အခန်း ၇၇

အခန်း (၇၇) အဝတ်အစား တော်တော် ကုန်တာပဲ... အောက်ကျိန်း အဆင့်တက်ခြင်း

"ပျောက်ကွယ်သွားတယ် ဟုတ်လား..."

အောက်ဝူယာ က တိုးတိုးလေး ရေရွတ်လိုက်ပြီး သူ၏ မျက်နှာက ရေပြင်လို တည်ငြိမ်နေသော်လည်း အလွန် အေးစက်နေသည်။

သူ၏ စိတ်ထဲတွင်လည်း သံသယ အချို့ ရှိနေသည်။ ယွင်ရွှီ သန့်စင်သော နန်းတော် အတွင်းမှ လူတစ်ယောက်ကို တိတ်တဆိတ် ပျောက်ကွယ်သွားအောင် လုပ်နိုင်သည် ဆိုလျှင်...

ထိုသူက ကောင်းကင်ကို အန်တုနိုင်သော စွမ်းအားကို ပိုင်ဆိုင်ထားခြင်း သို့မဟုတ် အထူး နည်းလမ်း တစ်ခုခုကို အသုံးပြုထားခြင်းသာ ဖြစ်ရမည်။

အောက်ဝူယာ က ဒုတိယ အချက်ကို ပို၍ ယုံကြည်နေသည်။

အကယ်၍ တစ်ဖက်လူက တကယ်သာ ကောင်းကင်ကို အန်တုနိုင်သော စွမ်းအား ရှိပါက ဤကဲ့သို့ ခိုးကြောင်ခိုးဝှက် လုပ်နေစရာ အကြောင်း မရှိပေ။

တစ်ခဏမျှ စဉ်းစားပြီးနောက် အောက်ဝူယာ က စကားစလိုက်ရာ သူ၏ လွှမ်းမိုးနိုင်သော အသံက နန်းတော် တစ်ခုလုံးသို့ ပဲ့တင်ထပ်သွားသည်။

"ငါ့ရဲ့ အမိန့်ကို ထုတ်ပြန်လိုက်... ရှာဖွေရေး နယ်မြေကို ချဲ့ကားပြီး အစွမ်းကုန် ရှာဖွေကြ... မင်းသမီးလေး ရဲ့ သတင်းကို ရအောင် ရှာရမယ်..."

"အသုံးဝင်တဲ့ သတင်းအချက်အလက် ပေးနိုင်တဲ့ သူကို ဝိညာဉ်ကျောက်တုံး ၁ သန်း ဆုချမယ်... ပြီးတော့ သူ ဘုရင်အဆင့် ကို တက်လှမ်းနိုင်အောင် ငါကိုယ်တိုင် တာဝန်ယူပေးမယ်..."

အောက်ဝူယာ ၏ မျက်လုံးများ ကျုံ့ဝင်သွားပြီး ညာဘက် လက်ချောင်းများဖြင့် လေထဲတွင် စာလုံး အချို့ ရေးဆွဲလိုက်သည်။

ရွှေရောင် အလင်းတန်းများ ထွက်ပေါ်နေသော အမိန့်စာလွှာ တစ်ခုက နန်းတော် ၏ လေထဲတွင် ထွက်ပေါ်လာသည်။

ထိုအမိန့်စာလွှာ က တစ်ခုမှ နှစ်ခု... နှစ်ခုမှ လေးခု စသည်ဖြင့် ပွားများလာပြီး...

မကြာမီ မရေမတွက်နိုင်သော ရွှေရောင် အလင်းစက်များ အဖြစ် ပြောင်းလဲသွားကာ အရပ်မျက်နှာ အသီးသီးသို့ ပြန့်ကျဲသွားတော့သည်။

မိနစ်အနည်းငယ် အကြာတွင် မိုင်တစ်ထောင် ပတ်လည် အတွင်းရှိ...

ယွင်ရွှီ သန့်စင်သော နန်းတော် ၏ အုပ်ချုပ်မှု အောက်တွင် ရှိနေသော သားရဲ အများအပြား ထံသို့ ရောက်ရှိသွားသည်။

အလင်းစက်များ ဖြတ်သန်းသွားသော နေရာတိုင်းရှိ သားရဲ မျိုးနွယ်စု များက အမိန့်စာလွှာ ၏ အကြောင်းအရာကို ရှင်းလင်းစွာ ခံစားသိရှိလိုက်ရသည်။

ဤအရာက လှိုင်းလုံးကြီးများအလား ရိုက်ခတ်သွားပြီး အားလုံးကို လျှပ်စီးပစ်ချခံလိုက်ရသကဲ့သို့ အံ့အားသင့်သွားစေသည်။

"ဝုတ်... မင်းသမီးလေး ပျောက်သွားတယ် ဟုတ်လား... ကောင်းကင်ကြီး ပြောင်းလဲတော့မှာလား... ဝုတ်... ငါတို့ ဝိညာဉ်ခွေး မျိုးနွယ်စု အနေနဲ့ ဒီအခွင့်အရေးကို သေချာပေါက် အရယူရမယ်... မင်းသမီးလေး ကိုသာ ရှာတွေ့ရင် သေချာပေါက် ကောင်းကင်ပေါ် ရောက်သွားပြီပဲ..."

"ညောင် ညောင် ညောင်... ငါတို့ အရိပ်ကြောင် မျိုးနွယ်စု က စစ်သည်တွေ အကုန် စုဝေးကြ... စွမ်းအား အကုန်သုံးပြီး မင်းသမီးလေး ကို ရှာကြ..."

"ဂူးဂူး... ဒီတစ်ခါ ကိစ္စက တော်တော်လေး ထူးဆန်းတယ်... ထင်သလောက် မရိုးရှင်းဘူး... ငါတို့ မျိုးနွယ်စု အနေနဲ့ အခြေအနေကို အရင် စောင့်ကြည့်တာ အကောင်းဆုံးပဲ..."

"တခြား မျိုးနွယ်စု တွေကို အရင် သွားခိုင်းလိုက်... ဒီကိစ္စက သာမန် မဟုတ်ဘူး..."

"ဟဲဟဲ... အောက်ဝူယာ က ဒီကိစ္စကို ဘယ်လို ဖြေရှင်းမလဲ ဆိုတာ ငါ ကြည့်ချင်သေးတယ်... ကောင်းကင်က ငါ့ကို ကူညီတာပဲ... ဟိုယိမ်းဒီယိမ်း ဖြစ်နေတဲ့ အဖွဲ့အစည်း တွေဆီ လူလွှတ်ပြီး သွားဆက်သွယ်လိုက်..."

...

ယွင်ရွှီ သန့်စင်သော နန်းတော် ၏ အုပ်ချုပ်မှု အောက်တွင် ရှိနေသော အဖွဲ့အစည်း အသီးသီးက အတွေးကိုယ်စီ ရှိနေကြသည်။

အချို့က သစ္စာခံချင်ကြပြီး... အချို့က အခြေအနေကို စောင့်ကြည့်ချင်ကြသည်။

အချို့ကတော့ မကောင်းသော အကြံအစည်များ ရှိနေကြသည်။

ဤ သားရဲ မျိုးနွယ်စု များက အလွန် ဉာဏ်ကောင်းကြပြီး သူတို့၏ ဉာဏ်ရည်က လူသားများထက် မနိမ့်ကျပေ။

အောက်ဝူယာ ၏ ရင်ထဲရှိ ဒေါသများက အထွတ်အထိပ်သို့ ရောက်ရှိနေပြီ ဖြစ်သည်။

အောက်ကျိန်း ပျောက်ဆုံးသွား၍သာ မဟုတ်ဘဲ အဓိကအားဖြင့် သူ၏ မျက်နှာ အကြီးအကျယ် ပျက်သွားရသောကြောင့် ဖြစ်သည်။

စဉ်းစားကြည့်ပါ... ယွင်ရွှီ သန့်စင်သော နန်းတော် ၏ အစောင့်အရှောက်များက အလွန် တင်းကျပ်လှသည်။

သို့သော် မင်းသမီး တစ်ပါးက အကြောင်းပြချက် မရှိဘဲ ပျောက်ကွယ်သွားခဲ့သည်။

ဤသည်က သူ့ကို ပါးရိုက်လိုက်ခြင်း မဟုတ်ပါလား။

အမြင့်မြတ်ဆုံး ဧကရာဇ် တစ်ပါး အနေဖြင့် မိမိ၏ သမီးအရင်းကိုပင် မကာကွယ်နိုင်ခဲ့ပေ။

ဤသည်က သူ၏ လွှမ်းမိုးနိုင်စွမ်းကို လုံးဝ ပျောက်ကွယ်သွားစေပြီး...

ပတ်ဝန်းကျင်ရှိ အဖွဲ့အစည်း များက သူ့ကို မည်သို့ လေးစားတော့မည်နည်း။

"မင်း ဘယ်သူပဲဖြစ်ဖြစ် ငါ သေချာပေါက် ရှာတွေ့အောင် လုပ်ပြီး မင်းကို အပိုင်းပိုင်း ခုတ်ထစ်ပစ်မယ်..."

...

သို့သော် ထိုအချိန်တွင် ကျိုးဟန် ကတော့ သူ ခေါ်ယူလိုက်သော ဓားဝိညာဉ် တစ်ပါးကြောင့် ဤမျှလောက် ကြီးမားသော တုန်လှုပ်မှုကြီး ဖြစ်ပေါ်သွားမည်ကို လုံးဝ မသိရှိခဲ့ပေ။

"အဆင့်မြှင့်ပြီးသွားတဲ့ ယန်သွေး ဆေးလုံး က သောက်သုံးခွင့် ကန့်သတ်ချက်ကို ဖြုတ်ပစ်နိုင်မလား အရင် ကြည့်ရမယ်..."

ကျိုးဟန် ၏ ခန္ဓာကိုယ်ထဲတွင် မီးဓာတ် မပါဝင်သော်လည်း ယန်သွေး ဆေးလုံး ၏ အကျိုးသက်ရောက်မှုက အလွန် အစွမ်းထက်လှသဖြင့်...

အဆင့်မြှင့်တင်ကြည့်ရန် ကြိုးစားချင်နေသည်။

စိတ်ထဲတွင် 'အဆင့်မြှင့်မည်' ဟု ရေရွတ်လိုက်ပြီးနောက်...

အဖြူရောင် အလင်းတန်း ၉ ချက် တောက်ပသွားပြီး...

အချက်အလက်သစ်များလည်း ထွက်ပေါ်လာသည်။

ယန်သွေး ဆေးလုံး (၉ ကြိမ်မြှင့်)

အရည်အသွေး - ဘုရင်အဆင့်

ဖော်ပြချက် - သားရဲများ၏ သွေးကြော ဆီနှစ်များကို အသုံးပြုထားပြီး အဆုံးမဲ့ ကောင်းကင် မီးတောက် ဖြင့် ဖော်စပ်ထားပါသည်

အကျိုးသက်ရောက်မှု - မီးတောက် တိုက်ခိုက်မှု ၁၂၀ ရာခိုင်နှုန်း တိုးလာမည်ဖြစ်ပြီး သွေးကြော စွမ်းအား ၁၅ ရာခိုင်နှုန်းကို စုစည်းပေးကာ အဆုံးမဲ့ ကောင်းကင် မီးတောက် အနည်းငယ်ကို နိုးထစေနိုင်သည်

ရှင်းလင်းချက် - မီးဓာတ် ကျင့်ကြံသူများသာ သောက်သုံးနိုင်ပြီး သောက်သုံးသူ အနေဖြင့် ကြံ့ခိုင်သော ခန္ဓာကိုယ် ရှိရမည်... မဟုတ်ပါက အဆုံးမဲ့ ကောင်းကင် မီးတောက် ၏ လောင်ကျွမ်းခြင်းကို ခံရကာ ပြာကျသွားမည် ဖြစ်သည်

အဆင့်မြှင့်ပြီးနောက် အကျိုးသက်ရောက်မှုများက အများကြီး ပိုမို အစွမ်းထက်လာသော်လည်း...

ကျိုးဟန် ကတော့ အလွန် စိတ်ပျက်သွားမိသည်။

မီးဓာတ် ကျင့်ကြံသူများသာ သောက်သုံးနိုင်သည် ဆိုသော ကန့်သတ်ချက်က ရှိနေဆဲ ဖြစ်သည်။

"ကျိန်းအာ... မင်းရဲ့ ခန္ဓာကိုယ်က အရမ်း ကြံ့ခိုင်တယ် မဟုတ်လား..."

ကျိုးဟန် က အတည်ပြုချင်သဖြင့် တိုက်ရိုက် မေးလိုက်သည်။

"ဒါပေါ့... ငါ့ရဲ့ မူလ ခန္ဓာကိုယ်က ထန်ရှီ လေ... ပြီးတော့ မီးတောက် တွေနဲ့လည်း အမြဲတမ်း ခန္ဓာကိုယ်ကို သန့်စင်လေ့ ရှိတယ်..."

"သခင် ကြည့်ချင်လို့လား... ငါ မူလ ခန္ဓာကိုယ် ကို ပြောင်းပြရမလား..."

အောက်ကျိန်း က သူမ၏ သွေးကြောကို ဂုဏ်ယူစွာဖြင့် ပြောလိုက်သည်။

"မလိုဘူး... မလိုဘူး... မင်း မူလ ခန္ဓာကိုယ် ကို မပြောင်းပါနဲ့... အခု ပုံစံလေးကပဲ ကောင်းပါတယ်..."

ကျိုးဟန် က အလျင်အမြန် လက်ကာပြလိုက်သည်။

သူက ထိုအရာကြီးကို မမြင်ချင်ပေ။ မြင်လိုက်ပါက ရင်ထဲတွင် မသက်မသာ ဖြစ်သွားမည်မှာ သေချာသည်။

"ဒီ ယန်သွေး ဆေးလုံး ကို သောက်လိုက်ပါ... အကျိုးသက်ရောက်မှု က မင်း အရင်က သောက်ခဲ့တာထက် အများကြီး ပိုကောင်းမှာ သေချာတယ်..."

အောက်ကျိန်း ၏ ခန္ဓာကိုယ်က ကြံ့ခိုင်သည် ဆိုမှတော့...

အဆင့်မြှင့်ထားသော ဤဆေးလုံးကို သောက်သုံးရန် ပြဿနာ မရှိနိုင်ပေ။

မည်သို့ပင်ဖြစ်စေ ကျိုးဟန် ကိုယ်တိုင်လည်း သုံး၍ မရနိုင်ရာ အောက်ကျိန်း ကို သောက်သုံးခိုင်းလိုက်ပါက...

သူမ ပိုမို အစွမ်းထက်လာပြီး သူ၏ တိုက်ခိုက်ရေး စွမ်းအားလည်း အလိုအလျောက် မြင့်တက်လာမည် ဖြစ်သည်။

"အို... ငါ စမ်းကြည့်လိုက်မယ်..."

အောက်ကျိန်း က ယူပြီးနောက် တုံ့ဆိုင်းမနေဘဲ မျိုချလိုက်သည်။

"မီးတောက် စွမ်းအား တွေနဲ့ သွေးကြော စွမ်းအား တွေက အရမ်းကို ပြည့်ဝနေတာပဲ..."

သောက်သုံးပြီးနောက် သူမ အလွန် ထူးခြားနေသည်ကို ခံစားလိုက်ရသည်။

သူမ၏ လှပသော မျက်လုံးများက ကျိုးဟန် ထံသို့ လှည့်လာပြီး လှိုင်းလေးများ ထနေသည်။

သူမ၏ ဤသခင်က သာမန် မဟုတ်ကြောင်း သိလိုက်ရသည်။

သူမ မေးခွန်းထုတ်ရန် ပြင်လိုက်ချိန်တွင် ရုတ်တရက် မျက်နှာထား ပြောင်းလဲသွားသည်။

"အ့... အို..."

ပြင်းထန်သော မီးတောက်များက သူမ၏ ခန္ဓာကိုယ်ထဲတွင် ပြန့်နှံ့သွားပြီး...

လောင်ကျွမ်းနေသော နာကျင်မှုများက ရေလှိုင်းများအလား အရှိန်အဟုန်ဖြင့် ဝင်ရောက်လာသည်။

သူမ၏ ပါးစပ်လေး ပွင့်သွားပြီး ညည်းတွားသံလေးများ ထွက်ပေါ်လာကာ...

မီးတောက် ၏ လောင်ကျွမ်းမှုကို အစွမ်းကုန် တွန်းလှန်နေရသည်။

"ဒါ... ဒါက အဆုံးမဲ့ ကောင်းကင် မီးတောက် လား..."

"အရမ်းကို ပြင်းထန်ပြီး လွှမ်းမိုးနိုင်တဲ့ စွမ်းအားပဲ... အရာအားလုံးကို လောင်ကျွမ်းပစ်တော့မလိုပဲ..."

အောက်ကျိန်း ၏ မျက်မှောင်များ ကြုံ့သွားပြီး မျက်လုံးများထဲတွင် အံ့သြမှုများ ပြည့်နှက်နေသည်။

သူမ နေ့စဉ် သောက်သုံးနေသော ယန်သွေး ဆေးလုံး ကို အဆုံးမဲ့ ကောင်းကင် မီးတောက် ဖြင့် ဖော်စပ်ထားခြင်း ဖြစ်ရာ သူမ အနေဖြင့် အလွန် ရင်းနှီးနေမည်မှာ သေချာလှသည်။

သို့သော် ယခု ဆေးလုံးထဲတွင် ကောင်းကင် မီးတောက် ၏ စွမ်းအားများ ပါဝင်နေသည်ကို အံ့သြဖွယ် တွေ့ရှိလိုက်ရသည်။

အကယ်၍ သူမသာ ဤလောင်ကျွမ်းမှုကို ခံနိုင်ရည် ရှိပါက အဆုံးမဲ့ ကောင်းကင် မီးတောက် ကို သူမ အသုံးပြုနိုင်မည် ဖြစ်သည်။

ဤကဲ့သို့သော နည်းလမ်းက တကယ်ကို အလွန် အစွမ်းထက်လှသည်။

အချိန်ဆွဲ တွေးတောနေရန် မဖြစ်နိုင်တော့ပေ။ ကောင်းကင် မီးတောက် ၏ စွမ်းအားက ပိုမို ကြမ်းတမ်းလာသည်။

ခန္ဓာကိုယ် အပြင်ဘက်ကိုပင် မီးတောက်များ ထွက်ပေါ်လာပြီး...

ယခုလေးတင် ဝတ်ဆင်ထားသော အဝတ်အစားများမှာ တစ်ခဏအတွင်းမှာပင် ပြာအဖြစ် ပြောင်းလဲသွားတော့သည်။

'သောက်ကျိုးနည်း... အဆုံးမဲ့ ကောင်းကင် မီးတောက် အနည်းငယ် ပါဝင်တာတောင် ဒီလောက်တောင် အရှိန်အဝါ ပြင်းထန်နေတာလား...'

'မီးလောင် သေသွားတော့မှာတော့ မဟုတ်ပါဘူးနော်...'

ကြောက်မက်ဖွယ်ကောင်းသော အပူချိန်ကို ဘေးတွင် ရပ်နေသော ကျိုးဟန် ပင် ရှင်းလင်းစွာ ခံစားနေရသည်။

ချက်ချင်းပင် သူ၏ စိတ်ထဲတွင် စိုးရိမ်ပူပန်မှုများ ဖြစ်ပေါ်လာသည်။

ဒီလောက် လှပတဲ့ မိန်းကလေး တစ်ယောက် သေသွားရင် အရမ်း နှမြောစရာ ကောင်းမည် မဟုတ်ပါလား။

ကျိုးဟန် က ဝင်ရောက် ကူညီရန် တွေဝေနေချိန်မှာပင်...

မီးတောက်များ ရုတ်တရက် ရပ်တန့်သွားပြီး အောက်ကျိန်း ၏ ခန္ဓာကိုယ်လည်း မြေပြင်ပေါ်သို့ လဲကျသွားတော့သည်။

ကျိုးဟန် က အလျင်အမြန် ပြေးသွားလိုက်ပြီး စိုးရိမ်စိတ်များ လွှမ်းမိုးနေသဖြင့်...

သူမ၏ အလွန် လှပသော ခန္ဓာကိုယ် ကိုပင် ဂရုမစိုက်နိုင်တော့ပေ။

"ကျိန်းအာ..."

"ကျိန်းအာ..."

သူမ ထံမှ တုံ့ပြန်မှု မရရှိသဖြင့်...

ကျိုးဟန် က သူမ၏ လည်ပင်းကို လက်ဖြင့် စမ်းကြည့်လိုက်သည်။

"ဟူး... ခန္ဓာကိုယ်က အရမ်း ပူနေတာပဲ..."

"ဒါပေမဲ့ တော်သေးတယ်... သွေးခုန်နှုန်းလည်း ရှိသေးတယ်... အသက်ရှူသံလည်း ရှိသေးတယ်..."

အခြေအနေကို စစ်ဆေးပြီးနောက် ကျိုးဟန် လည်း သက်ပြင်းချနိုင်တော့သည်။

အဆုံးမဲ့ ကောင်းကင် မီးတောက် ၏ စွမ်းအားက ပြင်းထန်လွန်းသဖြင့် အောက်ကျိန်း ၏ ခန္ဓာကိုယ်က ကြံ့ခိုင်သော်လည်း...

ရုတ်တရက် ဤကဲ့သို့သော ပြင်းထန်သည့် စွမ်းအင်များနှင့် ရင်ဆိုင်လိုက်ရချိန်တွင် တစ်ခဏအတွင်း အသားကျရန် ခက်ခဲသွားခြင်း ဖြစ်ပေမည်။

ကံကောင်းသည်မှာ သူမ၏ တစ်ကိုယ်လုံးတွင် မီးလောင်ထားသော ဒဏ်ရာများကို မတွေ့ရပေ။

ဒါပေမဲ့ အဝတ်အစား တော်တော် ကုန်တာပဲ။

တကယ်ကို နတ်ဆိုးမလေး ပဲ။

ကျိုးဟန် တစ်ယောက် အာခေါင်တွေ ခြောက်လာသည်အထိ ကြည့်မိသွားသည်။

"နောက်ဆိုရင် သူမကို မီးဒဏ် ခံနိုင်ရည် မြင့်မားတဲ့ အဝတ်အစား တစ်ထည်လောက် ရှာပေးမှ ရမယ်..."

မဟုတ်ပါက တိုက်ပွဲဝင်နေစဉ် အဝတ်အစားများ မီးလောင်သွားလျှင် ဘယ်လောက်တောင် အရှက်ကွဲစရာ ကောင်းလိုက်မလဲ။

ကျိုးဟန် တစ်ယောက် အတွေးများ လွင့်ပျံနေချိန်တွင်...

စနစ်၏ သတိပေးသံ ထွက်ပေါ်လာသည်။

"စနစ် သတိပေးချက်... သင်၏ ဓားဝိညာဉ် အောက်ကျိန်း သည် အိပ်မောကျသွားပြီး အဆင့်တက်နေပါသည်..."

"စနစ် သတိပေးချက်... လက်ရှိ သွေးကြော စင်ကြယ်မှု ၁၀၀ ရာခိုင်နှုန်း ဖြစ်ပြီး အဆင့်တက်နေပါသည်..."