ်တယ်... နိုးထခြင်း က အဆင့် ငါးဆင့် ရှိတယ်... ပထမ အဆင့်ကိုတော့ မင်း ခုနက ဖြတ်ကျော်ပြီးသွားပြီ... အဲဒါက မင်းရဲ့ အခြေခံ တိုက်ခိုက်ရေး စွမ်းအားကို စစ်ဆေးတာပဲ..."

နျဲ့ထျန်ချန် က စိတ်မရှည်သည့်ပုံ မပြဘဲ စိတ်ရှည်လက်ရှည် ရှင်းပြလိုက်သည်။

"ဒုတိယ အဆင့်ကတော့ သိမြင်ခြင်း ကျောင်းတော် ထဲကို ဝင်ပြီး သတ်မှတ်ထားတဲ့ အချိန်အတွင်းမှာ သိုင်းကျမ်း တစ်ခုကို နားလည် သဘောပေါက်အောင် လုပ်ရမှာ... အဲဒါက မင်းရဲ့ ဉာဏ်ရည်ဉာဏ်သွေး ကို စစ်ဆေးတာပဲ..."

ကျိုးဟန် ခေါင်းညိတ်လိုက်သည်။ နိုးထခြင်း လုပ်ငန်းစဉ်က တကယ်ကို မလွယ်ကူလှပေ။

ကဏ္ဍပေါင်းစုံကို စစ်ဆေးနေခြင်း ဖြစ်သည်။

"ဒါဆို တတိယ အဆင့်ကရော..."

ကျိုးဟန် က နျဲ့ထျန်ချန် ဆက်ပြောမည့်အချိန်ကို စောင့်နေသော်လည်း အတန်ကြာသည်အထိ ဘာမှ ဆက်မပြောသဖြင့် မေးလိုက်ခြင်း ဖြစ်သည်။

"မင်း ဒုတိယ အဆင့်ကို ဖြတ်ကျော်ပြီးမှ ဆက်ပြောကြတာပေါ့... အကယ်၍ ဒုတိယ အဆင့်ကိုတောင် မဖြတ်ကျော်နိုင်ရင် တတိယ အဆင့်ကို ဆက်သွားဖို့ လိုမှာ မဟုတ်တော့ဘူးလေ..."

နျဲ့ထျန်ချန် က လမ်းလျှောက်ရင်း ပြောလိုက်ပြီး ခြေလှမ်းများ မရပ်တန့်ဘဲ သိမြင်ခြင်း ကျောင်းတော် ရှိရာဘက်သို့ လျှောက်သွားလိုက်သည်။

"ကျရှုံးတာတွေလည်း ရှိသေးတာလား..."

"ဒါပေါ့... မင်း နားလည် သဘောပေါက်လိုက်တဲ့ သိုင်းကျမ်း ရဲ့ အရည်အသွေးက အနည်းဆုံး ရွှေအဆင့် ရှိရမယ်... ရွှေအဆင့် အောက် နိမ့်ရင် ကျရှုံးတယ်လို့ သတ်မှတ်တယ်..."

"အကယ်၍ ဒုတိယ အဆင့်မှာ ကျရှုံးသွားရင် ဘာဖြစ်မလဲ..."

ကျိုးဟန် က သူ၏ ခြေလှမ်းများနောက်သို့ လိုက်ရင်း ဆက်မေးလိုက်သည်။

"ကျရှုံးသွားရင် ၃ ရက် နေမှ ပြန်ပြီး နိုးထ ဖို့ လာလို့ ရမယ်... အကယ်၍ ၃ ခါ ဆက်တိုက် ကျရှုံးသွားရင်တော့ နိုးထ ခွင့် အမြဲတမ်း ဆုံးရှုံးသွားလိမ့်မယ်..."

'အမြဲတမ်း နိုးထ ခွင့် ဆုံးရှုံးသွားမည် ဟုတ်လား...'

'ဒီလောက်တောင် တင်းကျပ်တဲ့ စည်းကမ်းတွေ ရှိနေတာလား...'

ကျိုးဟန် ၏ မျက်လုံးများ ကျုံ့ဝင်သွားပြီး နောက်ဆက်တွဲ စစ်ဆေးမှုများက မည်သို့ ဖြစ်လာမည်ကို သူမသိသေးပေ။

"ဘယ်လိုလဲ... မင်း ကျရှုံးမှာကို ကြောက်နေပြီလား..."

ဓားဘုရင် ဆိုသည့်အတိုင်း ရှေ့မှ လျှောက်နေသော်လည်း နောက်သို့ လှည့်ကြည့်စရာ မလိုဘဲ စိတ်လှုပ်ရှားမှုများကို အာရုံခံနိုင်စွမ်း ရှိသည်။ သူက မျက်ခုံးများ ပင့်ကာ နောက်ပြောင်သည့် လေသံဖြင့် ပြောလိုက်သည်။

"ဟက်... ဘယ်လိုလုပ် ဖြစ်နိုင်မှာလဲ... ဒီလောက် သေးမွှားတဲ့ စစ်ဆေးမှုလေးကိုတောင် မကျော်ဖြတ်နိုင်ရင် ကျွန်တော်က အသုံးမကျတဲ့သူ ဖြစ်သွားမှာပေါ့... ကျွန်တော်က တစ်ခါတည်းနဲ့ကို အောင်မြင်အောင် လုပ်ပြမယ်..."

ကျိုးဟန် ၏ စိတ်ထဲတွင် အနည်းငယ် စိုးရိမ်နေသော်လည်း သူက လုံးဝ ထုတ်ပြမည် မဟုတ်ပေ။ မာနကိုတော့ လုံးဝ အကျမခံနိုင်ပေ။ သူက ပေါ့ပေါ့ပါးပါး ပြုံးကာ လွယ်ကူစွာပင် ပြောလိုက်သည်။

"အင်း... ယုံကြည်မှု ရှိတာ ကောင်းပါတယ်... ကြည့်ရတာ မင်း တကယ်ကို ဘာမှ မသိသေးဘူး ထင်တယ်... ငါလည်း မင်းကို စိတ်ဓာတ် မကျစေချင်ပါဘူး... ခဏနေရင် မင်းဘာသာ ကိုယ်တိုင် ခံစားကြည့်လိုက်ပါ..."

ကျိုးဟန် နှင့် စကားပြောနေစဉ် နျဲ့ထျန်ချန် က သူ့ကို အတွေ့အကြုံ မရှိသေးသော လူသစ်လေး တစ်ယောက်အဖြစ် သံသယ ဝင်သွားသည်။ နိုးထခြင်း နှင့် ပတ်သက်သော သတင်းအချက်အလက်များကို လုံးဝ မသိရှိထားပုံရသည်။

မဟုတ်ပါက တစ်ခါတည်း အောင်မြင်အောင် လုပ်မည် ဟူသော စကားမျိုးကို ပြောလိမ့်မည် မဟုတ်ပေ။

သိမြင်ခြင်း ကျောင်းတော် အတွင်း၌ ဓားနတ်ဘုရား ၏ အဆုံးမဲ့ စိတ်ဆန္ဒများ ရှိနေသည်။ ထိုအထဲမှ လျှို့ဝှက်ချက်များကို နားလည် သဘောပေါက်နိုင်ခြင်း ရှိမရှိ ဆိုသည်ကို ခဏထားဦး။ ထို ကြောက်မက်ဖွယ်ကောင်းသော အရှိန်အဝါကိုပင် နိုးထသူ ၇၀ ရာခိုင်နှုန်းက ခုခံနိုင်စွမ်း မရှိကြပေ။

ထို့ကြောင့် တစ်ကြိမ်တည်းနှင့် အောင်မြင်နိုင်ချေက အလွန် နည်းပါးလှသည်။

ဒုတိယအကြိမ် ရောက်လာချိန်တွင် ထိုဓားစွမ်းအင်များကို ဖြည်းဖြည်းချင်း အသားကျလာနိုင်သည်။

တတိယအကြိမ် ရောက်လာချိန်တွင်တော့ လူတစ်ဝက်ခန့်က လုံးဝ အသားကျသွားပြီး အောင်မြင်စွာ ဖြတ်ကျော်နိုင်ရန် အခွင့်အရေး အချို့ ရှိလာမည် ဖြစ်သည်။

'တကယ်ပဲ အဲဒီလောက် ခက်ခဲတာလား... သူ ပြောပုံအရဆိုရင် ဒီ နိုးထခြင်း လုပ်ငန်းစဉ် ရဲ့ ကျရှုံးနိုင်ချေက အတော်လေး များပြားပုံရတယ်...'

နျဲ့ထျန်ချန် ၏ လေးနက်သော မျက်နှာထားကို မြင်လိုက်ရသည့်အခါ ကျိုးဟန် လည်း အနည်းငယ် စိုးရိမ်လာတော့သည်။

စကားပြောနေစဉ် ကျိုးဟန် က နျဲ့ထျန်ချန် နှင့်အတူ ကျောင်းတော် အတွင်းသို့ ဝင်ရောက်လာခဲ့သည်။

ကြယ်တာရာ အာကာသထဲသို့ ဝင်ရောက်သွားသကဲ့သို့ သူက လေထဲတွင် ရပ်တည်နေပြီး ပုံမှန်အတိုင်း လမ်းလျှောက်နိုင်သည်။

အထက်အောက် ဘယ်ညာ အရပ်မျက်နှာ အားလုံးက အဆုံးမရှိ ကျယ်ပြောလှသည်။

"အရမ်း အံ့သြစရာကောင်းတဲ့ နေရာပဲ... ဟိုဘက်မှာ ပေါ်တယ် တွေ အများကြီး ရှိနေတာလား..."

ကျိုးဟန် က ဤကဲ့သို့သော ခံစားချက်မျိုးကို ပထမဆုံးအကြိမ် ကြုံတွေ့ရခြင်း ဖြစ်ပြီး အလွန် အံ့အားသင့်သွားသည်။

ဓားနတ်ဘုရား ကျောင်းတော် က တကယ်ကို ခမ်းနားကြီးကျယ်လှသည်။

"ဒါပေါ့... ဒီ ဓားနတ်ဘုရား ကျောင်းတော် က ချန်းလဲ့မြို့ မှာတင် ရှိတာ မဟုတ်ဘူး... ငါက ချန်းလဲ့မြို့ ရဲ့ လမ်းညွှန်သူ တစ်ယောက် သက်သက်ပဲ..."

"တခြား မြို့တွေမှာလည်း ဓားနတ်ဘုရား ကျောင်းတော် တွေ ရှိတယ်... သူတို့ ဝင်လာရင်လည်း ဒီလို နေရာမျိုးကို ရောက်လာကြမှာပဲ..."

နျဲ့ထျန်ချန် က ပြုံးကာ ရှင်းပြလိုက်သည်။

'တခြား မြို့တွေမှာလည်း ရှိတယ် ဟုတ်လား...'

ကျိုးဟန် က ဤစကားကို အလွန် လျင်မြန်စွာ သတိထားမိလိုက်သည်။

ဆိုလိုသည်မှာ နယ်မြေ ၆၆၆ မှလွဲ၍ အခြား နယ်မြေများမှလည်း ဝင်ရောက်လာနိုင်သည် ဟူသော အဓိပ္ပာယ်ပင်။

"ရောက်ပြီ... မင်းဘာသာ ဝင်သွားလိုက်တော့... မင်းလက်ထဲက အမိန့်ပြားကို သေချာ ကိုင်ထားဖို့ မမေ့နဲ့... အဲဒါက မင်းရဲ့ အသက်နဲ့ သက်ဆိုင်တယ်..."

နျဲ့ထျန်ချန် ၏ အသံက တွေးတောနေသော ကျိုးဟန် ကို သတိပြန်ဝင်လာစေသည်။

သူတို့က သိမြင်ခြင်း ကျောင်းတော် ၏ အပေါက်ဝသို့ မသိမသာ ရောက်ရှိလာခဲ့ပြီ ဖြစ်သည်။

"မင်း မခံနိုင်တော့တဲ့ အချိန်ကျရင် အမိန့်ပြားထဲကို စွမ်းအင်တွေ ထည့်လိုက်... အဲဒါဆိုရင် မင်းကို အလိုအလျောက် အပြင်ကို ခေါ်ထုတ်သွားပေးလိမ့်မယ်..."

"ပထမဆုံးအကြိမ် ဝင်တာဆိုတော့ အတွေ့အကြုံ ယူတဲ့ သဘောလောက်ပဲ ထားပါ... ဓားစွမ်းအင်တွေနဲ့ အသားကျအောင် အဓိကထား လုပ်ပါ... အရမ်း အတင်းအကျပ် မလုပ်ပါနဲ့... ဝင်သွားတော့..."

နျဲ့ထျန်ချန် က သတိပေးစကား ပြောလိုက်ပြီး ကျိုးဟန် ၏ ပခုံးကို ပုတ်ကာ အားပေးလိုက်သည်။

မည်သို့ပင်ဖြစ်စေ ပထမဆုံးအကြိမ် သိမြင်ခြင်း ကျောင်းတော် ထဲသို့ ဝင်ရောက်ရာတွင် ကြီးမားသော အကျိုးအမြတ်များ ရရှိရန် အလွန် ခက်ခဲလှသည်။ ထို့ကြောင့် သူက အများကြီး မျှော်လင့်မထားခဲ့ပေ။

"စနစ် သတိပေးချက်... နိုးထခြင်း တာဝန် ၂ ကို ထောက်လှမ်းသိရှိရပါသည်... လက်ခံမည်လား..."