အခန်း ၆၉

အခန်း (၆၉) နဂါးဧကရာဇ် သွေးကြော... တစ္ဆေ ဓားသမား

"စနစ်... တစ်ဖက်လူရဲ့ အချက်အလက်တွေကို လုယူပြီးသွားရင် သူက ပြန်ကောင်းလာနိုင်သေးလား..."

ကျိုးဟန် က ရိချွမ်ဂန်းပန် ၏ သနားစရာ အခြေအနေကို ကြည့်ရင်း သိချင်စိတ်ဖြင့် မေးလိုက်သည်။

"စနစ် သတိပေးချက်... လုယူခံရပြီးနောက် ထိုအချက်အလက်များကို အမြဲတမ်း ဆုံးရှုံးသွားမည် ဖြစ်သည်..."

"စနစ် သတိပေးချက်... သို့သော် သင့်အနေဖြင့် ထိုအချက်အလက်များကို တစ်ဖက်လူထံသို့ ကိုယ်တိုင် ပြန်လည် ပေးအပ်နိုင်ပါသည်..."

ကျိုးဟန် က ခေါင်းညိတ်လိုက်ပြီး နားလည်သွားသည်။

'ပြန်ပေးရမယ် ဟုတ်လား...'

'ကိုယ့်စွမ်းအားနဲ့ကိုယ် လုယူလာခဲ့တာကို ဘာလို့ ပြန်ပေးရမှာလဲ...'

"ဘာတွေ ဖြစ်နေတာလဲ..."

"ကျန်းရှုံး... မင်းရဲ့ တပည့်ကို အပြင် ဆွဲထုတ်သွားစမ်း... ကြည့်ရတာ သောက်မြင်ကပ်စရာ ကောင်းတယ်..."

အကြီးအကဲလင်း က မျက်မှောင်ကြုတ်လိုက်ပြီး ရူးသွပ်နေသည့်အလား ဖြစ်နေသော ရိချွမ်ဂန်းပန် ကို ကြည့်ကာ အလွန် မကျေမနပ် ဖြစ်သွားသည်။

ထို့ကြောင့် အဝေးသို့ မရောက်သေးသော ကျန်းရှုံး ကို လှမ်းခေါ်လိုက်သည်။

ကျန်းရှုံး က တိတ်တဆိတ် ဆဲရေးတိုင်းထွာလိုက်ပြီး ရိချွမ်ဂန်းပန် ကို ဆွဲထုတ်သွားတော့သည်။

သေချာပေါက် ဤသည်မှာ ကြားဖြတ် ဇာတ်ဝင်ခန်းလေး တစ်ခုသာ ဖြစ်သည်။

ဆက်လက်၍ နိုးထခြင်း တာဝန် များကို လုပ်ဆောင်ရန် လိုအပ်သေးသည်။

"အကြီးအကဲလင်း... တတိယ အဆင့် နိုးထခြင်း တာဝန် က ဘာလဲဆိုတာ ပြောပြလို့ ရမလား..."

ကျိုးဟန် က တိုက်ရိုက်ပင် မေးလိုက်သည်။

"တတိယ အဆင့်က မင်းရဲ့ စုဆောင်းနိုင်စွမ်း ကို စမ်းသပ်တာပဲ..."

"အနက်ရောင် သလင်းကျောက် ၁၀၀... ခရမ်းရောင် မဟူရာကျောက် ၅၀... ဓားသမား တံဆိပ် ၁၀ ခု လိုအပ်တယ်... ပလက်တီနမ်အဆင့် သားရဲ တွေဆီကနေ အကုန် ရနိုင်တယ်..."

အကြီးအကဲလင်း က အသေးစိတ် ရှင်းပြလိုက်သည်။

"စနစ် သတိပေးချက်... သင်သည် နိုးထခြင်း တာဝန် ၃ ကို လက်ခံရရှိပါသည်..."

ကျိုးဟန် က ပစ္စည်းများ သွားရောက် စုဆောင်းရန် ပြင်လိုက်ချိန်မှာပင် အကြီးအကဲလင်း ၏ စကားသံကို ထပ်မံ ကြားလိုက်ရသည်။

"ဒီတာဝန် ကို မင်း လုပ်စရာ မလိုတော့ဘူး... မင်းအတွက်တော့ ဘာမှ မခက်ခဲဘူးဆိုတော့ အချိန်ကုန်တာပဲ အဖတ်တင်လိမ့်မယ်..."

"ပြီးတော့ နိုးထခြင်း တာဝန် ရဲ့ စတုတ္ထ အဆင့်က မင်းရဲ့ အဖွဲ့လိုက် လုပ်ဆောင်နိုင်စွမ်း ကို စမ်းသပ်တာ... ငါ့ရဲ့ အခွင့်အာဏာ ကို သုံးပြီး အကုန်လုံး အောင်မြင်တယ်လို့ သတ်မှတ်ပေးမယ်..."

အကြီးအကဲလင်း က သူ၏ အဖြူရောင် မုတ်ဆိတ်မွေးများကို ပွတ်သပ်ရင်း ပြုံးကာ ပြောလိုက်သည်။

သူ့အမြင်တွင် ကျိုးဟန် ကဲ့သို့သော ပါရမီရှင်ကြီး တစ်ယောက် အတွက် အဖွဲ့လိုက် လုပ်ဆောင်နိုင်စွမ်း လိုအပ်သေးလို့လား။

လုံးဝ မလိုအပ်ပေ။ သူ တစ်ယောက်တည်းကပင် အဖွဲ့ တစ်ဖွဲ့လုံးနှင့် ညီမျှနေပြီ ဖြစ်သည်။

"စနစ် သတိပေးချက်... သင်သည် နိုးထခြင်း တာဝန် ၃ ကို ပြီးမြောက်သွားပါသဖြင့် ဆုကြေးအဖြစ် ဝိညာဉ်ကျောက်တုံး ၅၀၀ ရရှိပါသည်..."

"စနစ် သတိပေးချက်... သင်သည် နိုးထခြင်း တာဝန် ၄ ကို ပြီးမြောက်သွားပါသဖြင့် ဆုကြေးအဖြစ် ဝိညာဉ်ကျောက်တုံး ၁၀၀၀ ရရှိပါသည်..."

အကြီးအကဲလင်း ၏ စကားသံ အဆုံးတွင် တာဝန် ပြီးမြောက်ကြောင်း သတိပေးချက်များက ခေါင်းထဲတွင် အဆက်မပြတ် ထွက်ပေါ်လာသည်။

"ကျေးဇူးတင်ပါတယ် အကြီးအကဲလင်း..."

ထိုစကားကို ကြားပြီးနောက် ကျိုးဟန် လည်း မျက်နှာပေါ်တွင် ဝမ်းသာသွားပြီး အချိန်အများကြီး သက်သာသွားခဲ့ပြီ မဟုတ်ပါလား။

တကယ်ကို ပါရမီရှင် ဆိုပါက ဘာမဆို လုပ်ခွင့် ရှိနေခြင်းပင်။

"ဒါပေမဲ့ နိုးထခြင်း တာဝန် ရဲ့ ပဉ္စမ အဆင့်ကိုတော့ မင်း ကိုယ်တိုင် လုပ်မှ ရမယ်..."

"အကြီးအကဲလင်း... ပြောပါ..."

"ငါက မင်းကို အခက်အခဲ နည်းနည်း ထပ်တိုးပေးချင်တယ်... မင်းရဲ့ တကယ့် စွမ်းအားကို ကြည့်ချင်လို့လေ..."

"ဒါပေမဲ့ စိတ်ချပါ... ထိုက်တန်တဲ့ ဆုကြေးတွေလည်း ပိုများလာမှာပါ... မင်း လက်ခံနိုင်မလား..."

"သေချာပေါက် လက်ခံတာပေါ့... ကျွမ်းကျင်သူ ဆိုတာ အခက်အခဲတွေကို အဆက်မပြတ် ရင်ဆိုင်ပြီး ကိုယ့်ကိုယ်ကိုယ် ကျော်လွှားနိုင်ရမယ်..."

ကျိုးဟန် က ခါးဆန့်ကာ ပြတ်သားသော စိတ်ဆန္ဒဖြင့် ပြောလိုက်သည်။

"ကောင်းတယ်... ရည်မှန်းချက် ရှိတယ်... တာဝန် က အရမ်း ရိုးရှင်းပါတယ်... လူတစ်ယောက်ကို သတ်ပြီး သူ့ခေါင်းကို ယူလာခဲ့ဖို့ပဲ..."

အကြီးအကဲလင်း ၏ မျက်လုံးများထဲတွင် ချီးကျူးမှုများ ထွက်ပေါ်လာပြီး ဆက်ပြောလိုက်သည်။

"တစ္ဆေ ဓားသမား လို့ ခေါ်တယ်... သူက ငါတို့ ဓားနတ်ဘုရား ကျောင်းတော် ရဲ့ သစ္စာဖောက်ပဲ... အခု သူ ပုန်းနေတဲ့ နေရာကို ငါတို့ သိထားပြီးပြီ..."

"စနစ် သတိပေးချက်... နိုးထခြင်း တာဝန် ၅ ကို ထောက်လှမ်းသိရှိရပါသည်... လက်ခံမည်လား..."

"အကြီးအကဲ စိတ်ချပါ... ဒီကိစ္စကို ကျွန်တော့်ကိုသာ လွှဲထားလိုက်ပါ... အခု ကျွန်တော်ကလည်း ဓားနတ်ဘုရား ကျောင်းတော် ရဲ့ အဖွဲ့ဝင် တစ်ယောက် ဖြစ်နေပြီ ဆိုတော့ ဒီလို သစ္စာဖောက် မျိုးကို လူတိုင်း သတ်ပိုင်ခွင့် ရှိတယ်... ကျွန်တော်လည်း သေချာပေါက် သတ်ပေးရမှာပေါ့..."

ကျိုးဟန် က တရားမျှတသော လေသံဖြင့် ပြောလိုက်သည်။

"စနစ် သတိပေးချက်... သင်သည် နိုးထခြင်း တာဝန် ၅ ကို အောင်မြင်စွာ လက်ခံပြီးပါပြီ..."

ထို့နောက် တာဝန် ၏ ရှင်းလင်းချက်များလည်း ထွက်ပေါ်လာသည်။

နိုးထခြင်း တာဝန် ၅

ဖော်ပြချက် - သစ္စာဖောက် တစ္ဆေ ဓားသမား ကို သတ်ဖြတ်ပြီး ခေါင်းကို အကြီးအကဲလင်း ထံသို့ ပေးအပ်ပါ

အခြေအနေ - လုပ်ဆောင်ဆဲ

နေရာ - မိုးကြိုး အပျက်အစီး

"ဒါဆို မင်းဆီက သတင်းကောင်းကို ငါ စောင့်နေမယ်... ဒါပေမဲ့ ဒီနေ့ အရမ်း ညဉ့်နက်နေပြီ ဆိုတော့ မနက်ဖြန် မနက်ကျမှ မိုးကြိုး အပျက်အစီး ထဲကို တိုက်ရိုက် ဝင်သွားလိုက်တော့..."

တကယ်လည်း ကျိုးဟန် ရောက်လာသည်မှာ အချိန်အတော်ကြာနေပြီ ဖြစ်ရာ အချိန်ကို တွက်ကြည့်လျှင် ည ၁၀ နာရီခန့်ပင် ရှိနေပြီ ဖြစ်သည်။

ဒီကမ္ဘာ၏ ညဘက်အချိန်က အကြီးအကဲလင်း ကိုယ်တိုင်ပင် အနည်းငယ် ကြောက်ရွံ့ရသဖြင့် ကျိုးဟန် ကို ညဘက် အလုပ်လုပ်ရန် သေချာပေါက် ခွင့်ပြုမည် မဟုတ်ပေ။

ကျိုးဟန် လည်း ထိုစကားကို ကြားပြီးနောက် ခေါင်းညိတ်ကာ နှုတ်ဆက်လိုက်သည်။

"လာ... ကျိုးဟန်... ဒါလေး ယူထားလိုက်..."

ထိုအချိန်မှသာ နျဲ့ထျန်ချန် က စကားပြောရန် အခွင့်အရေး ရသွားပြီး နဂါးသွေး ဆေးလုံး ကို ကျိုးဟန် ထံသို့ တိုက်ရိုက် ကမ်းပေးလိုက်သည်။

သူ ဤသို့ လုပ်ရခြင်းတွင် အကြောင်းရင်းများ ရှိသည်။

ပထမအချက်မှာ သူ၏ မျက်နှာပန်း လှအောင် လုပ်ပေးခဲ့သဖြင့် ကျိုးဟန် ကို ကျေးဇူးတင်သောကြောင့် ဖြစ်သည်။

အထက်လူကြီးများ၏ အလေးထားမှုနှင့် ယုံကြည်မှုကို ပြန်လည် ရရှိသွားပြီ ဖြစ်ရာ နောက်ပိုင်းတွင် အရင်းအမြစ်များ မရတော့မည်ကို ကြောက်စရာ လိုသေးလို့လား။

ဒုတိယအချက်မှာ ယခု ကျိုးဟန် ဤမျှ အစွမ်းထက်နေပြီ ဖြစ်ရာ သူ့အပေါ် ရင်းနှီးမြှုပ်နှံမှု ပြုလုပ်ထားခြင်းက အလွန် တန်ဖိုးရှိသည်။ တုံ့ပြန်မှုများ ရလာပါက သေချာပေါက် သာမန် မဟုတ်နိုင်ပေ။

"ကျေးဇူးပဲ... ဒါဆိုလည်း ကျွန်တော် ယူထားလိုက်တော့မယ်..."

မျက်စိရှေ့ရှိ နဂါးသွေး ဆေးလုံး မှာ အနီရောင် တောက်ပနေပြီး လေထဲသို့ ပျံ့နှံ့နေသော စွမ်းအင်များကပင် လူကို စိတ်အားထက်သန်စေသည်။

ကျိုးဟန် သေချာပေါက် ငြင်းဆန်မည် မဟုတ်ပေ။ ဤဆေးလုံးက ကြည့်ရုံဖြင့် သာမန် မဟုတ်မှန်း သိနိုင်သည်။

ထို့အပြင် တစ်ဖက်လူက ရင်းနှီးမှု ပြသနေသည်ကို ငြင်းဆန်လိုက်ခြင်းက မျက်နှာကို ရိုက်ချလိုက်သလို ဖြစ်သွားမည် မဟုတ်ပါလား။

"စနစ် သတိပေးချက်... သင်သည် နဂါးသွေး ဆေးလုံး ကို ရရှိပါသည်... အချက်အလက်များကို ကြည့်ရှုမည်လား..."

"ကြည့်မယ်..."

နဂါးသွေး ဆေးလုံး

အဆင့် - ဘုရင်အဆင့်

ဖော်ပြချက် - အလွန် နည်းပါးသော နဂါးမျိုးနွယ် သွေးကြော များ ပါဝင်ပြီး အဆင့်မြင့် ဆေးဘက်ဝင် အပင်များနှင့် ပေါင်းစပ် ဖော်စပ်ထားပါသည်

အကျိုးသက်ရောက်မှု - သောက်သုံးပြီးနောက် ခန္ဓာကိုယ် ကြံ့ခိုင်မှု ၁၀၀၀ တိုးလာမည်ဖြစ်ပြီး စစ်မှန်သော နဂါး သွေးကြော ကို နိုးထနိုင်ရန် ၀.၀၀၀၀၀၀၁ ရာခိုင်နှုန်း အခွင့်အရေး ရှိပါသည်

ရှင်းလင်းချက် - လူတစ်ယောက်လျှင် အများဆုံး ၃ လုံးသာ သောက်သုံးနိုင်ပြီး ထို့ထက်ပို၍ သောက်သုံးပါက အကျိုးသက်ရောက်မှု ရှိမည် မဟုတ်ပါ

ခန္ဓာကိုယ် ကြံ့ခိုင်မှု ဆိုသည်မှာ ခန္ဓာကိုယ်၏ ခွန်အားနှင့် ခံနိုင်ရည်ကြားရှိ ပေါင်းစပ် အချက်အလက်များကို ဆိုလိုခြင်း ဖြစ်သည်။

၎င်းက လျှို့ဝှက် အချက်အလက် တစ်ခု ဖြစ်ပြီး ကိုယ်ပိုင် အချက်အလက် ဖန်သားပြင် တွင် ပြသမည် မဟုတ်ပေ။

ခန္ဓာကိုယ် ကြံ့ခိုင်မှု မြင့်မားလေလေ ရန်သူ၏ တိုက်ခိုက်မှုများကို ရင်ဆိုင်ရာတွင် လွင့်စင်သွားခြင်း သို့မဟုတ် လဲကျသွားခြင်း စသည့် အခြေအနေများ မဖြစ်ပေါ်နိုင်လေလေ ဖြစ်သည်။

တိုက်ပွဲများတွင် အလွန် အသုံးဝင်လှသည်။

'ဟင်... စစ်မှန်သော နဂါး သွေးကြော ကို နိုးထနိုင်တဲ့ အခွင့်အရေး ရှိတယ်လား...'

ကျိုးဟန် ၏ မျက်လုံးများ ကျုံ့ဝင်သွားသည်။ စစ်မှန်သော နဂါး ဆိုသည်မှာ မည်သို့သော သဘောတရား ဖြစ်ကြောင်း သူ မသိသလို မမြင်ဖူးခဲ့ပေ။

သို့သော် အလွန် အစွမ်းထက်သော တည်ရှိမှု တစ်ခု ဖြစ်မည်မှာ သေချာလှသည်။

သို့သော် အခွင့်အရေးကတော့ အလွန် နည်းပါးလွန်းလှသည်။

ကျိုးဟန် က တိုက်ရိုက် ၉ ကြိမ် အဆင့်မြှင့်လိုက်သည်။

နဂါးသွေး ဆေးလုံး (၉ ကြိမ်မြှင့်)

အဆင့် - ဘုရင်အဆင့်

ဖော်ပြချက် - နည်းပါးသော နဂါးမျိုးနွယ် သွေးကြော များ ပါဝင်ပြီး အဆင့်မြင့် ဆေးဘက်ဝင် အပင်များနှင့် ပေါင်းစပ် ဖော်စပ်ထားပါသည်

အကျိုးသက်ရောက်မှု - သောက်သုံးပြီးနောက် ခန္ဓာကိုယ် ကြံ့ခိုင်မှု ၅၀၀၀ တိုးလာမည်ဖြစ်ပြီး စစ်မှန်သော နဂါး သွေးကြော ကို နိုးထနိုင်ရန် တစ်သောင်းပုံ တစ်ပုံ အခွင့်အရေး... နဂါးဘုရင် သွေးကြော ကို နိုးထနိုင်ရန် သန်းတစ်ရာပုံ တစ်ပုံ အခွင့်အရေး... နဂါးဧကရာဇ် သွေးကြော ကို နိုးထနိုင်ရန် ဘီလီယံ တစ်ထောင်ပုံ တစ်ပုံ အခွင့်အရေး ရှိပါသည်

ရှင်းလင်းချက် - လူတစ်ယောက်လျှင် အများဆုံး ၃ လုံးသာ သောက်သုံးနိုင်ပြီး ထို့ထက်ပို၍ သောက်သုံးပါက အကျိုးသက်ရောက်မှု ရှိမည် မဟုတ်ပါ

'သောက်ကျိုးနည်း... နဂါးဘုရင် နဲ့ နဂါးဧကရာဇ် သွေးကြော တွေတောင် ရှိသေးတာလား... ဒါက အရမ်း မိုက်လွန်းတယ်...'

၉ ကြိမ် အဆင့်မြှင့်ပြီးနောက်တွင်ပင် အခွင့်အရေးက အလွန် နည်းပါးနေဆဲ ဖြစ်သည်။

သို့သော် တစ်သောင်းပုံ တစ်ပုံ အခွင့်အရေး ဆိုသည်မှာ အနည်းငယ်တော့ မျှော်လင့်ချက် ရှိနေသေးသည်။

ယခု ချက်ချင်း သောက်သုံးမည်လား သို့မဟုတ် ကံကောင်းသော အချိန်ကျမှ သောက်သုံးမည်လား ဆိုသည်ကို ကျိုးဟန် အနည်းငယ် တွေဝေနေသည်။

သူက ဤမျှ ကံကောင်းလိမ့်မည်ဟု လုံးဝ မယုံကြည်ပေ။

'အို... ကံကောင်းခြင်း... အိုးဟွမ် ဆိုတဲ့ ကောင်က အမြဲတမ်း ကံကောင်းနေတာ မဟုတ်ဘူးလား...'

ကျိုးဟန် ၏ မျက်လုံးများ ချက်ချင်း အရောင်လက်သွားပြီး ရဲတင်းသော အကြံတစ်ခု ရသွားသည်။

'အချိန်တန်ရင် သူ့ဆီက ကံကောင်းခြင်းတွေကို လုယူလို့ ရမလား စမ်းကြည့်ရမယ်...'

တွေးလေလေ ဤအကြံက တကယ်ကို ဖြစ်နိုင်ချေ ရှိသည်ဟု ခံစားရလေလေ ဖြစ်သည်။

ထို့ကြောင့် ချက်ချင်း သောက်သုံးမည့် အစီအစဉ်ကို စွန့်လွှတ်လိုက်ပြီး နဂါးသွေး ဆေးလုံး ကို ကျောပိုးအိတ်ထဲသို့ ထည့်လိုက်သည်။

"ဟတ်ချိုး... ငါ့ခန္ဓာကိုယ်က ဒီလောက် ကျန်းမာတာ... ဖျားဖို့ဆိုတာ မဖြစ်နိုင်ပါဘူး... နောက်ကွယ်မှာ ဘယ်သူကများ ငါ့ကို ကျိန်ဆဲနေပြန်ပြီလဲ မသိဘူး..."

အိုးဟွမ် က အိပ်ရန် ပြင်ဆင်နေချိန်တွင် ရုတ်တရက် နှာချေမှု အဆက်မပြတ် ဖြစ်ပေါ်လာသဖြင့် နှာခေါင်းကို ပွတ်ရင်း သံသယဖြင့် မိမိဘာသာ ရေရွတ်လိုက်သည်။

"ဒီလိုပဲ ဖြစ်ရမယ်... အဲဒီကောင်တွေ ငါ့ရဲ့ ကံကောင်းမှုတွေကို အားကျပြီး မနာလို ဖြစ်နေကြတာ သေချာတယ်... ဟဲဟဲ..."

အိုးဟွမ် ၏ မျက်နှာပေါ်တွင် မောက်မာသော အပြုံးတစ်ခု ထွက်ပေါ်လာသည်။

...

ထိုအချိန်တွင် ကျိုးဟန် က ဓားနတ်ဘုရား ကျောင်းတော် မှ ထွက်ကာ ချန်းလဲ့မြို့ သို့ ပြန်ရန် ပြင်လိုက်ချိန်တွင် မိန်းကလေး တစ်ယောက်၏ တားဆီးခြင်းကို ခံလိုက်ရသည်။

အလွန် လှပသော မိန်းကလေး တစ်ယောက် ဖြစ်သည်။

သို့သော် ယခုအချိန်တွင် သူမ၏ မျက်လုံးများထဲ၌ စိန်ခေါ်လိုသော အကြည့်များ တောက်ပနေပြီး အကြံဆိုးဖြင့် ရောက်လာကြောင်း သိသာထင်ရှားနေသည်။