အခန်း ၇၂

အခန်း (၇၂) အိုးဟွမ် ကို လုယူခြင်း... ပေါ့ပါးခြင်း လက်စွပ်

ဒီအရွယ်အစားက သေးတော့ မသေးဘူး၊ ခန့်မှန်းရသလောက် အနည်းဆုံး 36D တော့ ရှိမယ်။

"မဟုတ်ပါဘူး... ဒါ နားလည်မှု လွဲတာပါ... ငါ ရှင်းပြတာကို နားထောင်ပါဦး... ငါ့ ရည်ရွယ်ချက်က အဲဒီလို လုပ်ဖို့ မဟုတ်ပါဘူး..."

သူမက သတ်ဖြတ်တော့မည့်ဟန်ဖြင့် ပြေးဝင်လာသည်ကို မြင်လိုက်ရသဖြင့် ကျိုးဟန် ချက်ချင်းပင် အနည်းငယ် အားနာသွားပြီး အလျင်အမြန် ရှင်းပြလိုက်သည်။

သို့သော် ဝမ်ယွိဟယ် က မည်သို့ နားထောင်မည်နည်း။

ဓားကို ကိုင်ကာ ရမ်းကားစွာ ခုတ်ပိုင်းနေတော့သည်။

သို့သော် သူမက မူလကတည်းက ပြင်းထန်စွာ ဒဏ်ရာရထားပြီး ဖြစ်ရာ ဤမျှလောက် တိုက်ခိုက်မှုက ကျိုးဟန် အတွက် အနည်းငယ်မျှ ခြိမ်းခြောက်နိုင်စွမ်း မရှိပေ။

သို့သော် သူမကို ဤကဲ့သို့ ဆက်လက် ရမ်းကားခွင့် ပေးထားပါက အကျိုးဆက်က သေချာပေါက် ကောင်းမည် မဟုတ်ပေ။

ထို့ကြောင့် စိတ်ပိုင်းဖြတ်လိုက်ပြီး ဝမ်ယွိဟယ် ကို တိုက်ရိုက် ဖက်ထားလိုက်သည်။

"ဆက်မလုပ်လို့ မရဘူးလား... ဒီမှာ လူတွေ အများကြီး ကြည့်နေတယ်လေ..."

ထိုစကားကို ကြားလိုက်ရချိန်တွင် သူမလည်း အသိဝင်လာပြီး တဖြည်းဖြည်း ငြိမ်သက်သွားကာ ယခု အလွန် အရှက်ရစရာ ကောင်းသော အခြေအနေကို သတိပြုမိသွားသည်။

"တကယ်လို့ တခြားသူတွေက ငါနဲ့ မင်းလို အဆိုးမလေး ရဲ့ ပတ်သက်မှုကို နားလည်မှုလွဲသွားရင် ငါ့နာမည်တော့ ပျက်တော့မှာပဲ..."

ကျိုးဟန် က စကားတစ်ခွန်း ထပ်ဖြည့်လိုက်ပြီးနောက် ဝမ်ယွိဟယ် မှာ ထပ်မံ ရုန်းကန်လာပြန်သည်။

'ငါ့ရဲ့ ရုပ်ရည် ပါရမီ နောက်ခံ က အားလုံး အကောင်းဆုံးတွေချည်းပဲ... သူကတောင် နစ်နာတယ်လို့ ထင်နေသေးတာလား...'

သူမ၏ စိတ်ထဲတွင် မကျေနပ်မှုများ ပြည့်နှက်သွားသော်လည်း ယခုအချိန်က ထိုကိစ္စများကို တွေးတောနေရမည့် အချိန် မဟုတ်ပေ။

သူမက အတွင်းခံ ကို အတင်း ပြန်လုယူလိုက်ပြီး သွားကြိတ်ကာ ပြေးထွက်သွားတော့သည်။

ယခုလေးတင် ဖြစ်ပျက်သွားခဲ့သော ကိစ္စက တစ်မိနစ် နှစ်မိနစ်ခန့်သာ ကြာမြင့်ခဲ့သည်။

သို့သော် ထိုတိုတောင်းလှသော အချိန်လေးက ကြည့်ရှုနေသူ အားလုံးကို မျက်လုံးပြူးသွားစေခဲ့သည်။

ပွင့်ပွင့်လင်းလင်း မပြောသော်လည်း ထိုလူများ၏ မျက်လုံးများက အလွန် ထက်မြက်လှသည်။

ဘာဖြစ်သွားသည်ကို ချက်ချင်း ရိပ်မိလိုက်ကြပြီး သူတို့၏ မျက်လုံးများထဲတွင် ယောကျ်ားအချင်းချင်းသာ နားလည်နိုင်သော အပြုံးများ ထွက်ပေါ်လာကြသည်။

"အစ်ကိုဟန်... တကယ်ကို ကြမ်းတာပဲ... အဲဒီ လက်စွမ်းလေး သင်ပေးပါလား..."

"ငါသာ အစ်ကိုဟန် လို လက်စွမ်းမျိုး နည်းစနစ်မျိုး ရှိရင်... တွေးကြည့်ရုံနဲ့တင် အရမ်း မိုက်တယ်..."

"အစ်ကိုဟန်... မဟုတ်ဘူး ဆရာ... တပည့် လက်ခံသေးလား... တစ်လကို ဝိညာဉ်ကျောက်တုံး ၁ သောင်း ပူဇော်ပါ့မယ်..."

"နံပါတ်တစ် ပါရမီရှင် နဲ့ တကယ်ကို လိုက်ဖက်တယ်... ဒီလို နည်းစနစ် တွေကလည်း ပထမတန်းစား ပဲ..."

"အားလုံး မတ်တတ်ရပ်ပြီး အစ်ကိုဟန် ကို လေးစားမှု ပြကြ..."

...

လူအများ၏ မျက်လုံးများက အလွန် ပူပြင်း တက်ကြွနေပြီး ကျိုးဟန် ကို ကြည့်ရင်း လေးစားမှုများ ပြည့်နှက်နေကြသည်။

တစ်ယောက်ချင်းစီက တပည့်ခံပြီး ပညာသင်ချင်နေကြကာ ဆွဲဆောင်မှု ရှိသော အပေးအယူများကို ကမ်းလှမ်းလာကြသည်။

'သနားစရာပဲ... ငါက တကယ် မလုပ်တတ်ပါဘူး... မဟုတ်ရင် တပည့် နည်းနည်းလောက် လက်ခံပြီး ဝိညာဉ်ကျောက်တုံး တွေ အလကား ရနေရင် သိပ်ကောင်းမှာပဲ...'

ကျိုးဟန် က စိတ်ထဲတွင် တွေးလိုက်ပြီး ခေါင်းခါကာ ဓားနတ်ဘုရား ကျောင်းတော် မှ တိုက်ရိုက် ထွက်လာခဲ့သည်။

ထိုအချိန်တွင် ည ၁၀ နာရီ ကျော်နေပြီ ဖြစ်သည်။

လင်းလက်နေသော လမင်းကြီးနှင့် ကျဲပါးသော ကြယ်ရောင်များအောက်တွင် ညှို့ငင်နေသော ကျီးကန်းများ တောင်ဘက်သို့ ပျံသန်းသွားကြသည်။

ချန်းလဲ့မြို့ လမ်းမများပေါ်တွင်လည်း လူသူ အသွားအလာ နည်းပါးနေပြီ ဖြစ်သည်။

တည်းခိုခန်း သို့ ပြန်ရောက်ချိန်တွင် ဟန်ရှန်နင် ညီအစ်မ နှစ်ယောက်စလုံး အိပ်ပျော်နေကြပြီ ဖြစ်သည်။

ကျိုးဟန် လည်း တစ်နေ့လုံး ပင်ပန်းလာခဲ့သဖြင့် ကုတင်ပေါ် လှဲချလိုက်သည်နှင့် မကြာမီ အိပ်ပျော်သွားတော့သည်။

အလွန် ပင်ပန်းနေသောကြောင့် ဖြစ်မည်၊ ကျိုးဟန် နိုးလာချိန်တွင် မနက် ၁၀ နာရီ ထိုးနေပြီ ဖြစ်သည်။

ညီအစ်မ နှစ်ယောက်က အဆင့်သွားတင်နေကြပြီ ဖြစ်ပြီး စားပွဲပေါ်တွင်တော့ မေတ္တာပါသော မနက်စာလေး ချန်ထားရစ်ခဲ့သဖြင့် ကျိုးဟန် ၏ စိတ်ထဲတွင် နွေးထွေးသွားသည်။

"နယ်မြေကြေညာချက်... နတ်ဘုရားနှင့်မိစ္ဆာကမ္ဘာ ၏ စတုတ္ထမြောက်နေ့တွင်... နယ်မြေ ၆၆၆ မှ သေဆုံးသွားသော ကစားသမား စုစုပေါင်း ၄၃၆၂၂ ဦး ရှိပြီး ကျန်ရှိသော ကစားသမား ၅၆၃၇၈ ဦး ရှိပါသည်..."

"ဟင်... ဒီလောက်တောင် အများကြီး သေသွားတာလား... အခု ကစားသမား ၆ သောင်း တောင် မပြည့်တော့ဘူးပဲ..."

"တကယ်ကို ရက်စက်တာပဲ... မြို့ပြင်ထွက်ပြီး သားရဲ သတ်ရင် ဘယ်လို မမျှော်လင့်ထားတဲ့ ကိစ္စမျိုးမဆို ဖြစ်လာနိုင်တယ်လေ..."

"ဆာဗာ တွေ ပေါင်းတော့မယ် ထင်တယ်... လူက ဒီလောက်လေးပဲ ကျန်တော့တာ... သရဲခြောက်တဲ့ ဆာဗာ ဖြစ်တော့မယ်..."

"မကြာခင် ပေါင်းလောက်မှာပါ... နယ်မြေတိုင်းမှာ သေဆုံးတဲ့ အရေအတွက် က အတူတူလောက်ပဲ..."

ကြေညာချက် ကို ကြားပြီးနောက် မှတ်ချက်ပေးသည့် နေရာတွင်လည်း စတင် ဆွေးနွေးလာကြသည်။ သို့သော် ယေဘုယျအားဖြင့် စိတ်ဓာတ်ကျနေကြသည်။

မည်သို့ပင်ဖြစ်စေ ယုန်သေလျှင် မြေခွေး ငိုသည် ဟူသကဲ့သို့ နောက်တစ်ယောက် အလှည့်က မိမိ ဖြစ်လာမည်လား ဘယ်သူမှ မသိနိုင်ပေ။

ကြေညာချက် ကို ကြားလိုက်ရသဖြင့် ကျိုးဟန် လည်း အနည်းငယ် အံ့အားသင့်သွားသည်။

သူ့တွင် လုံလောက်သော စွမ်းအား ရှိနေပြီ ဖြစ်သဖြင့် အန္တရာယ်ကို မခံစားမိခဲ့ပေ။

သို့သော် ထိုအချက်အလက်များက အခြား ကစားသမား များအတွက် အသက်ရှင် ကျန်ရစ်ရန်မှာ ကြီးမားသော စိန်ခေါ်မှု တစ်ရပ် ဖြစ်နေဆဲ ဖြစ်ကြောင်း ပြသနေသည်။

ကျိုးဟန် က ခေါင်းခါလိုက်ပြီး ထိုကိစ္စများကို ဆက်မတွေးတော့ပေ။

မနက်စာ စားရင်း အဆင့်သတ်မှတ်ချက် ဇယား ကို ကြည့်လိုက်သည်။

အဆင့်သတ်မှတ်ချက် ဇယား

၁။ ကျိုးဟန် - ၂၅ (၁.၆ %)

၂။ ဟန်ရှန်နင် - ၁၉ (၁၆.၉ %)

၃။ ဟန်ချင်ရွှဲ့ - ၁၉ (၁၃.၈ %)

၄။ အိုးဟွမ် - ၁၄ (၂၁.၃ %)

၅။ ကောက်ထျို - ၁၄ (၁၆.၂ %)

၆။ မေအောက်ရွှယ် - ၁၃ (၉၅.၅ %)

၇။ ကျားဖေးချိုး - ၁၃ (၃၆.၄ %)

၈။ လင်းဖန် - ၁၃ (၂၃.၃ %)

...

ကျိုးဟန် က အခြားသူများနှင့် အလွန် ကွာခြားစွာဖြင့် ပထမ နေရာတွင် ရှိနေဆဲ ဖြစ်သည်။

ဟန်ရှန်နင် နှင့် ဟန်ချင်ရွှဲ့ ညီအစ်မ နှစ်ယောက်ကတော့ ၅ ဆ အတွေ့အကြုံ အကျိုးသက်ရောက်မှု အကူအညီဖြင့် အိုးဟွမ် တို့နှင့် အကွာအဝေးကို ချဲ့ကားနိုင်ခဲ့ပြီး အဆင့် ၅ ဆင့်ခန့် ကွာဟနေပြီ ဖြစ်သည်။

အခြား ထိပ်ဆုံး ၁၀ ယောက် နေရာများကတော့ သိပ်အပြောင်းအလဲ မရှိပေ။

မနက်စာ စားပြီးနောက် ယနေ့ လုပ်ရမည့် ကိစ္စများကို ကျိုးဟန် ပြန်လည် စဉ်းစားလိုက်သည်။

ပထမအချက် - မိုးကြိုး အပျက်အစီး သို့ သွားပြီး တစ္ဆေ ဓားသမား ကို သတ်ကာ နိုးထခြင်း တာဝန် ကို ပြီးမြောက်အောင် လုပ်ရမည်။

ဒုတိယအချက် - နတ်ဆိုးနှိမ်နင်းရေး ဌာန သို့ သွားပြီး သတင်းပို့ရမည်။ မည်သို့ပင်ဖြစ်စေ သူက ပထမဆုရှင် အနေဖြင့် အရည်အချင်းစစ် ပြိုင်ပွဲကို အောင်မြင်ခဲ့ပြီး နတ်ဆိုးနှိမ်နင်းရေး ဌာန သို့ ဝင်ရောက်ခွင့် ရရှိထားပြီ ဖြစ်ရာ သက်ဆိုင်ရာ တာဝန် သို့မဟုတ် ဇာတ်လမ်းက သူ့ကို စောင့်ကြိုနေမည်မှာ သေချာသည်။

တတိယအချက် - ယနေ့က နတ်ဘုရားနှင့်မိစ္ဆာကမ္ဘာ သို့ ရောက်ရှိလာသည့် စတုတ္ထမြောက်နေ့ ဖြစ်သည်။ ပဉ္စမမြောက်နေ့ ရောက်ပါက လျှို့ဝှက်နယ်မြေ ဖွင့်လှစ်တော့မည် ဖြစ်သည်။

ကျိုးဟန် တွင် လျှို့ဝှက်နယ်မြေ ဝင်ခွင့်လက်မှတ် ရှိပြီး စတုတ္ထမြောက် အဖွဲ့ဝင် နေရာ လွတ်နေသေးရာ ထိုနေရာကို အသုံးပြု၍ အရင်းအမြစ်များနှင့် လဲလှယ်ရန် ဆုံးဖြတ်လိုက်သည်။

မည်သို့ပင်ဖြစ်စေ ဤလျှို့ဝှက်နယ်မြေ မှာ ကြယ်ရောင်အဆင့် သို့မဟုတ် ဘုရင်အဆင့် ပစ္စည်းများကိုပင် ရရှိနိုင်သော လျှို့ဝှက်နယ်မြေ ဖြစ်ရာ ဈေးကောင်းကောင်း ရနိုင်မည်မှာ သေချာသည်။ ကစားသမား များက ထိုမျှလောက် ငွေကြေး မတတ်နိုင်မည်ကိုသာ စိုးရိမ်ရသည်။

'အချိန်တန်ရင် ချမ်းသာတဲ့ NPC တစ်ယောက်ယောက်ကို ရှာပြီး ဒီနေရာကို ရောင်းလိုက်လို့ ရမလား ကြည့်ရမယ်...'

ကျိုးဟန် က စိတ်ထဲတွင် စဉ်းစားလိုက်သည်။

စတုတ္ထအချက် - အိုးဟွမ် ရဲ့ ကံကြမ္မာကို လုယူပြီး တစ်ဖက်လူ၏ ကံကောင်းမှုများကို ရယူနိုင်မလား စမ်းသပ်ကြည့်ရမည်။ ထိုသို့ဆိုလျှင် နဂါးသွေး ဆေးလုံး ကို သောက်သုံးနိုင်မည် ဖြစ်သည်။

ဤအချက်ကို ယခုချက်ချင်း လုပ်ဆောင်နိုင်သည်။

ကျိုးဟန် လည်း တုံ့ဆိုင်းမနေဘဲ ချက်ချင်း စတင် လုပ်ဆောင်လိုက်သည်။

"အိုးဟွမ် ရဲ့ ကံကြမ္မာကို လုယူမယ်..."

"စနစ် သတိပေးချက်... သင်သည် လုယူခြင်း အခွင့်အရေး တစ်ကြိမ် ကို အသုံးပြုလိုက်ပါသည်... လုယူမှု ကျရှုံးပါသည်..."

ပထမအကြိမ် ကျရှုံးသော်လည်း စိတ်ဓာတ်မကျဘဲ ကျိုးဟန် က ဆက်လက် အသုံးပြုလိုက်သည်။

"စနစ် သတိပေးချက်... သင်သည် လုယူခြင်း အခွင့်အရေး တစ်ကြိမ် ကို အသုံးပြုလိုက်ပါသည်... လုယူမှု ကျရှုံးပါသည်..."

"စနစ် သတိပေးချက်... သင်သည် လုယူခြင်း အခွင့်အရေး တစ်ကြိမ် ကို အသုံးပြုလိုက်ပါသည်... လုယူမှု ကျရှုံးပါသည်..."

၃ ကြိမ် ဆက်တိုက် ကျရှုံးသွားသဖြင့် ကျိုးဟန် အနည်းငယ် စကားပြောစရာမဲ့ သွားပြီး ယနေ့ ကံသိပ်မကောင်းဟု ထင်လိုက်သည်။

'လုယူမှု အောင်မြင်နိုင်ချေ က အကွာအဝေး နဲ့များ သက်ဆိုင်နေမလား...'

ကျိုးဟန် က စိတ်ထဲတွင် ခန့်မှန်းကြည့်လိုက်သော်လည်း စနစ်က ထိုအချက်နှင့် ပတ်သက်၍ ရှင်းပြထားခြင်း မရှိပေ။

'နောက်တစ်ချက် ဖြစ်နိုင်တာက အိုးဟွမ် ရဲ့ ကိုယ်ပိုင် ကံကောင်းမှုတွေက လုယူမှု ကျရှုံးနိုင်ချေ ကို ပိုများစေတာလည်း ဖြစ်နိုင်တယ်...'

ကျိုးဟန် က ကျရှုံးရသည့် အကြောင်းရင်းကို ခန့်မှန်းကြည့်လိုက်သည်။ အကယ်၍ ထိုအခြေအနေမျိုး ဖြစ်နေပါက အနည်းငယ်တော့ ခက်ခဲမည် ဖြစ်သည်။

သို့သော် မည်သို့သော အခြေအနေ ဖြစ်သည်ဆိုသည်ကို နမူနာ နည်းပါးလွန်းသဖြင့် တိကျသော အဖြေကို မရနိုင်ပေ။ ယခု အသုံးပြုခွင့်လည်း ကုန်သွားပြီ ဖြစ်ရာ ယနေ့အတွက် စမ်းသပ်၍ မရနိုင်တော့ပေ။

'နောက်တစ်ခါ မျက်နှာချင်းဆိုင် တွေ့မှပဲ လုယူကြည့်ပြီး အောင်မြင်နိုင်ချေ ဘယ်လောက်ရှိလဲ စမ်းကြည့်ရမယ်...'

နဂါးသွေး ဆေးလုံး ကို ရက်အနည်းငယ် စောင့်ပြီးမှ သောက်သုံးရတော့မည်။

ပြောပြီးနောက် ကျိုးဟန် က စိတ်ဓာတ်မကျဘဲ အခမဲ့ မြေအိုး တစ်လုံးကို ဖွင့်လိုက်သည်။

"စနစ် သတိပေးချက်... သင်သည် ပေါ့ပါးခြင်း လက်စွပ် ကို ရရှိပါသည်... အချက်အလက်များကို ကြည့်ရှုမည်လား..."

မမျှော်လင့်ဘဲ ပစ္စည်းတစ်ခု ရလာသော်လည်း မည်သည့်အဆင့် ဖြစ်ကြောင်း မသိရသေးပေ။

ကျိုးဟန် က အလျင်အမြန် စစ်ဆေးကြည့်လိုက်သည်။

ပေါ့ပါးခြင်း လက်စွပ်

အဆင့် - စိန်အဆင့်

အချက်အလက် - တိုက်ခိုက်မှု ၅၀၀ နှင့် မြန်နှုန်း ၂၀ တိုးမည်

အကျိုးသက်ရောက်မှု - တိုက်ပွဲဝင်နေချိန်တွင် မြန်နှုန်း ၂၀ ရာခိုင်နှုန်း တိုးလာမည်ဖြစ်ပြီး သင်နှင့် ရင်ဆိုင်နေရသော ပစ်မှတ်၏ မြန်နှုန်း ၂၀ ရာခိုင်နှုန်း လျော့ကျသွားမည်

ဖော်ပြချက် - လေပြေလို ပေါ့ပါးပြီး သင့်အနားမှာ အမြဲ ရှိနေမယ်

'သောက်ကျိုးနည်း... မဆိုးဘူးပဲ... စိန်အဆင့် တောင် ဖြစ်နေတာကိုး...'

ကံတရား ဆိုသည်မှာ တကယ်ကို မျှတမှု ရှိသည်။ စောစောက ၃ ကြိမ် ဆက်တိုက် လုယူမှု ကျရှုံးခဲ့သော်လည်း ယခုတော့ စိန်အဆင့် အဆင်တန်ဆာ တစ်ခု တိုက်ရိုက် ထွက်လာခဲ့ပြီ မဟုတ်ပါလား။

ကျိုးဟန် လည်း ကံကောင်းသူ တစ်ယောက် ဖြစ်သွားခဲ့ပြီး စိတ်ခံစားချက် ချက်ချင်း ပြောင်းလဲသွားသည်။

"၇ ကြိမ် အဆင့်မြှင့်မယ်..."

ကျိုးဟန် က တိုက်ရိုက် ပြောလိုက်သည်။

ဤလက်စွပ်က မြန်နှုန်း ကို အဓိက တိုးပေးသောကြောင့် အဆင့်မြှင့်ပြီးနောက် မည်သို့သော အကျိုးသက်ရောက်မှုများ ဖြစ်လာမည်ကို သူ အလွန် မျှော်လင့်နေမိသည်။