အခန်း ၉၁

အခန်း (၉၁) အလှလေး နှင့် စမ်းသပ်မှု... ကျောင်းတော် တာဝန်

ခန်းမကြီး ထဲတွင် စကားပြောသံများ အဆက်မပြတ် ထွက်ပေါ်နေသည်။

ထိုလူများ၏ ခေါင်းပေါ်ရှိ နာမည်များကို မြင်လိုက်ရသဖြင့် သူတို့၏ အဆင့်အတန်းများကို ကျိုးဟန် ချက်ချင်း သိရှိသွားသည်။

သူတို့က ဓားနတ်ဘုရား ကျောင်းတော် မှ အကြီးအကဲ ကိုးဦး ဖြစ်နေသည်။

'ဒါကြောင့်ကိုး... သူတို့ဆီက ဒီလောက် အစွမ်းထက်တဲ့ အရှိန်အဝါတွေ ထွက်နေတာ...'

'ဒီလောက် များတဲ့ လူတွေကို တစ်ပြိုင်နက်တည်း အံ့အားသင့်သွားအောင် လုပ်နိုင်ခဲ့တာပဲ...'

ဘေးတွင် ရပ်နေသော ဝမ်ယွိဟယ် မှာ အားလုံးက ကျိုးဟန် ကို ဝိုင်းဝန်း ချီးကျူးနေကြသည်ကို ကြားလိုက်ရသဖြင့် မျက်နှာ ပျက်ယွင်းသွားသည်။

ယခင်က သူမ အစွမ်းထက်ဆုံး ပါရမီရှင် ဖြစ်ခဲ့စဉ်ကပင် ဤအကြီးအကဲများ၏ ဤကဲ့သို့သော ချီးကျူးမှုမျိုးကို မရရှိခဲ့ဖူးပေ။

"ဟေ့... ကျိုးဟန် လေး နိုးထခြင်း အောင်မြင်သွားပြီပဲ..."

မကြာမီ အကြီးအကဲ တစ်ဦးက ကျိုးဟန် ကို မြင်လိုက်ရသဖြင့် အလျင်အမြန် ပြောလိုက်သည်။

"ကျိုးဟန် ရေ... အားတဲ့ အချိန်ကျရင် အိမ်ကို အလည်လာခဲ့ပါဦးကွ... ငါ့သမီးလေး နဲ့ ဓားသိုင်း အကြောင်း ဆွေးနွေးလို့ ရတာပေါ့..."

"ကျိုးဟန် ရေ... မင်း အိမ်ထောင် ကျပြီလား... ငါ့မှာ မြေးမလေး တစ်ယောက်..."

"မင်းက တကယ်ကို တော်တာပဲ... နောက်ဆိုရင် ငါ့မြေးမလေး ဆယ်ယောက်လုံး ကို မင်းဆီမှာပဲ အပ်ထားလိုက်တော့မယ်..."

ကျိုးဟန် လည်း ဘာပြောရမှန်း မသိတော့ပေ။

'ဆယ်ယောက် တောင်လား... ဒါက အရမ်း ကြမ်းလွန်းတယ်...'

'ဓားနတ်ဘုရား ကျောင်းတော် ရဲ့ အထက်လူကြီးတွေ က ကြောက်စရာ ကောင်းတယ် လို့ ဘယ်သူ ပြောတာလဲ...'

'အဲဒါ ကောလာဟလ တွေ သက်သက်ပဲ...'

'ဒီ အဖိုးကြီးတွေ တစ်ယောက်ချင်းစီက ဘယ်လောက်တောင် သဘောကောင်းပြီး ကြင်နာတတ်လဲ ဆိုတာ ကြည့်လိုက်စမ်း... သမီး ပေးတဲ့လူက ပေး၊ မြေးမ ပေးတဲ့လူက ပေး နဲ့...'

'ဒါပေမဲ့ ဒီ အဖိုးကြီးတွေ နည်းနည်းတော့ ကပ်စေးနှဲတယ်... တကယ် အသုံးဝင်တဲ့ ဟာလေးတွေ ပေးလို့ မရဘူးလား...'

'ဥပမာ ဓားကောင်းကောင်း တစ်လက် ဖြစ်ဖြစ်၊ ဆေးလုံး ဖြစ်ဖြစ် ပေါ့...'

'ငါက ခင်ဗျားတို့ ရဲ့ သမီးတွေ၊ မြေးမတွေကို ဘာလုပ်ရမှာလဲ...'

"ကဲ ကဲ တော်ကြတော့... အလုပ်ကိစ္စ ပြောကြမယ်..."

အခြေအနေ အနည်းငယ် လမ်းလွဲသွားပြီ ဖြစ်ကြောင်း အကြီးအကဲလင်း က သတိထားမိလိုက်သဖြင့် ချက်ချင်း ဝင်တားလိုက်သည်။

"အကြီးအကဲလင်း... ဒီလောက် လူအများကြီး စုနေတာ... တစ်ခုခု ထူးခြားလို့လား ခင်ဗျ..."

ကျိုးဟန် က သူ၏ ရင်ထဲရှိ သံသယကို မေးလိုက်သည်။ ထိုနေရာတွင် ဝမ်ယွိဟယ် လည်း ရှိနေသည်ကို သူ မြင်လိုက်ရသည်။

တစ်ခုခုတော့ ရှိနေပြီမှာ သေချာသည်။

"ဒီလိုပါကွ... ၃ နှစ် တစ်ကြိမ် ကျင်းပတဲ့ နတ်ဘုရား စမ်းသပ်မှု ပြိုင်ပွဲကြီး က မကြာခင် စတင်တော့မယ်... ဒါက နတ်ဘုရားနဲ့ နတ်ဆိုး ကမ္ဘာကြီး ရဲ့ အကြီးမားဆုံး ပွဲတော်ကြီး တစ်ခုပဲ... ဆုလာဘ် တွေ အများကြီး ရနိုင်ရုံသာမက ဂုဏ်ကျက်သရေ နဲ့ စွမ်းအား ရဲ့ ပြယုဂ် တစ်ခုလည်း ဖြစ်တယ်..."

"ဒါကြောင့် မင်းရဲ့ သဘောထားကို မေးချင်လို့ပါ... မင်းက ဓားနတ်ဘုရား ကျောင်းတော် ကိုယ်စားပြုပြီး ဒီပွဲတော်ကြီး မှာ ဝင်ပြိုင်ပေးဖို့ မျှော်လင့်ပါတယ်..."

အကြီးအကဲလင်း က သူ၏ မုတ်ဆိတ်ဖြူ များကို ပွတ်သပ်ကာ ပြုံး၍ ပြောလိုက်သည်။

'သြော်... ဆုလာဘ် တွေ အများကြီး ရနိုင်တယ် ဟုတ်လား...'

ကျိုးဟန် က ချက်ချင်းပင် လေးနက်သော မျက်နှာထားဖြင့် "အကြီးအကဲ တို့ စိတ်ချပါ... ဓားနတ်ဘုရား ကျောင်းတော် ရဲ့ အဖွဲ့ဝင် တစ်ယောက် အနေနဲ့ ကျောင်းတော် နဲ့ အတူတူ ဒုက္ခ၊ သုခ တွေကို မျှဝေခံစားမှာပါ..." ဟု ပြောလိုက်သည်။

"ဘယ်တော့ စထွက်ရမှာလဲ ခင်ဗျ..."

"အရမ်း ကောင်းတယ်... မင်း ငါတို့ကို စိတ်ပျက်အောင် လုပ်မှာ မဟုတ်ဘူး ဆိုတာ ငါ သိပြီးသားပါ... ဒါပေမဲ့ ပြိုင်ပွဲ စဖို့ ၁ လ လောက် လိုသေးတယ်... အချိန် အများကြီး ရပါသေးတယ်..."

ထင်သည့်အတိုင်းပင် ကျိုးဟန် ၏ စကားကို ကြားပြီးနောက် အကြီးအကဲ များ၏ မျက်လုံးထဲတွင် ကျေနပ်မှုများ ထွက်ပေါ်လာသည်။ ယခုခေတ် လူငယ်များ ကြားတွင် ဤကဲ့သို့ လက်တွေ့ကျသော လူငယ်မျိုး တွေ့ရရန် ခဲယဉ်းလှသည်။

"၁ လ လောက် လိုသေးတယ် ဟုတ်လား... ဒါဆို အခုက ဘာလုပ်ရမှာလဲ ခင်ဗျ..."

ကျိုးဟန် ၏ မျက်နှာ မည်းမှောင်သွားသည်။ ၁ လ လောက် လိုသေးသည်ကို အခုကတည်းက ကြိုပြောနေသဖြင့် အလကား ပျော်သွားခဲ့ရသည်။

"ဒါက ဓားဧကရာဇ် ရဲ့ သမီး ဝမ်ယွိဟယ် ပါ... အရင်ကလည်း မင်းတို့ ရင်းနှီးပြီးသားပဲလေ..."

အကြီးအကဲလင်း က ဝမ်ယွိဟယ် ကို လက်ညှိုးထိုးပြကာ ဆက်ပြောသည်။ "သူမ ကလည်း နတ်ဘုရား စမ်းသပ်မှု ကို ဝင်ပြိုင်မှာ ဆိုတော့... နောက်ပိုင်း မင်းတို့ နှစ်ယောက် အတူတူ လေ့ကျင့်ဖို့ ငါ စီစဉ်ပေးမလို့..."

"မင်းတို့ လူငယ်တွေ ဆိုတော့... ဘုံစိတ်ဝင်စားမှု တွေလည်း တူမယ်... အတူတူ တိုးတက်အောင် ကြိုးစားကြပေါ့..."

ကျိုးဟန် အနည်းငယ် မလိုလား ဖြစ်သွားသည်။ ဒါက သူ့ကို ကောင်မလေး တစ်ယောက် ထိန်းခိုင်းနေခြင်း ပင်။

ရင်းနှီးသော ကောင်မလေး များကို ထိန်းပေးရန် ပြဿနာ မရှိသော်လည်း ဤကောင်မလေး နှင့်က သိပ်မရင်းနှီးပေ။

ထို့အပြင် သူမနှင့် ရန်ငြိုး အနည်းငယ် ရှိထားသဖြင့် ကျိုးဟန် က သူမကို မထိန်းပေးချင်ပေ။

"အကြီးအကဲ... သူမ က ကျွန်တော့်ရဲ့ တိုးတက်မှု အရှိန် ကို ထိခိုက်စေမှာ စိုးလို့ပါ ခင်ဗျ..."

ကျိုးဟန် ပြောချင်သည့် အဓိပ္ပာယ်မှာ တိုက်ပွဲတွင် သဘောထား ကွဲလွဲပြီး ပြဿနာ တက်မည်ကို စိုးရိမ်ကြောင်း ဖြစ်သည်။

မည်သို့ပင်ဖြစ်စေ ဤမိန်းမ ၏ ဒေါသက အလွန် ကြီးမားသဖြင့် ကျိုးဟန် က ဆက်လက် မပတ်သက်ချင်တော့ပေ။

"ဒါက..."

"စိတ်မပူပါနဲ့... အချိန်ကျရင် ဓားဧကရာဇ် က သူမ ကို ဧကရာဇ်အဆင့် လက်နက် တစ်ခု ပေးလိုက်မှာပါ... မင်းကို သေချာပေါက် နောက်ဆွဲ ဖြစ်စေမှာ မဟုတ်ပါဘူး..."

အကြီးအကဲလင်း က ရှင်းပြလိုက်သည်။ သူက ကျိုးဟန် ၏ အဓိပ္ပာယ်ကို လွဲမှားစွာ နားလည်သွားပြီး... ကျိုးဟန် က ဝမ်ယွိဟယ် ၏ စွမ်းအား အားနည်းမည်ကို စိုးရိမ်နေသည်ဟု ထင်သွားခဲ့သည်။

ပထမ ပါရမီရှင် တစ်ယောက် အနေဖြင့် ဤကဲ့သို့ မောက်မာမှု ရှိနေခြင်းက ပုံမှန် ပင် ဖြစ်သည်။

အကြီးအကဲလင်း ထပ်ပြောရန် ပြင်လိုက်ချိန်တွင် ဝမ်ယွိဟယ် ၏ ရှက်စိတ်နှင့် ဒေါသ ရောနှောနေသော အသံက ထွက်ပေါ်လာသည်။

"ကျိုးဟန်... နင်... နင် လူတွေကို အထင်မသေးနဲ့နော်..."

"မနေ့က နင် ငါ့ကို နိုင်သွားရုံနဲ့ အခုလို စော်ကားလို့ ရပြီလို့ မထင်နဲ့..."

ယခုအချိန်တွင် သူမ ဒေါသထွက်လွန်းသဖြင့် တစ်ကိုယ်လုံး တုန်ယင်နေသည်။ သူမ ဘဝတွင် ပထမဆုံးအကြိမ် ဤကဲ့သို့ အထင်သေးခံရခြင်း ပင်။

ထူးချွန်သော ပါရမီရှင် တစ်ယောက် အနေဖြင့် အသုံးမကျသူ တစ်ယောက် အဖြစ် သတ်မှတ်ခံရခြင်းကို မည်သို့ သည်းခံနိုင်မည်နည်း။

မူလက သူမ၏ မိခင် စီစဉ်မှု အပေါ် အနည်းငယ် မကျေမနပ် ဖြစ်နေပြီး ကျိုးဟန် နှင့် အတူတူ မလေ့ကျင့်ချင်ခဲ့သော်လည်း...

ယခုကဲ့သို့ ဖြစ်သွားပြီးနောက် ကျိုးဟန် နှင့် သေချာပေါက် အတူတူ လေ့ကျင့်ရမည် ဟု သူမ ဆုံးဖြတ်လိုက်သည်။

သူမ၏ အစစ်အမှန် စွမ်းအားကို ထုတ်ပြပြီး ကျိုးဟန် ၏ လှောင်ပြောင်မှု များကို ပြန်လည် တုံ့ပြန်ရမည် ဖြစ်သည်။

'ငါ တကယ်ကို မင်းကို အထင်မသေးပါဘူး...'

ကျိုးဟန် က စိတ်ထဲတွင် ကျိတ်၍ ပြောလိုက်သည်။

သူ့စကားက အဓိပ္ပာယ် ကောက်လွဲစရာ ဖြစ်သွားပြီး လူတွေကို အထင်လွဲသွားစေခဲ့သည်။ စကားပြောဆိုမှု အနုပညာ ကို ဆက်လက် လေ့ကျင့်ရန် လိုအပ်နေသေးကြောင်း သူ သဘောပေါက်လိုက်သည်။

သို့သော် အခြေအနေက ဤသို့ ဖြစ်သွားပြီ ဖြစ်ရာ ကျိုးဟန် ကလည်း ထပ်မံ ရှင်းပြမနေတော့ဘဲ... တိုက်ရိုက် ငြင်းပယ်လိုက်ရန်သာ ဆုံးဖြတ်လိုက်သည်။

ကျိုးဟန် ငြင်းပယ်ရန် ပြင်လိုက်ချိန်မှာပင် စနစ်၏ သတိပေးချက် ထွက်ပေါ်လာသည်။

"စနစ် သတိပေးချက် - သင်သည် ကျောင်းတော် တာဝန် သစ် တစ်ခု ရရှိပါသည်... အလှလေး နှင့် စမ်းသပ်မှု ... လက်ခံမည်လား..."

"လက်ခံမယ်..."

ကျိုးဟန် က အကျင့်ပါနေသဖြင့် တိုက်ရိုက် လက်ခံလိုက်သည်။

လက်ခံပြီးနောက်မှသာ ကျိုးဟန် သတိဝင်လာသည်။

ယခု ပေါ်လာသည်မှာ ကျောင်းတော် တာဝန် ဖြစ်ပြီး...

သာမန် တာဝန် များနှင့် မည်သို့ ကွာခြားသနည်း ဆိုသည်ကို သူ သေချာ မသိသေးပေ။

မကြာမီ တာဝန် ၏ ဖော်ပြချက်က ဖန်သားပြင် ပေါ်တွင် ထွက်ပေါ်လာသည်။

အလှလေး နှင့် စမ်းသပ်မှု

ဖော်ပြချက် - ဝမ်ယွိဟယ် နှင့် အတူတူ တိုက်ပွဲဝင်ပြီး လိုအပ်သော ပစ္စည်းများကို စုဆောင်းပါ

တိုးတက်မှု - မွှေးကြိုင် မြက်ပင် (၀/၁၀၀)... သွေးစွမ်းအင် ကျောက်တုံး (၀/၅၀)... မီးတောက် နတ်ဆိုး နှလုံးသား (၀/၁)

နေရာ - မီးဝိညာဉ် ကျွန်းစု (သြဒိနိတ် XXX)

အချိန်ကန့်သတ်ချက် - ၃ ရက်

ဆုလာဘ် - ဝိညာဉ်ကျောက်တုံး၊ အတွေ့အကြုံ၊ ကျောင်းတော် ကူညီထောက်ပံ့မှု အမှတ် ၁၀၀

တာဝန် ဆုလာဘ် တွင် ဝိညာဉ်ကျောက်တုံး များနှင့် အတွေ့အကြုံများ ပါဝင်သည်ကို မြင်လိုက်ရသည်။

ထို့အပြင် ကျောင်းတော် ကူညီထောက်ပံ့မှု အမှတ် လည်း ပါဝင်နေသည်။ ၎င်းက မည်သည့် နေရာတွင် အသုံးပြုရမည်ကို သူ မသိသော်လည်း...

အကြီးအကဲလင်း ကို မေးကြည့်ရန် ဆုံးဖြတ်လိုက်သည်။

"ဆုလာဘ် တွေက မဆိုးဘူးပဲ... ငါ လက်ခံလိုက်ပြီ..."

ထိုသို့ဆိုလျှင် သူမကို သနားသော အားဖြင့် ခေါ်သွားပေးလိုက်မည်။

ငါ ကျိုးဟန် က တကယ်ကို သဘောကောင်းလွန်းတယ်။

"အဟမ်း... အကြီးအကဲ က ဒီလို ပြောမှတော့ ကျွန်တော်လည်း သေချာပေါက် မျက်နှာသာ ပေးရမှာပေါ့..."

"သူမ ကလည်း ဓားနတ်ဘုရား ကျောင်းတော် ရဲ့ အဖွဲ့ဝင် တစ်ယောက်ပဲလေ... ပထမ ပါရမီရှင် တစ်ယောက် အနေနဲ့ ကျွန်တော့်မှာလည်း သူမကို ကူညီဖို့ တာဝန် ရှိပါတယ်... ဓားနတ်ဘုရား ကျောင်းတော် အတွက် အကျိုးပြုဖို့ ဆိုတာ ကျွန်တော်တို့ မျိုးဆက် ရဲ့ တာဝန်ပဲ မဟုတ်လား..."

ကျိုးဟန် က တည်ကြည်သော မျက်နှာထားဖြင့် ပြုံးကာ ပြောလိုက်သည်။

"ဟွန့်..."

ကျိုးဟန် ၏ မောက်မာသော မျက်နှာကို မြင်လိုက်ရသဖြင့် ဝမ်ယွိဟယ် ၏ ရင်ထဲတွင် ဒေါသများ ထွက်ပေါ်လာပြီး အေးစက်စွာ နှာခေါင်းရှုံ့လိုက်သည်။

သူမကို အလိုမရှိဘဲ သူ့ကို အတင်း တောင်းပန်နေရသကဲ့သို့ ခံစားလိုက်ရသည်။

"ကောင်းပြီ... ဒါဆိုလည်း အရမ်း ကောင်းတာပေါ့..."

အကြီးအကဲလင်း လည်း ကျေနပ်စွာ ခေါင်းညိတ်လိုက်သည်။ အကယ်၍ ကျိုးဟန် က သဘောမတူပါက သူလည်း အတင်းအဓမ္မ လုပ်ခိုင်းမည် မဟုတ်ပေ။

ထို့နောက် သူက ဆက်ပြောသည်။

"မင်း စိတ်ချပါ... ဓားနတ်ဘုရား ကျောင်းတော် မှာ တိကျတဲ့ စည်းကမ်း တွေ ရှိပါတယ်... ဆုပေး ဒဏ်ပေး တိကျတယ်... မင်းကို အလကား အလုပ် လုပ်ခိုင်းမှာ မဟုတ်ပါဘူး..."

"အို... အသေးစိတ် က ဘယ်လိုမျိုးလဲ ခင်ဗျ..."

ကျိုးဟန် လည်း ချက်ချင်း စိတ်ဝင်စားသွားပြီး အလျင်အမြန် မေးလိုက်သည်။

"ဒီ ဓားသမား တံဆိပ်ပြား ကို မြင်လား..."

အကြီးအကဲလင်း က သူ၏ အာကာသ လက်စွပ် ထဲမှ တံဆိပ်ပြား တစ်ခုကို ထုတ်ယူကာ ကျိုးဟန် ထံသို့ ကမ်းပေးလိုက်သည်။

တံဆိပ်ပြား က ပွင့်လင်းမြင်သာသော အရောင် ရှိပြီး အလယ်တွင် ဓားငယ်လေး တစ်လက်ကို ပီပြင်စွာ ထွင်းထုထားသည်။

၎င်းပေါ်တွင် ဓားချီများ လှည့်ပတ်နေသော်လည်း အလွန် မှိန်ဖျော့လှသည်။

"ဓားနတ်ဘုရား ကျောင်းတော် ကို ဝင်ရောက်လာသူ တိုင်းမှာ ကိုယ်ပိုင် သီးသန့် တံဆိပ်ပြား တွေ ရှိကြတယ်..."

ကျိုးဟန် က တံဆိပ်ပြားကို လှမ်းယူလိုက်သည်ကို မြင်ပြီးနောက် အကြီးအကဲလင်း က ဆက်လက် ရှင်းပြသည်။

"တံဆိပ်ပြား ကို အောင်မြင်စွာ အသက်သွင်း ပြီးတာနဲ့ မင်းရဲ့ လက်ရှိ အဆင့်နဲ့ ကိုက်ညီတဲ့ တာဝန် စာရင်း တွေ အားလုံးကို မင်း တွေ့ရလိမ့်မယ်..."

"လက်ခံထားတဲ့ တာဝန် တွေကို သတ်မှတ်ထားတဲ့ အချိန် အတွင်း ပြီးမြောက်အောင် လုပ်နိုင်ရင်... ကူညီထောက်ပံ့မှု အမှတ် တွေ ရရှိလိမ့်မယ်..."

"ကူညီထောက်ပံ့မှု အမှတ် တွေ နဲ့ ကျောင်းတော် ဈေးဆိုင် ထဲမှာ ပစ္စည်း မျိုးစုံကို လဲလှယ်လို့ ရတယ်..."

"အဆင့် သတ်မှတ်ချက် လည်း ရှိသေးတာလား ခင်ဗျ..."

ကျိုးဟန် က ထိုစကားလုံးကို ချက်ချင်း သတိထားမိလိုက်သည်။

"သေချာပေါက် သတ်မှတ်ထားရမှာပေါ့... ဓားနတ်ဘုရား ကျောင်းတော် ကို ဝင်လာခါစ ဓားကျင့်ကြံသူ တစ်ယောက် ကို ချက်ချင်းကြီး သစ္စာရှိဖို့ မျှော်လင့်လို့ မရဘူးလေ..."

"အကယ်၍ အဲဒီအထဲမှာ တခြား အဖွဲ့အစည်း တွေက သူလျှိုတွေ ဒါမှမဟုတ် တစ္ဆေ ဓားသမား လို သစ္စာဖောက် တွေ ပါလာရင် ဓားနတ်ဘုရား ကျောင်းတော် က အရမ်း နစ်နာသွားမှာပေါ့..."

အခြား အကြီးအကဲ တစ်ဦး လျှောက်လာပြီး ပြုံးကာ ရှင်းပြလိုက်သည်။

သူက အတွင်းပိုင်း စည်းကမ်း ထိန်းသိမ်းရေး ကို တာဝန်ယူရသော အကြီးအကဲယဲ့ ပင် ဖြစ်သည်။

"အင်း... ဟုတ်တာပဲ... ကျွန်တော် သေချာ မစဉ်းစားမိဘူး... ကျွန်တော်က စီမံခန့်ခွဲတဲ့ နေရာမှာ တကယ် မတော်ဘူးပဲ..."

"ဒါကြောင့် ငါတို့က ဒီလို စံနှုန်း တွေကို သတ်မှတ်ထားတာ... ရရှိလာတဲ့ စုစုပေါင်း ကူညီထောက်ပံ့မှု အမှတ် တွေ ပေါ် မူတည်ပြီး တံဆိပ်ပြား ရဲ့ အဆင့်ကို သတ်မှတ်တယ်..."

"အဆင့် မြင့်လေလေ အခွင့်အရေး ပိုများလေလေ ပဲ... အခု မင်းရဲ့ တံဆိပ်ပြား ကို အသက်သွင်းလို့ ရပြီ..."

နားထောင်ပြီးနောက် ဤနည်းလမ်းက တကယ်ကို ကောင်းမွန်ကြောင်း ကျိုးဟန် ခံစားလိုက်ရသည်။

သူလျှိုများကို လုံးဝ ဖယ်ရှားပစ်နိုင်မည် မဟုတ်သော်လည်း... မကောင်းသော ရည်ရွယ်ချက် ရှိသူ ၉၀ ရာခိုင်နှုန်း ခန့်ကိုတော့ သေချာပေါက် ဖယ်ရှားနိုင်မည် ဖြစ်သည်။

အကြီးအကဲလင်း က အကြမ်းဖျင်း ရှင်းပြသွားခြင်းသာ ဖြစ်ပြီး...

အခြား အသေးစိတ် အချက်အလက်များစွာ ရှိသေးသဖြင့် တစ်ခါတည်း ရှင်းပြ၍ မပြီးနိုင်ပေ။

ထို့ကြောင့် သူက ကျိုးဟန် ကို တံဆိပ်ပြား အရင် အသက်သွင်းရန်နှင့်... ထို့နောက် ကိုယ်တိုင် လေ့လာ ကြည့်ရှုရန် အကြံပြုလိုက်သည်။

ထိုသို့ဆိုလျှင် နားမလည်သည်များ ရှိပါက သူ့ကို ပြန်လည် မေးမြန်းရန် ပိုမို အဆင်ပြေမည် ဖြစ်သည်။

အကြီးအကဲလင်း ၏ ရှင်းပြချက် အရ...

သိမြင်ခြင်း ခန်းမ တွင် ရရှိခဲ့သော သိုင်းကျမ်းများကို အသုံးပြုမှသာ အောင်မြင်စွာ အသက်သွင်းနိုင်မည် ဖြစ်သည်။

တံဆိပ်ပြား အတွင်းတွင် အလိုအလျောက် ခွဲခြား သိမြင်နိုင်သော စနစ် ပါရှိပြီး...

အကယ်၍ အခြား ဓာတ် ရှိသော ဓားချီ များကို ထည့်သွင်းလိုက်ပါက တံဆိပ်ပြား က အလိုအလျောက် ပျက်စီးသွားမည် ဖြစ်သည်။

ဤနည်းဖြင့် အခြား အဖွဲ့အစည်း များမှ သူများ ရောနှော ဝင်ရောက်လာခြင်းကို တားဆီးနိုင်မည် ဖြစ်သည်။

ကျိုးဟန် ၏ မျက်လုံးများ ကျုံ့ဝင်သွားပြီး တံဆိပ်ပြား ထဲသို့ ဓားချီ တစ်ခုကို ထည့်သွင်းလိုက်သည်။

မကြာမီ တံဆိပ်ပြား မှ မှိန်ဖျော့ဖျော့ အလင်းရောင်များ ထွက်ပေါ်လာပြီး ကျိုးဟန် နှင့် ထူးဆန်းသော ဆက်သွယ်မှု တစ်ခု ချက်ချင်း ဖြစ်ပေါ်လာသည်။

"စနစ် သတိပေးချက် - ဓားသမား တံဆိပ်ပြား ကို အသက်သွင်း ပြီးပါပြီ... စစ်ဆေးမည်လား..."

စနစ်၏ သတိပေးချက်နှင့်အတူ တံဆိပ်ပြား က ကျိုးဟန် နှင့် လုံးဝ ချိတ်ဆက်သွားပြီ ဖြစ်သည်။

"စစ်ဆေးမယ်..."