အခန်း ၆၇

အခန်း (၆၇) တာဝန် ပြီးမြောက်ခြင်း... နံပါတ်တစ် ပါရမီရှင်

"ကျိုးဟန်... အကြီးအကဲလင်း ကို အရိုအသေ မပေးသေးဘူးလား..."

နျဲ့ထျန်ချန် က ကျိုးဟန် အမှား တစ်ခုခု လုပ်မိမည်ကို စိုးရိမ်သဖြင့် အလျင်အမြန် ဝင်ပြောလိုက်သည်။

ဓားနတ်ဘုရား ကျောင်းတော် ၏ အထက်လူကြီးပိုင်းတွင် အကြီးအကဲ ကိုးပါး ရှိပြီး အတွင်းရေး ကိစ္စရပ်များကို အဓိက တာဝန်ယူ ဖြေရှင်းရသည်။

၎င်းတို့၏ အထက်တွင် ခေါင်းဆောင်ကြီး လေးဦး ရှိသည်။ ဓားအရိပ်... ဓားဧကရာဇ်... ဓားနတ်ဆိုး နှင့် ဓားအရှင်သခင် တို့ ဖြစ်ကြပြီး သူတို့က အလွန် ရှားပါးစွာ ထွက်ပေါ်လာတတ်ကာ နေ့စဉ် ကိစ္စရပ်များကို ဝင်ရောက် စွက်ဖက်လေ့ မရှိပေ။

ယခု ရောက်လာသော အကြီးအကဲလင်း မှာ အကြီးအကဲ ကိုးပါးထဲမှ တစ်ဦး ဖြစ်ပြီး အာဏာ အလွန် ကြီးမားလှသည်။

ထို့ကြောင့် ကျန်းရှုံး ဤမျှ ကြောက်ရွံ့သွားခြင်း ဖြစ်သည်။

"မလိုပါဘူး... မင်းက ကျိုးဟန် လား... တကယ်ကို ထူးခြားတဲ့ အရှိန်အဝါပဲ..."

အကြီးအကဲလင်း ၏ မျက်လုံးများထဲတွင် ယခင်ကကဲ့သို့ တင်းမာမှုများ မရှိတော့ဘဲ ကြင်နာမှုများ အပြည့်အဝ ထွက်ပေါ်နေသည်။

"အကြီးအကဲ မြှောက်ပြောလွန်းနေပါပြီ..."

ကျိုးဟန် က မောက်မာမှု မရှိဘဲ နှိမ့်ချစွာဖြင့် ပြောလိုက်သည်။

"မင်းရဲ့ စမ်းသပ်မှု ရလဒ်ကို ငါ ကြားပြီးပြီ... အဲဒီထဲမှာ သံသယဖြစ်စရာလေးတွေ နည်းနည်း ပါနေတယ်..."

"ငါ ဒီတစ်ခါ အရိပ်မဲ့ မှန် ကို ယူလာတယ်... မင်း နောက်တစ်ခါ ထပ်စမ်းသပ်တာကို စိတ်မဆိုးဘူး မဟုတ်လား..."

အကြီးအကဲလင်း က မှန်တစ်ချပ်လို အရာတစ်ခုကို ထုတ်ယူကာ ကျိုးဟန် ၏ သဘောထားကို တောင်းခံလိုက်သည်။

အဓိကအချက်မှာ သူ ကိုယ်တိုင် မျက်မြင် မတွေ့ခဲ့ရသဖြင့် ကိုယ်တိုင် စမ်းသပ်ချင်နေခြင်း ဖြစ်သည်။

အရိပ်မဲ့ မှန်

ဖော်ပြချက် - သိမြင်ခြင်း ကျောင်းတော် တွင် ရရှိခဲ့သော သိုင်းကျမ်း ကို အာရုံခံနိုင်စွမ်း ရှိသည် အမြင့်ဆုံး ဧကရာဇ်အဆင့် သိုင်းကျမ်း ကို စမ်းသပ်နိုင်ပြီး တန်ဖိုးအားဖြင့် ဝိညာဉ်ကျောက်တုံး ၅ သိန်း တန်ကြေးရှိသည်

မှောင်မိုက်သော အလင်းတန်းများ ထွက်ပေါ်နေသည့် မှန်ကို ကြည့်ရင်း ၎င်း၏ အချက်အလက်များကို ကျိုးဟန် မြင်လိုက်ရသည်။

'ဧကရာဇ်အဆင့် သိုင်းကျမ်း လား...'

ကျိုးဟန် မျက်မှောင်ကြုတ်လိုက်သည်။ သူ၏ သိုင်းကျမ်း က နတ်ဘုရားအဆင့် သိုင်းကျမ်း ဖြစ်ရာ အကယ်၍ စမ်းသပ်လိုက်ပါက အရိပ်မဲ့ မှန် လည်း ပေါက်ကွဲသွားတော့မည် မဟုတ်ပါလား။

ဤအရာက ဝိညာဉ်ကျောက်တုံး ၅ သိန်း တန်ကြေးရှိသည်။ အကယ်၍ ပျက်သွားပါက စုစုပေါင်း ဝိညာဉ်ကျောက်တုံး ၆ သိန်း တန်ဖိုးကို သူ ဖျက်ဆီးလိုက်သလို ဖြစ်သွားမည်။

အကယ်၍ သူ့ကို ပြန်လျော်ခိုင်းပါက မည်သို့ လုပ်ရမည်နည်း။

"အကြီးအကဲ... မလုပ်လို့ မရဘူးလား... ကျွန်တော် မစမ်းသပ်ချင်တော့ဘူး..."

ကျိုးဟန် က ညှိနှိုင်းသည့် လေသံဖြင့် မေးလိုက်သည်။

"ဟင်... ဘာဖြစ်လို့လဲ..."

အကြီးအကဲလင်း ၏ မျက်လုံးများ ကျုံ့ဝင်သွားပြီး သူ၏ ခံစားချက်ကို အကဲခတ်၍ မရအောင် တည်ငြိမ်စွာ မေးလိုက်သည်။

"ကျွန်တော်... ကျွန်တော်..."

"ကျိုးဟန်... အခုတော့ ကြောက်သွားပြီ မဟုတ်လား..."

"ခုနက သေချာပေါက် ယုတ်မာတဲ့ နည်းလမ်းတွေ သုံးခဲ့တာပဲ... အခု မင်းရဲ့ လှည့်ကွက်တွေ ပေါ်သွားမှာကို ကြောက်နေတာလေ..."

ကျိုးဟန် က မည်သို့ ရှင်းပြရမည်ကို စဉ်းစားနေစဉ်မှာပင်...

ရိချွမ်ဂန်းပန် က အလျင်အမြန် ခုန်ထွက်လာပြီး အခွင့်အရေးကို အမိအရ ယူကာ ကျိုးဟန် ကို အပြစ်တင်လိုက်သည်။

"မောက်မာလိုက်တာ... ဒီနေရာက မင်း ဝင်ပြောစရာ နေရာလား..."

အကြီးအကဲလင်း က ကျယ်လောင်စွာ အော်ဟစ်လိုက်ပြီး မျက်လုံးများထဲတွင် ဓားအလင်းတန်း တစ်ချက် တောက်ပသွားသည်။

ထိုအကြည့် တစ်ချက်တည်းဖြင့် ရိချွမ်ဂန်းပန် ၏ ခန္ဓာကိုယ်ကြီး လွင့်စင်သွားပြီး ကြမ်းပြင်ပေါ်သို့ ခွေးသေ တစ်ကောင်လို ပြုတ်ကျသွားကာ အသက်ရှင်သလား သေသွားသလားပင် မသိရတော့ပေ။

"တကယ်ကို သေချင်နေတဲ့ ကောင်ပဲ... စည်းကမ်း နားမလည်ဘူး... အကြီးအကဲလင်း တောင် ဘာမှ မပြောရသေးတာကို သူက ကြားဖြတ် ပြောရဲတယ်..."

"ဒီလောက်ဆို အပြစ်ပေးခံရတာ လုံလောက်ပြီ... အသက်ရှင်နေဦးမယ် ထင်တယ်..."

"ဒီလို ရိုင်းစိုင်းတဲ့ လူငယ်တွေကို ကောင်းကောင်း သင်ခန်းစာ ပေးမှ ရမယ်..."

"ငါလည်း ဒီကောင်ကို ကြည့်မရတာ ကြာပြီ... သစ်သားဖိနပ် ကြီး စီးပြီး ကြည့်ရတာ သောက်မြင်ကပ်စရာကြီး..."

...

အကြီးအကဲလင်း ရောက်လာသဖြင့် လူအများအပြား လာရောက် ကြည့်ရှုနေကြပြီး...

ရိချွမ်ဂန်းပန် လွင့်စင်သွားသည်ကို မြင်လိုက်ရချိန်တွင် အားလုံးက ပျော်ရွှင်စွာဖြင့် ဝေဖန် ဆွေးနွေးနေကြသည်။

'သောက်ကျိုးနည်း... တကယ် လွန်လွန်းတယ်...'

'အကြည့် တစ်ချက်တည်းနဲ့ ဒီလောက်တောင် အစွမ်းထက်တာလား...'

ကျိုးဟန် လည်း အံ့အားသင့်သွားသည်။

"အခု မင်းရဲ့ အကြောင်းပြချက်ကို ပြောပြလို့ ရပြီလား..."

အကြီးအကဲလင်း က တည်ငြိမ်စွာ မေးလိုက်သည်။

"အရိပ်မဲ့ မှန် ပျက်စီးသွားမှာ စိုးလို့ပါ..."

ကျိုးဟန် က အမှန်အတိုင်းသာ ပြောလိုက်သည်။

"ဟဲဟဲ... စိတ်ချပါ... ဝိညာဉ်ကျောက်တုံး ၅ သိန်း လောက်က ဘာမှ မဟုတ်ပါဘူး... ပျက်စီးသွားရင်တောင် မင်းကို လျော်ခိုင်းမှာ မဟုတ်ပါဘူး..."

အကြီးအကဲလင်း က ကျိုးဟန် ၏ စိုးရိမ်မှုကို နားလည်သွားပြီး ရယ်မောလိုက်သည်။

တကယ်လို့ အရိပ်မဲ့ မှန် ကို ပျက်စီးစေနိုင်သည်ဆိုလျှင် ၎င်းက ဧကရာဇ်အဆင့် သိုင်းကျမ်း ထက်ပင် ကျော်လွန်နေပြီ ဖြစ်ရာ နှစ်ပေါင်း သန်းချီကြာမှ တစ်ခါ ပေါ်ထွက်လာတတ်သော ပါရမီရှင်ကြီး ဖြစ်နေမည် မဟုတ်ပါလား။ သူက ဝမ်းသာဖို့ပင် အချိန်မရနိုင်ရာ ဝိညာဉ်ကျောက်တုံး ၅ သိန်း ဆိုသည်မှာ ဘာမှ မဟုတ်ပေ။

'ဟဲဟဲ... ခင်ဗျားဆီက ဒီစကားကို စောင့်နေတာ...'

"ဒါဆို ကျွန်တော် စတင်တော့မယ်နော်..."

အကြီးအကဲလင်း ခေါင်းညိတ်ပြသည်ကို မြင်ပြီးနောက်...

ကျိုးဟန် က အရိပ်မဲ့ မှန် ကို ကိုင်ကာ သူ၏ မျက်နှာကို ထိုးကြည့်လိုက်သည်။

မှန်ထဲတွင် ချောမောသော မျက်နှာတစ်ခု ထွက်ပေါ်လာပြီး ကျိုးဟန် က သူ၏ ချောမောမှုထဲတွင် နစ်မျောနေစဉ်...

"ဂျွတ်..."

ကွဲအက်သံ တစ်ခု ထွက်ပေါ်လာပြီး မှန်ပေါ်တွင် အက်ကွဲကြောင်း တစ်ခု ထွက်ပေါ်လာသည်။

ထို့နောက် အက်ကွဲကြောင်းများ လျင်မြန်စွာ ပြန့်နှံ့သွားပြီး ပိုမို များပြားလာကာ နောက်ဆုံးတွင် အစိတ်စိတ်အမွှာမွှာ ဖြစ်သွားပြီး ကြမ်းပြင်ပေါ်သို့ ပြုတ်ကျသွားတော့သည်။

တစ်နေရာလုံး တိတ်ဆိတ်သွားပြီး မှန်ကွဲစများ ကြမ်းပြင်ပေါ် ကျသံကိုပင် ရှင်းလင်းစွာ ကြားနေရသည်။ အားလုံး အံ့အားသင့်သွားကြပြီး အတန်ကြာမှ ပြင်းထန်သော ဆွေးနွေးသံများ ထွက်ပေါ်လာတော့သည်။

"သောက်ကျိုးနည်း... အရိပ်မဲ့ မှန် တောင် ကွဲသွားပြီ... ဒီလူငယ်လေးက အရမ်း ကြောက်စရာ ကောင်းတာပဲ..."

"ဧကရာဇ်အဆင့် သိုင်းကျမ်း ထက် ပိုမြင့်တဲ့ သိုင်းကျမ်း ကို နားလည် သဘောပေါက်နိုင်တယ်ဆိုတော့... ဒါက အရင်က တစ်ခါမှ မရှိဖူးတဲ့ ကိစ္စပဲ... နံပါတ်တစ် ပါရမီရှင် လို့ ခေါ်ဖို့ လုံလောက်တယ်..."

"တခြား ပါရမီရှင် တွေက သူနဲ့ ခေတ်ပြိုင် ဖြစ်ရတာ သေချာပေါက် အကြီးမားဆုံး ဝမ်းနည်းစရာပဲ..."

"ငါတို့ ဓားနတ်ဘုရား ကျောင်းတော် ပြန်လည် ထွန်းတောက်လာတော့မယ်... အရင်က ဂုဏ်ကျက်သရေတွေ ပြန်လည် ရရှိလာတော့မယ်..."

"ခဏနေရင် သွားပြီး မိတ်ဖွဲ့ထားမှ ရမယ်... ဒီလို ပါရမီရှင် မျိုးနဲ့ အဆက်အသွယ် ရရင် နောက်ပိုင်းမှာ အကျိုးကျေးဇူးတွေ အများကြီး ရမှာ..."

"မိုက်တယ်... မင်းက တကယ်ကို လူမှုဆက်ဆံရေး နားလည်တာပဲ... ဘာလက်ဆောင် ပေးရင် ကောင်းမလဲ..."

...

လူအများစုက အစပိုင်းတွင် အံ့အားသင့်သွားကြပြီး နောက်ပိုင်းတွင် ချီးကျူးစကားများ ဆိုကာ နောက်ဆုံး၌ မိတ်ဖွဲ့ရန်အထိ ရည်ရွယ်လာကြသည်။

ကျိုးဟန် ၏ စွမ်းဆောင်ရည်က လူတိုင်းကို အပြည့်အဝ အသိအမှတ်ပြုသွားစေခဲ့သည်။

"ဒီတစ်ခါ စမ်းသပ်မှု ရလဒ် အရ ကျိုးဟန် က အောင်မြင်သွားပြီ... အရည်အသွေးက ဧကရာဇ်အဆင့် ထက် ကျော်လွန်တယ်..."

အကြီးအကဲလင်း က ဧကရာဇ်အဆင့် ထက် ကျော်လွန်ကြောင်း တိုက်ရိုက် ကြေညာလိုက်သည်။

အတိအကျ မည်သည့်အဆင့် ဖြစ်သည်ဆိုသည်မှာ အရေးမကြီးတော့ပေ။ ထို့အပြင် စမ်းသပ်ရန် ကိရိယာလည်း မရှိတော့ပေ။

အကြီးအကဲလင်း ၏ မျက်လုံးများက ကျိုးဟန် အပေါ်သို့ ကျရောက်လာချိန်တွင် အလွန် ပူပြင်း တက်ကြွနေသည်။

ဓားနတ်ဘုရား ကျောင်းတော် မှာ ယခင်ကလောက် အင်အား မကောင်းတော့ဘဲ အချိန်အကြာကြီး အထိ အစွမ်းထက်သော ပါရမီရှင်များ ပေါ်ထွက်မလာခဲ့ပေ။

ယခုတော့ နှစ်သန်းချီမှ တစ်ခါ ပေါ်ထွက်လာတတ်သော ပါရမီရှင်ကြီး တစ်ယောက် ရောက်လာပြီ ဖြစ်ရာ ယုံကြည်မှုကို မြှင့်တင်ပေးနိုင်မည့် ကြီးမားသော ကိစ္စကြီး တစ်ခု ဖြစ်သည်။

'ဓားနတ်ဘုရား ကျောင်းတော် ရဲ့ ပြန်လည် ရှင်သန်ရေး က သူ့အပေါ်မှာ မူတည်နေပြီ ထင်တယ်...'

အကြီးအကဲလင်း က စိတ်ထဲတွင် တွေးလိုက်သည်။

အကြီးအကဲလင်း ၏ ကြေညာသံနှင့်အတူ စနစ်၏ သတိပေးသံကလည်း ကျိုးဟန် ၏ ခေါင်းထဲတွင် အချိန်ကိုက် ထွက်ပေါ်လာသည်။

"စနစ် သတိပေးချက်... သင်သည် နိုးထခြင်း တာဝန် ၂ ကို အောင်မြင်စွာ ပြီးမြောက်သွားပါပြီ..."

"စနစ် သတိပေးချက်... ဝိညာဉ်ကျောက်တုံး ၁၀၀၀ ကို ဆုကြေးအဖြစ် ရရှိပါသည်..."

"စနစ် သတိပေးချက်... သင်သည် တာဝန်ကို မျှော်မှန်းထားသည်ထက် ပိုမို ကောင်းမွန်စွာ လုပ်ဆောင်နိုင်ခဲ့သဖြင့် ဝိညာဉ်ကျောက်တုံး ၁ သောင်း ကို အပိုဆုကြေး အဖြစ် ရရှိပါသည်..."

'နောက်ဆုံးတော့ ပြီးသွားပြီပဲ...'

ဤတစ်ကြိမ် ဆုကြေးက အလွန် များပြားလှပြီး ဝိညာဉ်ကျောက်တုံး ၁ သောင်း တိတိ ရရှိခဲ့သည်။

'နိုးထခြင်း တာဝန် ရဲ့ တတိယ အဆင့်က ဘာဖြစ်မလဲ မသိဘူး...'

ကျိုးဟန် က စိတ်ထဲတွင် တွေးလိုက်သည်။

"ကျိုးဟန်... မင်း တကယ်ကို ကောင်းကောင်း လုပ်နိုင်ခဲ့တယ်... ငါတို့ ဓားနတ်ဘုရား ကျောင်းတော် ရဲ့ စိတ်ဓာတ်ခွန်အားတွေကို တိုးတက်စေခဲ့တယ်..."

"ဒီနေ့ ငါက ကျောင်းတော် ခေါင်းဆောင်ကြီး ကိုယ်စား မင်းကို နံပါတ်တစ် ပါရမီရှင် ဆိုတဲ့ ဂုဏ်ပုဒ်ကို ပေးအပ်ချီးမြှင့်တယ်..."

အကြီးအကဲလင်း ၏ လက်ချောင်း တစ်ချက် ဝှေ့ယမ်းလိုက်သည်နှင့်အတူ ရွှေရောင် အလင်းတန်း တစ်ခုက ကျိုးဟန် ၏ ခန္ဓာကိုယ်ဆီသို့ ပျံသန်းလာသည်။

အလွန် မြန်ဆန်ပြီး ပြင်းထန်သော စွမ်းအားများ ပါဝင်နေသဖြင့် ကျိုးဟန် ပင် အနည်းငယ် လန့်သွားမိသည်။

သို့သော် မကြာမီ ထိုစွမ်းအင်၏ ကြီးမားမှုနှင့် နွေးထွေးမှုကို သူ ခံစားလိုက်ရသည်။

ခန္ဓာကိုယ်၏ အစိတ်အပိုင်းတိုင်းက အားဖြည့်မှု ရရှိသွားပြီး ကြွယ်ဝလှသော စွမ်းအားများက သွေးကြောများထဲတွင် စီးဆင်းသွားသည်။

ပတ်ဝန်းကျင်မှ ကြည့်ရှုနေသူများကလည်း မတ်တတ်ရပ်ကာ လက်ခုပ်တီးကြပြီး သူတို့၏ မျက်လုံးများထဲတွင် ချီးကျူးမှုများနှင့် စိတ်လှုပ်ရှားမှုများ ပြည့်နှက်နေသည်။

ဤသည်မှာ ဓားနတ်ဘုရား ကျောင်းတော် ၏ ကြီးမားသော ကိစ္စရပ် တစ်ခု မဟုတ်ပါလား။

ဓားနတ်ဘုရား ကျောင်းတော် ၏ အဖွဲ့ဝင် တစ်ဦးအနေဖြင့် အားလုံးက ဂုဏ်ယူနေကြသည်။

"နံပါတ်တစ် ပါရမီရှင် ဆိုတဲ့ နာမည်နဲ့ တကယ်ကို လိုက်ဖက်တာပဲ..."

"ဒါက နဂါး တစ်ကောင်လို ပျံတက်သွားတော့မှာပဲ..."

"ဒီလောက် ငယ်ငယ်ရွယ်ရွယ်နဲ့ ဒီလောက်တောင် အစွမ်းထက်နေပြီ ဆိုတော့ အနာဂတ်မှာ ဘယ်လောက်တောင် ကြောက်စရာ ကောင်းလာမလဲ မသိဘူး..."

"ငါ့သမီးလေးကို သူနဲ့ ပေးစားလိုက်ချင်တယ်... မယားငယ် အဖြစ် နေရရင်တောင် ကျေနပ်တယ်..."

"သနားစရာပဲ... ငါ့မှာ သမီး မရှိဘူး... ငါ့မိန်းမကိုပဲ ပေးလိုက်ရမလား မသိဘူး... သူ လက်ခံပါ့မလား..."

...

"စနစ် သတိပေးချက်... သင်သည် နံပါတ်တစ် ပါရမီရှင် ဂုဏ်ပုဒ် ကို ရရှိပါသည်... အချက်အလက်များကို ကြည့်ရှုမည်လား..."

"ကြည့်မယ်..."

နံပါတ်တစ် ပါရမီရှင် ကဲ့သို့သော အစွမ်းထက်သည့် ဂုဏ်ပုဒ် ၏ အချက်အလက်များက မည်သို့ ရှိမည်ကို ကျိုးဟန် က မစောင့်နိုင်တော့ဘဲ ချက်ချင်း ကြည့်ရှုလိုက်သည်။